قواعد المنتدى لحماية المنتدى هل من قواعد لحماية اعضاء المنتدي .

[badroora]

اعلم جيدا ان كل انسان ناضج مسئول عن نفسه وعن تصرفاته , واحنا كاعضاء من المفترض اننا محترمين, ناضجين,مثقفين,اصحاب قضية.

نتعامل مع بعضنا البعض كاخوة , كل واحد مننا يدخل المنتدى ويكتب اكيد ليه هدف من وراء ذلك .

انا هابدأ بنفسي انا هدفى هو انى باحب التواصل مع الناس من خلف ستار بمعنى انا ليست بطبعى اجتماعية فى الحياة اميل الى العزلة لا احب الاختلاط بالناس افضل الخروج كتير بمفردى , احب اتأمل كل شيء دون فرض اى سيطرة على سواء فى الخروج او فى اى شيء فى حياتى .

ولكن هذا الاسلوب اكيد بيكون ملل بعض الشيء لذا احيانا نحتاج لشيء يكسر هذا الروتين فالنت بالنسبة لى كذلك .

بعيدا عن القراءة والبحث والحياة الجادة نميل الى تغير فالتغير وجدته هنا بين اخواتى واخوانى هنا .

نتعامل مع بعض بثقة وشفافية نمزح نتناقش نختلف هذه سمة الحياة ولكن بداخل كلا من جزء من الاصالة والجدعنه .

بمعنى لو فى يوم من الايام حسيت من خلالى تعاملى مع بعض الاشخاص انهم محترمين اصحاب قلم نقي وفكرناضج وعقل متفتح .

فاذا طلب احد من الاعضاء سواء مذكر او مؤنث ان تتوثق العلاقة وتنتقل من مجرد اقلام عالمنتدى الى اصدقاء ممكن نتحاور ونتناقش فى امور شتى واعتقد ان المسنجر وفر اشياء كتير واكيد الشخص الذي تسمح له بتناول اميلك بيكون صديق وله بعض الصلاحيات كروؤية صورتك ااو حتى ارسالها طالما يوجد ثقة بين الطرفين والعلاقة منبية من الاساس على احترام كلا الاخر .

واذا حدث هذا وبعد مرور الوقت سواء اختلفت مع الشخص او ظروفك منعتك ان تتواصل معه وتفاجيء انها يستخدم الصلاحيات التى منحته اياها ضدك او يلفق بها اى شيء يشوه معنى الصداقةا الجميلة التى كانت بينكم شيء محزن حقا.

اتذكر وانا طفلة امى كانت دائما تنصحنى اوعى تدى صورتك لحد اوعى حد يديكى حاجة وتاكليها وظلت ناصيح امى لى طول الوقت كنت زمان اسمعها وكنت اشعر وكانها موعظة كبيرة جدا ومسئولية .

ولما كبرت وتعديت العشرين ثم الثلاثين واخر مرة امى نصحتى هذه النصيحة كانت من شهرين ابتسمت :blink: وقولتلها يااااااااااااااااااه يا امى انت بريئة اوى كدا

صورة ايه بس دا الدنيا تطورت بقي فيه اميلات وويب كام ومنتديات وحاجاااااااااااااات كتير وعلى رغم نصيحة امى البسيطة ولكنها ثمينة جدا .

المهم النت دا مخاطرة كبيرة وخصوصا المنتديات والتشات سواء مسنجر او الوسائل الاخرى واكيد اللى بيتادول النت لازم يكون قد المخاطرة وتحمل العواقب .

ولكن هناك شيء مهم جدا الا وهو الثقة والعلاقات المفترض انها محترمة ومبنية على ثقة بين الطرفين .

المنتدى هنا او اى منتدى بيجعلنا نتعرف على اطباع بعض واخلاق بعض قبل منعرف اشكال بعض .

اعتقد هذا الشيء ممكن يكون شيء حميد وغر حميد فى نفس الوقت لان الحميد نك تثق فى الناس وتعطيهم صلاحيات والغير حميد انهم يستغلونها ضدك .

نفترض مثلا ان شخص اخذ اميل عضو واستغلة استغلال سيء so what ?

هل هى كبيرة اوى ان احد ياخذ اميل حد ولا حتى صور شخصية مافيش واحد فينا او معظمنا معندوش مدونه ولا ويب سايت خاص به فيه صوره وكلام عنه .

