هل اللي بياكل فسيخ يعتبر شخص محترم؟

[لخبطه]

ولاد حلال

انا جاي لى فسيخ من مصر أمبارح المودام بتقولى مش هعرف أجيب فسيخ علشان الوزن قولت لها بلاش هدوم العيال وهاتي فسيخ وبعد ما وصلت بنص ساعه كانت الوفود متراصه أمام باب الشقة كل واحد عايز كفله من الاخوه المصريين معاي في الحي ،،

الفسيخ بقا معاي قصه عشق تمتد عبر التاريخ تبدأ من أيام أبوي رحمة الله عليه كان لما يعزم حد من قرايبنا يجيب لهم فسيخ -بشرط طبعا أنه يكون أكيل - وتوارثت الأجيال العادة لدرجة أني بأًعزم عليه في الاجازات

حدانا بلدين مشهورين أوي بعمل الفسيخ الجيد

نبروه ودي مدينة صغيره تابعه للدقهليه قريبه من المنصورة

وبيلا ودي بردو مدينة أصغر تابعه لكفر الشيخ

وتلاقي بقا مريدي الفسيخ يضربوا أكباد الإبل ويسافروا يجيبوا الفسيخ ويرجعوا والناس في البلدين دول بقوا يعرفوا الفسيخ اللى بيسافر يعني بيعطيه لك أقل سوا وأكثر ملح بحيث يستوى في الطريق وفعلا بيوصل ممتاز

الريحة بقا مشكله

مره أكلت وبسرعه غسلت 7 مرات بس ونزلت الشغل وجه واحد من جنسيه شقيقه دخل علي وفجأه لقيته اشماز كدا وقالى فيه حاجه ميته هنا في المكتب ياعم مافيش يقسم بالله أنه فيه حاجه ميته وانا مش واخد بالي خالص وفين لما انتبهت انه انا ما غسلتش أيدي كويس وكان أني رجعت البيت تاني وقومت بعمليه الغسل المضبوط واللى هيا تطلب غسل اليدين كام مره بالليمون وبعده الصابون كام مره وبعده الغسيل بالبرفان .

الفسيخ هنا ( السعودية ) موجود بس بشكل تاني واسمه لخم وهو قرش مجفف ومملح

الاخوه السودانيين بيعملوا فسيخ بس مطبوخ و مالوش ريحه شكله قريب من العدس كدا

مالوش علاقه بالاحترام طبعا ياسيد زهيري لانه الفكرة لها علاقه بالتعود زي ماقال الاخوه وتشوفني وانا ماسك الفسيخه بقلب فيها على جميع الاجناب تقولى باكل في منجه عويسي

[se_ Elsyed]

حاسب أربط يا عم

انا جاي لى فسيخ من مصر أمبارح

حلفتك بالغاليين يا شيخ .. تباصي واحده لاخوك سين سين ... ( لو عندك زيادة يعني ) مش فالح بس تستشيرني في حاجات وحركات ببلاش ... لفها كويس ووديها لي الفرع عندنا في جده هابعتلك عنوانه وهما هايعملوا اللازم .

الفسيخ هنا ( السعودية ) موجود بس بشكل تاني واسمه لخم

لخم إيه ولخمه إيه ؟

يا عم هو إسم امه فسيخ في أي حته ... ومحلات الإخوة الفلسطينيين والأدرنيين بيعملوا إعلانات قد كده عن الفسيخ الغزاوي وتروح تلاقيه مصر من اللي بيتباع في العُيم أو بنده ... بس بيبقى معقم وملفوف في أكياس كده وتحس إنه مُعلب وغالباً بيبقى ني ...

لخبطه ما تنساش أخوك ...

واللي يقدم السبت .. يلاقي جميع أيام الويك قدامه ..

