الأطفال الحلوين هما اللي مش بيشربوا اللبن

[se_ Elsyed]

ليه ؟

قولتوا لي ليه ؟

لإن من إسبوعين صحيت على خبر الصبح بيقول إن وزارة الصحة أصدرت قرار بغلق مصنع مصر للألبان - غلق نهائي بالضبة والفمتاح - وعدم السماح له بإنتاج الحليب ومشتقاته لإنه غير مطابق للمواصفات وذلك بعد كبسه على مصانعهم - اعتقد إن مكانه في منطقة الأميرية وإنت رايح على كوبري القبة كده - وكانوا واخدين عينات وحللوها وطلعت فشنك وشكله ما طلعش حليب أساساً .. ممكن يكون سيراميك زي الحاجات اللي بتتعمل تحت بير السلم ... ( بالمناسبة أصدروا القرار وما بعثهوش للمصنع ... تخيوا ؟ )

النهاردة صحيت برضوا - شكلي مش هانام تاني لإن كل ما بأصحى بأكتشف حاجات غريبة ...

لقيت خبر عن الرايب ومربرب .. مربرب .. على المعدة يرطب ... يرطب

يا جُهينة يا رايب

واللي مدرمغين الدنيا إعلانات

شوفوا معايا كده على ما أروح أولع في الحيب اللي عندنا في التلاجة

جريدة المسا

متابعة إخبارية..

حصر كميات "ألبان جهينة" في مدارس البحيرة

البحيرة - كارم قنطوش:

قرر اللواء محمد شعراوي محافظ البحيرة سحب جميع الكميات الموردة لأغذية المدارس بالبحيرة من شركة "جهينة للصناعات الغذائية" من منتج لبن "ماكس 200 ملي" والتحفظ عليها بعدما كشفت تحاليل المعامل المركزية بوزارة الصحة من خلال سبع عينات تم سحبها من مخازن الشركة بدمنهور أنها غير صالحة للاستخدام الآدمي وتصيب الإنسان بالتهاب بالأغشية وإسهال وفشل كلوي.

كان مسئولو التعليم بالبحيرة قد عقدوا اجتماعا طارئا عقب نشر "المساء" لواقعة عدم صلاحية ألبان الأغذية. وتم استدعاء مديري المدارس ومطالبتهم بحصر الكميات الموجودة بكل مدرسة والتحفظ عليها.

الطريف أن كل مدرسة تسلمت شهادة من وزارة التعليم تفيد أن المنتج صالح للاستخدام الآدمي.. وقد قامت الشركة بتوريد هذا المنتج للمدارس من خلال التعاقد مع الوزارة.

لكي الله يا مصر ويا طلبة مصر

فبعد هوجة البسكوت المسمم بتاع السنين اللي فاتت ومن بعده الجبنة النستو بتاعت المدارس طلع لنا الحليب

تصدقوا بالله

أنا عشان ما اكتبش أي كلام في المحشي وخلاص ... صممت إني اطلب من اخويا يشوف أي عيل من اللي بيستلمو بسكوت كوجبة غذاية مجانية في المدرسة ويشيلها لي لما أنزل أجازة عشان اشوفها ...

وأنا غلطت فعلاً غني ما صورتش لكم العبوة شكلها عامل إزاي ..

وكتاب الله المجيد .. لا مؤخذه عبوة تقرف الكلب الجربان وتُثير الغثيان وكإنهم بيعبوا البسكوت ده لمواشي ...

دي العبوة أو السلوفان اللي متكلفت فيه البسكوت

أما بقى المحتوى فحاجه كده بين العيش البتاو الصعيدي وبين العيش المحمص اللي مش باين له مِله

وبعدين لما مئات الأطفال إتسمموا .. يطلع السيد مسئول وزارة الصحة يقولك : إن إحنا حبينا نوجب مع العيال ونسبة الحديد واليود طلعت عالية في البسكوت وعشان كده إتسمموا .....

إلهي وإنت جاي يسمم بدنك يا بعيد ويكون يوم حد والاجزخانات قافلة وما نلقيش لك حقنة بنسلين نحقنك بها ..

طب حد يسألني ويقولي لي : هو ايه اللي بيحصل ده يا كابتن سين سين ؟

أقول له إن إنت بتتكلم في سبوبة بالملايين يا معلم

فعندك ألاف المدارس المختلفة مترامية الأطراف في كل المحروسة

وبالتالي التاجر أو المصنع من دول اللي هاترسي عليه سبوبة توريد المواد الغذائية للمدراس .. يبقى خلاص عدا ومش محتاج يبيع قطاعي او للمحلات ....

وبعدين لإنه مأكل الكبار ... ومظبط الصغار

فبيضطر يعوض ده عن طريق البضاعة المضروبة ... والحركات المنتهية الصلاحية .. والغير صالحة للإستخدام الأدمي ويضرب كل ده في الخلاط وورد يا معلم واهي عيال صغيرة ومش فاهمه حاجة .. والبطن ياما بتلم ... ودي عيال معدتها تطحن الزلط ...

[المر]

يا سعات الباشا المستسار كل حاجة فى البلد دى بقت مضروبة فى الخلاط . ايه يعنى شوية عيال فى المدارس من عينة اولاد عمى محروس البواب او عم سعيد الغلبان ان يتسسمموا شوية لبن او يطفحوا بسكويت مغشوش مش يحمدوا ربنا ان الحكومة بتوفر لهم كل الرفاهية دى. ده انتوا شعب غلس غلاسة . يعنى نجيب شعب تانى منين نحكمه و نزله.

