رحلة الى الاقصر واسوان .!!!

[badroora]

قررت انا وصديقتى شريكتى فى السكن بمناسبة اننا اول مرة ننزل اجازة مع بعض لازم نروح نزوراى مكان وحددنا اختيارتنا ما بين سانت كاترين وشرم او

الاقصر واسوان

رسي الاختيار على اسوان قولنا خلينا نبدا من اسوان زحف على باقي مصر يعنى مش كلة مرة واحدة لاء .

المهم هى نزلت قبلي بشهر وانا حصلتها وقررنا نروح محطة مصر نحجز التذاكر .للسفر

ذهبا انا وهى وعرفنا ان فيه قطار نوم قولنا يسلام حيث عبد الحليم حافظ وفاتن حمامة وفريد الاصم وهندرستم وشادية لطفى والحركات دي .

توجهنا الى شباك التذاكر وانا بقي فتحت تحقيق عن القطر

ها لو سمحت القطر دا امان

ايوة يا فندم طبعا امان

اه طيب هو عبارة عن ايه

قالى عبارة عن غرفة فيها 2 سرير

قولتله طيب مش ممكن حد يهاجم الغرفة دي بسكينة ولا سلاح قالى لاء دا امان ومتخفيش فيه قفل من جوة ابقي سكي الباب

قولتله طيب مستوي النضافة ايه قالى ممتاز دا فندق متحرك مش قطر

قولتله وايه الامكانيات قالى بطاطين ووجبة و.........الخ

قولتله طيب هات تذكرتين قالى البطايق

قولتله انا معى بطاقة وصديقتى لاء

قالى ليه

قولتله مش مصرية معاها باسبور

قالى لاء يبقي هتقطع تذكرة اجانب فرق بينى وبينها 100 جنية

هى طبعا انزعجت جدا انه متربية ومولودة فى مصر وبتتكلم مصري افضل من لغتها الاصلية وهو يقولها كدا

طبعا صحبتى وانا عرفاها لو بس قولتلها كلامه صح مش هنخلص وهبوظ الرحلة

قولتله دي اختى قالى ازاى قولتله من اب تانى !!!

هى طبعا من بلد افريقية تقع بين ليبيا ونيجيريا ( افتحوا الخريطة وهترفوها على طول ) هو طبعا لن تخيل عليه انها اختى

المهم هى قالتلى مش مسافرة قولتلها فى عرضك يا شيخة قوليلي ايه اللى يريحك وانا اعمله

الراجل اقترح علينا نقطع درجة اولى مكيف ومش هيسالونا على بطايق

قولنا ماشي

توجهت انا الى شباك التذاكر وقولتله تذكرتين اولى مكيف بكل فخر وكانى باقطع تذكرتين على طائرة بزنس كلاس

المهم طريقتى معجبنتس الراجل اوى وحس انى بتكبر عليه انا بقي قريت الغدر فى عنية

قولتله لو سمحت هو القطر دا هيبقي نضيف ومريح قالى طبعا فيه تلفزيون وتكيف وبوفيه قولتله متكلمش من الفرحة والاكسيتيشن مش بقيت حبه انه يحرقلى المفجاءة

قولتله طيب بليز بلاش المقاعد تكون فى النص ولا فى اخر القطر قالى ماشي

قولتله هو القطر المكيف دا زي اللى بيجي فى التليفزيون فى افلام محمد فوزى وفريد قالى دا انت هتلاقي محمد فوزى نفسه جوة فى القطر

اخدنا التذاكر وودعت صحبتي على موعد لقاء غدا الساعة 7 ونص على رصيف 7 او 5 والله ما فكره .

المهم ذهبت الى منزلى حيث اتى كل اخواتى واولادهم لتوديعي

وصباح اليوم السفر اتت امى غرفتى واحتضنتنى وظلت تبكي حسستنى انى رايحة كندا مش اسوان بينى وبينها 15 ساعة وبس

المهم طمنتها وقلتلها اكل العيش يا امه بقي هنعمل ايه خالى بالك من اخواتى لو مت حلال عليهم منابي المحشي اللى فى التلاجة امى ياعينى ضمتنى اكتر ليها

وقعدت تبكي .امى على فكرة

بتحب العياط زى عنيها اى حاجة تفرح تعيط اى حاجة تبكي تعيط بردوا .

المهم ظُهر يوم السفر توجهت الى غرفتى كى اجهز امتعتى حضرت امى لى سائلة

مش هتخدى سندويشتات معاكى قولتلها لاااااااااااء مش عاوزة اشيل اكل قالتلى لاء الطريق طويل قولتلها هو احنا مسافرين على جمل دا قطر درجة اولى وفيه

بوفيه كمان

قالتلى لاء الامر ميسلمش انا هاعمل سندويشتات قولتلها طيب زى مانت عاوزة بس بليز متكتريش كفاية بس عشرة من كل نوع :baby:

وبعد امى ما خرجت من غرفتى تذكرت ايام الرحلات المدرسية ومدرسة النجع المشتركة بينين والسندويشتات اللى كانت بتعملها لى ....ياااااااه ايام .

عصر يوم السفر

حضر اخواتى تانى وسلموا على وودعونى و قالولى تصحبكي السلامة

بعد عصر يوم السفر بساعتين

توجهت الى محطة مصر لكى اقابل صحبتيى هناك

وطبعا فى محطة مصر عالم تانى تهنا بين الارصفة وبعد عناء ولف بين جميع الارصفة تلاقينا قبل طلوع القطر بمافيش .

