ذكريات الطفولة .. صوت وصورة !!

[إيزيس]

فاكرين البتاعة دي

تقصد الأربع بتاتيع دول

آه و الله زمااااااااااان

[!! Lidooooo !!]

بس في حلويات كتير من ايام كانتين المدرسه.............وساعات كانوا يلفوا علينا في الفصل واحنا نشتري.....................نعناع ايكا المستطيل الصغير دا............جيلي كولا..............هولاهوب.....بنبون لارنو(تلاتاشر حبه وحبه.......دي صيغه الاعلان)...........لبان بم بم والالبوم ...........الشمعدان بانواعه.........

شطورة يا جالاكسي

تستاهلي دول

اللى ع اليمين دة كوفرتينا بتاع اعلان جبت الملبس :ninja:

والاسود اللى تحت دة كان اسمه ربسوس :happy:

ومكنتش بحبه :sad:

[kokomen]

اسمه البلح الرطب يا هانم

ربنا يخليكي...

انا كنت ملخبطه ومش متأكده من اسمه وخفت أغلط قولت لونه وخلاص

ماكنتش متأكده هو الاسود اللي زغلول ولا الرطب...

إما وريتك >>>>> :sad:

يامدام قرنفلة ...... أسمه البلح الأسود في أسكندرية ... مش الرطب

وزي مدام ناش ما قالت .... فيه بلح أحمر وبلح أصفر بيسموه سماني

على أيامنا من زمان قوي

[!! Lidooooo !!]

البلح الاسود

إيه البلح الاسود ؟؟

أخو القط الاسود :ninja:

طب فاكرين بطاريات ايفيريدي القط الاسود :rolleyes:

حجر حياته أطول

الشركة غيرت أسمها من ينيون كاربيد إلى إنرجايزر

بعد حادثة تسرب غاز كيماوي من مصنعها في الهند و موت 600 واحد :ninja:

[galaxy]

بس في حلويات كتير من ايام كانتين المدرسه.............وساعات كانوا يلفوا علينا في الفصل واحنا نشتري.....................نعناع ايكا المستطيل الصغير دا............جيلي كولا..............هولاهوب.....بنبون لارنو(تلاتاشر حبه وحبه.......دي صيغه الاعلان)...........لبان بم بم والالبوم ...........الشمعدان بانواعه.........

شطورة يا جالاكسي :ninja:

تستاهلي دول :ninja:

اللى ع اليمين دة كوفرتينا بتاع اعلان جبت الملبس :wub:

والاسود اللى تحت دة كان اسمه ربسوس :blink:

ومكنتش بحبه :rolleyes:

مرثي اوي يا عمو..............انا بحب كمان الربثوث (ربسوس مخصوص)......وكمان هارتي(مامتي وخالتي وطانطي ...حريفه لبان)..........مع اني مش بحب البان خالص ومن زمان ...........بس كنت بجمع الالبوم(بم بم ......بيقدم جوايز)

ياربت بقي كمان يا عمو تجيب لنا اعلان اللبان الثحري............دوق دوق ........دوق احلي هديه ..السحر لبان طعمه الوان ميه الميه......دوق دوق.

[!! Lidooooo !!]

إديني لبانة من السحري :blink: .. إشمعنى السحري مصر عليه :wub: .. جرب وحتعرف وحدك ليه :yahoo: السحري لبان أمضغوا القاه ألوان ألوان :yahoo: يا نهار أخبر..السحري البني والأصفر تمضغ يديلك لون أحمر..لو عاوز أزرق أعمل إيه :yahoo: أُمضع ف الأول لون أحمر..

دووق دووق دوق أحلى هدية السحري لبان طعموا يا جدعان مية المية ... :rolleyes:

أمضغوا و أنا أزود ف المصروف :110: أبدا أبدا دا ماهوش غالي واشتري حتشوف

دووق دووق دووق أحلى هدية السحري لبان طعموا يا جدعان مية المية... :ninja:

دوق دوق

من هاني ويــــل wst::

:ninja:

[nash]

وزي مدام ناش ما قالت .... فيه بلح أحمر وبلح أصفر بيسموه سماني

الله يخليك يا ابو حميد يا طيب.....انا شكيت في معلوماتي....

