الضرب والتهبيل وكذبة ابريل

[se_ Elsyed]

ندخل عالتقيل

--------

ثم ماتت رابعه ..

لأ مش دي

ثم ما لبثت الحقيقة أن أنقشعت .. والكذبة قد أنفضحت .. والفِرية قد أشلولقت .. وعلم المحاورون والمحاورات .. بشأن المتمريون الأكراد .. قصدي بشان التأليف والإستكراد ... وأستحلفوا للمؤلفين الفاشلين .. بأن تكون وقعتهم طين .

-------------------

س س : وبعدين يا سي سكوب ... زي ما عميت اللي جابوها . تعالى كحلها وخليها تشوف تاني يابو التأليف ؟

سكوب : والمسيح الحي يا س س لو من أولها هاتشيلني الليلة دي . لأقلب الاعضاء ضدك ..

حشيش : تقلب إيه .. هما سحلب يا بني ادم ؟

س س : قول له ؟ أهو الراجل الصادق قالك أهو ... مش إنت اللي قولت لي دي كذبة بيضا يا سون سون ... دي البي بي سي نفسها بتعمل مقالب في البريطانيين يا سيكو ... دول مره قالوا للناس إن في مخلوقات فضائية نزلت في محلات شيكوريل بتاعت الفايد والخلايق جريت بقمصان النوم والشباشب والكل فك بجلده .. وبعدين طلع واحد مذيع يقول لهم إحنا ضحكنا عليكو يا عبط ورجعهم من على حدود فرنسا .... إنت ولا مش إنت ؟ ..

سكوب : دي حقيقة وكتاب الله .. والحلقة دي متسجلة عندي ..

حشيش : طب يالله حلها لإننا هاناكل ضرب ووشنا هايتملي تفافه يا حاج وفي عيال غلاوية وقلوبهم سودا عندك في المحاورات ممكن ينتقموا مننا شر إنتقام ويخرموا وشنا ..وساعتها حلقة البي بي سي هايبقوا حلقتين .. بس دي هاتبقى اخر حلقة

سكوب : صلوا عالنبي ... إحنا نروح نلبس ملابس كوميدية إحنا التلاتة .. يعني سين سين يروح يلبس التي شيرت بتاع قلب الخساية .. وإنت يا حشيش طلع البدلة بتاعت كروميت .. وأنا هالبس فالنه بحمالات على شورط مخطط وهاحط بطاطسايه في مناخيري .. وندخل على الناس في باب الإبتسام ونقولهم إحنا كنا بنهرجو معاكو ..

س س : وكتاب الله ما يحصل .. إنت فاكرنا أراجوزات .. ده أنا كاتب محترم ولي إسمي في عالم الادب .

حشيش : إنت صدقت نفسك يالا ؟ ده أنت ساقط إبتدائية ... فاكر ؟ ولا أفكرك ؟ فاكر سلاح التلميذ والمعاصر ياض ؟

سكوب : طب بلاش دي ... تعالى ندخل عليهم وإحنا مطأطأي الرأس و في منتهى الخجل ونشرح لهم الوضع وهما هايسامحونا ..

س س : تفتكر ؟

سكوب : نجرب ونشوف .

ثم ينطلق ثلاثتهم ورابعهم الشيطان ويتسحبوا ويتدألجوا وينسلوا من باب شئون المحاورات وهم يضعون أكفانهم على أيديهم ...

س س : هأ هأ مساء الخير يا جماعة ... إزيكم وإزيكن ؟

ناش والشرر يتطاير من عينيها كأنها ولاعه ياباني من أم كهربا : يا عينك يا جبايرك .. ولك عين تورينا وشك بعد اللي عملته يا رعديد ؟

س س : من فضلك يا أم ياسر .. لما تيجي تتكلمي يبقى إتكلمي بصيغة الجمع ... تصحيح .. يعني تقولي " يا عينكو يا جبايركو يا رعاديد " وكده يعني لأني ما كنتش لوحدي ..

ناش : وجاي تسمع لي ضماير المتكلم كمان ؟ ... ومانتاش مكسوف من اللي عملته ؟ ده أنت خليت رقبتي قد السمسمه لدرجة التحاجيب اللي عندي بقت تلُق في راسي ..