مثلا اللى لهم صلاحيات فى الموقع لمعرفة الاي بي الخاص باى شخص يستطيع ان يحدد مكان اقامة الشخص بالظبط .

المقصود بالموضوع دا لان اكيد اللى هيقراه هيقول هو مين فين انا هقولكم .

فى الاونه الاخير بدات تحدث اشياء ومفاجئات ناس كنت بتتعامل معهم من باب الصداقة والاحترام والثقة تلاقيهم خانوا كل دا بقوا اندال بدون سبب.

ومسئولية المنتدى الوحيدة انها مكان للتعرف على اشخاص محترمين وناضجين والتعرف على الجانب السيء

من شخصيات مريضة ذو نفوس ضعيفة بدون اخلاق ولا شهامة .

عموما الاشخاص ذوى القناع البريء وقلب حقود مش هما اللى هيغيرونا ومش هما اللى هيجعلونا نفقد الثقة بكل الموجودين

على الرغم من المساويئ التى نصتدم بها الا انا هناك جوانب ايجابية كثيرة

الاب الغالى عادل ابو زيد

اعى تماما هدف حضرتك من عمل مجلة كمجلتنا هذه واعى تماما قد ايه حضرتك انسان محترم نقي جدا وفاتح بابك لكل الناس دون التمييز بين احد على احد .

نفسي فى شيء ولكن لست ادرى هل هذا معقول ام لاء نفسي واعتبره الازم لكل شخص يكتب او يشترك او يسء الى الاخرين

المفروض سياسة المحاورات تغغير

كل واحد يسجل باسمة الحقيقي زى مواقع كتير على الويب تشترط على المشترك وضع اسمه الحقيقي وبيناته الحقيقة

اعتقد لو دا حصل هنا هتكون الحماية للمنتدى وللاعضاء ايضا .

كل واحد بيكتب وراء اسم يختفي خلفة يجعله حر يفعل مايشاء بالقناع الخافى لملامحة ووجهه الحقيقي .

كل واحد هيحترم كل كلمة يكتبها كل فكرة كل لفظ يتلفظ به .

ويا ريت كل اسم حقيقي جنبه صورة حقيقية .

وبكدا نضيع فرصة على زوى النفوس الضعيفة فى انتهاز فرص حقيرة .

وكمان يبقي الكلام بالصورة زى المشاهير ولا الصحافيين فى المجلات والجرائد.

ثم مثلا ايه المشكلة ان الناس تشوف صور بعضها ماحنا بنشوف اشكال بعض فى الشوارع

موضوع غريب غامض شوية بس حلو ومسلي

يلا فى انتظار الهجووووووووووم

تم تعديل 24 مارس 2008 بواسطة Badria Mekkawy

[رحاب]

بدوره يا حبيبتى

معلش اتعبى معايه شويه

اصل انا لسه سنه اولى نت

فهمينى هو ممكن شخص اخر يوصل لحد فين تماما من بيانات العضو فى اى منتدى

ومشكوره مسبقا

[Advisor]

القائمين على محاورات المصريين يبذلون كل الجهد فى حماية الإحترام الواجب للجميع ، و نأخذ قرارات حازمة فى هذا الصدد و لا نعمد لإعلان هذه القرارات.

النصيحة العامة و الواجبة هى عدم خلط الخاص - بمعنى الحديث عن الخصوصيات - مع العام أو مع الإفتراضى.

فى حياتنا الطبيعية العادية نتوخى الحذر الإنسانى العادى قبل أن نفضى بخصوصياتنا للأخرين حتى لو كانوا زملاء عمل أو جيران أو أقارب.

بالنسبة لل IP فهى مجرد كود وقتى يتم تخصيصه للجهاز الذى تعملين من خلاله و يتم منح هذا الكود لآخرين بمعنى عدم وجود رابطة دائمة بين ال IP و شخص مستخدم الإنترنت إلا فى خلال الإتصال.

أما معرفة مكان ال IP فهذه مسألة تقريبية و ليس لها علاقة بمكان معين ربما يمكن معرفة أن IP معين يقع فى القاهرة أو أمريكا الشمالية و هذا هو منتهى المعلومات التى ترتبط ب IP معين ربما يمكن معرفة مقدم الخدمة هذا إذا كان ال IP حقيقى و ليس إفتراضى تم التلاعب به ببرمجيات معينة.

[أسد]

الأخت الفاضلة بدرية ..

