السؤال قبل الإرتباط بالزواج

[crossfield]

غتحطيت فى موقف زى الزفت النهارده ومش عارفة أنا إتصرفت صح والا لأ.شوفوا إنتوا و احكموا:

إتصلت بيه النهاردة واحدة معرفهاش و قالتلى إنها صديقة حميمة لواحدة متقدملها خطيبى السابق وإنها عايزة تعرف أسباب فسخ الخطوبة و إيه كانت عيوبه....بصراحة أنا اتاخدت من المفاجأة و كان باين عليه الارتباك و اللى نزل عليه ربنا يوفقها ربنا يعمل اللى فيه الخير ربنا يعمل اللى فيه الخير. حاولت أفلفص منها لكن بصراحة مدتنيش فرصة قعدت تقوللى إنها اتصلت بيه قبل كده مرتين و ملقتنيش و إنها ضرورى تتكلم معايةو دى أخت مسلمة و بنت زيك و لازم تقولى شهادة حق ...قلتلها أصل بصراحة إنتى إخترتى الشخص الغلط لان بطبيعة الحال عمر رأيى مهيكون إيجابى أو حيادى . قالتلى غريبة مع إنه بيشكر فيكى جداً!!!!!!!!!1 :roll: قلتلها معلش عموماً المواضيع دى نسبية يعنى اللى يناسبنى أنا ممكن ميناسبهاش هية و العكس .و هيه برضو مصرة ومصممة و أنا مش عايزة أفتح و لا عايزة أكون السبب فى وقف حال حد.أنا و الله يا جماعة مبحب أذية الناس و كمان الحمد لله أنا مش ندمانة على فسخ الخطوبة دى خالص بل بالعكس يعنى من الأخر أنا لا غيرانة ولا عايزة أقوم ببطولة الجزء التانى من غرام و انتقام و لا حاجة من الكلام ده خالص .لكن تحت ضغطها و كلامها بإن أهل البنت مش هيسمحولها بأكتر من مرة أو اتنين تقابله فيهم عشان تقرر و إنها مش عارفة تاخد قرار.. إسترجعت بسرعة تجربتى الخاصة و قلت لنفسى مش لو كان حد عرفنى عن الانسان ده من الأول اللى أنا عرفته لوحدى بعد سنة مش كانت النتيجة هتبقى أفضل؟ ولقيت ربنا أطلق لسانىبعد تلت ساعة مقاوحة.أنا و الله كنت بحاول أكون موضوعية فى كلامى و أقولها إن أكيد أنا برضو فية عيوب و إن يمكن أكون أنا اللى كنت فاهمة حاجات غلط وإنها المفروض تحكم هيه بنفسها و متعتمدش قوى على كلامى لان أكيد فيه شئ من التحيز.المهم خلصت المكالمة و هيه عمالة تشكرنى و تتأسفلى و تقوللى إنها كان لازم تكلمنى...المهم بعد المكالمة حكيت لماما اللى حصل و فوجئت بطيارات أباتشى أمريكية فوق دماغى :cry:

(إنتى مالك؟تتكلمى على الناس ليه؟ قوليلها كويس و خلاص إفرضى حصل نصيب يقولوا عليكى إيه؟كنتى غيرانة؟ما هوه برضو ممكن يتكلم عليكى ...) بصراحة الكلام ضايقنى لان نيتى و ربنا اللى يعلم كانت خير .ليه أسيب واحدة ترمى نفسها فى حفرة مش أنا بس اللى شايفاها.000 للأسف الناس بتشكر و تقول شعر فى أى واحد يتقدم لواحدة و أول ميحصل إنفصال تلاقى الكل بيقولك أحسن ده كان فيه و فيه و فيه و ده ربنا بيحبكوا بس إحنا اللى مكناش عايزين نقول!!!! :twisted: وده للأسف اللى حصل معايه و محبش أبداً إن أى حد يتحط فى الموقف ده و بعدين أكيد ربنا ليه حكمة فى إن البنت دى تعرف توصللى و تجيب تليفونى.أنا مش منقذة و لا مصلحة إجتماعية لكن "لا يؤمن أحدكم حتى يحب لأخيه ما يحب لنفسه"و الله ده كان قصدى .مش عارفة أنا اتصرفت صح والا اندفعت؟هل كان المفروض أسكت و أسيبها تشربه على رأى أخويه؟و يا ترى الناس ممكن تفكر فعلاً إنى إتصرفت كده عشان غيرانة و الكلام الخايب ده؟ :roll:

[se_ Elsyed]

طبعاً غلطانة يا كروس فيلده ،

هاحكيلك حكاية بسيطة لها علاقة بهذا الموضوع ، يحكى أن أحد الصالحين حدث خلاف بينه وبين زوجتة فالناس سألوه أيه الحكاية فجاوبهم انه موضوع خاص بي وبزوجتي ومايصحش حد يعرفة ، فأنفصلوا إنفصال مؤقت فسألوه الناس تاني نفس السؤال فجاوبهم أنها لسه مراته ومايصحش يتكلم عليها ، فحصل الطلاق بالفعل وهي أتجوزت واحد تاني فقالوا له هـــا قولنا بأه كانت أيه الحكاية فقالهم مش ممكن أتكلم على أمراة أصبحت زوجة لرجل آخر.

وأنت قولتي بالفعل انه قد يكون ماحصلش وفاق بينكم ، ولكن ممكن يحصل بينه وبين الأنسانة التانية اللى هو متقدملها ،

مش أحنا فى أمثالنا الشعبية بنقول كل فوله ولها كيال :cry: وبما أن أسمك يشبة "الكرواسون" فعلشان كده مانفعش معاكي .... :cry: لكن انفس المكيال ممكن ينفع مع الفوله دي قصدي البنت دي ويبقوا سمنة على عسل ( أيه اللى انا بقوله ده فول وعسل وسمنه ... .. دى باين عليها تخاريف جوع )

فاللى حصل حصل وماتعهمليش كده تاني .. وربنا يسهلوا ويسهل لها .

