رحلة الى الاقصر واسوان .!!!

[vipwithyou]

هو حضرتك بتاخدى ساندوتش وكباية ماية فى ساعة ونصف امال بتتعشى فى اد ايه ؟!!! :unsure: wst::

منتظرين المتابعة ..

[badroora]

شكر خاص لاستاذ محمد على تعبة وتعديل الصور

ميرسي جدا ربنا يخليك ويجبر بخاطرك زى ما بتساعد الفقراء والمساكين من الاعضاء

بارك الله فيك وبجد متشكرة جدا لسرعة استجابتك

مع خالص شكرى وامتنانى :unsure:

تم تعديل 12 أبريل 2008 بواسطة Badria Mekkawy

[badroora]

هو حضرتك بتاخدى ساندوتش وكباية ماية فى ساعة ونصف امال بتتعشى فى اد ايه ؟!!! wst:: wst::

منتظرين المتابعة ..

ما هو يا تامر انت مش واخد بالك وانا فى طريقي الى المطبخ لمحت طبقين على طاسة غسلتهم

الغسيل فى الغسالة باقلوا يومين طلعته ورميته ع السرير

عملت الساندويشت جالى تليفون ورغى نص ساعة قفلت رجعت كنت هنام بعد الاكل قولت عيب الناس مستنينى يلا خلينى اروح وبعدين ابقي ااقيل

بس :unsure:

[nash]

واحد كان جاى من اليسار وهو هيهديلوه عشان يعدي وانا بقي لاء لاء دا طريقك ليه تهدي وهو يعدي الراجل يبتسم ويرد على

ويقلي ايه المشكلة قولتله لا انا ما احب حد ياخد طريقي قالى لاء السياقة يعنى ادب وزوق وود بين الاخيرين مش حرب ومين اللى يسبق

طبعا انا دى مش اخلاقي ابدا فى السياقة انا بابقي هاين على لما عربية تكون قدامى افضل اديله فلاش ولو مخلاش الطريق لى اروح معدية منه وجايه

وجاية قدامة ومهدية غتاته عشان يدينى فلاش ومسألش فيه اعمل فيه زى ما عمل في

تسلمي يا بدريه علي تغيير الفونط...كده تمام :unsure:

وبعدين أنتي يا بتتكلمي علي الرياض والسائقين فيها يا بتتكلمي علي أبو ياسر وتقولي انتي اللي بتعملي كده..

طب بالأمانه لو حد غلس عليكي في السواقه مابتجيش قدامه وتفرملي وتقومي طالعه بالعربيه شويه صغيرين لقدام ؟؟ أهو منها تغلسي عليه ومنها تضمني العربيه ماتتخبطش من ورا....

أكملي يا فتاة wst::

[badroora]

وبعدين أنتي يا بتتكلمي علي الرياض والسائقين فيها يا بتتكلمي علي أبو ياسر وتقولي انتي اللي بتعملي كده..

طب بالأمانه لو حد غلس عليكي في السواقه مابتجيش قدامه وتفرملي وتقومي طالعه بالعربيه شويه صغيرين لقدام ؟؟ أهو منها تغلسي عليه ومنها تضمني العربيه ماتتخبطش من ورا....

أكملي يا فتاة wst::

بصراحة وللامانة يا ناش انا كنت باكتفي بالغلاسة بس لانى كنت لسه ساذجة ومستجدة فى عالم السياقة لكن دلوقتى بعد ما اتنورت وعرفت خلااااااااااااااااااااااااااااااااص زمن الخوف ولى وانتهى

وحظالظابط اللهي يستره نورنى وقالى ضهر اى عربية قدامك مسئوليتك اما ضهر عربيتك مسئولية اللى وراكى حتى لو انتى غلطانه wst::

من ساعتها بقي وانا خلاااااااااااااااص

مافيش خوف ويا ويل اللى ع الطريق منى ومن شري

اما بقي بخصوص اخوانا السعوديين حسبي الله ونعم الوكيل الويك اند مش بنخرج من البيت بسببهم وسبب هماجية البعض منهم فى السياقة يعنى لا زوق لا ادب لا بروتوكول خااااااااااااالص

تكسير ايشارة ماشي

مشي فوق الرصيف ميضورش

الجور على سيارات الاخرين مافيش مشكلة

يعنى قليل لما تلاقي حد منهم يتبع قواعد المرور ويحترم الاخرين ومع ذلك تلاقي عربياتهم متلمعة وصاغ سليم :unsure: يعنى لا خدتش ولا خبطة ولا اى حاجة خالص وكان عربيتهم مصفحة

يلا الله يستر على ابو ياسر وام ياسر وياسر واخوه

وانا كمان wst::

تم تعديل 12 أبريل 2008 بواسطة Badria Mekkawy

[badroora]

عدنا ,,,,,,,,

بعد الاحباط الفظيع الذي انتابنى عن السد العالى بقتش متحمسة لاى حاجة ...

بعد السد ذهبنا الى رمز الصداقة بين مصر والاتحاد السوفيتى وكان المنظر جميل اوى ... قولنا طيب

نطلع فوق نشوف الدنيا واحد كان واقف قالى لاء ممنوع وقريبة صديقتى كانت بتمنعنا بشدة وقوة جعلتنى

استغرب واتنح اكتر انى لازم وحكما لاطلع فوق المهم تفاهمنا مع الراجل وطلعنا بعد كدا حسيت بالذنب

لان قريبة صديقتى عندها فوبيا من الاماكن العالية وعشان كدا كانت مش عوزانا نطلع فوق ومع اصرارى

للطلوع طلعت معانا فعلا انسانة طيبة جدا وانا اكن لها كل الاحترام والتقدير المهم بدا يظهر عليها علامات الخوف

من شحوب فى الوجه ورعشة وضربات قلب سريعة المهم قولتلها مالك قالتلى لا مافيش الحيت عليها انا

وصديقتى قالت انها عندها فوبيا (خوف من الاماكن العالية غير طبيعي )المهم بسرعة نزلنا كان معانا

عصير وماية شربناها واعتزرتلها وهى من ادب اخلاقها وزوقها اعتزرت انها ضعيت علينا الفرجة

المهم لمحت حد قريبها او معرفة كدا هناك اسمة استاذ س جه وقدمتنا له وسلم علينا وكان راجل اخلاق

جدا كنت فكراه سودانى طلع مصري اسوانى طبعا هو حب يكرم الضيف فاستأذن من شغلة واصر اننا

لازم نروح عنده البيت يا عم س بلاش قال لا والله ما يحصل يا عم شغلك قال استاذنت قولت يسلام

شايفة الناس محترمين ازاى يستأذن من الشغل عشان ضيوفه .

المهم ذهبنا الى منزلة استقبلتنا زوجته مصري اسوانية ماشاء الله عليها سمارة بس جميلة ومنمقة وطيبة

جدا واستقبلتنا اجمل استقبال , طبعا الظهر كان اذن قولنا نستغلها فرصة ونصلي دخلنا صلينا ورجعنا

لاقناهم بيسالونا هتتغدوا ايه قولنا لاااااااا مش هينفع والله احنا هنمشي ودول تمشي مين ميصحش ابدا

المهم اكتفينا بشرب حاجة ساقعة وجبولنا معها بسكوت نواعم ومولوتو كيك طبعا بسكون نواعم اخر

مرة شوفته ايام ما كنت فى تسعة ابتدائي اكلنا واثناء الحديث ذهبت زوجتة لعمل شيء ما واخذ عم س يتحدث عن

زوجته ويمدح فيها وفى اخلاقها وطريقة معاملتها لاولاده من المرحومة مراته , فعلا هذه الاخلاق ليست

غريبة على الاسوانية ناس قنوعين بشكل غير عادي خدومين لابعد الحدود وكرماء ع الاخر والنساء منهم

اللى تعاملت معاهم قد ايه محافظين ومثقفين وعندهم ثقة بنفسهم بلا حدود وليهم مكانتهم فى كل مكان

يعنى خلال 5 دقائق من التعامل معهم تشعر وكانك واحد منهم من كتر كرم اخلاقهم ...

المهم بعد ما نسفنا المشروب ونواعم يا بستوك والكيك قولنا نستاذن بقي بالعافية لما سمحولنا بالذهاب على

شرط اننا نتغدى عندهم تانى يوم المهم قولنا ربنا يسهل وانصرفنا وكنت سعيدة جدا بالحب والود اللى لاقيته

بين الناس هنا ..

طبعا استاذ س مسبناش طلع معانا وقف لنا تاكسي وجه عند دفع الحساب واذا بسواق التاكسي يرفض ويوقله لاء يا عم س دول قريبك

يعنى قريببي وكله واحد ورفض ياخد الاجرة من عم س قولت يسلام شايفين اخلاق الناس .

المهم توجهنا الى الطريق لمعبد فيلة واثناء السير توقفت السيارة فى منتصف الشارع وكان قريب من لجنة

فكرت اننا بقي فى مصر قولت ياااااااااه من هنخلص بقي وهات الرخص وشغلانه ...

واذا بعسكري المرور قادم الينا قولنا استر يا ستار

العسكرى للسائق خير اخى محتاج مساعدة قاله والله العربية وقفت فجأئه العسكرى نادا على 2 من

اصحابة وشافوا العربية وبعدين سعدوه وزقوا العربية شوية لحد ما ممشينا يا دوب وصلنا السائق تركنا

على موعد بعد ساعتين هيروح يصلح السيارة وقبل ما يمشي وصي علينا ناس مراكبية وتركنا ومشي

روحنا للمراكبية واللى كان موصيه ياخد باله مننا المركبة بتاعتة اتعطلت فانشغل بتصليحها قولنا طيب

خلينا نوشف احنا روحنا عند المركبية اعتقد انهم كانوا صعايدة مش اسوانين المهم قولنا ها يا رايس

عاوزين مركب رايح جاى قال الواحد 30 جنية طبعا احنا قعدنا نفاصل قلنا دى اسعار كل المراكب .

واثناء الحديث قاطعتنا بنت من كندا الشقيقة والبوي فريند بتاعها وكانوا منزعجين جدا

هدناها وسالنها مالك قالت هنا ليه بيسغلوا اننا اجانب وعاوزين يدفعونا فلوس كتير انا ممعيش فلوس

بليز كلمية خليه يدينا اسعار المصريين لاننا جيين من اسكندرية والاقصر وشرم وكل الفلوس تقريبا

خلصت .صديقتى سالتها هو قالكم كام قالت الواحد ب 27 ونص قولتلها ايش معنى النص بالذات يعنى

ميقول 28 وخلاص فاحنا ضحكنا وقلنالها عاوزة اسعار المصريين احنا قالنا ب 30 النفر مصدقتش وفكرتنا

بنهزر جيت على جنب للراجل وقولتله بقي كندا ب 27ونص وانا المصرية ب 30 هابلغ عنك شرطة

السياحة المهم من هنا لهنا اشترطنا عليه هناخد المركب رايح جاى ب 50 جنية واحنا بقي حرين نركب

مجموعة نركب لوحدنا مش شغله المهم بعد فصال وصداع وافق خدنا الكندية وصديقها ودفعوا 20 جنية رايح

جاى واحنا دفعنا ال 30 احنا التلاتة

المهم اثناء سير المركب تبادلنا الحديث عن ان نفسها تعيش فى مصر واحنا مهاجرين لكندا وان كل واحد مش

عجبة البلد اللى فيها وووو.

وصلنا وقولنا هنتقابل عند المرسي بعد ساعة ولفينا واتصورنا ورجعنا وفعلا لاقناهم جم فى الموعد وكانوا

ملتزمين جدا وممنونين بمساعدتنا لهم .

والبنت قالت لنا انتوا ليه معاكم 3 موبيلات وكميرات انا فى كندا معنديش موبايل ولا عربية ولا حتى

تليفزيون احنا بقي فى بوء واحد يا خبر ليه قالت حسه انى مش محتجاهم عندى لاب توب يفى بالغرض

والشغل عندي تليفون والبيت فيه تليفون وفيه مواصلات عامة يبقي ليه اجيب حاجات مش محتجاها اوى .

طبعا هى كلمها صح ومقتنعة به جدا احنا بنجيب حاجات كيتر ومش عارفين اذا كنا محتاجنها ولا بس حبين

نمتلكها وخلاص ....

ركبنا التاكسي وتوجهنا الى اسوان البلد عشان نلحق نروح جزيرة النباتات ......

ابقوا معنا

فاصل ونواصل

[badroora]

عدنا ,,,,,,,,,

مرسي المراكب المتجه الى معبد فيلة

اثناء سير المركب فى النيل

صور من خارج وداخل المعبد ..

[Diab]

عووووووووووووودي يا هاميييييييييييييس

[badroora]

عووووووووووووودي يا هاميييييييييييييس

هو معبد الفيلة دا بيت هاميس

[Diab]

عووووووووووووودي يا هاميييييييييييييس

هو معبد الفيلة دا بيت هاميس

لا دي كانت net cafe بتاع رمسيس

[badroora]

عودنا ,,,,,,,

بعد ما ركبنا التاكسي واتجهنا الى الكورنيش لزيارة جزيرة النباتات ........ وصلنا عند المرسي واخذنا المركب لنعبر بها

النيل . وطبعا المراكبي طلع عنينا فى الفصال بس بصراحة بالمجهود اللى بذله والمخاطرة اثناء قيادته للمركب قولت يستاهل

المبلغ الى طلبه .

المركب بشراع كبير وبتمشي حسب اتجاه الرياح وبيقعد يشد فى الحبل يمين وشمال وبصراحة كانت متعبة جدا

فانا بقوله وليه تتعب نفسك كدا متجيب ماتور وخلاص قالى لاء دى متعة بصراحة معرفش متعة لمين بالظبط هل للزبون

انه يتمتع برحلة جميلة بدون صوت محرك مزعج ولا له هو فى الحبل اللى هيقطع ايده دا .

المهم وصلنا الى جزيرة النباتات وكانت غاية فى الجمال عااااااالم تانى وجو نقى بشكل ورائحة الزهور جميلة جدا

حسستنى انى فى الجنه والله

وانا بقي بوجه كلامى لقريبة صديقتى وبقولها يسلام انتوا محظوظين بشكل الواحد لما يكون مخنوق مجرد انه يعدي النيل

ويجي هنا ويقعد يسرح بس هيشعر براحة ما بعدها راحة وكأنك مش عاوز اى حاجة من الدنيا تانى ....هى بقي ردها فوقنى

قالتلى يسلام بقي يا بدور بكسر الباء فى شم النسيم لما نيجي هنا بالفسيخ والبصل بيكون يوم جميل .......!!!!!!!!!!!

قولت يا خبر معقول مكان زى دا يكون مصيرة لاكل الفسيخ حراااااااااااام بجد قالتلى هنبقي يوم قبل ما تمشوا

نجيب فسيخ ونيجي هنا ......قولتلها لاااااااااء لن اشترك فى هذه الجريمة فسيخ فى جزيرة النباتات لا يمكن ابدا ابدا

المهم اثناء تجولنا فى الجزيرة خلعت من صديقتى وقريبتها وقولتلهم نتقابل عند المرسي بعد ساعة وانا ظلت اتمشي

واتجول واسرح فى الجزيرة , وقابلت كتير اجانب فوق ال60 تقريبا كانت دار مسنين عملين رحله لاسوان .

تعرفت على اتنين منهم وكانوا من بريطانيا وجايين سياحة ,وسائلونى هل انتى مصرية قولتلهم نعم قالولى محظوظين

انتم يا مصريين جور رائع وهادي اعتقد انه مافيش اى امراض ممكن تصيبكم زى الضغط والقلب والاكتئاب الجو هنا اكثر

من رائع . ابتسمت وقولت لهم فعلا عندكم حق ولكن مش كل المصريين الاسوانين فقط هم المحظوظين اما فى القاهر .

فكل العوامل المساعدة للاصابة بمراض الضغط والقلب متوفرة وبكثرة لكن اسوان عالم اخر ,ممكن ينفع جو نقاهه او

فسحة علاجية ... تركتهم وكملت جولتلى فى الجزيرة واتى ميعاد العودة وحسيت باكتئاب بسيط عشان هاترك الجزيزة

الطبيعية ومكنتش عاوزة اليوم يخلص ولا الشمس تغيب ولكن ما باليد حيلة ....

قابلت صحبتى وقريبتها وقالولى هنروح نزور قرايب لهم فى منطقة تسمي الجوزيرة من اسمها فرحت جدا

قولت يسلام هنروح جزيرة تانية .....مافيش مانع

ويا ليتنى ما كنت ذهبت !!!!!!!!!!

صور جزيرة النباتات

هذا المنظر اثناء سير المركب فى النيل متجهه الى الجزيرة

صخرة عليها عصافير فى منتصف النيل طريق الجزيرة

صورة من داخل جزيرة النباتات مش عرفه ليه معوجة مع انى عدلتها بس معلش ناموا على الجنب الشمال وانتم تشوفوها كويس

قبل الغروب

تم تعديل 12 أبريل 2008 بواسطة Badria Mekkawy

[badroora]

الجوزيرة اشتاتا اشتوت

منطقة الجوزيرة ........ يا ويلااااااااااااااه

من الكورنيش اخذنا ميكروباص ونزلنا قبل شريط قطر وعدينا سكة القطر وبعد سكة القطر انتهت اى معالم

ونس .منطقة غريبة عكس كل اسوان يعنى اسوان اكتر شيء لفت نظرى هى الاضائه اما المنطقة دي

الاضاء فيها كانت غريبة وعجيبة المهم بدات تظهر على علامات التوتر وعدم الارتياح للمنطقة اللى

قصدنها . المهم كانت خطوتى اسرع من صديقتى وقريبتها فهديت ومشيت على خطوتهم . واذا بصمت

غريب ويتبعة همس كانهم بيكلموا نفسهم سالتهم في ايه قالولى اقرئي قرءان والمعوزتين وانتى ماشية .

انا بصراحة خوفت وقلتلها استنى احنا مشين فى مقابر ولا ايه .....لا استنى انا بخاف واستحالة ادخل مقابر

بالليل .وتسمرت مكانى وحلفت مانا ماشية الا لما اعرف في ايه بالظبط وايه السر الغريب فى قراءة القران

دلوقتى . قريبة صديقتى ابتسمتم وميلت على وقالتلى هنا تتمركز قوى الحسد قوتلها يسلام معقول انتى

بتعتقدي فى كدا . قالتلى ايوة ويلا نمشي واعملى زى ما بقولك ..

انا طبعا مشاية واقولهم دى خرافات حسد ايه ونيلة ايه هو عشان ماهو مذكور فى القرءان يبقي خلاص

اى شيء يصبنا يبقي حسد وماشين من مكان غريب لمكان اغرب وضلمة وكان الناس بيعندوا

بعض فى عدم اينارة الشارع .

دخلنا كدا فى مربع غريب وانا بدات اشعر بالرعب وقولتها سورى مش هامشي اكتر من كدا المهم فعلا

كان البيت فى ضهرى دخلنا واول مدخلت البيت فى المدخل رجلى لفت وانجزعت قولت يا مسهل .

دخلنا البيت مرتحتش زى ماكنت عند قرايب صحبتى اللى استضدفونا في بيتهم , حسيت بقلق وكمان نظرتهم

لى من تحت لتحت .قولت اكيد عشان انا الغريبة فيهم فمستغربنى مش اكتر .وبعدين لاقيت موضوع النظرة

طول وانا مخنوقة قولتلها حضرتك بتشبهى على وابتسمت ابتسامة صفرة والست قابلتنى بابتسامة خبيثة

وانتهى الموقف .

قولتلهم عاوزة اشرب جابلوى ماية فى ازازة وانا من ساعة ما روحت اسوان وانا ادمنت مياة الصنبور

طعمها جميل اوى كنت باحس انها زى ماء زمزم ايه العلاقة بينهم الله اعلم مجرد احساس

قولتلها لاء فين الحنفية اللى هنا هاروح اشرب منها . خرجت من الغرفة وروحت اشرب من الحنفية

وبالتفت واذا ب قطة خبيثة سودة بتبصلي .

من كلام قريبة صديقتى عن المنطقة دي جاء فى ذهنى على طول فيلم الجن والانث وان القطة دى جن .

فخضيتى وجريت بسرعة بلوزتى شبكة فى الحنفية تمزقت واديدي انبخط دخلت عليهم كأنى جاية من خناقة

جابولنا ميرندا وقولت شكرا مش هاشرب الست ردت على بعصابية لاء كدا عيب لازم تشربي معجبنيش

اسلوبها قريبة صحبتى بصتلى وقالتلى معلش اشربي بس شوية لانه بيعتقدوا ان اللى مش هيشرب البنات هتبور ومش هتتجوز

هى كلمتنى بهمش وانا بقي صوتى فضح الدنيا قولتها يا ريت تيجي ع الشرب وادينى هاشرب بس تبقي تقابلنى

.

المهم لسه باقرب الكوباية من بوؤي وراحت مقلوبة على هدومى طبعا ماليش نصيب فيها وكمان كنت مسكاها

بدون نفس . المهم قولت يلا نمشي عشان هدومى ملزقة ولازم اغير .

مشينا واثناء سيرنا قريبة صديقتى قالتلى بدور بكسر الباء اقري المعوذتين قولتلها معوذتين ايه اللى تحوق هنا

دانا لو ختمت القرءان كله .

المهم ذهبنا الى المنزل وغيرت هدومى وجلسنا بقي كلنا وقولت لازم افهم ايه المنطقة اللى روحناها دي

انا سالت السؤوال والكل انهمر فى الضحك الهيستيري انا قولت صحيح انا مكنتش مقتنعة ولكن مش هاقول انهم حسدونى

بس المنطقة فيها شيء غلط ملبوسة مثلا ولا معفرته .

اختهم الكبيرة خدتنى جنبها وقعدت ترقينى بالرقية الشرعية وحكتلى عن الجوزيرة

قالتلى دول اللى قلبوا القطر قولتلها ازاى

قالتلى المنطقة دي معظم الناس فيها كانهم مش من اسوان فيهم كمية حسد وقر وحقد على كل الناس

ونظرة عنيهم متخيبش .الواحد او الوحدة يركز بس على اى حاجة وبعد مافيش الشيء يدمر

ولهم كلمة مشهور قبل الحسد هى خبار يا اى حاجة عاوزين يحسدوها .

من ضمن الكلام اللى قالوه مش عارفه هل مجرد دعابة ولا حقيقة .

قالولى مرة كان فيه قطر معدى وكان جديد وسريع واتنين من المنطقة دى شافوا قالوووووووووو ياه

طيارة ماشية القطر بعد شوية انقلب باللى فيه .

ومرة اتنين منهم كانوا على مركب فى النيل وكان فيه مركب من بعيد زو شراع كبير وجديد فالاول لصحبة

شايف الشراع اللى هناك دا كبير ازاى قالوه يااااااااه وانت نظرك جاب لهناك :ninja:

فالراجل اتعمى

:lol:

طبعا قعدنا نضحك وحكولى حاجات كتير من هذا القبيل وبدؤا يسردوا كل المواقف اللى صابتهم من

اصحاب هذه المنطقة . فيها اللى يصدق وفيها اللى طبعا مبالغ فيه .

واحدة منهم قالتلى انها كانت شغالة سكرتيرة وكان ليها زميلة من الجوزيرة شغالة فى مكتب جنبها وجابت

ورقة تكتبهالها على الالة الكاتبة وهى كانت سريعة فى الكتابة قالتها ايه دا ماكينة بتكتب

قالت بعدها حست بتنميل فى اديها وسرعتها فى الكتابة قلت لمدة اسبوعين . هو طبعا الله اعلم واكيد

العامل النفسي له تاثير كبير .

بس الغريب ان معظم الناس هناك بيعتقدوا فى الحسد بشكل غريب .

انتهى اليوم وذهبا للنوم حيث انى انا وصديقتى سوف نتجة فى الصباح الباكر الى الاقصر ثم الى اسوان ومن

اسوان الى مصر .

بكرة بقي نكمل باقي الرحلة فى الاقصر وعودة مرة اخرى الى اسوان

ابقوا معنا

استراحة طويلة

وسوف نعود

تم تعديل 12 أبريل 2008 بواسطة Badria Mekkawy

[nash]

قولتلها معوذتين ايه اللى تحوق هنا

دانا لو ختمت القرءان كله .

بجد دي روعه......

لا الحقيقه الموضوع بجد روعه...أكتشفناكي يا بدور( بكسر الياء)...كوميديا عشرة علي عشرة....وقصه جميله...

بس سؤال...ألصور أنتي اللي مصوراها ولا كروت؟؟

وبعدين المناظر الطبيعيه هناك مالهاش حل... معقوله ...أنا كنت فاكرة شرم الشيخ بس هي اللي جميله....مع أني مازرتهاش ...وممكن أقول مرسي مطروح فيها مناظر رهيبه...دي رحتها مرتين مرة وانا صغيرة ومرة مع ابو ياسر والشباب....قعدنا فيها الليل وتاني يوم رجعنا علي القاهرة من هول الرطوبه والحر...شكلك قابضه مبلغ تقيل لعمليه التسويق....خلاص قررت والله لازم اشوف الجمال ده..

أكملي يا فتاة

تم تعديل 12 أبريل 2008 بواسطة nash

[badroora]

بس سؤال...ألصور أنتي اللي مصوراها ولا كروت؟؟

لا والله يا ناش كلهم حقيقين بايد نجفة الضب :happy: شوية بالكاميرا الديجيتال وبعضهم بالموبايل لما شحن الكاميرا خلص .

وان شاء الله تروحى اسوان ومش هتدمى ابدا ابدا وهتدعيلي كمان بس ابعدي عن اللهم ماحفظنا يجعل كلمنا حفيف عليهم

شكرا لتشجيعك يا ناش انتظرينا بقي ع الكوميديا الحقيقة فى الاقصر

رحلة الاقصر مش هتقدر تقفل بوئك :wub:

[حسام يوسف]

السلام عليكم

انا بجد استمتعت بوصف بدرية للرحلة

لكن متحف النوبة ازاى ماعجبكيش يا بدرية؟

ده انا لما أكون متضايق ومش عارف اجيب التارجت

أروح أقعد شوية هناك

مافيش حاجة فى المتحف مصرية

البنا

الاضاءة

طريقة العرض

لأن كل المتحف منحة من اليونسكو

وتم بناؤة 1997

وأدعو كل واحد محب للجمال أن يزورة

شفتوا يا جماعو صورة السادات وهوة شايل صورة عبدالناصر وحاطط صورتة ع السد

من ضمن صور بدرية عن رمز الصداقة المصرية السوفيتية

طبعا مش هعلق

كنت اتمنى انى كنت أكون فى صحبتك يا بدرية

تفرق كتير لما تزورى مكان مع حد عارفة كويس

وكمان يكون بيحب المكان

وأى حد عايز يزور أسوان بس يؤمر

وحتى الاسعار لو غالية انا ممكن أتصرف وأجيبلة أماكن مش غالية

كل الحب من مدينة الجمال

أسوان

[badroora]

دكتور حسام هنا يا الف نهار ابيض نورت اسوان اكتر ما هى منورة وشوفت بقي الدعاية اللى بعملهالكم اهي ناش قررت تزوركم من بعد ماشافت الصور يا ريت بقي نسبتى تبقي محفوظة :happy:

مافيش حاجة فى المتحف مصرية

البنا

الاضاءة

طريقة العرض

لأن كل المتحف منحة من اليونسكو

وتم بناؤة 1997

وأدعو كل واحد محب للجمال أن يزورة

ماهو جايز عشان مافيهوش الروح المصرية عشان كدا مدخلش قلبي :wub:

لا صحيح انا لا احب الاشياء الساكنة المحبوسة اميل للطبيعة اكتر الصور الساكنة بترهقنى كتير فى التفكير لانى باظل واقفة امامها واتخيل الاحداث فيها ودى مشكلة عندي مبعرفش اعدى اى شيء للازم احلله واطلع منه صورة حيه يعنى مثلا لو هنبدا بصورة الشيخ اللى بيعلم التلاميذ فى الكتاب انا صديقتى كانت جنبي قالتلى ياه شايفة كانت الحياة بسيطة ازاى وصورت المنظر ومسشت انا بقي معرفش فضلت واقفة واتخيل لحد مالصور الساكنة تحركت والاولاد بيتفعلوا مع الشيخ وقاموا وروحوا البيت كذلك صورة الفرح والعروسة فالتنقل بين كل فكرة وفكرة فى الصورة تعبنى وارهقنى وخلينى امر على الباقي مرور الكرام بس عجبنى اوى اوى المنظر الخارجى الخلفي اللى هو شلال المياة دا جميل وقعدت هناك برا المتحف اكتر من جواه نفسه .

وبخصوص صورة السادات هل هو اللى عمل الاتفاقية مع اليونيسكوا ولا جمال عبد الناصر ؟

لانه لو هو اللى عمل الاتفاقية والرمز اتبنى فى عهده يبقي من حقه اما لو غير كدا يبقي يا خسارة بجد.

واتفق معك فى نفقطة لومعك واحد فاهم ويعرف تاريخ البلد كويس ,انا رحلتى لن استفيد منها كتير اقصد كمعلومات تاريخية لاننا اعتمدنا على نفسنا فى كل شيء ومكنش معانا مرشد سياحي .

وعموما المرة القادمة ان شاء الله تشاركونا حضرتك ومحمد ومامة محمد وابقي اشجينا وسجل يا ي تاريخ.

اهلا بك مرة اخرى فى رحلتى اللى فى بلدكم :sad:

تم تعديل 13 أبريل 2008 بواسطة Badria Mekkawy

[badroora]

الاقصر بلدنا بلد سياح فيها الاجانب تتمخطر.!!!

ذهبت لكى انام وقبل الخلود فى النوم تذكرت فيلم غرام فى الكرنك ومحمد العزبي والاقصر بلدنا وبقيت

مغطية وشي بالغطاء وابتسم وفرحانة واتمنى ان استغرق فى النوم بسرعه عشان اصحي الصبح بدري

واشوف الاقصر . وبقيت اكسيتد نفس الاحساس اللى كان عندي لاسوان المهم حاولت انام والنوم

جفي عيونى هذه الليلة على الغرم انى كنت متعبة جدا ومرهقة ولكن النوم معاندنى , طبعا انا كنت ذهبت

للنوم والجمع لسه سهرانين ولكنى فضلت اظل تحت الغطاء اتذكر احداث اليوم واتخيل احداث بكرة

وما بين هنا وهناك استغرقت فى النوم وصحيت على صوت اذان الفجر قولت يااااااااه كويس خلينا نقوم

عشان نوصل بدرى وناخد اليوم من اوله ..

قمت صحبتى كانت نايمة ع الكنبة اللى جنبي انا طبعا من ساعة ما روحت عندهم وانا حبيت الكنبة اوى

وكنت كل ماقعد عليها ويلحفنى الهوا انام وكمان عشان عمرى مابعرف انام جنب حد الا اخواتى فقط .

فطبعا الناس تعبوا معى فى اقناعى بالنوم على سرير بمفردي ولكنى رفضت لان شخص اخر سوف يترك

مكانه من اجلى فقولت لاء كفاية عليهم مستحملنا فمش معقول كمان نقلب رحيتهم ونغير مكان نومهم .

وصحبتى طبعا رفضت تتركنى لوحدى فجت اخدت الكنبة اللى جنبي :happy: ويا محلى نوم الكتب والله متعه

المهم بكل ثقة وامل قربت من صديقتى ويلا قومى نصلي الفجر عشان نمشي هى بقي نعم هنمشي دلوقتى

قولت اه شكلها هتتعبنى هى ماشاء الله عليها متدينة جدا واكثر منى كمان قولتلها طيب قومى صلي الفجر

عشان عندنا سفر وخلينا ندعى ان ربنا يسترها معانا طبعا هى قريت دماغى وعارفه انى مجرد انها تصحي

وتصلي هاقدر ااثر عليها . انا سبقتها توضأت وصليت واستنيتها تصلي وخلصت واذا بها ع الكنبة تانى

حاولت معاها وهى عارفة انى مش هاسيبها ومش هاعرف انام طالما صحيت طردتنى خارج الغرفه وقفلت

النور ونامت :sad: . البيت بقي اللى كنا ساكنين فيه كان فيه حوش كبير و4 سرائر معرفش ليه هما فى

الحوش بس قولت ماعلينا , اخذت مجلة كدا كانت مرمية على الارض واستلقيت ع السرير واذا باخت من

الاخوات صحيت تصلي الفجر ودى كانت بتحبني اوى وقريبة منى اكتر من قربها لصحبتى اللى هى قربيتها .

المهم صلت الفجر وفكرتنى نايمة راحت تجيب غطى وجت تغطينى انا ضحكت قولتلها اصيلة يا ,,,,.....والله .

قالتلى منمتيش ليه قولتها نمت وصحيت عشان نمشي بدرى صديقتى نامت ومش عاوزة تقوم دلوقتى

قالتلى مش هتلاقم مواصلات دلوقتى وكمان حتى لو لاقيتم هيقعد للصبح لحد ما يحمل ناس ,قولتها طب ما

فيش قطر قالت فيه بس مش سريع وهيوقف فى كل محطة وهتزهقم ,المهم هى قامت ورجعتلى بعد شوية

بكوب كبير لبن وبسكون نواعم .قالتلى انا جايبة اللبن عشانك مخصوص مع انى مش باحب اللبن خالص

بس طبعا قدرت تعبها وعملته عشانى قولت مش هكسفها .قعدت جنبي وقعدنا نحكى فى حياتها وحياتى

والحكاوى اخدتنا للصبح .وبعدين لاقيت صحبتى صحيت وجاى على روحت عطياها وش ومغطية وشي

بالغطاء قالى انى نايمة يعنى . بتصحينى وانا بقي متنحةواقولها سبينى مش هاصحى انت مين وهى طبعا

حست انى باشتغلها وراحت شدة الغطاء مرة واحدة الحركة دي بتضايقنى جدا حتى ولو كنت صاحية قومت

اجرى وراها فى الحوش وبعدين قالتلى اعقلى الناس نايمة قولتلها ماشي .

قمنا لبسنا وهما حضروا الفطار ويلا افطروا قبل ما تمشوا انا طبعا اللبن عملى غممان نفس ومقدرتش اكل .

وبالعافية لما سبونى بدون فطار مع انى كنت ضربة ربع كيلوا لبن ونواعم يا بستوك ,,,ومع ذلك مفطرتش

وقال ماليش نفس :wub: . المهم اصطحبتنا قريبة صديقتى الى الموقف العام الباص قالوا هياخد وقت لما يجمع

الناس وانا طبعا مش صبورة ابدا . البيجو بصيت لاقيت كله رجالة والمكان ضيق قولت لا النفس هيخنقنا

لحد ما نوصل , قالتلنا مافيش غير الميكروباص بس هياخد وقت لحد ما يحمل قولت مش مشكلة ننتظر

احسن .الحمدلله كان حظنا حلو الميكروباص اللى لقناه كان محتاج نفرين بس لجوة استاذنت اللى فى

الكرسي القدامى وبصراحة كان زوق وسبلنا المكان وانا بقي قعدت جنب الشباك .العربية كانت كلها

صعايدة رجالة شكلهم بالظبط زى اللى فى مسلسل ذئاب الجبل حتى السواق نفسة كان شكلة قطاع طرق .

المهم قبل ما نمشي السواق قرا دعاء السفر والكورال وراه رددو الدعاء سالته المسافة قد ايه قالى 3

ساعات قولت يا الله ربنا يستر . المهم تحرك بنا السواق وشغل شريط تواشيح دينية ,صحبتى اخدت

وضعها على كتفي عدل وتاهت فى ملكوت الله , والشيخ يقول تواشيح والكورال وراه يااااااااه الله نور

اهو دا الكلام الله الله . مرة واتنين طنشت وبعدين الموضوع بدا يتكرر . قولتهم يا جماعة صلوا ع النبي

احنا لسه قدامنا ساعتين ونص مع بعض ومش هينفع كدا .بصراحة الناس كانوا محترمين واحترموا رغبتى

وسكتوا الا قليل منهم .المهم السواق غير المحطة وشغل اغانى وبعدين ناس انزعجت اوى انه يبدل

القرءان بالاغانى فطبعا السواق غير للقرءان تانى ومافيش والعربية كلها سكون وبدأ عزف الضفادع او

ديناصورات على راى استاذ سهران قولت يا ريتهم يصحوا افضل والله .

المهم الطريق كان فيه لجان تفتيش كتيرة اوى تقريبا كل مدخل قرية بنعدي عليها فى لجنة تفتيش .

بعد اللجنة وقفنا كدا قدام دكان وقال هنا الريست الل عاوز يشترى حاجات ينزل بس بسرعة .

جبنا عصير وشيبسي وبعد كدا تحركت العربية ووصلنا للاقصر .

عبارة عن مدخل ومكتوب عليه اهلا بكم فى الاقصر .

وبعد كدا بدا يمشي فى طريق ترابي والزرع مغطى على الطريق والقصب هو اكتر شيء كان مغطى ع

المنطقة . وصلنا الموقف والمنطقة مش باين عليها اى اقصر خالص .

سالنا قالوا لازم تخدوا ميكروباص تانى للمدينة نفسها .اخدنا ميكروباص ونزلنا المدينة

وبعد كدا اخدنا تاكسي وقولنا ودينا عند فندق كويس وامان وتكون اسعاره معقولة نزلنا عند فندق

نيفيتيل الاقصر 4 نجوم ودخلنا الفندق وجينا عند الحجز واكتشفنا ان صديقتى نسيت الجواز بتاعها

فى اسوان وممعهاش غير رخصة السياقة البحرينية وطبعا الفندق رفض رفض تام انه يقبلها بدون اثبات

شخصية غير الباسبورت .

فاصل ونواصل

يُتبع

[badroora]

:lol: عودنا ,,,,,,,,

حاولنا مع الفندق وكل محاولاتنا بائت بالفشل الذريع :wub: المهم خرجنا نجر ازيال الخيبة وصديقتى قالت مش مشكلة نقضي

اليوم فى الاقصر ونرجع على اسوان بالليل ,طبعا قولتها دا انتحار عموما خلينا نحاول ونشوف ,اتصلت بقريب لى كان

شغال فى الاقصر ويعرف كل خباياها وحكيت له ع المشكلة اللى قابلتنا قالى روحى فى شارع المحطة هتلاقي فندق على

الشمال قبل المحطة بشوية روحيه وان شاء الله يقبلوا يسكنوكم . المهم اخذنا تاكسي وذهبا الى الفندق .

الفندق عبارة عن خرابة مثلا او مصحة نفسية شكله تم بنائه فى اوائل العشرينات او بلاش كدا شبة مستشفي ام المصريين

المهم منظر الفندق مريب وخسارة اساسا كلمة فندق ان تلصق عليه المهم دخلنا الاستقبال بتاع الفندق عبارة عن فسحة

وتليفزيون قديم قوى وكراسي بلاستيك والكونتر خشبة قديم وشكلة مش عاطفي ,المهم موظف الاستقبال كان ساند على

الكونتر ونايم طبعا من خلال وصف الفندق فواضح اوى ان اى حد عاقل غير مضطر مش ممكن يسكن فيه . :blink:

المهم روحنا صحيناه وكان رافض تماما صحبتى من غير باسبور المهم من هنا لهنا قالى كلمى المدير وقلت اوك فين مكتبة

طبعا مكتبة تحت السلم لاقيناه بيصلي الضهر رجعنا واستنينا لما انتهى من الصلاة شرحناله الموقف المهم وافق انه يسكنا .

انا بقي مرعوبة من المكان ولكن ما باليد حيلة ,قولتلها شوفي احنا مش هندخل الفندق دا الى اذا حسينا اننا هنموت من

التعب يعنى ندخل بس نرتمى فيه قالتلى ماشي

روحنا رمينا شناطنا وغيرنا هدومنا وصلينا ونزلنا بقي عشان نلف فى الاقصر .

المهم واحنا ماشين ندور على تاكسي لاقينا حنتور وقلتلها بقولك ايه خلينا نلف بالحنتور بلاش تاكسي قالت ماشي

روحنا لبتاع الحنتور راجل تخين اوى ولابس جلبية لبنى مقلمة وطاقية بيضة شبيكة .

الراجل بالظبط زى النص اللى كان فى ليالي الحلمية ,المهم اتفقنا معاه هتاخد كام قال 150 جنية قلنا ليه ن شاء الله قعد

بقي يقول اصل من الكرنك لمعبد التحنيط لمعبد الاقصر و......الخ قولناله من الاخر هنشوف حسب المشوار قال ماشي .

قعدنا انا وصحبتى والراجل بقي العرض عرضين وقافل عننا المايه والنور وقولته افتح لنا السقف دا قالى لا للاسف مش

بيتفح قولت لاء انا راكبة مخصوص عشان اتفرج ع الدنيا وانت كدا قافل علينا كل شيء قالى تيجي قدام قولت ماشي اقعد

وانا هاسوق :lol: قالى مش هتقدرى ع الحصان المهم وسعلى جنبة وقعدت ومسكت طرف من الحبل وبقيت اسوق معاه طبعا

انا والراجل سدينا الماية والنور على صديقتى وبدل ماكان فيه طاقة نور انا كملت عليها وضلمتها .

احساس جميل واحنا ماشين ع الكورنيش وصوت الحصان تك تك تك حلو اوى وانا بقي مارست هوايتى القديمة اللى

تركتها من ايام الجامعة الا وهى التمثيل , انفصلت عن العالم الخارجى وعشت فى دنيتى انا وحسيت انى ليلي مراد

اتمخطرى واتمايلى يا خيل شوية , والاقصر بلدنا شوية , وناسية الناس اللى حواليا وصوتى حلو وحش مش مشكلتى المهم

انى باعمل اللى عوزاه وخلاص .

وصلنا معبد الكرنك ولفينا فيه وكان من برا جميل اوى بس لما دخلت حزنت اوى ان الاصنام مش متصانه كويس وكل

التماثيل معوقين وكانهم فقدين اعضائهم فى الحرب wst::

المهم كانت الدنيا زحمة اوى والاجانب غزيين المكان المهم تجولنا بسرعة بين التماثيل .

وخرجنا من معبد الكرنك الى معبد الاقصر معبد الاقصر كان على اول شارع اللى فيه المصحة اللى نزلينا فيها .

دخلنا معبد الاقصر وكان جميل اوى الاصنام اللى فيه سليمة شوية عن اللى كانت فى معبد الكرنك ,,,,

المهم كل دا وبتاع الحنتور منتظرنا بالخارج المهم بعد جولتنا روحناله وقولنا بقي احنا جعانين عاوزين ناكل .

مش عاوزين كنتاكى ولا برجر ولا اى حاجة من دى قالى تعالوا هوديكم مكان مش هنتدموا

فعلا روحنا مطعم فى منطقة شعبية بس ريحة المطعم كانت بتعلن عن سمعته .

المهم وصلنا المطعم والراجل قال ها ستناكم لما تاكلوا وتخلصوا , احنا طبعا قولنا عيب احنا ولاد بلد وميصحش ناكل وانت

مش معانا يلا تعالى كل معانا المهم الراجل كان متردد وبعدين وافق .

دخلنا المعطم وهو كان يعرف صاحب المطعم سلم عليه ووصاه علينا واحنا طلبنا الاكل والراجل طلب حمام محشي .

المهم واحنا بناكل الراجل كان قاعد قدامى وفجاءة لاقيت وشة احمر وظنهر وعرق كتير وعنية احمرت والله انخضيت

قولتله مالك فيك حاجة انا اعرف ان الحمام حامى بس مش للدرجادى

قالى اصلي عندي املاح وهى اللى بتعمل كدا ,طبعا ايه علاقة الاملاح بالحمام معرفش .ماعلينا ...

المهم بعد الاكل طبعا فصلنا والخطة اللى كنا اتفقنا عليها مقدرناش ننفذها اننا مندخلش الفندق غير ع النوم طبعا مقدرناش سفر 3 ساعات

ولف واكل فخلاص المهم قولنا نكمل بكرة

سالناه على تاكسي يجيلنا بكرة ويودينا البر الغربي عند مقابر وادي الملوك وباقي المعابد

المهم اتفق مع صاحب ليه وجالنا اتفقنا معاه ع السعر وخلاص روحنا الفندق ....

المهم انا دخلت الغرفة وكأنى داخلة غرفة اعدام مكان كئيب جدا جدا وقبل مانام قعدنا نامن كل مداخل الغرفة وقفلنا البكونه

بلكونه بتطل على خرابة :blush: وقفلنا الباب وسكرنا كل شيء ...

صحبتى بقي صلت العشاء وراحت فى سابع نومة وسبتنى للغلب ...

طفيت كل النور بدات اشوف خيالات فى السفق اترعبت نورت النور اللى جنبي وعماله اتقلب يمين وشمال ومافيش فايد ...

وطبعا كنت حسه اننا الوحيدين اللى فى الفندق على الرغم ان الشارع كان ونس للصبح بس محستش بالامان خالص

وكل شوية اتخيل ان فى حد هيجلنا من البلكونه وزاد القلق والارق وابص على صحبتى وهى نايمة اقول يا الله

جايبة الثقة دى كلها منين ونايمة ومطمئنة المهم فشلت فانى انام

قولت مبدهاش لازم ازعجها قعدت اخبط وارزع واشغل اغانى عا الموبايل وهى لا حياة لمن تنادي

اخر ما زهقت صحيتها يلا قومى متسبنيش لوحدى حطت مخده على راسها وقالتلى الساعة كام قولتلها تلاته قالتلى يا شيخة

حرام عليكي سبينى اناااااااام وانت روحى اتخمدي :sad:

المهم رجعت على سريري جبت الكام وقعدت اتفرج ع الصور وبعدين شكلى عينى غفلت نمت

وصحبتى قامت تروح الحمام وهى قايمة مدروخة وقعت على طرف سريري على رجلى وانا بقي قمت مفزوعة وقعدت

اصرخ وعنيها كانت بتلمع فى الضلمة وقمت وقفت ع السرير وهى تهدينى وانا مرعبة وباصرخ وفين لما نورت النور

وقعدت تهد في وشكلى صعبت عليها بجد وقلبها حن جت جنبي وقعدت تقرا قران لحد مانمت وبعدين صحينا 6 الصبح .

قولتلها يااااه انا حلمت بكابوس امبارح وحلمت انك وقعتى على وكان شكلك زى العفريت قالتلى نعم حلم ايه

دا حصل فى الحقيقة وانتى اللى خوفتينى من صريخك واول مرة اشوفك كدا , قولتها يسلام بجد دا حصل قالتلى والله حصل

والغريب على الصراخ دا محدش فى الفندق اتحرك وقال اروح اشوف فى ايه .....

المهم قولتلها مش هنقعد فى الاقصر اكتر من كدا نروح البر الغربي وبعدين نروح اسوان نجيب حاجتنا وبعدين نمشي تانى

يوم لانى زهقت ,,,,,,,,,,

المهم سواق التاكسي جالنا الصبح فى الميعاد اللى حددناه

فاصل ونواصل

ابقوا معنا :lol:

تم تعديل 13 أبريل 2008 بواسطة Badria Mekkawy

[badroora]

صور معبد الكرنك ومعبد الاقصر ....

1- معبد الاقصر

معبد الاقصر من الخارج

تم تعديل 13 أبريل 2008 بواسطة Badria Mekkawy

[badroora]

معبد الكرنك ,,,

يقولون دا حمام سباحة اجدادنا wst::

الباروما اكلتهم :blush:

معلش كل ما ادلها تميل :blink:

تم تعديل 13 أبريل 2008 بواسطة Badria Mekkawy