موضوعك هام بالفعل .. ولكن بكل تأكيد أن من المشكلات التي تقع للبعض هو كشفهم عن شخصياتهم كمرحلة أولى .. ثم في مراحل لاحقة الكشف عن خصوصياتهم .. أو الكشف عن أي موضوعات أو مسائل أخرى ..

ولا أعني هنا مايتم الكشف عنه في محاورات المصريين أو في أي منتدى مشابه .. ولكني أعني بما يتم في غرف الشات أو على الماسنجر .. الخ ..

في الحقيقة ليست لدي الخبرة بما فيه الكفاية بما يحدث في تلك الغرف .. ولكني أسمع وأقرأ عن مشكلات كثيرة تحدث للبعض .. وخصوصاً من قبل بعض ضعاف النفوس .. والذين يستغلون ما يحصلون عليه من معلومات أو صور أو ماشابه حتى ولوكان بمنتهى حسن النية .. وحتى ولو كانت صور عادية جداً كالتي توضع في البطاقة الشخصية مثلاً أو في جواز السفر ..

قرأت عن البعض يصور أحاديث الشات على الماسنجر بكاميرا أخرى أو بالموبايل ويستغل هذا الأمر لأغراض دنيئة ..

أطال الله في عمر والدتك ومنحها الصحة والعافية وبارك فيها .. فنصائحها درر ..

وبالفعل التشات والمحادثات مع الغرباء عبر الماسنجر وخلافه .. مخاطرة كبيرة في كثير من الأحيان .... فأحياناً تجدي شيطان في صورة ملاك . ووحش في صورة حمل وديع .. ورجل يتقمص شخصية امرأة والعكس .. والقصص والروايات كثيرة ..

ولا أعتقد أن هناك من آلية مهما كان للحماية من مثل تلك المخاطر سوى وعي الشخص نفسه .. وقدرته في الحفاظ على خصوصياته .. وأسراره .. وصوره .. الخ ..

أما من يعلنها لأي شخص .. فيجب عليه قبل أن يفعل ذلك أن يتأكد .. مع من يتحدث .. وعن أي شئ يتكلم .. وفي أي زمن ووقت هذا ...

وكما أوضح الأدفايزر .. فلا توجد طريقة من قبل أي شخص في المحاورات هنا .. أو في أي منتدى آخر معرفة شخصية المشارك من خلال الآي بي أو ماشابه ذلك ..

ويمكن الوصول لشخص معين من خلال عمليات بحث تقنية وفنيةوأمنية معقدة وطويلة .. لا يستطيعها إلا الأجهزة الأمنية من خلال قدرتها على التتبع والتفتيش والكشف .. الخ.

والنصيحة الغالية .. التي يمكني وضعها هنا .. لن تزيد حرفاً عما نصحت به الوالدة الغالية ..

[zizetta]

العزيزة بدرية ..

انا من المؤيدين لمبدأ ديكارت بشدة .. وهو أنا أشك إذن فأنا موجود ..

الثقة تتولد عندما تتقابل الوجوه .. وتكون الصداقة أسرية .. أشوفك وتشوفيني على الحقيقة علشان أعرف أقرأ وجهك وأشوف المستخبي في نظرات عينيكي .. لكن علي الماسنجر أو الويب كام .. ده كله تمثيل في تمثيل ..

الحقيقة أنا التشات ده أكرهه جدا ولا أستخدمه .. وأكتفي في التواصل بأصدقائي القدامي أو البعض من أعضاء هذا المنتدى علي الخاص أو علي الأيميل ..

يعني المثل بيقول حرص ولا تخونش .. أنا شخصياً لا أثق بسهولة في أحد ... ولا أصدق كل ما يقال لي .. يمكن برضة لأني عشت كتييير أوي والسن له حكمه في زيادة التجارب والفراسة ..

عموما الإنسان ما بتعلمش ببلاش .. وأهي تجربة تضاف لتجاربك في الحياة ..

أما اقتراحك عن وضع الإسم الحقيقة أو الصورة الحقيقية .. فأنا لا أويده لأنه ممكن يستغل برضة بشكل او بآخر .. كمان الواحد بياخد راحته في الكلام عن بعض الأمور اللي يفضل يتكلم فيها بشخصية اعتبارية مع اشخاص اعتباريين .. كما ان الباحث علي النت ممكن أن يصل لآي موضوع يقرأه علي المحاورات وليس مثل بعض المنتديات الأخري اللي لازم تسجلي بياناتك ثم يتم تفعيل العضوية لو عايزة تقرأي موضوع معين .. وده بيخلي غير الجاد يزهق ويخرج الا لو الموضوع مهم فبيسجل ...