س س : يا ستي وكتاب الله مستعد انزل البطحا أجيب لك طقم تحاجيب بترتر من اللي قلبك يحبها بس إرضي عني .. ده قلب الأم مهما قِسي مش ممكن يقسى على ولادها ... وانا زي إبن من أبناءك

ناش : وكمان بتهلفط في الكلام وإنت عارف إن عندي 36 سنة وإنت أحتفلت بعيد ميلادك الـ 37 في نوفمبر الماضي ؟

س س : يا ستي مش وقت كشوفات حساب دلوقت .. إنتي عايزه إيه ؟

ناش : أنا عايزه أطبق في زمارة رقبتك وأقعد أزمر بها قدام عيالي وخصوصاً ياسر عشان ناري تبرد ... قال وأنا عماله اقول لياسر .. بص يا حبيبي إنت تروح تقنع زمايلك وتروحوا من بدري يوم الخميس الجاي وتقفوا صف قدام مكتبة جرير وتهتفوا وتقولوا " عايزين نقرا عايزين نقرا ... يا س س يا بلاش كاتب غيره ما ينفعناش " وتشتري يا ضنايا جوزين كتب وتدنك راجع ..

س س : جوزين كُتب ؟ إنت باعتاه باتا يا أم ياسر ؟ ..

ناش : أيوه إتريق إتريق لأخر مره في حياتك مانت مش داري باللي هايجرى لك ... ده الولد يا عين أمه صدقني وراح عمل لك دعايا بما لا يقل عن 3500 ريال بين أصدقاءه بالإضافة إلى لفيف من دكاترة جامعة اليمامة فرع أم درمان .. طب إذا أقنعت ياسر .. أروح فين من اللفيف ؟

س س : وكتاب الله أنا مستعد أروح ابوس على راس ياسر وأحب على لفاليف اللفيف دول وأعتذر لهم لفلوف لفلوف .

قرنفلة : سيبوهولي ... سيبهولي ... ولالالالا .... تحب تموت من الضرب ولا تموت من الخضه ؟ لأ وانا اللي عملت فرح بمية لنضة وكنت ناقص اعمل حنه واعزم الجيران .واتنطط عليهم واقولهم الست دي امي .. قصدي الكاتب ده ابن الزقازيق يبقى جاري وساكن في الغيط اللي جنبنا وانا وهو شربنا من ترعه واحده ..

س س : حتى انتي يا بنت ديرتي ؟ .. على أخر الزمن الشراقوة هايكلوا في بعض ونفرجو علينا المنايفه ... يا شماته منيا القمح فينا ...

قرنقله : الشرقية بريئة منك من أول الزقازيق لحد موقف السرفيس اللي جنب البوسطه وانت داخل على شارع المحافظة ... حتى التل الكبير .. فاكر التل الكبير يا سين سين ؟

س س : ايوه فاكرها بتاعت عرابي ..

قرنفل : فاكر عرابي ووقفته بمنتهى الشموخ بحصانه في قلب ميدان عابدين بالتل الكبير قدام الخديوي توفيق لما قال له : بص يا تيفا ... إحنا ربنا خلقنا أحرار .. ما تحل عن سمانا وتغور يا أخي ؟

س س: إنتي هاتمتحنيني تاريخ .. ما تضربي وتخلصينا بقى ؟

قرنفله : لأ .. مش هانولهالك وأريحك يا سين سين ... أنا مش هالوث مونيكري وضوافري اللي مربياهم عالغالي وهاسيبك للتاريخ هو اللي يأدبك .

س س : طيب يا أبلة الجغرافيا ... روحي بقى خامسة أول عشان الجرس ضرب ... وبعدين هو س س بس اللي كدب طب مانا كان معايا إتنين تاني سكوب وحشيش .. ولا إنتوا ما قدرتوش على إسمهم إيه وهاتقدروا على إسمه إيه ؟

موديست : لقد تلقينا الصدمة بقلوب حزينة ونفوسٌ كئيبة وضمائر مقيته ... هل بلغ بكم الجرم أنتم الثلاثة أن تتلاعبوا بنا الكرة كما تلاعب فريق حرس الحدود ذات مره بالزمالك أيام فاروق جعفر ولبونا 5/0 ؟ ... أقول إيه لممدوح عباس وعمرو زكي والواد الجديد محمد عبدالله ؟ وإذا خلصت من فريق الزمالك .. أخلص إزاي من عيالي كريم وهيثم وتامر ... وبالذات كريم بتاع جريد ون ... يا فضيحتك وسط الكلاس يا كريم يا شماته تيتشراتك فيك يا كيمو ... يا حلاوة صحباتك في البريك يا كركر ... يا طعامت ساندوتشاتك بالجبنة يا كوكو ..

سكوب : إيه يا موديست ... إنت محسسني إن في ذئاب بشرية إغتصبونا وجبنالك العار وعايز تتخلص مننا ..

موديست : ياريت .. كنت غسلت عاري وتاويتكو زي ما توينا هنادي في دعاء الكروان ... لكن الولد عندي حساس وهاينصدم لما يعرف إنه أصحاب باباه طلعوا نصابين ولموا فلوس الشعب وهربوا .

حشيش : ليه ؟ قالوا لك عليه رامي لكح .. وكتاب الله كل واحد دفع درهم مقدم في الكتاب هارجعهوله درهمين وفوقيهم بوسه بحنيه بس لما بورصة القطن تضرب وأرجع فلوسي اللي منطورة في السوق ...

موديست : إنت تسكت خالص لإني باتكلم مع أُس البلاوي سكوب لإنه أكبركم سناً وأرجحكم عقلاً ..

سكوب : ده من أصلك يابو كريم والله ... تسلم يا ذوق

موديست : إنت تخرس خالص .. ده أنا جمعت العيال يوم التلات اللي فات وفضلت أتمنظر وأتقنعر عليهم وقلت لهم أبوكوا دخل التاريخ يا عيال ..

رد علي كريم وقال لي : ليه يا بابا ؟ هو حضرتك هاتشترك في مظاهرة العيش بتاعت 6 إبريل ؟

قلت له : لأ يا حبيبي .. عيش إيه وفينو إيه ... فاكر عمك سكوب اللي كان بيستلف مني فلوس كل نص شهر يمشي بها حاله بقيت الشهر وماكانش بيرد الفلوس دي ؟

كريم : أيوه يا بابا مش ده اللي كان كل ما يتصل تقولي قوله بابا بيقولك هو بره ؟

موديست : هو يا حبيبي ... طب فاكر عمك س س ؟

كريم : عارفوا مش ده الاهلوي بتاع أبو تريكه اللي كان كل ماتش يجي يحدفنا بالطوب وإحنا واقفين في البلكونه وكنت بتدعي عليه وتقول : اللهي أشوف فيك يوم إنت والأهلي في يوم واحد يا س س ويكون يوم جمعة والناس اجازة ..

موديست : اهو جيه اليوم اللي هاتشوفوا يوم فيه يا ولاد .. ومعاهم عمكو حشيش اللي إنتو ما بتشربهوش .. قصدي ما تعرفهوش .. التلاتة دول يا ولاد بقوا من اشهر تلات مؤلفين على مستوى حوض البحر الأبيض المتوسط والاحواض التانية ... وبقوا مرشحين لجايزة نوبل ..

هيثم : ... حوض ... مرشحين ... إيه يا بابا هما سباكين أساساً ؟

موديست : بس يا ولد ... بصوا يا عيال .. التلاتة هايطلعوا في برنامجين النهاردة عالهوا في وقت واحد وهما .. برنامج العاشرة دقيقة .. والتسعون مساءً ... عايزكو تبلغوا زمايلكو وجيرانكو وأصحابكم في الكلاسات .. وأول ما يظهروا تهيصوا وتقولوا في بؤ واحد : أصحاب بابا أهم .. اصحاب بابا أهم وكده .

موديست موجهاً لكمه إلى وجه سكوب : خد دي الأول تحت الحساب قبل ما أنسى .. زوووووووووووو وهنا تنفجر نافورة من الدماء من عين سكوب اليمني ويصيح

سكوب : ودني ودني ... وا ودناه .. انا اصنجيت وما بقتش نافع

.

.. وهنا يفر س س وحشيش من أمام هذا الوحش الكاسر قبل أن يفتك بهم... ويصيح موديست بحزن : عقدت لي العيال اللي الله يخرب بيتك يا سكوب . حسبنا الله ونعم الوكيل .. حسبنا الله ونعم الوكيل ..

وهنا تنهمر بدريه في البكاء ولم يكفيها كلينكسات المنتدى كله وهي تندب وتقول : الناس خيبتها السبت والحد .. وإنتي خبتك يا بدريه ما وردتش على حد ..

فلانه : خير يا بداره .. نصبوا عليكي في كام المجرمين دول ؟

بدريه : ياريتها كانت فلوس يا ابله .. يا ريتها جت عالفلوس .. دول دمروا مستقبلي الطبي وطموحاتي الإكلينيكية ..

فلانه : خير فضفضي لأختك ... ربنا عالميفتري والظالم والنصاب والمؤلف كمان معاهم بالمره ..

بدريه : أنا يا أختي عرفت فكرة الكتاب منهم وإنه كتاب كوميداني وإنه هايكسر الدنيا .. فروحت للدكتور النوباتجي في المستشفى وهو بريطاني المنشأ وإنجليزي الجنسية .. وقلت له يا دكتور انا شايفه إن المرضى النفساويين كتروا اليومين دول وما بقيناش ملاحقين عليهم جلسات كهربا وعلاج بالميه الباردة والسخنة ... وما بقناش عارفين نخزنهم فين .. فإيه رأيك يا إكسلنس اتبع معاهم طريقة علاج جديدة إسمها العلاج بالضوحك ؟ فقال لي والله جود أيديا .. جو اهيد .. وفعلاً صرفوا لي بدجت ( إكتبوها .. يعني ميزانية ) وأسست القسم وإبتديت أقرأ فصل من الكتاب على العيانين كل يوم قبل ما يغمى عليهم ..

فلانه : وخفوا ؟

بدريه : العجيبة إن خمس عيانين من ضمن التلاتة الموجودين خفوا وبقوا زي الفل والنهاردة لسه شايفه إتنين منهم في الرود سجنال في شارع الرفاع الغربي كانوا لابسين مقطع وبيمسحوا قزاز العربيات وحالاتهم المعنوية عاليه جداً .. أقول أنا إيه دلوقت للدكتور بعد ما وعدني إنه هايسمي قسم الأمراض النفسيه ده " مركز الاخت بدريه .. للأمراض المستعصية " ؟

فلانه : عوضك على الله .. ما تخافيش انا هاقف جنبك وهاشغلك في مستوصف الأسرة اللي جنبنا بيدوا مرتبات هايله هناك ..

ثم تقترب فتاة في الرابعة عشر ربيعاً من المجموعة وهي تنتحب وتقول بالإنكليزية : جد هلب مي .. جد فورجيف مي ..

ناش : مالك يا شابه .. في حاجه وقعت منك ؟

سمسمه : بليز يا أبله ناش .. ما شوفتيش اونكل سين سين فين عشان أقول له : منك لله يا وِحش ؟

ناش : أه شوفتو .. لسه ضاربينه حالاً دلوقت وجري من الناحية دي والرجالة جريوا وراه عشان يجرجروه من شعره ويجيبوه تاني نكمل على الحتت اللي لسه ما ضربنهاش ... خير ؟

سمسمه : مش خير خالص يا طنط ... ده أنا أول ماعرفت موضوع البوك بتاعهم روحت جري وفشرت على صحباتي الاناتيم في الأسكوله وقلت لهم عارفين المؤلف س س ده ؟ اهو كان معانا في المنتدى وكنت ساعات بأقوله يا اونكل س س كده حاف من غير تكليف ... وهو يقولي نعم يا سم سم ه .. والله العظيم والله العظيم ... ومره كمان قالي صباح الخير ... وحياة نينه .. ، يقوم بعد ده كله يطلعني عيله قدام أناتيمي ؟

قرنفله : اللهي يجيلك شكه في اناتيمك يا سين سين .. ياربب تصبح في يوم الصبح بدري تلاقي أنتيم واحد هو اللي فاضلك وتتسحب منك الرخص في أول لجنه تقابلك لإنك ماشي بانتيم واحد .... ... يارب اللي يكسر بخاطر البنانيت الصغيرين دول ويصدمهم في أناتيمهم . يارب يارب اناتيمه تضرب وما يلقيلهاش قطع غيار في التوكيل وولا في وكالة البلح كمان ..

أما على الجانب الاخر وفي ركان هاديء من المحاورات كان سيزيف يقف ممسكاً بتلابيب سكوب وهو يقول له : ... فليسامحك الرب .. وليغفر لك خطيئتك .. هل هانت عليك نفسك إلى هذه الدرجة أيها الخاطيء المخطيء الخطاء ؟

سكوب : ما تحسسنيش إني يهوذا الإسخربوطي يا سيزيف وكلمني عربي وحياة والدك ... طبعاً احنا ولاد كنيسة واحده ومش ممكن تضربني .. صح ؟ صح ؟ صلي عالنبي كده وروق وكل شيء يتحل بهدؤ

سيزيف : اكلمك عربي وأصلي عالنبي ؟!!! ده انا لي الحق أن أُحدثك بجميع اللغات الحية والميتة حتى تشعر بخطئك وتندم على ما فعلت وتذوب خجلاً امامي كما تذوب شموع المذبح المقدس.... ألم تعلم بأنني كنت قد رتبت إجتمع مع قداسة البابا غداً بالمجمع المقدس لكي أحدثه عن إبداعاتك وكتاباتك ومؤلفاتك واحصل لك منه على بركه معنوية تدفعك الى الامام في طريق الامجاد السماوية ؟ ماذا سأقول له الان ؟ وبأي وجه سأقابله غداً بعد حديث الأربعاء ؟ انت لازم تتطهر ... ايوه تتطهر

سكوب : يا نهار اسود !!!!!!!!! وانا في السن ده ؟

سيزيف : كيف سمعتها ؟ انا قلت تتطهر ... يعني تغتسل من خطاياك قبل انا اقابل البابا الذي لا ادري الى الان كيف سأواجهه ..

سكوب : آه انا افتكرتها تتطهر التانية ... ما علينا ... تقصد يعني اتطشف صح ؟ ماشي بسرعة بس عشان ماستهواش واخد برد ... واذا كان عالبابا هو قلبه كبير ,ممكن تقول له يا سيدي عيل وغلط .. ودي كذبة إبريل ... وهاجي يوم الحد الجاي أعترف ... والرب نفسه بيغفر لأبناءه .. إيه هو أنا كفرت ولا طلعت من المله ؟

سيزيف : كذبة إبريل ؟ .. إن جميع شهور السنة من أول يناير حتى ديسمبر لبريئة منك أيها الخطاء ... إذهب .. إذهب وأغرب عن وجهي .. وحاول ان تندم وتطلب الرحمه والغفران من الرب .... جيت أوت .

سكوب : يا عم اوت أوت إنت هاتعملي فيها يوسف باشا وهبي في مرسحية رابسو طين ؟ ... الله يخرب بيت أفكارك السودا يا سين سين هاتوديني جهنم حدف عشان الكتب والزفت بتاعك ده .

ثم تنظر اماني الي س س بكل حنان الام فيقول لها : امونه .... امونه بعثت لها جواب ...

اماني : بعثت لها جواب هـــا ؟ واسكندرية وفريسكا وزنقة الستات والشماسي يا اماني.... طب انا هاوريك بقى شويت شغل اسكندراني على حق ربنا وهاخلي الانفوشي كله يتلم عليك وما يبقوش عارفين يلاقوا فيك مليمتر مربع سليم .. فاكر فيلم ريا وسكينة يا حمو ؟..

فيتهلل وجه س س : آه فاكرو ؟

اماني : اهو انا هاعمل فيك زي فريد شوقي ما عمل في زكي رستم في فيلم رصيف نامبر فايف ... يا مرسي يا ابا العباس ... استعنا عالشقا بالله

وينتفض واحد تاني مهللاً : وكتاب الله ابداً .... اوعي تتعبي نفسك يا اماني ... س س صاحبي وانا اولى بعاره .. واذا كان عالشُغل الاسكندراني فأنا كفيل اني انفخهولك ..

اماني : لأ يا واحد .. انا خدت نصيبي من الدنيا ... روح انت وربي البيبي اللي جايلك واحسن تربيته

س س : والله عال .. هو انا ساندوتش كبده هاتتعزموا عليه ؟ خلصونا في ناس تانية عايزة تعمل الواجب .

وفجأة ينتبه الأعضاء ويكتشفوا بأن حشيش يختبيئ خلف كومة من القش في باب الإقتصاد فينقضوا عليه ليضربوه ضربه رجل واحد بفأس واحده في وقت واحد .... فيصرخ ويقول : ما حدش يضرب ... شلاليت لأ أنا عندي البواسير .. وكتاب الله هاصوت وألم عليكو الخلق .. أنا كنت بأهزر معاكو وما كنتش ناوي أكذب وهما اللي غاووني ...

ثم تصدر عنه صرخة مكتومممممممممممممممه ويصيح الأعضاء من بعدها .. الله أكبر ... الله أكبر .... لقد قضينا عليه وآلهتنا العوالي .... فلنقلب المنتدى أب سايد داون ونأتي بالمارقين الأخرين لينالا عقابهما في الدنيا إنتظاراً لعقاب الأخرة .... هيا يا معشر قريش فلتستلوا سيوفكم وتسنوا رماحكم وتسرحوا شعوركم .. مين يعادينا هأ هأ .. في أراضينا .. كا كا .

[badroora]

اليوم على البي بي سي كان فى واحد بيتكلم بغل عن المصريين وكدبة ابريل وبيقول ان المصريين دول لسه مبطلوش العادات السيئة دى وانا كنت لسه بافكر احضر كدبة لاصحابي عشان نحتفل بابريل . :waf: المهم الكلمتين خبطونى فى ضميري تراجعلت وقولت بلاش احتفل السنه دي .

بس امبارح كنت باتكلم بفخر عن الكتاب وعمالة اتناقش مع صديقة لى حول كلمة منتوق وتقولى بس صعب اوى يكون الكتاب اسمة كدا وانا اقولها معرفش منتوف يعنى ايه

هى تقولى يعنى فقير وعمالين نتشاور وبعدين قولتلها بس يا ترى المؤلفين هينزول الكتاب ب س س وحشيش واسكوب ولا باسمائهم الحقيقة وقالتلى اقترحى عليهم ينزلو نسخة عالنت عشان نقراها قولتها ان شاء الله وانتهى الحوار وكلمتها تانى اليوم وبتسالنى عليكم شكلى هاقولها دى كدبة ابريل والله ما يقطع لنا عادة mft: ماليش نصيب فى التوبة السنه دى .

عموما دعابة حلوة ودمها خفيف .

