ملائكة المنتديات

[مصري جدا]

الأخت نينا و ألأخوة الآعضاء

تابعت الموضعين أو نقول الموضوع الأول وأمتداده ....... اللي أحنا فيه ده ......وأنا مع الأخت الكاتبه في وجود ملائكة المنتديات .......بالنسبه للموضوع الأساسي أنا قرأته أول ما كُتب وبدايه الهجوم عليه وكنت ..{.مش حأقول فوجئت بالموضوع} لكن حسيت بغرابه في التعبيرات عن ما أعتدت قرأته ولكن لم أشعر بغرابه أذا ما قورن بما نسمعه في الفضائيات والأفلام والمسلسلات الجديده ..ولذلك فوجئت بحمله الهجوم ....ولظروف لم أستطع متابعة الموضوع لحوالي يومين وعندما عدت .لقيت الحكايه خلصت ....وبدأ موضوع ملائكة المنتديات ...وللحقيقه عندما قرأت اسم الموضوع أول مره توقعت ان الأخت نينا الكاتبه وأن الموضوع له علاقه بموضوع{ أحترسي....} وفعلا صدق توقعي ....لكن للأسف أبتعدت شويه تاني لآمتحانات الآولاد ورجعت لقيت الحوار اتخذ شكل ....حأقول لم يعجبني .....أسف للمقدمه وسادخل في الموضوع

لما يوصل الأمر للتدخل في الصوره الرمزيه لأي عضو يبقي دي حاجه متعجبش حد حتي ولو قيل ان ده رأي شخصي ...رأي شخصي يحتفظ به صاحبه لكن لما يكتبه يبقي خرج من الخصوصيه للعامه ...

النهارده أنا مش عجبني صورتك او عندي تحفظ علي صورتك...... بكره.... {زيزيتا.}. أسمك مضايقني .....وحنخرج من أي موضوع نناقشه لمواضيع فرعيه ومش حنوصل لحاجه.....ده أولا

ثانيا ...مش عاوز نحط رؤوسنا في الرمال وعاوز نشوف اللي بيحصل حوالينا بحلوه ومره ....اللي حكيت عليه الأخت نينا بيحصل وأحنا هنا بناقش للمصلحه مش بنعمل حلقات ومواضيع ساخنه علشان نشد الناس أو نزيد التوزيع .....يبقي المفروض المناقشه تكون بموضوعيه ....مش الحاجات دي مش بتحصل وأنت بتشوفيها فين

دي بناتنا أحسن بنات....والردود اللي تشبه الردود دي .....حأحكي

لكم علي موقف أتكرر معي أنا شخصيا

من حوالي 5 سنوات....شوف النهارده ايه اللي ممكن يحصل

كنت بسافر مرتين في الأسبوع من أسكندريه للقاهرة ...أخذ الفرنساوي بتاع 6.10 الصبح وأرجع في 3.15 الفرنساوي برضه .....طبعا القطار بيقف في المراكز الكبري والمحافظات ..دمنهور كفرالزيات طنطا ....بنها ...المهم كان بيركب معايا الطلبه بتوع الجامعات من أول دمنهور ..لغايه القاهرة.....لاحظت أن البنات بتطلع محجبه ومحترمه وبتنزل حاجه تانيه ....بعض البنات مش كلهم....بيتم تغيير كل شئ ,..رفع الحجاب ووضع مكياج حتي اللبس بيتغير ....وكنت بشوف العكس في رحلة العوده ....وطبعا بتوع الصبح ...مش هم بتوع رحلة العودة ...يعني مش حاله فرديه.....

يبقي الأخت نينا لما تحكي وتكتب اللي قالته مش حأستغرب ...و.اللي يحس أن الكلام غريب ومش عادي لأنه مشفش أو معرفش أو مش مصدق أن فيه في الدنيا حاجات كده دلوقتي.. مش مفروض يهاجم برضه...

مش عاوز أطول ..أتمني أن نتحاور بجديه وبوعي وموضوعيه بعيدا عن التدخل في الأشياء التي لاتخدم الموضوع المتُحاور فيه ...وكذلك الأشياء الشخصيه ...

لسنا كلنا ملائكه ولا شياطين بل نحاول أن نقترب للكمال ..ولن نصل للكمال أبدا...يكفينا المحاوله.....شكرا

تم تعديل 14 أبريل 2008 بواسطة مصري جدا

[Nina Hussien]

الأخ أبو محمد أسمح لي أن أقول أن السادة المشرفين أدلوا بدلوهم فقط عندما قامت الأخت نينا بتغيير الموضوع ولا أعلم لماذا لم يتدخل أحد المشرفين لتخفيف الضغط عن الأخت صاحبة الموضوع عند طرحه بدلاً من أن يتم لومها علي تغيير الموضوع و أين كان جهاز الأشراف عندما دخل كل عضو وعضوه بسوطه لجلدها . ربما تعطي السرعة التي تم طرح الموضوع وتغييره بها بعض العذر ولكن يبقي لنا أن نراعي الحالة النفسية التي كانت عليها العضوه و أضطرها لتغيير الموضوع وشكراً.

الموضوع عند طرحه كان جريئاً ..

ومن المفترض أن يكون صاحب الطرح على نفس القدر من القدرة على المواجهة ..

ويفترض في من يطرح فكرة معينة أن يكون قادراً على مساندة فكرته أو الإعتذار عنها حينما يصل إلى نتيجةأن فكرته كانت خطأ

ومن الطبيعي في مثل هذا الموضوع أن تقابل الأخت الفاضلة بمهاجمة عنيفة من البعض .. لأنه البعض يهاجم الفكرة لمجرد خروجهاعن المألوف .. بغض النظر عن إمكانية حدوثها أم لا ..

أما موضوع التعديل وتغيير الموضوع وتدخل الإشراف عند هذا الحدث . فقد كفى ووفي الأستاذ / أبو محمد في شرح وجهة نظر الإشراف في هذا

ما قلت من قبل يا أخ أسد انا لا تنقصني الجراءة مناقشة أي فكرة و أحب دائما ان اسمي الامور بمسماتها للبعد عن الخلط و اللبس

لكن سوء التفاهم كان اني قصدت بالتغيير ان اضع الاسلوبين أمام ملائكة المنتدايات و ال under age

و اغلاق الموضوع لم يعطيني الفرصة كي اوضح هذا الرأي

و لا كي أناقش ما جاء من أراء و ها أنا ذا متهمة اني فتحت موضوع جديد لانتقد الموضوع الأول مع ان هذا الموضوع مختلف تماما و ان كان حافزه الموضوع الاول

و عموما أنا اتحرمت وجهة نظر الادارة حتى لكن حد يقول لهم و حياتك اني ماهربتش ولا حاجة من الموضوع الأول :closedeyes:

[Nina Hussien]

الي نينا حسين

الموضوع كان حقيقي واقعي وجريء .ضعي في اعتبارك انك تكتبي لاعضاء وزوار المحاورات وستجدي تعليقات مؤيدة ومعارضة. تراجعك للوراء يعطي اشارة بعدم تمسكك بمنهجك أو ضعف في الحجة رغم ان غيرك كثيرون يستمرون في عرض افكارهم وان لم يقبلها الطرف الاخر ولكنهم يستمرون وربما يقتنع بهم اخرون.

