مناهج اللغة الفرنسية في التعليم المصري- دعوة للعقل

[Sherief AbdelWahab]

الموضوع دة بإذن الله حيكون مقدمة لسلسلة مواضيع متفرقة عن المواد الدراسية في مصر ومناهجها وطرق تدريسها في محاولة منا لقراءتها والتفكير فيها..

اللغات من المقررات اللي حتفرض نفسها في المرحلة القادمة ، سواء أكان الانجليزي أكثر لغات العالم انتشاراً دلوقت (الصينية بتتكلم بيها الصين فقط أما الهند ففيها 300 لغة على الأقل) ، أو الفرنساوي اللي حينفع في الدائرة الأفريقية (معظم دول أفريقيا فرانكوفوني يعني بيتكلم فرنساوي)..

ومع ذلك.. هل انتو شايفين مناهج الفرنساوي في بلدنا قوية ولا سطحية وغبية؟

خلص الكلام

[se_ Elsyed]

ومع ذلك.. هل انتو شايفين مناهج الفرنساوي في بلدنا قوية ولا سطحية وغبية؟

خلص الكلام

إستننننننننننننننننننى يا شريف قبل الكلام ما يخلص

عارف يا شرشر إن سؤالك ده بيفكرني بمواضيع " حقوق المعاقين في مصر " مع كامل التقدير لهم ..

فبتكون الإجابة : والنبي ياخويا قبل ما تتكلم عن حقوق المعاقين .. إتكلم عن حقوق المش معاقين الاول .... على اساس الأولويات ليس إلا .

كذلك لا استطيع أن أتحدث عن منهج اللغة الفرنسية وعندي نماذج متخلفة لمناهج اللغة الإنجليزية بتطلع العيل بيتكلم إنجليزي باللغة الفيومية .. مع إنه بيبقى في سن ممكن يتقبل فيها اللغة الصينية حتى ........ لكن للأسف لدنيا مدرسين فقدوا كل الدوافع لتحسين العملية التعليمية ... نتيجة إن اللي فوق أساساً مش عارفين هما عايزين إيه .

بالنسبة للغة الفرنسية في مصر .. فالنظام نفسة في منتهى الغباء

ليه بقى ؟

ينفع في الدنيا كلها أعتمد على تدريس لغة ثانية للطلبة ( أكثر من 90 % من الطلبة في الثانوي بيتخصصوا فرنساوي ... وقلة مندسة بيروحوا ألماني وإيطالي ) لمدة 3 سنوات فقط .. وبعد كده بخ ؟

فبنعمل زي اللي رقصت عالسلم ... لا اللي فوق شافوها ولا اللي تحت سمعوها

يعني لا منه أتقن لغه .. ولا منه وفر مادة ومدرسين ودروس خصوصوية ومجموع وحركات .

انا عن نفسي كنت بأحب الفرنساوي جداً .. لكن بعد 3 سنوات كان نفسي أكمل .. لكن ما فيش وقت نتيجة للحشو اللي بنشوفه سواء في الدراسة الثانوية أو الجامعة .. وأيضاً ما فيش تطبيق للغة

ونتيجة لعدم الممارسة في الحياة العملية ... حيث إن إنت عارف إن البلاد العربية غالبيتها اللغة السائدة في التعاملات التجارية هي الإنجليزية ... فالواحد غصبٍ عنه بينسى .

لكن لو عندك والعياذ بالله ناس عندها ضمير في مصر ومسئولة عن التعليم .. كانوا يضعوا مناهج قوية لتدريس لغة اخرى بجانب الإنجليزي منذ المرحلة الإبتدائية .. بحيث الطالب من دول يوصل لحد ثاوني ويبقى بيتكلم لغتين على الأقل زي اللبلب .. بدل المحشي اللي إحنا بندرسه ومالوش اي فايدة .

آه بالمناسبة إجابةً على سؤالك :

بسم الله الرحمن الرحيم .... مناهج اللغة الفرنسية في مصر تغي تغي تغي غبيه وسطحية ....

اوغوفوار مون شيغي شيغيف .

[جويرية]

عن زيد بن ثابت ، قال: قال لي رسول الله ـ صلى الله عليه وآله ـ إنه يأتيني كتب من ناس لا احب أن يقرأها أحد . فهل تستطيع أن تعلم كتاب العبرانية ، أو قال: السريانية ؟

فقلت : نعم .

قال : فتعلمتها في سبع عشرة ليلة

ده حديث نقلته و الشاهد في الحديث حاجتين

أولا ان الرسول صلي الله عليه و سلم سأل سيدنا زيد هل يستطيع تعلم هذه اللغة ده معناه ان تعلم اللغة و اي مادة عموما دي قدرات و بتختلف من شخص للتاني وده واضح من عدد الملايين اللي اتفرض عليم يدرسوا الفرنساوي مثلا و محققوش فيه حاجة و اتنسي أصلا

و تاني حاجة هيا المدة السريعة اللي اتعلم فيها اللغة ده برضه بيأكد نفس الكلام

وكمان هو الرسول صلي الله عليه و سلم طلب من شخص واحد بس ان هو يتعلم يعني حسب الأحتياج مش كل الناس دي اللي بيتفرض عليها الفرنساوي و لا هيا حتسافر فرنسا و لا هيا حتستخدمه

[amani]

