كان ياما كان

[علاء فكرى]

كان ياما كان

تروح الليالى وتيجى الليالى

ويصحى شبابى

وتجرى طراوة السنين فى خيالى

ياعمرى

يا لمبة بشريطة معمرها حبى

ونورها منور نهارى اللى ماشى

على رجل واحدة

وساند على نأز توتة عفى

وكان ياما كان

تروح الليالى وتيجى الليالى

وفاكر زمان

وأيام ما كان

فى بيتنا القديم

فى وش المجمع

وكان بمقاعد لها مشربية

وسور الجنينة وشجر الكافور

وتكعيبة العنباية اللى سارحة

وطالعة الحضير

وكان ياما كان

ياعيل صغير

فى حضن الطبيعة الجليلة اتولد

يا برد الشتا ياللى جاى م الناروزة

ما تقدرش توصل لحضن الولد

دا قاعد فى قاعة

بتحميها أمى بحضن الدفا

ووقيد الحطب

ولبشة قصب وشق القمر

ومحلبة الفول ف قلب الشاروقة

وبنَّام ونصحى

فى حضن الدفا

وإوعى يا برد الشتا يوم تقرب

لحضن الولد

ومرت ليالى وليالى وليالى

وهدوا قاعتنا بقت مندرة

ويصحى الصغير

يدور طرمبة حياته بإيده

وشايل فى إيده التانية القلم

ورايح على ( المشلى ) يحفظ آيات

الكتاب الكريم

ونون والقلم

وكان ياما كان

يا لعب الصغار

أوله كعلو – الميس معووج

واستغماية والديك طار

وإرمى وارمى وواحد كوك

والسندلانة

تلعب بلى ف وسط الدار

شيل من سنانك لياقة البيجاما

تيجى نروح نصطاد ف الترعة

صيرتين بعلو ف طبق المية

هنسويهم

بس كانونكم مش متقاد

روح إيد اللمبة أم شريط

من دار جاركو الشيخ توفيق

أو من عند الحاجة رتيبة

ياااااااااه

الله يرحمهم

فين أيامهم

كان ياما كان

وكان ياما كان

وبنت الجيران

وقلبه الجميل

راكب حمارة كسيحة بتعرج

فى سبق الخيول

ما لكشى مكان

دا وقت الكبار

دا افندى بماهية

وعيشة هنية

ولقمة طرية

وليه هيه تكبر بسرعة كده

ما عود الكافور اللى سارح لفوق

بينسى القلوب اللى مزروعة تحت

والله يهنى السعيد بالسعيدة

وخليك يا قلبى لدنيا جديدة

تروح الليالى وتيجى الليالى

وأكبر واشيب

لكن لسه عايش بحلم الصغير

وقلبه الكبير

واحن لصبايا وعمرى اللى كان

وكان فعل ماضى

ومش ممكن أقدر أسيبه فى حاله

وكان ياما كان

يا أيام زمان

[أشرف حسين]

عزيزي عـلاء ......

استعصى علي فـهم بعض الـكلمات الـغارقـه فى المحليـه

من ما وقف بيني و بين متعة "الأسترسال" في القراءه..

ارجو توضيح بعض هذه الطلاسـم wst::

نأز توتة عفى

الناروزة

أوله كعلو – الميس معووج

واحد كوك

والسندلانة

معلش اخوك "أسـواني" يعني بعيد حـبتين

[علاء فكرى]

الأستاذ الفاضل / أشرف

أشكرك لاهتمامك بقراءة خواطرى وذكرياتى القديمة جداً

كل الطلاسم المذكورة فى الخواطر ما سمعتهاش من أكتر من 35 سنة بس لسة عايشة فى خيالى

وللأسف يمكن فى خيالى لوحدى

أما بالنسبة للكلمات اللى بتستفسر عن معانيها

نأز توتة عفى :فرع من شجرة التوت وعفى يعنى جامد نتعكز عليه

الناروزة : فتحة فى أعلى القاعة اللى طبعاً كان بيبقى فيها فرن ولما يحموا ( يولعوا ) الفرن الدخان كان بيطلع منها

أوله كعلو : لعبة كنا بنلعبها زمااااااان أوى بكورة صغيرة ونرميها من ورا ظهرنا واللى يمسك الكورة يرميها على الميس وإذا أصاب الهدف ( الميس ) تناول هو اللعب بالكرة

الميس معووج : حجر متساو ممكن يكون جزء من بلاطة أو شقفة فخار قلة مكسورة ولو الميس كان معووج يعنى مش موضوع يشكل جيداللاعب مش هيعرف يصيبه

واحد كوك والسندلانة : لعبتين من ألعاب زمان

[زهرة الجبل]

أخي الفاضل علاء فكري

هذه ليست كلمات

ليست شعراً

ليست خواطر تكتب على الورق

بل هي لوحه فنيه رائعه من الماضي الجميل

عندما قرأت كلماتك إستعصت علي فهمي بعض الكلمات ..

لكنني شعرت بها كأنني رأيتها مرسومه لا مكتوبه

كثيراً ما نستحضر الماضي فنرى صوره بذاكرتنا و قد نال منها بعض الشيب

كأنها صوراً باهته إنهزمت ألوانها أمام طول الزمن

لكن قلمك أعاد للوحة الماضي زهوتها و ذكرياتها الجميله وتفاصيلها الصغيره العفويه

أعادها كما كانت لتذهو في أعيننا كسابق عهدها فننخدع و نسعد بها لوهله

ثم يباغتنا الحاضر بأن الماضي الجميل لا سبيل إليه إلا بالذكريات

تحياتي لأسلوبك الجميل

و أسعدني أن رأيت هذه اللوحه الجميله

دمت بخير

أختك أم كريم

[إيزيس]

وليه هيه تكبر بسرعة كده

ما عود الكافور اللى سارح لفوق

بينسى القلوب اللى مزروعة تحت

والله يهنى السعيد بالسعيدة

وخليك يا قلبى لدنيا جديدة

تروح الليالى وتيجى الليالى

وأكبر واشيب

لكن لسه عايش بحلم الصغير

وقلبه الكبير

واحن لصبايا وعمرى اللى كان

وكان فعل ماضى

ومش ممكن أقدر أسيبه فى حاله

وكان ياما كان

يا أيام زمان

كلمات ندية بالعبرات

تم تعديل 20 أبريل 2008 بواسطة قرنفلة

[علاء فكرى]

الأخت الفاضلة / زهرة الجبل

كلماتك الرقيقة وتصويرك لذكريات الماضى باللوحة الفنية رغم الكلمات غير المفهومة شىء رائع

كنت متخيل أن هذا الشىء يعيش فى وجدانى وحدى ولكن سعيد الآن جداً بتعليقك الجميل على الفكرة

أخوك / أبو كريم ( برضه )

[علاء فكرى]

الأخت الفاضلة / قرنفلة

أشكرك على قراءة فكرتى وأتمنى إن قلبك ما يكنش اتوجع من الكلمات الصعبة اللى فيه

علاء فكرى

[bentmasria]

تروح الليالى وتيجى الليالى

وأكبر واشيب

لكن لسه عايش بحلم الصغير

وقلبه الكبير

واحن لصبايا وعمرى اللى كان

وكان فعل ماضى

ومش ممكن أقدر أسيبه فى حاله

وكان ياما كان

يا أيام زمان

ما اجمل ما كان يا علاء حين يطل من زحام ايامنا لنحكيه بالحروف كقصة رائعة الملامح تطل علينا برائحة الطين الندى ونسمات الصباحات الحالمة المشرقة وعطر القرية الزاخر بالاصول والتقاليد واشياء كثيرة نسيها الكثيرون أو تناسوها لا ادرى

كلنا جذع من شجرة ذات جذور عميقة حفرت ملامحها على وجوهنا وامتدت لدمائنا وليتنا نستطيع ان نصف احساسنا بها بمثل ما وصفت

هنيئا لنا بالحكاية

وهنيئا لك انك مازلت تحمل هذه الاحاسيس بهذه الاصالة فى روحك

دمت مبدعا اصيلا

البنت المصرية

[مهيب]

علاء ... قلم عال جدا هو ما تكتب به .. أعجبنى ما كتبت - على الرغم من صعوبة فهم بعض المفردات - و ان كنت أحس أن الأمر كان ليختلف لو سمعنا هذا الشعر بالقائك .. منتظرين جديدك .

مهيب

[التونسى]

دخلت لاشارك فوجدت الاخوة الكرام قد قالوا أغلب ما كنت سأقوله .. ولكنى أزيد نقطة .. فقد لاحظت مهارة الاخ الكريم الشاعر علاء فكرى فى صياغة الصور الشعريه ...البسيطه منها ...أو المركبه .. وتلك المهارة ((((فى رأيى الخاص)))) هى المؤشر أو المعيار الذى من خلاله نستطيع أن نقيم موهبة الشاعر.. والفرق بينه وبين الشعراء الاخرين ..

اعجبتنى بعض الصور الشعريه وأراها مبدعة وتعبر بدقه عن الفكره المراد ايصالها ..وتدل على الجموح القوى لخيال الشاعر واختار منها تلك الصوره

يا لمبة بشريطة معمرها حبى

ونورها منور نهارى اللى ماشى

على رجل واحدة

وساند على نأز توتة عفى

شكرا للاستاذ علاء فكرى وفى انتظار المزيد من اعماله المتشحه بالعبق الشعرى الاخاذ

[علاء فكرى]

الأخت الفاضلة / البنت المصرية

كلنا جذع من شجرة ذات جذور عميقة حفرت ملامحها على وجوهنا وامتدت لدمائنا وليتنا نستطيع ان نصف احساسنا بها بمثل ما وصفت

ترى هل حقاً أستحق هذا الإطراء الرقيق الذى لا يعبر عنه إلا قلم حساس (مصرى بجد ) أشكرك على قراءة كلماتى وأشكرك جداً على التعبير الرقيق الذى وصفت به كلماتى .

علاء فكرى

[علاء فكرى]

الأستاذ / مهيب

أشكرك جداً على إحساسك الشاعر ولكن لو كنت سمعت الكلمات بإلقائى يمكن كان الأمر اختلف للعكس !

علاء فكرى

[علاء فكرى]

الشاعر المبدع / التونسى

أشكرك جداً للاهتمام بخواطرى وأشكرك أكثر على المهارة الجميلة التى صغت بها هذه الكلمات التى تصف بها أفكارى أتمنى دائماً أن أكون عند حسن الظن

علاء فكرى

[dr gml]

اخى

كم سعدت بهذه الحروف

فانااعرف معنى كل تلك المصطلحات التى بدت غريبة على البعض

لذا أحسست بكل حرف ينبض من داخلى

لقد عبرت معك حاجز الزمن

وابحرت بكلماتك الى الذكريات الجميلة

اشكرك من قلبى

[علاء فكرى]

أخى : د /جمال

هذه الأيام الجميلة بكل مافيها من أفراح وأتراح تعيش فى وجدان كل منا

وأنت قد شاركتنى هذه الأيام

فهذه المشاعر منك إليك

علاء فكرى

[دكتور ش ع م]

كان ياما كان

تروح الليالى وتيجى الليالى

ويصحى شبابى

وتجرى طراوة السنين فى خيالى

ياعمرى

يا لمبة بشريطة معمرها حبى

ونورها منور نهارى اللى ماشى

على رجل واحدة

وساند على نأز توتة عفى

وكان ياما كان

تروح الليالى وتيجى الليالى

وفاكر زمان

وأيام ما كان

فى بيتنا القديم

فى وش المجمع

وكان بمقاعد لها مشربية

وسور الجنينة وشجر الكافور

وتكعيبة العنباية اللى سارحة

وطالعة الحضير

وكان ياما كان

ياعيل صغير

فى حضن الطبيعة الجليلة اتولد

يا برد الشتا ياللى جاى م الناروزة

ما تقدرش توصل لحضن الولد

دا قاعد فى قاعة

بتحميها أمى بحضن الدفا

ووقيد الحطب

ولبشة قصب وشق القمر

ومحلبة الفول ف قلب الشاروقة

وبنَّام ونصحى

فى حضن الدفا

وإوعى يا برد الشتا يوم تقرب

لحضن الولد

ومرت ليالى وليالى وليالى

وهدوا قاعتنا بقت مندرة

ويصحى الصغير

يدور طرمبة حياته بإيده

وشايل فى إيده التانية القلم

ورايح على ( المشلى ) يحفظ آيات

الكتاب الكريم

ونون والقلم

وكان ياما كان

يا لعب الصغار

أوله كعلو – الميس معووج

واستغماية والديك طار

وإرمى وارمى وواحد كوك

والسندلانة

تلعب بلى ف وسط الدار

شيل من سنانك لياقة البيجاما

تيجى نروح نصطاد ف الترعة

صيرتين بعلو ف طبق المية

هنسويهم

بس كانونكم مش متقاد

روح إيد اللمبة أم شريط

من دار جاركو الشيخ توفيق

أو من عند الحاجة رتيبة

ياااااااااه

الله يرحمهم

فين أيامهم

كان ياما كان

وكان ياما كان

وبنت الجيران

وقلبه الجميل

راكب حمارة كسيحة بتعرج

فى سبق الخيول

ما لكشى مكان

دا وقت الكبار

دا افندى بماهية

وعيشة هنية

ولقمة طرية

وليه هيه تكبر بسرعة كده

ما عود الكافور اللى سارح لفوق

بينسى القلوب اللى مزروعة تحت

والله يهنى السعيد بالسعيدة

وخليك يا قلبى لدنيا جديدة

تروح الليالى وتيجى الليالى

وأكبر واشيب

لكن لسه عايش بحلم الصغير

وقلبه الكبير

واحن لصبايا وعمرى اللى كان

وكان فعل ماضى

ومش ممكن أقدر أسيبه فى حاله

وكان ياما كان

يا أيام زمان

[دكتور ش ع م]

ما أروعك يا أبا كريم