نفسي فى حياة جديدة ( انا حلمى بسيط) !!!

[badroora]

يلا يا شباب ويا شبات كل واحد يجي هنا ويتخيل الحياة اللى نفسه فيها ويوصفهلنا بالظبط كأنه بالفعل عايش فيها

وانا هبداء بنفسي

انا نفسي فى بيت وسط غيطان وحواليا جيران على بعد كام فدان

اصحى الصبح بدرى على صياح الديك والفجر يشقق والشمس تطلع وتعلن يوم جديد .

نفسى فى حياة هادية بعيدة عن الاضراب ولا حكومة قاسية مايملى عنيها الا التراب .

نفسي فى بيت من طين وسقفة خشب زان وازوقه بايدي واعيش فى راحة بال .

مش عوزاة سيارة اتوه وانا فيها وابعد عن طريق نفسي المسة برجلى

مش عاوز زوج غنى ولا يلعب 3 ورقات نفسي فى فلاح مكافح ينام ويصحي من سكات :lol: يا سيدي

دى كانت المقدمة كدا خطرت على بالى قولت اسجلها .

نفسي فى بيت فى الريف ويكون حواليا جيران بس قليلين .

البيت دا بقي عوزاه مبنى بالطين والارض مش مبلطة بس متساوية

وقدام البيت حوش كبير فيه فراخ ومعيز وجاموسة وحمارة وكلب اليف

البيت يكون عبارة عن 3 غرف وحمام ومطبخ وصالة

البيت متمحر بالطين ومتبيض بلون ازرق ومتسقف بخشب وفوق السطح حبلين غسيل .

وطرمبة قدام البيت

غرفة النوم عبارة عن سرير مبني من الطين وعليه مرتبه وكليم وجنبة كوميدينوا عشان ينحط عليه القله

غرفة العيال عبارة عن 2 سرير صب بردوا وبينهم كوميدينو صب ومكتب صب وكرسيين صب لزوم المزاكرة

ولمبة بجاز

غرفة المعيشة عبارة عن شباك فيه قلتين وراديوا قديم وحصيرة ومسندين وشلتتين

غرفة الضيوف

حصيرة وملفوفه بمساند زى قعدة عرب كدا

الزوج يكون اسمة ابو الخير

فلاح اصيل

يكتب ويفك الخط

فقير المال غنى القلب والعقل

ولادى

بهية

وابنى حسنين

وانا طبعا نجفة او لواحظ خليها نجفة

اصحي الصبح بدري على صوت الاذان اصحي ابو الخير يصلي هو يروح الجامع وانا اصلي فى البيت .

وبعد الصلاة اروح احلب الجاموسة واسحن لبنها واروح عند الفراخ اجيب البيض بتاعها واروح الغيط

اجيب طمطمتين وشوية جرجير وشوية فول حيراتى وشوية برسيم للطيور والمعزة

وبعدين احط البيض يتسلق واحط البرسيم للطيور والمعيز واروح عند الحمام ازغطة بايدي

تكون الشمس شقشقت وابو الخير رجع من الجامع

يقعد سلطان زمانه فى المندرة وانا اروح اصحي الولاد

قومى يا بهية قوم يا حسنين هتتأخرو على الكتاب والشيخ هيضربكم

العيال يصحوا ويروحوا على الطرمبة يساعدوا بعض فى غسيل الوش والاسنان.

انا بقي سخنت اللبن وسلقت البيض وغسلت الجرجير والفجل والفول

وسخنت العيش وطلعت جبنه من اللى عملاها بايدي وشوية مش صغيرين وشوية عسل اسود .

وفتحت الراديوا على اذاعة مصر .

