se_ Elsyed بتاريخ: 31 مارس 2008 تقديم بلاغ مشاركة بتاريخ: 31 مارس 2008 لا إله إلا الله وما دايم إلا وجه الله كلنا لها ما حدش واخد منها حاجه .. شكر الله سعيكم غفر الله ذنبكم .. هييييييييييييييييييييييييه دُنيا كل من عليها فان ----------------------- كل دي عبارات نسمعها في العزا ولازم تبقى عارفها وإلا وقعتك هاتبقى يبضا يا حلو وهاتبقى قاعد في العزا زي الأطرش في الزفة ولو حد رزعك جثملة من دول وما عرفتش ترد هايبقى شكلك وحش وهايقولوا عليك " مثستجد " ومُحدث مياتم ..... اللي يرجع للتاريخ بقى يكتشف إننا إحنا المصريين يعني ممكن يتقال علينا " ولاد موت " .. آه والله بنحب الموت قوي زي عنينا .. وبندلع ونروشن أمواتنا ... شوف كده الأهرامات الثلاثة .. أبويا الحاج خوفو واونكل خفرع وخالو منقرع .. دولاهما العتاولة الكبار ... وكمان كانت في مشاريع بُنى أهرامات تانية غير دول لكنها فشلت لاٍسباب مادية بحته ... تكاليف البُنا والتراخيص وأرتفاع أسعار الحديد المتسبب فيها الفرعون الأكبر " عــــز توت إخص " وده كان تاجر حديد كبير أيام الفراعنة برضوا وكان مبهدل الفراعيين وكان كل فرعون من دول امنية حياته إنه ياخد ولو سيخ حتى يبني به تُربته .. لكن الإيد قصيرة والإسياخ طويلة ... . كل الأهرامات دي بقى كانت عبارة عن قرافة كبيرة .. تخيل ؟ .. مقابر أو تُرب يعني .... بالذمة في دلع أكتر من كده ؟ يعني كبارات البلد يلموا الطوب والحجارة والدبش اللي في البلد عشان يدفنوا ريسهم ويدلعوه ويخدلوا ذكراه ويعملوا له تُربه خمس نجوم الناس تحكي عنها وتتحاكى وإن شالله عنه الشعب مالقى حجر حتى يُزقل به حد متغاظ منه ؟ ناهيك بقى عن التحنيط وما ادراك ما التحنيط اللي العالم كله لحد دلوقت واقف على حواجبه ومش عارف يتوصل لأسراره .. وتلاقي ناس تفتي دلوقت وتقولك : دول يا عم كان بيفضوا الجُتة بقى من جوه من الكرشه والفشة والممبار وبعدين يملوها زفت من اللي بيسفلتوا به الشوارع اللي قدام بيت الريس وحوالين بيوت الوزرا ... فالجته بتفضل زي ما هي بحالتها ، ويطلع واحد عالم تشريح تاني ويقولك مش صحيح ... دول كانوا بيفضوا الجته من جوه برضوا بس بيملوها ملح خشن فالجته بتبقى زي الفسيخة المخللة .. وبعدين يلفوها بقماش كستور من بتاع زمان عشان ما يدخلهاش هوا وتبقى منفثه .. كستور فرعوني بقى مش أي كلام اللي الواحد كان يفصل منه الجلابية من دول تفضل عنده لحد ما يموت لكن هي ما تدوبش .. فالجته بتفضل بحالة الفبريكة .. يطلع رأي تالت من عالم كيماوي ويقولك ... لأ يا عم دول كانوا بيستخدموا حركات كيماوية وزيبق أحمر من اللي الناس بتفتش عنه في المقابر الفرعونية اليومين دول عشان يرجعها شباب زي زمان ويديها باور هورس وحركات كده وكده وبلاش نفسر عشان معانا اولاد صغيرين بيقرأوا الكلام ده ومش عايزين نفتح عنيهم وكل واحد لازم يعتمد على نفسه ومجهوده من غير مساعدات خارجية ذات أثار جانبية وماحدش بينفع حد اليومين دول . وهكذا ... وناهيك بقى عن الدهب والياقوت والمُرجان وكل العفش والمتعلقات اللي كان بيتدفسوا في المقبرة مع النفر الفرعوني من دول ، واللي ناس عملت من وراه سبابيب نضيفه وبقوا ينمروا على أي فرعوني ميت طازه ويفضلوا مرقدين وموجودين في العزا وعاملين حبايبه وهما ولاد ... وعايزين يقشطوها .... لحد مع المعزيين يمشوا ويقوموا العيال الهلييبة دول كاسرين التُربة ومقلبين الميت وسايبينه بحتت الكتان والقطنة ودُمتم .. يا عيني امك يا بني اللي يشوفك من شويه ما يشوفكش دلوقت وإنت عالحديدة ..قصدي عالكتانة .... ، ويروحوا يبيعوا الحاجات المسروقة دي بقى في قاعة سوثبي وكريستي للمزادات العلنية.. واهو الحي أبقى من الميت والله يرحمك يا جدو سيبت لنا هبره جامده نعيش بها من وراك . يحضرني هنا لقطة من فيلم " المهاجر " لما إيه بقى أم البطلة ماتت فحبوا يحمصوها .. قصدي يحنطوها فباعوا اللي وراهم واللي قدامهم ولموا حتتين السيغه اللي مع حريمهم وإدوها للراجل المحنطاتي راح قايل لهم : كل اللي إنتوا لمتوه ده ما يحنطش رِجلها حتى .... شوفت الجشع يا جدع ؟ ... طب حنطها نص تحنيطه يا ناقص وما تكسرش بخاطر الناس الغلابة دول !!! ولا هو كده من الزمان والغلبان ريحته وحشه والتحنيط ييجي لحد عنده ويبقى كُخ ؟ نسيب الفراعين بقى ونمر كده على المساجد اللي ماليه مصر و اللي فيها قبور تخليداً لذكرى الاولياء واللي إنتشرت منذ العهد الفاطمي مروراً بالمماليك والعثمانلية ونلاقي منها اعداد بالهبل منها المعروف زي مسجد سيدنا الحُسين كده والسيدة نفسيه والرفاعي و و و و وصولاً إلى لمحافظات الاخرى ومنها المشهور زي احمد البدوي وسيدي طلحه والمرسي أبو العباس وسيدي الغريب بتاع السويس... ولو وصلنا شويه لداخل معاميق معاميق الريف هانلاقي عجب العُجاب وقبور على كل شكل ولون وموالد يوميه لناس مجهولي الهوية لمجرد إن الميت ده ممكن ييجي من وراه سبوبه .. نذور وموالد ودبايح ولحمه وفته للرُكب وفتح عينك تاكل ملبن وجلا جلا جلا .. وتلاقي المصريين لحد دلوقت في مسألة العواطف الموتية دي ما عندهمش تفاهم ... ولو كان واحد قريبك عنده ميتم قريب وما جتش تعزي وتاخد واجب القهوة ... اقسم بالله ممكن يخاصمك طول عمره .... على العكس الفرح لو ماجتش فرحه ممكن يعديها .. لكن الميتم ... نو واي . لازم تحضر وتزرف الدمع على المرحوم وتعدد مأسره ومناقبه وما فيش مانع لو كنتي واحده ست يبقى تروحي ترقعي صوتين .. مجاملة يعني عشان القاعدة تسخن . أخوكم اللي قدامكم ده قعد لحد أولى جامعة كده مالوش في المعازي ولا المحاشي حتى .. بجد والله .. لحد ما أبو واحد صديقي وحبيبي إتوفى .. وهو جاري في نفس الوقت .. فقولت ما ينفعش كده ولازم أروح اعزي وأقف جنب صاحبي واعمل أي منظر ، بالرغم من إن صداقتنا كانت ممتدة لعدة سنوات إلا إني لم ارى المرحوم ولا مره لظروف عمله .... شي غريب ؟ ... أنا هاعزي ؟!!! طب ده العزا ده المفروض يتراح له بملابس خاصة .. مش إسموكن وبيبيون وكلام من ده .. ولكن على الأقل لبس مش روش ... وبأفتح الدولاب يا أيها السادة الكِرام ... عشان أخويا عمال يستعجلني عشان العزا بدأ ويقولي إن الشيخ دخل في الربع التاني كمان .. إلا وأكتشف مفاجأة كانت الأيام مخبياها لي وما كانتش متوقعها ... فالنص التحتاني ما عنديش فيه أي مشكلة .. منطلون جينز أو أي حاجه غامقة والسلام ... نطلع بقى الادوار العُليا اللي ما بتوصلهاش ميه .. هنا بقى المصيبة والطامه الكبرى .. فهذا تي شرت مرسوم عليها مادونا وهي بتبوس جورج مايكل .... يا دي الكسوف .. ودول ايه اللي هايوديهم العزا ؟ وده قميص مشجر عامل زي اللي بيلبسوهم وهما رايحين مارينا ... ما ينفعش برضوا ده المرحوم كان راجل كبير ومحترم .. وده تي شيرت تاني لونه نبيتي غامق ........ حلو .. قشطه هو ده .... يا عيب الشوام ... بس ده كت ومن غير اكمام ، منتهى الإغراء وطبعاً فضيحة .. ما ينفعش كل ده وأخويا مشغل السارينه من بير السلم وعمال ينده ويحذرني إن الشيخ دخل في الربع التالت والعزا قرب ينفض وإنت لسه بتلبس يا أخي خلي عندك دم وأتنيل ألبس أي حاجه وأنزل بسرعه ... وهو مش حاسس بالمصيبة اللي أنا فيها .... يعني أوح العزا بمنطلون بس ؟ توب ليس يعني ؟ فقلت أحسن حاجه أقفل النور وأدب إيدي في الدولاب وزي ما تيجي واللي طلع في إيدي بقى يبقى من نصيب المرحوم .. ولحسن الحظ والحمد لله طلع في إيدي قميص لونه مش فاقع قوي .. يعني نقدر نقول لموني مدي على قلب خسايه.. فقلت شغال وأهو الجودة بالموجود .. يُتبع نزل يا عم طقم قهوة سادة هنا لحد ما أرجع ... وإنتو إعملوا لكو أي منظر .... اللي كاتب الموضوع ده مش ميت محروق .. اقتباس الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Scorpion بتاريخ: 31 مارس 2008 تقديم بلاغ مشاركة بتاريخ: 31 مارس 2008 ما نجيلكش في بصارة يا سي السيد ... بس من فضلك قول للعم اللي بينزل قهوة ده اني عايز اسبريسو .. مالياش في السادة و اللي عالريحة و الكلام ده. :blink: تسجيل متابعة يا أوستاز اقتباس كل اللي حيلتي زمزمية أمل... و إزاي تكفيني لباب القبر "صلاح جاهين" رابط هذا التعليق شارك المزيد من خيارات المشاركة
se_ Elsyed بتاريخ: 31 مارس 2008 كاتب الموضوع تقديم بلاغ مشاركة بتاريخ: 31 مارس 2008 ما نجيلكش في بصارة يا سي السيد ...بس من فضلك قول للعم اللي بينزل قهوة ده اني عايز اسبريسو .. مالياش في السادة و اللي عالريحة و الكلام ده. :blink: تسجيل متابعة يا أوستاز أسبريسو ؟!!!!!!!!! إنت في عزا يا أستاذ عيب كده .. مانتش في حفلة كوكتيل سيادتك آه لو يعرف سكوربيون أنا مستحضر له إيه في الموضوع ده ... كان قرا على روحي الفاتحة وحضر القُرص ام عجوة من دلوقت .... لكن حلاوتها في مفاجإتها اقتباس الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
Modest بتاريخ: 31 مارس 2008 تقديم بلاغ مشاركة بتاريخ: 31 مارس 2008 نزل يا عم طقم قهوة سادة هنا لحد ما أرجع ... وإنتو إعملوا لكو أي منظر .... اللي كاتب الموضوع ده مش ميت محروق .. بس من فضلك قول للعم اللي بينزل قهوة ده اني عايز اسبريسو .. مالياش في السادة و اللي عالريحة و الكلام ده. :blink: عمرك اطول من عمري يا سكوب .. كنت داخل أطلب اسبريسو لكن حيث كده خليها كافيه لاتيه و خلي الفلافور على ذوقك يا مرحوم سين سين :happy: كمّل يا مولانا :) اقتباس وقف الخلق ينظرون جميعا ... كيف أبني قواعد المجد وحدي وبناة الأهرام في سالف الدهر ... كفوني الكلام عند التحدي أنا تاج العلاء في مفرق الشرق ... ودراته فرائد عقدي إن مجدي في الأوليات عريق ... من له مثل أولياتي ومجدي أنا إن قدر الإله مماتي ... لا ترى الشرق يرفع الرأس بعدي ما رماني رام وراح سليماً ... من قديم عناية الله جنده كم بغت دولة عليّ وجارت ... ثم زالت وتلك عقبى التحدي إنني حرة كسرت قيودي ... رغم أنف العدا وقطعت قيدي أتراني وقد طويت حياتي ... في مراس لم أبلغ اليوم رشدي أمن العدل أنهم يردون الماء ... صفوا وأن يكدر وردي أمن الحق أنهم يطلقون الأسد منهم ... وأن تقيد أسدي نظر الله لي فارشد أبنائي ... فشدوا إلى العلا أي شد إنما الحق قوة من قوى الديان ... أمضي من كل أبيض وهندي قد وعدت العلا بكل أبي ... من رجالي فانجزوا اليوم وعدي وارفعوا دولتي على العلم والأخلاق ... فالعلم وحده ليس يجدي نحن نجتاز موقفاً تعثر الآراء ... فيه وثمرة الرأي تردى فقفوا فيه وقفة حزم ... وارسوا جانبيه بعزمة المستعد رابط هذا التعليق شارك المزيد من خيارات المشاركة