اخر الاخبار : امين الحزب الوطنى الديمقراطى فى ديارب نجم بمحافظة الشرقية اتقبض عليه لانه كان بيبيع الدقيق المدعم فى السوق السودا و عجبى.

[Yasser_71]

امبارح كانوا جايبين الاستاذ أسامة سرايا (كمية غلاسة و عدم حضور متناهى) مع حبيب الملايين تامر أمين في البيت مش بيتك خالص بيتكلموا على الديمقراطية والشفافية و كمان المهلبية (دا بمناسبة اللبن البايظ) . الاستاذ أسامة سرايا جردل بجردله (أدلى بدلوه زمان) وقال ان خلاص البلد عضمها قوى وما عادتش بتخاف من المعارضة وكمان الاصلاح ماشى فى طريقه سياسيا و اجتماعيا واقتصاديا منذ 2005 (قال يعنى ماكانش فيه اصلاح قبل كدة )

طبعا الأخ تامر راح منزل جردله وقال يعنى بسسسسس اييييي المواطن لسه ما حسش قوي بالاصلاح

واحنا قاعديييييين

وانا بأقول كفاية اصلاح بقى المواطن مش مستحمل اصلاح تانى

[se_ Elsyed]

تابع مهازل البسكوت في دولة اللادولة لحد ما ربنا يفرجها ويبقى عندنا رئيس وحكومة

جريدة المساء بتاعت الحكومة

بسبب وجبة البسكويت الفاسد

تسمم 56 تلميذاً بالبحيرة..والصحة تصر علي التعتيم

البحيرة - جمال إمبابي وكارم قنطوش:

أصيب 56 تلميذاً بمدرسة عثمان بن عفان الابتدائية بالبحيرة بتسمم غذائي اثر تناولهم الوجبة الغذائية المدرسية "بسكويت" وتم نقلهم لمستشفي النوبارية المركزي.. وأجريت لهم عمليات غسيل معوي كما تم سحب عينات من الوجبة لتحليلها بالمعامل المركزية بوزارة الصحة.

كان التلاميذ قد اصيبوا بحالة قيء شديدة وارتفاع في درجة الحرارة عقب تناولهم وجبة البسكويت.

الجدير بالذكر أن اجهزة الصحة بالبحيرة قد فرضت تعتيما علي الحادث ورفض المسئولون الادلاء بأي تصريحات عن الإجراءات الطبية التي تم اتخاذها حيال التلاميذ والإجراءات الوقائية التي سيتم اتخاذها لحين الانتهاء من التحقيقات في الحادث.

كان عدد كبير من تلاميذ المدارس قد رفضوا تناول وجبة البسكويت بعد علمهم بإصابة عدد من زملائهم بمدارس الاسكندرية بتسمم بسبب تناولهم البسكويت رغم محاولة مديري المدارس والنظار اقناعهم باستلام الوجبة الغذائية.

[Muhammad Zidan]

الله يسامح يا سين سين

هو الطين ناقص بلة .. واللا المشرحة ناقصة قُتلة

ماهي مطينة ومتنيلة في كل حاجة ... في التعليم والصحة والمواصلات والسياسة والاقتصاد والأسعار والمجتمع والتجارة والأخلاق ..

ما نسيتش حاجة ؟؟؟؟؟؟؟

كل حاجة زي الزفت

الواحد حاسس إن البلد دي بقت صندوق زبالة

البني آدم فيها ما يساويش كلب جربان من كلاب الشوارع

هو في إيه ... دا إحنا كل يوم لازم نقرا لأو نسمع خبر زفت

مفيش مرة يقولوا خبر عدل شوية .

كفاية بقى حرام ...

Muhammad Zidan

[مصري جدا]

لما نعيش علي أرض ونكون بنسميها وطن

ونلاقي حكامها ملوها فساد وعفن

ومهما عملوا بنسكت ونهلل لهم

يبقي نكمل سكاتنا..... وما نلعنش أبو الزمن

أحمدجلبي

لما تموت الحقيقة جوه العيون

ويزيد ويكتر الزيف وسط الظنون

ساعتها كل محققي العالم مش ممكن

يعرفوا الحقيقة…. فين تكون..؟

أحمد جلبي

[badroora]

المصنع اللى بيورد للمدارس اكيد واحد اشمعنى بقي مدارس البحيرة فقط اللى بيحصل فيها كدا ؟

اكيد فى حاجة غلط ؟

يعنى لبن فاسد فى مدارس البحيرة ؟

بِسكيت فاسد فى مدارس البحيرة؟

ماذا عن باقي المدارس التى تاخذ من نفس المصنع ؟

ماهم دول عيال ودول عيال !!!!!!!!!!

على فكرة انا بن عمى لما كنت فى مصر من شهر كان جاى من المدرسة ومعاه البسكيت اللى ادهوله الغلاف شكله مش ولابد اوك بس طعم البسكت والله حلو مش وحش .

وعموما سورى لاطفال البحيرة وربنا عالظالم والمفترى وبن الحرام :blink:

تم تعديل 3 أبريل 2008 بواسطة Badria Mekkawy