ابو العيال يا نجفة ليه تتعبي نفسك وتصحي كل يوم الصبح وتفطرينى وتفطري العيال

نجفة يوه يا ابو الخير انا سمعت من يومين فى الراديوا عن وجبة الفطار مهمة جدا للمخ يعنى تعتبر اهم حتى من الغذاء

حسنين بلؤم يعنى يا امه كدا مافيش غدا

نجفة لا يا ضنايا فيه غدا وعشه كمان

اكلوا العيال وراحو الكتاب

ابو الخير شال الفاس وراح على الغيط

ونجفة بتنضف البيت وخلصت شغلها

وحضرت الغدا

جم الولاد من الكتاب

شالت الغدا وقفلت الباب وراحت لابو الولاد الغيط

ابو الخير انت جيتى يا غالية طبعا يا ابو ولادى

وليه التعب يا نجفة انت سيدي واللى لى من الدنيا :lol:

فرشت ملاية وحطت عليها الاكل ويلا يا حسنين بهية تعالى

ابو الخير شكله مش مبسطوط

نجفة مالك يا ابو بهية وحسنين لا ابدا مافيش انت زنبك ايه كفاية عليكي امور البيت وصحتك على قدك

يا خير قول يا ابو الخير ان شالله تعدمنى .......لا من غيرك اضيع

اصلي الموضوع يا نجفة انى تعبت من شغل الغيط ومحتاج حد يساعدنى ومعنديش فائض اجيب اجير

نجفة روقك يا ابو الخير وابتسمت وطبطبت على ظهرة انا هاجيبلك حد يساعدك ومن غير مقابل كمان ......ابو الخير ازاى .

انا ....ابو الخير اصيلة يا نجفة .

نجفة بعد الغدا عملت الشاي وقامت تشتغل مع ابو الخير فى الغيط حتى اتى المساء وعادوا الى المنزل .

ابو الخير تعب من اثار البلهاريسيا فنجفة ادلت معاه مصر لجل الطبيب والعلاج .

ابو الخير راح المستشفي عمل الفحوصات وقالوله استنى عشان النتيجة هتطلع بعد كام يوم .

راحوا اكانده فى رمسيس وحجزوا فيها يومين .

نجفة شافت الدنيا وقالتله يا ابو الخير احنا حياتنا بسيطة ومش متقدمين

هنا فى كهرباء وكمبيوتر وانورنت وتليفزيون وحياة تانية

ابو الخير قالها يا نجفة حاسس ان عمرى قصير ونفسي اأممن مستقبلك انتى والعيال

راح باع الارض وجاب شقة وجاب عربية وجاب كمبيوتر وخف وبقي كويس .

وعمل مشروع وانشغل عن نجفة بالمشروع

يرجع البيت متابع الاخبار قدام التليفزيون

خلص التليفزيون قعد عالنت وهتتك بتتك ودز

ونجفة بقي عندها شغالة والقشف اللى فى ايديها ورجليها راح

وابو الخير ريحة عرفة راحت وبقي يستخدم برفيوم

ونجفة بقت حزينه

وقالت يا ابو الخير

مش عاوزة كهرباء ولا بيت من بلاط

يكفينى لمبة جاز وحصيرة وقله

عاوزة ارجع دنيتى تانى واشتغل فى الارض واتعب وانام بالليل

ارجع اضم ولادى واددفنهم فى حضنى

وانت تكون جنبي وتصلي ال5 صلوات

مش عاوزة حياة تخدنى واتوه فيها

تكفينى حياة بسيطة وانت تحليها

يا ابو الخير تعالى نرجع لاصلنا تهنا

الارض هى العرض يا ريتنى ما حلمت .

قام ابو الخير معاكم والحق تنح شوية وبعد كدا لم خلاجاتة وادلى الريف مع نجفة

وعاشوا فى ثبات ونبات

وكبرووا الولاد والبنات

وزرعوا الارض وبقي يكلوا من خيرها

ورجعتلهم السعادة بالحياة البسيطة اللى كانوا عيشنها

مش عرفة الموضوع كان فكرة فجائه خيالى سرح وبقت قصة

يلا كل واحد بقي يقولنا ايه الحياة اللى نفسها يعيشها

بيت نجفة وابو الخير وبهية وحسنين

نجفة وبهية

جاموسة نجفة

ابو الخير

فراخ نجفة

ارض نجفة وابو الخير منظر جميل يا بختهم wst::

تم تعديل 8 أبريل 2008 بواسطة Badria Mekkawy

[vipwithyou]

كدة ينفع يعنى

أخدتى كل اللى نفسى فيه

أكتب ايه انا بقى

:lol: :lol:

[واحد تاني]

أنا من زمان مسمعتش مسلسلات في الراديو ...