بسم الله الرحمن الرحيم

بعد بونجور والعواف والحاجات دى احب اقول حاجة صغننة آآآآآآآآآد كده

انا ولادى فى مدارس لغات ههههههههههههههههههه اكيد بتضحكوا لان اللغات فى مصر زيها زى الحكومة متفرقش غير فى المصاريييييييف

يعنى اللى يدخل لغات هنا يبقى(............) والللى يدخل الحكومة برده

المهم عشان ماطولش عليكم احنا معندناش تعليم من اساسه ولا تقولى فرنساوى ولا انجليزى ولا حتى عربى ( اه والله)

متستغربوش كده ابقى متاكد ان انت اكييييد فى مصر

ياسلام على المدرس وهو واقف بيرطن الفرنسى وبيقوله زى مايكون مكره ومجبر ولا بنسمع الاكسوووو ولا اى حاجة على راى القائل انهم بيقروا بالفيومى

وعلى فكرة ده فى الانجليزى كمان عشان مانجورش على حق حد يعنى

من الاخر الاجابة

مناهج اللغة الفرنسية فى مصر سطحية وغبية

وضف عليهم الانجليزى والعربى وكل المواد اللى بيدرسوهااااااااااااااااا الضحايا

[Sherief AbdelWahab]

أول ملاحظة في منهج اللغة الفرنسية الموقر إنه بيضرب البيئة المصرية عرض الحائط..

بمعنى..

بمعنى لو عايز تعلم ابنك القراءة والكتابة والكلمات الأساسية أول حاجة دور على العالم المحيط بابنك .. الأشياء الصغيرة اللي حواليه واللي بيشوفها وبيتعامل معاها ، يحفظ كلماتها الأول يخش ع اللي بعدها..

طبعاً دة آخر شيء فكر فيه واضعو تلك المناهج والحمد لله..

لما تقرا الكتب دي تحس الصراحة إنك في مركز ومدينة باريس .. كل الناس بتلعب تنس في الويك إند وعندهم كارت سكولير وتغي تغي تغي كونتون!

وما تفهمش إن كانت المناهج دي بتحرض على الحفظ ولا الحفظ اللي شغال الله ينور.. يجيبلك قطعة في الكتاب تحفظها وتحفظ مفرداتها علشان حيجيلك زيها في الامتحان .. وطبعاً القطع دي يسري عليها ما يسري على الكلمات .. وسمعني سلام : أنا عايز أعيش في كَوكَو تاني!

ولو حبوا يمصروها تحس انك بتتفرج على برنامج "اتمسي بالخير يا بلدنا" .. افتتح السيد الرئيس.. افتتحت السيدة الأولى ..

لا والبعد السياحي صارخ.. تحس إن الغرض الواضح والفاضح من المنهج إنك تشتغل ترجمان في المناطق الأثرية مش إنك تعرف تتعامل مع غيرك باللغة دي لما تتزنق..

وغني عن التعريف مسألة المحادثة المضروبة بالنار ، والأسئلة اللي هية هية في كل امتحان..

مناهج تعمل على إعلاء قيمة العبط وتعتمد على الاشتغال الذاتي وكما ينبغي..

خلص الكلام

[Princesse]

أسمحوا لي ان اعلق على موضوع تعليم اللغة الفرنسية في منهج الثانوية العامة

من خلال تجربتي بتدريس اللغة الفرنسية لابنة خالتي التي كانت في الثانوية العامة احب اقول ان المهنج بجد صعب

أنا اصلا خريجة اداب فرنساوي وكنت طالبة بدرسات العليا و كنت بدي كرسات فرنساوي في احدي معاهد اللغات

بجد المنهج صعب و فيه مفردات صعبة ان الطالب يحفظها. المنهج اصلا يعتمد على الحفظ و التلقين بطريقة (غبية) و النحو صعب لان واضع المنهج عاوز يعلم الطلبة كل قواعد اللغة في سنتين (في حين احنا في المدارس الفرنسية اتعلمناها من اولي حضانة لحد ثانوية عامة)

غير كدة المواضيع الي في الكتاب مش هتعلم الطالب انه يكلم فرنساوي بحيث يعبر عن مشاعره و افكاره و رغباته بالفرنساوي

من الاخر المنهج يعقد و يسد النفس

و ليا ملحوظة على الطلبة انهم مش بيعرفوا ينطقوا فرنساوي ولا عاوزين يتعلموا ينطقوا صح لان الامتحان تحريري

في الاخر ممكن واحد يكون حاصل على الدرجة النهائية في اللغة الفرنسية بس مش عارف ينطق كلمة صح علشان كدة كل كليات الالسن و الاداب و التربية في جامعة القاهرة وحلوان و عين شمس بتشترط ان الطالب يكون خريج مدارس فرنسية

العيب في التعليم و المناهج و في الطلبة كمان الي مش عاوزين يتعبوا نفسهم

تعليم اللغات في بلدنا متاخر جداا

يعني مثلا ليه ميكنش فيه قاعة فيديو في المدرسة، الاطفال يتفرجوا على كرتون بالفرنساوي و بعدين المدرس يناقشهم الطلبة بالفرنساوي و يعلقوا على الي همة شافوه و يسمعوا اغاني و يحفظوها و بكدة نحسن طريقة النطق بطريقة لذيذة و سهلة

و للكبار كمان نختار لهم موضيع مناسبة و مفيدة

المهم انهم يسمعوا اللغة بلسان اهلها و يفهموها و يقدروا يكلموا بيها