أخطاء الأطباء

[crossfield]

حد يقدر يقوللى ايه اللى جرى للطب فى بلدنا؟لية كل يوم و التانى نسمع و نقرى عن حوادث اهمال طبى بشعة؟أنا شخصيا والدى اتعرض لاهمال طبى بشع كاد أن يودى بحياته رغم انه أجرى الجراحة(استئصال جزء مسرطن بالكبد)فى أكبر مستشفى فى مصر(ولاد اللذين عملينها أ وتيل فايف ستارز فى الصحرا عشان يضحكوا عالناس) و الجراح اسمه كبير جداً و مع كده مهمل هو الاستف بتاعه؛ لكن الحمد لله ربنا ستر و اكتشفنا الكارثة بعد 3 شهور :lol: لكن الحمد لله . بسلامتهم سابوا الريدى فاك فى معدتة 3 شهور و ما كنش عندهم الشجاعة يقولولنا الحقيقة .و كانوا بيوهمونا ان حالته هيه اللى متأخرة عشان ما يبقاش عليهم مسؤلية.تخيلوا قعدنا فى المستشفى 3 شهور و اشعات و تحاليل و عينات و دكتور داخل و دكتور خارج واحنا طبعا عمالين نكع لحد ما ربنا أراد انه يفضحهم بالصدفة.طبعا حاولوا يلبسونا الطربوش و يقنعونا بضرورة اجراء جراحة "حالا" رغم ان حاله والدى كانت سيئة جدا و لا تسمح باجراء جراحة تانية فى الوقت دة لكن المهم انهم يداروا على عملتهم ومش مهم بنى ادم يموت .رفضنا طبعا التفاهم معاهم و خرجنا لمستشفى تانية؛مش يسبونا بقى فى حالنا والله العظيم شغل مافيا و عصابات فعلا _ولاد ال ...لقيناهم جايين ورانا فى المستشفى التانية _المرة دى جوة الجيزة فى المهندسين - بعد ما "ظبطوا" المدير و الدكتور اللى كان هيعمل لوالدى جراحة استخراج الأنبوبة_على فكرة؛حاجة كدة ما شاء الله حوالى 50سم !!!!و اكتشفنا برضه بالصدفة ان اسم والدى ما كانش مدرج فى جدول العمليات!!!! مش بس كدة -ده البية الدكتور مساعد الجراح بتاع المستشفى الأولى لقيناه لابس لبس العمليات و واقف ال ايه هيساعد الجراح التانى فى العملية؟؟؟؟ .فخرجنا تانى أو تالت لمستشفى بعيدة خالص عن الجيزة و هناك دخلوا والدى العناية المركزة و رفضوا اجراء الجراحة لأن حالة والدى الصحية لم تكن تسمح بذلك !!!!!!!!معلش أنا طولت عليكم بس اللى حصللنا فى الفترة دى ماكانش قليل..المهم يعنى الحمد لله والدى عمل العمليه فى عين شمس التخصصى و صحته بتتحسن ولله الحمد.لكن برضه يفضل السؤال بيطرح نفسه:أيه اللى حصل للطب و الأطباء فى بلدنا؟؟؟؟ :(

تم تعديل 18 يوليو 2004 بواسطة crossfield

[Salwa]

الضمير ياعزيزتى كروس فيلد

هى دى المشكله

سلامة والدك الف سلامة عليه

برضه مش ححكى لك / تجربتنا / وزى ما بتقولى كدة بالضبط

كانت والدتى مريضة وتعالج فى مصر

فى افضل مستشفى استثمارى فى مصر

فوضى لا يتخيلها مخلوق

لن اقول على --- الفاتورة النهائيه ---

لكن حساب القطن -- فى 10 ايام ----

كاننا كنا -- بننجد 4 مراتب --

واكتشفنا انهم - بدون اعطائنا خلفيه -- زودوا جرعه الدواء ثلاثة

اضعاف -

واعطوها دواء - علمنا بعدها - انه كان تحت التجربة

وكل ده لانهم سالونا فى الاول - فيه نوعين من العلاج - بس العلاج

الاكيد مش فى متناول الجميع -- مستعدين -- قلنا لهم

على البركه

وطلعوا /البروفسيرات

بيتعلموا فينا

وساعات اقول لنفسى -- ليه رغم كل شيئ --

ومهما حصل

نرجع نثق فى الاخرين ونعتقد ان كل واحدبيتصرف بدافع من ضميره وشرف المهنه

مش لاقيه اجابه

سلام

[crossfield]

عزيزتى سلوى:

سلامة ماما ألف سلامة.لكن برضه أكبر مستشفى استثمارى فى مصر؟و أول حرف من اسمها (دار ...)؟ :roll :( مش بعيد نكون جيران فى الأوض! :? .المهم ما تسيبوش حقكم طالما فيه دليل على الاهمال دة.على فكرة ؛لو هية المستشفى اللى عليها العين يا ريت تقوليلى :mad: .

[Salwa]

عزيزتى كروس فيلد

شكرا لك

لكن فيه حاجات....

خلاص.

جروح واتقفلت.

ومحدش فاضى لحد....

ده بيشتروا المحامى.....والقاضى.

وياما الواحد شافففففف....من مهازل.

وتعرفى تقولى..،عليه العوض ومنه العوض،...مش بقولك الضمير مات.

شكرا مرة اخرى.

سلامى

[crossfield]

يعنى اية؟أقول على قضيتنا يا رحمن يا رحيم؟ :D طبعا حسبى الله و نعم الوكيل ألف مرة لكن لو كل واحد قال كدة و سكت يبقى عليه العوض فى الشعب المصرى كله.أنا و الله ما باتكلم على تعويض لان عوضنا على ربنا لكن الناس دى لازم تتفضح و دى أقل حاجة الواحد يعملها.

[عادل أبوزيد]

يعنى اية؟أقول على قضيتنا يا رحمن يا رحيم؟ :) طبعا حسبى الله و نعم الوكيل ألف مرة لكن لو كل واحد قال كدة و سكت يبقى عليه العوض فى الشعب المصرى كله.أنا و الله ما باتكلم على تعويض لان عوضنا على ربنا لكن الناس دى لازم تتفضح و دى أقل حاجة الواحد يعملها.

الفاضلة كروسفيلد

اكبر مشاكل العلاج فى مصر هو جودة الأداء او تجنب الإهمال او ان تجدى مكانا للعلاج دون استغلال الموقف.

فى الشتاء الماضى فى دور برد لفيت على الأطباء كعب داير لمدة اربع أشهر فقط لأنى أخطأت و ذهبت لطبيب مشهور دون تقصى مسبق منى كما لو كنت (حناسبه).

نعود لموضوعنا أعتقد أنك يمكن أن تأخذى حقك كاملا من خلال القضاء و لكن عليك أولا استشارة مكتب طب شرعى خاص و قد عرفت تلك المعلومة خلال متابعتى لقضية الممرضة عايدة بالإسكندرية حيث ان رئيس الطب الشرعى السابق يدير مكتبا استشاريا اظن بالإسكندرية.

أخطاء الأطباء أصبحت ظاهرة و ايضا افلاتهم من العقاب اصبح ظاهرة.

ربما حان الوقت لإلزام الأطباء كلهم بلا استثناء بتوثيق كل ما يقومون به من خطوات العلاج و تفاصيله و ان يصبح لكل مواطن سجل طبى يحى حتى قرص الأسبرين اذا تناوله بارشاد طبى.

ملحوظة: تذكرت ان محامى الممرضة عايدة بالإسكندرية كان اسمه .... أبوهيف أظن يمكنك الوصول اليه

[بنت شعنونة]

بلا قضاء

بلا بتاع

الوحيد اللي يجيبلك حقك فعليا

طبييييييييييييييب من العيلة

لآنه الوحيد اللي ها يعرف يتكلم بلغتهم

ويعرف يفضحهم ازاي ويخوفهم بجددددددددد من القضاء دا ازاي..

انا بعت لهاالة سرحان النهاردا عشان تعمل حلقة عن الموضوع دا عشان الطفل علي

وكام ورة لككام حالة خطأ دكاترا بهايم

لكن ربنا يسهل ويحصل اي شيء اصلا...

انا بقى

والدتي توفت نتيجة خطأ دكتور بهيم

وهذا ما جعلني اكون طبيبة............حتى وان كنت طبيبة فاشلة :(

[ابو حلاوه]

لابد لكل من أهمل ان يأخذ عقابة و لسئ النية و لمن يتلاعب بالمرضي أن يأخذ عقابه مضاعف

و الطب كأي مهنة أخري في مصر في الظروف الحالية تعاني من منعدمي الضمير

و لكن اسمحولي ... و انا هنا لا اتكلم عن ما ورد في مداخلات الاخوة و لكن انا اتكلم بشكل عام فقط

. هناك ما أسميه نوع من التحفز الاستعداد للأدانة تجاه الطبيب و الكلام ده في كل مكان و في كل مجتمع و ليس في مصر فقط

هناك من يبحث عن مخطئ حين فقد عزيز عليه او رؤيته و هو يعاني

و المخطئ هنا هو الطبيب في كل الاحوال ... و مجتمعنا يعاني من انعدام كبير في الثقة و بالتالي اي يتضاعف هذا الشعور بالتحفز