يا جماعة والله ما تراجعت

بس حبيت اسثبت ان الكتابة بالاسلوب المحفوظ سهلة جدا و انا على علم ان الموضوع الاصلي موجود في الاقتباسات

ثم ان هذا ليس الغرض الوحيد من فتح هذا الموضوع

الغرض هو مناقشة لماذا يتبع رواد المنتدايات مثالية و تحفظ و هجوم ليس موجود على أرض الواقع

لماذا التظاهر بعكس ما نحن عليه او عكس ما نعيشه حولنا ؟

لماذا التسرع في الحكم و اطلاق التهم الجاهزة سلفا

و هل انكار امر او عدم رضانا عليه يجعله غير موجود؟

و هل رأي أي شخص هو الملزم و من عارضه زندق فاسق أو ارهابي متعصب ؟

[زهرة الجبل]

و هل رأي أي شخص هو الملزم و من عارضه زندق فاسق أو ارهابي متعصب ؟

تااااااني؟

الظاهر مفيش فايده !!!!

( زندق ) إللي هي زنديق يعني ؟ طب مين قال كده؟

فاسق؟ جت منين دي؟ ومين قالها؟

إرهابي؟ برضه مين قالها؟

متعصب؟ مين جاب سيرة التعصب؟

رأيك طرحتيه و عارضناه مختلفناش في النقطه دي ... لكن محدش لسه جاب سيرة التهم المذكوره أعلاه ولا أعلى أعلاه غيرك

إلا إذا كنتي بتعتبري المعارضه في حد ذاتها تهمه تلاحقك وده يبقى سوء فهم منك مش أكتر

المشكله إنك بتغيبي تغيبي وتيجي تكتبي نفس الكلام بنفس المعنى ولا جديد تحت الشمس

( أنا مغيرتش رأيي و لم اتنازل عن حق الدفاع عن افكاري بس مستاءه من التهم المعلبه و الهجوم غير المبرر )

طب فين التهم المعلبه؟ ملهاش اثر !!! طب حتى علبه فاضيه :closedeyes: برضه مفيش

لا عفواً... هو في بس من إنتاج وتعبئة وتغليف مصانع نينا حسين

مره أخرى و من باب التكرار أحياناً يفيد:

( إختلفنا معك في الرأي وهذا حق نصر عليه و أوضحنا النقاط التي إختلفنا معك فيها وكان تعليقنا كله على نص الموضوع ولم يمسك أحد بصفه شخصيه )

دي حقيقه لن تتغير لو فضلتي للصبح تقولي تهم معلبه هتفضل تعليقات الأعضاء موجوده تشهد ببساطه على عكس كلامك

وتؤكد أن الحقيقه هي أنك عجزتي عن الرد المقنع فإتجهتي للهجوم كسد خانه بدلاً من الدفاع عن الفكره

ملحوظه مهمه :

الكلام إلى الآن لم يتغير و لم يجد عليه جديد و أصبحنا ندور في دائره مفرغه

تم تعديل 14 أبريل 2008 بواسطة زهرة الجبل

[MZohairy]

انا شايف ان الصوره زي الفل :closedeyes:

[إيزيس]

( إختلفنا معك في الرأي وهذا حق نصر عليه و أوضحنا النقاط التي إختلفنا معك فيها وكان تعليقنا كله على نص الموضوع ولم يمسك أحد بصفه شخصيه )

دي حقيقه لن تتغير لو فضلتي للصبح تقولي تهم معلبه هتفضل تعليقات الأعضاء موجوده تشهد ببساطه على عكس كلامك

وتؤكد أن الحقيقه هي أنك عجزتي عن الرد المقنع فإتجهتي للهجوم كسد خانه بدلاً من الدفاع عن الفكره

ملحوظه مهمه :

الكلام إلى الآن لم يتغير و لم يجد عليه جديد و أصبحنا ندور في دائره مفرغه

أتفق مع زهرة في كل كلمة

وإذا راجعنا مداخلات الزملاء نجد أن محتواها مع اختلاف الأساليب تقريبا واحد

ببساطة الفتاة التي تحذريها حضرتك من الذئب البشري لا تستحق التحذير و لا الاهتمام

لأن هي التي جلبت الذئب لحد عندها ولا هي متفاجئة من دناءته و لا زعلانة

طب احنا تعبانين علشانها ليه ؟؟

هي دي الفكرة ببساطة

سؤال على جنب للأخت نينا وقد سألت نفس السؤال من قبل ولم تجب

ما هي الصحف الثلاثة التي سمحت بالموضوع ؟

لا أعني بهذا السؤال كيف سمحت لأن عندنا صحف في مصر تسمح بكل شيء ولا يعني أنها سمحت أن الموضوع رائع مثلا لكن سؤالي

يعني هل من المنطق أن ينزل نفس الموضوع في 3 صحف

إلا إذا كان في بريد القراء مثلا لأن الصحف في مصر لا تقرأ بعضها

[Nina Hussien]

زهرة يا عزيزتي

حول موضوع الذئب البشري ... إنتِ كتبتِ الموضوع بنفسك ولكنك للأسف لم تتحملي مسؤوليتك في مناقشته

وكأنك كنت تكتبي و انتي تمنين نفسك بالإتفاق التام من الأعضاء معك والتصفيق الحاد فقط و لم تسعفك الفطنه إلى أن النقاش يحتمل الإتفاق و الإختلاف و أن الحوار الصحي هو ديموقراطية الرأي و ليس الغضب لعدم القدره على فرض الرأي على الآخرين

مادام الطرف الذي عارضك لم يتعدي حدوده ولم يخطئ بحقك ولم يتجاوز حريته بدوره في التعبير عن رأيه

لكن ما حدث منك كان بكل بساطه أن النقاش تحول إلى أغلبيه تعارضك و هذا وارد أحياناً و طبيعي جداً

ولو كان لديك إيمان بفكرتك لدافعتي عنها بكل ما ترينه من أساليب متاحه و كل ما تجدينه من سبل للحوار

و لو كنتي فعلتي ذلك لكان أصبح الموضوع طبيعي وبنهايه طبيعيه إما أن تقتنعي بآرائنا أو تقنعينا برأيك أو ينتهي الحوار بشكل ودي وليحتفظ كل منا برأيه لنفسه ولا يفسد الخلاف للود قضيه

أعتقد ان ريقي جف و انا أقول انا لم أهرب من الحوار و لكن تم اغلاق الموضوع بدون رضائي

يعني مطلوب أعمل ايه ؟ أفجر مقر الادارة :happy:

أما التصفيق الحاد لو كنت أبحث عنه ما كنت كتبت موضوعي بأسلوب مخالف عن المعتاد و لا كنت فتحت هذا الموضوع الذي العلم انه سيثير حفيظة معظم الناس ... و قد حوله معظم الاعضاء هنا لمناقشة موضوع الذئب رغم انه لم يكن المقصود الوحيد بكلامي

بل كان موقف من ضمن الكثير من المواقف ..