قصتك دي فكرتني بليالي السهر مع البرنامج العام

حلوة ...

[badroora]

كدة ينفع يعنى

أخدتى كل اللى نفسى فيه

أكتب ايه انا بقى

wst:: wst:: wst::

ليه بس كدا يا تامر

استحالة حد يقدر يسرق احلامنا طول ماحنا بنام .

فطول مانت بتنام نوم كافي اذن هيكون فيه فرصة كبيرة جدا لاتمام اى حلم

فيلا روح قيلك شوية وقوم من النوم على طول على الكمبيوتر سيدة افرغ محتوايات حلمك وبعدين ابقي اغسل وشك بقي

وعلى فكرة فى الغيط اللى جنبنا فدانين للبيع لو حابب تبنى حلم جديد

يعنى بلاش حجج يا تامر :)

[badroora]

أنا من زمان مسمعتش مسلسلات في الراديو ...

قصتك دي فكرتني بليالي السهر مع البرنامج العام wst::

حلوة ...

الاحساس دا فعا جالى وانا بتكتبها كانى باذيع مسلسل رديوي :)

شكرا لقرائتك قصتى المتواضعة وعلى تشجيعك لى wst::

اختك لواحظ

[جويرية]

حلمك حلو يا أختي بدرية

و انا كمان نفسي في حاجة زي كدة بس مختلفة

اعيش في الصحرا في خيمة و يبقي عندي جمل و شوية معيز و خلاص علي كدة

يا بختهم زمان دلوقتي ضغوط الحياة بتعجز الناس بدري

[Folana]

السلام عليكم ورحمة الله....

استنوا بس ياخوانا...رنجة رنجة الله يخليكوا...ده كده الفيلم اتلخبط خالص

مش ابو الخير باع أرضه ياولاد..واتدلى ع البندر

وعاش عيشة الفندية؟

طب ازاى رجع تانى بقى لارضه؟

يعنى استحملنا ان ربنا كتب له الشفا فى المشهد التانى على طول بدون ذرف دموع

لكن ارضه..ارضه ياناس...رجعت له تانى ازاى؟؟

[nash]

أنا عايزة أقعد علي البحر ...هوششش ما اسمعش صوت مخلوق غير صوت البحر....وأرجع القطه اللي ابو ياسر وداها لصاحبه ..وأخدها معايا ونقعد أنا والقطه وفنجان القهوة وبس...مش عايزة اسمع دوشه...

محدش يطلب طلبات...

محدش يقولي هانتغدي ايه النهارده...

محدش ياخد رايي في لبس ولا مذاكرة

أسبوع واحد بس....والله واحد مش اكتر .... :)

[badroora]

حلمك حلو يا أختي بدرية

و انا كمان نفسي في حاجة زي كدة بس مختلفة

اعيش في الصحرا في خيمة و يبقي عندي جمل و شوية معيز و خلاص علي كدة

يا بختهم زمان دلوقتي ضغوط الحياة بتعجز الناس بدري

انتى كمان حلمك حلو وهادي وجميل

وفعلا عندك حق الحياة الحالية تجيب جميع الامراض سواء نفسية او عضوية

لكن الحياة الطبيعية البسيطة بتهدي الاعصاب وتريح المخ وغير طبعا بعيد عن تلوث البيئة وكفاية انك بتكلى كل شيء طبيعي مش متهرمن ومصنع ومحفوظ

شكرا لحضورك الى بيتى :)

[badroora]

السلام عليكم ورحمة الله....

استنوا بس ياخوانا...رنجة رنجة الله يخليكوا...ده كده الفيلم اتلخبط خالص

مش ابو الخير باع أرضه ياولاد..واتدلى ع البندر

وعاش عيشة الفندية؟

طب ازاى رجع تانى بقى لارضه؟

يعنى استحملنا ان ربنا كتب له الشفا فى المشهد التانى على طول بدون ذرف دموع

لكن ارضه..ارضه ياناس...رجعت له تانى ازاى؟؟

يا سادة يا كرام (المشهد عبارة عن واحدة ماشي رابط عنية وبيدق على طبلة صغيرة wst:: )

انا الراوى لفيت عا القهاوى احكى حكاية نجفة الاصيلة ووقفتها مع ابو العيال

ابو الخير يا عترة لا بلهارسيا تغلبك ولا تهدم الجته

انت اصيل يا جدع وربنا شافاك (عزيزى القاريء البلهارسيا بتتعالج بحبوب يعنى كام قرص يسفهم على نص قلة ماية الموضوع ينتهى )ودا اللى حصل مع ابو الخير .

