قررت امشى نهائى اية رأيكم ؟

[مصري جدا]

الآخ العزيز..وفقك الله لما فيه الخير

اولا ....لازم تفكر بهدوء في الموضوع ككل ....أهم شئ أن الأسره تكون مع بعضها .....وبعدين يكون فيه دخل يكفل مستوي المعيشه اللي أنت عايشه.......وبعدين تكون مستريح مع اللي بتشتغل معاهم ويكون فيه مستقبل لتحسين الوضع

يبقي تشوف لو نزلت مصر حتحقق أيه من النقط دي..... ولو عندك وكملت حيكون فيه كام نقطة ناقصه ...وتفكر تحققهم أزاي

من كلامك المشكله في الدخل القليل وعدم وجود عمل أو مستقبل للتحسين ....يبقي رأئ تصبر وتحاول مع كفيلك بكل الطرق للوصول لما تريده أنت

بلا ش ترجع مصر ألا أذاكنت واثق أن فيه دخل كافي لمعيشتك أنت وأسرتك وأعتقد ده حيكون مش أقل من 3000 جنيه شهري

أتمني لك التوفيق

أنا مع الأخ تامر من أستفزاز بعض الأجابات ....بس أحنا أتعودنا منهم كده ...ربنا يوديهم كندا ويريحهم

تم تعديل 7 أبريل 2008 بواسطة مصري جدا

[hishamelsayed]

شاكر لكم جميعا

فعلا وصلني ال CV وتم عمل اللازم واللي فيه الخير يقدمه ربنا

ان شاء الله خير

تحياتي وبالتوفيق

[المكافح]

احبائى الكرام

لم اشعر فى حياتى بكل هذا التضامن والتعاطف مع مشكلة من مشكلاتى مثلما شعرت بها معكم

فأنتم بحق نعم الاخوة وارقى الاصدقاء

تحياتى الشديدة لكم ودعائى المتكرر للة عز وجل ان يفرج كرب كل مكروب وان يجعل كل كلمة طيبة قيلت لحل مشكلتى فى ميزان حسناتكم وان يرزقكم الله من حيث لا تعلمون .

ارسلت بالفعل امس ال c v لأخى هشام السيد وتفضل هو مشكورا ببيان انة استلمها وجزاة الله عنى خيرا

وحتى ان لم يوفق الله فيما لدية فيكفى انة ساعد ولو بكلمة طيبة

احبائى الكرام قرارى هذا الذى اشرككم معى فة اتخاذة ليس وليد اليوم ولكنى افكر فية منذ ما يقرب من العامين ودائما اؤجلة واقول لعل الله ان يصلح الحال بالشركة التى اعمل بها او غيرة

ولكن بالفعل الاحوال تزداد سوءا يوما بعد يوم سواء على الصعيد العائلى او الصعيد المهنى وقد وصلت لمرحلة الكرة لهذة البلد وللغربة بصفة عامة والتى لا يقدر فيها من هو اهل للتقدير واصحاب الكفاءة والخبرة .

ولكن ما ثار الشجن فى نفسى كثيرا دفع بى خطوة اخرى لإتخاذ هذا القرار ما تعرض لة عديلى ( زوج اخت زوجتى ) فقد اغترب هذا الرجل ما يقرب من الخمسة وعشرون عاما فى ليبيا اولا ثم فى السعودية اخيرا لمدة تقارب العشرين عاما وكان وحيدا بدون زوجتة واولادة الى ان اصيب هذا الرجل من عامين تقريبا بسرطان المعدة وظل يعانى منة وهو فى غربتة ثم بعد ان عاد الى مصر ليعالج من هذا المرض اللعين الى ان توفى منذ ايام قليلة

وكما تعلمون ذهبت كل مدخراتة القليلة من غربتة طيلة هذة السنين على علاج مرضة واكثر من ذلك

وذهب الرجل الى مولاة وليس لاولادة ولا لزوجتة معاش اجتماعى ولا اى مصدر للرزق يعيشون منة .

لا يوجد ذرة شك عندى ولا عندهم ان اللة لن ينساهم ابدا وسيرزقهم من حيث لا يعلمون .