ثم عن الشكل الودي فأنا لم أتطاول على أحد و لم أغلق الموضوع هناك و يمكن ان تطلبي من الزميل أسد فتحه

أنا هنا أناقش ظاهرة ملائكة المنتدايات المغالين في اضهار التحفظ و الاستنكار بدون داعي ...

لكن أن تعرضي موضوع معين للنقاش بإختيارك و في مكان بإختيارك ثم تفقدك المعارضه توازنك و تغيري نص الموضوع فهذا أعتقد أنا في رأيي المتواضع جداً أنه إما لأنك لم تؤمني بالفكره تماماً قبل طرحها لذلك عجزتي عن الدفاع عنها أو أنك لم تعرفي قبل النقاش أن الحوار الصحي يحتمل القبول و المعارضه و لم تفطني لبديهيات طبيعة الحوار الأوليه والبسيطه والبديهيه

قلت وجهة نظري لماذا قمت بتغير نص الموضوع و لا أرغب في الاعادة منعا لملل و التكرار

حكمتي على كل من يخالفك الرأي بالإزدواجيه و قدمتي الإساءه رغم أنه لم يخطئ أحد بحقك و كلامنا كله كمعارضه للموضوع كان تعليقاً على نص الموضوع وليس على كاتبه أما إلصاق صفة الإزدواجيه هو تجاوز لحدود لياقة الحديث

عزيزتي لم أقصد بازدواجية المعايير موضوع الذئب فقط و ان كانت ازدواجية المعيير في المجتماعات الشرقية ظاهرة نص عليها كل علماء علم النفس

تذكري أي قصة خيانة زوجية ... ستجدي الجميع يلتف حول الزوجة ان اكتشفت خيانة زوجها و يصرون ان تسامحه على اعتبارها نزوة

و ان حدث العكس فستجدي الجميع يتسابق لرجمها

معظم الاباء يستمعون بلا مباللاة لمغمارات ابناءهم العاطفية لكن لو البنت جربت ان تقول نظرت لفلان فيكسر لها ضلعين

هل الله و الدين فرق بينهما في أحكامه ام سوى بينهما؟

و هل التفرقةالتي تحدث في المجتمع ليست ازدواجية معايير

في موضوع الذئب لم يلم أحد الشاب على اعتبار ان الفتاة شجعته و مش مشكله انه مش متربي

و أأسف لو كنت وجدتها تجاوز للياقة الحديث فلم أجد كلمة أليق منها للتعبير عن تلك الازدواجية

كلامك يشير لمناخ فكري دون المستوى الذي يلائم مثل تلك الفكره الساميه ((لا تعليق ))

أنا لم أقل دون أو أعلا ... أنا قلت لا يلائم فلا تضعي كلام على لساني رجاءا

أتحداك أن تأتيني بلفظ واحد يشير لشخصك أنتي بصفه واحده

أنتي تكلمتي في الموضوع عن فتاه وشاب و الجميع في ردودهم عليكي لم يتخطون هذا الحد ... الفتاه والشاب

أما ما تشيرين إليه من ألفاظ و تهم وصفات وما إلى ذلك فهي للأسف لم يراها ولم يتكلم عنها غيرك أنتي فقط لا غير و إن وجدتي في أراء الأعضاء غير ذلك فإقتبسي ما ترينه نصاً و هاتيه هنا

عزيزتي

اكرر

انا لا اناقش فقط موضوع الذئب

و كما ذكرت الكثير من تلك التعليقات جاء على الخاص و بعضها على مواضيع اخرى في منتدايات أخرى كموضوع السنة و الشيعة و موضوع ختان الاناث

كما ان كلمة مثل " ولست انا من بحثت عليها وتصفحتها لانى حينها ساكون ملامة وليس انت." أفهم منها ايه دي ؟

و لما ألاقي حد بيقول على الخاص " ان جرأتك تدل ان لا حياء لديك و لا دين" يبقى اسمه ايه ده !!

مره أخرى ... أنحداكِ تجيبي كلمه واحده من الصفات التي ذكرتيها بالأعلى في رد عضو واحد هنا عليكي ( مراهقه كافره علمانيه رذيله إباحيه ) كلها كلمات من خيالك فقط

إلا كلمة أسلوبك يحتاج لتقويم ...و دي أنا اللي قلتها bsh:) لكن لاحظي انها عن اسلوبك مش صفه شخصيه وصفتك بها و قلت بالتحديد ان اسلوب النصيحه محتاج لتقويم

مرة تانية أقول لم أكن اتحدث عن موضوع الذئب فقط

أنا اناقش موضوع مختلف و اتهامات جاهزة تصب على أي شخص يتكلم في موضوع لا يروق لبعض الناس خاصة لو كانت فتاة فلا داعي للتحدي لاني لن اعرض عليم ما يأتيني على الخاص

و كلمة اسلوبك تختلف تماما عن كلمة اسلوب النصيحة لو كنت تحتاجين رأي :ninja:

نتكلم فقط عن كتبتيه هنا و رأيناه وتفاعلنا معه و حاورناك فيه و غضبتي منا و أفقدك غضبك التوازن فنسفتي الموضوع كله و كأن شئً لم يكن

لم يفقدني غضبي التوازن و الا لما فتحت هذا الموضوع فلا تتسرعي في الحكم و راجعي ثانية ما كتبته عن سبب تغيير الموضوع

و بعدين انا حاسيت ان فيه أعضاء ممكن يصابوا بحالة نفسية من هول ما قرأوا و كأني كتبت مل لم يكتب في التاريخ .. و الذي مازلت أري انه اسلوب عادي بألفاظ عادية لكن صدمة تعرية الواقع هي ما سببت الصدمة

لم يناقشني أحد في الفكرة بقدر مناقشة الالفاظ و استنكار حدوثها في مصر

و لم يلتفت أحد أني لا ادافع عن الفتاة و لا الوم الفتى

أنا أترجم مواقف تحدث و بعض الفتايات لا يفهمون ما قد ترمي اليه

اما هي كلمته ليه و فين و ايه مدى علاقتهم فلم يكن موضوع النقاش أصلا

ماهي المصيبه إن محدش قال...إيه اللي مزعلك كده مش فاهمه ؟ إنت هتقولي الكلام وتزعلي مننا فيه وبعدين تطلعينا عايشين في أثواب الملائكه و إنتي ثابته بأقدامك على الأرض؟ أعتقد إن ده ميصحش خالص يعني

و أخيراً هقول كلمه بس بسيطه و إن كانت تخرج عن موضوع الملائكه و تعود لموضوع الذئب البشري و لكن لأنني أراه الدافع لموضوع الملائكه

ماهو يا عزيزتي انت ما شفتيش اللي جاني على الخاص و مش عايزة اذكر أسامي

س لما حد يقول النماذج اللي انت بتتكلمي نها و بتتعاملي معاها لا توجد هنا أو لا توجد في الأوساط المحترمة يبقى أفهم أنا ايه بقى !!!

بإختصار شديد ورغم إن الكلام مكرر لكن أحياناً يكون التكرار مفيد ... على سبيل التذكره حتى

نحن لم نختلف معك في وجود نمازج كالتي ذكرتيها في موضوع الذئب البشري

نمازج من الطرفين الشباب والبنات

إختلفنا فقط في كونك تخاطبين الفتاه كأنها بريئه في مثل تلك المواقف والفتى فقط هو الذئب

ونحن نرى أنها هنا -و بالتحديد في الأمثله التي ذكرتيها انتي بموضوعك -صيد ثمين ينادي الصياد بطريقه أو بأخرى وليست ضحيه مسكينه وقعت تحت شباكه يعني مسؤوله تماماً عن ما يحدث مثله بل و أكثر منه في كثير جداً من الأحيان

أنا لا جيبت سيرة انها بريئة و لا حاجة

أنا قلت لو حصل الكلام ده ماتعيطيش و تقولي اللي جرى ماكان لان المقدمات تؤدي لنتائج

ثم من امثلة الفتايات الاتي حكين تلك المواقف اؤكد انهم لا كانوا بيغروا حد و لا دايرين في الشوارع مع حد

دي واحدة مع خاطيبها

و واحد كانت بتكلم زميلها في الشغل في مواضيع تتعلق بالعمل و هو تمادى

و واحدة كانت بتكلم زميلها في الكلية لانها بتحبه و متصورة انه بيحبها

و سواء كان تصرفهم صح ام خطء فلم يكن هذا محور موضوعي

هنا كان الإختلاف الذي عجزتي عن نقاشه معنا بهدوء و إتهمتينا بالإزدواجيه و مش شايفن العسل والكلام اياه ده

كون رأيك سبب العجب من البعض و عدم التقبل من البعض الآخر و إمتعاض الكثيرين أيضاً فهذا لم يمنعهم من النقاش و إبداء آراءهم المخالفه لرأيك دون المساس لشخصك

محدش فيهم جه غير كلامه تاني و قال وماله غيرك ومحدش نال الطرف الآخر بوصف يتعدى الحوار حول الرأي ليصل لوصف كاتب الرأي إلا أنت

إلا أنا

طيب اللي تشوفيه

انت أدرى برضه

حتى ابقي راجعي باقي المشاركات اللي سابت الموضوعين و دخلوا على صورة المعرف الخاص بيا على اعتبارها تعطي انطباع بالتحرر و المعروف ماذا يقصد بتلك الكلمة :blink:

[Nina Hussien]

ونحن بإنتظار الحلقه القادمه

لو كنت أستخدم اسلوب جرئ لا يتناسب مع المحافظين و صغار السن فماذا نسمي هذه الأساليب في بعض الأحاديث الشريفة و أمهات كتب التراث التي كتبها علماء دين

عن ابن عباس - رضي الله عنهما - أن رسول الله - صلى الله عليه وسلم - قال لماعز حين أتاه فأقر عنده بالزنى . قال: لعلك قبلت ، أو لمست ؟ قال : لا، قال الرسول (( أ ***** )). قال: نعم قال : فأمر به فرجم

البخاري 8/135 رقم 6824 . و فى أحد روايتين لأحمد 1/238، 270 .أبو داود 4 /580 رقم 4427 البيهقي 8/226

لم يذكر لفظة يـُفهم منها أو تـُحى مثل : "وأطئتها، أو أقضيت وطرا، أو حدث بينكم مثل ما يحدث بين زوجين،، بل ذكرت بصريح اللفظة العربية المستخدمة فى لغة الشارع اليوم!

كتاب "الروض العاطر فى نزهة الخاطر"

.. التحميل للإمام الهمام سيدى محمد النفزاوى

http://fosta.net/malafaljens/alrawda...lrawdindex.htm

**********

كتاب "نزهة الألباب فيما لا يوجد فى كتاب"

شهاب الدين أحمد التيفاشى

(لم اعثر على ربط له)

و كتاب "تحفة العروس و نزهة النفوس"

لأحمد التيجانى

http://www.algazalischool.com/vb/attachmen...mp;d=1160864862

و

http://www.jesus-for-all.com/islamic_books...t_al_3aroos.pdf

كما يمكن للجميع ان يراجعوا كتاب الأغاني و نثر الدار

و كتاب ألف ليلة و ليلة النسخة الأصلية

و الكثير من روايات عظماء الكتاب مثل يوسف ادريس و احسان عبد القدوس و نجيب محفوظ

في كل تلك الامثلة لم يستخدموا لا تورية و لا تلميح و لم أسمع أحد اتهمهم حتى الآن بالجرأة و التحرر و العلمانية الخ الخ

و أعتقد تلك الامثلة تكفي و لا حاجة للمزيد :happy:

[Nina Hussien]

الأخت نينا

يضايقك لو قلت لك ان صورتك في المنتدى لا تلاقي قبولا ً لدي .. والا تزعلي من الصراحة دي ؟؟؟

تحياتي

زيزيتا

لا والله يا زيزتا ما يزعجنيش خالص بالعكس أنا عارفة انها صورة مرعبة لان فيه لسه وجوه تبتسم و احنا في ازمة رغيف العيش بس أنا بحب التفاؤل معلش علشان كده حاطيتها

بس هل ده له علاقة بموضوعنا هنا :happy:

[Nina Hussien]

ناس كتير في المنتدى وأعضاء محترمين لهم تحفظ كبير على الصورة وأعتقد إنه حصل ربط بين الصورة الرمزية لنينا حسين وطرح الموضوع الأول ...

عشان كده في أحد الموضوعات اللي طرحته الأخت بدرية مكاوي قواعد المنتدى لحماية المنتدى هل من قواعد لحماية اعضاء المنتدي . قلت فهي كده أفضل طريقة للتعارف وخلينا من غير صور أحسن لأن كل إنسان بياخد انطباع من الشكل اللي بيشوفه وما بيكونش في أغلب الأحيان انطباع صحيح

وتلاقي الأفكار أفضل من تلاقي الوجوه والله

هذا الكلام في حال كانت الصورة شخصية .