ابو الخير يا جدعان بعد ما الغالية نجفة اترجته يرجع لاصلة

صفي المشروع يا سيادة وباع الشقة بسعر تمام

ورجع الاصيل ارضة وبيته وعاشوا عيشه تمام .

اى خدمة :)

فين انتى بقي حلمك يلا قوليلنا نفسك فى ايه وسيبي ابو الخير فى حالة دا صحاب مرض wst::

[badroora]

أنا عايزة أقعد علي البحر ...هوششش ما اسمعش صوت مخلوق غير صوت البحر....وأرجع القطه اللي ابو ياسر وداها لصاحبه ..وأخدها معايا ونقعد أنا والقطه وفنجان القهوة وبس...مش عايزة اسمع دوشه...

محدش يطلب طلبات...

محدش يقولي هانتغدي ايه النهارده...

محدش ياخد رايي في لبس ولا مذاكرة

أسبوع واحد بس....والله واحد مش اكتر .... :)

الغالية ناش حلمك رومانسي اوى وشاعرى وانت والله قنوعة اسبوع بس طيب يا ستى سوف نتقدم لابو ياسر بطلب اعفاء من البيت لمدة اسبوع بس يا ريت ميتبيش تيجي انت بقي واللى تعيطي wst:: وتقولى بيتى وولادى وحشونى

واله احلمنا بسيطة انا الريف

جويرية الصحراء

وناش البحر

يلا مين تانى

[النجم الثاقب]

انا حسيت انى بتفرج على فيلم عربى قديم لما قريت حلمك يا اخت بدريه حاجه كده من بتوع عبد الوارث عسر و الناس دى

انا بقى حلمى اعيش فى دنيا كلها حب ، مفيهاش حقد و لا كره و لا انانيه و لا مكر و الناس يسيبوا بعض فى حالهم

نفسى ربنا يرزقنى بزوجه صالحه و ذريه صالحه تقر بهم عينى

نفسى نطبق سنة رسولنا من غير جماعات ولا منظمات ولا حركات

نفسى اعيش من غير مشاكل ولا روتين و من غير ما اتعامل مع اى جهه حكوميه

نفسى اعيش و اموت فى المدينه المنوره او اعيش فى بلد ساحليه زى مطروح كده بس تكون هاديه مش زى ما بقت دلوقتى

نفسى ربنا يرضى عنى و يدخلنى الجنه من غير حساب ولا عذاب انا و كل المسلمين

شكرا ليكى اختى بدريه على اتاحة الفرصه للتعبير عن اللى جوانا :)

[vipwithyou]

خلاص احجزيلى الفدانين اللى جمبك

ابنى حته بيت صغير

وازرع اللى امامه كله ورد

واعمل حمام سباحة صغير

علشان مش هالاقى بحر يا ام ياسر جمب الفدانين بتوعها

ولو المنطقة مفيهاش عصافير هشترى 500 عصفورة واطيرهم حوليا

وانام بقى فى الطل

ياااااااااااااااه

حلم والله

[رحاب]

والله احلامكم بسيطه وجميله

انا بأه نفسى اعيش فى مصر تانى

فى اى مكان بس المهم انى اشوفها

[badroora]

والله احلامكم بسيطه وجميله

انا بأه نفسى اعيش فى مصر تانى

فى اى مكان بس المهم انى اشوفها

رحوبة حبيتي ان شاء الله تتحقق امنيتك يا رب .