اخوك جاي له صفقة فسيخ أول شهر مايو لما حماتي تيجي ... بس ما تقولش لعدوك الريحه هاتسمع عندكو في جده .. بالمناسبة هي جايه هي وحمايا ونسيبي وهايقعدوا حادكو يومين يعملوا عُمره يكفروا عن ذنوبهم المستقبلية الفسيخية ... وممكن أخليهم يحودوا القفف والأقفاص والزلع عندك ... وتقيفها وتفلترها انت بمعرفتك .... وإدعي لأخوك

[إيزيس]

و بيقولوا المصريين في الغربة وحشين !! الناس زي الفل أهم تبادل زلع و فسيخ و قفف واحنا بردة اخوات :blink:

على فكرة اللي بياكل فسيخ لوحده عند جمهور العلماء لا يعتبر محترم أوي

تم تعديل 1 أبريل 2008 بواسطة قرنفل

[Scorpion]

Ghost كتب

و الكورين يكلوا الكلاب

الكوريين بس يا أستاذ Ghost

Mohamed كتب

كل اللى اعرفه عن الفسيخ انهم يذكرونه مرتبطا بنقل ناس للمستشفيات او للعناية المركزة.

واتذكر انه فى احدى السنوات اسرة كاملة فقدت حياتها فى اكلة فسيخ.

ربنا يكفينا شره

كنت من أشد المعجبين بأكلة الفسيخ عندما كان يتم عملها بضمير .... و لكن في شم نسيم نحس ... لم يتردد تاجر فاسد الذمة ان يبيع فسيخ مسمم بالفعل ... و من ضمن ضحاياه فقدت عمي و الذي كان ابويا الروحي بالفعل ... الله يرحمه ... و من يومها اصبح الفسيخ آخر شيئآ افكر ان اتناوله ....

و لو نفسي هفتني هي الأنشوجا و خلاص ....

بس طبعآ اكل الفسيخ مالوش اي علاقة بالأحترام او غير الأحترام ...

[مسافر زاده الخيال]

شوقتوني اجرب الفسيخ

لكن خايف.....بجد

ايه الطقوس المتبعة من شخص لا فسيخي

وايه حكاية الريحة ؟؟؟؟؟؟؟؟؟؟؟؟؟؟

[se_ Elsyed]

شوقتوني اجرب الفسيخ

لكن خايف.....بجد

ايه الطقوس المتبعة من شخص لا فسيخي

وايه حكاية الريحة ؟؟؟؟؟؟؟؟؟؟؟؟؟؟

يا عم مسافر اللي موجود في السعودية ده يعتبر شوكولاته مقارنة بالفسيخ بتاع مصر والله بجد ...

ممكن تلاقي حضرتك الفسيخ في محلات العُثيم أو بنده وهو مغلف ومعقم والكيلو بـ 40 ريال .. لكن زي ما قلت لك ... ليس بحلاوة فسيخ مصر ...

عامة عشان تبقى شخص عصامي وبدأت من الصفر ..جرب الموجود حالياً .. لحد ما عضمك ينشف ومعدتك تاخد عالمتفجرات دي .. وبعدين ممكن نباصي لك 100 جرام فسيخ مصري .... شويه شويه نزود لك الجُرعة لحد ما تبقى فسخانجي محترف .. وساعتها ممكن تلعب في أي نادي عالمي .

---------

السؤال اللي عايز أسأله للأخوة الفسخانجية المحترفين وذوي الصيت العالمي هو " أنا شاب في الثلاثين ربيعاً .. لست اكولاً بالمعنى المفهوم .. وعادي يعني .. ممكن اكل ما بين نصف إلى رغيف في الاكلة الواحدة مهما كانت .. ليه بقى نفس الشاب ده بيتحول إلى إنسان آنوي أكل لحوم البشر مع الفسيخ وبأضرب 4 أرغفة بالمستريح لو قمت نص بطن يعني مع الفسيخ إلى جانب البصل والليمون ؟ ليه هــا .. ليه ؟

بالمناسبة أنا لستو رنجاوياً ولا أطيق الرنجة على الأطلاق وبأحس إني بأكل ميه ساقعه لا طعم ولا لون لها ...

------------

محضر لكم النهاردة مفاجأت عديدة وهدايا ثمينة ..... وهي طريقة عمل الفسيخ . وأسرار شوفتها وعرفتها في مصر عن الفسيخ وهانشرح بالصور والرسوم المتحركة والجثث المتراكمة ليه الفسيخ بيبوظ وليه الناس بتتسمم منه ... وهانتكلم كمان عن " طقوس التطبيخ .. و كيفية أكل الفسيخ " ........ إنتظرونا بعد الفاصل

[se_ Elsyed]

عمار يا محاورات

بادعبس كده وانكش في المحاورات لقيت موضوع لأختنا drody عن كيفية عمل الفسيخ بطريقة سهلة وسلسه

الموضوع اهو

الأكل والصريخ .. في طريقة عمل الفسيخ

شكراً درودي وياريت كمان تقولي لنا طريقة عمل البصل الأخضر بالمرة ..