عموماً أضم صوتي لصوتك في ضرورة معالجة مشاكل الأعضاء التي يواجهونها منفردين أو مجتمعين أو حتى مشاكلهم مع بعض ..

تحياتي

زيزيتا

[badroora]

بدوره يا حبيبتى

معلش اتعبى معايه شويه

اصل انا لسه سنه اولى نت

فهمينى هو ممكن شخص اخر يوصل لحد فين تماما من بيانات العضو فى اى منتدى

ومشكوره مسبقا

هلا رحوبة لا يا قمر مش قصدي دا خالص الموضوع دا بالذات فى ايد امينه وقد ايه عارفه ان صاحب المكان دا شخص نبيل واهل ثقة وائتمنيه على حياتك مش بياناتك بس الموضوع بعيد خالص عن بياناتك اللى بتكتبيها عند التسجيل .

اوضحلك عشان لا نخلط الاوراق ببعضها البعض .

شوفى يا ستى هاديكي مثال

انت كعضوة جديدة هنا لاقيتنى كويسة معاكى قراتى مواضيعي لاقتيها كلها محترمة وقيمة هتستريحيلي كخطوة اولى الخطوة الثانية تبادل الرسائل عالخاص

الثالثة هتكون تبادل الايميلات وانت بتخدى ايملى هتكونى فى منتهى السعادة والانتصار انك حصلتى على اميل شخصية واضح من خلال كتابتها انها محترمة وومتفتحقة وعقل ناضج تحبي تتكلمى معاها .

قوم ايه تعرفنا وانت بقي ارتحتيلي وبداتى تتكلمى معايا وانا بقي امدح فيكي وفى اخلاقك يعنى انت كدا استريحتيلي اوى.

تبدا تتكلمى عن نفسك من باب التعارف وتقريب الصداقة هيجي اللى بعد كدا ممكن اشوف انا بكلم مين انت هتقولى يا خبر هو انت لسه ماشوفتيش صورتى هاقولك لا والله هتقولى ثانية واحدة هتقومى تجيبي انضف صورة عندك وحطاها عالمسنجر ااقوم انا اقولك والله ماشايفاها طب مافيش واحدة واضحة :blink: حتقولى لا والله طيب ممكن تبعتيها لو سمحتى واحلفلك انى هاشوفها وهامسحها او ارجعهلاالك تانى على طول :blush2: شايفة النصاحة

تقومى انت تقوليلي عيب يا بدرورة متقوليش كدا انا واثقة فيكي

والدم يجري فى عقروقك وتبعتى الصور

وخلاص صورتك عندي واحنا اصحاب واحدة واحدة انشغلتى بعدتى مش طيقانى المهم مش بقيتى تكلمينى اقوم انا بقي ليه وليه وطبعا العرق الضعيف الندل هيشتغل طيب اتكلمت مع شخص تانى ولا شخصة وطبعا كل واحد بيتكلم هنا بيقي 99% من الناس عندهم كريوزتى(فضول) فولان دا يا ترى شكلة ايه اقوم انا بقي يا خبر انت متعرفش فولان دا شكلة ايه لا والله لا يا شيخ ودى تيجي بردوا اتفضل البوم كامل اهو بس بليز متقولش لحد لاااااااااااااااا عيب مش هقول لحد انا والله بعتهالك انت عشان بثق فيك .

ويوقم دا يبعتها لتانى والتانى للتالت والغريب بقي انه كله متقولش لحد والموضوع يبقي عامل زي البلهاريسيا اللى بتنهش فى الكبد وكل مكتم وبينشر على مستوى القاعدة اللى قريبة منه وكل فى النهاية متقولش لحد والغريب ان الموضوع يوصلك انت شخصيا وبردوا متقوليش لحد :lol:

انا بس حبيت اوضحلك طرق انتشار المرض ومن خلال الطرق هتعرفى ازاى تواجهييه او تمنعية او تعلجية

وانا اديتك مثال بيحصل وبيتكرر كل يوم واللى بعيش يا ما يشوف

اه صحيح كدا اتعملنا ان الصور تتبعت ازاى فى طريقة اخرى على الياهو اللى هو sharing photo not with ur friend with ur future enemy God welling لما الصور تعملى شيربنج مع شخص \شخصة وانت بقي حريصة كل الحرص وواعية وقال ايه الشيرنج مجرد انه بيعرض صورة

اقولك لو الطرف التانى ندل وغير امين سوف يقوم بحفظ اى صورة بتعرضيها .