ولكن ارأيتم يا سادة ماذا بعد غربة اكثر من 25 عام ........... لا شيىء

اعتذر للاطالة عليكم ....... واسف ان كنت قد ازدت همومكم .............. وتمنياتى لكم بدوام الصحة ونعمة الايمان

[madzoro]

ممكن اسالك انت عقدك هاينتهي امتى ان شاء الله ؟

عشان كان في خبر سمعته بس مش عارف هايطبق امتى بس ممكن يكون خلال السنة دي وهو :

(الخبر دة منقول من جريدة الوطن بتاريخ 2/12/2007 و يا رب يا مسهل الحال

اتجاه لنقل كفالة العامل عبر القنوات الحكومية دون الرجوع للكفيل

الرياض: طارق النوفل

كشف مسؤول قانوني بوزارة العمل عن مقترح ستتقدم به الوزارة في ندوة حقوقية بالرياض يتضمن انتقال كفالة العامل بعد انتهاء فترة عمله عبر القنوات حكومية دون الرجوع للكفيل.

وأوضح لـ"الوطن" مدير عام الشؤون القانونية بوزارة العمل محمد بن سليمان الدويش أن مشاركته اليوم في ندوة "حقوق المواطن والعامل في ظل ترتيبات الكفالة.. مشكلات و حلول" التي تنظمها الجمعية الوطنية لحقوق الإنسان، ستتركز على طرح توجه الوزارة نحو تعزيز الدور الحكومي فيما يخص نقل الكفالة, مضيفا أن منطوق التوجه المقترح يشير إلى أن آلية نقل كفالة العامل تأتي عن طريق الجهاز الحكومي بعد انقضاء مدة عقد عمل الوافد لدى صاحب العمل، ورغبة العامل في البقاء بالمملكة للعمل لدى كفيل آخر.

واشترط الدويش أن يكون نقل الكفالة عن طريق الحكومة ولا تمنح إلا للعامل الذي أثبت صلاحه وعدم مخالفته لأنظمة العمل والأنظمة الحكومية الأخرى.

وتعقد جمعية حقوق الإنسان مساء اليوم الندوة بمركز الملك فيصل للبحوث والدراسات الإسلامية, وتتضمن 4 محاور تتناول أهمية معرفة حقوق العامل والمواطن في ظل الأنظمة المنظمة للكفالة, وتسليط الضوء على الفجوة بين تلك الأنظمة والتطبيق , وبيان المشكلات والحلول في ظل معرفة حقوق المواطن والعامل.

وستخصص الندوة محورا حول حقوق العمال في نظام العمل القانوني يتناوله محمد الدويش، ويركز على الحقوق الامتيازية للعامل من رسوم وتذاكر والأجور والإجازات والعلاج ومكافآت نهاية الخدمة والعديد من النقاط الكاشفة لتلك الحقوق

ربنا يوفق الجميع

[جويرية]

يا أخي الحال في مصر صعب جدا

ممكن الأولاد يدخلوا مدارس عادية بدل المدارس الغالية دي

لا يكلف الله نفسا إلا وسعها

[waleedss88]

سؤال مهم لم تضعه في حسبانك انت محوش كام

لو عندك مبلغ محترم ممكن تبدا بيه مشروع مدروس وربنا هايوسعها عليك

مشروع متوسط المدى الهجره الى كند بصراحه ولا اروع مع ان القانون اتغير بيقولو للاحسون وناس تقول للاسوأ

ممكن تستثمر فلوسك في المقاولات مثلا في مصر (اقصد الاستثمار العقاري) اعتقد 200 الف بدايه معقوله (وبنفسك)

ممكن تتعلم المضاربه في البورصه (العالميه) وبنفسك تدر دخلا معقولا جدا ولكن عايزه دراسه وتدريب من سنه لسنتين على الاقل حتى لاتكون مقامره تحتاج راس مال متوسط حوالي 10000 دولار . قد تناسب ظروفك اذا انت تقعد على النت طول النهار ممكن تتعلمها قبل ان تستقيل.

انا كنت اعمل في وظيفه بمرتب محترم وتركتها وبدات اشغل لحسابي ولكن بعد ماحصل اوفر لاب بين دخلي القديم والجديد لان الظروف لا ترحم وتاكل اي تحويشه كبرت ام صغرت.