--------------

نيجي بقى لشغل المحترفين ونعرفوا الفسخانية بيعملوا الفسيخ إزاي

- طبعاً إحنا مش بنتكلم عن كيلو ولا أتنين .. إحنا بنتكلم عن كميات كبيرة ... جُملة يعني ... فتلاقي الفسخانية المشهورين بيعملوا الفسيخ اللي هو من السمك البوري في براميل خشبية وبيكتموها ويحكموا قفلها كويس جداً واوقات كثيرة بيحطوا حواليها طين .. أه والله ... لإن سر الخلطة هنا هو إن الفسيخ لو دخله نسمة هوا بسيطة في أثناء تخليلة يبقى عليه العوض وهايتملي دود ويفسد ... وده من أسباب إن في ناس بتموت منه ... وكمان هناك فسخانية معدومي الضمير بيلموا السمك البايظ ويعملوه فسيخ واهو بالملح طعمه هايروح وكل سنة وإنت طيب ..

ومن المعروف إن الفسيخ بيتعمل من السمك البوري ... داهو

- وفي كمان نوع تاني إسمه الملوحة ودي مشهور بها أهل الصعيد وبينزلوا مصر يبيعوها في زلع أو بلاليص زي دي

بس دي مديه شويه على فرعوني

وده بيعملوه من السمك السردين الصغير

دي بقى اللي ريحتها أعوذ بالله ... فإذا كانت ريحة الفسيخ قوتها 5 ريختر .. فالسردين المنقوع في ميه وملح ده بيبقى ريحته 15 ريختر فهرنهايت سنتيجريت

- في نوع تاني بقى وده المعلم الكبير والزبده كلها وأكل المحترفين مش الهواة ... سامعني يا زهيري

وبيسموه الجِزل ... بكسر الجيم مع تعطيشها حتى تموت من العطش وتشديد اللام وشد عليها جامد قوي ..

وده بيتعمل من السمك البلطي الكبير الحجم

وده مليان لحم ولما بيبقى معمول صح الصح بتحس إنك بتاكل زبده بتدوب في بؤك ... آه ياني .

والحاجات دي سعرها في مصر بقى نار وأرخصها الملوحه .. واغلاها الفسيخ و الجزل وسعرهم ممكن يوصل 70 ج للكيلو من الفسخانية المشهورين المحترمين عشان تبقى مطمئن إنك بتاكل حاجه نضيفة ...

------------------

طقوس أكل الفسيخ

لا تختلف كثيراً عن طقوس شرب الشاي الياباني من حيث لبس الكومينو والشبشب الخفيف أبو صباع مع التوكه اللي بيحطوها في الشعر والمشيه اللي عامله زي الروبوت .. ده بالنسبة للستات .. أما للرجاله فملابسهم بتبقى أقرب إلى ملابس مصارعي السومو قلالات الادب اللي مش لابسين حاجه اساساً ...

اولاً :

1- لازم الحركات دي تتاكل يوم جمعة أو يوم اجازة بشكل عام ... وتكون بعد الضهر عشان ما تفاجأش المعدة والقولون والحاجات اللي جوه بتلك المتفجرات عالصبح فممكن معدتك تقع منك .

2- تأكد تماماً إن إنت لا خارج بره ولا في ضيوف هاييجوا يزوروك جوه منعاً للأحراج والروائح الفسيخية والبصلية واللمونية .

3- قوم البس لك بيجاما مش هاتحتاجها تاني .. وإنتي ألبسي الجلابية بتاعت يوم الغسيل والتنفيض اللي عامله زي لبس سيدة في فيلم نحن لا نزرع الشوك عشان الروايح هاتلبد فيها ومش هاتطلع ولا باجدعها مسحوق مذيب للدهون وماتصدقيش كلام بيرسل وبونكس والكلام ده .

