مشكلة كبيرة تهم ناس كتير بخصوص إسكان الشباب

[se_ Elsyed]

حقيقة كانت مفاجأة ومش مفاجأة في نفس الوقت ما شاهدته في برنامج العاشرة مساءً اللي سارق الأضواء من برنامج 90دقيقة .. اللي بقى في منتهى الهيافة والسطحية وهو على فكرة في طريقة إلى الضمور نتيجة لإنحيازة التام إلى الحزب الوطني بمساوءة وفساده بقيادة مزيعه البارد معتز الدمرداش إبن ماما نونا ( بيفكرني بنيرفانا إدريس بتاعت القاهرة اليوم في أواخر أيامها قبل ما تركب الطفطف ) .. ما علينا

هذه المشكلة أنا اعلم إنها تمس قطاع كبير من مالكي شقق إسكان الشباب في مصر

سواء المُلاك الحقيقيين

او من وصلت إليهم تلك الشقق التي أنتقلت من إيد لإيد لحد ما وصلت للي سكن في الشقة بالفعل

• نرجع شويه فلاش باك كده للتسعينات لما دولتنا الرشيدة حبت تحل مشكلة الإسكان فتفتق ذهنها عن بناء وحدات سكنية صغير المساحة تبدأ من 53 متر إلى 73 متر .. مدعمه وعلى اقساط تمتد إلى 20 عام ... وكانت في المدن الجديدة وتحديداً في القاهرة الجديدة والشروق والعبور و6 أكتوبر – انا اتحدث عن القاهرة –

• وكانت بصراحة واضعه شروط للمتقدمين لهذه الشقق منها إنه يكون حديث الزواج او كاتب كتابه .. ويكون دخله محدود غير قادر يعني إنه يشتري او يأجر شقة بسعر عالي .. ومنها إنه يسكن فيها وما يتصرفش فيها بالبيع إلا بعد تسديد الأقساط ويمتلك العقد النهائي ... والمفروض إن كان في لجان مُكونة من أجهزة تلك المدن الجديدة وبتسأل على كل متقدم وتشوف ظروفه إيه وهل فعلاً الكلام اللي ذكره في طلب التقديم حقيقي أم لا ... إلخ

• والحقيقة إن ما كانش في لجان ولا غيره .. ولو جه واحد عندكو البيت يسأل على الأستاذ عيسوي اللي مقدم على شقة كنت ممكن تغمزه ببريزه و الموظف ساعتها يكتب في تقريره إنه راح لعيسوي البيت ولقاه لابس جلبية مقطعه وبياكل عيش مسأ سأ في ميه وهكذا

• وعيسوي كان يوقع بالموافقة على إحترام الشروط دي ويستلم الشقة من هنا ويروح يبيعها من هنا بمكسب مش بطال وأهو عمل بكده مصلحة على السريع

• وشاكر يشتري من عيسوي ويبيع لعبد العال وعبد العال يباصيها لبرعي وبرعي ياخدها على صدره ويمررها لفتحيه .. تيجي فتحيه الغلبانة تسكن ..

• هوب تلاقي الإسبوع اللي فات زوار الفجر بيخبطوا عليها الساعة 11 بالليل ويقولوا لها :

• الزوار : إفتح يابا الحاج عيسوي يا صاحب الشقة رقم 13 في البلوك رقم 13 في الحي الـ 13 إفتح لو سمحت

• فتحية : عيسوي مين ؟!!! ما فيش عيسوي هنا .. أنا فتحيه مرات شكري وإحنا دلوقت اللي شاريين الشقة وساكنين فيها وبنسدد الأقساط في ميعادها وكتاب الله .... وبعدين حد يجي يزور حد الساعة 11 .. إيه الجليطة دي ؟ .

• الزوار : آه قولتيلي بقى .. يعني عيسوي باع لكم شيء لا يملكه ؟!!! طب يا ست فتحيه يا مرات شُكري إلبسي هدومك بكره وتعالي لنا على جهاز المدينة عشان عايزينك في كلمتين

• تلبس فتحية هدومها وتروح الجهاز تلاقي إخطار بسحب الشقة لإن الأخ عيسوي اللي هي ما تعرفوش باع لهم التروماي كلهم وأختفى ...... تصرخ بقى فتحيه وتلطم وتقول : شقى عُمري ... شكري إنزل معايا الملاحه وكده يعني

• الموقف ده بيحصل ومازال حتى الأن ... ولسه نسيبي بايع شقتة اللي في الشروق من شهرين .. ومع إنه شغال في السعودية وعنده شقتين تمليك وفيلا ما شاء الله ... إلا إن البحر يحب الزيادة .. فكان هابش من الدولة شقة شباب في الشروق مُدعمه وبسعر التراب وما كانش ساكن فيها فباعها من شهرين تلاتة والمشتري يكمل الأقساط .

طبعاً ده وضع غير قانوني بالمرة وشيء مزعج وأنا مع ذلك قلباً وقالباً ...

لكن مين السبب فيه ؟

الإجابة : أنا أُلقي باللوم دائماً على الحكومة اللي المفروض بتسن القوانين وتحرص على تطبيقها في الوقت المحدد.. وإلا ما كانتش سنتها وتتلهي علي عينها وتسكت ... ولو قرأتوا كلامي ومداخلاتي وأرائي هاتعرفوا إني أقول دائماً إن الإنسان فوضواي بطبعه .. وإن ماكنش في قوانين بتحكمه وتطبق عليه بشكل سليم .. يبقى كل واحد هايقف في وسط الشارع ويقلع هدومه ويصرخ ويقول : من النهاردة ما فيش حاكومه ... أنا الحاكومه ( مع الإعتذار لأحمد السقا في فيلم الجزيرة اللي عصام شوقي بعت لي اللنك بتاعه وكان في فيروس خرب لي الجهاز .... ميرسي يا عصام – هاخليك تحس بعقدة الذنب طول حياتك زي الهولوكوست - )

ولا أنفي هنا خطأ الأفراد اللي بيستغلوا مثل تلك الثغرات وهما عارفين إنهم مخالفين للقانون ولما يقع المحظور يرجعوا يعيطوا ( راجع الكتاب صفحة أراضي القرعة المتسقعة .. وأراضي إبني بيتك المتجمدة )

حدث موقف ظريف لأحد زملائي هنا ... اللي جه معايا على نفس الطيارة وكان معذور في قرشين قبل السفر .. خلوا بالكم معايا .. فراح باع شقته اللي في مدينة 6 أكتوبر بـ 6 ألاف جنيه آه والله ( كان عليها أقساط متبقية طبعاً ) يشاء السميع العليم بعدها بشهور إن لم تكن اسابيع .. إتبنت قدامه جامعة 6 اكتوبر فبقى ماشي يكلم نفسه .. ولإنها كانت في الدور الأرض وأمام جنينه تابعه للعمارة فاللي إشتراها عملها جزء كافيتريا وجزء ساكن فيه والبليه لعبت .. وروحي يا أيام وتعالي يا أيام وبعد أكثر من 10 سنوات على تلك الحادثة لقى واحد جايله بيته وبيقوله حضرتك فلان الفلاني ؟ قال له أيوه ... فالراجل كان هايعيط من الفرحة ... فقال له أنا بقى لي سنين بادور عليك ومش مصدق إني لقيتك .. الحكاية يا سيدي إن شقتك أشتراها واحد من واحد من واحده من وحايد لحد ما وصلت لي .. والأقساط خلصت ... فمين لازم يعمل تنازل ويوقع على الورق أما جهاز المدينة لإن كل شيء في الشقة لسه بإسمه من حيث الملكية وعداد الكهربا و و و ؟

صاحب الشقة الأول فقط ...فراح معاه صديقي ده وإتنازل له .

ندعو الله أن تتم تسوية الأمور دي على خير عشان ده شقى وتعب ناس .. وياريت نبقى ملتزمة وحكومة واعية ما تسيبناش لما نغلط وبعدين تدور على علاج للغلط ده ... فالوقاية خير من العلاج .

تم تعديل 10 أبريل 2008 بواسطة se_ Elsyed

[vipwithyou]

انا فهمت دلوقتى انتى كنت بتقولى ما تبعش ليه

ماشى يا ريس

علشان هايبنوا جامعة 6 اكتوبر امام ارضى فى بدر .. صح مش كدة

شفت انا بأفهم ازاى

العيب مش على اللى باع يا ريس

العيب على الحكومة اللى بتسيب ثغرات للبيع

النفس دائما ً بتبحث عن المزيد

فيبقى لما الاقى شقه او ارض هتجيب ليا مبلغ كويس واقدر أفحر فى الثغرات يبقى اكيد هابيع صح ولا لا ؟

دا مش حالى لوحدى ومش عايزك تشتم بس انا بأقولك بصراحة

شكرا يا ريس على النصيحة والموضوع الجامد

تامر السيد