شكلك بقالك كتير منزلتيش مصر

مصر رغم الازمة التى تمر بها الا انا طبعا تظل افضل مكان الواحد ممكن يرتاح فيه ويلاقي نفسه وخصوصا بين اهله

ربنا يحققلك امنيك يا رب :happy:

تامر مرحبا بك جارى العزيز

ممكن بعد اذنك ابقي انقع هدوم الاولاد فى بركة السباحة بتاعتك حيث الكلور الوفير والجيران لبعضها :winner:

تم تعديل 8 أبريل 2008 بواسطة Badria Mekkawy

[التونسى]

حلوه الفكره .. جميله الفكره .. ثريه الفكره

تسجيل حضور .. وعوده للمشاركه بتمعن وتعمق بالحياه اللى بحلم بيها :happy:

[ELSHAMY]

بس انتى كده يا نجفة مش حينفع تروحى كندا خالص...

ما فيش هناك جواميس ولا أبو الخير

[badroora]

حلوه الفكره .. جميله الفكره .. ثريه الفكره

تسجيل حضور .. وعوده للمشاركه بتمعن وتعمق بالحياه اللى بحلم بيها :winner:

ميرسي جدا لحضرتك وفى انتظار حلمك بس مش تتأخر علينا :happy:

[badroora]

بس انتى كده يا نجفة مش حينفع تروحى كندا خالص...

ما فيش هناك جواميس ولا أبو الخير

اهلا وسهلا بحضرتك حمدالله ع السلامة

ابو الخير لو قدم هيقدم

على بيزنس كلاس وانت عارف بقي كندا هتجرى ورا فلوس ابو الخير عشان يستثمرها وبعد كدا هيبقي حر يستورد جاموس بقر حمير بفلوسة بقي :winner:

بس على فكرة الحياة البسيطة اللى بحلم فيها هو غيط فى مصر ولا نت ولا كهرباء ولا تليفزيون ولا حتى هجرة نفسي كل تطلعاتى تبقي فى زراعة الارض ومساندة ابو الخير وتربية الاولاد والكتاكيت

تخيل حضرتك كدا لما البيضة تكبر وتبقي كتكوت ويكبر ويبقي فرخة الللللللللله

لكن لاسف تظل نجفة وابو الخير فى احلامى فقط .

وتبقي الصراعات بين كل ماهو جديد والهجرة والنت و............الخ

والهجرة بالنسبة لى مش حلم ....ابدا

دى مستقبل فقط ,,,,,,,واعتبرها مخاطرة وربنا يستر

سعدنى وجودك فى حلمى وكان نفسي تشاركنا بحلمك انت كمان

مع خالص تحياتى :happy:

[badroora]

انا حسيت انى بتفرج على فيلم عربى قديم لما قريت حلمك يا اخت بدريه حاجه كده من بتوع عبد الوارث عسر و الناس دى

انا بقى حلمى اعيش فى دنيا كلها حب ، مفيهاش حقد و لا كره و لا انانيه و لا مكر و الناس يسيبوا بعض فى حالهم

نفسى ربنا يرزقنى بزوجه صالحه و ذريه صالحه تقر بهم عينى

نفسى نطبق سنة رسولنا من غير جماعات ولا منظمات ولا حركات

نفسى اعيش من غير مشاكل ولا روتين و من غير ما اتعامل مع اى جهه حكوميه

نفسى اعيش و اموت فى المدينه المنوره او اعيش فى بلد ساحليه زى مطروح كده بس تكون هاديه مش زى ما بقت دلوقتى

نفسى ربنا يرضى عنى و يدخلنى الجنه من غير حساب ولا عذاب انا و كل المسلمين

شكرا ليكى اختى بدريه على اتاحة الفرصه للتعبير عن اللى جوانا

هلا والله بالنجم الثاقب سورى والله ما اخذت بالى من مشاركتك الا دلوئتى لحمت التيشيرت الاسود قولت اشترية لحسنين :winner: فوقتها قريت كلامك

مين عبد الوارث عسر دا ؟ ممكن اكون اعرف شكلة بس مش اعرف اسمة

ان شاء الله ربنا يقدرك على طاعته وحسن عبادتة ويرزقك بالزوجة الصالحة

وحياتك تبقي هنية وتكون دايما راضي عن نفسك ان شاء الله

حلمك جميل ربنا يناولهولك :happy: