لو شاطر.. تعرف تعيش فى مصر بـ 1000 جنيه ! !

[number]

البيان مصروف يومي مصروف أسبوعي مصروف شهري ملاحظات

عيش بلدي 1 30 بس لازم تلحق دورك فى طابور الفرن وتلحق شغلك فى نفس الوقت ربنا معاك

حليب 4 120 عدد واحد لتر يومياً ويارب ميطلعش بودرة سيراميك ويكفى العيال

فول 8 32 كيلو فول اسبوعيا يعنى 125 جرام يوميا رضا والحمد لله

جبنة بيضاء 20 80 كيلو في الأسبوع 125 جرام يوميا انت عايش

بيض 5 20 عبارة عن 10 بيضات فى الاسبوع يعنى لو اربع افراد يبقى بيضه ونص يوميا للاربعة

خضار 10 40 عبارة عن صنف واحد بس + كيلو طماطم + لمونه وحزمة جرجير اسبوعيا

فواكهه 5 20 عبارة عن كيلو برتقال أو قشر موز مرة اسبوعيا علشان العيال تفتكر اسمة

شاى 10 لزوم الكيف اللى بيذل والضيوف الرزلين

سكر 4 16 عدد واحد كيلو اسبوعيا مش بقولكم الكييف يذل وضيوف معندهمش دم

ارز 4 16 عدد واحد كيلو اسبوعيا للعائلة كلها يعنى 125جرام يوميا متوسط الفرد 40 جرام

زيت 10 40 لتر اسبوعيا علشان تشرب بق على الريق يزيت معدتك 000 يستعمل كبديل للخضروات

مكرونه 8 32 عبارة عن عدد 4 كيس 400 جرام اسبوعيا 0000 خلى العيال تنبسط

دجاج 20 80 عدد واحد دجاجة اسبوعيا للعائله 000000 اظن معقول

لحم 30 120 عدد واحد كيلو لحم نصها شغت و دهنة اسبوعيا لزوم صنف الخضار واللمونه وحزمة الجرجير 000 الف هنا

بقوليات 10 عبارة عن كيلو واحد بس شهريا ونقى اللى بتحبه براحتك ( عدس - لوبيا - فاصوليا )

توابل 10 عبارة عن دقيق + ملح + كمون + فلفل + كسبرة + وممكن تديها خل براحتك

صابون 15 عبارة عن صابونه واحدة للحمام + صابون مواعين + مسحوق للملابس ( النظافة عموما )

مواصلات 2 60 بعد طابور الفرن تركب أتوبيس الهيئة ذهاب وعودة وبهدله وفرهده لفرد واحد يوميا

حلاق 10 عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

مدرسة 10 40 عبارة عن مصروفات المدرسة + مصروف العيال اليومى + كراسات واقلام وجلاد 00ألخ

دكتور 30 نمرض بالدور طبعا عدد اربع افراد مرة واحدة للفرد كل 4 اشهر وربنا يستر

ادوية 50 أكيد طبعا العلاج بالدور وربنا يستر واتنين ميمرضوش فى وقت واحد تبقى كارثه

تليفون 10 اشتراك الهيئة هنرد بس ومش هنتكلم معدش ينفع كلام

مياة 10 للاسف لازم نشرب مياة ملوسة بالمجارى

غاز 5 الحمد لله غاز طبيعى الله فى عون اللى عنده انابيب ( 10 جنيه للانبوبه ) وممكن تطلع فاضية

نور 20 لمواكبة التطور غساله ملهاش مسحوق - تلاجة فاضية - بوتجاز يستخدم مرة كل اسبوع

قمامة 10 اجبارى طبعا ومن الواضح ان العشة دى مفيهاش اكل اساس يبقى القمامة هتيجى منين

بواب 15 مهو من حقه يعيش هو كمان لو عشر شقق يبقى 150 جنية شهريا خليه يهيس

صيانة 30 لاصلاح الاجهزة بالدور غساله - سخان - بوتجاز - مروحه - تلاجة - سباكة - لمبات انارة الخ

ملابس 100 عبارة عن الصيفى والشتوى داخلى وخارجى واحذية وشربت وكلونات واتصرف بقى

الاجمالى 1081 اكيد اللى هيخليك تعرف تعمل الكلام اللى فوق ده هيخليك تتصرف وتضغط مصروفاتك شويه علشان تبقى الحسبة 1000 جنية اقولك متمرضش ومتخدش ادوية وشيل 80 جنية معلش ربنا يقويك وينصرك على من يعاديك ويكفيك شر المرض

ايجار الشقة طبعا قانون جديد وللاسف ملهوش قانون كل واحد وبخته ومش هنحسبها كل واحد يقعد عند امه وبالمناسبة

عيد الام ربنا يخليها ويديها الصحه 0 كل سنة وهى طيبة

عيد الكحك مضر وملهوش لزمة 0 كل سنة وانتم طيبين

عيد اللحمة مضر وملهوش لزمة 0 كل سنة وانتم طيبين

حلاوة المولد السكر مضر وملهوش لزمة 0 كل سنة وانتم طيبين

ورمضان كريم وخيره كتير

أخ خ خ نسيت احسب زكاة الفطر بس مش عارف هدفع ولا هأخد ؟

عموما هقولكم على قائمة الممنوعات والمحظورات 000 متقربوش منها علشان تعرفو تتنيلو وتكملو الشهر

ممنوع عنك الحلاوة والمربى والعسل والزبدة وكافة انواع الجبن عدا ماذكر فى التعيين ( الجبنه البيضا )

المعلبات تونه بلوبيف لانشون سالمون فول وطبعا البسطرمة والزيتون والمخللات ممنوووووووووووووووع

اوعى قلبك يحن لعيل من العيال وتجيبله شيبسى ولا ببسى أو كراتيه ونايتى عسلية بسكوت شيكولاته اياك ومنتجات العيال الصغيرين حتى لو حليب بالفواكهه او لبانه وجيلى كولا وهوهوز حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل

احظر اللحوم بانواعها البفتيك والاستيك والرقبة والموزة واللوزة كله كلام فاضى خليك فى تعيينك الاسبوعى

ومتنساش ان البانية والفليه من الممنوعات ومتقربش ومتمشيش فى الشارع جنبك كنتاكى وهاردييز وهاربيز وتكه ومؤمن وكوك دور واياك من السندوتشات عموما زى الطعمية والبطاطس والبذنجان الحجات الحلوة دى مش مطلوبه تعملك حموضه وهتحتاج فوار واحنا منعناه مع الدوا وطبعا مش محتاج اقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بانواعها يالعربى انت زى العصفورة تاكل عيش ودنيبة رز وتشرب ميه عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد

اهم حاجة مترحش لدكتور متجبش مدرس ولا ادوية واياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم

طبيعى انك مش هتقرب من الفواكهة خالص البرقوق المنجو البطيخ الفراوله الكيوى الخوخ العنب التفاح حتى الكاكا والحرنكش والنبأ والقصب والدوم والتوت ممنوع سيادتك واللا تبقى اتهبلت

وطبعا معجون الاسنان والحلاقة والشامبو والبلسم كلها رفهيات ملكش فيها زى البصل والتوم والبطاطس كلها اساسيات ملكش فيها برضه ومتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة وفكرهم يقولو لعيالهم لو شافو مسلسل فى التليفزيون مليان بهرجه ان دى قصص خياليه كانت فى العصور القديمة فترة من الزمن و ان الواقع زى ماهما شايفيين حتى الاعلانات حاولو تفهموهم انها مجرد الوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوربا كلها وان الحجات دى علشان لما الناس دى يجو عندنا يلاقو منها ويعرفو يعيشو هى مش لينا دى ليهم هما اصحاب البلد ولازم ينبسطو

عموما لو على الكلام مش هيخلص روح الحق طابوووووووووووووووووووووووووور العيش تبقى مصيبة لو عطلتك ورحت لقيت الفرن شطب

تم تعديل 27 مارس 2008 بواسطة number

[vipwithyou]

حلوة تسلم ايدك

طفشتنا من الدنيا يا راجل

[أبويوسف]

يا عمنا اديني ال 1000 جنيه الأول ةبعدين قول عيش بيهم

[المر]

العحيب فى موضوع المصلريف الى زادت عن حدها ان كل ما تسأل واحد ازاى انت بتكمل الشهر يقولك ما عرفش وان الفلوس الى هو بيصرفها اكتر من مرتبه بكتير.

[Toronto]

العحيب فى موضوع المصلريف الى زادت عن حدها ان كل ما تسأل واحد ازاى انت بتكمل الشهر يقولك ما عرفش وان الفلوس الى هو بيصرفها اكتر من مرتبه بكتير.