[م.سامح المصرى]

استاذى المكافح

عجبنى جدا ان حضرتك لم تلتف الى إناس لم يدخلو الموضوع او يشاركو فية إلا للمرح او الاستظراف

واولا واخيرا احب اقول لحضرتك صلى صلاة استخارة قبل اى شى حتى لو متيقن انه هايبقي كويس ليك

الرسول صلى الله علية وسلم كان بيصلى صلاة استخارة ابل ما يشترى حذاء

وان شاء الله ربنا هايكرمك بالافضل ان شاء الله

ويكون فى عونك

[vipwithyou]

الاخ الفاضل .. كلنا معرضين للمرض

كلنا مصابون فعلا

لكن.. الله موجود وانت تعلم ذلك جيدا ً

اولا البقاء لله فى قريب زوجتكم

فهو لم ولن يأخذ أكثر مما كُتب له منذ ميلادة

وانا على يقين من انكم على علم تام بذلك

اذن

من مشاركتم عرفت ان منذ فترة بسيطة تعدل الراتب واصبح 4500 ريال

كنت تعانى من المشكلة المادية وهو 3000 ريال

هل لازالت نفس المشكلة قائمة مع ارتفاع مصاريف المدارس للأولاد

لماذا طالما ان الشغل اللى حضرتك فين مفيهوش ضغط وقاعدين على النت

حاول لغاية لما الكفيل يوافق على نقل الكفالة انك توفر اى دخل آخر من عمل اضافى آخر

صدقنى ممكن

معلش هو تعب شوية لكن حاول

اشتغل دروس حتى لو قدرت

نزل اعلان فى الوسيلة انك هتدرس رياضة مثلا وشوف

بس برضوا خليك ورا نقل الكفالة

علشان الفيزا التانية هتكلفك تضحيات كتيرة جدا ً اهمها وخلى بالك من الحته دى هى اسرتك

علشان بجد ما تخسرش كل حاجة

انا فى رأيي انك لو عشت بس كويس معاهم أحسن ما تحوش ملايين وهما بعيد عنك

وربنا يهديك للصواب

شكرا

أخوك

تامر السيد

تم تعديل 8 أبريل 2008 بواسطة vipwithyou

[ايهاب سالم]

الحقيقة ان وضع اخينا مكافح نموذج لوضع كل المصريين بالخارج

لا احد يضمن الاستمرار فى عمله

و البلد ليست بلدك لتبدأ فيها عمل خاص

و لا يتم تقدير جهودك كما هو متوقع

و ده بيحصل فى بلاد الغربة كلها حتى كندا

على الاقل الواحد فى بلده يقدر يفتح مشروع خاص

و انا ادعو العاملين بالخارج التفكير جديا فى استثمار اموالهم فى مصر تحسبا لاى طوارئ

معلش ... بلاش نتكلم على حاجه منعرفش عنها

انا عشت في الخليج و في كندا و اعرف الفرق كويس

طبعا لا احد يضمن شغله في كندا ولكن اذا فقدت عملك لن يطردوك انت واولادك خارجها و ستتقاضى اعانه من الدوله تكفيك انت واولادك حتى تحصل على عمل اخر

والبلد بلدك والبيت بيتك بجد و بحق حقيقي مش كلام اغاني

ومفيش كفيل و لا كارنب و لا كلام فارغ من ده

وتقدر تحط صباعك في عين التخين لو معاك الحق

وضابط الشرطه يقولك sir مش انت اللي تقوله يا باشا

واذا كنت فاهم شغلك كويس سيتم تقديرك وتحصل على مقابل مجزي زيك زي اي حد مولود في البلد

مفيش مواطن ومقيم .... الناس كلها زي بعض لهم نفس الحقوق وعليهم نفس الواجبات

وتقدر تغير شغلك في اي وقت وتروح مكان تاني براتب اكبر

مش محتاج موافقة كفيل

وتقدر تفتح مشروع خاص وتمتلك عقار

[ايهاب سالم]