4- قبل الأكل إنطق الشهادتين إذا كنت مسلم ... وأتلو صلاتك للرب إذا كنت مسيحي .. وإذا كنت يهودي يبقى ما أعرفكش وإيه اللي جابك هنا يالا ؟ ..

5- حاول تستخدم أكبر قدر من الليمون عشان تكسر سم الفسيخ ... وتكون مجهز جنبك قد ربطتين تلاته بصل أخضر متنضف .. تسليك زور ..

6- لا تنس المشروبات الغازية وخصوصاً السفن أب عشان الفسيخ بيحب يعوم بعد الأكل ..

7- إستنى وخد نفس 5 دقايق بعد ما تخلص اكل وأحبس بكوبايتين شاي صعيدي تقيل بالنعناع .. عسى ان يخفف عنك ألام البطن والمفاصل .

8- مش هاقولك قوم نام لإنك بعد ما رزعت لك فسختين و5 أرغفة طباقي مع حزمتين البصل وقزازة السفن اللترين وربع مع الشاي الصعيدي ... هايغمى عليك وهاتروح في ثُبات عميق وكأنك سافف شريط منوم .

9- لما تقوم من النوم - لو قمت بإذن الله - مع نفسك بقى أقعد أشرب في لبن رايب مع بواقي قزازة السفن بتاعت الصبح واغلي شوية تفل الشاي اللي فاضل في البراد واشربه ...

الاكله دي يا جماعة مفيدة جداً لحالات البرد واتحدى واحد يأكلها والبرد يفضل في جتته لإنه ما بيبقاش حاسس بالجته من أساسة فبالتالي لن يضر الشاة شيئاً بعد سلخها ززز

شن النسين - شم النسيم - قرب وكل سنة وإنتو طيبين الشهر ده والريحة هلت .. بس ماحدش يخرج الجونينة ياكل حاجات من دي لإنها فضيحة وهاتلم عليك قطط المنطقة وهاتبقى عبارة عن شخص كريه الرائحة والناس هاتفتكر إن بقى لك سبع سنين ما ستحمتش زي الفنان عيسوي عيسوي الفنان البوهيمي المعروف .

نلتقي بعد الفاصل ..

[MZohairy]

مراتي (الغير مصريه) اتريقت عليا و على موضوع الريحه

و قالتلي إن كان على تنضيفه ففي حاجه اسمها جوانتيات (زي بتاعة الدكاتره كده) تتلبس اثناء التنضيف و بالتالي مفيش ريحه

و اذا كان على الأكل فالشوكه مش حتخليك تلمسه بإيدك

وان حبيت تغمس برضه مش حيلمس ايدك لأنك حتغمس بالعيش مش بإيديك مباشرة

و راحت مقشرالي فسيخه امبارح و قطعتهالي حتت صغيره و حطط عليها زيت و لمون

و فعلا مكانش في ريحه مش عارف ازاي wst::

Mzohairy

من غرفة العناية المركزه

مستشفى الحميات بالدمرداش

[se_ Elsyed]

مراتي (الغير مصريه) اتريقت عليا و على موضوع الريحه

و قالتلي إن كان على تنضيفه ففي حاجه اسمها جوانتيات (زي بتاعة الدكاتره كده) تتلبس اثناء التنضيف و بالتالي مفيش ريحه

و اذا كان على الأكل فالشوكه مش حتخليك تلمسه بإيدك

وان حبيت تغمس برضه مش حيلمس ايدك لأنك حتغمس بالعيش مش بإيديك مباشرة

و راحت مقشرالي فسيخه امبارح و قطعتهالي حتت صغيره و حطط عليها زيت و لمون

و فعلا مكانش في ريحه مش عارف ازاي wst::

Mzohairy

من غرفة العناية المركزه

مستشفى الحميات بالدمرداش

ده أنت بتتكلم جد بقى ..

جبتوا منين يابن الذين أنت ؟

هو في سلطنة عمان في فسيخ مصري من الأصلي يا نجم ؟

[لخبطه]

كان على عيني يابو عمر ياغالي لكن العين بصيره والايد ريحتها وحشة

خلص الفسيخ حتتك بتتك على قول قدماءنا الفراعنه ( الحتت عندهم اللى هو العظم والبتت اللى هو الجلد)

أنا كلى اللى طلع لي أنا والحرمه 4 فيسخات وهي رأفة بحالي اكلت واحده وان الثلاثه أكلتهم وكملت ببصل بقا

،، لكن علشان تعرف عدوك من حبيبك انا قولت ل Modest العيال جايين مش عايز حاجه مليون مره يقولى لا ( هيموتني من احترامه الراجل دا ) طبعا لو انته في باله كان قالى هات لابو عمر كليو ولا اثنين لكن طبعا انته مش على باله ( بنهدي النفوس )

الفسيخ بتاع هنا المغلف ناشف ومش حلو أنا بقصد باللخم دا حاجه قريبه في عميلها من الفسيخ

بخصوص موضوع حماتك أنا بحتفظ بحقى الشرعي في الصفقة وأكل حقي يعتبر واكل مال أيتام

[مسافر زاده الخيال]

طب ازاي يتعمل من الفسيخ شربات؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[MZohairy]

مراتي (الغير مصريه) اتريقت عليا و على موضوع الريحه

و قالتلي إن كان على تنضيفه ففي حاجه اسمها جوانتيات (زي بتاعة الدكاتره كده) تتلبس اثناء التنضيف و بالتالي مفيش ريحه

و اذا كان على الأكل فالشوكه مش حتخليك تلمسه بإيدك

وان حبيت تغمس برضه مش حيلمس ايدك لأنك حتغمس بالعيش مش بإيديك مباشرة

و راحت مقشرالي فسيخه امبارح و قطعتهالي حتت صغيره و حطط عليها زيت و لمون

و فعلا مكانش في ريحه مش عارف ازاي :wub: :blink:

Mzohairy

من غرفة العناية المركزه

مستشفى الحميات بالدمرداش

ده أنت بتتكلم جد بقى ..

جبتوا منين يابن الذين أنت ؟

هو في سلطنة عمان في فسيخ مصري من الأصلي يا نجم ؟

هوه نفسه بتاع السعوديه للأسف ياأحمد لكن ما باليد حيله

و ما لا يدرك كله لا يترك كله

[MZohairy]

طب ازاي يتعمل من الفسيخ شربات؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

دي تريقه يا مسافر

يعني زي المعجزه كده

الجمله مقصود بيها ان الشخص ممكن يحول التراب دهب او الملح سكر او الفسيخ شربات

[واحد تاني]

هوه نفسه بتاع السعوديه للأسف ياأحمد لكن ما باليد حيله

و ما لا يدرك كله لا يترك كله

أعتقد ممكن يكون أفضل حالا ... لأن عندك هما اكبر مصدرين بوري لهنا ...

اسواق السمك هنا أغلب واحيانا كل البوري اللي فيها بيكون عماني ...

أعتقد المفروض ده يرفع شوية من الحالة المعنوية للفسيخ ...

وعلى فكرة اللي ياكل فسيخ مرة واحدة في السنة ... ويكون منقوع في الزيت والليمون لمدة لابأس بها ... ومعاه شرايح البصل الاخضر والعيش البلدي السخن

مع اخذ جميع الاحتياطات الواجبة ... والانعزال عن المجتمع لفترة مناسبة بعد كده ... ده أكيد شخص محترم bv:-

[semsema]

انا مش بطيق حاجة اسمها فسيخ........ريحته لوحدها كفيلة انها تعذب بلد

[زهرة الجبل]

الموضوع ده جوعني :unsure:

انا بمووووووت في الفسيخ

و يا سلام عالفسيخ لما يكون سايح كده ومش حادق قوي

انا كده جوعت

وعلى فكره كلام الأخ لخبطه سليم 100%

ولاد حلال

حدانا بلدين مشهورين أوي بعمل الفسيخ الجيد

نبروه ودي مدينة صغيره تابعه للدقهليه قريبه من المنصورة

وبيلا ودي بردو مدينة أصغر تابعه لكفر الشيخ

وتلاقي بقا مريدي الفسيخ يضربوا أكباد الإبل ويسافروا يجيبوا الفسيخ ويرجعوا والناس في البلدين دول بقوا يعرفوا الفسيخ اللى بيسافر يعني بيعطيه لك أقل سوا وأكثر ملح بحيث يستوى في الطريق وفعلا بيوصل ممتاز