دى بس معلومة كدا عالماشي طالما بدات دروس التوعية

المهم اتمنى ان يكون المعنى وضح والرسالة وصلت

وولاد الحرام مخلوش لولاد الحلال حاجة

بس الدنيا لسه بخير

والبقاء للانقي

تحياتى

تم تعديل 24 مارس 2008 بواسطة Badria Mekkawy

[vipwithyou]

موضوع جميل

ونصيحة والدتك طبعا ً نصيحة جميلة جدا لكل البنات لأنهم هما أكثر عرضة للضرر من النت

بس كدة يا بدرية خوفتينا من الكلام فى الخصوصيات

لكن بصراحة الواحد لما بيرتاح لحد تلقائى بيتكلم باستفاضة وبيحس انه مع اهله

وفعلا فى المنتدى هنا فى عائلة كامله وكلهم محترمين والحمد لله الواحد لما بيحكم على حد من خلال كلامه او مواقفه بيكون حكمه صح

لكن زى ما قالتلك الاخت زيزيتا برضوا حرصى ولا تخونيش

وأعتقد كمان ان موضوع الآى بى دة كويس جدا ً لأن زى ما حضرتك قلتى اننا فى يد امينه ( أو بناتنا بمعنى اصح )

وبصراحة القائمين على المنتدى بيتدخلوا فى الوقت المناسب لما يلاقوا اى غلط موجود او اى اساءة

وأذكر ان كان فى شخص دخل باسم وكان يسىء للمنتدى وغير اسمه لكن القائمين على المنتدى عرفوه من الآى بى

فدة كويس

اما بخصوص ان الناس تدخل بيانات حقيقية وصورة مثلا او كدة

فأنا لست معك فى هذا الامر لأن مش اللى بيتكلموا فى المنتدى بس هما اللى بيكلموا بعض ، ممكن حد يدخل ويتابع كل اللى على المنتدى من غير ما يكون مشترك فيستعمل البيانات دى بطريقة غير مشروعة ويكون هناك ضرر

وربنا يستر على الجميع

[رحاب]

والله مش عارفه اشكرك ازاى با بدوريا قمر انتى نورتينى فعلا :blush2: مش لاقيه غير البوكيه ده اهديه ليكى

يلا تبذير بأه

[Scorpion]

طب ايه رأيك يا آنستي العزيزة بدرية ان اسمي الحقيقي مش سكوربيون و لكن اسمي

ميشيل فارس

و دي صورتي

و الا أقوللك .. انا كنت بهرج ...

اسمي الحقيقي مصطفي المانيسترلي

و دي بجد صورتي

و ضحكت عليكي .. انا في الحقيقة بنت و اسمي ليلي كامل

و دي صورتي

و يا ريت نبقي اصحاب ....

كل واحد يسجل باسمة الحقيقي زى مواقع كتير على الويب تشترط على المشترك وضع اسمه الحقيقي وبيناته الحقيقة

اعتقد لو دا حصل هنا هتكون الحماية للمنتدى وللاعضاء ايضا .

ايه رأيك بقي يا أختي العزيزة ... اهي كلها اسامي حقيقية و بالصور كمان ... ايه اللي يضمن لأي مخلوق فينا انها لأشخاص حقيقيين ... و ايه اللي يضمن لأي منتدي صدق أي معلومة يضيفها أي انسان عن نفسه .... الا بقي لو تم طلب بطاقة تحقيق شخصية كل واحد فينا قبل ما يسجل .. و حضور العضو بنفسه للتحقق من صدق بياناتها و يا ريت كمان حد يضمنه ... و ابقي قابليني لو أي منتدي في الدنيا زاد عدد اعضاؤه عن اصابع اليد الواحدة ....

يبقي الحل في ايدينا نحن فقط آنستي الفاضلة ... نحن فقط من نقرر هل نصدق أو لا .. هل نأمن أم لا ... هل نثق أم لا ... و تبقي نتيجة أي قرار نتخذه في هذا الصدد تحت مسئوليتنا الشخصية البحتة و صدق حدسنا ....