ومتهيألي إن الكلام ده صح

هما بقوا كثير كمان :blink:

فكرتني بمسرحية عادل امام لما قال هو نابليون ساب الحرب و قعد يمضي على اطباق

انتوا سيبتوا الموضوع و دخلتوا في الاسلوب و بعدين سبتوا الاسلوب و دخلتوا في الصورة ماحدش يحب يتدخل في أنا بفطر ايه الصبح كمان bsh:)

طيب لو ماكنتش صورة شخصية يبقى في هذه الحالة ماذا سيكون الكلام :happy:

و سوء كانت شخصية ام لم تكن فهي صورة لوجه يبتسم ... يعني لا يوجد فيها صورة لجسد و لا اغراء و لا اي حاجة و لا يمكن لازم احجب بنات الصور لكي لا اثير تحفظ أحد :ninja:

[Nina Hussien]

على هامش الموضوع يانينا ولكنه ذو صلة به:

أولاً: معظم الرجالة عينيهم زايغة إلا من رحم ربى وهذا معلوم بالضرورة لبنات حواء :ninja:

ثانياً: الفتاة هى من تعطى الضوء الأخضر أو الأحمر للرجل ولكنها فى النهاية تلومه منفرداً وتتقول عليه كلام كبير على شاكلة الذئب البشرى وهذا لا يعفيها من المسئولية فى شئ لأن المسئولية مشتركة :lol:

ثالثاً: صعب تلاقى راجل راح يجر شكل واحدة فى حالها ومحتشمة فى لبسها ومكياجها ... وحتى إن فعل وإديتله وش أبلاكاش من الأول مش حيكررها تانى :blink:

كفاية كده عليكى النهارده bsh:)

من كم شهر مرات خالي ولدت عقبال عندكم فلميت هدومي و رحت أراعيها لان لا اخوات بنات لديها و امها مريضة كما ان لها طفلين اكبر من المولود.

المهم احتاجنا حاجات من السوق فلبست قميص خالي و خالي للعلم طوله 188 سم أي ان قميصه كان واصل لكعب رجلي تقريبا.

و اخذت الطفلين و نزلت السوق بدون ان اضع خط مكياج واحد.

و عدت أحمل 10 اكياس و اجر طفلين و ملحوسة و مبهدلة و حالتي تصعب على الكافر

و اذ بي افاجأ و انا احاول توقيف تاكسي برجل تجاوز الخمسين يقف لي بالعربية و بيعزمني أركب !!!!

طيب ده بقى اغريته بالخيار و لا اتدلعت عليه بالطماطم و لا كان طمعان في العيال و لا ايه بالظبط ؟

و مرة 6.30 الصبح نازلة اجري ألحق القطر علشان عندي شغل و مش شايفة قدامي ... و لابسة مبهدل و اتوضيت و لم اضع حتى قلم كحل بعدها و برضه لاقيت واحد رايق ماشي يعاكس البنات الساعة 6.30 الصبح

الموضوع لم يعد له علاقة بالتشجيع

الموضوع انهم كفوا عن الحكم بالمظاهر

المحجبة و غير المحجبة و المنقبة و من تحمل طفل رضيع و من تجر طفل صغير قد تركب معه السيارة

لذا اصبح بيجرب حظه مع أي واحدة و خلاص

لان الكل يستتر الان خلف ستار الحجاب و الدين لردأ الشبهات

و لا ايه :happy:

[Nina Hussien]

ناس كتير في المنتدى وأعضاء محترمين لهم تحفظ كبير على الصورة وأعتقد إنه حصل ربط بين الصورة الرمزية لنينا حسين وطرح الموضوع الأول ...

حتي الآن من أبدي تحفظه علي تلك الصورة هي العزيزة zizetta و حضرتك .. لذا من الأفضل دائمآ في تلك الأحوال التحدث بصفة شخصية ... فأنا مثلا أجزم بأني محترم الي حد ما و لكن ليس لي اي تحفظ عليها .. بالعكس فهي ترمز الي تحرر المرأة المصرية من الأفكار التقليدية و الشكل الستاندرد المرسوم لها ... و سواء هكذا او بشكل آخر تبقي دائمآ هي المرأة المصرية بكل الأحترام الذي نكنه لها ...

الصورة الشخصية هي حق أصيل لأي عضو منا و هو يجد فيها ما يعبر عنه ....

و مادام لا يوجد بها ما يخدش الحياء او ما يمس الأديان فالأعتراض عليها يصبح رأي شخصي يعبر عن صاحبه فقط ....

كان هذا رأيي الشخصي علي جزئية في هذا الحوار .....

:happy:

روح يا شيخ ربنا يسترك :ninja:

[~Heba~]

ناس كتير في المنتدى وأعضاء محترمين لهم تحفظ كبير على الصورة وأعتقد إنه حصل ربط بين الصورة الرمزية لنينا حسين وطرح الموضوع الأول ...

حتي الآن من أبدي تحفظه علي تلك الصورة هي العزيزة zizetta و حضرتك .. لذا من الأفضل دائمآ في تلك الأحوال التحدث بصفة شخصية ... فأنا مثلا أجزم بأني محترم الي حد ما و لكن ليس لي اي تحفظ عليها .. بالعكس فهي ترمز الي تحرر المرأة المصرية من الأفكار التقليدية و الشكل الستاندرد المرسوم لها ... و سواء هكذا او بشكل آخر تبقي دائمآ هي المرأة المصرية بكل الأحترام الذي نكنه لها ...

الصورة الشخصية هي حق أصيل لأي عضو منا و هو يجد فيها ما يعبر عنه ....

و مادام لا يوجد بها ما يخدش الحياء او ما يمس الأديان فالأعتراض عليها يصبح رأي شخصي يعبر عن صاحبه فقط ....

كان هذا رأيي الشخصي علي جزئية في هذا الحوار .....

:happy:

حضرتك بتجامل نينا على حساب الدين!!!!!!!!!!!

لا و هى ردت عليك بمجاملة بالمثل

اللى مش محجبة وعايزة تبين انها محترمة دى بتضحك على نفسها مش اكتر

لكن متجيش حضرتك وتجاملها و توافقها الراى

انا نفسى اعرف شئ واحد

نينا لم تعترف اعتراف ضمنى ان الصورة صورتها وحتى لم تنكر

و بعدين دى صورة للعضو منشورة كده فى العلن عشان الناس تشوفها و نيجى فى الاخر نقول محدش له الحق فى ابداء تعليق عليها و محدش يحق له يعترض عليها

طب اذا قلنا انك يا نينا التزامك الدينى ده شانك الخاص و سواء كنتى محجبة اوغيره ده شئ لا يخصنا لانك انتى لوحدك محاسبة عليه

لكن كون انك تحطى صورة زى كده فى المنتدى معلش ده موضوع تانى

قد تصادفى واحد عنده مرض فى قلبه يراسلك على الخاص يطلب صداقة و كلام من ده و هو فى الاساس معجب بالصورة و بجد محدش يلوم عليه اذا افتكر انك من اياهم رغم انى شخصيا شايفة كتاباتك جميلة فيما عدا الموضوع الاخرانى اللى شايفاه جرئ زيادة عن اللزوم و للعلم انه بعد الموضوع ده بالذات لاول مرة باخد بالى من صورتك و كتير حاولت اقنع نفسى انها مش بتاعتك

يا نينا فعل السوء حاجة و المجاهره بيه حاجة تانية

و اذا بليتم فاستتروا

هو فيه بلاء للمرأة زى بلاء ترك الحجاب

تم تعديل 14 أبريل 2008 بواسطة ENG.Heba

[~Heba~]

ترمز الي تحرر المرأة المصرية من الأفكار التقليدية و الشكل الستاندرد المرسوم لها

قصد حضرتك تحررها من الحجاب تاج المراة المسلمة

و بعدين الشكل الستاندرد ده المرسوم لها يعنى مين رسمه!!!!!!!!!!!