احد اقاربي كان بيتعالج هنا في فرنسا في المستشفي التي أعمل بها و اجري له منظار اظهر جسم غريب استدعي اجراء عملية و كانت الفضيحة ان قريبي كان في بطنه فوطة طولها خمسة سم بعد عملية سابقة تم اجرائها في اكبر مستشفيات القاهرة و ا جراها احد اكبر الجراحيين في تخصصه

و بعد العملية سألني زميلي الفرنسي بمزيج من السخرية و الذهول هل هذا النوع من الاخطاء منتشر و لم اجد به ما ار د عليه

[crossfield]

السادة الأفاضل عادل أبو زيد ؛أبو حلاوة؛ شعننة:

متشكرة جداً لاهتمامكم و إن كنت فقدت الأمل فى كل شئ إلا فى وجه الله الكريم ..زى ما قلت قبل كدة أنا مش بدور على تعويض مادى عن اللى حصللنا أنا اللى يهمنى بالفعل إن الناس دى تتفضح و عشان كده رفعنا قضية رغم ثقتى بعدم جدوى القضاء مع هذه المافيا المسنودة من أكبر روس فى البلد ؛و يمكن ده اللى خلانى أتجه للصحافة لكن للأسف محدش إهتم قوى بالموضوع لإن الكل بيدور على خبطة صحفية و جرايم من نوع خاص (إغتصاب؛قتل(و لو ان ده قتل برضو)؛قضية خلع ) لكن إيه يعنى دكتور موت أو كان هيموت واحد؟إيه يعنى حياة إنسان من أساسه ؟ هوه الواحد مننا تمنه كام أصلاً؟ بيتهيألى لو حد مننا جراله حاجة الحكومة بتدفع تعويض حوالى 3000جنية فى الراس .يا بلاش . أنا كنت فاكرة إن الواحد لو معاه فلوس أكيد هيتعالج كويس لكن اتضح إن الموضوع مش موضوع فلوس و اللى حصللنا فى أكبر مستشفى فى مصر يمكن ميحصلش أصلاً فى عيادة دكتور صغير فى حى شعبى. حتى الجريدة الوحيدة اللى نشرت الموضوع نشرته بطريقة متخلفة جداً و حذفت تفاصيل كتيرة مهمة جداً و كمان مقالتش إسم المستشفى!!! يعنى من الأخر و لا كأننا عملنا حاجة ...أنا بصراحة مفوضة أمرى لله و كلى ثقة فى ان القضاء المصرى -زيه زي أى حاجة تانية فى البلد دى- لا يكيل بالبتنجان :?

[crossfield]

ذهبت بالأمس لمتابعة ما تم فى الشكوى التى تقدمت بها منذ أكثر من سنة ضد هذا الطبيب المهمل و المستشفى التى أجريت فيها الجراحة لوالدى رحمه الله و كنت قد أرفقت بها منذ أكثر من شهر أوراق خاصة بتقرير الطبيب الشرعى عن الحالة و الذى أقر بالاهمال الجسيم الذى حدث و ظننت خطأً أن الجهة التى سوف تعاقب المهملين على إهمالهم هى نقابة الأطباء و وزارة الصحة(إدارة العلاج الحر )و لكن إذا بالبيه الدكتور المسئول بلجنة آداب المهنة التابعة للنقابة يقوللى بكل بجاحة "الدكتور-المهمل يعنى- رد على التقرير-تقرير الطب الشرعى - بإن المريض خلاص عمل العملية فى مستشفى تانى و كويس" تخيلوا!!!! أنا مشفتش و لا هاشوف صفاقة بالشكل ده

يعنى ايه؟ يعنى كان المفروض يموت فى ساعتها علشان يبقى مهمل فعلاًُ؟

و الشهور اللى قعدها فى المستشفى بسبب إهمالهم و تدهور حالته الصحية و العملية اللى عملها تانى و اقرار خطورة العملية اللى مضينا عليه و احنا نبستعوض ربنا؟ كل ده ايه؟

اللى زاد الطينة بلة

إن الأستاذ الدكتور بتاع لجنة آداب المهنة قاللى لما سألته فى انفعال"يعنى ايه يعنى؟ مش هيتعاقب على اللى عمله؟"

و بمنتهى البرود"متقلقيش هتاخدى تعويض".

بصراحة لم أتمالك نفسى و أنا باخبط بإيدى على مكتبه فى إنفعال:

إنتوا ايه يا أخى ...ايه...فاكرين الناس كلها زيكم...أقولك تأديب تقوللى تعويض...والدى مات...هتدفعوا لى فيه كام؟

و خرجت من مكتبه منهارة و أنا أستعوض ربنا فيه و فى أصحاب الذمم الخربة الذين يبيعون حياة الناس بالفلوس.

حسبى الله و نعم الوكيل.