ع العربية

[elbana]

لله في خلقه شؤون ، ومن بين هؤلاء الباعة الجائلون

الذين هم في في أنحاء مصر المحروسة منتشرون

يعلنون عن أنفسهم وعن بضاعتهم بشتى صنوف النداء والغناء والفنون

تعالوا نسترجع أصناف البياعين اللي كانوا ، ويمكن لازالوا ، بيعدوا في شوارعنا ، وبيقعدوا قدام مدارسنا يبيعوا سندوتشات أو حرنكش ، أو دوم أو دندرمة أو بليلة .... إلخ ، وكل واحد فيهم كانت ليه طريقة في عرض سعلته وطريقة في النداء عليها ، وطريقة في عمايلها علشان تكون أحلى وأطعم من حاجة غيره .

حد منكم فاكر الناس دول ، بتاع الخضار ، عربية الجاز (أيام البوابير) ، بتاع الفول المدمس ، اللي بيسن السكاكين ، بتاع التين الشوكي ، الدرة المشوي .

كل هؤلاء شكلوا جانباً من حياتنا اليومية دون أن نلتفت إلى ذلك ، تعالوا نفتكرهم مع بعض .

[ســيد مرزوق]

ياعم البنا ...

إحنا في ايه وللا في إيه؟؟؟؟

مش قادر أركز في حاجة ... الأوضاع عندنا منيلة بستين نيلة ومنتظرين الدنيا تتطربق والضرب يشتغل ..... وربنا يستر ....إدعوا لنا يا جماعة

كان نفسي أشارك في التوبيك الظريف ده بس ماباليد حيلة

عايز أروح بلدي مش عارف

لا فيه حجز طيران ولا أي وسيلة ممكنة

ربنا يستر

[Sherief AbdelWahab]

أصل يا عزيزي البنا نوعية ما يبيعه الجائلون اختلفت هي الأخرى!...

عندنا في الأقاليم...تخيل أن الصحف تباع على السيارة...صحف الحوادث طبعا...يأتي مذيع أخنف-غالبا رئيس التحرير-ويقول في الميكروفون:

إقرأ حوادث الدقهلية...إقرأ قصة العائلة التي لبسها العفاريت..إقرأ حوادث الدقهلية...إقرأ فلانة و علان و ثالثهما الشيطان...إقرأ حوادث الدقهلية!

كله الآن في كوكب الأقاليم يباع ع العربية...بميكروفون قديم صدئ...لكنه خلق تراثا جديدا ميكروفونيا...من باعة جرائد الحوادث ...إلى سيارات الوفيات بمعلنيها المصابون بالخنف...الذين ضل بعضهم الطريق...ودخلوا ماسبيرو!

خلص الكلام

[ابو يوسف]

حد منكم فاكر الناس دول ، بتاع الخضار ، عربية الجاز (أيام البوابير) ، بتاع الفول المدمس ، اللي بيسن السكاكين ، بتاع التين الشوكي ،  الدرة المشوي .

كل هؤلاء شكلوا جانباً من حياتنا اليومية دون أن نلتفت إلى ذلك ، تعالوا نفتكرهم مع بعض .

نفتكرهم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!

يا عم دول لسة ما انقرضوش و موجودين فى كل حتة ...

قلت لى انت منين ؟؟؟؟؟ :D

[Cleo]

- أصلح بوااااااااااااابير جااااااااااااااااااز حاناااااااااافيييااااااااااااااات (السباك)

- أبو حلاااااااااااااوة ياااا تيييييييييييييين (بياع التين الشوكى)

- تان تتان تتان تان تان... جااااااااااااااااااززززز

- أخبااااااااااار أخباااااااااااااااااااار (بياع الجرانين)

- بيييييكييييييييييياااااااااااا (بياع الروبابيكيا)

- مجنووووووووووونة يااا قووووووووطة (بياع الطماطم)

- الورورررررررررررر (بياع الفجل)

- فووووووووونص يا ماااااااانجاااااااااااااا.......