[amir]

الأخت Crossfield

اللى حصل حصل كما قال سى السيد ، ولكنى أرجو أن تكونى تكلمتى فى الخطوط العريضه فقط و ليس فى التفاصيل الممله !

أحكى لك عن زميله كانت معانا فى الشغل و تقدم لها دكتور و طبعا فرحت بيه جدا رغم معرفتها بأنه كان خاطب قبل منها ، و طبعا الموضوع كان جواز صالونات و هى لا تعرفه من قبل ، و بسرعه تم الزواج ، و بسرعه تركت العمل معانا ، ... و بسرعه أكتشفت أنه يادوب حاصل على بكالوريوس الطب ـ أخذه بعد عمر طويل ـ و غير متخصص ، و عصبى جدا ، و حاول ابعادها عن أهلها بحجة أنه لا يريدها أن تخرج لوحدها و عامل فيها متزمت ـ شكليا فقط ـ و طبعا حدثت بينهم خلافات كثيره دفعتها للتفكير فى الطلاق ، و هى النهارده بتقول ياريتنى سألت خطيبته الأولانيه ، و أحنا أصدقائها مش قادرين نعمل حاجه لأنه منعها من الأتصال بنا ـ الرجال ـ و منع زميلاتها البنات ايضا من زيارتها !!

يعنى قد يكون ما فعلتيه خدمه للأخت الجديده قبل ما تتكرر نفس القصه معاها.

تحياتى

[عادل أبوزيد]

.أنا مش منقذة و لا مصلحة إجتماعية لكن "لا يؤمن أحدكم حتى يحب لأخيه ما يحب لنفسه"و الله ده كان قصدى .مش عارفة أنا اتصرفت صح والا اندفعت؟هل كان المفروض أسكت و أسيبها تشربه على رأى أخويه؟و يا ترى الناس ممكن تفكر فعلاً إنى إتصرفت كده عشان غيرانة و الكلام الخايب ده؟ :roll:

الفاضلة كروسفيلد

حرصت على المشاركة فى هذا الموضوع رغم انشغالى بموضوعين آخرين أعد لهم منذ اسبوع .

ردا على الفاضل " سى السيد " الذى قال ان كل فولة و لها كيال فذلك صحيح فى الظروف العادية و ليس فى الظروف المقلوبة حولنا و اعطيك مثال يقرب الفكرة لو كل فولة لها كيال لوجدت طالب الثانوية العامة الحاصل على مائة فى المائة يدخل الكلية التى يحبها و يصلح لها و لكننا نجده يختار الكلية التى تأخذ أعلى مجموع ... اليس قادرا على دفع الثمن ؟؟ و نفس الوضع يجرى الآن عند اختيار شريك العمر عنصر الملائمة غير وارد تجد الشاب ينتمى الى اقل الفئات الإجتماعية و تربى و عاش عمره فى بيئة اقل بكثير من شعبية و يذهب الى الخليج و عندما يبدأ البحث عن زوجة لا يتحرج و هو او اهله يتقدمون الى خريجة الميردى دييه او الطبيبة ابنة الحسب و النسب !!! ... هذا عن الملاءة (من ملائمة ) الإجتماعية

نعود الى ضرورة السؤال عن الشخص قبل الإرتباط به و هذا امر ضرورى و صعب جدا و بمناسبة ما رواه الفاضل " امير " أعرف رجلا من عائلة كريمة و عرف بانه متشدد او كما تقول أسرته انه متمسك بالدين و حقيقته ان هذا المظهر يخفى تحته جبالا من الأنانية المفرطة و كذا مفهوما عجيبا عن المرأة " جنس نجس " و لم يعرض لى ابدا ان سمعت هذا الرأى و يتعامل مع المرأة التى كانت زوجته بتعالى مفرط و انانية مفرطة ... و الأطراف التى لم ترى الصورة من قرب تصفه بانه مسكين "وقع وقعة غلط " !!!

و احكى قصة من الأسرة

عند زواج عمى ربما فى اوائل الستينات و عمى هذا - رحمه الله - كان ابن عمدة بلدنا فى صعيد مصر و العروس التى اختارها كانت ابنة عمدة قرية قريبة من قريتنا - تصل اليها من قريتنا مشيا على الأقدام - و كان عمى هذا مهندسا فى البلدية او المحافظة فى القاهرة و تخرج من هندسة عين شمس ... اسرد كل ذلك لأؤكد ان عنصر الملاءة الإجتماعية متوافر كما لا يوجد شىء مجهول لدى اى من الأسرتين ... الا اننا فوجئنا ان أهل العروس ارسلوا من يسأل و يتقصى عن عمى فى القاهرة ماذا يعمل و اين يقضى وقته و مع من يجلس على المقهى ؟ المهم تم الزواج و بقيت هذه القصة نتناقلها للتدليل على ضرورة السؤال ( الى محمد ابوزيد انا اتكلم عن عمك صادق رحمه الله )

الخلاصة انى ارى ان الإجابة الأمينة لمن يسأل عن شريك او شريكة الحياة قبل اتمام الإختيار نوع من الأمانة التى لا يجب ان نتردد امامها و لكن علينا ان نكون فى غاية الدقة و الحيادية و الموضوعية

[بنت شعنونة]

أنا و الله كنت بحاول أكون موضوعية فى كلامى

هنا مربط الفرس يا كروس..

يعني ان تقولي الحقائق كما هيا

مش من خلال عيونك انت..

طبعا اكيد بعد فترة انفصال في حاجات بتبان اوضح من وقتها

اهم حاجا انك تكوني "حقاااااااااانية" وراعيتي ربنا في كلامك..