بس بجد بجد أول مرة اسمع في البلح السماني....اول حاجه جت علي بالي ..طائر السمان....جهل معلش عدوها... :rolleyes:

مش عارفه حاسه أني قاعده في فصل كي جي تو وعايشه الجو مع جلاكسي مع أنها أكبر مني...بس يله مش مشكله...

ليدو.......انت مسجل معانا من زمان... :ninja:

طيب الاقيش عندك الموسيقي الكئيبه بتاعه نافذه علي العالم؟؟

بفتكر طبق جزر مبشور وعليه سكر.....بجد والله :ninja: لما بفتكرها

[!! Lidooooo !!]

ما اكتر البرامج اللى كنت باكره موسيقتها

عندك حدث في مثل هذا اليوم :wub:

وبرنامج اغرب القضايا بتاع يوم الجمعة في الراديو :blink: :ninja:

بمناسبة يوم الجمعة :yahoo:

عارفة مين دي :ninja:

:rolleyes:

[nash]

حدث في مثل هذا اليوم كان بيحسسني أنه فيه كارثه هاتحل علي الارض ..

وسوري يا جماعه علشان ممكن حد يكونها بيحبها....موسيقي العلم والايمان.....يا الله معرفش كنت بتخنق منها برضه...

وطبعا نافذه علي العالم اللي كانت بتلف وتدور ...

معقوله دي ( عفاف الهلاوي)؟؟ صح؟؟

طب فاكر فرديناند اللي كان بيجي في سينيما الاطفال؟؟ اللي عامل شعرة بوجوديه زي نجاح الموجي في المتزوجون؟؟

[!! Lidooooo !!]

فاكره طبعا :ninja:

وفاكر الكلبة لاسي

طب فاكرة انتى برنامج كان بييجي يوم التلات العصر بتاع منى عبد المقصود :yahoo:

كانت شبه سماح انور كدة وبتلبس نضارة :ninja:

وكان فيه فقرة اسمها اصنع بنفسك بتقدمها هالة الشارونى وكرتون بيرسمه نادى على سبورة wst::

ومعالي حسين في ما يطلبه الأطفال :yahoo:

وماجد عبد الرازق في فنون وكرتون :blink:

وعروستى بتاع سامية شرابى :yahoo:

و كرنبة وماما فاطمة :rolleyes:

على فكرة اللى كانت بتعمل صوت كرنبة دي بنتها .. وبقت مذيعة نشرة في النيل الدولية للاخبار :wub:

[nash]

ناخدهم بالترتيب....

الكلبه لاسي ....وياعيني كلنا ننطم وأحنا بنتفرج

الاسماء مش متذكراها بس ...اللي فاكراة بابا ماجد شويه طشاش وكان معاه ارنوب...وكنت شايفه أن الأتنين يشبهوا بعض جدا...

كنت فاكراهم أخوات :rolleyes:

وكان فيه مذيعه في وشها حسنه ...تقريبا اسمها ساميه حاجه...لأ حاجه ده مش اسم باباها... :ninja:

طبعا كرنبه عملت ضجه فظيعه في مصر.....وهنا لقيت عروسه لعبه تشبهها سالت عليها لقيتها ب300 ريال في تويز آر أس...قال ماركه ...مسكتها حدفتها :ninja:

ده أنت عندك شويه معلومات كنز مالوش حل...