ده اسلام يا استاذ سكوب

[جويرية]

عن ابن عباس - رضي الله عنهما - أن رسول الله - صلى الله عليه وسلم - قال لماعز حين أتاه فأقر عنده بالزنى . قال: لعلك قبلت ، أو لمست ؟ قال : لا، قال الرسول (( أ ***** )). قال: نعم قال : فأمر به فرجم

البخاري 8/135 رقم 6824 . و فى أحد روايتين لأحمد 1/238، 270 .أبو داود 4 /580 رقم 4427 البيهقي 8/226

لم يذكر لفظة يـُفهم منها أو تـُحى مثل : "وأطئتها، أو أقضيت وطرا، أو حدث بينكم مثل ما يحدث بين زوجين،، بل ذكرت بصريح اللفظة العربية المستخدمة فى لغة الشارع اليوم!

أول مرة اشوف حد يحذف كلام من حديث الرسول صلي الله عليه و سلم !!

ده نص الحديث

عن ابن عباس قال‏:‏ ‏(‏لما أتى ماعز بن مالك النبي صلى اللّه عليه وآله وسلم قال له‏:‏ لعلك قبلت أو غمزت أو نظرت قال‏:‏ لا يا رسول اللّه قال‏:‏ xxxxxxxxxxxxxx قال‏:‏ نعم فعند ذلك أمر برجمه‏)‏‏.‏

رواه أحمد والبخاري وأبو داود‏.‏

يا اختي ده واحد رايح يتنفذ فيه عقوبة الأعدام ( الرجم حتي الموت )مش حينفع ساعتها نستخدم أي كلام او تلميح

لازم يبقي الكلمة تبقي بنفس اللي بتدل عليه

و بعدين نشوف رحمة الرسول صلي الله عليه و سلم لما بيقولوه ( لعلك قبلت أو غمزت أو نظرت )

ده معناه أنه عايز يشوفلوه مخرج من العقوبة

ده غير أختلاف اللهجات

يعني ممكن يقولوه ( زنيت ) و الراجل ده مش عارف بالظبط يعني ايه الزنا بالتحديد

لو قاضي في المحكمة ممكن يحكم علي برئ بالأعدام عشان اللفظ مش و اضح

فما بالك بأرحم البشر صلي الله عليه و سلم

و بعدين كلمة النكاح دي جاية في القرأن الكريم

المشكلة أن الناس استخدمت الكلمة دي كلفظ دارج

أما عن حياء الرسول صلي الله عليه و سلم

حديث أبي سعيد الخدري رضي الله عنه قال:«كان النبي صلى الله عليه وسلم أشد حياءً من العذراء في خدرها» [صحيح البخاري ومسلم].

أسماء بنت يزيد سألت النبي صلى الله عليه وسلم عن غسل المحيض قال: «تأخذ إحداكن ماءها وسدرتها فتطهر إلى أن قال: ثم تأخذ فرصة ممسكة فتطهر بها». قالت أسماء : وكيف أتطهر بها؟ قال: «سبحان الله تطهري بها» ورأت عائشة حمرة الحياء في وجهه فأخذتها وأفهمتها

كما يمكن للجميع ان يراجعوا كتاب الأغاني و نثر الدار

و كتاب ألف ليلة و ليلة النسخة الأصلية

و الكثير من روايات عظماء الكتاب مثل يوسف ادريس و احسان عبد القدوس و نجيب محفوظ

ألف ليلة و الأغاني دي كتب مش كويسة و ليه نستشهد بيها

و لا تحفة العروس دي

منخدش الأحاديث الضعيفة عن الرسول صلي الله عليه و سلم

أسلم حاجة صحيح البخاري و مسلم

أما الأدباء العظماء يوسف ادريس و احسان عبد القدوس و نجيب محفوظ

دول خدوا لقب عظماء عشان كتبهم بتدعو للرزيلة و الأباحية

منكرش طبعا ان اسلوب الأدبي جميل و يشد لكن لو كانوا استخدموه صح

مش كاتب يقعد علي مدار صفحة كاملة يوصف بقي اللي قدره ربنا عليه

تم تحرير المشاركة بواسطة Mohammad

ويرجى ملاحظة ان ليست كل الالفاظ مسموح بذكرها فى الاماكن العامة حتى لو كانت تذكر فى الغرف المغلقة او فى جلسات المحاكمة.

شكرا

[maryous]

حتي الآن من أبدي تحفظه علي تلك الصورة هي العزيزة zizetta و حضرتك .. لذا من الأفضل دائمآ في تلك الأحوال التحدث بصفة شخصية ... فأنا مثلا أجزم بأني محترم الي حد ما و لكن ليس لي اي تحفظ عليها .. بالعكس فهي ترمز الي تحرر المرأة المصرية من الأفكار التقليدية و الشكل الستاندرد المرسوم لها ... و سواء هكذا او بشكل آخر تبقي دائمآ هي المرأة المصرية بكل الأحترام الذي نكنه لها ...

الصورة الشخصية هي حق أصيل لأي عضو منا و هو يجد فيها ما يعبر عنه ....

و مادام لا يوجد بها ما يخدش الحياء او ما يمس الأديان فالأعتراض عليها يصبح رأي شخصي يعبر عن صاحبه فقط ....

كان هذا رأيي الشخصي علي جزئية في هذا الحوار .....

هو تحرر المرأة المصرية في نظر سيادتك إنها تكشف شعرها وجزء من أكتافها عشان تخرج من الأفكار التقليدية والشكل الستاندرد المرسوم لها ...

طيب من خليها متحررة جداً زي إيطاليا اللي انت عايش فيها وتلبس مايوه وتتصور بيه ..