هم النباروه و بتوع بيلا دول صناع تاريخ الفسيخ المشرف

انت كده بالمعلومه دي أثبتت انك عضو محترم و مخضرم في رابطة عشاق الفسيخ النبراوي

وبعدين بقى ؟ أنا كده جعت

تحياتي لكل محبي الفسخ و آكلي الفسيخ و صناع الفسيخ

[se_ Elsyed]

طب بعيداً عن الفروماج والفروماكيه بتاعت زهيري

عايز اسأل سؤال :

ما هو مدى إحترامكم لأكلي الجبنة الحادقة أو كما يسميها البعض الجبنة القديمة ومشتقاتها من مِش وخلافة ؟

يا سلام عليها بالطحينة والطماطم والخيار المنزوع القشر ورشة زيت زيتون أو لو مافيش يبقى زيت عربيات شل سوبر بلص .. وفي الصيف يكون جبنها نص بطيخه ساقعة ودرجة حرارتها 5 تحت الصفر ، او لما يكون محصول الفول وفير وحلو في مصر ونلاقي بياع الفول الحراتي الأخضر سارح في الشوارع وتشتري لك نص كيلو ...وبرضوا تكله جنب الاكلة الهلامية دي ......... وكل ده يكون يوم جمعه .. لإن ما ينفعش أي يوم تاني ..

يــــــــــــــــــاه .. والله ما في إحترام أكتر من كده .

مازلت أتذكر منظر بيت أعمامي واخوالي في الريف وأنا صغنن .. لما كنت أطلع فوق السطح والأقي الزِلع - جمع زلعه - مرصوصة رص جنب بعضها ومحكمة الأغلاق بقطع من القماش ... وهي تحتوي على الإستوك بتاع السنة كله

والفلاحين لهم صنعة وحرفية في تصنيع هذا النوع من الأجبان ومكوناته هي :

1- جبنة قريش مصرية تتاكل حاف .

2- أسانس أو بلاش دي .. منفحه ... ولا دي كمان ... شوية مش قديم يعتبروا ركيزة أو خميرة لصنع زلعة كاملة ..

3- بضع ثمرات من فاكهة اللارنج .. وأعتقد كتير ما يعرفوهاش .. هي شكلها بيبقى عامل كده وهي من فصيلة الحمضيات ( ليمون برتقال جريب فروت ولارنج ) ... مع بضعة قرون فلفل أخضر .. وكثير من حبات الليمون .

4- ملح وشطة

كل ده بيتقفل عليه كويس قوي قوي لإن برضوا لو دخل له هوا وماكنتش الزلعه مقفولة بشكل محكم فبتتملي دود وما ينفعش يتاكل ...

كل ده يتصبر في الملاحات لمدة لا تقل عن 6 أشهر ... وبعدها أفتح وكُل يا معلم مع عيش فلاحي ملدن - محمص - بس يكون متسخن بسيط كده ( قرنفلة فهماني وحسه بيه طبعاً لما بأتكلم عن العيش الملدن أو المرحرح )

وبعد الاكله دي .. اللي يحبنا ما يضربش نار ..

------------

أختي من سنتين كده اخدت معاها شوية جبنه قديمة وهي راجعه الدنمارك - أصل اللي فيه طبع ما بينساهوش إن شالله يروح يعيش في القطب الشمالي - وراحت في أول فرصة عزمت اخو زوجها ومراته الدنماركية على جبنة قديمة بالطماطم والحركات ... وكانت عامله حسابها وغسلت الجبنة كويس منعاً لوجود دوده هنا او هنا ..

والست الدنماركية أكلت وانبطست وكانت مزقططه .. إلى أن حدث ما لا يحمد عقباه وقامت بعد الأكل تساعدها في غسيل المواعين ... وقال على رأي المثل " الستات لبعضشيها "

وإذ بالوليه تفاجأ بدوده وديعة و صغننه جداً ولا ترى بالعين المجردة كانت بتبلبط في حوض المواعين ... وإغذ بها ترقع بالصوت الدنماركي الحياني ويُغمى عليها ..

اعتقد إنهم فوقوها بفحل بصل أو حاجه من دول ... وزمانها أفتكرت يا كبد أمها إنها اكلت بتاع خمستاشر دوداية من دول ... عالم فرافير طبعاً ومعدتها سمباتيك واخده على الفروماج والفوتتير بروش بتاع زهيري .

[زهرة الجبل]

لا حرام عليك يا س س بجد والله كتير كده

يعني الواحد مش عارف يفوق من صدمة الفسيخ ومن امبارح قالبه الدنيا على حد جاي من مصر يشيل لنا معاه فسيخ

وانت جاي تقلب علينا المواجع بالجبنه القديمه كمان؟

ما هو مدى إحترامكم لأكلي الجبنة الحادقة أو كما يسميها البعض الجبنة القديمة ومشتقاتها من مِش وخلافة ؟

أجدع ناس

[إيزيس]

كل ده يتصبر في الملاحات لمدة لا تقل عن 6 أشهر ... وبعدها أفتح وكُل يا معلم مع عيش فلاحي ملدن - محمص - بس يكون متسخن بسيط كده ( قرنفلة فهماني وحسه بيه طبعاً لما بأتكلم عن العيش الملدن أو المرحرح )

طبعا يا باشا

أموت في الجبنة القديمة و من بعد وفاة تيتة الله يرحمها باكلها من مصدر واحد فقط موثوق منه

صديقتي المنوفية هنا في الإمارات و بنتعملهالي كل شهر كده لما تحن علي بالقشدة و الزبادي و الطحينة و الطماطم و زيت الزيتون و في الشغل بأة ووسع ياجدع

و الحمد لله كل اللي معانا عندهم فكرة سيئة عن الجبنة القديمة ولذلك ما حدش بيقرب ....أحسن

أما تيتة يالهوي على الجبنة بتاعتها

تيتة يا إخوتي لها أصول ريفية على تركية و طبعا عارفين العرق التركي شديد ومنظم و منمق شويتين ..الجبنة تعملها بإيديها و ومعاها الحلبة و قشر البرتقال و الشطة لمنع الكائنات الحية

وممنوع على أي شغالة و أي عيلة مننا (زمان طبعا كنا عيال و الله ) ولا أي كائن من كان يفتح الجرة دي

بس تيتة لأن لو دخلها هوا و اللا أي يد غير معقمة باظت الشغلانة فكنا نمشي وراها بالطبق

وتتقدم تيتة وتقص الشريط و تفتح و تطلع قطعة الإيسانس المركز بدرجة 99% و عيلة تانية شايلة قشر برتقال جديد و شطة

تسلمه لتيتة و تضعة على وش الجرة و عيلة تالتة شايلة إزازة الزيت و ترش تيتة الزيت في الجرة و تغلقها بأرقام سرية تحرص على ألا يراها حد من العيال

ونعود ومعنا الدرة المكمونة و الجوهرة المصونة

على فكرة لما اتنقلت تيتة لشفة في اسماعيلية كانت الجرة أول المنقولات لكن تقريبا هواها ماجاش على هوى اسماعيلية و انتحرت أصدي انكسرت في يوم مشئوم و حزين

فين أيامك يا تيتة

أنا هأقوم أكلم صاحبتي تحضر لي التعميرة مش كفاية مش لاقيين فسيخ خليها جبنة أهو حاجة معفنة و خلاص

[se_ Elsyed]

ما هو مدى إحترامكم لأكلي الجبنة الحادقة أو كما يسميها البعض الجبنة القديمة ومشتقاتها من مِش وخلافة

أجدع ناس

ميغسي يا أم كريم ... ممكن تقومي بمهمة إنتحارية في الاجازة الجاية وتجيبي برطمانين شيك كده وتلفيهم كويس بحاجات كاتمة للصوت والريحة وتمليهم جبنة قديمة وفسيخ وحركات .. وإنتي وحظك ... يا تعدي بالبضاعة ... يا يمسكوكي ويرحلوكي بتهمة تكدير الامن العام ..

أنا شايف قرنفل بتتسحب على طراطيف صوابعها وجايه تاخد لها لقمه ... بِسم الله يا أم اسامه ... حاجه على ما جُسم كيده .. ده أحنا زارنا النبي ... والله لو كنا نعرف إنك هاتنورينا كنا دبحنالك عضوين من اللي مداخلاتهم تقل عن 1000 مداخلة .... يا سلام يا ولاد .. وإحنا في ديك الساعة .