أحترس قد يكون المدرس سبب مدمر لأبنك

[Simba]

كان يا ما كان كان زمان وانا عندي 10 سنين وشوية شهور وفي حصة الألعاب جاب مدرس الالعاب طاولة صغيرة ووراها مرتبة وطلب من الصف كله انه يقفز من فوق الطاولة كنا حوالي 30 ولد وبنت وبدات ا لاولاد بس في القفز من فوق الطاولة وكان فيه منهم اللي ماهر شوية وبيحاول يعمر حركة بسيطة وهو بيقفز بس انا بقي كنت خايف وكنت مخلي نفسي اخر واحد لحد ما الدور جه علي مش عارف ساعتها كانت فيه حاجة جوايا بتقولي انك مش هتقدر مع ان الطاولة كانت مناسبة لعمرنا وكمان وراها مرتبة المهم كان كل اللي يقفز يطلب مننا كلنا نصفق له ولما جه الدور علي روحت لحد الطاولة وتنحت مدرس الالعاب طلب منهم يضحكوا علية ( ده بقي تضحكوا عليه )

ومن يومهم كرهت مدرس الالعاب والمدرسة والفصل وجه في بالي الليلة الموقف ده وسالت نفسي هو كان يقدر يتصرف غير كده لو كان صحيح مدرس المفروض كان يعلمني اواجه خوفي ويشجعني يحاول علي الاقل يديني الثقة بنفسي او لو مش هيقدر كان يعدي الموقف وخلاص

عموما انا كتبت الموضوع ده علشان اقول لكل الناس تتابع تعامل المدرسين مع اولادها ممكن كلمة ترفع للسما وممكن كلمة تدمر

تم تعديل 22 مارس 2008 بواسطة سمبا

[se_ Elsyed]

أنت أثرت نقطه هامه جداً يا سمبا وهي تتعلق بطُرق تدريس الصغار

إنت عارف لو الموقف ده حصل في مرحلة الثاوني أو الجامعة .. ولا كان هايأثر لإن الواحد في الفترة دي بتبقى جتته منحسه وممكن هو اللي يعلم المدرسين angl:: ..

- أما في مرحة الإبتدائي فهي بتكون أخطر مراحل تكوين الشخصية للإنسان ...

وخلي بالك طلبة كثير جداً وأنا منهم ممكن يكره مادة علمية ويفضل متعقد منها طول حياته عشان لم تُدرس له بالطريقة الصحيحة في إبتدائي وإعدادي ..

تخيل إنه كرهت الرياضيات والعلوم عشان فترة الإعدادي

تخيل إنك تكون مقتنع بُمدرسة - واحده ست - بتدرس لك مادة العلوم في الإعدادي وتيجي في كذا حصة ورا بعض تختفي ونسأل هو حصل إيه ؟ : يجيلك الرد يقولك أصل الدروس الجايه دي يا ولاد هاتدرسوا فيها الجهاز التناسلي للجنسين الذكر والأنثى وعيب مُدرسة ست تدرس لكم ده وبالتالي جابوا لنا راجل وسيد الرجالة يدرس المادة والعلم لا يُكيل إلا بالبتنجان !!!!!!!!!!!!!!!!

تخيل يا عزيزي إن في مصر ولفترة كبيرة جداً كان الفشلة واللي جايبين ملاحق والعيال الصيع ومنهم ناس كنت اعرفهم تمام المعرفة صياعة مُبكرة وأخلاق زي الزفت ( بنات وصبيان ) .. وكل دول بيتخرجوا من إعدادي بالعافية فكانوا بيدخلوا مدرسة إسمها " المُعلمين " ويهبد أربع سنين وبعدين ياخد دبلوم مُعلمين قد الدُنيا ويطلع مُدرس إبتدائي ؟!!!!!!!!!!!!!!!

الحمد لله إن النظام ده إتلغى دلوقت

لكن بعد ما أجيال كاملة تم تدميرها لإن فاقد الشيء لا يُعطيه وإزاي تخرج مثل هؤلاء الحثالة عشان يشاركوا في تكوين طفل عبارة عن قطعة عجينة تُشكلها كما تريد ؟ .

طبعاً لو إتكلمت عن ضرورة إجراء إختبارات نفسية للمدرسين وخصوصاً للمرحلة الإبتدائية والإعدادية هايحطوني انا في مستشفى المجانين ..

تخيل مدارس كتيرة بتسمح بإستخدام القسوة المفرطة في هاتين المرحليتن لدرجة تخلي العيل يتعقد من أم المدارس واللي بيروحوها ؟

تخيل لما يبقى عندنا في إعدادي جيش من مدرسي الانشطة الرياضية - الألعاب او على رأي عُمر PE ( قعدت شهر أدور على معنها لحد ما عرفت إنها التربية البدنية ) - المدرسين البيئة قصدي البي إي اللي كانوا عندنا كانت كل شغلانتهم إنهم ماسكين شوم - آه وكتاب الله شوم جمع شومه .. بتاعت الصعايدة دي - عشان يظبط بها النظام في المدرسة وما فيش مانع يلوش في الطلبة ذوي الأجسام الضعيفة ... ومدريسن البيئة دول بيستخدموهم في الحصص اللي مدرسينها غايبين عشان بس يسد خانة ... وو كتاب الله أنا ما فاكر إننا أخدنا حصة واحده ألعاب او تمارين رياضية أو حتى يا راجل تربية موسيقية مع إن كان عندنا آلات موسيقية في المخزن وعليها تراب زي الجبل كل الأجهزة دي كانت كافية إنها تعمل دار اوبرا تانية ... تخيل كان عندنا بيانو زي بتاع عُمر خيرت كده ؟ آه والله

وأنا اتحدث هنا بشكل عام عن المدراس الحكومية ... يعني لا إجتماع مجلس أباء ولا حد عارف إيه اللي بيجرى في المدرسة .. والمُدرس نفسه يشعر بإن مافيش سُلطة أعلى منه لإنه موظف حكومة وماحدش يقدر يرفده او يجازيه وبالتالي فالأطفال الصغار شيء مباح بالنسبة له يدرس بقى ما يدرسش يضربهم يعجنهم يعقد اللي جابوهم نفسياً مش فارقه وكله حلالاً بلالاً له ولأمثاله ..

[Sherief AbdelWahab]

وأضيف:

عايز تدخل شغلانة افهم نظامها وطبقه..

المدرس هو جزء من نظام له دعامة وسياسة يجب إنه يطبقها .. ومن أساسيات هذه السياسة الغير مكتوبة هو التعامل "الآدمي" مع الطلبة خصوصاً في السن الصغير قوي..

لكن المدرس اللي ابتدى يدي دروس خصوصية من أولها اتعود على إنه يشتغل برة المنظومة ، بطريقته الخاصة ، وبنظامه الخاص..

والمؤسف في التخريب اللي بيتم بيد "الجمل" اللي باعتبره هو و"عائشة عبد الهادي" أسوأ وزراء الحكومة الحالية هو إنه بيحاول يدي حرية حركة أكبر بشكل رسمي للمدرس وللمدرسة .. كل واحد بقى يشتغل من دماغه وفيه سياسة مكتوبة تتحط على الرف للزينة ومالهاش أدنى لازمة!

اللي بيشتغل برة المنظومة بيبقى عايز ثواب ومش عايز عقاب ، حقوق ومش واجبات ، سلطات ومش مسئوليات.. وحيطلعوا الجيل اللي جاي كله كدة .. إذا كان رب البيت بالدف ضارباً .. فإن كل أهل البيت فيفي عبده!

خلص الكلام