وبعدين لو بقت بالشكل اللي انت شايفه أو عاوزه تبقى ما بقتش مرأة مصرية تبقى مرأة أفرنجية لا هي حصلت عنب اليمن ولا بلح الشام .. كل بلد في الدنيا وله سماته المميزة في لبسه واللا حضرتك ما بتشوفش الزي التقليدي لليابانيين والباكستانيين والماليزيين والسودانيين والمصريين طبعاً ... وغيرهم وغيرهم ... وعشان ماتقوليش نلبسها ملاية لف ومنديل وبيشة ... لا يامحترم نخليها معتدلة تقترب من المظهر الرائع للمرأة المتحفظة التي تحاول أن تخفي جمالها ومفاتنها عن العيون ... بالعربي شوية حياء .. أما اللي حضرتك بتنادي بيه يبقى اسمه شذوذ وخروج عن المألوف والتقليدي اللي مش عاجبك .. بالظبط كده زي ما تلاقي طالب بايظ في وسط مجموعة طلبة متفوقين .. ده بيسموه شاذ عن المجموع

وطبعاً مش ها ضيف على اللي قالتهولك المهندسة المحترمة جداً هبة ... من إن الدين الإسلامي يشترط في مظهر المرأة المسلمة الحجاب المحتشم ومما قرأناه من موضوع الأخت نينا أنها استشهدت بآية كريمة فأظنها مسلمة وينطبق عليها ما ينطبق على أخواتها المسلمات ( في حال كانت الصورة شخصية ) ... أما لو الصورة مش صورتها فكان الأولى بها أن تتحرى الدقة في اختيار صورتها الرمزية لأن المنتديات ومنهم منتدانا المتميز يدخل من ضمن أعضاءه أعضاء لهم اتجاهات وميول دينية وأظنهم كثيرين جداً .. يمكن أن تمر عليهم الصورة مرور عادي إلى أن يظهر موضوع زي اللي طرحته الأستاذة المحترمة نينا فيبدأ التركيز والبحث والتمحيص عن كاتب الموضوع لمعرفة شكله لعله يوضح جزء ولو جزء اتجاهاته ونواياه بطرحه لمثل هذا الموضوع .... وأعتقد في كثير من الأحيان يؤخذ انطباع عن الشكل أو المظهر الخارجي ويتم الربط بينه وبين فكرة الموضوع كما يؤخذ في الاعتبار أيضاً مظهره في تقييمه ... وفي أي معاملة المظهر العام للإنسان ... وأظن أنك تعرف إن في حاجة اسمها كشف هيئة في كليات الشرطة والكليات العسكرية وكمان إنتر فيو للوظائف في الشركات المتميزة والمرموقة ... وكلُُ حسب نشاطه ...

وبعيداً عن الأخت نينا .... لما تيجي واحدة زي إقبال بركة وتنتقد خطبة وخطباء الجمعة في المساجد ... ما ينفعش .. عارف ليه عشان دي واحدة ليس لها علاقة بالدين وماتعرفش إن أ . ب دين هي حجاب المرأة المسلمة ( وطبعاً هي مش لابسة حجاب ) فما كان من الشيخ محمود عاشور وكيل الأزهر الشريف إلا أن هاجمها على تتطرقها لموضوع ليس لها شأن به من قريب أو بعيد وهي المتبرجة التي لا تعرف أي شئ عن الإسلام والدين الإسلامي قال تعالى ( إسألوا أهل الذكر إن كنتم لا تعلمون ) .... صدق الله العظيم

يعني صورتك الرمزية إذا كانت حق أصيل ليك ... فأن ليا حق أصيل في إني أتخيل شخصيتك ...

زي مثلاً صورتك الرمزية للرجل الفلاح المصري الأصيل أعطتني انطباع إنك رجل بتحب مصر جداً وترثى لحال البلد .. ده بالإضافة لزمزمية الأمل... وبالضبط زي صورة ناش وقرنفلة أعطتني انطباع إنهم شخصيتين مرجتين وأعتقد إن ده ظاهر في كل مشاركتهم ولا أعتقد إن صورة واحدة فيهم أو صورتك استفزت أي حد ... حتى في كل المواضيع الخاصة بكل واحد ..

فإذا كنت سيادتك بتدعو إلى تحرر المرأة المصرية ... فيبقى تحرر عن العادات البالية والتقاليد الخاطئة وليس تحرر من الملابس وستر العورات ..

وإذا كنت تؤمن بالتخصص ( بالبلدي إدي العيش لخبازه ) يبقى إذا كنت عاوز تتكلم في الدين تسمع لشيخ أو قسيس وإذا عاوز تتكلم في الصحة تسمع لدكتور .. ولكل منهم شكله ومظهره الذي يميزه ..

وإذا أردت أن تنصح فيجب أن ترتدي عباءة النصيحة

عباءة النصح دي عبار عن مظهر وفكر وأسلوب وتخصص ...

وإذا كنت من دعاة التحرر والخروج عن الاستاندرد والشكل التقليدي اللي بتقول عليه ... أوقفتوا الموضوع الأول ليه اللي كان مش ستاندرد ومتحرر جريئ

وحياة النبي ياأستاذ Scorpion خليك بعيد عن المنطقة دي

طبعاً أنا عارف إن عندك رد فياريت نتحاور في موضوع جديد عشان ما نخرجش عن الموضوع الأصلي للأخت نينا

أختكم

maryous

[ابو جيداء]

و اذ بي افاجأ و انا احاول توقيف تاكسي برجل تجاوز الخمسين يقف لي بالعربية و بيعزمني أركب !!!!

طيب ده بقى اغريته بالخيار و لا اتدلعت عليه بالطماطم و لا كان طمعان في العيال و لا ايه بالظبط ؟

الأخت نينا

أكيد راجل معندوش نظر

هوة دة شكل واحدة حد يبصلها

ولايمكن عاوز يقولك القميص دة جايباة منين ..

تم تعديل 15 أبريل 2008 بواسطة ابو جيداء

[Scorpion]

ENG.Heba كتبت

ده اسلام يا استاذ سكوب

أشكرك يا أستاذتي الفاضلة علي تعريفي بما هو الأسلام ... و اذا كنتم أخذتم ( حضرتك و السيدة maryous ) ما كتبته علي محمل ديني و هو آخر ما كان يخطر لي عند كتابتي لرأيي الشخصي فهذا ليس بخطأي .... فبجانب كثيرآ من الأخوات المحجبات هناك الكثير أيضآ ممن لا يحملونه .. كما أن نسبة كبيرة أيضآ من السيدات المصريات تدين بالمسيحية و لا ترتديه ... لذا ما أكتبه أكتبه من وجهة نظري التي تنظر الي الجميع كمواطنين يتقاسمون الحياة في بلد واحد أما معتقداتهم و تطبيقهم لها فهو شيء بينهم و بين ربهم .. و لن أكون القاضي و الجلاد لكل من لا يطبق جزئية أجدها تمثل شريعة في ديانتي ....

احترامي سيظل دائمآ لما هو داخل الأنسان و ليس لما يريد ان يظهره للآخرين ...

[Scorpion]

تم طرح الموضوع للنقاش مرة أخري دون أن يتم حذف أيآ من المداخلات غير ذات صلة بفكرته الأساسية..

قمنا بذلك لثقتنا في نضج تفكير جميع الزملاء .. فهل نستطيع أن نبدأ من جديد في مناقشة أصل الموضوع ..

[Nina Hussien]

بلا شك ان هناك العديد من الالفاظ التى نسمعها من حولنا وقد نستعملها احيانا داخل الغرف المطلقة ، ولكننا نشعر بالحرج من استخدامها على الملأ واظنك والاخوة الاعضاء يوافقوننى على ذلك.

