اراضى الكيلو 48 مقابل الشروق طريق مصر اسماعليه الصحراوى

[sheriefm]

ارجو من الأخوه المساعده حيث انى مقيم خارج مصر من سنتين ومنزلتش أجازه وعندما كنت بمصر عرض على صديق شراء قطعة أرض مقابل الشروق بعد المركز الطبى من شركة النجمه لصاحبها الحاج على محمد الكرداسى وفعلا اشتريت قطعتين بحيث ابيع واحده وابنى بالتانيه مع العلم انا من سكان الأقاليم ومفيش حد عندى يروح يشوفها وسوف اقوم بوصف الارض اعتقد من مشاهدتى لجوجل ايرس فهى تقع خلف القادسيه وهناك بوابه عندما دخلت اشوف الارض على الطريق اخر بوابه ودخلت منها بتاع 700متر او كيلو مش متذكر ولكن هناك بيت فيلا قديمه يسكنها الحاج علىالكرداسى وطريق مسفلت قديم وقطع الارض خلف الفيلا وعندما كنت هناك بمصر اشتريت القطعتين المتر 120 جنيه كاش ومعى عقد اخضر من الشركه وعندما قرأت محاورات المصرين على طريق مصراسماعيليه الصحراوى انتبانى القلق ومش عارف وضع الأرض دى أيه لأنى مسألتش اجازتى كانت قصيره مع العلم هناك اقرباء لى اشتروم من الشركه عاوز أعرف الوضع القانونى للأرض والأسعار وهل العقد الا معى صحيح ولا لا وهل يمكننى البناء هناك الان وسعر الارض المتر بكام مع العلم وانا بمصر وفى الارض كنت اشاهد بالقرب منى فلل مبنيه جديده وشكرا ارجو من الاخوه المصرين من عنده معلومه عن هذه الشركه يخبرنى بها والدال على الخير كغاعله وشكرا

[se_ Elsyed]

هاجاوبك بالتفصيل غداً

خصوصاً اني اعرف مُلاك الارض دي معرفه تكاد تكون شخصية

واعرف طبعاً المنطقة دي عن ظهر قلب

[se_ Elsyed]

بص يا ريس

حظك حلو لإني عارف الناس دول معرفة شخصية ...

وللامانة فهما ناس مُحترمة وورثوا موضوع تقسيم الأراضي أباً عن جد

نرجع لموضوعك

أعرف جيداً قطع الأرض اللي غنت بتتكلم عنها واللي تبعد عن المركز الطبي حوالي 5 كيلو وتحديداً في منطقة إسمها الرابية ... والحاج محمد الكرداسي باني هناك مكتب كده عبارة عن غرفتين ...

إنت أشتريت الأرض بسعر مغري جداً جداً ( إنت جيبت السعر ده إزاي يا دؤرم ؟ ) ما شاء الله ولو عايز تبيعها دلوقت مش هاتكون أقل من 300 ج كاش ...

لكن هناك شيء مهم جداً :

1- من الناحية القانونية : العقد الأخضر لا ينقل الملكية .. لإنه عقد إبتدائي بينك وبين البائع فقط حتى لو عملت عليه صحة توقيع وهو غير موثق من الشهر العقاري .. ومش هايوثق للأسف .. لإن دي أساساً أرض زراعية او كانت زراعية زمان .

2- المواضيع كانت ماشية حلو في السنتين تلاتة اللي فاتوا لحد الدولة ما صحيت ولقت إن الأراضي اللي معطياها بملاليم بحق إنتفاع زراعي للناس دي .. قسموها وباعوها وفضلت تنتقل من إيد لإيد لحد ما أتفتت قطع صغيرة .. وبالمناسبة الموضوع داخل فيه هوامير كبار أعرف بعضهم .. ومنهم على سبيل المثال أبناء الشيخ جاد الحق علي جاد الحق شيخ الأزهر السابق ... وأبو الممثلة حنان تُرك .. وناس هوامير سياسة تانيين ودول بيبيعوا بالجملة وأقل حاجه تقدر تاخدها منهم بيبقى 10 فدادين .. والفدان اليومين دول بيبعوه بحوالي 800 ألف جنيه .. يعني المتر واقف بـ 190 ج ...

3- هناك تهديد من الدولة الان بإنها هاتسحب تلك الأراضي وتنظلها في القرعة .. والناس اللي شاريه ميتين من الرعب .. لكن هناك بصيص امل في ان يتم توفيق أوضاعهم .. وإن الدولة تفرض عليهم مخططات محددة منعاً للشعوائيات لإنهم ملاصقين لثلاث مناطق منظمة ومحترمة ( العبور الشروق والعاشر من رمضان ) وبالتأكيد هاتاخد منهم فرق ... ومش هايبقى كتير في مقابل إن لو حصل كده .. فبالميت قوي سعر المتر هايصل 1000 ج ...

الخلاصة : إنت غامرت ... ولا اعتقد إنك لا قدر الله لو خسرت 50 ألف ج هايبقى مبلغ كبير ... لكن في نفس الوقت لو ضربت معاك .. هاتعدي ومش هاتعبرنا بعد كده ... وتذكر دائماً " ويفوز باللذات كل مغامر ٍ "

أصبر وهانشوف الأمور هاترسي على إيه .... على فكرة أنا معاك في نفس المركب ... ومجمد قلبي ... لإن قلبي ميت أساساً وعارف إن الحياة كلها مكسب وخسارة .... والأيام الجاية هي أيام مدينة العاشر من رمضان .. ويكفي لو " زيزينيا "حطت قالب طوب في المدينة السكنية اللي هاتبنيها هناك واللي ملاصقة مباشرة لأرضك .. فسعر المتر هناك هاينط لـ 3000 ج .. وإبقى أفتكر الكلام ده كويس ... بس هما منتظرين لما اسعار مواد البناء تهدا شويه ..

تحياتي ،،،،

[AboAsem]

أخى سين سين

السلام عليكم

قلت فى مداخلتك السابقه أن : الأيام الجاية هي أيام مدينة العاشر من رمضان

يا ريت تعطينا بعض أسباب هذة الرؤيه ، بصراحه أنا إشتريت شقتين فى العاشر (فى المجاورة 31 و الأردنيه ) من عدة شهور و كنت أفكر أبيعهم لأنى حسيت المنطقه مع إنها نشيطه جداً إلا أن مستواها عادى أو أقل من العادى!

المهم ، ما هى رؤيتك لمدينه العاشر من رمضان الأن و فى المستقبل؟

هل تتكلم عن مناطق معينه فى المدينه؟

متوسط الأسعار للشقق السكنيه و الإداريه الأن ؟ و مستقبلها؟

أيه محاذير تحب تنبهنا إليها ؟

شكرا على كرم أخلاقك ووقتك الثمين.

أبو عاصم

[se_ Elsyed]

إوعى تبيع يا أبو عاصم إلا لو كنت مزنوق ومحتاج كاش

بص

العبور والشروق إتملوا وما بقاش فيهم منفس .. ده بالإضافة إلى إن الأسعار فيهم بقت هلاميه ...

والإمتداد الطبيعي لهما هو مدينة العاشر اللي لسه فاضية سكانياً ...

حالياً أقرا العديد من الأخبار المبشرة عن هذه المدينة الواعدة ومنها مثلاً الإسبوع الماضي وخبر سار بيقول إن الهند وقعت عقود لإنشاء عدة مصانيع للحديد والصلب والنسيج في مدينة العاشر وبالتالي ده بيعمل إنتعاشة هناك على جميع المستويات ...

أنا أتكلم عن المدينة بشكل عام ..

لكن متوسط الأسعار أو تفاصيل الأحياء الدقيقة هناك لا اعلم عنها شيء ...

[sheriefm]

اخى الكريم سى السيد

السلام عليكم

مشكور جدا على اهتمامك افدتنا وجزاك الله خير وشكرا على اهتمامك ولو فيه جديد ارجو اعلامنا به

[AboAsem]

أخى سين سين

شكرا على ردك ، دائما تشاركنا بأفكارك .

جزاك لله خيرا

أبو عاصم