رحلة الى الاقصر واسوان .!!!

[nash]

كتبت رد ..واتمسح :lol:

وأى حد عايز يزور أسوان بس يؤمر

وحتى الاسعار لو غالية انا ممكن أتصرف وأجيبلة أماكن مش غالية

كل الحب من مدينة الجمال

أسوان

لأ ماينفعش كده يا دكتور حسام...قول بالاسماء.....أنا أسمي مكتوب؟؟ wst::

بدريه.........تصدقي بالله؟؟ لا إله إلا الله....ما قرأتش باقي قصتك الجديده..قولت هاحلي بيه بعد ما الغجر يصحوا وينتشروا...وكل واحد ياخد موقعه من البيت...

علشان أحلي بيه بعد لفه الجرايد والمنتديات المشتركه فيها... واتعكنن من الأخبار والأهرام والوفد والدستور ....يعني بكتب وأنا مغمضه علشان ما أحرقهاش :lol:

هارجع أقرأها في الروقان..مع فنجان القهوة .... :lol:

صباحك جميل..... :blush:

من الحماس كتبت ما أحرقهاش بتاع عشرتاشر مرة.... :wub:

عدي كام مرة كتبتها وهاديكي جايزة :blink:

تم تعديل 13 أبريل 2008 بواسطة nash

[badroora]

ماشي يا ننوشة فى انتظارك بس بلاش قهوة كتير بتتلف الاعصاب wst::

.............................................................

سواق التاكسي ونجفة

هو مش تاكسي الظبط هى عربية ملاكى وعملها تاكسي العربية جاكوار موديل 1976 ولونها ارزق وفرشها عبارة عن

كراسي جار عليها الزمن مغطاه بكليم والتابلوه عبارة عن هيكل لخرابة والاجمل فى كل دا ان الباتش بتاع العربية ماركة جاكوار جديد

وبصحته .المهم انا ركبت قدام قولت عشان ابقي اصور اى شيء يعجبنى فى الطريق .السائق بقي قصير اوى وليه شنب

ولابس جلابية وعليها عمة كبيرة اوى خافية وشه تحتها ,الميزة فى السواق بقي انه عنده عزة نفس ومتكبر اوى .

المهم واحنا ماشين عدي من جنب مطعم ريحة الطعمية كانت قوية جدا قولته وقف وروح جيب لنا ساندويتشات قالى لاء

انتى من اولها بقي ولا ايه استغربت قولتله خلاص استنى وهانزل انا قالى لا يا ستى انا هاروح مش عشان سواق التاكسي

لا انا هاروح عشان انت ست وفى بلدنا وميصحش قولت ماشي هات لنا كذا وشوف انت عاوز ايه قالى ملكش خاص فينى

اتغظت من لامضته بس قولت ماشي .

جاب الساندويتشات واكلنا وهو ماشي كان فى سوبرماركت على يمينى قولتله وقف هنجيب ماية وبيبسي قالى بقولك ايه

يا مُدام شكلنا كدا مش هنخلص انتى كل متشوفى حاجة هتشتريها ماوديكي السوق تتسوقي بالمرة ,قولتله ومالوا بفلوسي وانا

حرة هو طبعا غظنى المهم مشينا قولته على فكرة انا مش بستعبدك ولا حاجة الطبيعى اننا اكلنا واكيد محتاجين مايه قالى

ماشي ولا يهمك .

وهو ماشي كل راجل مرور واقف فى الشارع يشاورله ويسلم عليه وهو ماشي شكلهم كلهم عارفين بعض .

هو بقي ماشي على سرعة 30 او 40 بالكتير ,انا قولتله هو انت بتزحف ليه مفهمش الكلمة قولتله ماشي براحة ليه قالى

لا السياقة مزاج ومحبش حد يعكر مزاجى هتضيقينى هاوقف وانزلك واوقفلك اجدع عربية ,قولت يسلام انت بتهددنا

المهم قولتله طيب امشي براحتك ,عربيتك دى نوعها ايه قالى جوكر (جاكوار) ماشاء الله موديل كام قالى 1976 قولتله

ياه عربيتك دي اكبر منى بسنه ولسه شغالى لدلوقتى قالى اه قولتله ماشاء الله وجايبها جديدة ولا مستخدمة قالى جديدة قولتله

ياه ومغيرتهاش خالص قالى واغيرها ليه قولتله يعنى لا حادث ولا مخلفة ولا اى حاجة خالص قالى لا المرور واد عمنا .

المهم بفتح الميم والهاء وتسكين الميم .انتى منين قولتله من الجيزة قالى اه باين على شكلك وصحبتى لسه هاقوله قال من

الصومال صح شبههم ,طبعا صحبتى انزعجت وكبسته . قولتله بقولك ايه انا حسه انى راكبه جمل متزود شوية عن ال 40 دي .

قالى طيب حطى الحزام قولتله لاء انت خايف ولا ايه مش بتقول المرور واد عمك قالى طبعا وانا مخفش واصل من اى حد

المهم سرع شوية ومشي ع ال70 واذا بلجنة مرور اوقفته على جنب طبعا هو بقي من بعيد اهلا يا عمنا يا صباح الفل

ورايح للظباط عمله مخلفة وسحب منه الرخص , وقعد يحاول معاهم شوية وبعدين رجع وعليه غضب ربنا تصورى انا من

25 سنه باسوق وعمرى ماخدت مخالفة وانت قريتى على وسحبوا منى الرخص

قولتله يسلام مش المرورواد عمك ايه المشكلة بقي مانتم اهل فى بعض .

المهم اخدت منه الوصل لاقيت مخالفة عشان ماشي على سرعة 70 والطريق كان فاضي ومافيش حد غيرنا ع الطريق

المهم قالى روحى كلمى الظابط وخليه يدينى الرخص ,قولتله عييب انتم اهل وانا ميصحش اتدخل بين الاهل اصطفوا مع بعض .

الراجل فكرنى انى باحسد وقالى انتى منين ليكي اقرايب فى منطقة كدا فى الاقصر مشهورين بالحسد قولتله لاء انا اصلي من الجوزيرة قالى اللى وقعوا القطر قولتله اهم دول بقي واد عمى اللى قلب القطر .

قالى ان المنطقة اللى فى الاقصر دى كانوا بيستدعوا ناس منهم فى متشات الكورة يركزوا عنيهم على الكورة واللعيبة

يجيبوا اجلهم ولو الكورة هتدخل الشبكة يقروا عليها تخرج وتتحسب اوت .

هو بقي كل مايحكى حاجة يقول الله اكبر ويخمس فى وشي .

بس هو كان ظريف ودمة خفيف

روحنا وادى الملوك والمقابر ومعبد خشتبسوت ورجعنا الفندق اخدنا شناطنا

وروحنا ركبنا الميكروباص ووصلنا اسوان.

قبل مانروح البيت عند قرايب صحبتى روحنا المحطة حجزنا قطر النوم والناس كانوا متساهلين ومسالوش على بطاقة زميلتى .

روحنا البيت قعدنا وريحنا شوية وعلى بالليل ركبنا قطر النوم .

القطر كان غريب بالنسبة لى فكرنى بالافلام الهندية

صديقتى طلعت الدور التانى وانا فى الارضي .

المهم طبعا القطر كان معقول دخلنا وقفلنا الباب وقولنا للمضيف لو عاوز يشك ع التذاكر يجي وميصحناش مش عاوزين العشاء

المهم قال ماشي جه فرد لنا السراير ومشي

صحبتى كالعادة نامت وانا التكتكة بتاعة القطر معرفش انام

بس من التعب ريحت شوية وصحبتى نامت بتاع ساعتين وصحيت قولتلها تعالى زورينى قالتلى لاء مكسلة انزل اطلعى انتى

المهم كان معنا شنطة فيها عصائر وشيبسي خدتها وطلعتلها فوق وجتلنا هيسترية ضحك اننا قاعدين على رف ويسلام لو الرف اتكسر او وقع بينا وقعدنا ننكت وجينا عند النزول

باعدل السلم اتزحلق بعيد وانا اتشعلقت ومن كتر الضحك اعصابي سابت ووقتعت بس الخبطة كانت بسيطة

وقعدنا نتريق على نفسنا شوية وبعدين على الصبح كدا الساعة 11 ص وصلنا محطة الجيزة .

والى هنا توتا توتا خلصت الحدوته :blink:

باقي صور مقابر وادى الملوك هارفعها واضيفها ويبقي كدا انتهت رحلتى . :blush:

تم تعديل 13 أبريل 2008 بواسطة Badria Mekkawy

[حسام يوسف]

السلام عليكم

أختى العزيزة بدرية

أنا أوعدك لو كررتى الزيارة

انى أوريكى حاجات أجمل وأحلى

حتى مامة محمد نفسها تتعرف عليكى

وبالنسبة لصورة الرئيس المؤمن اللى (لطعها)فوق صورة ناصر

دى على رمز الصداقة المصرية السوفيتية ابان انشاء السد العالى

يعنى البشوات اللى موجودين فى كل عصر بعلم السادات جم وشالوا صورة ناصر

اللى يعتبر السدالعالى أبرز انجازاتة

وحطوا صورة السادات

حاجة جميلة جدا

وبالنسبة لأختى العزيزة مدام ناش

انتى اسمك مش مكتوب

انتى صاحبة بيت

وانتى وكل اللى من طرفك تشرفونى فى أى وقت

وأى استفسار أنا تحت أمرك

بس بلاش الصيف

خليها على اكتوبر ونوفمبر لحد فبراير

لأن الحر هنا هيبقى صعب

والدعوة عامة لأعضاء المنتدى

[badroora]

حتى مامة محمد نفسها تتعرف عليكى

يا فندم دا شرف لى والله انى اتعرف على مدام حضرتك وعلى الدكتور الصغنون ان شاء الله

ربنا يسهل ونبقي نطب عليكم زيارة مفاجئة باذن الله

اهل اسوان يعنى الاخلاق والكرم والطيبة والاصل والمياة النقية ربنا يبارك فيكم يا رب

[حسام يوسف]

السلام عليكم

أختى العزيزة بدرية تشرفينا وتشرفى اسوان كلها

بس كنت عايز أسأل سؤال

ايه الفروق اللى حستيها بين اسوان والاقصر؟

[badroora]

مقابر وادى الملوك ومعبد حشتبسوت وبعض صور منوعة من معبد الكرنك والاقصر .

اعلى مسلة فى العالم

معبد الكرنك من الداخل

الشاطر بقي اللى هيقولى انا مين فى ددول !!!

ابو رجل بدون ساق :sad:

40 حرامى معبد الاقصر

البر الغربي

معبد حشتبسوت من الخارج

مدينة العمال والمكعبات الصغيرة دى كانت بيوتهم

يُتيع

[badroora]

المقبرة دى بصراحة نسيت اسمها بس اللى غيظنى انى طلعتها بتاع 6 ادوار فى المرتفع ودخلتها وما محنية لما جالى أتب ومن جوة

خنقة ومافيش اكسجين والجو فظيع وكانوا بياخدوا مننا الكاميرا قبل ما ندخل عشان ممنوع التصوير داخلها انا بقي راسي والف .... انى لازم اصور الممنوع مرغوب بقي

قولت مقبرة اكيد هلاقي جثث محنطة جوة المهم الراجل عطيناه 20 جنية فسمح لنا بالكام ودخلنا لوحدينا وحجز الاجانب برا لحد مانخلص .

المقبرة فعلا اسم على مسمي مقبرة مقبرة يعنى ,عبارة عن مستطيل والسقف سدادى الشكل طولها مترين فى العرض متر

وفاضية وكل اللى فيها شخبابيط ع الحيطة والله كنت هتشل جواها بقي بعد البهدله دي كلها وطلوع جبل ما يعادل 6 ادوار وانحنى وانا عمرى منحنى ابدا غير لله سبحانه وتعالى

وبعد كل دا اتفرج على روسومات ع الحيطة

المهم بعد المقبرة دى رفضت ادخل باقي المقابر انتظرت صديقتى برا وهى دخلت وصورتهم وانا اتفرجت ع الصور واخدتهم بدون بهدله وانحناء

بدروا جدودنا القدماء كان فيهم هيافة زينا بالظبط حتى احنا ورثينها منهم :rolleyes:

اله الطب او الطحنيت او المساج والله اعلم :ninja:

دول تمثالين كدا عطرنا فيهم واحنا مروحين قولنا نصورهم شكلهم كانوا اهلهم متبريين منهم فاستقروا هنا بمفردهم

صورة للبر الغربي جنب المقابر

سورى يا جماعة على وجود بعض الصور بدون شرح والله نسيت كل حاجة مسامحة :blink:

وبكدا اكون ختمت رحلتى

على فكرة وانا بعيد احدثها معاكم حسيت انى كنت باتفسح بجد وكانى لسه فى الاقصر ومروحة بيتنا

يا رب تكونوا انبسطوا ومتكونوش مليتم من الشرح التفصيلي .

ويا ريت بقي كل واحد زار اسوان يكتب لنا اهم المواقف اللى صادفها هناك والنوادر بتاعته

لانى واثقة ان مافيش حد مرحش اسوان الا وقابل مواقف عجبته او زعلته .

واهو دا يكون مرجع ودعاية لاسوان فى نفس الوقت .

اشكركم جميعا على تشجيعكم لى وعلى حسن متابعتكم .

تمت بحمدالله

بدرية :ninja:

تم تعديل 13 أبريل 2008 بواسطة Badria Mekkawy

[badroora]

السلام عليكم

أختى العزيزة بدرية تشرفينا وتشرفى اسوان كلها

بس كنت عايز أسأل سؤال

ايه الفروق اللى حستيها بين اسوان والاقصر؟

هارد على سؤالك دا بالتفصيل لانه مهم جدا وليه عدة جوانب احب اتناقش فيها

فهاجله لوقت اكون مركزة وهارد عليك ان شاء الله :rolleyes:

[nash]

ايه ده؟؟ أنتي بتخمي؟؟

خلصت بسرعه كده؟؟ :ninja:

طيب فكري في اي حاجه بجد.... :blink:

بكرة هاشرب القهوة إزاي؟؟؟ ممكن علي روح قرنفل في المحكمه ...نو بروبليم

سؤال جانبي.....هاتي نوع الكاميرا ....وبسرعه...أنا بتاعتي سامسونج ديجيتال ...بس حسيت كاميرتك الريزولوشن افضل بكتير....

لاحظي كلمه ( ريزولوشن) دي متعوب عليها .... :rolleyes:

هه ؟؟

انا بجد بتخنق من الاماكن التراثيه القديمه...ولي صديقه دكتورة في الجامعه سيده في منتهي الاحترام الحقيقه و تعشق الاماكن التراثيه ...بجد كرهت عمرها كله من زني....واتورطت في حته عيله ( أنا ) بلا فخر...وباة هاين عليها تركبني ليموزين وتمشيني من وشها...

بإنتظار المعلومات...

وبجد موضوع من المواضيع الحلوة جدا..ولا تمل :ninja:

[امانى]

اولا صباح الفل يا بدريه

انا استنيت لما تكملى الرحلة الجميلة وبعدين أعلق عليها

ايه الجمال ده كله تصدقى انا كنت بتخيل منظرك فى كل موقف تتعرضى له وضحكت كتير لقفشاتك وشفت اسوان والاقصر بعيونك

شوقتينى اروح اشوفها زوجى واولادى راحو كذا مرة وأنا كنت برفض لظروف الجو اصلى بتخنق من الحر جدا لكن بعد كلامك ووصفك

ده وكلام الرجالة اللى عندى هروح واتفرج وبعدين فى دعوة مفتوحة اهى من الدكتور حسام وكمان لنا ناس حبايبنا هناك بيتمنو

اننا نزورهم .

المهم اخبار الحسد ايه معاكى النظرة راحت ولا لسة اللهم ما اجعل كلامنا خفيف على اهل الجوزيرة ورحلة سعيدة وعقبال كل رحلة

والف تحية وتقدير لاهل اسوان

امانى

[se_ Elsyed]

موضوع ظريف تسلم إيدك يا بدريه

وأنا شايف الدكتور الشامي اون لاين وبيضرب الموضوع وسمعني يا عم سلام كندا هي امي ونهر النيل بتاع تورنتو هو دمي ... ويلكم آون بورد دكتور شامي ... هاو دو يو دو ؟

-------------

عايز أقول بصراحة لحسام إن الفرق بين أسوان والأقصر على حسب أخر زيارة لي للمنطقتين إبان الهزيع الاول من التسعينات ( 1992 )

الأقصر .. مدينة تجارية بحته وتحس إنك هاتتقلب فيها ... وأقرب مدينة تشبهها من حيث الماديات هي " مكه " في مكه تروح عشان تعمل عمره وتزور البيت الحرام فقط وتجري جري بعد ما تخلص .. أما تجارياً فاهلها ممكن يبيعوك لو تنفع تتباع .

أسوان ... بدون مجاملة .. ناس في منتهى الطيبة والشهامة وإكرام الضيف .. وبالرغم من إن مافيهاش مزارات زي الأقصر .. إلا إنك تشعر براحة نفسية لا توصف فيها سواء من المكان أو من الناس الي بتعمر هذا المكان .. وبالفعل من وجهة نظري تُشبة جو المدينة المنورة جداً وما بتبقاش عايز تسيبها وتروح ..

إتعرفت في الفندق على إتنين أسوانيين أو بالأحرى هما اللي إتعرفوا علي أنا وصديقي وهما شغالين في التجارة ما بين السودان وأسوان .. بجد رجولة وشهامة ما حصلتش .. وخرجنا كتير خصوصاً في الفترة المسائية وبجد ما يخليش الواحد يطلع مليم من جيبه في الخروجة ... نفس طبع السودانيين بالظبط .. فهما ما بيعملوش كده عشان ترد الجميل .. لأ والله .. لكن بدون مقابل ...

بس بصراحة زيارتي لأسوان كانت في عز الشتا والجو كان خرافه ودافيء ... ولما رجعت القاهرة طلعت الجواكت والدنيا كانت بتمطر .. أما في أسوان فكنا بنمشي بنص كم .... بس اعتقد في الصيف بتبقى نار يا حبيبي نار ده غير الرطوبة ..

[حسام يوسف]

السلام عليكم

أنا منتظر انطباعاتك يا بدرية عن الفرق بين الاقصر واسوان

من ناحية البلد

ومن ناحية المناظر

ومن ناحية الناس

ومعلهش يا عم س س هأجل الرد على كلامك وهقول رأيى بعد بدرية ما ترد

بس أقدر أقولك انك لو زرت أسوان دلوقتى

هتلاقى حاجات كتير اتحسنت من طرق

ومرافق

ونفسى أعمل معاك دور واجب والله

وانا تحت أمر أى حد نفسة فى زيارة أسوان

[badroora]

بعد ازنك يا حسام ارد ع المعازيم اللى شرفونا وبعدين نعمل مقارنة بين الاقصر واوسان

الغالية ناش متزعليش ابقي تابعينا قريبا فى رحلتى الى راس البر وكنت فكراها الغردقة :closedeyes:

بخصوص الكاميرا فكرتينى بموقف ليها نسيت احكية

نفس اليوم اللى كنا مغادرين اسوان قولنا نتصور مع اصحاب البيت عشان لما احكى لامى تبقي صوت وصورة المهم خرجت من الغرفة اتجهت الى الحوش واذا بواحدة من الجوزيرة جايه تزوروهم واقسم بالله العظيم انا كنت كل دا واخدة موضوع الحسد على انه هزار فى هزار ولكن اللى حصل كان معجزة فعلا .

المهم قولتلهم خليكم قاعدين هصوركم بعد ما صورت الضيفة قالتلى معقولة الموبايل بتاعك بفلاش وفلاشوه قوى كدا

قولتلها لاء دى كاميرا مش موبايل ........وبعدين مافيش ثوانى اديت الكاميرا لصحبتى عشان تصورنى معاهم واذا بالكام والله العظيم واقعة من صحبتى متعرفيش ازاى على العدسة وراحت العدسة مكسورة والبوز اللى كان قدام هنج مكانه على الرغم ان الارض ترابية يعنى مش بلاط بس سبحان الله

جبتها هنا التوكيل وكانوا محترمين وغيرولهالى ودفعت الفرق

المهم الكاميرا مش غالية اوى بحوالى 750 ريال

8 ميجابيكسل

3 optical zoom

yashica ez digital 6032

الكتالوج مش حاضر قدامى دلوقتى هادور عليه لو لاقيته هاجبلك الويب سايت بتاعها .

على فكرة سامسنج كويسة بردوا .

امانى

روحى يا امانى اسوان مش هتندمى ابدا المناظر اللى عجبتك دى فى الحقيقة اروع واحسن

س س

انت الاحلى وشكرا على تشريفك على متن الرحلة

وعلى فكرة انت قولت جزء كبير من اللى كنت هاقوله بالنسبة للفرق بين الاقصر واسوان

شكرا لكم جميعا .

تم تعديل 14 أبريل 2008 بواسطة Badria Mekkawy

[badroora]

طبعا كلامى مبنى على تجربتي الشخصية مش شرط انه يكون صحيح مقارنه بتجارب ناس تانية .....

اسوان

زى بالظبط ماقال س س الناس هنا يتميزوا بالطيبة والكرم ومتخفش منهم ابدا ابدا .

يعنى انا مثلا اول ما نزلت اسوان وانا لسه ع المحطة حسيت بامان وراحة نفسية ومافيش قلق ولا خوف على الرغم انى كنت مرعوبة من وانا فى القطر كل ما القطر يبعد احسن انى ممكن اتقتل ومحدش يدرى عنى دى بصراحة كانت الافكار التى انتابتنى من بعد المسافة .

اسوان هادية وطبعا مقدرش احكم عليها قوى لانى زورتها فى اخر نوفمبر لاول ديسمبر فتقريبا مكنش لسه السيزون بدا .

المناظر الطبيعية اكثر من رائعة من النيل حتى موقع المعابد نفسه جميل جدا وخصوصا موقع معبد فيله ,بصراحة كان نفسي ازور ابو سمبل كنت فكراه فى اسوان بس قالولى دا سفر 3 ساعات تاننين قولت مرة تانية بقي نبقي نروح طيران عليه الاول وبعدين نروح اسوان .

البيئة

من ناحية النظافة معقولة اعتقد ان اسوان معندهومش تلوث بيئي

الكهرباء ماشاء الله مزهزهه اوى وماية الحنفية تحفة طعمها جميل جدا ومتقلقش لو الواحد شربها بدون فلترة

اشارات المرور الالكترونية والستوب واتش عجبني اوى تبقي عارف بعد كام دقيقة هتتحرك لو واقف فى ايشارة

الناس طيبين جدا وكرم ما بعده كرم

معظم الناس مش تخنين معرفش قليل لما شوفت حد تخين فى اسوان

متاثرين كتير بالزى النوبي والسودانى والافريقي

الاسعار معقولة جدا يعنى افتكر انى فصلت فى اسوان بس مع المراكبية فقط لكن غير كدا الاسعار معقولة

اسوان بصراحة كفاية عليها السد العالى وجزيرة النباتات والنيل بجد جوة علاجى ممتع

تحس انك بتحلم مش عايش

كفاية كدا بقي لاقع فى حب اسوان

الاقصر

اخدت الانطباع من قبل ماروح من المطاريد اللى كانوا معايا فى الميكروباص والله حسيت انى حد هيتوينى فى الاقصر دي

وهذا الانطباع ظل راسخ بداخلى الا ان تركتها

مدخل البلد لاى سائح مرعب طريق ترابي والقصب على الجانبين ومش امان ممكن حد يقتل حد ويتاوية فى اى غيط :closedeyes:

البلد او المدينة نفسها اجمل مكان فيها الكورنيش وميدان معبد الاقصر ومنطقة معبد الكرنك بعد كدا تحس انك فى بلد عادي مواصلات زحمة ناس شكلها غريب مرعب

تحس انك ساكن فى منطقة سكنية وليست سياحية

البر الغربي كويس كزيارة فقط لا تستغرق 3 ساعات غير كدا هتمل ملل زريع وخوف رهيب

اعتقد ان البر الغربي دا مليان قتله ومطاريد متخافوش انا اصلي مبالغة شوية

بهذا هذا لا يمنع ان ثلث اثار العالم فى الاقصر .

بس للاسف مش دى الاقصر اللى غنلها محمد العزبي

بس هى بلد ظريفة انصح اللى يعمل رحلة للاقصر واسوان يبدا بالاقصر يوم بالكتير ويسافر اخر اليوم الا اسوان

هى كفاية عليها يوم مش اكتر

المعابد للاسف مش متصانه خالص

كل التماثيل مكسرة زعلت اوى ان اشوف اجدادى معوقين اللى بلا رجل ولا بلا دراع الرطوبة اكلتهم

الاقصر الناس فهلويين شوية يعنى مش متعودين اوى على الشيااكة واللباقة فى الحديث كبلد سياحى

ويمكن عشان هى بتجمع بين السياحة والزراعة

الشوارع والاضاءه معقولة

وفيها بردوا ايشارات مرور بستوب واتش

الاقصر الصبح قبل ما الناس تصحى

ُوطبعا بما انى قضيت فيها يوم ونص فاكيد حكمى عليها مش هيكون صح اوى بس دا راى خلال المدة اللى قضيتها فيها

ولو حد عنده راى تاننى ممكن يشاركنا به واهو عشان منجيش على حق البُنية (الاقصر )

وبكدا يا عم حسام اكون خلصت اروح بقي على شغلى وهابقي اتابع تعلقيك من هناك

بلدك تكسب يا سيدي

وابقي بقي لاحق على الزوار اللى من طرف المنتدى

عاوزين نعمل شركة انا وانت انا اعمل دعاية وانت تستقبلهم هناك وتقوم بالواجب باسعار رمزية غير الضرائب طبعا

تم تعديل 14 أبريل 2008 بواسطة Badria Mekkawy

[~Heba~]

اسوان

يا بدرية انتى مروحتيش كوم امبو و لا ادفو هما فيهم اثار كمان

معبد ادفو و معبد كوم امبو و هم فى ضخامة و حجم معبد فيلة بس مش على النيل

و شكلك مروحتيش معبد كلابشة اللى تم تصوير حلقة البيت بيتك فيه

اسوان هادية وطبعا مقدرش احكم عليها قوى لانى زورتها فى اخر نوفمبر لاول ديسمبر فتقريبا مكنش لسه السيزون بدا .

لو روحتى كوم امبو او ادفو حتغيرى رأيك بشكل قطعى

المناظر الطبيعية اكثر من رائعة من النيل حتى موقع المعابد نفسه جميل جدا وخصوصا موقع معبد فيله ,بصراحة كان نفسي ازور ابو سمبل كنت فكراه فى اسوان بس قالولى دا سفر 3 ساعات تاننين قولت مرة تانية بقي نبقي نروح طيران عليه الاول وبعدين نروح اسوان .

يا سلام بقى لو روحتى ابوسمبل فى يوم التعامد يعنى تعامد الشمس على وجه رمسيس الثانى بصراحة معرفش هو موافق كام :closedeyes:

بس اسألى دكتور حسام ده موسوعه....بدييييييييييا

على فكرة انا اخويا عايش فى ابو سمبل و الهدوء الحقيقى حتلاقيه هناك

انصحك تروحى اتوبيس عشان تبقى تعدى على توشكا و تشوفيها

معظم الناس مش تخنين معرفش قليل لما شوفت حد تخين فى اسوان

يااااااااااااااه اقول مرة اشوف حد بيقول كده...يا بنتى انتى متعرفيش انه بنات اسوان مشهورات بالتخن

مش التخن بس

دول تخان و سمر و قصيرين و نادرا ما تلاقى بنات اسوانية فوق ال 168 سم

و محسوبتك اكبر مثال على كده

اخدت الانطباع من قبل ماروح من المطاريد اللى كانوا معايا فى الميكروباص والله حسيت انى حد هيتوينى فى الاقصر دي

احساسك ده طبيعى لانك اخدتى اقل وسائل المواصلات امان و صدقينى القطر امان اكتر انا دايما بسافر من اسيوط لاسوان قطر .. و بالليل

اما الميكروباص فحدث و لا حرج انه فيه بنت بلدياتى اتخطفت فيه و اخدها السائق لمنطقة جبل و هناك حاول الاعتداء عليها فمقدرش ...تتصورى المهم هو تركها وسط الجبال و هناك ماتت .. من الخوف بس السواق اتمسك و اعدام انشاء الله مفيش غيره

وهذا الانطباع ظل راسخ بداخلى الا ان تركتها

مدخل البلد لاى سائح مرعب طريق ترابي والقصب على الجانبين ومش امان ممكن حد يقتل حد ويتاوية فى اى غيط

متخافيش على السياح دول حاسين بالامان اكتر مننا يكفى انه اى فوج سياحى يمر من من مدخل مدينة الاقصر الامن على المدخل بيوقف كل العربيات على جمب لغاية ما الفوج يدخل اتوبيس اتوبيس و بيكون كل فوج وراه عربية شرطة و قدامه عربية شرطة

شكلك دخلتى فى وقت مكنش فيه افواج داخلة...حظك بقى و الا كنتى حتضيعى نص ساعة انتظار او اكثر على حسب عدد الاتوبيسات فى الفوج

و احب هنا اسرد لك موقف

كنت مرة معدية على اسيوط بعربية ...مع اخويا المهم كان فيه كمين مرورى بيفتش الناس و عدى اتوبيس سياحى

و نزل منه السياح بيريحوا شوية و كان المكان طبعا زراعات و بيوت ريفية و سكة حديد

المهم فى سايح غتت ورزل عارفة عمل ايه

ساب منظر الزراعات الجميل الاخضر الزاهى وراح يصور فى حمار كان واقف بياكل من شوية زبالة قريب من السكة الحديد

طبعا هو حياخد الصورة دى و ينشرها فى بلده و يقول هيا دى مصر

شفتى بقى مش طامر فيهم مهما عملنا لهم

البلد او المدينة نفسها اجمل مكان فيها الكورنيش وميدان معبد الاقصر ومنطقة معبد الكرنك بعد كدا تحس انك فى بلد عادي مواصلات زحمة ناس شكلها غريب مرعب

من قريب سمعت ان الاقصر حصلت على جائزة ثانى اجمل مدينة عربية بس مش فاكرة مين عمل المسابقة

بس هيا فعلا بقت جميلة و نظيفة

كل التماثيل مكسرة زعلت اوى ان اشوف اجدادى معوقين اللى بلا رجل ولا بلا دراع الرطوبة اكلتهم

اسكتى احسن وزارة الثقافة تسمعك تقول خلينا نرممهم صدقينى حلاوة الاثار انها شكلها قديم و متكسرة ... و ده الفرق بين الاقصر الاصلية و التقليد اللى عاملينها فى امريكا و دبى

و اخيرا و ليس آخرا انا استمتعت فعلا بموضوعك ده و اجمل حاجة فيه اسلوبك فى وصف الرحلة

[badroora]

هبة حبيبتي الزيارة الجاية ان شاء الله نطب على كوم امبوا ونستشكف جمالها ولو انك قلقتيني بكلامك بس مش مشكلة كل يهون عشانك .

هبة زعلتينى اوى على اللى حصل لصحابتك بس لى استفسار

هل ماتت موت وراحت عند ربنا

ولا ماتت من الخوف معناها افظع لحظات الخوف .

ولسه حية ترزق بجد طمنيني

وربنا يسترها على البنات اللى سكانين فى المناطق دى بجد

تم تعديل 14 أبريل 2008 بواسطة Badria Mekkawy

[~Heba~]

هبة حبيبتي الزيارة الجاية ان شاء الله نطب على كوم امبوا ونستشكف جمالها ولو انك قلقتيني بكلامك بس مش مشكلة كل يهون عشانك .

هبة زعلتينى اوى على اللى حصل لصحابتك بس لى استفسار

هل ماتت موت وراحت عند ربنا

ولا ماتت من الخوف معناها افظع لحظات الخوف .

ولسه حية ترزق بجد طمنيني

وربنا يسترها على البنات اللى سكانين فى المناطق دى بجد

انا معرفهاش اناسمعت عن الموضوع بس

هى البنت كليتها فى صحارى ... فى مدينة اسوان

و هى من كوم امبو

خلصت امتحاناتها و قالت لاهلها انا جاية البيت

للاسف ارتكبت غلطة عمرها انهاسافرت عربية لوحدها والمفروض انه مفيش اى بنت بتسافر لوحدها فى مواصلات خطرة زى دى

تعرفى قبل ما توصل البلد الناس بقت تنزل واحد واحد و بقت لوحدها مع السواق و كان فيه حتة كلها قبل عند ادفو خدها هناك و لما مقدرش يعمل عملته السودة سابها و بعدين لما اتاخرت اهلها قلقوا و راحوا اتصلوا ببنات صحابها وصلوها للعربية و من الصدف انهم شافوا السواق و عرفوه و كمان رقم العربية

اهلها خدوا البيانات و جرى على البوليس و لما قبضوا عليه قالهم سبتها فى الجبال واخدوه معاهم عشان يجيبوها لقوها ماتت بمعنى ماتت يعنى صعدت روحها لربها الله يرحمها

انا صراحة سمعتب بالحكاية بس مش قادرة اصدق انه ده يحصل عندنا المهم انا من ساعتها و انابكره ام الميكروباصات و مفيش غيره القطر و السفر فى عز النهار

بس اقولك حاجة

لوكان فيه راجل واحد معاها فى الميكروباص مكنش السواق اتجرأ مهما كان رجالتنا لسة فيهم نخوة و شهامه اما السواق ده ربنا ينتقم منه ميمثلش رجالة اسوان باى شكل وممكن ميكونشى اسوانى لانه سواقين المسافات الطويلة احيانا بيبقوا من محافظات مختلفة

تم تعديل 14 أبريل 2008 بواسطة ENG.Heba

[حسام يوسف]

الاخت العزيزة بدرية اللى صيتتلنا أسوان

حقيقى استمتعت بوصفك

وواضح ان فيه عرق فيكى بيمد لأحمد بن ماجد (ابن بطوطة)

الدعوة المفتوحة للجميع لزيارة أسوان

بس ف الشتا

عشان مانخسرش بعض

يعنى من أكتوبر لحد مارس

ويا سلام بقة لو كانت ديسمبر او يناير

الكلام لكل أخوتى وأصدقائى أعضاء المنتدى

وفعلا يابدرية بخصوص فرق الطبايع بين ناس اسوان وناس الاقصر

الاقصر أهلها صعبين شويتيتن

مع احترامى لأهل الافصر

التجارة والبيزنس أهم حاجة عندهم

الحاجة التانية اللى باخدها على الاقصر

اختلاط المصريين بالاجانب موجود عندنا فى اسوان

لكن مش بالشكل الفظيع بتاع الاقصر

يبقى نقطة حتى نزيد ثراء الموضوع الذى بدأته العزيزة بدرية

وهذة النقطة يستطيع ان يجيب عنها أكثر أهل أسوان

هل اسوان هى جنة الله فى الارض؟

بمعنى أخر

ما هى عيوب أسوان؟

سواء كنت زائرا لها

أو مقيما فيها وده عز الطلب

وبلاش حكاية ليه نتكلم ع السلبيات

وبلاش ننشر الغسيل المعرفش ايه والكلام السلبى ده

عايزين الملف ده يكون وصف حقيقى لأسوان

ميزات وعيوب

وقديما تفلسف شخص ما (العبدلله)وقال :

(نصف الحقيقة

كذب)

هبة

دياب

والعبد لله

أسوان حبيبتى

وأى زائر

أو أى شخص له رأى فى اسوان

اتكلم

واوصف أسوان ميزات وعيوب

الكلمة أمانة

[galaxy]

عزيزتي الجميله بدريه. :blush2: ..............بجد استمتعت برحلتك جدا ........فكرتيني بذكريات جميله جدا .... :happy: ...لاني طلعت رحله الاقصر واسوان وانا في الكليه ..............وكانت احلي رحله طلعتها في حياتي بالفعل..........لكن بالنسبالي القطار كان كويس جدا مع انه كان درجه تانيه مكيفه بس كان كل القطار كليات. :lol: ....... العربيه اللي قبلنا كليه اثار واللي قبلها كليه اداب واللي بعدنا اداب ..........يمكن عشان كدا ...... والحاجه الوحيدة اللي بجد كانت بتضايقنا ........مجموعه من الطلبه معانا كانوا حالفين ما يسيبوش حد معانا ينام ......عشان كدا اول ما بيلاقوا حد نام ييجوا و يغنوا جنبه لحد ما يصحي..............رحله بقي؟؟؟ :blink:

محطتنا الاولي كانت الاقصر ونزلنا في فندق شادي . ..........وبجد كان مريح وكويس...........رغم انه كان تلات نجوم تقريبا........و كل الغرف فيها تليفون وتليفزيون و حمام والاكل كمان كان مش بطال....................المواصلات كلها كانت متوفرة والحمد لله وكان الباص بييجي عند الفندق سواء في الاقصر او اسوان وكان برضه بييجي المرشد مع الباص ودا كان بيخلينا بجد مستمتعين عشان كنا مش بس كنا بنتفرج لأ كمان كنا بنستمتع و بنفهم كل حاجه ليه والكتابه معناها ايه.. :lol: .....................قضينا في الاقصر يومين........حسيتها بلد صغيرة وعلي فطرتها ........يمكن عشان ما كنش فيه احتكاك بينا وبين الناس للدرجه عشان كدا مش قادرة احسهم زي ماقلتوا...........استمتعنا جدا بالكرنك والمتحف والبر الغربي .......................بس للاسف عدين للبر الغربي علي الكوبري مش بالمركب ..........مع ان ماما والله كانت موصياني وحكيالي علي جمال المركب لما بيعدوا بيه للبر الغربي لانها راحت زمان مع المدرسه في الثانوي :happy: ............بعد يومين طلعنا علي اسوان. :sad:

.....ويومها واحدة زميلتنا تعبت للاسف ووقفنا في بلد اسمها .......دارو...........فترة يمكن ساعتين لاننا روحنا وحدة الطوارئ.......ودا طبعا اثر علي برنامج الرحلة ويومها قضيناها سوق وبس..........كنا نازلين في فندق سته اكتوبر وكان برضه كويس والغرف معقوله(عموما انا اصلا كان معايا ملايه واكياس مخدة حركات من دي ..احتياطي يعني)

واجمل حاجه ان السوق كان ورانا والكورنيش والمرسي قدامنا...........للاسف بسبب العطله ماروحناش احد المعابد يمكن....ابو سمبل تقريبا علي ما اتذكر.................لكن السوق كان ممتع فعلا والباعه كلهم كانوا ودودين جدا .......ولطاف اوي والله...............واشترينا كل حاجه حتي الملوحة اللي كان عمري ما دوقتها لكن ازاي نبقي في اسوان وما نجبش ملوحة؟؟؟؟؟؟

نيل اسوان من اجمل ما يكون ومنتهي الابدع بجد .....ماشاء الله........ما كوناش عايزين نطلع من المركب خالص والله ........وكانوا هيودونا جزيرة تانيه قالوا اننا هنشوف فيها الحياة والبيوت النوبيه والحنه والاغاني النوبيه بس البرنامج للاسف اتلخبط نتيجه للفترة اللي اتعطلناها في الطريق اللي هو اصلا تلات ساعات :blink:

جزيرة النباتات تحفه بجد وصورة النخله اللي انتي حطاها يا بدورة المتقابلين عند قاعدتهم اتصورت عندها مع انتيمتي اللي كانت معايا في الرحله.. wst:: .........اما المقبرة اللي صورتيها دي .......للاسف محدش خلانا ندخل بالكاميرات وكان باقي ياخدوا الموبايلات كمان...عشان ما نصورش خالص وبصراحه ما صورناش ...........بس كانت مبهرة زي ما يكونوا لسه ملونينها امبارح.

كمان التمثالين اليتامي دول لفتوا نظرنا برضه .........وسألنا هما لوحدهم ليه؟

النصب التذكاري دا كل الكليه او الرحله يعني اتصورت عنده صورة جماعيه .....................بس والله يا بدورة استمتعت بوصفك اوي اوي اوي وقمت اتفرجت تاني علي الصور لان عندي من الرحله حوالي خمس افلام...................

نيتي بأذن الله تكرار الرحله بس عن طريق النيل ........حساها هتكون اجمل كتير ودلوقتي كمان دكتور حسام والمهندسه هبه حلوها والحمد لله ......يعني اي معلومات مش هنحتار ابدا.........تحياتي لاهل اسوان الكرام.........وليكي يا بدورة علي الرحله الرائعه wst::

تم تعديل 15 أبريل 2008 بواسطة galaxy

[badroora]

الاخ العزيز حسام شكرا على والله انت بتعطينى اكث مما استحق ,,,,,,,يا رب اكون دايما عند حسن ظنك وظن الاخرين

بوركت wst::

جلاكسي ايه الجمال دا والله انت كمان بتجكى كويس بس اختصرتى الرحلة بتاعتك وكروتينا

ابقي شوفلنا بقي صور حلوة كدا وضفيها عشان نشوف عدستك ولا عدستى

خدى دي