هناك ايضا الكثير من الالفاظ لانستخدمها على الرغم من انها من صميم لغتنا العربية لان السيدات يشعرن بانها كلمة فيها اهانة لها ، فمثلا لن تقبلى ان يناديك شخص لايعرف اسمك بـ " يامرأة ، وستقولين عليه سوقيا ، ولو تقبلتيها فسترفضها سيدات كثيرات غيرك. ولذلك استحسنا استخدام الفاظ مثل " آنسة ، سيدة ، مدام ، مدموازيل " وهكذا.

ايضا فى امور حياتنا ، نسمع عن كلمات مثل ( PMS ) للهروب من الاسم التقليدى ، او " انا عيانة " لتفادى الحرج من ذكر امر طبيعى يلازم المرأة معظم حياتها.

الفاضل محمد

أولا هذا الموضوع ليس زفرة غضب من موضوع الذئب و لكن تعجب من تظاهر الكثير من رواد المنتدايات

موضوعي الذئب الذي تفضلت حضرتك بالحديث عنه أنا معترفة جدا انه كتب بطريقة جريئة لانه يحاكي الواقع بلا زيف

و برغم ذلك لم أراى انه حمل الفاظ خادشة للحياء

ثم انه كان مكتوب بطريقة المبالغة الفكاية و التي يمكن لسيادتك ان تطلع عليها في كل الافلام و الصحف و المقالات و الكتب

يعني مش بكتب موضوع انشاء لطلبة الثانوية العامة

و لو كان هناك من تحفظ على الاسلوب و هذا حقه

فأعتقد انه ليس من الطبيعي ان ينكر ان الموضوع موجود و بكثرة أيضا و ليش شرزمة قليلة كما يحاول البعض أن يوحي ...

لقد كنت امسك بابا بريد القراء كما انأعز صديقاتي طبيبة نفسية و انا اعلم عماذا اتحدث

و لو اردنا دفن رأسنا في الرمال فلن يعني ذلك ان العالم من حولنا اختفى.

اذن فالموضوع ليس ملائكة وشياطين ، بل ان الموضوع هو لمن نوجه الحديث ، وهل مايتحدث عنه الموضوع هو موضوع شائع ام انه من نسج الخيال؟ ام انه يحدث بين فئات معينة؟ وصدقينى اذا قلت لك ان ماكتبتيه لم اعلم به الا من الافلام على الرغم من اننى لم اغادر مصر الا منذ مايقارب الثمان سنوات. وليس معنى هذا اننى اقول انه اشياء مثل هذه لاتحدث ، بل اقول انها حالات بسيطة وحالات خاصة ، لان البنت المصرية مازالت بنت جدعة وخجولة حتى ولو كانت متحررة كما يحلو للبعض ان يصف البنت التى لديها قدر اكبر من الحرية وفى جميع الاحوال فهى لاتسمح بان تسمع هذا الكلام الا اذا كانت " مش متربية " ، لان البنت التربية بتقطع السكة فورا على من يمتهن عفتها ولو باللفظ حتى لو كان خطيبها.

يا سيدي والله أنا قلت لو قالك

هل معنى ذلك انها فتحت السكة ؟

كم من فتاة وجدت من يحاول التحرش بها على الاقل بالقول و صدته؟

و كم من فتاة انخدعت باسم الحب و العواطف؟

ثم متربية و لا مش متربية لم يكن هذا محور كلامي ..

اذا اردت همسة صدق في اذنك

ما من فتاة لم يحاول احد ان يسكب على اذنها بعض من هذا الكلام او يحاول التقرب منها خاصة لو كانت جميلة

سواء كانت محجبة أو غير محجبة

ثلاثة اعتقد هن من لم يتعرضن لذلك

المنقبة و المخمرة خمار صحيح و الدميمة جدا

و الكثيرات بالطبع يقفن موقف شديد حيال هذا الامر و ليس معنى حدوثه انها شجعته كما قال معظم الناس و الا يجب ان نعتبر التي تم اغتصابها فتاة ليل ماشية ببدلة رقص في الشارع

ام ان تقول لي انه اذا طرح موضوع كان نصه " هل تقبلي ان تكلمي خطيبك في الهاتف قبل الزواج ، او هل تقبل ان تكلمك خطيبتك في الهاتف"

و اجد 95% من الشباب في سنة 2008 يجيبون بالنفي الشديد

فأعذرني هذا تظاهر

و ان أجد في موضوع مناقشة الختان من يغلي و يفور و يتشال و يتحط لمجرد مناقشة الفكرة دون أن يأتي بأي بينة تعضض كلامه مع وجود الكثير من الادلة على العكس

فأعذرني مرة أخرى هذه اما مبالغة أو انه " حافظ مش فاهم"

من ناحية أخرى سيدتى الفاضلة ، انت لم تردى على من ادرجوا مداخلات فى موضوعك الاول ، بل تركتى موضوعك الاصلى وفتحتى موضوعا تبدين فيه استياءك مما كتب هناك ، مع انه كان من الواجب ان تناقشى فكرتك وكلامك فى نفس الموضوع ، وصدقينى بعد ان فتحتى موضوعك الثانى هنا بدا لى كشخص ذهب الى الاوبرا مرتديا جلابية ، وعندما استنكر الجمهور ان يأتى للاوبرا شخص بزى مخالف للتقاليد ، انبرى يقول لهم " جرى ايه؟ زعلانين ليه؟ حاتعملوا لى افندية وبهوات ، اراهنكم انكم كلكم عندكوا جلاليب ".

والله ما جلالايب و لا شورتات

انا فتحت هذا الموضوع لاناقش المبالغة و التظاهر الشديد بالميثالية و كان في نيتي و ربنا يعلم كتابته في كل الأحوال

انتم من حولتوه لمناقشة موضوع الذئب

ثم انا لا هربت و لا حاجة و الا ماكنتش هنا اناقش الآن

و بعدين من فضلك من فضلك حدد لي ما هي الكلمات الغير طبيعية الشديدة البذاءة الخارجة عن كل النصوص و الاعراف التي استخدمتها!!!

و هذا سؤال جدي جدا

ثم مش شايفة ان حد ناقش اصلا ان الموضوع بيحدث و يجب التوعية منه

الكل ناقش 3 كلمات في الموضوع و ناقش صورة المعرف و شوية هايناقشوا اسمي و نوع البرفان اللي بستخدمه :blush2:

وبالاصالة عن نفسى ، صورتك الرمزية لاتزعجنى اطلاقا ، ولو كان الموضوع مقارنة صور ، فصورتك الرمزية جيدة بس مش احلى من صورتى الرمزية.

طبعا صورة علم مصر هي امي أجمل من أي حاجة

هو أنا أقدر أتكلم

اروح في حديد على طول أو ألاقي اللي يتهمني بالجسوسية جنب الايباحية

بالمناسبة هل صورة المعرف جزء من مناقشة المواضيع و الافكار اليومين دول smk:

شفت الحوار بهدوء حلو ازاي

شكرا لك و دمت بألف خير