نفسي فى حياة جديدة ( انا حلمى بسيط) !!!

[badroora]

نفسي اشتغل فى هيئة حكومية يعنى زى شئون عاملين كدا ويكون مكان معندهومش ضمير خالص فى الشغل ,ويكون لى مكتب وعليه كمبيوتر بوصلة نت .

وتكون كل شغلتى هى اعمال كتابية بسيطة , ومكتبي عبارة عن مكتب فى غرفة مشتركة مع 6 سبع موظيفين من الجنسين وتكون مكتبنا مقابلة لبعضها .

والدوام من 9 صباحا تجنبا الصحيان بدري الى 2 ظهرا

وبعدين باص الهيئة ياخدنا من قدام البيت الصبح ويرجعنا اخر النهار واكون اجازة خميس وجمعة او جمعة وسبت وااقضي يوم الجمعة

فى البيت زى مخاليق ربنا الطبيعين , والنام الليل كله في بيتنا وعلى سريري والاعياد والمواسم اكون اجازة زى الخلق .

اصحي من النوم الساعة 8 اصلي والبس وانزل الاقي باص الهيئة مستنينى قدام البيت اركب فيه واقعد جنب الشباك ونام لحد الشغل .

اروح الشغل اقعد على مكتبي وبعدين يجي الساعى يجيب لنا السندويشتات والشاي ابو نعناع اخضر ,ناكل ونشرب الشاي ونقعد بقي نجيب فى سيرة مخاليق

ربنا واللى تشكي من جوزها واللى يتكلم على جيرانه والحديث ياخدنا للساعة 1 ونص ومن واحدة ونص نبدا نستعد للمرواح

2 الا خمسة اكون فى الباص جنب الشباك اتفرج على الفترينات وانا ماشية

اروح البيت الساعة 3 الاقي امى لسه مخلصة طبيخ اغير هدومى واتغدى مع ابويا واخواتى واثناء الاكل اجيب فى سيرة زمايلي فى الشغل وكل الحكاوى

اللى دارت بينا ,وبعدين امى واختى يلموا الاكل ويعمولنا الشاي وانا اقعد جنب ابويا طبعا شقيانه وباشتغل وباصحي بدرى ماليش فى شيل الاكل وحطة

بعد كدا امى تيجي انام على رجلها وتبدا تحكيلي على اللى حصل معاها طول اليوم ونقعد نتكلم على اللى اتجوزت واللى اطلقت واللى حامل واللى مش حامل .

وحياتى تبقي تافهه ودماغى فاضية وكدا

والله حياة جميلة اوى ويسلام بقالى يجيى 40 سنه مشربتش شاي العصارى وحكاوى العصارى

ياااااااااه كل ماكون تعبانه وعاوزة انام وخصوصا وانا فى الشغل احلم الحلم دا :sad:

تم تعديل 13 أبريل 2008 بواسطة Badria Mekkawy

[امانى]

معلش يا بدرية دايما اوصل متاخرة كدة عندك بس انا طبعا عارفة انك صديقتى ومننا وعلينا يعنى عارفة اللى عندى

خلينا فى حلمك الاولانى علشان حلم جميل بسيط يتمناه اى حد علشان قرفنا من الحياة اللى عيشينها اللى كلها سرعة واتيكيت

ومش عارف ايه وظروف مين وحاجات كتيرة تزهق لكن حياة حلمك جميلة مفيهاش التعقيدات الموجودة فى الواقع فيها الانسان بيتصرف

على طبيعته الفطريةبدون تكلف ماله ابو حسنين وام حسنين وولادهم والله عيشة هنية وجميلة بحسدهم عليها خمسة فى عنيا

اما الحلم التانى فده موجود منه كتير اوى وممكن تلاقى معظمه فى الوظايف الحكومية بس متهيالى متنفعيش فى الحلم ده خالص

علشان ده له ناسه وانت مش منهم انت مش من النوع الكسلان ولا من النوع الغاوى نميمة انت من نوع تالت خالص نوع نقدر نقول

عليه لا يصح الا الصحيح او نقول عليه الجدعنة المصرية فى صورة بدرية

اقلك بقى على حلمى الاول وهو عمره ما هيتحقق لان زمنه راح ومش هيرجع تانى هو الرجوع الى طفولتى لحد سنة 12 سنة

فعلا هو ده الحلم اللى مش ممكن يرجع بس هو احلى فترة فى حياتى كلها عمر البراءة والتنطيط واللعب والدلع وعدم التفكير

فى بكرة حلم جميل ولى وراح ساعات بشوفه فى الحلم وبس

الحلم تانى بتمنى يتحقق وهو ان اولادى يكبرو ويتخرجو من الجامعات ويشتغلو فى وظايف محترمة وانا ابقى كبرت كدة وشعرى ظهر فيه

خصلات الشيب واروح لبنات الحلال اخطبهم لهم واعمل فيها بقى حماه كدة وابص للعروسة من فوق لتحت وكدة يعنى واديها البندقة

تكسرها علشان اشوف قوة سنانها زى مارى منيب كدة فى الفيلم ياه ياريت ربنا يدينى ويدى ابوهم العمر لحد ما اشوفهم متهنيين فى

بيوتهم والاقى حاجة صغننة شبر ونص بتقولى يا تيتة يا خبر ده حلم جميل اوى نفسى اشوفه ربنا يحققهولى يارب

اسفة للاطالة يا بدورة وفى انتظار احلام اخرى

امانى

تم تعديل 14 أبريل 2008 بواسطة امانى

[badroora]

هلا بالست الغالية امانى ولا يهمك يا قمر الموضوع موضوعك اصلا يعنى اى يوقت يحلا ليكي مزاجك خشي على طول .

وان شاء الله يا أمانى ربنا يكرمك انتى وبابا الاولاد وتكبروهم وتجوزوهم وتفرحوا بيهم وتجوزوا عيال عيالهم كمان يا رب

تعرفي يا امانى اللى هتكونى حماتها هتبقي بنت محظوظة وامها داعيلها بجد ولانها هتفوز بابن امانى واكيد اخلاقه اخدها منها ,وبحماه محترمة وطيبة مش مؤزية .

وحلمك التانى مش صعب ولا حاجة تقدرى تعيشي خيالك زى مانت عاوزة يعنى استنى لما بابا الاولاد يروح الشغل وعيالك ع المدارس وجيبي عيلتين من عيال الجيران بتاع 10 خماشر سنه كدا واقعدى العبي معاهم .

تعرفي لما بلاعب بنت اختى والله باحس انى فى سنها 3 سنوات :blink: افكر بطريقتها واقلدها بالظبط وهى كمان بتقلدي واحيانا من كتر حبي الغير طبيعي لها بتكلم بطريقتها احيانا .

انطلقي يا امانى وعيشي حياتك زى مانت عوزاها طول ماهى احلام مشروعة يبقي من حقك تحلمى وتعيشي .

بخصوص حلمى التانى :unsure: اللى مش عجبك دا

هو فعلا الحالة دي بتجينى لما باكون فى الشغل او لما اكون باصحي بدري للشغل اقعد شوية فى السرير واحسس انى فى قهر شديد وانى مجبرة على الشغل والصحيان بدري واتمنى لو انى مش باشتغل وحاجات كدا ومجرد مافوق ارجع لطبيعتى اللى غاوية شقي

يلا حلمك جميل وان شاء الله هتحققيه

وكل ماتنامى وتحلمى بليز تعالى هنا على طول وسجلى حلمك ماشي

حياكى الله :unsure: :ninja:

تم تعديل 14 أبريل 2008 بواسطة Badria Mekkawy

[التونسى]

ونعود تانى للحلم البسيط :D

ودى بعض خواطرى الزجليه حول نفس الفكره .. خواطر منفصله متصله ..واللى بتوقع انها تكون ارهاصات او مسودات لقصيده زجليه جديده اقوم بنظمها وتنقيحها بحول الله .. وطبعا حقوق الفكره محفوظه للاخت بدريه wst::

أنا حلمى بسيط .. انا حلمى بسيط :D

لاهو حلم كبير .. ولا حلم خطير .. ولا حلم عبيط

أنا حلمى بسيط .. انا حلمى بسيط

لانا عايز مال..ولا جاه..ولا شهره..ومجد..وصيت

أنا حلمى بسيط .. والله بسيط

أنا نفسى اكون.... انسان عادى .. واضح وصريح

واللى على قلبى..على لسانى..ومن غير تجريح

واقول الحق على رقبتى ..و من غير تفريط

أنا حلمى بسيط .. انا حلمى بسيط

بحلم بسواقى.. تلف تدور .. وشجر .. ونخيل

بحلم بفلوكه تاخدنى معاها فى حضن النيل

واسهر على سوطح البيت.. اتأمل قمر الليل

وفطارى يكون ..فول بالقوطه.. ومش وجرجير

وغدايا يكون ... وركيـــن فرخه .. مع رز كتير

وعشايا يدوب صحن القشطه وعسل وفطير :wub:

أنا حلمى بسيط .. انا حلمى بسيط kis)-

بحلم بعروسه ....تكون طيبه .. وتكون صالحه

تتقى ربها... وتصون عرضها .. وتكون سمحه

وف شغل البيت ..كده لهلوبه .. وشاطره وفالحه

يا سلام لو كان .. بالمره كمان ..اسمها صابحه :lol:

وتجبلى عيال .. يملوا الدوار .. لعب وتنطيط

أنا حلمى بسيط .. انا حلمى بسيط :rolleyes:

قد أعود ...

[badroora]

استاذ تونسي سكت سكت وطلعتنا بقصيدة جميلة جدا والله ماشاء الله عندك قدرة على التعمق فى الكلمات وصياغها بصورة شعرية جميلة بجد تسلم ايدك

وغدايا يكون ... وركيـــن فرخه .. مع رز كتير

وعشايا يدوب صحن القشطه وعسل وفطير :lol:

مش تبزير دا ........ انا بقول وركين فرخة مع رز قليل كويس عشان الدايت :rolleyes:

العشاء اوك خفيف جدا ومش محتاج تعديل :D

بحلم بعروسه ....تكون طيبه .. وتكون صالحه

تتقى ربها... وتصون عرضها .. وتكون سمحه

وف شغل البيت ..كده لهلوبه .. وشاطره وفالحه

يا سلام لو كان .. بالمره كمان ..اسمها صابحه

وتجبلى عيال .. يملوا الدوار .. لعب وتنطيط

أنا حلمى بسيط .. انا حلمى بسيط :D

ان شاء الله ربنا يحققلك حلمك ويرزقك بالزوجة الصالحة مدام صابحة هانم

وكبشة عيال حلوين يملوا عليك الدار

وفى انتظار عودتك مرة اخرى kis)-

تم تعديل 18 أبريل 2008 بواسطة Badria Mekkawy

[التونسى]

وادينى رجعت تانى :ninja:

طبعا انا لغاية دلوقتى متكلمتش عن الحياه اللى انا نفسى فيها :blink: .. لان الارهاصات الشعريه السابقه اللى انا نظمتها كانت محض خيال .. ونتاج ما قراته هنا من احلام

انا بقى الحياه اللى بحلم بيها عشتها قبل كده من حوالى 8 سنين .. وبتمنى يجى يوم واعيشها تانى .. ويارب ميكنش ده مجرد حنين كاذب ووهمى للماضى :lol:

انا نفسى ارجع اعيش فى طابا .. اصحى كل يوم بدرى اوى .. افتح الشباك الاقى الجبال قدامى .. واعيش فى بيت مبنى بالطريقه النوبيه .. لانه بيكون مصمم بشكل يتناسب مع البيئات الحاره .. يعنى يكون بيت مبنى بالطين او الطوب اللبن .. نفسى ارجع اعيش فى الجو الحر جدا بتاع طابا .. لانه حر جاف صحى .. ونسبة الرطوبه هناك على ما عتقد واتذكر منخفضه

انا بحب الجبال جدا .. وكنت كل حين واخر اتسلقها واقعد فوق اتامل الصحراء والبحر .. لدرجة ان زملائى فى العمل كانوا مسمينى ((مجنون الجبل)) ...

يا سلام على منظر السما فى ليل طابا ... شئ لا يوصف .. كنت اطلع فوق سطوح البيت اللى قاعد فيه انا وزميلى ... ونفرش كليم وننام عليه ونوجه ابصارنا للسما واحنا بنسمع فيروز ... عشان كده فيروز مرتبطه شرطيا معايا فى احلى ايامى واحلى واحلك ذكرياتى

حقيقى ارض سيناء وخاصة طابا نعمه كبيره .. وانا لما عشت هناك عرفت ليه اليهود حيموتوا عليها كده .. تلك الارض المباركة المقدسه ..والتى سقطت من حساب حكوماتنا المتعاقبه لاسباب شبه غامضه

هييييييييييييييييييه دووووووووووووووووونياااااااااااااااااا من حر طابا .. لبرد أوربا .. ياله له من فرق شااااااااااااااااااااسع

[badroora]

حلمك جميل اوى استاذ التونسي ..... :)

يا بختك انك كنت عايش فى طابا بجوها الجميل والطبيعة الخلابة ....

دلوقتى حسه ان طابا دي ممكن نحتاج كمصريين فيزة دخول ليها .... ونزورها زى الغرباء او اجانب على ارض بلدنا ووطننا الحبيب .

منهم لله اللى باعوها برخص التراب ..... ودم الشهداء راح ببلاش

ان شاء الله ربنا يكتبلك زيارة تانى لطابا وتروح وتستمتع ومش تبقي تنسي تجبلنا صورها لو عندك صور ليها

شكرا على اشراكنا بحلمك الجميل ........ :)

تم تعديل 30 أبريل 2008 بواسطة Badria Mekkawy

[abdooovet]

طبعا انا لسه جديد هنا ومشاركاتى مش كتير بس بصراحه انا ليا حلم

بجد لو حصل هبقى مش عايز حاجه تانى

نفسى مره اجى اطلع اى حاجه ورقيه هنا فى مصر وتطلع بسهوله من غير تعقيد

نفسى احس بكرامة الجنس البشرى فى استخراج الورقيات

نفسى الموظفين يبطلوا استمتاع فى تعطيل المراكب السايره

[badroora]

اهلا وسهلا بحضرتك يا استاذ ... عبدوووو نورت الصالون الثقافي .

والله يا استاذ عبدوووو الحلم دا مش حلمك لوحدك دا حلمنا كلنا .. ولعلمك روتين الورق دا متعب فى كل حته مش مصر بس

سعدت جدا بمشاركتك وان شاء الله نشوف مواضيعك وتافعلك معنا

مع خالص تحياتى

بدرية

[abdooovet]

ميرسى جدا لكلامك يا اخت بدريه

وميرسى على بوكيه الورد

ويارب كل الحكومات تبقى الكترونيه اعمل كل الورق من بيتنا يارب

[التونسى]

ونعود تانى للحلم البسيط :D

ودى بعض خواطرى الزجليه حول نفس الفكره .. خواطر منفصله متصله ..واللى بتوقع انها تكون ارهاصات او مسودات لقصيده زجليه جديده اقوم بنظمها وتنقيحها بحول الله .. وطبعا حقوق الفكره محفوظه للاخت بدريه wst::

أنا حلمى بسيط .. انا حلمى بسيط :D

لاهو حلم كبير .. ولا حلم خطير .. ولا حلم عبيط

أنا حلمى بسيط .. انا حلمى بسيط

لانا عايز مال..ولا جاه..ولا شهره..ومجد..وصيت

أنا حلمى بسيط .. والله بسيط

أنا نفسى اكون.... انسان عادى .. واضح وصريح

واللى على قلبى..على لسانى..ومن غير تجريح

واقول الحق على رقبتى ..و من غير تفريط

أنا حلمى بسيط .. انا حلمى بسيط

بحلم بسواقى.. تلف تدور .. وشجر .. ونخيل

بحلم بفلوكه تاخدنى معاها فى حضن النيل

واسهر على سوطح البيت.. اتأمل قمر الليل

وفطارى يكون ..فول بالقوطه.. ومش وجرجير

وغدايا يكون ... وركيـــن فرخه .. مع رز كتير

وعشايا يدوب صحن القشطه وعسل وفطير :wub:

أنا حلمى بسيط .. انا حلمى بسيط kis)-

بحلم بعروسه ....تكون طيبه .. وتكون صالحه

تتقى ربها... وتصون عرضها .. وتكون سمحه

وف شغل البيت ..كده لهلوبه .. وشاطره وفالحه

يا سلام لو كان .. بالمره كمان ..اسمها صابحه :lol:

وتجبلى عيال .. يملوا الدوار .. لعب وتنطيط

أنا حلمى بسيط .. انا حلمى بسيط :rolleyes:

قد أعود ...

ونا بقلب فى أجنده من اجنداتى القديمه الى كنت بكتب فيها الشعر او اى افكار او ارهاصات ادبيه ... لاقيت قصيده مكتوبه بخط منعكش ومخربش ((نبش فراخ)) .. بعنوان انا حلمى بسيط .. وعصرت دماغى .عشان افتكر انا كتبتها فى اى منتدى .. وفعلا لاقيتها هنا .. ولاقيت الموضوع الجميل ده اللى قررت ارفعه ..

ياترى حلمكم بسيط والا حلم مركب .. مهما كان حجم احلامكم .. ممكن تشاركونا إياها .. بالافصاح عنها