واحد تاني بتاريخ: 31 مارس 2008 تقديم بلاغ مشاركة بتاريخ: 31 مارس 2008 عندي شوية مواقف مع المعازي والمحاشي لذيذة موووت ... كمل يا مولانا وهبقى احكي عليهم ... تسجيل متابعة دايمة ... ولا دايم الا وجه الله اقتباس يا عابر الدهر سيب بينا أثر قدمك اياك تكون امعة وجودك شبه عدمك رابط هذا التعليق شارك المزيد من خيارات المشاركة
أسد بتاريخ: 31 مارس 2008 تقديم بلاغ مشاركة بتاريخ: 31 مارس 2008 وبمناسبة القميص لون قلب الخساية ده .. انا عايز كابوتشينو ماشي.. اقتباس في القصص الرومانسية القديمة .. يكتب المحب رسالة حب .. ويضعها في زجاجة .. ويرمي الزجاجة في البحر .. لا يهم من سيقرأها .. لا يهم هل ستصل إلي حبيبته أم لا .. بل كل المهم .. أنه يحبها ..وتاني .. تاني .. تاني .. بنحبك يامصر .. ... "إعلم أنك إذا أنزلت نفسك دون المنزلة التي تستحقها ، لن يرفعك الناس إليها ، بل أغلب الظن أنهم يدفعونك عما هو دونها أيضا ويزحزحونك إلى ماهو وراءها لأن التزاحم على طيبات الحياة شديد" (من أقوال المازني في كتب حصاد الهشيم) رابط هذا التعليق شارك المزيد من خيارات المشاركة
Folana بتاريخ: 31 مارس 2008 تقديم بلاغ مشاركة بتاريخ: 31 مارس 2008 السلام عليكم ورحمة الله..... البقاء لله ياجماعة... كُل واشكر.... لا مش دى...أه اهى شكر الله سعيك.. وأنا بأعزى...قصدى وانا بأقرأ الموضوع خطر فى بالى خاطرة غريبة...ياترى الفراعنة كانوا بياخدوا فلوسهم ودهبهم و اكلهم ليه. هل فعلا علشان لما يبعثوا يلاقوا مصاريفهم وسجايرهم وكدهوت ...ولا علشان ماحدش يورثهم؟؟؟ يعنى هل كان فيه ورث أيام الفراعنة؟....وعلشان كده بيدفنوا اموالهم معاهم كيد فى زوجاتهم؟ طب هل اللى كانوا بيسرقوا المقابر لصوص فعلا...ولا فرعونة هانم بتلم اهلها وتروح تاخد الفلوس علشان فرعون لما يصحى تانى يتشحور ومايتجوزش عليها؟ ما برضه لو اللى كتب التاريخ مجنون اللى بيقراه عاقل...ولازم نعرف السبب الحقيقى ... تحضر وتزرف الدمع على المرحوم وتعدد مأسره ومناقبه وما فيش مانع لو كنتي واحده ست يبقى تروحي ترقعي صوتين .. مجاملة يعني عشان القاعدة تسخن مش شرط على فكرة...أنا شخصيا كسرت القاعدة دى بالثٌلث.....وأى ميتم باروحه بيتقلب مسرحية كوميدية...لدرجة انى بادعى ماحدش يموت علشان ما اروحش أعزى... اولا ..بافضل واقفة بره عشر دقايق لحد ما اجمع نفسى...وادخل اقدم الواجب واقعد ...مافيش ثوانى الا وتجى لى هستيريا ضحك بطريقة محرجة جدا بصراحة...وده ينطبق على كوووووووول المحاشى اللى باروحها حتى فى وفاة الاحباب...مابارحمش ... والناس اللى يعرفونى اول مايشوفنى هلّة كده...يضحكوا ويداروا وشهم..تقولش رايحة اقدم نمرة... ويقوموا كلهم من جنبى...مش باتكلم خالص والله...بس افضل اضحك واخبى وشى بالطرحة... اللى مايعرفونيش يفضلوا يهدوا فىّ...ومعلش ياختى ماتعمليش فى نفسك كده.. واللى يعرفونى ياخدونى يخرجونى بره.... شىء محرج فعلا .... فين الشربات بقى ؟؟؟ قصدى القهوة كمل ياسيدنا السيد كمل مانجلكش فى حاجة وحشة اقتباس { لَّقَدْ كُنتَ فِي غَفْلَةٍ مِّنْ هَـٰذَا فَكَشَفْنَا عَنكَ غِطَآءَكَ فَبَصَرُكَ ٱلْيَوْمَ حَدِيدٌ } رابط هذا التعليق شارك المزيد من خيارات المشاركة
