عايزة مكتب بيخلص تاشيرة السعودية من غير نصب

[samaa]

السلام عليكم ورحمة الله وبركاته

انا مسافرة لزوجى ان شاء الله استقدام

هو بعتلى الورقة وانا عملت التحاليل والكشف الطبى وفى انتظار النتائج المهم انا عرفت بنظام التاشيرة الالكترونية وانهم بيخلصوها عن طريق موقع انجاز الموقع اللى بياخد 10.5 دولار وان المكتب المفروض بياخد رسوم لا تتعدى خمسين جنيه بس انا ما اعرفش اى مكتب من التابعين للسفارة او الشركةة دى وروحت عند السفارة ما حدش افادنى بحاجة وكمان المكاتب اللى سالتها نصبوا على اللى يقولى 1000 جنيه واللى يقول 900 جنيه ياريت حد يفيدنى يا جماعة

وكمان انا رايحة ابها ياترى العيشة فيها ازاى ويارتى ممكن الاقى فيها اى شغل علما بانى مترجمة المانى

وكمان عشان اوثق شهادة التخرج بتاعى من السفارة هل انا محتاجة مكتب والا اقدر اروح اوثقها بنفسى من السفارة

ياريت اى حد يرد على بسرعة عشان خاطر انا محتارة وحاسة انى بغرق

وشكرا

[se_ Elsyed]

لا لا .. لن تغرقي وسي السيد موجود حتى لو دخلتي ورا البرميل يا أخت سما

مش عارف الرسائل الخاصة شغاله عندك ولا لأ .. بس هابعت لحضرتك رسالة فيها إسم مكتب محترم جداً في الدقي وتحديداً في محطة البحوث .. وقولي لهم إنك من طرفي وخلاص على كده .

والله يا فندم أبها حلوه ومش حلوه

حلوه علشان هي بلد سياحية وفيها منظار خلابه وهي عبارة عن مرتفعات وجبال شاهقة وخضر وميه وشمس عفيه بس ماعندهمش أوكسجين لإنه مرتفعة فوق سطح البحر زي ما قلت لحضرتك ...

مش حلوه عشان لا تُقارن بالعاصمة الرياض وجده ... وفرص العمل فيها ضعيفة جداً .. وألماني كمان .. ما يأكلش عيش ولا حتى توست هنا .. كان غيرك أشطر .. أنا زوجتي لغة ألمانية برضوا وقاعدة أهي بتسقع قُلل جنبي وأدي اللي أخدناه من إمبراطورية الرايخ الثالث .. يعني لو كانت إتعلمت الخياطة ولا شغل الإبرة أو الشغل في الأزرق حتى كان زمانها أكلتنا الشهد ... لكن كل شيء نصيب ..

اللغة الوحيدة هنا هي الإنلجيزية وإلى حد ما على خفيف الفرنساوي ..

مافيش داعي تتعبي نفسك وتصرفي فلوس على قلة فايدة وتصدقي الشهادات لإنك مش هاتحتاجيها

اهم حاجه تعملي تحليل فيروس الكبد الوبائي في أي معمل خاص خارجي .. وتشوفي النتيجة اللي بإذن الله اتمنى تطلع سلبية ...

عشان لا قدر لو عملتيها في المستشفيات المعتمدة من القنصلية وطلع في حاجه كده ولا كده .. هاتطحطي بلاك ليستد سنة كاملة .

وتاخدي جواز السفر مع الشهادة الصحية وتأشيرة الإستقدام وتعطيهم للمكتب وهاتستلمي التأشيرة خلال إسبوع .

التكاليف مش عارف كام بصراحة .. لكن هاتبقى حنينه بإذن الله

وتوصلي بالسلامه

[samaa]

ميرسى يا سي السيد على ردك واهتمامك وربنا يستر على باه هناك بس اسبوع كتير اوى ده انا عايزة اسافر فى خلال اسبوع وعلى العموم انا فى انتظار عنوان المكتب وربنا يخليك للغلابة

[se_ Elsyed]

معليش إنتي عضوة جديدة ومش مسموح لك بإستخدام الرسائل الخاصة ...

[samaa]

طب وبعين انا مسافرة بكرة القاهرة عشان انا من الدلتا ومش عارفة اعمل ايه وخايفة يتنصب على دلنى يا سى السيد اعمل ايه طب لو حد يعرف يا جماعة يقول

ده من قدم شئ بيداه التقاه وهنيالك يا فاعل الخير والثواب

[se_ Elsyed]

طب وبعين انا مسافرة بكرة القاهرة عشان انا من الدلتا ومش عارفة اعمل ايه وخايفة يتنصب على دلنى يا سى السيد اعمل ايه طب لو حد يعرف يا جماعة يقول

ده من قدم شئ بيداه التقاه وهنيالك يا فاعل الخير والثواب

ضعي حضرتك بريدك الألكتروني سواء ياهو أو هوت ميل وهابعت لك عليه المعلومات وهاقوم بحذفه مرة أخرى .

[الحازم حسن]

وكمان انا رايحة ابها ياترى العيشة فيها ازاى ويارتى ممكن الاقى فيها اى شغل علما بانى مترجمة المانى

للأسف يستحيل ان حضرتك تلاقي فرصة للعمل باللغة دي في أبها همه أساساً بيتكلموا عربي بالعافية

لكن النقطة الاهم وهي السكن العائلي لو حضرتك جاية في خلال شهر أو اتنين يعني في الصيف فلازم تعرفي ان الشقة اللي سعرها في أبها بيكون من 1300 الى 1500 ريال في الشتاء

بيركبها عفريت في الصيف وبيكون ايجارها حوالي 350 ريال في الليلة وأحياناً 500 في وقت الزحمة

يعني لازم جوز حضرتك يكون مرتب نفسه للوضع كويس وفي ناس معندهاش ضمير بيخرجوا العائلات وحتى العزاب من سكنهم لما بيلاقي فرصة انه ممكن يأجرها في الصيف بسعر مغري حتى ان في بعض عقود الشقق هنا بتشترط على أصحابها إخلائها في شهور الصيف.

لكن فرص العمل ممكن تكون متوفرة أكتر في خميس مشيط ودي بلد قريبة جدا من أبها حوالي 25 دقيقة بالعربية ومعظم اللي ساكنين في أبها بيشتغلوا هناك وبيرحوا وييجوا كل يوم وحسب تقارير في الجرايد فهي تالت مدينة من حيث نشاط الحركة التجارية في السعودية وفيها معاهد لغات كتيرة قوي ومدارس لغات كمان

بالتوفيق

تم تعديل 8 أبريل 2008 بواسطة الحازم حسن

[Dr.mmfriend]

فيه مكتب بجور السفارة اسمه فهد نت بيوثق الشهادات

الورقه ب 60 جنيه وبتستلم تانى يوم

اما التاشيره لسه مش وصلت للمرحله دى

وانا كمان من الدلتا بس رايح جزان

هق هق هق