:D :D :D :D :D

[crossfield]

رومى يا برنجاااااان

زى الرمان يا أوووووووووطة

حمار وحلاوة يا بطييييخ

ع السكين و اقطع(بتاع البطيخ برضو)

أيوة يا شيليااااان

البلدى يوووووووووكااااااااال(بتاع الفول)

بيكيا(اختصار روبابكيا)

[ســيد مرزوق]

الأخت كروسفيلد المحترمة

إنتي من المنصورة؟؟؟؟؟؟

[crossfield]

الأخت كروسفيلد    المحترمة

إنتي من المنصورة؟؟؟؟؟؟

:) :cry: :lol: :lol: :

لأ يا أخ سيد. لكن ليه؟همه بتوع المنصورة بيقولوا كده برضو؟

[أسد]

اوووووووووووووووووووء

اووووووووووووء

في الآخر اتضح انه كان بيقصد يقول

فووووووووووووووووووووووول

طبعاً عربية الفول المدمس الصبح بدري

[عادل أبوزيد]

موضوع جديد و ربما جاء فى توقيته حتى لا تنفجر رؤوسنا من التفكير و التوتر فى دوائر متداخلة و لا متناهية.

سأقول لكم ندا أشك أن أيا منكم يتذكره (مسألة سن )

شكوكو بإزازة ... سميحة بإزازة

حيث كان الرجل و الذى كان يدفع امامه عربة يد مزدانة بتماثيل من الجبس للمنولوجست الأشهر فى مصر - وقتها - محمود شكوكو و كان يبيع تلك التماثيل او بمعنى اصح يقايض عليه بزجاجة فارغة !!! ( هل كان ذلك لزوم ال recycle ؟ أو إعادة الإستعمال ؟) ... أما سميحة فكانت أيضا تمثال من الجبس لفتاه او سيدة و لم أعرف ان كانت تمثل شخصية حقيقية أم لا .

و على ذكر هذا الموضوع أنهم فى انجلترا قاموا بتخليد هذه النداءات و الباعة الجوالين بطريقة ظريفة

يباع هناك تماثيل صغيرة من الرصاص يطلق عليها Londond's cries و كل من تلك التماثيل يمثل أحد هؤلاء الباعة الجائلين.

فى أوبريت الليلة الكبيرة يوجد ثروة من تلك النداءات

"السمك المقلى كل و برقلى "

و أذكر من أيام الطفولة هذا الصوت الذى كنت أسمعه ربما قبل السادسة صباحا "أبياااض يا نابيييت" و المقصود به الفول النابت

[elbana]

أخي سيد ، أرجة تكون لقيت حجز وعرفت ترجه بألف سلامة .

أخي شريف ، عسل قوي حكاية المنادي الأخنف اللي ممكن يكون رئيس التحرير ي ، وأول مرة أعرف إن الصحف بقوا ينادوا عليها كده .

أبو يوسف ، أنا م البلد دي والله ، بس شايف إن فيه بياعين انقرضوا شوية وبضاعة معينة انقرضت برضه .

كليو وكروسفيلد واضح إنكم راميين ودنكم تمام :lol: :D :lol: ، ده انتوا حافطين النداءات بالظبط

SYD عسل وربنا ، أنا فععلاً كنت أوقات أسمع نداء ما أفهمش منه حاجة لحد ما أشوف إيه البضاعة علشان أقدر أفهم ، يعني مثلاً مرة واحد كان بيعدي كل يوم الصبح ويقول :

آآآآآآآ إإإإإإإي

وفي يوم انتظرته ولقيت معاه برسيم :lol: :lol: :lol:

أخي عادل أبوزيد ، أيوه هو ده بالظبط ، الرد العواجيزي اللذيذ ، أنا كمان فاكر شكوكو بقزازة ، وكان فعلاً يأخذ الظجاجات الفارغة ويديك تمثال من الجبس لشكوكو ، وعلى فكرة هو كان بغرض إعادة التصنيع ، يعني يسيحوا الزجاج ويعيدوا تشكيله في الورش البلدي ومصانع القزاز .

