لمغتربين الكويت.. أرجوكم ساعدوني

[Figooo]

السلام عليكم :

عاملين ايه ؟ يا رب تكونوا مبسطين في الكويت

أنا كنت عايز أخد رأيكو في موضوع كده ؟ هتساعدوني بقى و لا ايه النظام ؟ :closedeyes:

أنا شاب, جاتلي فرصة اني أسافر الكويت على عقد ب 300 دينار و السكن عليهم و المواصلات كمان

أنا قلتلهم ان انا خاطب و ممكن أكتب الكتاب في أي وقت و أبعت لزوجتي.. قالولي السكن عائلي و تذاكر ليها و للولاد كمان..

ديه بقى أسئلتي :

1- هل العقد ده كويس و يستاهل ؟

2- لو انا لوحدي, هقدر أحوش كام ؟ بس أرجوكوا بواقعية شديد, عشان محدش يقوللي اني أقدر أعيش ب 30 دينار في الشهر :lol:

3- هعرف أبعت اجيب زوجتي بعد مانا أسافر و أستكشف الوضع ؟ الموضوع سهل يعني ؟

4- لو بعتلها, هنعرف نحوش أنا و هي كام من المرتب ؟ ( متخافوش مش هتصرف هي المرتب كله :wub: )

5- هل من الممكن ان زوجتي تعرف تشتغل هناك ؟ أنا مش عايزها تشتغل بس هي عايزة

أرجوكم ساعدوني و جزاكم الله خيرا عني

[حلواني]

عليكم السلام ورحمة الله وبركاته

شوف يا فيدو لو الكلام اللي بتقوله مظبوط من ناحية السكن والمواصلات يبقي عقدك كويس

وانت عازب ممكن اقولك ان الصعايده والفلاحين اقصد القرويين يعني ممكن يعيشو ب30 او 40 دينار مصاريف طبعا في معيشه مشتركه بينهم

لكن مدام انت من شباب النت والكول يبقي 100 دينار حد ادني خد بالك بدون سكن ومواصلات لان مصيبتنا الكبيره هنا السكن ومن ناحية زوجتك او خطيبتك تشتغل دا بيتوقف علي التخصص اللي بتشتغل فيه لان فيه فرص كتير لكن لتخصصات معينه وفيه تخصصات ملهاش فرص او فرصها نادره

عموما لو مش هاتخسر شغل محترم في مصر وبيجيب لك دخل 1500 جنيه علي الاقل بيقي توكل علي الله وتعالي

اتنمي لك التوفيق

[زهرة الجبل]

أخي الفاضل

المشكله الكبرى هنا في الإيجارات و المواصلات .... يعني إذا السكن عليهم و هيلتزموا بسكن عائلي لك ولزوجتك إن شاء الله فالعقد كده معقول بهذا الراتب

لكن أهم شئ أن ينص العقد بشكل واضح على توفير السكن والمواصلات ولا يكون العقد ينص على الراتب و يترك السكن والمواصلات بالإتفاق ( لأن هذا يحدث أحياناً و قد لا يلتزم صاحب العمل معك )

كله في العقد

هو معدل الإنفاق مرتفع قليلاً لكن أعتقد كل حاله تختلف عن الإخرى بإختلاف طبيعة أصحابها

و إن شاء الله تقدروا توفروا بشكل جيد

و بالنسبه لزوجتك فده حسب مؤهلها

يعني أفضل عمل للنساء هنا هو العمل كمدرسه ... عمل مريح و مناسب للمرأه و أوقاته مناسبه

ده إذا كانت بكالريوس تربيه و تقدير لا يقل عن جيد

أتمنى لك التوفيق

[Figooo]

أولا, أنا متشكر جدا لحلواني و زهرة الجبل على ردودكوا

ثانيا, و الله مش موضوع شباب النت و كول و كده.. الفكرة اني عايز احوش بس أكل و أشرب زي البشر فكنت عايز أعرف هينفع بالمرتب ده و لا لأ.. أه انا أكيد هاجي على نفسي بس برضه مش نظام أقعد يوميم مش أكل و كده :closedeyes:

ثالثا, أنا زوجتي بكالوريوس تجارة انجليزى ان شاء الله 2008.. ده سهل هناك انها تشتغل و لا ايه ؟

جزاكم الله خيرا عني

[الحاج فوزى]

عزيزى فيجو ..

حضرتك لم تذكر المهنة أو الوظيفة أو التخصص .. وظيفتك الحالية فى مصر ..

كذلك اسم الشركة ..

وهل سيتم إرسال زيارة أم لا مانع إقامة ..

مدة العقد ، عدد أيام الإجازة المدفوعة ..

نسبة الزيادة السنوية إن وجدت .. هل هناك بند بالعقد يشير إلى التذاكر العائلية والسكن العائلى أم لا ؟

مكان السكن .. نوع الإنتقالات ..

عوامل كثيرة جداً تفرق فى النصيحة ..

إن شعرت بحرج من نشر أى معلومة على العام ، تستطيع أستخدام الرسائل الخاصة ..

فكما قلت سابقاً فى العديد من الموضوعات المشابهة .. الكثير من المشكلات التى قد تواجه المغتربين يمكن تجنبها بالمعرفة السابقة ومن الخبرات السابقة .

تحياتى وإن شاء الله تشرف الكويت وأهلها من المغتربين المصريين .

[Figooo]

عزيزي Huss

متشكر جدا لردك علي.. و أنا ان شاء الله لما يجيلي تفاصيل العقد, هقولك كل حاجة بالظبط

بس معلش كنت عايز اسألك سؤال مهم و هو ايه موضوع الحد الأدنى للمرتب ده عشان أقدر أبعت لزوجتي

أنا أسمع ان كان زمان الحد الأدنى 500 دينار.. هل دلوقتي النظام ده لسه معمول بيه و لا ايه ؟

معلش تعبتك و لسه هتعبك معايا :closedeyes:

[الحاج فوزى]

لاء مش حقيقى .. زمان كان 450 دينار وتغير القرار وأصبح 250 دينار الحد الأدنى للعائل لإستقدام الزوجة على كفالته .

لكن التغيير سمة دائمة فى الكويت .. بمعنى أنه من المتوقع فى أى وقت صدور قرار بأى شىء ..

خاصة فيما يتعلق بإستقدام العمالة وما يتعلق بها من إجراءات الوافدين .

أنا تحت أمرك فى أى إستفسار .. فى أى وقت .. فقط تأكد من المشورة قبل الإقدام على شىء ..

[HDarwish]

الأخ / فيكو

في البداية أتمنى لك التوفيق وتوصلنا الكويت بالسلامة إنشاء الله

أنا حسن من المنصورة عايش في الكويت منذ ثلاث سنين .. ومن واقع خبرتي الصغيرة دي أحب أقولك لو عايز فعلا تحوش هيبقى أحسن لو إنت لوحدك بدون الزوجة إلا إذا كانت فعلا الشركة هتوفرلك سكن عائلي وده اللي انا شاكك فيه بنسبة 90% لإني من أول ما جيت ما لقيتشي شركة خاصة بتوفر سكن عائلي لموظفيها .. بس الوزارات هي اللي ساعات بتوفر سكن وحتى مش سكن عائلي لأ سكن عزاب وده زي وزارة الصحة.

أنا عشت أول سنة ونصف عازب ودي الفترة الوحيدة اللي قدرت أحوش فيها وأعمل مبلغ كويس برغم ان الراتب كان في المتوسط (250) بس من بعد كده وانا ما حوشتش حاجة.

من الآخر .. هنا في الكويت قدامك حل من إتنين يا تعيش عازب بعيد عن أهلك وتحوش مبلغ كويس (وده اللي أنا برشحه يعني كام سنة تحوش فيهم المبلغ اللي انت محدده من قبل ما تيجي وبمجرد ما تجيب المبلغ ده تنزل) يا إما تجيب الأهل وتعيش عيشة كويسة (مكان نظيف، وأكل كويس، وعربية نظيفة،...) وما تحوشي حاجة نهائي

أنا أسف إذا كانت الصورة قاتمة بعض ما .. بس للأسف ده الواقع ..

الحياة هنا عبارة عن التالي:-

حياة عائلات:-

- سكن 150 إلى 200 دينار

- مواصلات (معاك سيارة مصروفها 30 دينار شهريا بدون لا قدر الله أعطال وخلافه) - (بدون سيارة إشتراك في الباص ب 15 - 20 دينار شهريا)

- أكل وشرب 60 - 80 دينار شهريا

- فسح وخروجات أسبوعية 20 - 30 دينار شهريا

- منوعات (لبس ومستلزمات بيت) 30 دينار

- تدخين 15 دينار شهريا

إجمالي 290 إلى 350 ده في حالة مافيش أولاد - لكن لو فيه أولاد بتوصل لحوالي 500 دينار وده من واقع تجارب ناس كتير معايا

حياة عزاب:-

- سكن 30 إلى 40 دينار

- المواصلات نفس العائلات 20 الى 30 دينار

- أكل وشرب 20 الى 30 دينار

- فسح وخروجات 10 الى 15 دينار

- منوعات 10 دينار

- اتصالات مصر 10 دينار

- تدخين 15 دينار

إجمالي 100 إلى 130 دينار

ملحوظة : تختلف الأسعار من حالات لأخرى زي فيه ناس بتحذف بعض المصاريف ناس تانية بتزود في بند من البنود

في النهاية الخيارات أمامك وكل منهما له مميزاته وعيوبه

بصراحة الكويت هنا للأطباء والمهندسين جميلة جدا غير كده فهي غير مربحة .. زي ما بيقول كتير كدبه كبيرة

وزي ما بيقول ناس تانية (الكويت زي طربيزة القمار الخسران فيها بيقول بكره أكسب واللي بيكسب بيقول ممكن أكسب أكتر وفي الآخر الكل بيقوم خسران من على الطربيزة)

[magedghonim]

الموضوع كله يعتمد على سمعة الشركة وهل هي بتحترم بند المواصلات والسكن دة ولا لأ

لو الشركة اوكي صلي استخارة الاول ثم

توكل على الله ممكن تصرف اكل وشرب وخلافه 150 دينار

وتحوش زيهم ( ومعلش تعاللى على نفسك شوية)

انما ساعتك لو هتصرف منهم السكن والموصلات

تبقى تخلي المدام وتيجي لوحدك ومش هتحوش اكتر من 150 برضه

بتمنالك التوفيق ولو عزت اي حاجة مترددش تسال..