واكتر شيء جعلها موثقة هو ان الفاضل اسد هو اللى كتبت الموضوع لانه جد جدا وقليل لما الاقية بيهزر .

عموما ربنا يوفقكم والكدبة تصبح حقيقة ان شاء الله قصدي الحلم يبقي حقيقة

:ninja: مع السلام عليكم

تم تعديل 1 أبريل 2008 بواسطة Badria Mekkawy

[~Heba~]

دى خبطة ابريل يا سين سين جامدة و الله بس انا من الاول مصدقتش مش على الصعايدة يا بوى

[Folana]

السلام عليكم ورحمة الله...

ياخوسارة.... mft:

وأنا اللى كنت حاجزة اربع نُسخ فى الصف الاولانى

علشان اشوف الكتابة بوضوح.....

؟عليه العوض ومنه العوض بقى فى ال...ال.... هو اربعة فى خماشر بكام؟

فى ال 57 جنيى ونص...

حيتخصموا من مرتباتكم فى الاشراف يافندية وحتتحملوا نصيب حشيش كمان

[nash]

لا....... والأول في باب شؤون .....علشان تبأة مظبوطه وأحنا صدقنا :sad:

من فضلك يا أم ياسر .. لما تيجي تتكلمي يبقى إتكلمي بصيغة الجمع

ياسلام..هو مين اللي اللي ظهر وجه يكلم الجمهور؟؟ اسكوب وحشيش فضلوا ساكتين وكان كل واحد حاطط ايده علي وشه قال وانا فاكرة قال قال قال ده تواضع الادباء ورهبه أول عمل ادبي قصصي روائي ..أتاري كل واحد مداري الضحك وكاتمه ومش قادر يتنفس ومصدرينك أنت...الفدائي بتاعهم

قال وأنا عماله اقول لياسر .. بص يا حبيبي إنت تروح تقنع زمايلك وتروحوا من بدري يوم الخميس الجاي وتقفوا صف قدام مكتبة جرير وتهتفوا وتقولوا " عايزين نقرا عايزين نقرا ... يا س س يا بلاش كاتب غيره ما ينفعناش " وتشتري يا ضنايا جوزين كتب وتدنك راجع ..

أيه ده أنت كنت معانا؟؟ :blink:

ده الولد يا عين أمه صدقني وراح عمل لك دعايا بما لا يقل عن 3500 ريال بين أصدقاءه بالإضافة إلى لفيف من دكاترة جامعة اليمامة فرع أم درمان .. طب إذا أقنعت ياسر .. أروح فين من اللفيف ؟

ياسلام...قال قال قال....ده انا اتصلت علي طوب الأرض وأتفقت مع الواد ياسر وابوة نشتري كذا نسخه للعيال الداكترة هناك علشان يشوفوا المصريين أهمه ..حيويه وعزم وهمه...ونشتري للعيال المدرسين بتوع الواد احمد هما والناظرة كتبادل ثقافي نوعي بين الحضارات المختلفه..وأهو بالمرة نغير السيديهات اللي الواد كل أسبوع يوزعها علي المدرسين :sad: وبالذات مدرس الإنجليزي بتاعه بأحدث الأفلام علشان يبأة يشوفه في الدرجات

سيبوهولي ... سيبهولي ... ولالالالا

قرنفله من فضلك انا مش عايزة اشوف دم بس..لا أنا عايزة اشوف ارواح بتطير

برايفت موديست...لاحظ انه بيرمي كلام علي الزمالكويه والفريق..يعني مش مكفيه اللي عمله ..لا جاي وبقلب ميت يجيب سيرة عمرو زكي..إلا ماشوفت زمالكوي قلبه طاوعه يعمل كده في اصحابه الاهلويه...ماتسكتش يا موديست

سي السيد..واسكوب وحشيش...إن شاء الله لو نزل الكتاب في مصر في فترة الأجازة هاتكون حركه جميله وهايكون سيزون والكتاب هايضرب.. وإن شاء الله بالتوفيق ...وربي يحفظكم من كل سوء

دمتم في رعايه الله وحفظه

[إيزيس]

و الكلمة الختامية في مؤتمر قمة قريش المحاورتية بدار الشئون الإجرامية للأستاذ القائد أبو هشام بن فلسعة فليتفضل

- أولا أهنئكم على النصر الجليل في شهر أبريل الفضيل و أبشركم أننا قطعنا رؤوس الرذيلة و طهرنا شبه الجزيرة

من هذا الشرذمة المختلفة و القلة المنحرفة و ها هي رؤوسهم تشهد لنا بالعزة و تحذر كل من تسول له نفسه بأن يعبث

بأحفاد أبي لهب و أم لهب.

و الآن أقيموا الأفراح وتعالي يا سلامة أطربينا و أسمعي القاصي و الداني ليعلم كل ذي كبد أننا أولاد العرب لا نرضى بالكذب.

:lol: :sad: :blink: :sad:

[se_ Elsyed]

يا نهار مش فايت

مش عارفه المنتوف يا بدريه ؟

والله العظيم كنتي فاكرك بتهزري

ده اللي ما قرأش المنتوف .. يبقى بجد ما دخلش المحاورات من أصله

وعقاباً ليكي تقري القصة دي 3 مرات في اليوم وتفرقيها على صحباتك كمان

عيشي بقى

رائعه الاديب الراحل حشيش ... المنتوف

[se_ Elsyed]

والله والله والله

لا استطيع ان اقرأ هذه الرائعة الا وانا مأمن نفسي

العيال نايمين

قاعد في اوضة الصالون مع جهازي ومنهمك في القرأة والقهقة بصوت عالي

[إيزيس]

انزل يا سكوب من ع المشنقة هات لنا أغنبة الكداب هيروح شرم الشيخ أصدي هيروح النار وارجع مكانك تاني ولوحدك

قاعد في اوضة الصالون مع جهازي ومنهمك في القرأة والقهقة بصوت عالي

إيه اللي نزله ده و كمان قاعد في الصالو ن...طلعه يا جدع

تم تعديل 1 أبريل 2008 بواسطة قرنفل

[Scorpion]

طب انا حنزل اهه .. بس اللي حيمد ايده عليا حلم عليه أمة لا الله الا الله...

:sad:

حاجة تانية .. ما حدش شاف جزمتي ؟؟؟؟ :blink:

[nash]

ما حدش شاف جزمتي

تحت الكنبه

[Alshiekh]

أنا عايز حقى !!!!!!!!!!!!!!!!

[إيزيس]

ما حدش شاف جزمتي ؟؟؟؟

الجزمة في شبرا بقالها شهرين

وحتى الزمزمية اللي حيلتك دي هتسلمها كمان

تحت الكنبه

لا يا نوشة دي جزمة كلاركس تبع أبو جهل خبيها لا حد يطمع فيها من الشياطين التلاتة

[Modest]

كدبة أبريل؟!!! يا نهار كوبيا :sad: ... و انا اللي واقف من الفجر قدام مكتبة جرير مستني تفتح علشان ألحق النسخة بتاعتي قبل ما سمسمة تيجي تلهفها :blink:

و كنت ناوي أقول لهم أنا الكاتب الكبير سين سين و أوقع اوتوجرافات بقى و اعيش .. و اهو طال عمرك كله في السعودية و محدش عارف سين سين من صاد صاد wst::

موديست : يا فضيحتك وسط الكلاس يا كريم يا حلاوة تيتشراتك يا كيمو :sad:... يا شماتة صحباتك في البريك يا كركر ... يا طعامت ساندوتشاتك بالجبنة يا كوكو ..

كوكو ايه اللي انت شايل همه.. الواد احمد اتصل بيا من مصر بعد ما عرف الموضوع و جاهز هو و شلة الكلية ييجوا يرنّوا عمو سين سين علقة محترمة ، بس انا قلت له خليك في مذاكرتك انت و اصحابك عشان أخاف تتمسكوا و مش عايزين مشاكل و انتوا داخلين على امتحانات آخر السنة.

كركر كفاية هايعمل الواجب و زيادة هو و اصحابه و اخرتها هانقول عيل و غلط :lol:

اتفق معايا يلم اصحابه و بدل ما يروحوا الملاهي بكرة الخميس هايطلعوا على بيت عمو سين سين و يحدفوه بالطوب ويخطفو الواد عمر رهينه لغايه ما يرجع الحق لاصحابه و كل المقدمات اللي دفعناها ترجع لنا على داير هللة wst::

كشفت راسي عليكو انتوا التلاتة يا س س يا محطم احلامي و يا سكوب يا مضيّع أمالي و انت يا حشيش يا مقطّع انفاسي

[Modest]

برايفت موديست...لاحظ انه بيرمي كلام علي الزمالكويه والفريق..يعني مش مكفيه اللي عمله ..لا جاي وبقلب ميت يجيب سيرة عمرو زكي..إلا ماشوفت زمالكوي قلبه طاوعه يعمل كده في اصحابه الاهلويه...ماتسكتش يا موديست

برايفت نادية :blink:

قرأت رسالتك المكتوبة بالحبر السري و إشتطت غضباً من كلام المذكور :sad:

لكن زي مانتي عارفة انا زملكاوي و قلبي أبيض و كفايه عليه اللي عملُه الحضري فيهم :sad:

[vipwithyou]

ايه دة هو انتوا هتدوهم جزمهم

لالالالالا دا انا هالمهم ويبقوا يقابلونى لو شافوهم تانى وخصوصا ً اللى تحت الكنبه علشان غاليه

وسيبوهم متعلقين كدة اسبوع ولا تشربوهم ولا ياكلوا ولا يتكلموا

وادوهم انذارات وحطوا مشاركاتهم تحت الرقابة لمدة 45 يوم قابله للتجديد

ويتم شطب المدعو سين سين من المحاورات نظرا لتماديه فى النصب على خلق الله

ياعم هو انا ناقصك دا انا شكلى هيتنصب عليا فى الفيزا التانية هى كمان

يلا هييييه نصيب

لما تنزلوهم ابقوا هاتوهم مربوطين كدة على الشرقية ووقفوهم عن عرابى فى المحطة وهنوقف لهم القطر وكل واحد يعمل الواجب وزيادة

اطمنوا هيتظبطوا خالص

وبعدين نبقى نجيبهم المنتدى تانى نقيم عليهم جميع ايام الاسبوع

ومع السلاموا عليكم

[امانى]

ياخبر كحلى منقط بقى الحكاية طلعت فشنك

لا وانا قال ايه واخدة الكورنيش من راس التين لحد ابو قير رايحة جايه اوصى بياعين الفرسكة واصحاب الشماسى واقولهم

عارفين الكتاب اللى هيبقى معاكم ده بتاع مين يقولولى بتاع مين يعنى اقولهم بتاع تلاتة قرايبى من اسرتى واقلكم على

سر يقولولى قولى يا معلمة اقلهم سى السيد كان مبسوط اوى وانا بقله على مكان منفذ البيع وهو اللى قالى عليكم ومن

ساعتها وانا واخدة الشط رايحة جايه لما نشفت من الهوى

بتضحك عليا يا سى السيد وبتغنيلى امونه بعت لها جواب امونه مين بقى فاكر مسلسل الراية البيضة ( وله حمو التمساحة يله)

فاكر سناء جميل واللى عملته اهى امونة الحنونة بقى استلمت الجواب وجيالك السعودية بالتمساحة ماهو لا ممكن اقعد فى

اسكندرية بعد كدة بعد ما راحت هيبتى وسط بياعين الفرسكة واصحاب الشماسى اقلهم ايه كنت بهزر ودى كدبة ابريل ها ها ها

لا انسى بقى اجى اخد حقى وبعدين ادورلى على حته ادارى فيها

ولحد ما يظهر الكتاب بحق وحقيقى انا فى السعودية عند نوشة او فى الامارات عند قرنفل

امونه

تم تعديل 2 أبريل 2008 بواسطة امانى

[nash]

أمونه ...من نوشه

قرنفله في الإمارات ...وبالتحديد في الجهراء عاصمه المجر

عندهم الدنيا ربيع والجو بديييييييع موووت

أما أحنا..فعايشين في بلاد الصقيع ونتف الثلوج التي تغطي قمم الجبال والطعوس الصحراويه..

حبيت بس اصحح المعلومه ....

حبيت بس أأر علي بتوع إسكندريه ( أحسن ناس ) فينك يا ست داليدا...

[امانى]

طيب قوليلى اهلا وسهلا الاول وبعدين رحلينى على الامارات

كدة برضه يا نوشة عماله تشكريلى فى الامارات وتعرفينى ان الجو عندكم وحش علشان مجيش يعنى عندك يا شماته

الاسكندرانية فيا وانا اللى بقول ليا ضهر فى السعودية عموما بعد ما اقابل سى السيد هناك على طول على قرنفل

ومتنسيش انا ليا كمان حته كبيرة اوى بره وفى جو جميل فى البحرين يتمنى اقولهم اروح عندهم حبايبى اوى برده

بس انا مستنية اما اشوف قرنفل هتقول ايه هى كمان يمكن تحمل هى كمان هم المصاريف وتقول لى الجو اتقلب عندهم

مع انى كنت ناويه املأ التمساحة خزين معايا من حاجات مصر اللى بتحبوها ماشى يا نوشة

امانى

[إيزيس]

بس انا مستنية اما اشوف قرنفل هتقول ايه هى كمان

أمونة واحنا في ديكي الساعة لما نشوف أمونة المزيونه

هلا هلا هلا هلا هلا هلا

هابعت لك لستة الطلبات ع الخاص

بس مؤقتا جهزي 85 دكر بط و 35 جوز حمام و 56 كيلو فسيخ و برميل عصير قصب و 73 كيلو برتقان سكري

و 69 كيلو بسيمة و 18 كيلو لب و 45 كيلو جبنة قديمة 78 كيلو بلح أمهات أصلي ماقدرش آكل منه كتير عشان سناني وووووووو هافكر و أقوللك

تم تعديل 2 أبريل 2008 بواسطة قرنفل