vipwithyou بتاريخ: 31 مارس 2008 تقديم بلاغ مشاركة بتاريخ: 31 مارس 2008 (معدل) وبمناسبة القميص لون قلب الخساية ده ..انا عايز كابوتشينو ماشي.. والله يا باشا انا كنت داخل اعزى واطلب نفس الطلب ياريت تنزل اتنين لو سمحت مساء الفل .. قصدى الله يرحمة .. تم تعديل 31 مارس 2008 بواسطة vipwithyou اقتباس أستغفر الله الذى لا اله الا هو الحى القيوم وأتوب اليه رابط هذا التعليق شارك المزيد من خيارات المشاركة
إيزيس بتاريخ: 31 مارس 2008 تقديم بلاغ مشاركة بتاريخ: 31 مارس 2008 ماحبش أروح عزا أبدا أصلي باحب النكد موت و أعيش القصص بأمانة و الناس تسيب أصحاب العزا و تراقبني بعين الشفقة و أنا أذرف الدموع فرادى و جماعات حتى لو ماعرفش مين الميت بس هو استايلي كده إسود فاتح مقلم على مشجر في منقوش اقتباس قُل لَّوْ كَانَ الْبَحْرُ مِدَادًا لِّكَلِمَاتِ رَبِّي لَنَفِدَ الْبَحْرُ قَبْلَ أَن تَنفَدَ كَلِمَاتُ رَبِّي وَلَوْ جِئْنَا بِمِثْلِهِ مَدَدًا رابط هذا التعليق شارك المزيد من خيارات المشاركة
se_ Elsyed بتاريخ: 2 أبريل 2008 كاتب الموضوع تقديم بلاغ مشاركة بتاريخ: 2 أبريل 2008 نسيب القاهرة شويه ونروح الريف نلاقي العادات مختلفة بكل تأكيد بسبب طبيعة الحياة والتقارب الشديد بين الناس هناك ... زمان قوي في أواخر السبعينات حيث كنت أهوى تقضيه الإجازة الصيفية في الريف وبالتأكيد عادات الموت والدفن والعزا مختلفة بعض الشيء نتيجة المجتمعات الريفية المترابطة والصغيرة كنت اجلس ذات مره داخل الدار ( يعني بيت بالانجليزي ) وفجأة سمعت صوت طبلة زي المرشات العسكرية كده فقلت اراجوز او فرح او حاجه زي كده وإذ بي أفاجأ ان في واحد ماشي معاه طبله عسكرية كبيرة وماشي يطبل عليها عشان يلفت النظر الى خبر سيقوله ويبلغ الناس ان فلان مات وان صلاة الجنازة هاتبقى بعد الضهر وهكذا لإن ببساطة عندنا مسجدين بس في البلد وميكرفوناتهم ما بتغطيش كل المساحة كلها واينعم بيذيعوا في ميكرفون المسجد ان فلان ابن فلان مات او فلانه بنت فلان ماتت لكن ده مش كفايه .. وبعون الله اخونا ابو طبلة ده بيبرم البلد كلها في نصف ساعة وبكده ماحدش له حجه والحاضر يبلغ الغايب ويسيب اللي في ايده عشان ييجي يعمل الواجب المدافن الريفية غالباً ما تكون على اطراف القرية وهي الفاصلة بين قرية واخرى ... وزي ما يكون اهل القرى بيخلوا موتاهم جنبهم عشان يونسوهم او بحيث يبقوا قريبين منهم ويروحوا يزوروهم في اي وقت . المقابر بقى بتبقى شكل اللي في القاهرة كده عبارة عن بنايه بالطوب او الحجارة تتكون من دورين مقسمة الى مجموعتين : - عين سفلية للرجال واخرى جنبها للنساء - وعين علوية لجمع عظام الرجال واخرى للنساء ... وبيسموها " العضامه " ودي لما الميت يقدم شويه وييجوا يدفنوا واحد تاني بداله فبيشيلوا عضم القديم ويحطوه فوق ويضعوا بداله الجديد . طب فرضنا يا فلاح اتنين ماتوا ورا بعض والتاني مالحقش يبقى عضم ؟ بسيطة .. بيرطنوا القديم على جنب وبيضعوا التاني بجانبه ... والمقابر يوجد لها حارس يحرسها منعاً للعبث بها ويُسمى تُربي وهو اللي بيقوم بتجهيز التربه على ما اهل الميت يغسلوه ويصلوا عليه ويذهبوا به الى مسواه الاخير ومن اساسيات كل عيله ان لازم يكون عندهم مقابر خاصة بهم .. يعني يتشاركوا فيما بينهم مالياً ويشتروا كام مقبرة لافراد عائلتهم .. ويجمعوا برضوا فلوس في حاجه زي صندوق زمالة كدة عشان ترميم تلك المقابر كل فترة خلاص دفننا الميت واخدنا العزا عند المقابر .. نيجي بقى من بعد العصر كده نذهب الى " المضيفة " ودي دار المناسبات يعني .. وكل كام عيله قريبين من بعض وفي بينهم علاقات نسب وقرابة وهكذا بيقوموا ببناء دار مناسبات ايضاً خاصة بهم للعزا اولاً ثم للافراح ثانياً والعائلات الفقيرة اللي ماعندهاش بتأجر الموجود ... ويبتدي المعزين يتوافدوا على المضيفة اللي فيها كراسي مرصوصة الضهر في الضهر وفي في ركن من المضيفة يوجد مٌقريء بيقرأ القرأن ويجب عليه ان يتوقف كل 10 دقائق او ربع ساعه لكي ينصرف الموجودون ويأتي بدلاً منهم معزين جدد وغالباً بيكون موجود اكثر من مقريء عشان لو الوقت امتد كل ده نخلي بالنا ان الستات مالهاش دور لحد دلوقت .. يعني لا بيمشوا في جنازة ولا بييجوا المضيفة معانا .. لكن دورهم بيبقى في الـ back office وبيعملوا اكل للمعزين الغرباء او اللي جايين من برا البلد ... ولكنهم بيبقوا مرقدين لادوار ستأتي بعد ذلك وتمتد وتتوغل وتنتشر فبالصلاتو عالنبي مع مرور الوقت هايكون عندنا طلعات نسائية متعددة منها : 1- الخميس ... وده اول يوم خميس بعد الوفاة وفيه بيزوروا المقابر . 2- الخميس الكبير .. تاني خميس بعد الوفاة 3- الاربعين ... 40 يوم بعد الوفاة .. ودي عادة فرعونية بحته والفراعنة كانوا بيعتقدوا ان روح الميت بتصعد الى السماء بعد 40 يوماً الى السماء 4- طلعة رجب ... طلعات جويه بقى وزيارات مقابر على ودنه .. اي والله على ودنه 5- طلعتي العيدين الصغير والكبير وفيهم جميعاً بيتم اعداد قُرص محشية عجوه وساعات قُرص سادة وفطير وممكن بلح وفاكهه وبيروحوا يفرقوها على الفقراء الموجودين حوالين المقابر وبينتظروا الزائرين لكي يحصلوا منهم على تلك الصدقات وتُسمى " رحمه ونور " على الميت . ولم يستطع كثير من ذوي الاصول الريفية والنازحين الى القاهرة والمُدن الاخرى التخلص من تلك العادات ولما ييجي الجيل الجديد زينا يتكلم ويقول لهم ان تلك العادات خطأ وحرام اللي انتوا بتعملوه ده .. يردوا ويقولوا : انت عايز الناس تاكل وشنا ويقولوا ما صدقوا خلصوا من الميت وما حدش بقى يروح يزوره ؟ لأ ازاي ؟ لازم نندفن احنا كمان بالحيا معاه نخلي بالنا برضوا ان كل ده انا اتحدث عن الوجه البحري ذو العادات الوسطية المعقولة اما ما اسمعه عن عادات العزا في الوجه القبلي فهو ما يُسمى " موت وخراب ديار " فأقل عزا بيكون 3 ايام ... ويا سلام لو انت من المدينة وروحت تعزي في الصعيد في قريب لك .. يبقى هاتتعطل وحياتك هاتقف طوال هذه المدة وانت وحظك 3 ايام او اكثر وخدهم بقى اجازة عارضه او بدون مرتب .. ومهما بلغ عدد المعزين فعلى اهل الميت واقرباءه ان يأكلوا ويشربوا جيوش المعزين طوال تلك المدة ولكن الاقارب والجيران لا يتركون فرصة لبيت الميت ليفعل اي اكل ويقومون هم بالواجب كنوع من انواع الترابط والوقوف بجانبهم في الازمات . يُتبع اقتباس الأحـــرار يؤمنون بمن معه الحق .. و العبيــد يؤمنون بمن معه القوة .. فلا تعجب من دفاع الأحرار عن الضحية دائماً .. و دفاع العبيد عن الجلاد دائماً رابط هذا التعليق شارك المزيد من خيارات المشاركة
kokomen بتاريخ: 2 أبريل 2008 تقديم بلاغ مشاركة بتاريخ: 2 أبريل 2008 (معدل) في المدن الكبيرة بالإضافة الي إذاعة خبر الوفاة بميكروفون المسجد يتم كذلك إذاعة الخبر بواسطة ميكروفون محمول على سيارة نصف نقل أو سيارة تاكسي يطوف المدينة في المنطقة التي حدثت فيها الوفاة ليعلم الناس بحدوث الوفاة ووقت الصلاة على الميت حتى يتجمع الناس لحضور الجنازة ويكون العزاء في الإسكندرية إما في صيوان كبير يقام في الشارع الذي كان يسكن فيه المرحوم .. أو في دار المناسبات بجوار مدافن المنارة وسط البلد ممكن يا سي السيد قهوة سكر زيادة بلاش تكون سادة تكون من :blink: البن البرازيلي في شارع النبي دانيال تم تعديل 2 أبريل 2008 بواسطة kokomen اقتباس أبو أحمد الأسكندراني رابط هذا التعليق شارك المزيد من خيارات المشاركة
Modest بتاريخ: 3 أبريل 2008 تقديم بلاغ مشاركة بتاريخ: 3 أبريل 2008 على ذكر تقاليد العزاء أتذكر يوم وفاة جدتي رحمة الله عليها. كان عمري حوالي 17 سنة و وقفت أتقبل العزاء مع أخوالي و آخرون كانوا يتقبلونه في الصوان .. الكلام ده في أحد المدن الجميلة بالدلتا المهم بقى لقيت خالي بيديني علبتين سجاير (لأ مش علشان اشربهم لإني كنت لسه بريء أيامها angl::) و بيقول لي أدخل اعزم على الموجودين في الصوان دخلت لفيت الصوان كلّه و رجعت له بالعلبتين ناقصين سيجارة واحدة بس .. يعني الراجل إداني أربعين سيجارة رجعت له بتسعة و تلاتين :rolleyes: لقيته بيزغر لي!! .. قلت له ماهو محدش راضي ياخد يا خالو .. قال لي تقف قدام كل واحد و ما تتحركش من قدامه إلا لما ياخد .. يعني تعزم بقلب كده مش عزومة مراكبية .. بيدخن و لا مش بيدخن لازم ياخد سيجارة .. الأصول كده :rolleyes: دخلت الصوان تاني بقى و انا كلي إصرار إن اللي مش هايمد إيده و ياخد سيجارة هاطلّعه بره الصوان و أوريله شغله ksh:: .. أه مادام الأصول كده بقى يبقوا لازم يمشوا تبع الأصول و إلا ماكانوش ييجوا يعزّوا gsm:: بس يا جماعة ... هما أول أربعين واحد و رجعت لخالي قلت له العلبتين خلصوا هات غيرهم علشان أكمّل الجولة bv:- اللي لاحظتُه برضه إن القهوة اللي اتقدمت في العزاء كانت مضبوطة .. يعني موضوع قهوة سادة طلع خيال علمي و محدش بيعمل كده لإن مش معقول ناس مكلفة خاطرها و جاية تقوم بالواجب يقوم أهل الفقيد يعذبوهم و يستخسروا فيهم معلقة سكر. نزّل آيس كريم للجماعة هنا يابني :cry: اقتباس وقف الخلق ينظرون جميعا ... كيف أبني قواعد المجد وحدي وبناة الأهرام في سالف الدهر ... كفوني الكلام عند التحدي أنا تاج العلاء في مفرق الشرق ... ودراته فرائد عقدي إن مجدي في الأوليات عريق ... من له مثل أولياتي ومجدي أنا إن قدر الإله مماتي ... لا ترى الشرق يرفع الرأس بعدي ما رماني رام وراح سليماً ... من قديم عناية الله جنده كم بغت دولة عليّ وجارت ... ثم زالت وتلك عقبى التحدي إنني حرة كسرت قيودي ... رغم أنف العدا وقطعت قيدي أتراني وقد طويت حياتي ... في مراس لم أبلغ اليوم رشدي أمن العدل أنهم يردون الماء ... صفوا وأن يكدر وردي أمن الحق أنهم يطلقون الأسد منهم ... وأن تقيد أسدي نظر الله لي فارشد أبنائي ... فشدوا إلى العلا أي شد إنما الحق قوة من قوى الديان ... أمضي من كل أبيض وهندي قد وعدت العلا بكل أبي ... من رجالي فانجزوا اليوم وعدي وارفعوا دولتي على العلم والأخلاق ... فالعلم وحده ليس يجدي نحن نجتاز موقفاً تعثر الآراء ... فيه وثمرة الرأي تردى فقفوا فيه وقفة حزم ... وارسوا جانبيه بعزمة المستعد رابط هذا التعليق شارك المزيد من خيارات المشاركة