وركبنا القطار والحمدلله

يُتبع

تم تعديل 10 أبريل 2008 بواسطة Badria Mekkawy

[الحازم حسن]

قررت انا وصديقتى شريكتى فى السكن بمناسبة اننا اول مرة ننزل اجازة مع بعض لازم نروح نزوراى مكان وحددنا اختيارتنا ما بين سانت كاترين وشرم او

الاقصر واسوان

ايه ده

انتي غنية بئه على كده :baby:

[AMEIR]

الله نفسي ازور الاقصر واسوان ويكون بالمركب :baby:

[badroora]

انتي غنية بئه على كده

الغنى هو الله :baby:

الله نفسي ازور الاقصر واسوان ويكون بالمركب

ولا يهمك تا بعنا وانا اوعدك يا امير هجبلك الاقصر واسوان لحد عندك صورة وكتابة

تم تعديل 11 أبريل 2008 بواسطة Badria Mekkawy

[badroora]

الرحلة داخل القطار .........

اول شيء على باب القطار كان فيه واحدبيشيل الشنط وقال هيحطها فى الامانات قولانا لااء

شال الشنط لحد رقم الكراسي وكانت اول كرسين فى العربية من قدام شمال فى وش التليفزيون ومكان كدا لبه باب فكرته يا اما بلكونه او كافتيريا زى اللى كانت بتقعد فيها فاتن حمامة

وعبد الحليم

االمهم انتهينا من وضع الشنط على الرف وجينا لاهم نقطة الا وهى مين اللى هيقعد جنب الشباك انا طبعا مع اصحابي مدللة جدا يعنى لازم انا اللى اقعد جنب الشباك لو بناكل وحد

هيموت وعاوز ميه طبعا انا

خارج العدد نهائي وحاجات من دى كتير .........الخ المهم واحنا بنحط الشنط بدات احس ان صحبتى شكلها هتبعنى المرادى ومش هتخلينى اقعد جنب الشباك ةانا اى رحلة عندى ما هى

الا صمت رهيب وفرجة من الشباك ومتابعة كل شيء وخيال بقي ..........

صديقتى فولت خلينا اكلمها وش كدا لسه لاقتها اخذت وضعها عند الشباك قولتلها اصلي برجع فى المواصلات ولازم ابقي جنب الشباك قالتلى ولا يهمك عملت احسابي فى اكياس زيادة

قولتها طيب من الاخر كدا معرفش اقعد كدا ع الحرف لازم ابقي جوة تنحت اوى ورفضت وانا بقي اتغليت منها اوى طبعا دي انانية انا عرفة اقصد انى انانية بس هما

عارفين ميولى ومحدش تنح معايا قبل كدا ..........المهم حسيت انى انهزمت قولت ماشي لسه اليوم طويل ويا ويلك منى .........!!!!!!!! :rolleyes:

تحرك القطار من رمسيس الى الجيزة وركن حوالى 30 دقيقة وبعد كدا بدا يتحرك بقي وكان الليل دامس ومافيش حاجة بتظهر غير عواميد النور فقط ...

انا بقي كنت مقلقة كل شوية اقوم واقف واقف واقوم وبعدين بدات اتخنق قاعدين جنب البلكونة ولا الكافتيريا دي والناس مش رحمة نفسها داخلة طالعة طالعة داخلة

وبدائت ريحة غريبة تظهر كان فى جثث فى القطر .

اعلنت انها هتتركنى للجحيم بمفردي وهى نامت ماشاء الله مافيش ثوانى مع ان القطر غير مريح بالمرة كفاية الكافتيريا اللى قدامنا وزباينها اللى طالعين دتخلين

واحنا طبعا او انا بالذات كنت بواب الكافتيريا كل ماحد يدخل ويترك الباب وتهل عليان روايح غريبة اروح بكل غل زقة الباب قفلاه ,.

بنظرة كدا حواليا فى القطار لاقيت كل الناس اعلنت رحلتها الى الملائكة حيث النوم العميق والشخير كانى قاعدة فى حقل ضفادع ...

المهم قولت خلاص كل الناس نامت يبقي التليفزيون لى لوحدى يعنى اجيب القناة اللى عوزاها قمت احاول افتح التليفزيون معرفش قولت استنى المضيفة لما تيجي تفتحهولى ..........

بعد شوية جه الكمثري اديته التذكرة ومشي بعدي بكرسيين قولتله لو سمحت هو مافيش حد هنا يقضى احتياجتنا قالى ثوانى واجيلك ......

جه ويا ريته ما جه نورنى على الحقيقة المرة

قالى اؤمرى يا استاذة قولتله فين المضيفة قالى مافيش مضيفة هنا قلت امال قالى انا اللى مسؤول ..

قولتله طيب لو سمحت ممكن روتانا سينيما قالى واجبهالك ازاى قولتله افتح التليفزيون وهى هتيجي .........قال تليفزيون ايه قولتله دا ولا ديكور قالى الله ينور عليكي

دا بقالوه 4 سنين مش شغال انا صدمت 4 سنين ولدلوئتى محدش لسه بلغ عشان يتصلح .........قالى تؤمرى بشيء تانى ...

قولتله ايوة فين الكافتيريا اللى هنا قالى مافيش كفتريا قولتله اومال ايه اللى الناس داخلين طلعين فيه دا قالى لمؤاخذة دى دورة مايه :lol:

قولتله طيب شكرا اوى اوى اوى .................

بدات بقي اتغل مين صحبتى اللى جيت معاها فى القطر دا وكمان تسبنى وتنام وكمان مش تقعدنى جنب الشباك .............

طلعت شوية كتب وقعد اقري شوية مافيش فايد ة باب الحمام عمال يزيق والناس مش رحمة نفسها ........

اتغظت منهم روحت قفلاه وزقاه برجلى وبقيت اتنح مع كل اللى يدخل واقوله هتسك الباب وراك يقولى اه اقوله طب عدي ..........

وطبعا تقول لمين واحد مشفش رجلى راح جاى فتح الباب بكل قوته رجلى اتزنقت وجعتنى ................

روحت كتبة ورقة بليز اغلق الباب بعد الخروج او الدخول ................

والشهادة لله الناس عددهم كتر عشان يثبتولى حسن تعاونهم

بقي كل اللى يجي جنب الباب يميل يقرا الكلام بصوت عالى كانه بيسمع الجميع ولا فى حصة قراءة فى المدرسة

وبعد كدا بقي اللى يتعافى على الباب يروخ مطير الورقة وطبعا انا فى اول الكرسي وكنت المطلشة وبقي اللى وقع الورقة شهم وراسة والف ......... انه يجيب الورقة ويعلقها زى

ما كانت ....... كل شوية لو سمحتى قومى شوية عشان نجيب الورقة ............انا بقي اتخنقت اكتر واكتر قولت سيبها ماعليك منها .............

المهم النفس حمى فى القطار وخوفت بصراحة قبل مانزل دى 15 ساعة يعنى اى ميكورب هيتنقل ويتعايش ويبدا يظهر اعراضة من قبل مانزل .......

عدى الكمسري بالصدفة قولتله لو سمحت ممكن تشغل التكييف انا عرفه ان الجو شتاء بس حضرتك الدنيا زحمة وم ينفع كدا يعنى ........... ضحك بسخرية وقالى تكييف ايه يا استاذة

قولتله نعم دا الشيء الوحيد اللى مثبوت فى التذكرة اولى مكيف wst:: قالى للاسف مش شغال دا كمان .........

هو حضرتك مش مصرية قولتله ليه قالى اصلك مستغربة كل حاجة وكانك مش من مصر

قولتله لا والله انا بس باصدق الناس لما اللى قطع التذكرة اكد ان فيه بوفية وتكييف وتليفزيون كنت اعرف منين انه بيكدب .........

هنا بقي افتكرت الراجل كان بيقولى هتدعيلي ليه ................ :lol:

طبعا قولت يا بت هونى على نفسك لو بقيتى مشمئزة من اصوات الضفادع ولا الحمام وريحتة ولا الباب اللى مش بيبطل فتحان وقفلان ولا التكييف حاولى تتناسي كل الحاجات دى

وتخيلي اسوان واللى هتشوفيه هناك ويستاهل المعناه بجد ........

بعد شوية حسيت بجد انى عندى رغبة شديدة فى التقيء ومش هاقدر ادخل الحمام اللى ريحته وصفاه وصف يعنى صورة وريحة ........ وصحبتى نايمة قولت مش هاصحيها بسرعة

اخذت كيس بلاستيك وجريت لاخر العربية ولاقيت مكان كويس بين البابين فتحت الكيس وتقيئت وحسيت انى هيغمى علي من الخنقة روحت بسرعة على الباب وفتحته ووقفت فيه كل

شيء ظلام ومش شايفة حاجة بل بالعكس كانت بتجيلي كوابيس وانا واقفة وافكار رغيبة انى ممكن حد يزقنى من الباب روحت بسرعة قفلت الباب وسندت خلفة لمدة نص ساعة حسيت

انى بقيت كويسة وشعرت ببرودة قولت خلينى اروح البس الجاكت .........

الحمدلله كانت بدات معالم تظهر وناس تنزل الكرسي اللى وراى كرسيينا كان بتاع عائلة ونزلت وانا قعدت مكانهم جنب الشباك طلعت واحدة قعدت جنبي وفضلت ترغى كانت لذيذة

بس رغاية اوى المهم عشان اخلص منها طلعت كتاب وقعدت اقرى فيه هى راحت فى سابع نومة وانضمت الى فريق عزف سيمفونية بيت ضفدع ..... كنت باحقد عليهم والله الناس

الناس اللى بتنام فى اى حتة كدا وغيرهم متذنب كام ساعة بقي وصاحى ...........

شوية والبنت صحيت ولسه هترغى روحت قايمة وسيبلها المكان رجعت جنب صحبتى اللى ماشاء الله نووووووووم عميق ..

الدفعة اللى جنبنا كان تقريبا بقالة 3 شهور فى الطريق ومقلعش جزمته ابدا المهم هو طبعا نام من بعد مالقطر طلع من رمسيس على حسب تسجيلاتى ورصدي لكل الراكبين فجأءة

حسن انه مش مرتاح من جزمته

انضم لحزب الحمام وقلع جزمته ولا اله الا الله بجد يعنى انا طبعا الله يكون فى عونه اه قولت جايز يكون جاي من سفر بعيد ومافيش فرصة يغير الشراب

بس مقدرتش رجعت تانى جنب البنت هى بقي اللى سبتنى خالص وغيرت العربية كلها ......

لحد هنا مكنش ظهر اى بياع وبعد كدا بدا يهل علينا البائعين وخبط ورزع وعمال يقول وجبات العشاء جه عندي وقالى تحبي تتعشي ايه انا عجبنى البساطة بتعتة وزوقة قولت والله

عندك ايه للعشا قالى فى وجبات وفيه سندوتشات والوجبات دى عبارة عن ايه قالى طبيخ ولسه هيوصف قولتله لا شكرا

عندك اى عصير مقفول قالى لا فى شاي قولتله لا شكرا هو بقي حطنى فى دماغة عشان استجوبته وبدا يؤرفنى بجد

انا طبعا كنت تعتبت جدا من الوحدة ومن كل شيء فى القطر ويا ريته ساعة ولا اتنين دا 15 ساعة ......المهم

لاقيت معايا كدا كتاب اذكار فى شنطتى ولاقيت دعاء النوم عمرى فى حياتى مادعيت من قلبي بجد حتى وانا فى اشد المحنة الا المرة دى وكان ناقص اعيط والله ...

طبعا مش هاقول ربنا استجاب لى ولا حاجة ولكن اللى اقدر اقوله انى بعدها بدات ادروخ يعنى معنديش نزم ازى بس حسنى انى بانام افتح عين واغمض عين يعنى اون اند اوف

كل ماقفل عينى والا بتتاع الشاي ويجي جنب الكرسي بتاعى ويخبط بالمعلقة ع الكوباية شاي ويوقل شااااااااااااى ااقوم مفزوعة وابقي عاوزة ارمية من القطر .

المهم فضل على كدا كتير لحد ما قولتله خد تمن 2 كوباية شاي اهوم ومش عاوزينهم ومتجيش جنبنا قالى لاء هتدفعى تخدى الشاي انت هتزكى على ولا ايه قولتله طيب هادفع مقدم ولما

اعوز الشاي هابقي اطلبة قالى ماشي

المهم بقي كل ساعة يجي ويقولى حضرتك عاوزة الشاي دلوقتى ,,,,,,,,,اقوله لاء يقولى طيب .........وشوية ويرجع تانى قولتله بص بقي انت نفد صبري معاك مش عاوزة شاي

ومش عاوزة اشوفك هنا وعاوز ترجع الفلوس هتها

المهم سبنى ومشي

صحبتى بقي اخيرا قلقت وصحيت وقالتلى فيه اي مش عرفة انام من الازعاج اللى بتعمليه والله كنت هاخبطها بحاجة لانها نايمة وسيبانى ولما قربنا ندخل على بقي اسيوط والمنيا

والحاجات دي صحيت

المهم اكلنا سندويشتات امى على شندويتاش امها والله انا كنت باكل غيظ لانى لما باكل معدتى مش بتستحمل فبتخلينى انام على طول

اكلنا وهى صحيت وانا بقيت على بداية النهار كدا اغفل روحت نايمة نص نص وهى تكلمنى وانا بانتقم مش برد عليها قولت غليها تدوق اللى دوقتة ..

بتقولى ما تيجي نروح الكافتيريا قولتها طيب روحى وانا هاصحصلك هى طبعا منصدمتش زى قامت تعدى من عند الحمام صرخت رجعتلى تانى مخضوضة ايه اللى جنبنا دا قولتلها ايه

بستان ورد وحديقة مائية فى حاجة :wub:

المهم الرحلة اكتملت على انى انا اللى بدات انام وهى صحصحت وبصراحة على حد متابعتى شوفت اسامى بلاد غريبة ولا اكنها مصرية بس كلها راحت عن بالى ما عدا ملاوى مش

مش عرفه ليه

وبعد عنان بين الصخور والجبال والمناظر الحلوة الخضرة والماء واحنا طبعا الوجه الحسن :wub: بدات اشعر بالامان على رغم ان جالى فوبيا من بعد المسافة

واعلن الكمسري على اننا سنصل اسوان بعد ساعة

الساعة دى قضيتها فى الشباك اتفرج على الصخور وعلى النيل وعلى الخضراء ونسيت كل اللى عنيته فى القطار طوال مدة السفر

وصلنا اسوان والمحطة طبعا صدمتنى كنت متواقاعها حاجة كبيرة وفخمة بما انها بلد سياحى بس مش مشكلة كله يهون

لاقينا التكاسي زات اللون الغريب ابيض فى ازرق يا رب اكون لسه فكرة وطبعا عفي عليها الزمن بس البلد كانت هادية وكان سكانها كانوا فى اجازة خارجها

توجهنا الى فندق بسمة وبكرة نكمل الباقى

الرحلة داخل اسوان

فاصل ونواصل

ابقوا معانا

يُتبع

تم تعديل 11 أبريل 2008 بواسطة Badria Mekkawy

[badroora]

وصلنا الفندق وحطينا شناطنا وغيرنا هدومنا وقولنا نرتاح بقي واذا بتليفون صديقتى يرن وتبادل حديث وحوارات حميمة وسلامات وطيبيبون

وهاتك يا رغى بتاع 20 دقيقة روحت ساكة اذونى بمخدة عشان مسمعش الصوت وانا واذا بها قومى يا امه احنا جاين ننام قولتها لاء انت

الليل بتاعك نمتية سيبني بقي انام النهار بتاعى وبعدين نبقي نتفاهم قالتلى المشكلة ان ليها قاريب هنا ولما عرفوا انها فى اسوان جايين عشان

يخدونا البيت عندهم قولتلها اوك روحى عند اهلك براحتك واتغدى معاهم وابقي هتيلي غدايا معاكي :rolleyes: طبعا هى صبرها بينفد بسرعة .

راحت شايلة كل شيء من على وشدتنى فقمت لبسنا ونزلنا قابلنا قريبتها وروحنا بيتهم هما فى الاصل بدياتها بس راحوا السودان اخدو الجنسية

واستقروا فى اسوان على فكرة كنت كتير هنا بفكر اسوان هى السودان واننا فعلا فى دولة تانية :wub:

المهم روحنا البيت عندهم فى منطقة اسمها زلابية المكان بسيط جدا جدا وحتى البيت نفسه بسيط ولكن منظم جدا ومترتب لاقصي حد ...

جابولنا الفطار واسروا فطر نحلفلهم اننا اكلين شنطتين سندويشتات بس مافيش فايدة من كتر كرامهم والله كانوا بيحالوا يكالونا فى بؤنا

المهم العيش الاسوانى حلو اوى ويشجع ع الاكل يعنى يا هبة يستاهل الوقفة فى الطابور :wub:

المهم اكلنا وانا اخترت اقرب كنبة وريحت عليها وشوية يلا نروح المعبد النوبي ,,,,,,المهم كنت كسلانه وبعدين قالتلى ان بالليل ما فيش حاجة

غير السوق واننا الصبح بدري عندنا يوم طويل ما بين السد العالى ومعبد فيله وجزيرة النباتات المهم اول ما سمعت كلمة السد العالى ..........

ضربة فى دماغى اغنية عبد الحليم وقلنا هنبنى وادينا بينينا السد العالى ..........قمت بسرعة شربت فنطاس شاي عشان افوق وتوجهنا الى

المعبد النوبي .........هو بصراحة معجبنيش اوى بس يعنى معقول بردوا ...........

الغزية وفرقتها طبعا حسام ودياب وهبة وكل الاسوانية لو كتبت عليق غلط ع الصور يا ريت يصححونى بليييييييييز.

الصورة طبعا شرحه نفسها قولل واطباق

مصرية قديمة بتتطمع

2 حصان من بتوع الف ليلة وليلة (فوازير رمضا )

معرفش تعابين دى ولا ايه

اللى بيشيلوا فيها التعابين

العروسة مع الكفرهرجية

تم التحرير بناء على طلب الفاضلة بدرية مكاوى لكبر حجم الصور

تم اضافة الصور بعد اتاحة خصية التحرير

بدرية مكاوى

تم تعديل 13 أبريل 2008 بواسطة Badria Mekkawy

[~Heba~]

يا بدرية مستنياكى تكملى رحلتك

و عندى ليكى هدية صغيرة

لقيتها على اليوتيوب صراحة مصدقتش نفسى لما لقيتها

خدى عندك

http://www.youtube.com/watch?v=90ap2XMJcZ4...feature=related

ملحوظة ...البنت اللى فى الفيديو دى مش انا و الله ...انا مهندسة مش دكتورة :rolleyes:

[سهران]

المهم هى نزلت قبلي بشهر وانا حصلتها وقررنا نروح محطة مصر نحجز التذاكر .للسفر

ذهبا انا وهى وعرفنا ان فيه قطار نوم قولنا يسلام حيث عبد الحليم حافظ وفاتن حمامة وفريد الاصم وهندرستم وشادية لطفى والحركات دي .

توجهنا الى شباك التذاكر وانا بقي فتحت تحقيق عن القطر

ها لو سمحت القطر دا امان

ايوة يا فندم طبعا امان

اه طيب هو عبارة عن ايه

قالى عبارة عن غرفة فيها 2 سرير

قولتله طيب مش ممكن حد يهاجم الغرفة دي بسكينة ولا سلاح قالى لاء دا امان ومتخفيش فيه قفل من جوة ابقي سكي الباب

قولتله طيب مستوي النضافة ايه قالى ممتاز دا فندق متحرك مش قطر

قولتله وايه الامكانيات قالى بطاطين ووجبة و.........الخ

[/quote

لما سمعت كلامك ده عن القطر أنا قلت أتضحك عليا ........ أكيد أنا ركبت قطر غلط ........ سافرت مع الولاد في يناير الماضي و كنت فاكر زيك كدة ... لكن نفس اللي أنت قولتيه على القطر بعد كدة هو اللي شفته ... كدة يبقى أنا مانضحكش عليا... هوه نفس القطر و نفس العربية ... بس الأصوات ما كانتش ضفادع ... كانت أصوات ديناصورات ...

[~Heba~]

انتي غنية بئه على كده

الغنى هو الله :rolleyes:

حازم شكله اصله من " الجوزيرة" :wub:

بس لا انتى غنية بأمارة محمد منير قال عليكى

***

يا ام عقدين دهب تلاتة وتلاتين طارة

ما عيناً رأت ما وردت على بكارة

يوم طلت علينا الكل وقعو سكارى

سقطت فى الحليب ما بينتلو عكارة

***

يا ست البنات ماحلى الجمال الفيكي

مهما اعمل واسوّي ف الوصف ما يكفيكي

الروح والجسد تاخدي وما يكفيكي

بسْ خلي العيون علشان تعاين فيكي

نعناع الجنينة المسقي في حيضانه

شجر الموز طرح ضلل على عيدانه

[nash]

كبري الخط يا بدريه.... :rolleyes:

فيه فروق فرديه بين الافراد الله يكرمك.....

[vipwithyou]

كملى يا بدرية انا مستنى اعرف باقى المغامرات الجميلة دى

بس بجد كانى ماشى معاكم وانتوا مسافرين

طريقة السرد جميلة بتعيشينا فى الموضوع نفسه

كملى ..

علشان تعرفى قيمة العربية لو كانت معاكى وقتها ..

[badroora]

يا بدرية مستنياكى تكملى رحلتك

و عندى ليكى هدية صغيرة

لقيتها على اليوتيوب صراحة مصدقتش نفسى لما لقيتها

خدى عندك

ملحوظة ...البنت اللى فى الفيديو دى مش انا و الله ...انا مهندسة مش دكتورة :wub:

ازاى يا هبة موش انتى ااذ كان صورتك اللى شلتيها

كانت بالظبط يالظبط تشبه البنوته دي

وكمان ازاى يا هبة تقولى على السمكة وزة :rolleyes: فى فرق شاسع بين الاتنين

بخصوص رحتلى طبعا محتاجة مساعدتك فى شرح بعض الصور

[badroora]

لما سمعت كلامك ده عن القطر أنا قلت أتضحك عليا ........ أكيد أنا ركبت قطر غلط ........ سافرت مع الولاد في يناير الماضي و كنت فاكر زيك كدة ... لكن نفس اللي أنت قولتيه على القطر بعد كدة هو اللي شفته ... كدة يبقى أنا مانضحكش عليا... هوه نفس القطر و نفس العربية ... بس الأصوات ما كانتش ضفادع ... كانت أصوات ديناصورات ...

طيب يا رب الاولاد ميكونوش اترعبوا من اصوات الديناصورات دي

ويا ريت انت كمان تبقي تحكلنا عن رحلتك عشان واثقة ان اكيد فى مواقف طريقة قابلتك وشارطنا بيها ماشي

وكمان يا ريت كل الاخوة اللى راح اسوان يحكلنا عن رحلته :rolleyes:

[badroora]

كبري الخط يا بدريه....

فيه فروق فرديه بين الافراد الله يكرمك..... :wub:

يسلام يا ننوشة انت تؤمرى بس قوليلى انهى فونت ورقمة اللى مناسب ليكي وانا اختاره على طول

ونصيحة ابعدى عن الصور اللى بتجبيها فى الالغاز دى نظر رمضان راح فيها وانا جالى صداع واحوليت :rolleyes:

[badroora]

كملى يا بدرية انا مستنى اعرف باقى المغامرات الجميلة دى

بس بجد كانى ماشى معاكم وانتوا مسافرين

طريقة السرد جميلة بتعيشينا فى الموضوع نفسه

كملى ..

علشان تعرفى قيمة العربية لو كانت معاكى وقتها ..

اه والله يا تامر بتقول فيها فعلا السيارة ما فى غنى عنها بتسهل امور كتير

وحاضر عندى اصحابي كنت عزماهم على وليمة رنجة وبصل وانشوجا ولسه متخدرين اول ما يفوقوا ويرجعلهم وعيهم هاخلص منهم واجى طوالى واكمل لكم باقي تفاصيل الرحلة

ابقو معنا

فاصل ونواصل

[~Heba~]

ازاى يا هبة موش انتى ااذ كان صورتك اللى شلتيها

كانت بالظبط يالظبط تشبه البنوته دي

وكمان ازاى يا هبة تقولى على السمكة وزة فى فرق شاسع بين الاتنين

كده يا بدرية عايزة توقفى حالى

و انا اللى منشنة على عريس والا اتنين من بتوع المحاورات اللى فى الخليج wst::

شوفى لو انا عنست يبقى انتى السبب :lol: انا مش دكتورة و مش وزة و مش عقيلية كمان عشان تستريحى

بخصوص رحتلى طبعا محتاجة مساعدتك فى شرح بعض الصور

طبعا طبعا

و اول تصحيح

الصورة اللى انت حاطاها دى من متحف النوبة مش معبد النوبة

مفيش معابد فى النوبة المعابد فرعونية

يالا استمرى go on

[سهران]

:lol: طيب يا رب الاولاد ميكونوش اترعبوا من اصوات الديناصورات دي

ويا ريت انت كمان تبقي تحكلنا عن رحلتك عشان واثقة ان اكيد فى مواقف طريقة قابلتك وشارطنا بيها ماشي

وكمان يا ريت كل الاخوة اللى راح اسوان يحكلنا عن رحلته

ــــــــــــــــــــــــــــــــــــــــــــــــــــــــــــــــــــــــــــــــ

ـــــــــــــــــــ

هو الحقيقة الأخ الديناصور اللي كان نايم في آخر القطر كان ممسخها شوية..... كان بيسحب السحبة من دول صوته يجيب لآخر القطر ... كان مشطب على أكسجين العربية كلة ..... ندمت أني ما سافرتش بالعربية خاصة مع مرور أخواننا البائعين زي أنت ما حكيتي ... كملي يا بدرية حكايتك الجميلة انت فعلا موهوبة و أحنا متشوقين نسمعلك .

[badroora]

وصلنا لحد فين اه .....متحف النوبة زى ماقالت الغالية هبة .... wst::

خرجنا من المتحف على بالليل كدا وبعدين كنا مش عاوزين ننام على رغم التعب اللى كنا فيه قولنا نروح فين ... اللى كانت معانا قريبة صديقتى قالت

نروح السوق . السوق للاسف مش هاقدر احط الصور عشان احنا فيها .

يا ريت بقي هبة او اى احد من اخوانا لو عندة صور للسوق فقط يضفهلنا هنا .. مسامحة :ninja:

المهم السوق جميل جدا جدا من حيث الاضاءة ماشاء الله اسوان مستولين على الكهرباء الاصلية فتلاقي الشوارع كانك فى عز الضهر

اللى بيميز السوق كمان انه مافيهوش سيارات يعنى امان جدا وخصوصا لو فيه اطفال ... والبائعين فريندلى يعنى كنا نروح نتفرج ونتصور

ونفاصل وفى الاخر منشتريش حاجة :lol: وتلاقي البائع طيب جدا وبعد كل دا يرحب بك فى اسوان ويقول فى اى وقت حبة تشترى

ابقي تعالى ,فعلا حسيت فرق شاسع بين بائعين اسوان واخلاقهم واخلاق البائعين فى القاهرة ,افتكر مرة سنه 98 عجبتنى شنطة فى شارع

قصر النيل وقولت اروح اشتريها وانا خارجة من القصر العينى قبلت واحد بلدياتى قالى رايحة فين قولتله رايحة اشترى شنطة

قالى طب خليكى ناصحة ولما يقولك على اى سعر انزلى به للنص على طول ..قولتله بجد قالى طبعا وابقي شوفى ...

المهم روحت شارع قصر النيل وعجبتنى الشنطة وسالت الراجل بكام قالى 35 جنية قولت اها يعنى 17 جنية ونص قول 18 ووالله العظيم

الراجل كان صعيدي وشكلة كان طالع عنية وانا بقي كنت القشة التى كسرت ظهر البعير , المهم انا لسه باكمل كلامى ولاقيته راح

ناتش الشنطة منى وسابب للعيشة واللى عيشنها والشنط واللى بيشتروا الشنط وقالى يلا مافيش شنط ,المهم قارنت بين الموقفين قولت ياااه سبحان الله هنا غير .

المهم بعد ماليفنا فى السوق واكلنا ايس كريم كنت متشوقة اوى اروح على الكورنيش , روحنا ع الكورنيش قعدنا فى كازينو ايزيس وتقريبا كنا

الزبائن الوحيدين اللى روحنالهم اليوم الكل على دمغنا والمهم طلينا الطلبات وانا شوفت كنافة قولت يااااااااه هاخد كنافة مع انى مش بحبها

خالص بس معرفش قولت اجرب ,الكنافة بقي كانت عندهم من رمضان والله اعلم ,,, انا اكلت الكنافة حسيت بطعم غريب اوى ,قولت خلينى

ادوق اللى معانا هى من اسوان وعارفه الكنافة بتاعتهم المهم قولتلها دوقى كدا شوفيها مالها ,,, داقت وقالتلى انها مافيهاش حاجة يا بدور بكسر

الباء قولت هى ادرى منى طبعا ,, ضربت شوكة تانية وقولت عيب دا انا اعرف الاكل الحمضان من وهو لسه بينطبخ smk: ناديت على الويتر

وقولتله بليز دوق الكنافة دي لاقيته شلها من السكات وكل اللى كانوا واقفين حوالينا اختفوا ..قولتله لاااااا تعالى هنا ونادي على اصحابك اللى

كانوا واقفين فنداهم وجم قولتلهم يلا كل واحد يدوق الكنافة دي ويقولى ايه الطعم اللى حسه ..اول واحد قالى لو مش عجبة حضرتك نغيرها

قولتله لاء انا عزماكم عليها يلا دوقوا اول واحد قالى سكرها تقيل شوية , والتانى قالى ممررة سنه

التالت قالى ممكن تكون بس عشان من الصبح قولتله لاء طبعا دى حمضانه ومن رمضان اللى فات كمان ... المهم قالولى يجبولى ايه بدلها قولتلهم

لاء خلاص ولا حاجة ....

خرجنا من الكازينو واتمشينا شوية ع الكورنيش والناس وخصوصا المراكبية كانوا بيكلمونا انجليزي واحلى كلمة ويلكام بفتح الكاف سمعتها

منهم وحسسونى ان القاهرة دولة تانية واحنا فعلا اجانب ..بس كان دمهم خفيف ...

روحنا البيت بعد ما هلكنا روحنا عند قرايب صحبتى البيت لانهم اسروا يعشونا ... روحنا اتعشينا وانا طبعا الاكل فى معدتى اقوى من المورفين

كالعادة اكلت واستلقيت ع الكنبة وروحت فى سابع نومة بجد احلى ايام نمت فيها فى اسوان على الرغم انى مش بنام بالليل بس هناك كنت بنام ,

المهم الميزة فى اقارب صحبتى دول انهم 4 بنات اخوات متجوزين واجوازهم يعملون بالخليج وهما مقيمين بمفردهم مع ااولادهم فدا حسسنى

اكتر بالامان وكنت كل ماقعد ع الكنبة عندهم وتيار الهوا يلفحنى اتوه على طول وانا م ......

صحينا الصبح اسروا اننا نترك الفندق وعيب اننا نزل فى فندق وبيتهم موجود فى الاول كنت محرجة جدا عشان منتقلش عليهم بس هما اسروا

بشكل غريب ولاول مرة فى حياتى اشوف ناس حياتهم بسيطة جدا وستات ورجالة فى نفس الوقت وبيعزموا بقلب جامد وحبونى اوى وبقي

يدللونى اكتر من صحبتى على اساس انى انا الغريبة وفحبوا يدلعونى عشان يحسسونى انى منهم ومافيش فرق وانا بصراحة حبتهم اوى

المهم روحنا الفندق اخدنا حاجتنا ووداناها البيت عندهم وقولنا هنروح السد العالى .........

انا بقي صحبتى منخوقة منى لانى دايما فى شقتنا ارفاها باغانى وطنية وشعارات حتى فى عربيتى اللى كانت اغانى وطنية اكثر من اى شيء

المهم انا بقي من ساعت ما قولنا هنروح السد العالى وانا بقي

قولنا هنبني وادينا بينا السد العالى وبقيت مستاثرة اوى واراجع فيلم ايهاب نافع وماجدة وشوية صور السد اللى كانت بتجي زماااااااان وخلاص

عشت فى مووووووووووود عبد الحليم وماجدة الصباح

هاروح اكل ساندويشت واشرب ماي وارجع اكمل

فاصل ونواصل

كونوا معنا

تم تعديل 11 أبريل 2008 بواسطة Badria Mekkawy

[badroora]

عودنا .........

انا بقي كنت اكسسيتد مثل الاطفال وفرحانة وعاوزة بسرعة اجرى احضن السد العالى ومكنتش مصدقة نفسي انى هاشوفه زى مكانت بتمنى اشوفة زمااان

فى التليفزيون انا بقي كنت مش صبرة وعاوزة نمشي بسرعة وطبعا صحبتى وقريبتها من النوع الراسي اللى لازم يفطر ويحلى ويحكى مع الاكل

وانا بقي كنت مسروعة اوى ...المهم كل شوية اقول يلا يلا يلا يلا وهما بقي برووووووووود المهم فى الاخر بعد مكلوا وشربوا الشاي ابو لبن ولبسوا

ببطء شديد نادا علينا عيل صغير وقال الاموزيل وصل اتفضلوا انا طبعا سبقتهم وروحت قعدت جنب السواق كان بابا كبير فى السن و طيب جدا

ومثقف لاقصي درجة , والمهم قعدت ارغى معاه واحقق واسأل عن كل شيء عن السد والراجل كان صبور جدا واستحملنى اوى المهم جت صديقتى

وقريبتها المرشدة بتاعتنا وتحرك بنا الاموزيل واول كبري كدا عدا من عليه كنت مبسوطة اوى وحسه انى مش هالحق اوصل للسد من كتر السرعة بفتح السين

اللى كنت فيها المهم اثناء القيادة انا بقي كأن محدش فى الدنيا بيسوق وعنده عربية غيري عماله ارشدة واديله نصايح وهو بصراحة مستحملنى

المهم واحد كان جاى من اليسار وهو هيهديلوه عشان يعدي وانا بقي لاء لاء دا طريقك ليه تهدي وهو يعدي الراجل يبتسم ويرد على

ويقلي ايه المشكلة قولتله لا انا ما احب حد ياخد طريقي قالى لاء السياقة يعنى ادب وزوق وود بين الاخيرين مش حرب ومين اللى يسبق :ninja:

طبعا انا دى مش اخلاقي ابدا فى السياقة انا بابقي هاين على لما عربية تكون قدامى افضل اديله فلاش ولو مخلاش الطريق لى اروح معدية منه وجايه

وجاية قدامة ومهدية غتاته عشان يدينى فلاش ومسألش فيه اعمل فيه زى ما عمل في smk:

المهم اللى عجبنى جدا ان السائقين اخلاق اوى اوى ومحترمين لاقصي درجة ومش بيتكلموا الا اذا انت اديتهم فرصة غير كدا لاء

وكمان ينصحوك تعمل ايه وتروح فين وتدفع كام وبصراحة كمان لما توصل اى مكان وتساله ها عاوز كام يقولك اللى تدفعه سواء قليل كتير ميفتحش بوئة

والله كنت مستغربة ان دول مصريين فعلا عوامل البيئة بتاثر فى اخلاق الناس وهما ماشاء الله شاربين من مياه النيل النقية ومتمتعين بالكهرباء المزهزهة

فمخليه عنيهم مليانه اوى ومش طمعين المهم

وصلنا السد العالى وهنا كانت المفجاءة التى احبطتنى جدا جدا وكانت غير متوقعه

هو دا بقي السد العالى اللى باشوفة فى التليفزيون ومعرفش غيرة ودا اللى كنت جاية عشان اشوفه ودا اللى غنى له عبد الحليم اما اللى شوفته داااااااااا

معرفهوش ولا شفتوش wst::

طبعا احبطت احباط شديد وقولت ايه دا هو كل حاجة كدا يغيروها ويشوهوها ومشيت كدا على جنب لاقيت خريطة النيل وقفت جنبها ادارى غضبي فيها

وقعدت اتفرج شوية على بحيرة ناصر وعلى المنطقة وقعدت اتخيل افلام الابيض واسود وقولت ماليش دعوة باللى قدامى دا انا هاعيش فى الصورة الى فى

بالى من زمان اوى ورفضت من جوايا اقبل الصورة الحالية للسد العالى .

بحيرة ناصر .....

بعد كدا لما انا احبطت ونفسي انسدت قولت يلا بقي نمشي مافيش فايدة جت قريبة صديقتى قالت لا لسة فيه مكان تانى هنروحة وبعدين نروح معبد فيله ...

انا بقي خلاص الاكسيتيشن اللى كان عندى حصله سبريشن وبقي كل شيء عادي ...

برج الصداقة بين مصر والاتحاد السوفيتى ايام ماكان موجود ..

دى جبتها من ع النت لان اللى عندي لما تحملت بقت صغيرة جدا بس احلى بكتير من دي

من عدسة نجفة الضب :lol:

يتبع ....

تم تعديل 12 أبريل 2008 بواسطة Badria Mekkawy

[badroora]

هنا صور السد العالى وبحيرة ناصر وبعض الصور لاسوان من فوق برج الصداقة او رمز الصداقة كما يطلق عليه البعض