هافتكر بكرة .....ده أنا ناويه استرجع الشريط وخصوصا ماما نجوي وبقلظ :blink:

[galaxy]

زي الشمس ما هلت .........علي كل الامامير :ninja:

غنوا زي ما غنت .............غنوا صباح الخير...... :yahoo: .......زي النسمه ما غنت .......علي شعر الامامير.........زي فراشه ما لمست..........وردة بقلب حرير

صباح الخير...........صباحالخير...............صباح الخيييييييييييييييييييييييييير.. :yahoo: .........اللي فاكر الاغنيه يكتبها

في كمان سينما الاطفال........بتاع ماما عفاف الهلاوي..............يوم الجمعه الصبح.... :ninja: ....ما كونتش بفوته ومرة كمان قابلت ماما عفاف واديتها اسمي اسم اخويا الضغير و الحلقه اللي بعدها ذاعت الفيلم اللي طلبته.(سينما الاطفال ....سينما ....فيها الحقيقه وفيها الخيال.......سينما الاطفاااااااااااااااااااااااال) :yahoo:

وبرنامج بستان الزهور....بتاع برضه ماما نجوي بس كان كل يوم صفه جديدة.......وكان معاها ابوبكر عزت(فتحي يا زهور فتحي........واصحي معانا وصحصحي) :blink: :wub:

كنا كمان بنجيب مجله ماجد وندور علي فضولي wst:: ....ومغامرات شمسه ودانه ...وخلفان ومساعده فهمان.. :110: ........وكسلان جدا...........وع الغلاف من ورا موزة واخوها رشود....................حد فاكر دول؟؟؟؟؟؟؟؟؟؟........وكمان مجله العربي الصغير :rolleyes:

[galaxy]

علي فكرة اللبان السحري لو عايز ازرق تندغ في الاول لون اخضر :ninja: :ninja: :rolleyes:

[Folana]

السلام عليكم ورحمة الله...

ياسلام...الحرنكش والجميز والتوت...فاكهتى المفضلة من الزمن البائد....والله زوجى ربنا يكرمه لما يحب يفرحنى يجيب لى جميز وتوت...بس مش عارفة ليه طعمهم مابقاش زى زمان..

يمكن علشان بأغسلهم دلوقت ؟ :unsure:

وكمان العسلية..يعنى النداغة...يعنى نبوت الغفير ...وسمعنى احلى سلام..

[galaxy]

الا سؤال يا نيشو. :unsure: ..................ماما نجوي وماما عفاف وبابا ماجد ولاسي وكل الحركات دي كانت علي ايامنا. :blink: ...............عرفتيها منين........ولا كنتي بتتفرجي عليهم مع اولادك؟......... :ninja:

......حاسه كدا ويارب ما تخيب ظني :unsure: ...........انك المفروض تتكلمي عن بابا شارو اللي كنا بنسمع عليه زمان :sad:

[أسد]

السلام عليكم ورحمة الله...

ياسلام...الحرنكش والجميز والتوت...فاكهتى المفضلة من الزمن البائد....والله زوجى ربنا يكرمه لما يحب يفرحنى يجيب لى جميز وتوت...بس مش عارفة ليه طعمهم مابقاش زى زمان..

يمكن علشان بأغسلهم دلوقت ؟ :unsure:

وكمان العسلية..يعنى النداغة...يعنى نبوت الغفير ...وسمعنى احلى سلام..

امبارح قعدت أدور على صورتها علشان أحها ماعرفتش ..

ألاقيش عندكوا حلاوة نيفا ..

:unsure: :ninja:

[se_ Elsyed]

ألاقيش عندكوا حلاوة نيفا ..

دي غير العربية النيفا الروسي ؟ !!!

----------

بمناسبة الحرنكش .. أنا كنت هاكل الصورة من عالشاشة ... كنت معزوم في الشيراتون من إسبوعين تلاتة كده أنا وصديكي هاندي كرافت وكان هناك ما لذ وطاب من المأكولات وضرنا ضرب يوميها بالرغم من إننا كنا متعشيين في بيوتنا لكن أنا ضعيف نفسياً قدام السي فوود .. وجينا بنحلي .. وعادة لا ألتفت إلى صفوف الفواكه لإنها مرطرطه في السوق ... ولكن إذ بي فجاة ألمح حبيب قلبي الحرنكوش ده ... وكتاب الله نزلت حتتك بتتك وكإني محروم منه وكنت عايز اخد التربيزة بالحضن ..

على فكرة العيال بتوع اليومين دول عيال بايظه بتوع بلاي إستشين وكارتون ماسخ وكله طحن .. يعني متخيل الولا عمر لما ييجي بعد 20 سنة يقعد يسترجع ذكرياتي مع أصحابه ويقولهم فاكر يالا كارتون سابق ولاحق .. ولا سونيك ولا فتيات القوة .... ده إيه القرف ده ؟

إنما جيلنا بتاع السبعينات والثمانينات - أسد لو سمحت إطلع بره وخد باب التوبيك في إيدك :unsure: - كنا الروقان كله وعيال دماغها عاليه من غير لا بانجو ولا عرانيس

وكانت الدماغ دي لازم تتكون من :

دوم

حرنكش

النبق - في السعودية هنا بيسموه عِبري زي الشوام ما بيسموه بس داهوت كبير وماسخ إنما دكهوه صغير وزي العسل لما يكون مدي على صفار -

بامبوزيا ....... يا لهوي عالعسل اللي بيشر منها

بالمناسبة قلت أعمل سيرش على صورة المامبوزيا في جوجل وإذ بالصورة دي تطلع لي ... والله العظيم

قلت يا عم إرحم اهالينا بقى إنت ورانا ورانا حتى في ذكريات طفولتنا ... دي حاجه تجيب الشلل الرعاش .. اووووووووووووف

تفاح أخضر مزز لسه ما أستواش

مانجا صغيرة برضوا ما ستوتش وجلدها لازق في البذرة اللي جوا

نبوت الغفير أو العسلية

حلبسة - بالفرنساوي يعني حُمص شام -

جيلاتي من عالعربية

مراجيح من اللي كنت كل ما أركبها أرجع .. طب تركب أوبها ليه ؟ عشان أرجع

صندوق الدنيا ونفس الحكايات الحمضانة بتاعت أبو زيت الهلالي وعنترة بن المستر شداد

الأراجوز النوز النوز

الحاوي اللي كان بييجي حتتنا ويملى بؤه جاز ويطلع نار من بؤه .. ويجيب دبابيس مشبك ويقعد يدبس بها جسمه من غير ما ينزل نقطة دم وانا أشوف المنظر ده أفتكر المراجيح وأبقى عايز أرجع - ده إيه الولا اللي كان مقضى طفولته ترجيع ده ؟ ... يخرب بيت كده -

اليوم الرياضي في المدرسة - العيال بتوع اليومين دول بيسموه أوبن داي - وكان دايماً يجي لنا ساحر ادواته قديمة وبقى لها خمسين سنه ويحط الميه في قرطاس ورق وبعدين يعمل إنه هايدلقه في وشنا ومش عارف الميه كانت بتروح فين ... وكان يجيب علبه كبيرة يخبي فيها أرنب وبعدين فتح العلبة وما لاقيناش الأرنب ومره فقست أهله وشوفت ديل الأرنب في جنب العلبة وما رضيتش أحرجة عشان يسترزق .... بالنسبة كان في قطاع كبير من المجتمع بيفتكرنا عِبط او عيال ملزوقه على قفاها

رحلة القناطر ومتحف الشمع والكبرتاج وكل دي بخمسة وسبعين ساغ

يــــــــــــاه يا ولاد .. رجعتوني 48 سنة ورا

[se_ Elsyed]

ياسلام...الحرنكش والجميز والتوت...فاكهتى المفضلة من الزمن البائد....والله زوجى ربنا يكرمه لما يحب يفرحنى يجيب لى جميز وتوت...