هاجر كندا

أقسم بالله العلى العظيم

انى لو مشرف فى المنتدى كنت لغيت المشاركات دى فورا

ايه يا جماعة

ليه كدة

الراجل فى محنه ربنا يكون فى عونه

لا حول ولا قوة الا بالله

والراجل متجوز وفى رقبته عيله

هدي نفسك بس شويه

انا لم اكن اسخر من المكافح

انا كنت باقترح عليه احتمال افضل من وجهة نظري من الرجوع لمصر او البقاء في الخليج

اولادك هيتعلموا تعليم افضل بمراحل من اللي بتدفع فيه دم قلبك حاليا و ببلاش

وهتقدر تغير شغلك زي ما انت عايز بدون الحاجه لموافقة كفيل

[magedghonim]

انا لم اكن اسخر من المكافح

انا كنت باقترح عليه احتمال افضل من وجهة نظري من الرجوع لمصر او البقاء في الخليج

اولادك هيتعلموا تعليم افضل بمراحل من اللي بتدفع فيه دم قلبك حاليا و ببلاش

وهتقدر تغير شغلك زي ما انت عايز بدون الحاجه لموافقة كفيل

-----------------------------------------------------------------------------

دة اهم فرق بين الخليج وبين كندا واستراليا

انت ممكن تعمل فلوس في الخليج

وبعدينن تلاقي الفلوس دي ملهاش قيمة في مصر مع الوقت

دة طبعا لو ربنا سترها وعرفت تحوش من اساسه

مش هنتكلم على ساعات العمل الطويلة وانعدام الاجازات وعدم الاحساس بالاستقرار

ولا هنتكلم برضه عن عدوم وجود فرص حقيقية للترقى او التطور

وطبعا مش هنتكلم كمان على انعدام الحقوق تماما ومليكيش اي ضمانات غير ان يكون كفيلك محترم وبيخاف من ربنا؟

انا بحكي من واقع تجربتي في السعودية كصيدلي وماضي على عهدة كبيرة

انا قعدت هناك 3 سنين في الرياض ربنا يعلم عدو علي ازاااي؟؟؟؟؟؟؟؟

بس:

عموما بقول للاستاذ المكافح

"فصبر جميل والله المستعان"

متخدش قرار مصيري زي دة الا متدرس اموروك كويس

وبلاش تنفعل وتتحرك من واقع رد الفعل رجاءاا

واهم شيء فعلا صلاة الاستخارة يصديقى

وربنا يوفقك ويكرمك

[المكافح]

اشكر كل الاخوة الافاضل الذين اهتموا بالرد على ومشاركتى فى تفكيرى فى اتخاذ هذا القرار وانا بالفعل هاخد وقتى فى التفكير جيدا وتدبير كل الحلول البديلة وذلك حت انتهاء العام الدراسى بعد شهرين تقريبا واكون بالفعل درست كل جوانب القرار وبمساعدتكم معى ايضا فى التفكير ومن قبل صلاة الاستخارة مرة واثنين وثلاثة حتى يقضى الله امرا كان مفعولا

وتعجبنى جدا المقولة التى تقول ( لا ادرى ان كانت حيث نبوى او قدسى او مجرد عبرة حقيقة لا ادرى )

لو ركب ابن ادم الريح هربا من رزقة

لركب الرزق البراق حتى يقع فى فم ابن ادم

تقبلو شكرى وامتنانى لكم

[kazabaza]

إذا أرهقتك هموم الحياة *** و مسك منها عظيم الضرر

وذقت الأمرين حتى بكيت *** وضج فؤادك حتى انفجر

وسدت بوجهك كل الدروب *** و أوشكت تسقط بين الحفر

فيمم إلى الله في لهفة *** وبث الشكاة لرب البشر

*****************************

سهرت أعين ونامت أعين *** في شؤون تكون أو لا تكون

فدع الهم ما استطعت *** فحملانك الهموم جنون

إن رباً كفاك ما كان بالأمس *** سيكفيك غداً ما يكون

معلش موجموعة الابيات الولى صعبه شويه.

اسأل اللة ان يفرج همك و يبارك في رزقكك.