و يبقي آخر شيء هو ثقتنا في عدم الآنزلاق في أي خطأ (مهما كانت قوة الحجة ...او نبل الغاية.. او حلو الكلام) يمكن للآخرين أن يستخدموه ضدنا يومآ ما ...

تحياتي دائمآ ....

[badroora]

الاخوة الاعزاء توضيح بيسط .

موضوع الاسم والصور دى مجرد فكرة مش اكتر مجازية مش اكتر وبالفعل الانسان الغير امين

مش هيحوق فيه حتى لولو سجل بكشف العيلة وبطاقة التموين بتاعتة :closedeyes:

عموما انا بالطبع اقترحت اقتراحى كوسيلة اخيرة ممكن تخلى كل واحد قبل ما ينهش فى عرض خلق الله يبص فى صورته ينكسف من نفسة ويتراجع عن افكارة المريضة .

العزيز اسكون

بما انك من الحكام

ايه رايك فى عمل فيش وتشبيه قبل التسجيل واهو بردوا يبقي كتر خيكم خدمتم المجتمع فى الحد من انتشار الجرائم

اتفق مع كلامك وكلام الغالية اوى زيزى

[badroora]

تحياتى الى الادفايزور

والى العزيز استاذ اسد

وانا احترم كلامك جدا ومتفهماه

اشكركم على الاهتمام والمشاركة

مع خالص تحياتى واحترام

بدرية

[Muhammad Zidan]

يبقي الحل في ايدينا نحن فقط آنستي الفاضلة ... نحن فقط من نقرر هل نصدق أو لا .. هل نأمن أم لا ... هل نثق أم لا ... و تبقي نتيجة أي قرار نتخذه في هذا الصدد تحت مسئوليتنا الشخصية البحتة و صدق حدسنا ....

إسمحيلي أقول رأيي في الموضوع ده أعتقد كلام الأستاذ Scorpion في الجزء الخاص بتاع صدق حدسنا هو الفيصل في الموضوع وانتي برضه اتكلمتي عن الثقة اللي بتتولد أثناء المشاركات وتكوين آراء عن المحاورين في المواضيع الواحدة ...

فهي كده أفضل طريقة للتعارف وخلينا من غير صور أحسن لأن كل إنسان بياخد انطباع من الشكل اللي بيشوفه وما بيكونش في أغلب الأحيان انطباع صحيح

وتلاقي الأفكار أفضل من تلاقي الوجوه والله

تحياتي وتقديري

Muhammad Zidan

[Nonna]

هي المشكلة انى مش عارفة اتابع و لا عارفة اقرا المشاركات

هي ليه الردود مترتبة فوق بعضها ولازم انقر على كل مشاركة عشان اقراها

مش زي الاول كلهم مفتوحين وفوق بعض

رحاب بدوره يا حبيبتى معلش اتعبى معايه شويه اصل انا ل... أمس, 02:50 PM

Badria Mekkawy إقتباس(رحاب @ Mar 24 2008, 03:50 PM) بدور... أمس, 06:48 PM

Advisor القائمين على محاورات المصريين يبذلون كل الجهد فى ح... أمس, 04:39 PM

أسد الأخت الفاضلة بدرية .. موضوعك هام بالفعل .. ولكن... أمس, 05:52 PM

zizetta العزيزة بدرية .. انا من المؤيدين لمبدأ ديكارت بشدة... أمس, 06:45 PM

vipwithyou موضوع جميل ونصيحة والدتك طبعا ً نصيحة جميلة جدا لك... أمس, 08:59 PM

رحاب والله مش عارفه اشكرك ازاى با بدوريا قمر انتى نورتي... اليوم, 12:00 AM

Scorpion طب ايه ر... اليوم, 12:40 AM

Badria Mekkawy الاخوة الاعزاء توضيح بيسط . موضوع الاسم والصور د... اليوم, 01:50 AM

Badria Mekkawy تحياتى الى الادفايزور والى العزيز استاذ اسد وانا... اليوم, 01:53 AM

Muhammad Zidan إقتباسيبقي الحل في ايدينا نحن فقط آنستي الفاضلة ..... اليوم, 02:09 AM

[se_ Elsyed]

هي المشكلة انى مش عارفة اتابع و لا عارفة اقرا المشاركات

هي ليه الردود مترتبة فوق بعضها ولازم انقر على كل مشاركة عشان اقراها

مش زي الاول كلهم مفتوحين وفوق بعض

عشان ميت مرة قولنا ما تلعبوش في زراير الريموت

شوفي يا ستي ...