الاخت العزيزية ناش

إحنا هنا بنتكلم بمنتهى الصراحة وبنفتخ جيوبنا قصدي قلوبنا لبعض

عايزه تفهميني إن مستر فلان لو دخل عليكي يوم عيد ميلادك بكيس حرنكش أو جميز او علبة قطيفة وفيها توت .. ده احسن من علبة تانية فيها خلالخيل وكردان دهب بُندقي عيار 24 ؟

عيني في عينك كده

والله العظيم لو مراتي قالت لي كده .. لادخل عليها كل يوم ومعايا قفصين حرنكش وشجرة جميز وسبتين توت

حرام عليكو وسطنا اتقطم والدهب وصل 170 جنيه الجرام

يعني بثمن جرام ذهب ممكن أنزل الم الحرنكش والتوت والجميز اللي في السوق كله

------------------------

بالمناسبة يا فلانه بما إنك جميزاويه قديمة ... هو ليه الواحد لما كان بياكل الجميز لازم يجيله مغص فظيع وبنه توجعه - كان زمان إسمها بنه مش بطنه .. مراعاة للحقبة الزمنية - ؟

إنتي عارفه إن أنا وأصحابي الصغيرين المشردين كنا بناكل الجميز من الصورص ؟ المصدر يعني

عمري في حياتي ما اشتريت جميز .. ولكن بخبرتنا كنا عارفين مصادر الجميز وأشجاره .. ووالله العظيم كنا نقطع الفيافي والصحاري ونمشي لعدة كيلو مترات عشان نروح تلك الاماكن ونتسلق أشجار الجميز العجوزة الطيبة زي القرود الإستوائية كده ويبقى منظر محتاج كاميرا تصورة وكل واحد فينا قاعد على فرع الشجرة الضخم ونازل تقطيف في الجميز وهاتك يا اكل لحد ما ممكن الواحد يقع من فوق الشجرة من التخمة ...

أما التوت فكان في الريف بصراحة وبنرجع الدار وعلى أفواهنا أثار الجريمة .. والجريمة بتختلف حسب الموسم ... ساعات تبقى جريمة حمرا لو كان التوت أحمر .. أو جريمة سودا ومنيلة لو كان التوت إسود وتلاقي وشوشنا متلحوسة .. وهدومنا كذلك ... وممكن ناخد لنا قلمين على تلات شلاليت عشان وسخنا الهدوم ...

المداخلة دي رجعتني 32 سنة ورا ومعايا 42 من المداخلة اللي فاتت يبقى كده رجعت للثورة العرابية ... يـــــــــاه .. الله يحظكو يا ولاد

[مهيب]

يا نهار أبيض ع المواضيع .. جامد الموضوع ده ...

طيب حد فيكو فاكر كارتون مخمخ و مشمش .. ثنائى مدهش ..

لكن - و دى مش عارف- حد هيوافقنى عليها و لا لأ .. فاكرين الشمس بتاعة زمان .. مش عارف ليه بحس انها مختلفة عن دلوقتى .. حاولوا بس تسترجعوا الشعور الشمس بعد الصلاة يوم الجمعة زمان .

فاكرين مشروبات لايف .. و سيكو .. و الآيس كريم اللى كنت تكسب واحدة تانية وتروح تبدل الاستيك .

طب حد فاكر أول حاجة ساقعة شربها كانت بكام ؟؟

[se_ Elsyed]

.. و الآيس كريم اللى كنت تكسب واحدة تانية وتروح تبدل الاستيك .

طب حد فاكر أول حاجة ساقعة شربها كانت بكام ؟؟

يا أخ مهيب نرجو الدقة في المعلومات.... عشان ده تاريخ

إسمه أيس كيريم كيمو سعادتك يا فندم لو سمحت وبندلعه ونقول عليه أوستيك .. جايه من stick وكنت تضرب الأوستكاية من دول بسرعه ولهوجه وبدون إستطعام عشان تشوف مكتوب على العصايا إنت كسبت أوستيكاية تانية ولا لأ

بالمناسبة في م لا يقل عن 10 مواضيع من دول في المنتدى بنفس المحتوى ... بس الواحد من مرارة الحاضر بيحب إجترار ذكريات الماضي ..