[justtrying]

نصيحة لوجه الله

كل الي انت بتقوله ده اهون من الحياه في مصر

معنديش كلام تاني اقوله

سلام عليكم

[aimen]

نصيحة لوجه الله

كل الي انت بتقوله ده اهون من الحياه في مصر

معنديش كلام تاني اقوله

سلام عليكم

صدقت واهل مكه ادرى بشعابها - نحن ننظر للمشكلة من الخارج اما الموجود فى داخلها فله وضع اخر تماما

عاوز اقول

اللهم ارضيك بما اخترته سواء بإكمال الغربة أو العودة الى مصر

وان شاء الله حتتيسر امورك هنا او هناك

اللهم يسر لنا امورنا وارضنا بما نحن فيه يارب

[somayasaleh]

انا اشجع موضوع الهجرة لكندا

حياة ارقي وانظف وافيد للاولاد

اتكل علي الله وفكر جديا في الهجرة

من اجل حياة افضل للعائله كلها

ولكن رجوع مصر لا لا لا لا لا لا لا لا لا لا لا والف مليون لالالالالالالالالالالالالالالالا

وفقك الله

[mesk061]

اخى الغالىالعام الدراسى قرب على الانتهاء سافر اجازة وشاهد بنفسك الوضع فى مصر وبعدها احكم بنفسك هل تقدر على الاستمرار هنا ام لاونفس الوقت عندك فرصة هنا البحث على النت عن الوظيفة المناسبة وربى يوفقك

[إيزيس]

أدعو الله أن يختار لك الأفضل لدينك و دنياك

تم تعديل 16 أبريل 2008 بواسطة قرنفلة

[Toronto]

هاجر الي اى بلد تانية بس بلاش ترجع مصر.حفيقي ما قدرتش اعيش هناك اكتر من شهر السنة ايلي فاتت.

[حسام يوسف]

السلام عليكم

كنت أتابع أخى العزيز مشكلتك

ولم أرد ان أشير عليك برأيى

لأنى خايف أكون بضرك

لكن انا كان لية موقف فى السعودية

فى جدة

اخر العام الماضى

وكنت حضرتك أحد متابعيه

كفيل سعودى

لايعرف القراءة ولا الكتابة

ولا الادب

ولا الاسلام

ولا أدنى الاخلاق الانسانية

أصلة يمنى

حاطط لينا مشرفين يمنى

أحسن مافيهم

ثانوية عامة

ماشاءالله

طبق الاصل العلقة بتاعتك على رأى سعيدصالح فى العيال كبرت

وماشاء الله استحملت شهرين كاملين

كنت هموت فيهم

كنت بحس بالام فى الصدر تشبة الام الذبحة الصدرية

وانا مريض ضغط

وربناستر

وهداه لحد ماسابنى أمشى بعد ما كان عايز 12 الف ريال سعودى

بس

المهم انا هقولك رأيى والارزاق بيد الله

النقطة الاولى:

مادام انت بقالك 5 سنين

يبقى أكيد حصلك تكيف

ولو بصعوبة

هل انت تعبان دلوقتى لدرجة انك متأثر صحيا؟

لو الاجابة اه

يبقى الارزاق بيد الله

ارجع مصر

انا رجعت مصر وماكنتش عارف هعيش منين

صيدليتى قفلتها لأنها كانت خسرانة

وماكانش ينفع اشتغل مندوب دعاية

لانى كبرت

وقعدت شهرين ابويا بيصرف علية

انا ومراتى

وبعدين جاتلى الفرصة

واتعينت مدير جنوب الصعيد فى شركةأدوية

حاجة ماكنتش ممكن أصدقها ابدا

لكن ربنا كبير

وفوق الظلم

وبالرجوع لموقفك

لو انت تعبان بس ممكن تمشى كمان شوية

بدون مايكون لده تأثير على صحتك

كمل شوية

حتى يقضى الله أمرا كان مفعولا

النقطة التانية:

لو رجعت مصر هل عندك بديل؟

ولو مافيش فكر من دلوقتى

جايز دلوقتى تقدر تكمل

لكن بعد كدة

لأ

اسف لو طولت عليك

بس انا عايز اساعدك

الله يخرب بيت السعودية

على اليمن