المستثمر الهندي «عيش كمارا مقمّر» يعرض شراء طوابيرك يا مصر

[سكر]

المستثمر الهندي «عيش كمارا مقمّر» يعرض شراء طوابيرك يا مصر

١٧/٤/٢٠٠٨

ومازالت المعركة مستمرة لتحرير طوابير العيش بالعبور نحو «الماجور» وننتظر بفارغ الصبر الانتهاء من هذه المعركة لنواصل بعدها مرحلة الغموس لبناء معدة المواطن. فليس بالخبز وحده يحيا الإنسان لابد من غموس ومعاه حتة لحمة.

* دار هذا الحوار بين وزير البيع وبين رئيس الوزراء..

وزير البيع لرئيس الوزراء: صباح الخير يافندم الله أكبر وجه حضرتك «صابح» وصحة سيادتك «ردة» عن الأسبوع اللي فات. رئيس الوزراء! هات يا محمود من الآخر وخليك «دقيق» في كلامك، وزير البيع: إحنا يافندم اتعلمنا من سيادتك إن الباب اللي يجيلك منه الريح سده واستريح.

رئيس الوزراء: بلاش «لت وعجن»، يا محمود وهات من الآخر..

وزير البيع: بصراحة يافندم أصبحت طوابير العيش «خميرة» عكننة علي الحكومة كلها.. فيه يافندم مستثمر هندي عاوز يشتري طوابير العيش اللي في المحروسة كلها وهيدفع مبلغ محترم.

رئيس الوزراء: اسمه إيه المستثمر ده يا محمود وإيه نظامه؟!

وزير البيع: مستثمر يافندم اسمه الثلاثي «عيش كمارا مقمر» وناوي يافندم يطور الطوابير هيعمل مظلة مكيفة وتحتها كراسي بالأرقام وهيركب دش لكل مظلة علشان المواطن مايشعرش بالملل..

رئيس الوزراء: عظيم يا محمود.. طيب وإيه المشكلة؟

وزير البيع: المشكلة يافندم إن المستثمر الهندي عامل رسم دخول ٥ جنيهات لكل فرد وجنيه لكل «قفص» وناوي يبيع كل رغيف بداخله صباع كفتة.

رئيس الوزراء: والرغيف بكام يا محمود؟

وزير البيع: في متناول الجميع يافندم بجنيهين فقط..

رئيس الوزراء: عظيم يا محمود بس أنا خايف جمهور الطوابير يعملوا مظاهرات والبلد مش ناقصة.

وزير البيع: يافندم الشعب بتاعنا شعب طيب ومسالم وزي «العجينة» بنشكله في إيدينا يعني مثلاً سيادتك لما خلينا العدس بعشرة جنيه حد اتكلم.

نبيع يافندم - بيع يا محمود!

أمين أبونضارة

منقول من موقع المصرى اليوم