أعذروني يا جماعة أنا بأفتح الوضوع ده علشان أخرج بنفسي وبيكم من الحالة اللي كلنا فيها ، اللي بيحصل وقعه صعب .

عموماً أنا فاكر أيام المدرسة كان فيه بياعين دوم بيقعدوا قدام المدرسة ، وكنا نشتري الدوم ونقعد ننحت فيه لحد ما أسناننا تقع ، وبعدين ناخد قلب الدومة بعد ما نأكلها ونحولها إلى كرة قدم نفضل نلعب بيها في الفسحة لحد ما جزمنا تتبهدل .

وفاكر بياع كشري كان يحط الكشري في سندوتشات ، والغريبة إن طعمه كان جميل .

أما النداءات الظريفة ، فكان فيه واحد بيبيع ملح في أحد أسواق مدينة المحلة الكبرى واقف ينادي بصوت عالي جداً ويقول :

إوعي تنسي الملح يا بت ... :lol: :lol: :lol:

ولو بصيتوا للنداء ح تلاقوه ذكي جداً ، لأن الست دايماً تنزل السوق تشتري كل حاجة وتنسى الملح .

وواجد تاني كان يعدي بمقشات ويقول :

معايا المقشات العيـ

مولة

(قصده العمولة) بس مش عارف ليه كان بيسكت حوالي أربع ساعات على ما يكمل الكلمة ، أظن نوع من الساسبينس (التشويق يعني) .

أما أشهر منادي في مصر فهو المسحراتي ، وده ما كانش بيبيع سلعة ، لكنه كان بيقدم خدمة جميلة وبيخلق نوع من الونس في شوارعنا ، وكان دايماً يعدي في آخر يومين من رمضان ويغير نداؤه إلى :

الوداع يا شهر الصيام

وكان نداء مؤثر جداً

[freefreer]

بييييييكييييييييييييييييييييا

من داااااااة بكرة .. بقرشييييييييييييين ..

مجنوووووووووووونة يا طماااااااااااطم

أهراااااااام أخبااااااااار جمهووووورييييييييييييية .. اقرا اخر ساعة

المصور ..

[elbana]

تعرف ليه يا فري كانوا بيقولوا مجنونة على الطماطم ، علشان التغير السريع جداً في سعرها ، تلاقيها في أول الموسم غالية جداً ، وبعدين هب تنزل أسعاررها وترطرط في ظرف أسبوع واحد .

أنا فاكر كان فيه بياعين في القطارات ، ودول بقى كانوا موال لوحده ، كانوا ملك منظمه سيده بصحيح ، يعني بياعين الشارع كلهم كوم ، وبتوع القطارات كوم ، أصل أخوكم كييف ركوب قطارات ، لدرجة إني لما بانزل مصر أجازات مش بأرضى أسافر من القاهرة لأسوان والعكس بالطائرة ، وبأسافر بالقطار ، المهم البياعين اللي بنقول عليهم بيكونوا في قطارات الدرجة الثالثة ، فتلاقي بتاع السميط والجبنة والبيض ، له نداء ، وبتاع الحاجة الساقعة ، يعني مثلاً في الصعيد بتاع الحاجة الساقعة يقول :

عِسّ الجزازة واشرب .

وكلمة (عس) بكسر العين وتشديد السين ، تعني في لهجة أهل الصعيد (إلمس) يعني الراجل عايز يقول شوف بنفسك إذا كانت القزازة ساقعة ولا لأ وبعدين إشرب .

واحد تاني (في الصعيد برضه) كان بيبيع تسالي ولب كان يقول :

حد عايز يتسلى جبل ما اندلّى .

يعني حد عايز يتسلى قبل ما أنزل من القطر .