وانا معاكي اللي عملتيه صح صح صح..

لآنك ما زيفتيش ولا فتريتي..

يعني شهدتي شهادة حق..وهما اللي طلبوها.. يعني انتي لم تقصدي تخريب اي علاقة من اي نوع..

في مرة واحدا صاحبتي كانت مخطوبة لزميلنا.. وهوا حكالها على واحد

من زملائنا في الكلية..

اتصل بيه وقاله.. خلي بالك فلانه دي ما تنفعكش.. دي كذا وكذا وكذا..

المهم خطيبها كتر خيره حكالها

قالتله بس انا عمري ما عرفت فلان دا ولا شفته؟؟

مع انه دفعتنا؟

قالتله اوك.. عاوزاك تقالبله بكرا في الكلية وانا معاك

وراح فعلا

وفتح معاه موضوعها

طبعا دا انطلق في الكلام عنها.. انها الساحرة الشريرة وحاجات كدا

وهي واقفا بعيد

المهم راحت وسلمت ووقفت حبة وهوا عمال يكمل كلامه عليها

فخطيبها راح مبتسم وقاله

انت تعرف فلانا؟

قاله اااااه طبعا.. امال يا راجل؟

رحت هيا ضاحكا وسلمت عليه تاني

وقالتله طب انا فلانة... تعرفني منين بقى يا سيدي؟

ودا وشه جاب الوان..

ومن يومها الكلية كلها عرفت انه كذاب..

وقال ايه راح يعتذر لهم ويقول

اصل دا الكلام اللي انا "سمعته"؟ :D :D :cry: :cry: :twisted: :twisted: :twisted:

[بنت شعنونة]

بما ان الموضوع اتقسم وبقى موضوع مستقل..

عاوزا اسأل على حاجا بالمرة..

مين اولى في حالة الأرتباط؟ راي اصحاب الشأن؟ والا راي الناس؟

يعني فرضا اتنين عاوزين يتجوزوا

وهما مستريحين لبعض وشايفين انهم مناسبين لبعض

لكن الناس رايها انهم غير مناسبين؟

وطبعا كل واحد ها ينزل عليهم بفتوة معتبرة :?

ناخد براي الناس؟ والا استفتي قلبك؟

دي حاجا

الحاجا التانية...

فرضا البنت كويسة او الولد كويسة

لكن اهل الطرف التاني عارضوا الأرتباط..

لآسباب تافهه

زي مثلا.. كانوا عاوزين يجوزوه فلانه تانية

او اختلاف جنسية

او اختلاف طبقات مادية

حاجات زي كدا

يبقى مين اولى؟

يسمع كلام اهله؟ والا قلبه؟ خصوصا انه هوا اللي ها يتجوز مش اهله

وهل يبقى دا عقوق لآهله؟؟

خصوصا مع ردود الفعل المعروفة من الأهل والعدائية :? :?

موضوع مصري صميم وبالي... بس اهو.. ها يجنني من كتر ما بشوفه :roll: :roll: :? :? :twisted: :twisted: :twisted:

[الطفشان]

اولا تعليقا على الموضوع الاصلي

قال رسول الله صلى الله عليه و سلم

المستشار مؤتمن

حديث صحيح

يعني المشورة امانة

مين اولى في حالة الأرتباط؟ راي اصحاب الشأن؟ والا راي الناس؟

الرأي المتكامل

يعني الرأي المكون من رأي اصحاب الموضوع و رأي الناس ايضا

الحاجا التانية...

فرضا البنت كويسة او الولد كويسة

لكن اهل الطرف التاني عارضوا الأرتباط..

لآسباب تافهه

زي مثلا.. كانوا عاوزين يجوزوه فلانه تانية

او اختلاف جنسية

او اختلاف طبقات مادية

حاجات زي كدا

يبقى مين اولى؟

يسمع كلام اهله؟ والا قلبه؟ خصوصا انه هوا اللي ها يتجوز مش اهله

وهل يبقى دا عقوق لآهله؟؟

خصوصا مع ردود الفعل المعروفة من الأهل والعدائية :?  :?

كل حالة بحالتها

case by case

و لا يمكن وضع قاعدة عامة

[عادل أبوزيد]

لكن اهل الطرف التاني عارضوا الأرتباط..

لآسباب تافهه

زي مثلا.. كانوا عاوزين يجوزوه فلانه تانية

او اختلاف جنسية

او اختلاف طبقات مادية

حاجات زي كدا

يبقى مين اولى؟

يسمع كلام اهله؟ والا قلبه؟ خصوصا انه هوا اللي ها يتجوز مش اهله

وهل يبقى دا عقوق لآهله؟؟

خصوصا مع ردود الفعل المعروفة من الأهل والعدائية :?  :?  

موضوع مصري صميم وبالي... بس اهو.. ها يجنني من كتر ما بشوفه :roll:  :roll:  :?  :?  :twisted:  :twisted:  :twisted:

الفاضلة شعنونة حرصت على الرد عليك ربما من منطلق مسئوليتى كأب و لا أكتمك سرا ان هذا الموضوع بالذات اطرقه باستمرار هذه الأيام مع اولادى .

إبنى الكبير أبدى رغبته فى الإرتباط مع زميله له كانت تثير اعجابة منذ السنه الأولى فى الكلية ثم اختفت من امام ناظريه لسنوات طويلة - محمد تاخر فى الكلية ثلاث سنوات - ثم رآها و التقى بها و جائنى فرحا !!! و لكننى قابلت فرحته بتحفظ و بدأنا نتكلم عن الملاءة الإجتماعية ..... الخ و يبدو انه استعمل ذكائه معى فترك الأمر لى اذا رايت عدم الملائمة فسينزل على امرى !!! و لكن أنا كأب لم أحرؤ على وأد الفرحة فى قلبه و اعلن الرفض و لكننى حتى الآن لم أعطى رأيى بالموافقة !!!!!

قصصت عليكى تلك القصة لأبين لكى ان امر الإختيار ليس سهلا

إبنتى الفاضلة ابناء الخليج - بنات او اولاد - يتميزون بحسن النية و البراءة عاشوا معظم حياتهم مع من على شاكلتهم

هنا فى مصر قد تلقين من يتكتك و ينصب شباكه حولك ظنا منه ان تحت القبة شيخ و قد حدث ذلك كثيرا ..... أخلص من ذلك الى انه لا يكفى ان تكونى مرتاحة فقط للطرف الآخر بل لابد من تقصى و سؤال عنه و عليكى انت ان تصرى ان يكون من بيئة ووسط اجتماعى مقارب لك فالزواج اولا و اخيرا ارتباط بين عائلتين فى شخصى العريس و العروس

و اذا كان لى ان انصح فاهمس فى اذنك اعيدى نظر فى من تقدم لكى من الأقارب او الجيران... اقصد جيران العمر ... و اعلمى ان الإختلافات الحادة اجتماعيا و بيئيا لا يمكن تجاوزها مع الزمن بل تزداد

و اخيرا دعواتى بالتوفيق

[crossfield]

إيه ده؟انتوا هنا و سايبنى أدور عليكم هناك؟ :w: طيب حد يدينى أى هنت بإن الموضوع إتنقل خليتونى أظلم الادارة . ربنا يستر دول ناس إيدهم طايلة :lookaround: .المهم نرجع لموضوعنا.

الأخ سى السيد:

فطستنى من الضحك و أنا بصراحة مكنش ليه نفس أضحك .المهم حضرتك بتتكلم فى موضوع مفروغ منه حكاية الأزواج دى ورد ذكرها فى القرآن فى آية معناها إنه حرام إن أى حد من الزوجين بعد ما التانى أفضى ليه بأسراره يفضحه و يتكلم عنه بعد الانفصال.لكن الوضع بالنسبة لى أنا مختلف .ده كان مجرد خطيب أو فى كل الحالات أجنبى بالنسبة لى و الخطوبة لبست إلا وعد بالزواج زى ما حضرتك عارف.ثم أنا ما افتريتش و مألفتش و كمان مقلتش كل حاجة .و الله أنا ما أخدت الموضوع تصفية حسابات شخصية أو فرصة عشان أصطاد فى الميه العكرة زى ما بيقولوا .إفرض إن البنت دى بنتك مش كنت حمدت ربنا إنه نجاها أو لقت حد ينبهها حتى لو هيه إرتبطت بيه بعد كده و إكتشفت اللى أنا عرفته مؤخراً يبقى ذنبها عليها هيه مش عليه أنا .أنا إتطلب منى شهادة حق و كان لازم أقولها. ليه متعتبرهاش "إماطة أذى " عن طريق البنت الغلبانة دى؟أنا بصراحة مكنش قصدى العيوب العادية اللى موجودة فينا كلنا و اللى ممكن بمرور الوقت تتعالج أو الواحد يتفاداها أنا كان قصدى العيوب الجوهرية اللى مينفعش واحد بيها يفكر فى إرتباط أصلاً (عقد نقص مثلاً ؛ لسان طويل؛الخ) العيوب دى معتقدش إنها تتغير أو تتعالج ؛الواحد يايبقى متربى يا إما مش متربى و مالهاش حل تالت. تفتكر واحد بالمواصفات دى يقدر يحافظ على أولاد الناس؟؟؟ ثم أنا معاك طبعاً ربنا يسهله بعيد عنى لكن أنا إتطلب منى شهادة حق متوقف عليها مصير واحدة ممكن تدعى عليه فى يوم من الأيام إنى مقلتلهاش الحقيقة.

المهم؛بصراحة أسعدتنى بمشاركتك فى الموضوع ده و إن كانت وجهات نظرنا مختلفة.لكن قوللى إيه علاقة إسمى بالكرواسان و الفول و السمن و العسل؟؟؟؟ طيب أنا دلوقتى إسمى كروسفيلد إيش دخل إسمى فى حرف العين؟ :oops:

أخ أمير:

متشكرة لاهتمامك و متخفش أنا معكتش قوى و مدخلتش فى تفاصيل لكن "كل لبيب بالاشارة يفهم"

أستاذ عادل:

متشكرة جداً لمشاركتك معانا .رأيك ريحنى و حسسنى إنى إتصرفت صح .

حبيبتى شعنونة:

متخافيش إحنا شعارنا القومى"الصدق أقصر الطرق للإقناع" :wink: و إسالى حسحس "ضمة على الحاء لو سمحتوا)

أما بالنسبة للموضوع اللى طرحتيه:انا رأيى إن مش كفاية حكاية الإرتياح دى و عمرها ما كانت القاعدة الأساسية عشان أى إرتباط ينجح؛ عشان كده رأى الناس برضو مهم لان البعيد عن الموضوع بيشوفه بوضوح و بعقلانية أكتر.لكن طبعاً مش أى ناس لازم يكونوا ناس بتثقى فيهم و عندهم خبرة أكتر منك .

أما بالنسبة للموضوع التانى فأنا بصراحة شايفة إن لو الموضوع وصل لمرحلة الاختيار يعنى يا إما الأهل يا إما اللى الواحد عايز يرتبط بيه أنا شايفة إن أى حاجة غير الأهل بتتعوض و خصوصاً و إن الأهل لو تمت جوازة بدون رضاهم و بالذات لو إبنهم بتبقى وقعة مراته بيضاااااااااااااااا :sigh: .إنتى عارفة مجتمعنا .فمفيش داعى الواحد يحط نفسه فى الموقف ده اصلاً و" كفى الله المؤمنين شر القتال"...و بعدين فيه حاجة مهمة يا شانا عايزة أقولهالك مفيش حد بيفضل تفكيره واخد خط واحد على طول ؛يعنى اللى عاجبك النهارده ممكن ميعجبكيش بكره و العكس ...رأينا فى الناس مش بيفضل ثابت بيتغير بمرور الوقت و ده من نعمة ربنا علينا.