badroora بتاريخ: 3 أبريل 2008 تقديم بلاغ مشاركة بتاريخ: 3 أبريل 2008 لا اله الا الله والله يا س س احترت فيك , حنوتى ولا مشرف ولا مؤلف ولا ايه بالظبط يعنى بتاع كله . احكى بقي عن طقوس العزاء فى نجعنا ومقارنته بالحضر وبعض الدول المتقدمة . حدانا فى النجع الفرح والمأتم واحد من حيث مراسم الاحتفال بالاكل يعنى اللى عاوز يتغذي روح يا اما فرح يا امى مأتم . اول ليلة الوفاة اهل المأتم كل اللى عليهم يعملوه هو البكاء والنواح والاقارب عليكم الطبيخ وخلافة وطبعا لكل عيلة حدانا فى النجع حاجة تسمي المصطبة او دوار كل بيكون عبارة عن قعدة كبيرة جدا بيتم فيها العزاء او كتبت كتاب حد لو منكتبش فى الجامع المهم . وبعد ما الاقارب يقوموا بالطبخ يبدوؤا بارسال الاكل الى المصطبة او المندرة او الدوار وكذلك ارسال الاكل للنساء دا سواء غدا او عشي الفطار بقي كل واحد تيجي تزور مامتها اختها صحبتها تجيب معاها عيس وحلاوة وجبنه وبيض وبرتقال bv:- معرفش ايه علاقة دا بدا بس هو دا سلو النجع عندنا . ويوقلون عيب ان حد يعزم على المعازيم اللى جايين يعزو باى شيء اثناء تأدية العزاء . الرجال بس هما اللى يعملوا اللى هما عاوزينه فى المندرة اما النساء عزاء بدون ضيافة . عمرى ماعزيت فى حياتى غير 2 مرة واحدة زميلتنا باباها مات من 4 سنوات روحنا نعزي وماماتها جابتلنتا شاي سادة بدون لبن بدون سكر قولتلها شكرا يا طنط مش باحب الشاى بصتلى باستغراب والكل بصلي انه يعنى عيب لازم تاخدى اخدت الكوباية وقلت لصحبتى اللى باباه متوفي انتى ابوكي مات احنا بقي ذنبنا ايه نشرب شاي سادة مش شربة المهم ضحكنا والناس طبعا اتكلموا علينا بس معرفش قالوا ايه ربنا يسمحهم . المرة التانية هنا فى البحرين واحدة شغالة معانا خالتها ماتت اتصلنا بها وقولنا هنجي نعزى كانت عزومة مركبية فكراها بقي هتقول لا متتعبوش نفسكم الا انها قامت توصفلي المكان احنا كنا خارجين بعد العزاء يعنى كان لبسنا عادى قولنا مش مشكلة هيقولوا علينا غرباء منعرفش سلو البلد المهم البيت كان فى مكان غريب اوى وكانت ماسورة مياة ضربة ومغرقة الدنيا روحنالهم هدومنا مطرطشة بماية مش نضيفة من الشارع ووصلنا قدام بيت العزاء واشكلنا مبهدلة كل مانرن الجرس تجلنا هيسترية ضحك نلاقي ناس داخلة نرجع لورا وبعدين تشجعنا ودخلنا اول مادخلنا كل الناس قعدوا يتنحونا ومستغربين مننا عالاخر وكأننا من كوكوب اخر . اول ماشوفت صحبتى اللى رايحين نعزيها حضنتها ومش قادرة اكتم الضحك والكل مفكرنى باعيط :rolleyes: وبعدين قاعدنا لاقينا ترولى كدا معدي ايشي حلويات وملبسات وشيكولاتة من جميع الانواع و وقهوة عربي مش بحبها وقزايز ماية واحدة جبني بتقولى ممكن تنولينيى غرشة ميه وانا واصحابي فطسنا من الضحك على كلمة غرشة دي اللى طلعلت ازازه فى الاخر قمنا مشينا وصحبتى دي عمتها ماتت قولنا نجيلك قالتلى لا بلاش تتعبوا نفسكم كانكم جيتم وزيادة ومش عرفة ايه السبب تفتكروا ليه رفضت نروح نقضى الواجب ونعزيها اقتباس A liberal is a man or a woman or a child who looks forward to a better day, a more tranquil night,and a bright, infinite future . رابط هذا التعليق شارك المزيد من خيارات المشاركة
Recommended Posts
انضم إلى المناقشة
You are posting as a guest. إذا كان لديك حساب, سجل دخولك الآن لتقوم بالمشاركة من خلال حسابك.
Note: Your post will require moderator approval before it will be visible.