سنة اولى جوااااااز

[سهيلة]

اختكم يا جماعة لسة ف مرحلة سنة اولى جواز

يعنى عدى منها 8 شهور دلوقتى

بصراحة قبل الزواج ما كنتش مع الراى اللى بيقول ان اصعب سنة ف الزواج هية السنة الاولىىىىىىىىى

لكن :ninja: :sad:

التجربة خير دلييييييييل

السنة الاولى دىىى موش بس اصعب سنة دى سنة المشاكل كلهاااااااا

اية كمية الشد والجذب والخصام والصلح دىىىىىىىىىى

فى الاول الواحد يتصدم بصفااااات جديدة ف الطرف التانى

عارفين كانى ف فيلم بشوف انسان تانى غير الانسان الرقيق الديسنت جدااااااااااا

بتاع فترة الخطوبة

اللى موش بيقول دايما غير كلام حلو

وكمان موش بشوف غير الابتسامة على وشة

وكمان بشوفة ف كامل اناقتة ف فترة الخطوبة واحنا خارجين

تخيلو بقى بين يوم وليلة كل دة يتبدل wst::

ممكن اشوفة مكشر

او بدقن طويلة

وممكن اشوفة بلبس البيت

اما بقى

الرومانسية

بصراحة عشان ما اظلموش هوة اتبدل فيها بالتدريج

يعنى اولا عندكم شهر العسل والشهر اللى بعدية بردو كويسين

لكن بعد كدة

اتفاجات

بجد اتفاجات

الرومانسية فجاة اختفت من الحياة

والصمت الرهيب وصل

وخصام على اقل الاسباب

وكاننا موش عارفين بعض

وشد وجذب طول الوقت

وعناد كمان

لكن ف الاونة الاخيرة بعد مرور 6 شهور ع الزواج

الحاجات دى قلت بالتدريج

وبدانا نوصل لنقطة التقاء وتفاهم وحوار ف كل شىئ :blink:

الحمد للة

بس بعد عناااااااااااااء صدقونى :wub:

ياترى يا جماحة مريتو بالظروف دى حد يطمنى؟؟؟

ويقوللى دة تبيعى ولا لا

والرومانسية لييييييية بتختفى بعد الزواج

بتروح فين

ولا الناس بيتغيروا

ولا مشاكل الحياة بتقتل الرومانسية ولا ايييية؟؟

[هيثم نافع]

مش خايفة لحسن البيه بتاعك يشوف الكلام ده :sad: :wub:

[حشيش]

السنة الاولى دىىى موش بس اصعب سنة دى سنة المشاكل كلهاااااااا

اية كمية الشد والجذب والخصام والصلح دىىىىىىىىىى

فى الاول الواحد يتصدم بصفااااات جديدة ف الطرف التانى

عارفين كانى ف فيلم بشوف انسان تانى غير الانسان الرقيق الديسنت جدااااااااااا

بتاع فترة الخطوبة

اللى موش بيقول دايما غير كلام حلو

وكمان موش بشوف غير الابتسامة على وشة

وكمان بشوفة ف كامل اناقتة ف فترة الخطوبة واحنا خارجين

تخيلو بقى بين يوم وليلة كل دة يتبدل :sad:

ممكن اشوفة مكشر

او بدقن طويلة

وممكن اشوفة بلبس البيت

كفارة يامعلمة ... أجر وعافية إن شاء الله :wub:

ده حلو قوى إنه فضل سابك عليكى الرومانسية شهرين بحالهم wst:: ... الراجل ده من غير ما أعرفه حبيته بصراحة :blink: ... طب وانتى يعنى ما بتقعديش بلبس البيت فى البيت ومش بتكشرى أبداً ! ... يعنى إبتسامة الرضا بقضاء الله وقدره مش بتفارق شفايفك من ساعة ما اتجوزتوا !!! ... حسبنا الله ونعم الوكيل فيكم :ninja:

تم تعديل 22 أبريل 2008 بواسطة حشيش

[nash]

شوفي يا سهيله...السنه الاولي هايحصل فيها كل اللي تتخيليه واللي ماتتخيليهوش...وبعد كده صدقيني هاتكونوا عملتوا كل اللي نفسكوا فيه..

خناقات....شد وجذب....تكسير...تكشير....كل حاجه من غير إستثناء...وده طبعا تمهيد للحياة الجديده اللي لسه هاتشوفيها...

لإن هاتستهلكوا فيها كل الأسلحه المشروعه ..ووقتها مش هاتلاقوا حاجه جديده تضيفوها......

ولو مرت العشر سنين الاولانيين علي خير...يبأة إن شاء الله العشر سنين اللي بعديهم هايكونوا هينيين...

أسألي مجربه...

ولعلمك إن شاء الله لما ربنا يرزقك بالذريه الطيبه..مش هاتلاقوا وقت اصلا للشد والجذب نهائي...

ربنا يوفقك في حياتك..وتعيشي في احلي سعاده :sad:

[semsema]

تسجيل متابعة :wub:

قصدي ربنا يعينك :ninja:

الرجالة دول مالهمش امان....بسمعهم يقولوا كدا :sad:

[حشيش]

فيه حاجة كمان مش عارف إيه تفسيرها :wub: ... الراجل بعد أول كام شهر جواز بيحس إنه عايش مع خالته :ninja: ... طب فين راح الشوق من قلبه والرقة والحنية ؟! :sad:

[هشام عباس]

شوفي يا سهيله متقلقيش كل الجوزات كده اول سنه جواز بتبقى اصعب سنه

انا هقولك على حاجه كل الي بتقوليه بيحصل لمعظم الزيجات

بس معلش متقوليش اني متحيز للرجال بس الست عليها عامل كبير جدا جدا في العلاقه الزوجيه

يعني متبطليش تتكلمي معاه وتقوليله على كل الي بيضايقك منه ومن تصرفاته يعني بمنتهى البساطه لما يعمل حاجه تضايقك لازم تقوليله عليها وتتكلمي معاه وتطلبي منه انه يغيرها وانتي كمان حاولي انك بكل قوتك تحافظي على شوية رومنسيه بينكم

واكيد انتي ادرى في الطريقه الي هتتبعيها معاه لتجديد الحياه بينكم

وربنا معاكي

[هشام عباس]

نسيت حاجه مهمه جدا وهي انك تقوليله على الي بيضايقك لكن مش بنقد

يعني تختاري كلامك يكون رقيق وكمان الوقت المناسب والا هيعتبر ده منك تزمر ونقد في غير محله وتبقي جيتي تكحليها عمتيها

[badroora]

والله يا جماعة عقدتونا واحنا اللى كان امالنا كبير فيكم ومستنين تجربة ناجحة عشان نتشجع

ماشاء الله كل الاراء مبشرة

اللى يقول هما بس اول عشر خماشر سنه وبعد كدا الوضع بيتعدل

واللى يقول خالته :happy:

والله الواحد المفروض يعمل بالمقولة اللى بتقول

" pray for your freedom." :blink:

ربنا يسعدك يا رب بما انك بداتى الطريق

اما انا واللى زي لينا قاعدة تانية نقرر فيها هنعمل ايه smk:

تم تعديل 22 أبريل 2008 بواسطة Badria Mekkawy

[حسام يوسف]

السلام عليكم

أقترح ان تتحدثى معة يا دكتورة

الكلام يفيد بدلا من ان كل واحد ياخد جنب

قولى اللى مزعلك

وبشكل لطيف

بضحك يعنى

ارميها فى وسط الكلام

وماتخافيش

مش المشكلة انك تقولى ايه

المهم تقوليه ازاى

the problem not what u say

the problem how 2 say

تحياتى ومستنى النتيجة

وتعالى يوم التلات خدى الاشعة

[سهيلة]

هيثم نافع مشاركة بتاريخ اليوم, 06:35 PM

مش خايفة لحسن البيه بتاعك يشوف الكلام ده

لا بصراحة موش خايفة لانى بكل بساطة بقولة الكلام دة

انو اتغير عن ايام الخطوبة

بس بقولة بطريقة غير مباشرة موش زى هنا طبعاااااااااااااااااااااااااااااا

حشيش مشاركة بتاريخ اليوم, 07:10 PM

كفارة يامعلمة ... أجر وعافية إن شاء الله

ده حلو قوى إنه فضل سابك عليكى الرومانسية شهرين بحالهم ... الراجل ده من غير ما أعرفه حبيته بصراحة ... طب وانتى يعنى ما بتقعديش بلبس البيت فى البيت ومش بتكشرى أبداً ! ... يعنى إبتسامة الرضا بقضاء الله وقدره مش بتفارق شفايفك من ساعة ما اتجوزتوا !!! ... حسبنا الله ونعم الوكيل فيكم

حشيش مشاركة بتاريخ اليوم, 07:24 PM

فيه حاجة كمان مش عارف إيه تفسيرها ... الراجل بعد أول كام شهر جواز بيحس إنه عايش مع خالته ... طب فين راح الشوق من قلبه والرقة والحنية ؟!

يا استاذ حشيش انت بتتحسبن علينا كمان

الستات دول واللة غلابة

اكيد طبعا بقعد بلبس البيت ف البيت وموش بكشر غير لما هوة يزعلنى يعنى انتم السبب ف التكشيرة

انما الزوج بييجى اساسا من الشغل مكشر

يعنى الست موش ليها ذنب انها تشوف التكشيرة دى

المفروض الرجل بمجرد ما يسيب الشغل ويدخل البيت ينسى كل حاجة حصلت برة

ويدخل بوجة بشوش البيت على المودام

وبعد ما يهدى ويتغدى ممكن يبقى يحكى اللى مضايقة

انما يا استاذ حشيش معناها اية بيحس انو عايش مع خالتة دى

قصدك ان الزوجة موش بتعتنى بنفسها مثلا

لااااااااااااا طبعا الست كدة تبقى غلطانة وكمان الزوج غلطان لانو موش بيلفت نظرها انها اهملت ف اناقتها ف البيت

لازم يبقى فى وضوح يا جماعة ف كل شىئ يضايق اى من الطرفين

عشان التصحيح بسرعة وما تكبرش المشكلة

nash مشاركة بتاريخ اليوم, 07:17 PM

ولو مرت العشر سنين الاولانيين علي خير...يبأة إن شاء الله العشر سنين اللي بعديهم هايكونوا هينيين...

أسألي مجربه

ناش حبيبتى

اللة يطمنك

العشر سنين الاولانيين

لااااا بسيطة

ولعلمك

إن شاء الله لما ربنا يرزقك بالذريه الطيبه..مش هاتلاقوا وقت اصلا للشد والجذب نهائي...

[~Heba~]

ولعلمك

إن شاء الله لما ربنا يرزقك بالذريه الطيبه..مش هاتلاقوا وقت اصلا للشد والجذب نهائي...

هو زى ما انا فهمت؟؟؟

اذا كده ..يبقى

الف مبروك يا دكتورة سهيلة

و ان شاء الله ربنا يديكى توأم زى اللى فى الصورة بتاعتى .. شايفة حلوين ازاى

[سهيلة]

semsema مشاركة بتاريخ اليوم, 07:19 PM

تسجيل متابعة

قصدي ربنا يعينك

شكرا يا سمسمة يا اوختشى

هشام عباس مشاركة بتاريخ اليوم, 08:26 PM

شوفي يا سهيله متقلقيش كل الجوزات كده اول سنه جواز بتبقى اصعب سنه

اللة يطمنك يا استاذ هشام بجد

هشام عباس مشاركة بتاريخ اليوم, 08:24 PM

يعني متبطليش تتكلمي معاه وتقوليله على كل الي بيضايقك منه ومن تصرفاته يعني بمنتهى البساطه لما يعمل حاجه تضايقك لازم تقوليله عليها وتتكلمي معاه وتطلبي منه انه يغيرها وانتي كمان حاولي انك بكل قوتك تحافظي على شوية رومنسيه بينكم

انا فعلا كنت ف الاول بتكسف الفت نظرة لاى حاجة تضايقنى

واقول اكيد هياخد بالة بعد كدة

لكن

حسيت امو اساسا موش واخد بالة انى مضايقة من كدة

عشان كدة انا بدات فعلا استخدم نصيحتك الهايلة دى يا استاذ هشام

وهوة كمان بدا يستخدمها وفعلا بدانا نتلاشى اى تصرف ممكن يضايق حد منناااااااااااااا

ففعلا دى نصيحة ذهبية

Badria Mekkawy مشاركة بتاريخ اليوم, 08:43 PM

والله يا جماعة عقدتونا واحنا اللى كان امالنا كبير فيكم ومستنين تجربة ناجحة عشان نتشجع

اختى بدريةةةةةة

لالا اوعى تتعقدى

احنا هنا بنقول المشاكل اللى مضايقانا من الجواز بس

بس صدقينى الحاجات الحلوة كتيير

واى حد بيكون فى مشكلة بيتكلم عنهاااااااااا

عشان يفضفض وكدة

فاى حد يقولك الجواز كلو عيوب يبقى كداب :blink:

عقبال لما نباركلك وتحكيلنا ذكريات سنة اولى زواج

حسام يوسف مشاركة بتاريخ اليوم, 09:03 PM

the problem not what u say

the problem how 2 say

اشكرك يا استاذ حسام

بجد دى النصيحة الذهبية التانية

اللى لازم اى حد يتعامل بيها مع شريك حياتة

:happy:

ويبقى السؤال اللى لسة ما حدش جاوب علية

رومانسية الخطوبة

اين تذهب؟؟؟

[vipwithyou]

يا جماعة يا جماعة ..

الأول يا أخت سهيله الحمد لله ان حضرتك بدأتى فى الاستقرار

دلوقتى بقى يا جماعة نناقش الموضوع

كل فتاه بتبقى داخلة الموضوع وهى يا عينى واخدة فكرة ان كل الأزواج بيتغيروا بعد الجواز

طيب ليه ما تفترضش حسن النيه ويكون عندها أمل ان زوجها ما يتغيرش فعلا بعد الجواز

وتعمل على كدة

يعنى زى ما قال الأخ هشام تتكلم معاه

انتوا بتتكلموا على العلاج بعد حدوث مشكلة طيب ليه اصلا يوصلوا لمشكلة لو هما بيتفاهموا فى كل حاجة بالهدوء

عايز بس افهم السيدات او الفتيات حاجة

ان الراجل بيضحى فى فترة الخطوبة بحاجة معينه فى شخصيته المفروض يستردها بعد الجواز

وهى السيطرة

البنت وهى مخطوبة بتلاقى نفسها بتتشارك فى كل حاجة كانها هى اللى بتاخد القرار لكن دة بيكون بتضحية من الزوج

دا فى رأيي ( برضوا يا بدرية )

بعد الجواز بقى الراجل بيفترض ان الزوجة بتكون تابعه له ولكن قراراته

انا هاقول انه من حق الرجل كدة فى حالة القرارات الصح

والمفروض فعلا يكون المناقشة مع الزوجة لأخذ الرأى مش لإتخاذ القرار وتفرق كتير

وهذا ليس تهميش للمرأة لكن المفروض يكون دة وضعها يا جماعة وما تزعلوش منى

لكن انا مش مع سي السيد وزوجته امينه ابدا ً ( طبعا ً مش سي السيد بتاعنا )

علشان كدة الزوجة بتيجى بعد الجواز مش متعودة على الاسلوب دة

وتواجة دة بمشاكل وزعل وانتقاد وكدة

كان ايام الخطوبة لو العروسة زعلت من العريس يجرى يراضيها حتى لو هى اللى غلطانه

هل السيدات عايزين كدة كمان بعد الجواز

متهيألى هيكون حمل كبييييييييييير جدا ً على الرجل

وربنا ما يجيب مشاكل ابدا ً يارب

وعلى فكرة مش الأولاد هما اللى يحلوا المشاكل بين الزوجين

بالعكس الأولاد المفروض انهم بيحرموا الزوج من زوجته لفترات طويلة ودة المفروض انه مشكلة

ربنا يسعد الجميع

لكن الدور على الطرفين بعد الزواج بعدما كان على طرف واحد قبل الزواج

شكرا

وربنا يسعدك يا أخت سهيله

[حسام يوسف]

السلام عليكم

فية نقطتين هنا

النقطة الاولى ان كتير مننا بيمارس الكذب الجماعى

يعنى هية مرفت امين

والبية بيبقى حسين فهمى

حما

وجيل

وبارفان

وقميص مكوى

الوان متناسقة

وهى على سنجة عشرة

(وبلاش اوصف هى بتبقى عاملة ايه لأحسن الجماعة المكفراتية يشتغلولى)

هوب

يحصل الجواز

ومافيش ممثل بيمثل 24 ساعة

وكل يوم

مدى الحياة

العبد لله صريح زيادة عن اللزوم

لما كنت لسة خاطب زوجتى

كانوا بيخوفوها منى

(ربنا معاكى يا بنتى

وايه اللى عاجبك فيه؟

ده صعب قوى)

ولما اتجوزنا وهى بالفعل كانت خايفة من طباعى

لقيتنى على طبيعتى فى البيت

أحسن بكتير من قبل كدة

والنقطة التانية اللى عايز اقولها:

مافيش مشكلة بين اتنين متجوزين

واحد منهم بس عليه الغلط كله

يعنى بنسبة 100 %

يعنى ممكن مشكلة الخرس الزوجى

أو غياب الرومانسية فجأة يكون

50% الزوج

و50%الزوجة

أو 80%الزوج

20% الزوجة

انشالله 90%الزوج

و10% الزوجة

انما الغلط كلة من طرف واحد

لأ

لازم الناس تقعد وتشوف

وتحلل

عشان تحل

أى خدمة

تم تعديل 23 أبريل 2008 بواسطة حسام يوسف

[medopharm]

يا استاذ حشيش انت بتتحسبن علينا كمان

الستات دول واللة غلابة

اكيد طبعا بقعد بلبس البيت ف البيت وموش بكشر غير لما هوة يزعلنى يعنى انتم السبب ف التكشيرة

انما الزوج بييجى اساسا من الشغل مكشر

يعنى الست موش ليها ذنب انها تشوف التكشيرة دى

المفروض الرجل بمجرد ما يسيب الشغل ويدخل البيت ينسى كل حاجة حصلت برة

ويدخل بوجة بشوش البيت على المودام

وبعد ما يهدى ويتغدى ممكن يبقى يحكى اللى مضايقة

انما يا استاذ حشيش معناها اية بيحس انو عايش مع خالتة دى

قصدك ان الزوجة موش بتعتنى بنفسها مثلا

لااااااااااااا طبعا الست كدة تبقى غلطانة وكمان الزوج غلطان لانو موش بيلفت نظرها انها اهملت ف اناقتها ف البيت

لازم يبقى فى وضوح يا جماعة ف كل شىئ يضايق اى من الطرفين

عشان التصحيح بسرعة وما تكبرش المشكلة

الأخت سهيله

احب اعلق على نقطه مهمه جدا

وهى ان المفروض كل واحد يعرفبالظبط ايه اللى مطلوب منه وما يلقيش اللوم على الطرف الآخر

بعنى حضرتك بتقولى انه المفروض مايكشرش فى البيت واول مايرجع من الشغل ينسى كل اللى هو فيه

واكيد هو هيكون له رأى تانى فى نفس النقطه وهى انك المفروض تقابليه بابتسامه جميله وتاخديه بحنيه وتنسيه هموم شغله

ولكن اللى بيحصل انك أول ما بتشوفيه مكشر على طوووووووووووووول بتروحى واخده جنب وتكشرى انتى كمان وتبقى الليله منيله

لأنك اخدتى على خاطرك لأنه جاى من الشغل زهقان وقرفان ومكشررررررررررر

وهو طبعا هيزعل لأنك كشرتى واخدتى جنب

وفيه حاجه مهمه جدا

فعلاااااااااا الراجل بيكون عامل زى الطفل يحب دايما زوجته تدلعه وتهشتكه زى الأطفال بالظبط

وبالطريقه دى تقدرى فعلا تثبتيه

وكمان الواحد صدقينى ما يقدرش يفصل مابين شغله وبيته بسهوله الا اذا زوجته ساعدته بأنه يخرج خااااااااااااالص من موووووووود الشغل

وتدخليه انتى فى موووود تانى وهو مود شهر العسل

انا بقول الكلام ده صدقينى لأنه حاجه واقعيه وكلنا بنعانى منها

ياريت ياستات ماتحملووووش الرجاله فوق طاقتها

[مصري جدا]

الأخت الدكتوره سهيله

أسف لتأخري في الرد لأنشغالي الأيام الماضيه

طبعا كل اللي بتحكي عنه ده أمرحدوثه طبيعي .....لكن مش معني كده أن نترك دفة الأمور تسير بنا في أي أتجاه بل يجب علينا التحكم فيها....لنصل لبر الأمان......خلينا في الكلام العملي

الجواز ده شركه ...يعني فيه طرفين ... طرفين مختلفين في كل شئ .....أوعي تفتكري أن مادام حصل أرتباط وحب وجواز أن ده معناه أن الطرفين متفقين ...العكس هوالصحيح وده اللي بيبان عند بداية الحياه الزوجيه واللي بنسميه العشره......هنا حتبان أوجه الأختلاف وتصرفنا وتفاعلنا معها هو اللي بيحدد أستمرارية العلاقه أو فشلها لا قدر الله ...... ففي حالة حدوث امر غير متوقع في أمور هذه الشركه يجب علي كل من الطرفين مراجعة حساباتهم .....يعني مراجعة نفسه ومراجعة الطرف الآخر

الغلطة اللي كلنا وقعنا فيها واعتقد أن معظم الناس بتعملها هي أن كل واحد بيحاسب الطرف الأخر فقط وهنا تبدأ المشاكل في الظهور.....محدش بيحاول يغير كرسيه ويجلس مكان الطرف التاني ويشوف هو عمل كده ليه...

وثقي دائما وتوقعي أن كل عمل وراءه نيه طيبه حتي ولو ظهر العكس فحاولي أظهار النيه الطيبه المختفيه ولا تأخذي بالمظهر السئ وتتفاعلي معه....فتتجه الأمور الي أتجاه خاطئ و سئ..

ثانيا حضرتك عارفه أن العقل الباطن هو اللي بيتحكم في كل تصرفاتنا .....يبقي لازم أخلي بالي من عقلي.....عقلي الباطن طبعا ... طب أزاي

من خواص العقل الباطن أن مانفكر فيه أو مانتوقعه نتجه اليه ونجده.....وزمان قالوا اللي يخاف من العفريت يطلع له.....هو نفس الكلام العلمي ...اللي افكر فيه حلاقيه....علشان كده لازم تأخدي بالك من أفكارك ...ومش أفكارك بس.... لأ...كمان تأخدي بالك من كلماتك خصوصا اللي بتقوليه لنفسك يعني {حديث الذات} .لأن كلماتك دي بتحدد تصرفاتك وشخصيتك.فيما بعد...... طب إزاي...

أن تكرار الكلام أو المعني بيؤدي الي أن اللي كنت بقوله اليوم مع التكرار حيبقي فكره ......والفكره مع شوية أحاسيس وشعور بها ستتحول إلي أعتقاد في العقل الباطن ......ولآننا نتصرف طبقا لمعتقداتنا ...فسيكون التصرف علي أساس هذا المعتقد الخاطئ...وطبعا شخصيتنا تنتج من مجموعة تصرفاتنا......علشان كده لازم تاخدي بالك من أن تطردي أي فكره سلبيه أو سيئه فور التفكير بها ... حتي لا تجرنا إلي تصرف خطأ.....وحتي تمر الأزمه وتتخطي هذا المفترق الصعب بأقل خسائر لأنك الأن في فتره حرجه ويجب الحرص علي الخروج منها بأمان

وتأكدي أن كل منا مر بهذه الفترة وخرجنا منها ......منا من خرج بأصابه بسيطه ...ومن خرج بعاهه مستديمه يعاني منها بقية العمر....ومنا من فضل البتر والأنفصال .....

أذا أحببت أن تغيري الملل والمشاكل فتأكدي أن التغيير يبدأ من داخلنا ....أبدئي بنفسك...ولا تحاولي أبدا تغيير الطرف الأخر أتركيه يتغير كرد فعل لتغيرك أنت إلي الأفضل .... فسيتغيرهو للأفضل..ثقي أن كل عمل ورائه نيه طيبه......توقعيها...و أبحثي عنها ...... وحاولي إظهارها.. ستجديها.....وأبعدي عن ترديد الكلمات والأفكار السلبيه وتخلصي منها فوراً ....وأعلمي أن الزواج سكينه ورحمه..

أبدئي وحققي السكينه لتنعمي بالحب والرحمه

أتمني لك كل السعاده................ ومادمت شعرت بالقلق وكتبتي هذا الموضوع فأنت حريصة علي نجاحك في حياتك الجديده........ وستنجحي أن شاء الله ......وعقبال ما نشوف سنه30 جواز

تم تعديل 23 أبريل 2008 بواسطة مصري جدا

[حلواني]

الاخوه والاخوات او اسمحولي اقول اصدقائي لاني انا اعرفكم من زمان لكن انتو ماتعرفونيش لاني كنت مشاهد فقط

المهم اللي بيحصل خلال اول سنه جواز هو صراع علي السلطه داخل المنزل بكل ما تحمله الكلم من معني

زكل طرف بيحاول يستخدم جميع الاسلحه المتاحه لتحقيق الهدف وبيجرب كل سلاح لفتره واذا فشل يشوف سلاح تاني وتالت

وهكذا حتي تنفذ جميع الاسلحه من احد الطرفيين ويفوز الطرف الاخر وهذا بيكون غير معلن من الطرفيين زممكن يكون النصر غير

كامل ويظل لكل طرف مناطق للنفوذ لا يسمح للطرف الاخر بالدخول فيها وكل دا بيكون غير معلن وبعد السنه الاولي اللي هي فتره

المعركه الرئيسيه بيكون كل واحد حدد مناطق نفوزه ورضي بيها وانتهي الامر وتظل بعض المناطق المتنازع عليها دي بتستمر بقيه

العمر حتي مع وجود الاولاد بل الاولاد نفسهم وطريقة تربيتهم ومذكرتهم وهوياتهم وكل حاجه عي مناطق للصراع ايضا ود انا شايفه

طبيعي بين اثنين لكل منهم ميول مختلفه وطباع مختلفه واسلوب تربيه مختلف ....................... للحديث بقيه

النصيحه الوحيده اللي بقولها للطرفين

المشكله بين اثنين بسهوله تتحل بين ثلاثه صعبة الحل بين اربعه مستحيله الحل اوعي اي مشكله تخرج بره البيت لاي حد مهما كان

سلامي للجميع

[Modest]

النصيحه الوحيده اللي بقولها للطرفين

المشكله بين اثنين بسهوله تتحل بين ثلاثه صعبة الحل بين اربعه مستحيله الحل اوعي اي مشكله تخرج بره البيت لاي حد مهما كان

برافو استاذ حلواني ... هي دي الخلاصة :lol:

و أكررها بعد خبرة 19 سنة جواز

يا خبر أبيض :sad: .. تصدقوا فوجئت إني بقالي 19 سنة متجوز!! ;)

[om marawan]

عزيزتى سهيلة

طبعا اللى حكيتيه بيحصل فى أول سنة وده طبيييييييييعى جدا واحياينا كتير مش علشان الزوج بيتغير بعد الجواز لكن لأن فيه شخصين مختلفين ومن بيتين مختلفين مهما اتشابهوا

وفيه طباع مختلفة وعادات مختلفة وبعدين جينا اخدناهم وقعدوا مع بعض 24 ساعة فى بيت واحد

واعتقد ان الموضوع مش موضوع فرض سيطرة او غيره ... ده مجرد وصول لأسلوب فى التفاهم

وزى ماقال الفاضل حسام والزملاء الافاضل

ان المصارحة اللطيفة أقصر طريق لكن احنا أحيانا فى اول الجواز كل طرف بيفترض ان التانى عارف ايه اللى بيزعله وبيعمله عشان يضايقه وطبعا ده مش صحيح

وده اللى قصده الفاضل مصرى جدا لما قال ان بلاش نتكلم مع نفسنا ونخللى العقل الباطن يغذى شعور الزعل

ومهما طالت فترة الخطوبة فهى لا يمكن ان تكشف كل الطبائع اللى بنشوفها بعد الجواز

وعلى فكرة مش دايما بتكون مش حلوة بل بالعكس كتير تكتشفى حاجة حلوة جدا بعد الجواز واحيانا بعد انجاب الأطفال كمان

أما بالنسبة لتكشيرة الشغل فمعلش ربنا يكون فى عونهم طبعا فيه ضغط عصبى كبير وصعب نقدر نفصل فى لحظة وان ماكانش يرمى حموله عليكى هيرميها فين ويرتاح مع مين

ربنا يخليكوا لبعض دايما

فى الاخر عاوزة أقول ان مافيهاش حاجة برضه ان الزوج لو لقا زوجته زعلانة يروح على طول يصالحها زى أيام الخطوبة يعنى

وأكيد هى كمان هتعمل كده

أستاذ حلوانى أهلا بيك بيننا فى المحاورات