أخ الطفشان:

ربنا ميطفشلك حد غالى عليك

ده اللى كنت عايزة أتأكد منه .جزاك الله خيراً .و بالمناسبة أنا متشكرة جداً على وصلات الأحاديث اللى حضرتك نزلتها لما كنا بنتكلم عن ال "methodism” "مش" الميسوديت" على رأى بعضهم :sar: .

[se_ Elsyed]

أنا بصراحة مكنش قصدى العيوب العادية اللى موجودة فينا كلنا و اللى ممكن  بمرور الوقت تتعالج أو الواحد يتفاداها  أنا كان قصدى العيوب الجوهرية اللى مينفعش واحد بيها يفكر فى إرتباط أصلاً (عقد نقص مثلاً ؛ لسان طويل؛الخ)

أنا كان قصدي كده فعلاً فى حاجات يتسكت عليها وحاجات تانية لأ ، يعني مثلاً لو كان أخينا ده عصبي ممكن يكون غير مقبول بالنسبة لك ، لكن بالنسبة لواحده تانية يبقى قشطه.

لكن قوللى إيه علاقة إسمى بالكرواسان و الفول و السمن و العسل؟؟؟؟ طيب أنا دلوقتى  إسمى كروسفيلد  إيش دخل إسمى فى حرف العين؟ :D

انا أقول لك يا ستى ، أنا فعلاً بأحب أشجع الشباب الصغير اللى عنده فضول فى معرفة كل شيء أنا كنت كده وانا فى سنك من 35 سنة :lol: ، فى أحدى تعليقات إبنتنا شعنونة على موضوع ليكي ناديتك وقالتليك يا " كروساية " وكروساية دى فى معجم لسان العرب هو مفرد " كرواسان " أقرأوا باه وخلوا عندكم حب الأطلاع وبلاش تتسمروا قدام التليفزيون وهاله سرحان والبنت التانية بتاعة ال ام بي سي " رازان " :cry:

أما علاقة أسمك بالفول ... فبتهيألي لا علاقة له بالمره بس أنا كنت قولت أن كل فوله ولها كيال ... أما السمن والعسل فهو لأنى قولت أن خطيبك السابق ممكن تتوافق طباعه مع البنت اللى متقدم لها دى ويبقوا سمن على عسل .

وهأقولك معلومة بدولار والحساب يجمع كلمة " كاني وماني " اللى بنستخدمها فى لغتنا العامية الدارجة .. معناها سمن وعسل فى اللغة الهيروغليفية القديمة .. دى حقيقة على فكرة مش تهريج.

وربنا يوفقك يا كروساية يا بنتي وينور لك طريقك.

[se_ Elsyed]

متشكر جداً على مداخلتك القيمة يا أستاذ عادل ، وبالتأكيد نحن فى حاجة إلى خبرة أعضاءنا الكبار - فى المقام - لكي يظبطوا دفة الأمور ومايسبوهاش فى أيد الشباب الطايش اللى زيي كده :twisted:

[بنت شعنونة]

استاذ عادل

كلام حضرتك صح صح صح جدااااااااااااا

انا من يوم ما رجعت مصر الى يومنا هذا والله

بيعدي على شباب يعملوا عليا افلام ولا عمر الشريف وانور وجدي

وحب وغرام وافلام

كله عشان فاكرين تحت القبة شيخ زي ما حضرتك قلت..

ومعتمدين على ان البنت يوم ما بتقع في الحب

بتبيع اهلها عشان خاطر حبيبها او تجبرهم بالغصب او الرضا على انهم يجوزوها لحبيب القلب

والحمدلله ربنا كان بينجيني من الأفلام دي...كله برحمته اولا وثانيا لآني صريحة جدا مع اهلي فكانوا بجد هما القلعة الحصينة اللي انا بستخبى في حضنها وانا مش قلقانا.. :roll: :cry:

لكن.. المشكلة دلوقتي انك لما تسال على بنت خصوصا البنت

تلاقي الف كلمة وكلمة عليها

وتحتار؟ مين بيقول الحق؟ وين كداب؟؟

مثال..

واحدا قريبتي وهيا من المنصورة.. والمنصورة بلد صغير كما تعرفون والكل فيها عارف بعضه

المهم اتقدملها عريس ابن ناس وكويس

وكاالعادة راحوا سالوا عليه وعلى اهله

وعرفوا ان والده تاجر ذهب..وانه هوا راجل بمعنى الكلمة ولكل بيشكر فيه..

واتجوزوا...

وبعد شهرين جواز

عرفت انه حشااااااااااااش كبيييييييييير جدا

وان اوالده متجوز واحدا تانية على مراته في السر

وافلام عظيييمة... انتهت ببهدلتها معاه كذا سنة

لحد ما خلفت وربنا كرمها وهوا حس بمسؤولية الطفل ف اتعدل..

طب ما اهم؟ سألوا وكل حاجا؟ وما وصلوش؟

قصة تانية.. واحد حب واحدة عرفها من على النت وقرر الزواج منها

طبعا اهله رفضوا عشان الطريقة‍‍‍؟

لكن هوا صمم. وخلاهم يقابلوها..

لقوها عاديةوبنت ناس وكدا...لكن الشكوك كانت جواهم

وتطوع واحد من اصدقاء العريس بالذهاب الى بوه واخباره ان البنت دي سمعتها على "النت" مش قد كدا وبتكلم شباب كتير‍‍‍‍؟؟؟؟

طبعا لأب راح رافع السماعه ومكلم البنت وشاتمها عشان تبعد عن ابنه

والبنت انهارت تماما

ولما العريس عرف

خد صاحبه دا وراح لأبوه وخلاه يعترف بالحقيقة.. انه عمره لا شاف ولا كلم البنت دي وانه الما كلمها كانت محترمة فعلا.. وانه الي قاله دا مجرد كلام "سمعه"‍‍‍‍؟؟؟

والجوازا اتفركشت طبعا :? :?

الناس يمكن كانت زمان كويسة

انما دلوقتي

لو ها تسال حد عنده بنت.. تلاقيه يحقد على البنت اللي ها تجووز ويطلع فيها القطط الفطسانة؟

ولو ها تسال على ولد.. يطلعوه ابو الرجال لمجرد ان راجل؟؟

بيني وبينكم هوا وضوع محير جدا.. :?

يعني مثلا.. اخويا التاني عاوز يخطب واحدا. وانا بقى مش طايقااااهاا :twisted: :twisted:

وعلى جثتي اخطبهاله

مع اني عمري ما شفتها

انما سببي الوجيه. انها بتكلمه ابتدأ من الساعا 1 بالليل لوش الصبح؟؟؟؟؟ :shock:

مش فارق معاها بقى امتحانات من غيره

ولو رديت عليها تقفل في وشي؟؟؟؟؟

احترمها ازاااااااي دي؟ :twisted: :twisted: :twisted: :twisted:

[se_ Elsyed]

يعني مثلا.. اخويا التاني عاوز يخطب واحدا. وانا بقى مش طايقااااهاا :twisted:  :twisted:  

وعلى جثتي اخطبهاله

مع اني عمري ما شفتها

أيه يا يا ست ماري منيب .. سيبي الولد يعيش حياته طالما ناوي خير وعايز يرتبط بيها ... وقدمي السبت تلاقى الحد قدامك يا شنشن

بس أنا رأيي يا جماعه أن فترة الخطوبة مهمه جداً فى حياة الاتنين اللى عايزين يرتبطوا ببعض ، ولازم الطرفين فيها يتمتعوا بقدر من الذكاء .. بمعنى أن مهما حاول أى طرف أن يتجمل ويعمل فيها حبوب ومرهف الحس ( سواء الولد أو البنت ) بس برضوا بتبقى فيه مواقف بتبين صفات الأنسان ولازم كل طرف ينتبه لها ويقيمها ، يعني ماتقولوليش أن فيه واحد بخيل أو سليط اللسان .... الخ مش هايبان فى فترة الخطوبة أو مثلاُ عصبي ( زي حالاتي كده .. أصلي بعيد عنكم برج العقرب ) وبرضوا لازم الواحد ( أو الواحده ) ينتبه للعائلة والبيئة اللى عايش فيها الطرف الأخر ويشوف تصرفاتهم ودماغهم عمله أزاي ، يعني بإختصار يخليها فترة للحكم على الطرف الأخر .. مش بس فترة حــب وغرام وأكل ترمس على الكورنيش.

[Salwa]

كيف حالكم يا أحبائى.

انا شخصيا معنوياتى....تحت الصفر.

موضوع الحرب فقط...هو اللى مسيطر على كل حواسى.

بتتكلموا على ...الخطيب...والخطيبة....واللى سأل...واللى...واللى...

علشان بس تعرفوا...حاحكيلكم حصل ايه..وفى عائلتى.

خالتى فى شبابها كانت..الصراحة...ومازالت..جميلة جدا جدا..وفى يوم

كانت تسير مع زوجها...واخدين بالكم...

رآها شخص كان يسير مع صديقه../هو رجل محترم ومعروف/ وقال

لصديقه..اسأل لى عن أهل هذه الفتاة....تقريبا هذا أخوها.

لان زوج خالتى ..تركى..

فى اليوم التالى..صاحبه أكد له انها فعلا كانت تسير مع اخيها...وانها

فى سنه اولى آداب قسم لغة انجليزية..وانها لها 4 اخوات.

وتانى يوم...حضر الشخص المحترم مع والديه....ليخطب خالتى من

زوجها...وكان يوم.

ورغم ان زوج خالتى انسان راقى...وهادىء....الا...انه

كان بيصرخ زى المجنون...انت جاى تتجوز مراتى.

وآدى اللى يعتمد على المعلومات اللى تجيله من الناس.

لابد من السؤال....بس سؤال شخص موثوق فيه..

على فكرة...خالتى مكانتش فى كلية الآداب.

الاسبوع اللى فات....كان عندى نفس حالة...الانكسار...من ساعة

الحرب.

وبالصدفه اتصل بنا..رجل وزوجته...حضرا هنا رحلة لمدة اسبوع.

هو كان صديق لزوجى من ايام الدراسة.

وانا فرحت...واحده مصرية...،مش بقول لكم...انا أكيد من غرائب الطبيعة..كأننا من نوعين مختلفين من الكائنات العجيبة.

المهم ...احكى لكم بعدين...علشان مانطلعش برة الموضوع.

بالصدفة طلعت تعرف....واحد قريبنا.

وتطرق الكلام على...أختى.

وهى لاتعرف انها...أختى.

وحكتلى...حكاوى...وانا..//رزينه قوى//

كله كذب.

وانا اهلى..ملهمش دعوة بالسياسة.

واحنا بنوصلهم المطار...زوجى قال له...على فكرة ...لو شفت فلان

ابقى قولله ان سلوى أخت مراتك بتسلم عليك..

الراجل فتح بقه...جاله ذهول.

تلاقى لسه بقه مفتوح لحد دلوقت.

فيه ناس...تحب تبين انها تعرف اللى محدش يعرفه.

ويؤلفوا قصص ...ويكذبوا و.....يصدقوا نفسهم.

يعنى..مثلا..النتيجة ايه؟

زوجى ..قرر...ميعرفهوش بعد كدة.

وطلعت عليه جلالة..يقول..ازاى راجل كبير ويكذب...وليه؟

وهى...هيافه منقطعة النظير.

يبقى..لو..سؤال حد زى دول فى مشروع زواج ..معناه ايه؟

فشل زريع طبعا.

ودى امثلة قريبة منى ...بس علشان تخللوا بالكم...فيه ناس كويسة

وناس مزاجها تبوظ اى حاجة.

موضوع كروس فيلد..هى اتقرصت منه...وحكت للبنت بعد ما ضغطت

عليها جامد...ومن واقع تجربة هى عاشتها فعلا...

بس المرة الجاية...خللى بالك.

فيه مثل أسبانى بيقول مامعناه...الفم المقفول لايدخله الذباب.

انا وجعت دماغكم....بس حكيت لكم على اللى حصل.

سلامى.

[بنت شعنونة]

أيه يا يا ست ماري منيب .. سيبي الولد يعيش حياته طالما ناوي خير وعايز يرتبط بيها ... وقدمي السبت تلاقى الحد قدامك يا شنشن  

اقدم السبت لواحدا بتكلم اخويا من ورا اهلها الساعا واحد بعد منتصف اليل؟؟؟؟؟؟؟؟؟؟؟؟؟؟

لا وايه كمان

لو انا رديت عليها تقفل في وشي السسسسسسسسسكة؟؟؟؟؟ :twisted: :twisted: :twisted:

طب قولها هيااااااااااااا تقدم السبت... دا انا حمااااتها :wink: :wink:

والنبي دي احترمها ازاي بس :?

ولازم الطرفين فيها يتمتعوا بقدر من الذكاء .. بمعنى أن مهما حاول أى طرف أن يتجمل ويعمل فيها حبوب ومرهف الحس

دا اهم حاجا

لكن طول ما احنا في مصر مستحييييييييييييييييييييييييييييل انك تلاقي حد مش "بيمثل" وهوا خاطب :twisted: :mad: :twisted: :twisted:

احكيلكوا قصة وانا متاكدا انه استحالة تصدقوها.. بس والله حصلت زي ما بحكلكم..

واحدا عزيزة عليا اصحاب من يجي 12 سنة ومن كتر حبي فيها كنت اقول عليها بنت عمي لما اعرفها بحد..

ودايما اخواتي كانوا مش طايقنها وبيقولوا عليها "واحدا مش تمام" وانا ادافع عنها واقولهم انها عبيطة بس وكدابة شوية.. لكن ربنا يهديها

وعلى فكرة.. عليتها كلها فيها طبع الكدب.. او الفشر بمعني اصح..

المهم واحد زميلي كان عاوز يتجوز فرشحتها ليه.. وشافها وشافته الخلاصة عجبوا بعض وابتدوا يخرجوا سوى طبعا هوا كلم اهلها رسمي وانا كنت اخرج معاهم "قلة" معتبرة.. بس ماشي.. لجل خاطرهم كله يهون :neutral: :neutral:

وطبعا الرقة والرومانسية كلها تجسدت فيها.. واشي مرة تطبخله اكل وهيا جايا وتجيبه.. واشي تعمله النسكافيه اللي بيحبه

واشي هوا يجبلها ورد!!

واشي دبدوب الحببوب

واشي ياكلوا بعض..

واختكوا قاعدا عمالة تلعب في المفاتيح او تقرا كتاااااااااب جنبهم :twisted:

وفي يوم البنت دي كانت عند خطيبها "لمرتقب" في الشغل وخرجت لقيته اتصل بيصوتلي هيا فييييييييين دي بقالها 4 ساعات ماروحتش؟

قلبنا الدنيا عليها.. وفي الأخر لقينها وبتقول انها كانت مخنوقة ف راحت تتمشى شوية ع النيل

ما علينا

بعدها بككام اسبوع كانت برضه عند خطيبها ومروحه بعده

المهم لقيته بيكلمني الساعا 12 وهوا بيلطم؟

في ايه يا عم

البنت كانت عندي من 5 ساعات كدا وما روحتش وموبايلها مقفول واختها مش عارفا هيا فين اصلا؟

قلتله طب يا ابني انا في السينما مع اهلي شوية كدا وها اكلمك

لقيته بيهب فيا

انا عندي نبطشيييييية دلوقتييييييي ومافياش اعصاب اقعد قلقان عليهااااا

- طيب يا عم

المهم انا كنت متاكدا نوعا ما انها اكيد روحت وعاملة فيه مقلب

لآني اعرفها من كذاااااااا سنة واعرف اهلها ومتاكدة مليوووووووون المية انها لو اتاخرت ساعا واحدا عن معادها من غير ما تقول لآهلها هيا فين كانوا قلبوا الدنيا عليهاااااااا واول واحدا ها يكلموها هيا انا

المهم فيييييييييين لحد 6 الصبح مافيش خبر عنها

والواد اتجن بجد

المهم طمنته

وتاني يوم كلمتنا

قالت.. انها كانت بايتا عند صاحبتها.. ومافيش تلفون تتكلم منه.. موبايلها شحنه فصل.. موبايل صاحبتها مع جوزها وجوزها برا

يعني من الأخر كلام جننا زيادا..

طبعا الولد راح رايحلها تاني يوم وقالها كلمة واحدا

البنت اللي تبات برا بيت اهلها من غير علمهم.. ما تلزمنيش..

طبعا انهارت

و والله انا حاولت اقنعه انه اكيد كانت بيتا في بتها بس دي افلام بنات وحركات عليه

ابدا..:(

بعد يومين لقيتها بتكلمني وتعيط.. انه كل الكلام كدب وانها كانت بياتا في بيتها فعلا.. لكن مكتئبة ومش عاوزا تكلم حد

طبعا ع التهزيق والبهدلة اللي اديتهولها

انا قفلت من هنا

وهيا كلمت خطيبها من هنا.. وهاتك با شتايم فيا!!!!!!!!

وانه انا السبب انه مش طايقها.. وانا انا برسم عليه.. وانه وانه وانه

لدرجة اني يومها من صدمتي فضلت قاعدا اعيط 24 ساعا

بس الحمدلله الولد عارفني من اكتر من 8 سنين فقالها عموما انا عارف شانا كويس.. واحنا موضوعنا منتهى

بعد اسبوع استلمت منها ظرف سابته عند البواب من 150 صفحة وش وضهر شتايم فيا.. وفي الولد العريس....

شفته الأفلالالالالالالالالالالالالالالالالالالالالالالالالالامم

وتقولوا صراحا في فترة الخطوبة؟؟؟؟؟؟؟؟؟

مافيش فايييييييييييدة :(

[Salwa]

شانا حبيبتى.

مش معقول ياشانا؟

قال وبيسألوكى عندك اكتئاب ليه؟

يا ابنتى للأسف..خير تعمل...شر تلقى.

ده موضوع شائك جدا..الصراحة.

ماهى دى المشكلة....مفيش مخلوق يقدر يحكم على مخلوق تانى

من غير ما يعاشره..

فترة الخطوبة مهمة جدا..بس متكونش الخطيبة ولايكون الخطيب

بس بيفكروا يقضوا وقت سعيد...

وهى...لابسة وش مش بتاعها.

وهو...عامل سيف الدين قطز.

يعنى فيه صراحة....لو ناويين فعلا يتجوزوا....

ولايعتمدوا على كلام الناس.

روقى ياشانا...تعيشى وتاخدى غيرها.

ماينوب المخلص.....الاتقطيع هدومه.

سلام.

[بنت شعنونة]

ما انا بعد كدا يا ماما سلوى بقى شعاري في الحياة..

امششششششي في جناااااازة وما تمشيش في جوااااااازة

تووووووووووووبة :lol: :D :lol: :oops: :lol: :roll: :roll:

[Cleo]

من أهم الأسباب اللى بتخلينى أطفش عرسان الصالونات و طالبى القرب من عابرى السبيل هى حكاية "و أنا أعرفه منيييييييين؟؟"

أيش يضمننى إن البنى أدم أخلاقه كويسة؟؟؟ يعنى مرة واحد "عابر سبيل" من إياهم :wink: زارنا فى البيت و قفل معايا جدا... فوالدتى قعدت تعدد فى محاسنه و تقوللى "ده ولد مهذب جدا" ..... كان ردى أنه طبيعى جدا إن واحد غريب داخل بيت ناس لأول مرة مش ممكن مايكونش مؤدب.... يعنى ده مش مقياس!!!!!!!

المشكلة يا جماعة إن الشعب المصرى عاطفى جدا.... يعنى واحدة تهمنى و جايلها عريس و نفسها تفرح و أنا نفسى أفرجلها... أقوم أشكرلها فى الشخص ده و أحببها فيه رغم إنى أنا نفسى ممكن مارضاش بيه كعريس أو أكون عارفة فيه عيوب خطيرة...

أو يمكن لأننا اتعودنا السلبية و الجبن من زماااااااااااان "أنا ايه اللى يوقعنى فى مشاكل مع التاس لو عرفوا إنى قلت عنهم كذا وكذا"

و نبتدى ننقل للغلبانة صورة وردية كاذبة لحد ما تقع فى الخية.... و يوم ما يطلع بنى أدم مش أمين عليها نقول "واحنا مالنا... ماهى كانت مخطوباله ولو كانت شاطرة كانت عرفت عنه كل حاجة من الأول" ...!!!!!!! :shock: :shock:

[crossfield]

و نبتدى ننقل للغلبانة صورة وردية كاذبة لحد ما تقع فى الخية.... :shock:  :shock:

جعلونى مجرماً :( :( :(

[crossfield]

انا أقول لك يا ستى ، أنا فعلاً بأحب أشجع الشباب الصغير اللى عنده فضول فى معرفة كل شيء أنا كنت كده وانا فى سنك من 35 سنة :D ، فى أحدى تعليقات إبنتنا شعنونة على موضوع ليكي ناديتك وقالتليك يا " كروساية " وكروساية دى فى معجم لسان العرب هو مفرد " كرواسان " أقرأوا باه وخلوا عندكم حب الأطلاع وبلاش تتسمروا قدام التليفزيون وهاله سرحان والبنت التانية بتاعة ال ام بي سي " رازان " :oops:

أبى الروحى سى السيد:

متشكرة جداً على المعلومة القيمة دى بس أعتقد إن الأمر إختلط عليك شويه لان الكلام ده ورد فى مجلة علمية إسمها... إسمها :roll: ...آه "الفطائر الغربية على الطبلية العربية" يعنى مش فى لسان العرب زى مقلت .ثم أنا و لله الحمد بتفرج على "المرناة"فقط عندما تشتعل الحروب و يشتد الوطيس"الوطيس ده مبيتكلش على فكرة " و هتتبسط منى أكتر لما تعرف إنى مبسمعش غير شعبان عبد الرحيم و رمضان البرنس هاه إيه رأيك ؟شفت بقى أنا مثقفة إزاى؟ :oops:

وهأقولك معلومة بدولار والحساب يجمع كلمة " كاني وماني " اللى بنستخدمها فى لغتنا العامية الدارجة .. معناها سمن وعسل فى اللغة الهيروغليفية القديمة .. دى حقيقة على فكرة مش تهريج.

يا ساتر!!!!! هوه مفيش حد بيعمل حاجة أبداً لوجه الله :twisted: .عموماً متشكرين و نردهالك فى ظروف أحسن من كده.