"حين ميسرة"

[shawshank]

شاهدت مؤخرًا فيلم "حين ميسرة" ، وتلك بعض ملاحظاتي على الفيلم ...

• تقييمي الشخصي للفيلم 7 من 10 .
  
• الفيلم محاولة من المخرج خالد يوسف للوصول بالشفافية في تناول الواقع الاجتماعي إلى درجة أعلى مما كانت عليه في السينما قبل "حين ميسرة" .
  
• أهم ما يعيب الفيلم اهتمامه برصد واقع اجتماعي على حساب الدراما والحبكة . وقد تسبب هذا في جعل الفيلم يقترب من الفيلم التسجيلي الاجتماعي أكثر من العمل الدرامي . لكن عمومًا أشعر أن الأعمال السينمائية مؤخرًا يتم "سلقها" ، فلا تأخذ القدر الكافي من الإعداد . لكن "حين ميسرة" أقل كثيرًا "سلقًا" من غيره .
  
• أهم ما يميز الفيلم اقترابه الشديد من الواقع ، ربما بشكل غير مسبوق . خصوصًا اقترابه من البيئة العشوائية بكل تفاصيلها من لهجة وعادات وأماكن معيشة وثقافة ... الخ . التصريح بمشاهد جريئة وألفاظ خارجة اقتراب من الواقع ، لكنه أيضًا خروج عما اعتاده المشاهدون وجرح للكثيرين منهم . وهناك دائمًا جدل حول : إلى أي مدى يجب أن تعكس السينما الواقع ؟ وهناك أيضًا جدل حول أي نقطة يجب أن تقف عندها الدراما بين التلميح والتصريح . ومؤخرًا تتحرك هذه النقطة نحو الأخير . وقد قطع "حين ميسرة" شوطًا في هذا التحرك .
  
• يرسل الفيلم الرسالة الآتية : "لا توجد داخل العشوائيات أي بارقة نور" . ولا أعلم إن كان هذا حقًا هو الواقع . حتى إن كان ذلك كذلك ، لم يقدم الفيلم بارقة حل لهذا الظلام .
  
• أشعر أنه كان ممكنًا جعل "العشوائية" كلمة السر في الفيلم بشكل أكبر وأوضح ، لكن ليس وضوحًا كبيرًا لا يتطلب إعمال الفكر .
  
• أسجل هنا بعض ما علق في ذهني من مشاهد وجمل حوارية في الفيلم :
  
  1. "الحكومة معندهاش كرامة" . قالها ضابط شرطة لضابط آخر أقل منه رتبة . ثم استدرك : "الحكومة عندها هيبة" :wub:
     
  2. "احنا مش باينين ... دانا كنت مغفل إني كان نفسي أجيب عيال ، يعني أجيب عيال يدخلوا الدنيا ويخرجوا منها وهم مش باينين؟" . قالها "فتحي" ، أحد سكان العشوائيات ، للبطل "عادل حشيشة" ، زميله في العشوائيات .
     
  3. "ابقى سلم لي على حكومتك" . قالها البطل ممسكًا مسدس ضابط شرطة يهدده به والضابط يتوسل له ليتركه . وذلك بعد أن ارتبط البطل بتنظيم إرهابي ، رغم أنفه ورغم غياب أي ايدلوجية عنده تدفعه لذلك ، إلا القهر ونسيان المجتمع و"الحكومة" له ولمجتمعه العشوائي .
     
  4. مشهد اغتصاب البطلة يتم قطعه بمشاهد سقوط و"اغتصاب" بغداد .
     
  5. مشهد الختام يجسد العشوائية : أسرة مكونة من أب وأم داخل قطار اسكندرية وابنهما على سطح نفس القطار (مع "زوجته" وابنهما) ولا يعلم أي منهم بوجود الآخر . (يحسب للفيلم في ذلك ايثاره للواقعية على النهاية السعيدة ، لكنه على الجانب الآخر يميل مبتعدًا عن الدراما والحبكة.)
     

  [*]الأداء التمثيلي لكن من بطلي الفيلم سمية الخشاب وعمرو سعد أقل من أداء زملائهم هالة فاخر وسوسن بدر وأحمد بدير ووفاء عامر وأحمد سعيد عبد الغني و"فتحي" .

  [*]رغم مرور السنين ، لا يظهر أثر ذلك على البطلين : ناهد وعادل .

  [*]أغنية المقدمة جميلة .

[~Heba~]

هو الحين مدعرة ده اقترب من الواقع!!!!!!!!!!!!!!!!!!!!

طيب صلح فيه حاجة :wub:

[Ghost]

الحال بصراحة في مصر مش للدرجة ديه على الاطلاق

لا يمكن ان يكون المجتمع كله بلا ضمير او صلاح او ذره من الخير

انا هنا بقول مصر مش العشوائيات و التي عليها محور الفلم

صور المخرج البلد و كانها عباره عن لصوص و ارهابين و سحاقين

الراجل الكمسري الذي اخذ العيل و باعة

و العائله التي اشترت العيل و كان شيئا عاديا ثم استغنت عنه بكل لاانسانيه بعد ما حملت الزوجة

رجال الاعمال بتوع الرقصات و الليالي الحمراء ...عمري ما شوفت واحد بيمضى على عقد بالملاين علشان رقصه ...ازاي

الشباب المدمن و الشباب الضايع بتاع الخمره و لعب القمار

شقق الدعاره للطبقة الراقيه ...و السحااااااااااااااااااااااق ..؟؟ له ... نسبته اد ايه في مصر علشان واحد سافل زي المخرج ده يعملها في فلم

خلاص ما فيش خير في المجتمع

صدق رسول الله صلى الله و عليه وسلم : من قال هلك الناس فهو اهلكهم

العشوائيات و التي منها تخرج اناس كثيرون افاضل و اصحاب مناصب فيها كل الموبقات

الارهاب و المخدرات و الدعاره

يعني كل اللي في العشوائيات و هم كام مليون ... عاملين كده

و بعدين ايه الشتيمه اللي في الفلم ديه كلها

اه في اسخم منها في الشارع

بس انا لو قاعد بتفرج جنب امي و لا اختي و لا اي حد في العيله

ده هيجرح احساسي ...كمشاهد لم يحترمه المخرج المحترم

لا

و الالفاظ اللي الستات بقولها لبعض لما يتخانقوا

و لا لما يجوا يتكلموا على الرجاله

اه ده

انا مش عاوز انقلها حياءا

و مشاهد قذره - سبكم من حته السحاق ديه ..... خفيفيه على اللي كان بين الواد و البيت...

لا بقى

لو عاوز فلم يصور حال البلد بجد و بدرجة كبيره من الحقيقة

شوف هي فوضى

و سلام لاحسن انا محروق دمي

[shawshank]

لا بقى

لو عاوز فلم يصور حال البلد بجد و بدرجة كبيره من الحقيقة

شوف هي فوضى

حاضر ، هشوفه إن شاء الله . وإن كان ناصر عبد الرحمن هو سينارست الفيلمين . وشارك خالد يوسف - مخرج "حين ميسرة" - في إخراج "هي فوضى" مع يوسف شاهين .

تم تعديل 13 أبريل 2008 بواسطة shawshank

[Ghost]

وشارك خالد يوسف - مخرج "حين ميسرة" - في إخراج "هي فوضى" مع يوسف شاهين .

اه بس في المره ديه كان الصبي بتاع يوسف شاهين مش المعلم

تاني حاجة ان الفلم ده كان عاوز يعمل فيها زي يوسف شاهين و يطلع فلم ما حصلش

غيران بقى

بس الموضوع خرج منه

و ربنا ليهديهم او يخدهم هما الاثنين في يوم واحد

[مهيب]

أحيى الفاضل شاوشانك على النقد و النظرة الموضوعية ..

أنا شخصيا شاهدت الفيلم و لم يعجبنى تماما .. لكن نظرة النقد الهدف منها ذكر ما له و ما عليه يا أخ جوست .. نظرية (ايه القرف ده) فى النقد ليست من النظريات المحببة .. فقط شاوشانك ينقده كفيلم و ليس كعضو فى منظمة الحازم لفقأ أعين مخرجى الأفلام.

مهيب

[se_ Elsyed]

أنا عجبني الفيلم جداً لإنه لمس وتر حساس بالمجتمع وهو العشوائيات ... واللي بصراحة لم أكن أعرف عنها الكثير وبالأمس شاهدت برنامج " يبقى أنت أكيد في مصر " على الأو تي في .. وجاب حاجات عن المساكن اللي في المقابر وفعلاً شيء مؤلم ..

لكن ما لم يُعجبني هو المشاهد الفجه الصريحة ... والتي لو إتحذفت فلن تؤثر على نسيج الفيلم .. تماماً زي المشاهد العبيطة اللي كانت في عمارة يعقوبيان عن الشذوذ الجنسي ...

إستنى يا مهيب قبل ما تشن هجمة عكسية عليه

عارف التساهل ده أدى إلى ماذا يا عزيزي الفنان ؟

أدى إلى إن خالد يوسف بيصور فيلم دلوقت برضوا مع سُميه الخشاب وخالد صالح وهاني سلامه ... أقسم بالله أنا لما قرات أمبارح إعتراض بعض الفنانين المشتركين في الفيلم على مشاهد تم وصفها حركياً وكلامياً .. صُعقت .. وقلت " البورنو قرب يا ولاد وكل شيء هاينكشفن وهايبان "

ببساطة فكرة الفيلم الرئيسية بتدور حول العلاقات الشاذة .. رجاله ورجالة .. وستات مع ستات ...

وسلم لي عالفن الجميل ... وكإن ام الأفكار اللي في الدنيا خلصت وما بقاش ورانا غير خالد يوسف والأفكار المهببة دي ..

[Ghost]

مهيب

انا بتكلم على الفلم كمشاهد من الناس العاديه جدا و ليس كناقد فني

بس ده الفرق و الاثنين بيكملوا بعض

لكن المشاهد اعتقد ان له الغلبه لانه هو الحاكم الاخير على نجاح و سقوط الفلم

شكرا

[مهيب]

س س .. بالعكس .. أنا شايف اننا متفقين جدا .. على فكرة أنا لا حب خالد يوسف و لا أسلوب طرحه .. ولا حتى طريقة دفاعه عن أسلوبه .. و أنا من كارهى فيلم حين ميسرة جدا .. لكن بس أنا كنت باتكلم عن فكرة النقد .. عجبنى أسلوب شاوشانك فى النقد ليس الا ..

جوست .. فعلا ايضاحك فى محله .. بس أحيانا بيختلط عليا الأمر ما بين الكلام العفوى و الرأى .. اعذرنى .. لكن طبعا حديثك كمشاهد واضح و بصراحة أكتر أنا معاك .. بس كل الحكاية أنا كنت معترض على أسلوب النقد .. س س نقد برضه الفيلم بشكل جاد .. و ذكر اللى عجبه و اللى كرهه فى الفيلم ..

أعجبنى كلام شاوشانك عن :

وهناك دائمًا جدل حول : إلى أي مدى يجب أن تعكس السينما الواقع ؟ وهناك أيضًا جدل حول أي نقطة يجب أن تقف عندها الدراما بين التلميح والتصريح . ومؤخرًا تتحرك هذه النقطة نحو الأخير . وقد قطع "حين ميسرة" شوطًا في هذا التحرك .

وهى نقطة مهمة .. لأن التشدق بالواقعية و تصويرها أصبح باب خلفى لتلويث أعين المشاهد بمشاهد قد تكون صارخة فى الاباحية أحيانا أو المأساوية أحيانا أخرى بشكل منفر .. و يجب وضع حدود لمسألة تجسيد الواقع و الا على رأى س س الموضوع هيقلب ببورنو عن قريب ان مكانش بالفعل ده حصل .. و أنا متأكد ان خالد يوسف نفسه كان من الممكن انه يطلع فى أفلامه الشتائم النابية المتداولة بشكل محموم فى الشارع المصرى الآن من باب الواقعية لولا الرقابة .

مهيب

[om marawan]

أقسى ما قرأت من نقد لهذا الفيلم ان يظن البعض ان العشوائيات بهذه الصورة غير موجودة فى الحقيقة

فهذا النقد لا يمس الفيلم بشىء بل يمس المهمشين من سكان العشش وان كنت لا ستطيع تسميتها بالمساكن فهى لا سكن فيها

يمسهم حين نرى انهم لا وجود لهم او ان واقعهم ليس بهذه القسوة لأنها أقسى

كما ان الفيلم لم يطرح واقع المجتمع فى مصر بل طرح واقع شريحة محددة منها وهل هناك مكان لتجار المخدرات مثلا او الارهابيين او غيرهم ليختبئوا فيه افضل من مكان لا يراه المجتمع بأسره

انه نوع من الواقع الفج ربما لم يطرح فى الفيلم الحل له لانه ترك الحل بايدينا فهل نظل نغمض أعيننا وننكر مايعيشه هؤلاء الناس ليل نهار من حياتهم

نستطيع ان نهاجم المخرج والممثلين بل وطاقم العمل بأسره ولكن لا يمكننا ان ندفن رؤوسنا فى الرمال

أستاذى الفاضل جوست .......... عندك حق ...مصر مش العشوائيات لكن العشوائيات دى موجودة فى مصر ومش عشرات او مئات الأسر بل ألوف

وانا هنا مش باهاجم الفيلم او أأيده

انا بس باقول ان الناس دى موجودة ممكن مش بنفس النماذج لكن بنفس ظروف المعيشة

[~Heba~]

الشباب دلوقتى مش بيعمل حاجة غير انه يقلد

تجسيد اخلاق العشوائيات فى افلام معناته نقلها لوسط البلد و من ثم البلد كلها

[om marawan]

الشباب دلوقتى مش بيعمل حاجة غير انه يقلد

تجسيد اخلاق العشوائيات فى افلام معناته نقلها لوسط البلد و من ثم البلد كلها

معاكى حق جدا فى موضوع ان الشباب بيقلد لكن احنا نقصد ايه لما نقول أخلاق العشوائيات ةلأن المفروض انها معاناة العشوائيات مش اخلاقها

يعنى بعيد عن المواقف الخارجة و الاباحة خلينا ناخد نموذج زى هالة فاخر اللى رفضت حتى الافات عشان مش عاوزة فلوس حرام او وفاء عامر اللى عايشة برغم القهر لكن مش عاوزة تجرح جوزها

انا مش بافند شخصيات الفيلم لكن حتى الشخصيات اللى انحرفت زى شخصية سمية مثلا فليه سيبنا معاناة الشخصية ومرمطرتها بالعربى طول الاحداث ومسكنا بس فى انحرافها فى اخر الفيلم

بالعكس الفيلم جاب نماذج منحلة من خارج العشوائيات اكتر من اللى داخلها

اللى عاوزة اقوله خلينا نخرج من انتقاد اسلوب طرح الفيلم ونبص اكتر للناس اللى أشار ليهم اللى موجودين حوالينا فى كل مكاااااااان وبنعدى عليهم من غير مانبص ولا نلتفت او نقف نفكر هم عايشين ازاى

المخرج أخطأ بادراج مواقف أساءت للمعنى اللى كان مفروض يوصل بس بلاش نغلط احنا كمان ونحصر الفيلم فى المشاهد اللى معترضين عليها ونهمل مشكلة ناس المفروض انهم اهل بلدنا

مشكلة الاعلام مشكلة كبيرة ومحتاجة لوحدها عدة أفلام

لكن انا كان كل تعليقى على الشريحة اللى وصلنا اننا نقول عنها لأ دى مش موجودة ومش للدرجادى

الحقيقة انها اكتر من الدرجادى واللى مش مصدق ينزل يشوف بعينه ان فيه ناس فقيرة لدرجة اننا مش شايفنهم

عشوائيات يعنى لا مية نضيفة ولا أكل ولا تعليم ولا احترام من اى حد وخلينى أسأل بس كام واحد فينا عدا على أطفال بتشم كلة فى الشارع وبصيلهم من غير مايشوفهم ولا يفكر وراهم ايه

وعملنا عشانهم ايه ؟؟؟؟؟؟ انا سمعت تعليق متكرر على الفيلم من صديقات انهم ماكانوش متخيلين ان الوضع بالسوء ده لأننا طول عمرنا نسمع كلمة عشوائيات وخلاص

وزمان لما كنت اروح اسكندرية بالقطر كنت اشوف قبل المحطة ناس واطفال عايشين فى عشش صفيح بكل معنى الكلمة تخيلى عايشين على شريط القطر فى عشة أسوأ من اللى كانت فى الفيلم بمراحل

وسمعت مؤخرا ان المحافظ المحجوب خصص لهم مساكن بس اللى زيهم الافات فى مصر كلها

باكرر تانى فيه خطأ فى اسلوب الطرح لكن يمكن يكون سبب فى الناس تبتدى تتلفت وتشوف فى يوم عيلة او حتى طفل تهتم بيه ويمكن بعد عشرين سنة تانيين العيلات دى ترجع يادوب عشرين تلاتين عيلة زى ماكانوا من عشرين سنة

[~Heba~]

يا حبيبتى ام مروان صدقينى يبقى نضحك على نفسنا لو صدقنا ان اللى عملوا الفيلم ده همهم فعلا الناس اللى عايشين فى العشوائيات و عايزين يصلحوا حالهم

طب قوليلى حيصلحوا حالهم ازاى.... حيبنوا لهم بيوت و يوصلوا لهم مية بإيرادات الفيلم

الافلام السينما دلوقتى همها كله تجارى بحت و ستين بحت كمان و الاسطوانة المشروخة بتاعت اصلاح عيوب المجتمع ما هى الا ستار يقدروا من وراه وضع ما يشاءوا من مشاهد مخلة بالاداب تحت دعوى ان هو دا اللى حاصل فى المجتمع و احنا عايزين نغيره

طيب سؤال معلش

الفيلم فى نهايته اقترح حلول ولو بشكل غير مباشر؟؟؟

[لونا]

انا لن اعلق على الاكتئاب الذى اصابنى بعد مشاهدة الفيلم ولكن تعليقى على كمية السباب التى تؤذى الاذان انا اعلم ان هذا السباب موجودفىالشارع لكنى لااذهب انا وزوجى واولادى وناخذ كراسى ونجلس فى الشارع لكى نشاهد هذه المناظر المنفرة ونسمع هذه الشتائم فهذه اللغة جارحة لمعظم الاسر المصرية وليس معنى وجودها انى لازم اسمعها انا واسرتى وتيجى لغاية عندى وكذلك بالنسبة للمشاهد الخارجة قد تكون موجودة فى مناطق معينة و فى قنوات بعينها ولكنى لاارغب فى مشاهدتها

النقطة الثانية الفيلم لم يعرض لاى شخصية ايجابية توحد ربنا يعنى المناطق العشوائية مفيش فيها اى شخص متدين{مش متطرف} او واحد متعلم او واحد الدنيا نصفته باى طر يقة مش ممكن كل بيئة ولازم يكون فيها نصف الكوب المليان والا المفروض نعمل ايه فى هذه العشوائيات نحاول نصلح فيها ولا نكتفى باهمالها على اساس ان ما فيش فايدة .

[om marawan]

يا حبيبتى ام مروان صدقينى يبقى نضحك على نفسنا لو صدقنا ان اللى عملوا الفيلم ده همهم فعلا الناس اللى عايشين فى العشوائيات و عايزين يصلحوا حالهم

طب قوليلى حيصلحوا حالهم ازاى.... حيبنوا لهم بيوت و يوصلوا لهم مية بإيرادات الفيلم

الافلام السينما دلوقتى همها كله تجارى بحت و ستين بحت كمان و الاسطوانة المشروخة بتاعت اصلاح عيوب المجتمع ما هى الا ستار يقدروا من وراه وضع ما يشاءوا من مشاهد مخلة بالاداب تحت دعوى ان هو دا اللى حاصل فى المجتمع و احنا عايزين نغيره

طيب سؤال معلش

الفيلم فى نهايته اقترح حلول ولو بشكل غير مباشر؟؟؟

احنا والله ياباشمهنس متفقين جدا على رأينا فى الفيلم وانا بس باعلق والله على موضوع ان فيه ناس مش متخيلة ان حال الناس فى العشوائيات بالسوء ده

انا اقصد يعنى مستوى المعيشة طبعا او بمعنى اصح ادمية المعيشة

طبعا الفيلم ماعرضش اى حلول

والحلول اصلا مش سهلة ابدا ولا غرض الفيلم هو اصلاح حال الناس

وفيه افلام كتير فى السينما أسوأ من كده بمراحل وبتعرض الانحلال بدون مناسبة وزى ماقلت حال الاعلام فى مصر عاوز صفحات وصفحات

والانحلال وصل المسلسلات اللى بتدخل بيوتنا بالعافية

فى النهاية ...أرجع وأقول انا ماباتكلمش على الفيلم

انا باتكلم على التعليق اللى قال ان مصر مش كده وان الحاجات دى مش فى مصر ....لأن ده مش صحيح

[badroora]

رؤيتى .........للفيلم

شاهدت مساء امس فيلم ( حين ميسرة) فيلم مؤلم جدا بكيت من بداية الفيلم الى اخره دون مبالغة

واكثر شيء ألمنى هو التناقض بين المشاهدين .

انا كمصرية قلبي وجعنى اوى على مصر وعلى حال الناس القانطين فى المناطق العشوائية وظروفهم الصعبة وقد ايه الحياة بتلطش فيهم .

صديقتى رغم انها ليست مصرية ولكن دموعها وبكائها لم يقل عنى بل احسست انها مصرية تتألم مما يتألم منه المصريين وكأنها عايشة وسطهم.

وعلى النقيض الاخر

قهقهة اهل الخليج على مشاهد مؤلمة وكأنهم لا يعانون من نفس المأساة او ليس لديهم مناطق عشوائية وأناس مستواهم تحت خط الفقر.

ولكن طالما القضية خارج وطنهم فلا بأس من الضحك والقهقهة على حال المصريين وظروفهم الصعبة .

قصة الفيلم .......تتلخص فى الاتى ...

فقر .........جهل .........ضياع .........خراب ..........دمار .... ارهاب.........سوء استخدام سلطة .....حكومة بلا كرامة

...والمقابل .......حب ........تماسك.........اصالة .........شهامة............الحكومة هيبة .

أتت فتاة (سمية الخشاب ) وكان اسمها ناهد الى القاهرة هاربة من زوج امها الذي بدأ ينظر اليها نظرة غير ابوية ولم تعد تتحمل ذلك فهربت منه .

بدأ المشهد وهى تصرخ لانها ركبت العربية مع شخص لانها لم تمتلك اى نقود لاخذ تاكسي او مواصلات عامة .

وكانت تصرخ لان الذي توهمت انه شهم وهيساعدها كان يحاول الاعتداء عليها , استنجدت ب عادل الشهير بحشيشة ( عمرو سعد )

وخلصها منه وركبت معه وبعد ذلك طارده الرجل الذي ركبت معه ناهد فى الاول وادى الى سقوطة فى النيل ودخل حشيشة السجن 6 شهور .

وعاشت ناهد مع ام حشيشة ( هالة فاخر ) فى منزلها لمدة 6 شهور حتى خرج عادل من السجن

وبعد ذلك قررت الام ان تبعد ناهد عن المنزل حفاظا عليها فى ظل وجود ابنها البالغ.

ولكن ....ناهد لم تذهب لانها ليس لديها اى مكان اخر تقيم فيه .....سوى منزل عادل المكون من غرفه واحدة فقط يسكن فيه امه و8 اطفال او اكثر .

وحدث ما لا كانت توده ام حشيشة وكانت بصدده تود رحيل ناهد من المنزل .............وانتهى الامر بحمل ناهد من حشيشة

ورفض ان يقبلها زوجه هى وابنها نظرا لظروفه المادية الصعبة .

اضطرت ناهد الى العودة الى منزل والدتها وزوجها الغير محترم .....الى ان وضعت جنينها ولم تترحم من لسان امها وزوج امها.

ذهبت الى عادل مرة اخرى ولكنه آبا ان يقبلها زوجه هى وابنها ........اثناء عودتها الى منزل والدتها تركت ابنها فى الاتوبيس لتتخلص منه.

وذهبت الى امها مرة اخرى ولكن حدث مشاكل تانى مع امها وزوجها.

ذهبت ناهد الى محطة الاتوبيس وسالت على ابنها الذى اخذه الكمسرى واعطاه لاسرة ثرية كانت ليس لديها اطفال انذاك.

وظل الزمن يلطش فى ناهد من ناحية الى ان ادى بها الامر الى راقصة فى كبارية ...........

هالة فاخر ........جسدت دور الام ببراعة انا لو على اديها جايزة كبرى على دورها فعلا فظيع لم اصدق هالة فاخر الفنانة

الكوميدية خفيفة الظل التى تضحكنى من قلبي فى افلامها انها هى نفسها هالة فاخر ام رضا.التى ابكتنى من اعماق قلبي .

ام صبورة .....ترعى ابناء ابنها الغائب فى العراق .......وبنات ابنتها التى قتلها زوجها .......هالة فاخر كانت رائعة .

وفاء عامر .........من اجمل الادوار التى شاهدتها لوفاء عامر ......زوجة تبان فى بداية الفيلم سليطة اللسان مستقوية على زوجها ابراهيم .

ولكنها بعد ذلك ظهر معدنها الاصيل .......زوجها كان عقيم وهى كانت بتخلف من زوجها السابق ومع ذلك تزوج عليها زوجها ظنا انها هى التى لم تنجب .

ولم تجرحه باى كلمة على رغم انه اهانها كثير ........وحتى زوجته الثانية كانت رائعه عندما هددهم انه سيتزوج عليهم زوجه ثالثة لينجب طفل .

ورغم انها تعلم ان العيب منه ولكنها لم تتفوه بكلمة تجرحه بها ......الا ان ادرك ان العيب منه وخيرهم

بين البقاء معه او الذهاب .....ولكنهم رفضوا الطلاق وفضلوا البقاء مع زوج عقيم رغم قلة اصلة .

ابراهيم ........معرفش اسمه الحققي ايه ...كنت حاسة انه بيحاول يقلد محمد سعد فى طريقة نطقه

الخاطيء للالفاظ زى اللمبي بالظبط .

بس كان ليه جملة ظريفة عجبتنى ويمكن دى الوحيدة اللى ضحكتنى .( كان بيعاكس جارتهم ويقولها يا روح الروح ) ايه بقي

روح الروح دى معرفش .

عمرو سعد ......او عادل ......او حشيشة ........الولد دا مستقبله هايل وامامة مستقبل كبير لو تعامل مع مخرج محترم يعرف يستخدم امكانياته صح .

عادل ........ولد صايع .........مؤدب ..........حنين............متحمل اسرة واطفال اخواته........شايل هموم فى قلبه .

من اكثر المشاهد التى ابكتنى بحرقه فى الفيلم له هو الاتى.

المشهد الاول .........لما االدنيا ضاقت به ذهب الى تاجر مخدرات لكى يعمل معه .. واعطاة حتة حشيشة يبعها ولكنه شربها مع اصحابة

ارسل المعلم صبيانة لاخذ النقود ......ولكن عادل كان ليس لدية اى فلوس .....واوهم الصبيان ان لدية نقود فى المنزل

واستاذنهم ليحضرها ... ذهب ولم يجد امامه غير غوايش امه اللى شيلاهم لجنازتها ......المشهد دا يقطع القلب بجد

ام تبكي لاغتصاب ابنها غوايشها .......وابن يبكي انه يفعل ذلك بامه مضطر .......ومنظر الدموع فى عين الام والابن

تبكي اى حد لو حتى دموعه عزيزة . الرائع هنا هو اننا اعتدنا على رؤية دموع عادية فى الافلام او المسلسلات .....لكن اول مرة اشوف

دمعة بتتولد .....انقباض الاوعية الدموية للعين ... واحمرارها .....ونزل الدمعة .. لم اصدق انها تمثيل ابدا

ودا اكتر شيء عجبنى فى الفيلم .....هو خلق دموع مش تصنيع دموع .بجلسرين او خلافة .

أيمن .....بن ناهد وعمرو ....نربي فى اسرة ميسورة الحال الى سن تقريبا 6 سنوات .. ثم آبا رب الاسرة على استضافته مبررا

ان امراته اصبحت حامل فلا داعى لو جود بن بالبتبنى ........ولحظة خروج ايمن من المنزل الذي ظن انه منزل ابوية

ودموع امه بالتبنى كانت فعلا مشهد يعور القلب ويبكي العين ...........

ذهب ايمن الى منزل اخر .......حيث العنصرية بين الابناء .........فهرب وانضم الى اولاد الشوارع القانطين على شط النيل

وتحت الكبارى ........اطفال ابرياء مشردين لا ولى ولا رقيب ولا اى حاجة

نتج عن ذلك حمل طفلة من ايمن الطفل ......وولادته بطريقة بشعة على شط النيل .......

وتكرر نفس الماساة .....طفل اب لطفل .!!!

الحكومة .......مالهاش كرامة .....كما وصفها اكبر رتبة فى الداخلية ........والحكومة هيبة ... مش كرامة

تعذيب فى السجون بدون حق

اقتحام بيوت الناس فى منتصف الليل دون اعتبار لاى حرمة المنزل او حتى اطفال ابرياء يستيقظون على صوت البوليس واقتحامه لمنزلهم .

دور البوليس ......كان فعلا فظ سوء استخدام سلطة واعطاء لانفسم صلاحيات وضع الناس فى السجن زور وتلفيق قضايا

وتعذيب كبار السن والبريء من الناس .!!

الارهاب ......دور الارهاب فى الفبلم ...لم يلفت نظرى كثير ا ......لانه ناتج من سيناريو الحياة البائسة

فقر .............. جهل .............مرض .........بالطبع سيكون الناتج ..........مدمنين .......ارهاب .........زنا

......تشرد........الخ

نقط ضعف الفيلم ...

هو الاطفال .....بدؤا اطفال فى الفيلم وحتى بعد مرور 12 سنه هما هما نفس الاطفال ... او الكبر مكنش

بالمعدل المتوافق مع الزمن الفعلى .

ناهد .........و عمرو ......ابنهم كبر واصبح اب وهما لسه بصورتهم زى مابدؤ بها الفيلم .

يعنى مخرج عبقري زى خالد يوسف مش عرفه عديت عليه ازاى النقطة دي .......يعنى عجبنى اوى ..

خلق الدموع ودى تعتبر اصعبهم .لكنه فاتت عليه موضوع السن دا.

النهاية طبعا مؤلمة ........هو القضاء على العشش والناس بداخلها . !!!

من الاخر روحت سينيما عشان انبسط واغير مودى .........رجعت حزينة وقلبي مهموم .......وكان نفسي

اصدق ان دا وهم مجرد دراما.

ولكن لاسف .......انا شاهدت وتعاملت مع أناس مثلهم فى الحياة وكانت ايام سودة بجد.

عندنا فى الكلية فى رابعة .......مادة اسمها community health ) صحة المجتمع .......وكان لينا 4 شهور تدريب فى مناطق عشوائية .

معظمها كانت بيوت فى المقابر .....تخيل طفل يصحى من النوم يرى امامه مقبرة ولا واحد بيندفن ........يااااااااااه صعب صعب.

9 افراد اسرة مقيمين فى بيت عبارة عن حجرة فيها كل حاجة .......مطبخ .....نوم ........وحمام صغير فى مدخل الباب

بجد جالى اكتئاب وكنت استغرب ان وقتها كنت احلم انى اجيب عربية وناس تانية تحلم حتى ......بسرير بمرتبة عدلة يعرفوا يناموا عليه.

مش هاقول غرفه خاصة مش هتكلم عن خصوصية الاب والام مش هتكلم عن خصوصية الابناء مش هتكلم عن خصوصية البنات.

كنت حاسة ان الظلم واقع على الجميع .........حضرت موقف ..فى منزل وكان احد افراد الاسرة التى كنت مسئولة عنهم حاب يغير ملابسه ولم يجد مكان يغير فيه .

نظر ا لوجودى غريبة بينهم .....استأذنت وخرجت خارج المنزل الى ان غير ملابسه وكنت باقول يعنى

البنات لو حبت تغير هدومها ولا تعمل اى حاجة هتروح فين فى ظل وجود الاب واخوانها.!!

بجد مأساة ......اسرة اخرى ....ابنها 10 سنوات مدمن .!!! طيب يا بنى انت الى بيدمن

دا عاوز يهرب من مشاكل الحياة انت بن 10 سنوات عندك ايه تهرب منه.

كنت وقتها مفكرة نفسي باتكلم مع طفل المفروض كل همه اللعب واللهو مش طفل بيتحمل مسئولية اسرته بعد وفات ابيه.

تتكلم مع طفل عنده 10 سنوات كأنه شاب فى الثلاثينات .....شايل الهم وعارف الاسعار والتموين والمشاكل .....

قولت فى نفسي معندوش اى سبب يمنعه من الادمان ......طالما طفل لا يتستمتع بطفولته وتحمل المسئولية فى هذا السن

وشال الهم بدرى ........

لدى .......اكثر من سؤال ........

من المسئول عن العشوائيات ؟

ما دور الصحة والحكومة فى القضاء على العشوائيات كمساكن وليست كأشخاص .؟

اين الجمعيات الحيرية وحماية حقوق الانسان ؟

هل سكان العشوائيات ........ينتمون للمنظمة المباركية المتحدة؟

اسئلة كثيرة تدور فى خاطرى ........ولكنى من مرراة حلقي ....والقهر .....لا اود ان اكتب اكثر من ذلك ........

لكى الله يا مصر ..........ويا ساكنى عشوائيات مصر.!!!

[se_ Elsyed]

يا بدريه كل بلد فيها وفيها

أكبر دولة بترولية في الخليج اللي هي السعودية .. فيها عشوائيات وعشش صفيح والملك عبد الله أيام ما كان ولي عهد راح زار العشش دي وشاف حال الناس اللي عايشين تحت الأرض ...

ده رداً على اللي كانوا بيقهقهوا من مناظر العشوائيات من الناس اللي عندك ...

فرق كبير جداً أن ندفن أنفسنا في الرمال ..

وبين ان نُسلط الضوء على مشاكلنا وننبه الناس بوجود تلك البؤر الخطرة ..

من شهر كده شاهدت تحقيق تليفزيوني عن كثير من القرى على الحدود اللبنانية السورية بتصل إن أهلها يكادوا يشربون ماء الصرف الصحي ... عشش صفيح ... لا تعليم ... لا خدمات ... يمكن عايشين وراء الزمن ...

[abaomar]

السلام عليكم

الاخوه الكرام جزاكم الله خيرا

هذا الفيلم حين مسخره انعكاس حقيقى واقعى لحال المجتمع المصرى حاليا ليس فى تفاصيله لان الواقع و ان كان يحمل بعض الملامح السيئه الا انه هناك جانب مضئ غفل عنه هذا الفيلم المسخره الا و هو ملايين الصابرين الكادحين الذين يمكن رؤيتهم عند شروق الشمس خارجين من تلك العشوائيات الى اعمالهم فى كل ناحيه و اتجاه .

هناك بالتاكيد جوانب سلبيه لا تخفى عن العيان و لكن الا يوجد طريقه اخرى للحديث عنها غير تلك الطريقه القبيحه السافله التى تناست اننا ما زلنا فى مجتمع سمه عربى شرقى اسلامى او ما شئت لا زال هناك مفاهيم تحتم على من يتناول القضايا الالتزام بحد ادنى من الادب و الحياء و لنا مثلا فى القران قصه يوسف و كيف تم تناول قضيه غوايه امراه بهذا الشكل المحترم.

بالطبع انا لا اقصد المثاليه و لكن بالتاكيد هناك طرق اخرى اكثر احتراما للتعبير عن المشاكل غير تلك البجاحه و اذكر مثلا انه فى الافلام القديمه اذا اراد المخرج التعبير عن علاقه اثمه بين رجل و امراه كان يجيب الكادر و هما داخلين الغرفه و الباب يُغلق عليهم و للمشاهد ان يتخيل اما الان بيجيبهم عريانين ملط فى السرير مع مؤثرات صوتيه .

يعنى ما ينفعش علشان اعبر عن مشاكل المجتمع الجنسيه غير انى اجيب اتنين ستات عريانين وواحده فيهم بتتحرش بالاخرى و الالفاظ المذكوره غايه فى السفاله و لماذا وضع تلك الصوره بالذات فى الاعلان عن الفيلم .

ايضا انا قصدت انها تعكس المجتمع فى ان اليوم صار هناك تجرؤ على عرض القضايا بكل بجاحه و قله حياء كما هو حال الشارع الذى يفتقد تلك المفاهيم اليوم ( العيب و الحياء و الاحترام وو...)

ايضا التكرار العبيط للهجوم على الاسلام من خلال النموذج الساذج للجماعات و الارهابيين ووو .... بقت قديمه قوى و لماذا تلك الخلطه التى تزكم الانوف من ارهاب كما يدعون و دعاره و حشيش و سحاق .....

هذا المخرج عليه من الله ما يستحق امتداد لذلك الاتجاه العلمانى السافل فى المجتمع الذى يعمل على هدم الدين من خلال بث تلك المفاهيم الخربه و نسى ان الله له بالمرصاد هو و من على شاكلته و يمكن مشاهده حلقات فى القاهره اليوم مع هذا المخرج الذى يدعى انه ليبرالى و انه يناقش قضايا المجتمع و ذلك الكلام الكبير الذى لا يمت لواقعهم بصله ..... حسبنا الله و نعم الوكيل

لى مقياس للحكم على الفيلم ممكن نجربه و نرى و هو هل تستطيع رؤيه هذا الفيلم و حولك زوجتك و ابائك ام لا ؟.

تم تعديل 29 يونيو 2008 بواسطة abaomar

[badroora]

أبا عمر .......هو حضرتك شوفت الفيلم كامل ........ولا قرأت قصته فقط ؟

أجب عشان نتناقش بعدها ؟

تم تعديل 29 يونيو 2008 بواسطة Badria Mekkawy

[badroora]

يا بدريه كل بلد فيها وفيها

أكبر دولة بترولية في الخليج اللي هي السعودية .. فيها عشوائيات وعشش صفيح والملك عبد الله أيام ما كان ولي عهد راح زار العشش دي وشاف حال الناس اللي عايشين تحت الأرض ...

صح يا س س وانا نفسي شوفت بيوت هنا اسواء بكتير من اللى جات فى الفيلم ........وانا لا ألوم عليهم بالضحك فهم احرار

ولكنى اتغظت انهم فاكرين اننا عالم درجة تسعه وانهم معندهومش الحاجات .......على الرغم ان المنامة ....اصلا عبارة

عن شارع وجه كويس وخلفه بلاوى مش محتاجة تبحث عنها لانها موجودة وظاهر للاعمى ....

يلا ربنا يديهم كمان وكمان .......ويصلح حالنا ........ويحنن قلب حكومتنا وتاخد بلها من الناس اللى بتضيع دي