بُصي فوق على أقصى شمال الشاشة هاتلاقي زرارين .... إضافة رد ... و إضافة موضوع جديد ... وجنبهم زرار خيارات ..

إفتحي الخيارات ده وخدي الخيارة بتاعت طريقة العرض في الأسفل خالص .. وإختارى ... " عادي " هاتلاقي الدنيا حلوه ورجعت زي الأول

[رمضان]

انتي شكلك يا بدرية واخدة حتة مقلب

[الحازم حسن]

كل واحد يسجل باسمة الحقيقي زى مواقع كتير على الويب تشترط على المشترك وضع اسمه الحقيقي وبيناته الحقيقة

اعتقد لو دا حصل هنا هتكون الحماية للمنتدى وللاعضاء ايضا .

ويا ريت كل اسم حقيقي جنبه صورة حقيقية .

وكمان يبقي الكلام بالصورة زى المشاهير ولا الصحافيين فى المجلات والجرائد.

ثم مثلا ايه المشكلة ان الناس تشوف صور بعضها ماحنا بنشوف اشكال بعض فى الشوارع

بس الحكاية دي حنتأكد منها ازاي

يعني أنا على سبيل المثال أتأكد ازاي أن اسم بدرية مكاوي ده اسمك الحقيقي مثلا ؟

[zizetta]

بالمناسبة يابدارة .. أنا مرة قلت معلومة لواحدة على الخاص والمعلومة دي كانت خاطئة يعني قلتها علي سبيل التمويه وعدم ذكر المعلومة الصحيحة اللي ألحت في معرفتها .. لكني لقيتها قالتها لواحدة تانية وعرفت من كلمة اتقالت لواحدة تالتة ووصلتني بالصدفة ..

علشان كده .. نخلي بالنا أحسن .. مفيش أسرار هنا ..

تحياتي

زيزيتا

[badroora]

انتي شكلك يا بدرية واخدة حتة مقلب

يعجبنى فيك يا رمضان نبهتك بسم الله ماشاء الله

روح يا شيخ ربنا يكفيك شر المقالب :closedeyes:

[badroora]

بس الحكاية دي حنتأكد منها ازاي

يعني أنا على سبيل المثال أتأكد ازاي أن اسم بدرية مكاوي ده اسمك الحقيقي مثلا ؟

احلفلك ع المصحف ان دا اسمي

يبقي خلاص التسجيل يتم باول صفحة فى الباسبورت يعنى تصور اول صفحه وترفقها فى الفايل بتاعك وفينجر برينت ووصل ماية ووصل نور

وكل دول يتعملهم اسكان ويتم رفقهم فى البروفايل الخاص بكل عضو .

يعنى على كدا بقي انت اسمك مش الحازم حسن :closedeyes:

عموما على راى القائل

لا يهمنى اسمك ولا لونك ولا عناونك

انا يهمنى الانسان .

تحياتى

تم تعديل 25 مارس 2008 بواسطة Badria Mekkawy

[badroora]

بالمناسبة يابدارة .. أنا مرة قلت معلومة لواحدة على الخاص والمعلومة دي كانت خاطئة يعني قلتها علي سبيل التمويه وعدم ذكر المعلومة الصحيحة اللي ألحت في معرفتها .. لكني لقيتها قالتها لواحدة تانية وعرفت من كلمة اتقالت لواحدة تالتة ووصلتني بالصدفة ..

علشان كده .. نخلي بالنا أحسن .. مفيش أسرار هنا ..

تحياتي

زيزيتا

لا يا زيزى خليقي حقانية انتى قولتلى ان السر خرجته لواحدة بس يعنى هذا لا يعتبر افشاء سر

ابويا بارك الله فى عمره دايما كان يقولى يا بينتى السر لو خرج عن 45 نفر ميبقاش سر .

وهى قالت لواحدة بس يعنى لو تعدت ال44 يبقي هنا افشاء اسرار وعقوبيتها حرص ومتخونش :closedeyes:

من راى نعمل حق عرب وكلنا نجتمع كل واحد يطلع اللى فى قلبه عشان يرتاح

وبعد كدا نعمل شعار جديد

لا اسرار بعد اليوم