من سنة 2004 الي سنة 2005 عاذب محامى داخلي الشهرى 1500 مابدفعش ايجار كهرباء,غاز,مية,انترنت,تليفون تابت و محمول ,مصاريف سيارة,اكل و شرب,نثريات يعني كريمات شامبوهات بارفانات,و دخان,اكتر من ال 1500

اهيف.بس كنت عايش .ايلي عنده عيلة و عايز يعيش في مصر ب 1000

لازم يبطل سجاير و يكون انسان جديد,ما يستعملش السيارة الا في اضيق الحدود,مافيش فسح و لا مصيف,,ما فيش مجاملات و لا زيارات,,ما فيش مرواح القهوة,,الموبايل كارد و قضيها رنات ,, و الحذاء تركبلوا نص نعل.,قضيها ببلوفر و جاكت طول الشتاء,و بنطلون جينز علشان حلوته لما يتوسخ,, الصيف حذاء سبورت و جوز تيشرتات نص كم.

[ابتسامة رضا]

عجبني أوي انت زي العصفورة تاكل عيش ودنيبة

تصدق

هي الحكومة بتقنعنا اننا زي العصافير وفعلا بيصرفولنا رز التموين كله دنيبة وسوس

هتقولي سوس ليه

هقولك علشان السوس مكتوب علي المصريين لما الفول غلي علينا نقلولنا السوس في الرز

علشان منتحرمش منه

[adm adm]

طيب اعمل اية انا باللة عليكم قلولى اعيش اذاى وانا لاموظف لاحكومى ولا خاص وبدفع ايجار محل على قدة وايجار شقة وعندى ثلاث اطفال ومش حرامى مع انى شايف الكل بيسرق من كلة ومش عارف اسرق والمشكلة الكبيرة الضرايب هادفعها منين اة ماهو حق البلد عليا لازم يندفع ماهو بردة اما الدفع

اما الحبس وانا بقول اللحبس احسن على الاقل مش هاكل ولا هاشرب هابطل كلة

ولا انتوا عندكوا حل تانى

[واثق الخطوة]

الأخ NUmeber ولك من اسمك نصيب ..

ذكرت لنا أرقام مفزعة

أذكرك با لجملة الشهيرة " غلاء الأسعار غلاء عالمي"

طيب لماذا لا تصبح المرتبات عالمية ؟؟؟

[ziad]

أعرف ناس عايشه بنص الكلام ده,ربنا يعينا جميعا

[Dida]

امال الناس اللى عايشة فى مصر ب 250 وال 300 دول ازاى الى بياخد 3000 مش مقضيين والى بياخد 300 مش مقضيين وعجبى

[~Heba~]

انا عايشة ب 300 جنيه مصروف شهرى و انا لوحدى يعنى مش بصرف على حد(دا انا اللى بيتصرف عليا)

المهم ال 300 دى بصرف منها على ايجار السكن و الفواتير و الاكل و المواصلات و النت و اى مصاريف اضافية اخرى

و اهو ماشى الحال بس

بس

بس مباكلشى لحممممممممة :cry: :cry:

[حلواني]

كل كلامكم حقيقه لا تقبل الشك.الله يكون في عون اصحاب الاسر اللي عندهم اولاد

بس اللي محيرني من زمان اني لما بنزل مصر في الاجازات بلاقي الناس عايشه كويس وبيصرفو عادي جدا وعندهم كل حاجه ربنا يزيدهم مع انهم موظفين ودخلهم محدود ومبيسرقوش وتروح مع اصحابك علي القهوه متلاقيش مكان من كتر الناس وساعه الحساب تدفع علي الاقل 10 او 15 جنيه وفيه ناس كل يوم علي القهوه واكيد بياكلو ويشربو ويلبسو ويركبو مواصلات وبيدفعو ايجار وكهرباء وضرايب وتليفونات وموبايلات ودكاتره وادويه . اكيد المعادله 1+ 1=2 او الدخل = الخرج متنفعش في الحسبه دي

حد يفهمهالي

[Toronto]

:lol:

انا عايشة ب 300 جنيه مصروف شهرى و انا لوحدى يعنى مش بصرف على حد(دا انا اللى بيتصرف عليا)

المهم ال 300 دى بصرف منها على ايجار السكن و الفواتير و الاكل و المواصلات و النت و اى مصاريف اضافية اخرى

و اهو ماشى الحال بس

بس

بس مباكلشى لحممممممممة :lol: :lol: :lol: :lol:

اه ه ه علشان كده,فرجه قريب. :lol: