يا باشمهندزة.....يا ضكتوووورة....يا صيدلانية

[ابو جيداء]

شوفى ياهبة

انا من ساعة ماتخرجت من كلية الهندسة طبيب بشرى وفتحت صيدلية :lol: وانا لا يعنينى هذا الأمر وممكن اوافق على اى واحدة حتى لو كانت شبة الآنسة كونداليزا رايس :D

[Nonna]

سبحان الله

هباية من كام يوم واحدة زميلتي كانت مكتئبة جدا

بسألها مالك

قالتلي ابدا جالها عريس

بيني و بينك انا من انصار(عبي و شيلي) :D

فطبعا قلتلها يا نهار ابيض يا نهار ابيض

يالا على بركة الله

انما زعلانة ليه

قالتلي ابدا اصل بابا و ماما نزلوا يشتروا العشا

فالراجل البياع بيقول لبابا هو حضرتك والد الانسة البيضا الللي اللي

_اللي عاوز عروسة بالمواصفات اللي اللي يقوللي اهديله نمرة موبايلها_

باباها قاله ايوة خير

قاله بصراحة انا عاوز اتقدملها و كدة!!

بيني و بينكم انا ابتسامتي كان من الودن للودن التانية

بدات تتلاشى

مش تكشير لا سمح الله

انما هيستيريا ضحك مجانيييييييييين

قلتلها البياع!!

قالتلي اااااااااه

والدتها قالتله ماشي بس انت عارف هي بتدرس ايه

قالها لا

قالتله طب

قالها يا نهار

ده كدة ما ينفعش خالص

و اعتذر كما لو كان عمل مصيبة

نسيبنا بقى من الجدع البقال

نخلينا في البنوتة صابحتي

مكسور خاطرها انها اتقدملها بقال

بيني و بينك كمان مرة

مش عارفة ليه حاسةان معاها حق

مش عشان لا سمح الله ان اليومين دول بيقع في غراامي سواقين الميكروباصات

انما حاسة انها صعبة قوي

طبيبة

تتجوز

بقال

!!!!!!!!!!!!!

مش هقولك وجاهة اجتماعية

انما هقولك النفس

في بنات ممكن تقبل

و في بنات ممكن تفضل طول عمرها بدون جواز ولا انها تتجوز بقال لمجرد انه ماديا مرتاح

و مش هيغرمها تمن الجبنة و الزيتون

!!!!

معلشي بقى اصبري عليّ فى ردود تانية جاية

اصلك اتكيتي على الكالو اللي في عقلي من الموضوع ده

:lol:

[Nonna]

انا واحدة في كلية طب

ماشي؟

قلتيلي ماشي

في سنة اولى بالتحديد

_اللي هي اول سنة في طب خااااااااالص_ ;)

كان في ملزمة امتحانات بتاعت اسرة ما

عارفة الغلاف مكتوب عليه ايه

_غير طبعا examination note for 1ST year _

مكتوب

طبيبات فوق سن الثلاثين بدون زواج :D

_تبقى قلة أدب ولا مش قلة أدب_ :D

طبعا احنا _بنات دفعة سنة اولى_ماهمناش قوي

ايشكمننا حلوين قوي :lol:

و كمان معجزناش

_ماعديناش العشرين يعني :D _

من ست شهور فاتت

سمعت عن واحدة معرفة يعني

طبيبة و بتحضر ماستر تحاليل طبية

اتجوزت واحد دبلوم تجارة :cry:

بيقااااااااااااال

انه لا يعمل

امال اتجوزته ليه؟!!

انتي نسيتي ولا ايه :wub:

_غلاف الملزمة (طبيبات فوق الثلاثين بدون زووواج)_ :D

يبقى لا وجاهة اجتماعية حوقت

ولا ماديات منعت جواز

ولا هي حرة

نفسها مطاوعاها

[Nonna]

نيجي بقى لأمة الله

نونّا :lol:

في فترة من الفترات كان معظم اللي بيجوا مهندسين

ثم امتنعوا

و حل محلهم دكاترة

ثم

امتنعوا برده

و بعدين رجعوا المهندسين تاني_الهي يكرمهم دنيا واخرة_

و كوليكشن بسيط من ضباط

و لما بدأوا ينسحبوا

بدأ يدخل بالتدريج محاسبين و محاميين

ماديا مرتاحين

عارفة والدي كان ايه رأيه؟!!

_علما بأن ليّ أخ بكالوريوس تجارة السنة ده_

قاللي يعني خلاص

الدكاترة عدموا؟

المهندسين شطبوا؟

الضباط اتنسفوا؟

دوري كدة في الليستة القديمة مين رفضناهم و نعيد النظر في أمرهم :D

أخويا نفسه بكالوريوس التجارة اللي بقولك عليه

لما قلتله

قاللي محاسب!!!

ليه كدة يا نونّا؟!!

استني أحسن حاجة كويسة؟!!

الكلام ده من سنة فاتت

لما كنت لسة 22 سنة :D

السنة ده

بابا بيقولي

دوري في الجيب ده او الجيب ده

جايز نلاقي محاسب

او محاسب برده ;) :D

طيب مدرس العاب

مدرس العاب يا نونّا :cry: :wub:

انا راضي

ياالهي الرحيم

شر البلية ما يضحك والله

[Nonna]

موقف كمان

حصل ان اتقدم صيدلي و مرتااااااح ماديا جدا

لما والدتي شافته

بصيتلي بصة اللي هي قومي يعني و انا هحصلك

لما دخلت انا وماما المطبخ لقيتها بتقولي ايه؟

عجبك؟

قلتله يا ماما كويس :lol:

قالتلي بس؟

قلتلها مقبول متدين اخلاق عالية عقلية نضيفة أضيفي الى مكتبتك انه ماديا مرتاح

قالتلي

مش حلو

قلتلها مين مش حلو ايه مش فاهمة؟

قالتلي شكله مش حلو

قلتلها مقبول يا ماما

قالتلي بقولك ايه

يا واخدة القرد على ماله

يروح المال و يفضل القرد على حاله :D

_اه ده كله و الراجل قاعد برة و احنا في المطبخ_

شوية كمان و لقيتها بتبصلي نفس البصة بتاعت قومي ونا جاية وراكي

خير يا ماما

قالتلي لاحظتي حاجة ؟

قلتلها بخلاف ان جزمته مش متلمعة :D

و ساعة ايده لونها دهبي

و

يا بنتي يا بنتي

لااااااااااااا

قال انا قلت لماما كام مرة من ساعة ما قعد؟!!

فعلا انا ما كنتش اخدت بالي

لما خرجنا بقيت أدقق في كلامه اكتر

شوية و بصيت لماما بصة مغزاها

قومي و انا هحصلك :D

قلتلها خدتي بالك من حاجة؟

قالتلي بخلاف انه جايب شيكولاته في طبق بورسيلين يعني مش اقل من 50 جنيه

و

يا ماااااااااامااااااااا

لااااااااااا

امال ايه؟

يا ماما لاحظتي قال (قلت لماما فماما قالتلي قلت لماما فماما قالتلي) كام مرة؟!!

صعبااااااان عليّ

المطبخ :wub:

[Nonna]

مش عارفة ايه علاقة بوستاتي اللي فاتت بالموضوع :D

لبن بلدنا بقى يعمل أكتر من كدة معلش

بصي يا هباية

ايييييييه هي المواصفات الشرعية اللي تقول فلان ده يالا اتجوزيه؟

و معلش لازم أقول ان اللي جاي شروط لازم توافرهم ان وقع شرط

فسد الموضوع برمته

_فظيعة انا و انا بقول عربي فصحى :D _

اولاالقبول

يعني شفتيه_بصفة عامة واخدالي بالك انتي_

و حسيتي بالقبول يعني تصورتي البني ادم ده يصلح زوج و ياريت بقى

لو يبقى التصور في اسوأ حالاته

صدقيني متجربة :D

وهو متعصب ممكن يكون ازاى و هو راجع من الشغل و مديره مطلع عينيه ممكن يبقى ايه

كدة يعني

ولقيتي انه يالا ان شاء الله اقدر اتحمل

تبقى بداية كويسة

نيجي بقى لثانيا

النبي صلى الله عليه و سلم قال

إذا جاءكم من ترضون دينه وخلقه فزوجوه

يعني عرفنا انه الحمد لله بيصلي في المسجد و بيقرأ قران عنده استعداد يبقى افضل في دينه و معروف عنه انه

اخلاقه كويسة

خير و بركة سبب تاني نقول انه مناسب

نيجي لثالثا

التوااااااااااااافق

1_توافق فكري و اجتماعي

وده بالتأكيد يعني مش جاي من فراغ

مش هتجيبي تفكير طبيبة لتفكير سباك

انما ممكن يبقى التفكير متقارب بين طبيبة او مهندسة او صيدلانية و حاسب مثلا او محامي

ليييييييييييه؟

عشان التعليم و درجته بتفرق كتير و بتفرض على الانسان طريقة تفكير و تحليل

حتى المكانة الاجتماعية

2_توافق في السن _ما يبقاش هو 50 سنة وهي عشرين سنة_

3_+ او - توافق مادي

و قلت كدة عشان الماديات مهمة في الوقت الحالي

انما اذا واحدة عايشة في ست اوض مع اهلها و لقت نفسها عندها استعداد تعيش بعد ما تتجوز في اوضين

يبقى ان شاء الله ربنا هيكرمها

انما اذا مالقيتش الاستعداد ده عندها

ما تقدريش تلومي عليها و لا تقولي ايه البنت الارستقراطية اللي عايشة في برج عاجي ده

معلش

اللي بيشيل قربة مخرومة بقى :cry:

انصحيها بخديهم فقرا يغنيهم ربنا وخلافه

و اخيرا صلاة الاستخارة يعني بعد حتى ما ينجح الجدع في كشف الهيئة الحداشر :wub:

و لسة حاسة انك بلعاه و شاربة وراه واحد سوبيا يبقى (عبي و شيلي)

انما لو شاربة وراه لتر سفن اب وواحدتين زبادو

يبقى ماعطلكش يا اسمك ايه

بابا قاعد ويانا :lol:

[Nonna]

البوست السادس على التوالي :lol:

_استحملوني_

المشكلة عندنا ان الراجل لازم يبقى راجل

و يبقى أفضل من الست في النواحي العلمية و المادية

يعني مثلا بيتقال عندنا في مصر جمل كدة لذيذة خالص

العروسة دايما احلى من عريسها

حاجة بقى مسلم بيها

تخيلي بقى

لو العروسة اوحش من العريس سنة

بيتبقى محط استهجان و تعجب ازاى الحليوة ده خد البتاعة ده

اقلبي بثى الموضوع على درجة التعليم

هتلاقي الناس بتقول دكتورة ولا مهندسة و متجوزة سمكري دوكو!!!!!!!!

و تبدأ الافتراضات

ده اصلها عنست و مش لاقية

و ماله ضل راجل ولا ضل حيطة

و عواجيز الفرح يقطعوا الواحدة بلسنتهم

طيب ده رد فعل الناس

و لنفرض فرض كدة اصلا مش مبني على شئ انما يعني اهه احنا بنفرض

_كم مرة ذكر حرف السين في الجملة السابقة؟!! :D _

مافيش حد قال حاجة و لا استغربوا الجوازة الشيك

هو نفسه لو اصلا يعني واخداه سليم من غير امراض نفسيه

هيبقى مريض نفسيا

بصي كدة

الموضوع هيبدأ بتفكير

هي وافقت علي ليه؟

ده انا كهربائي و هي ط م ص

التفكير يخليه موسوس

طيب يعني هي بتشتغل اكيد في زمايل و برده ط م ص

ازاى يعني مش بتفكر ستين مرة وتندم على الجوازة ده ؟

و موسوس بقى يبقى عنده عقد نقص و دونية

اقعدي من الشغل

انتي فاكرة نفسك ايه يا هانم

مهما كبرتي و خدتي شهادات انا راجل

_و تبقى البنية ما عملتش حاجة توحي اصلا ماهي وافقت من الاول و كان ممكن تقول لا_

هوب ويبقى عدواني

ضرب و تهزيئ و قلة قيمة

و عيال معقدة

و انا الراجل تبقى لبانة في بق اولادها الولاد

و البنات حاسيين بالاضطهاد

يعني ربناااااااااا ما يوريها لحد

و على فكرة ده مش كلام نظري بالمرة

ده واقع حصل و بيحصل و هيحصل الى ابد الابدين

بيتهيالي الكلو اللي في عقلي خف

شوية :D :D

[م.سامح المصرى]

اعتقد يا باشمهندزة هبه ان الحكاية دى مش معقدة للدرجة يعنى

بمعنى ان عادى ان واحدة صاحبة منصب كويس تتجوز واحد صاحب صنعة

مش ممكن هيا تخلية من صاحب صنحة لصاحب مكان كبير بيمارس فيه الصنعة دى

انا مقتنع جدا جدا ان الواحدة ممكن تخلى الشخص الى معاها يبقي فى مكانة كويسة

وممكن تخلية اقل حاجة ..... فهمتى حاجة

بس احنا بنحب المظاهر نسبياً ...... بمعنى

المهندسة .... ما يقلش الى هايتجوزها عن مهندس

الدكتورة نفس الحال

وهلما جرة

كلنا عارفين ان الغرب نسبياً بيتعاملو ببعض معاملات دينا (الاسلامى)

فى بعض الامور طبعا مش كلها

وهما عندهم انى الدكتورة ممكن تتجوز اى واحد فى اى منصب

بس

مش ممكن الى هاتتجوز الصنايعي دا او اياً كان ممكن يحترمها ويقدرها اكتر من مهندس او حامل منصب كويس

مش ممكن تبقى مع الى مش صاحب شهادىعليا افضل من الى معاه شهادة عليا

استأذنك بقي يا هوبه

----------------

استاذة Nonna أزيك اولاً

طبيبة

تتجوز

بقال

!!!!!!!!!!!!!

عادى

حضرتك استشهدى بحديث جميل جدا وانا احييكى علية

النبي صلى الله عليه و سلم قال

إذا جاءكم من ترضون دينه وخلقه فزوجوه

يعني عرفنا انه الحمد لله بيصلي في المسجد و بيقرأ قران عنده استعداد يبقى افضل في دينه و معروف عنه انه

اخلاقه كويسة

طب نبدل بعض المناصب كدة شوية

هاقولك يا ستى

بدل البقال دا

تعرفى بتوع الغنم

الى بيبعوا الغنم دول فى الاعياد وكدة

اكيد عرفاهم

وبدل الطبيبة .... واحدة محترمة جدا جدا وعندها فلوس كتيرة اوكى

ومعرروفة جدا فى المكان الى هيا فية

فهل تقبل انها تتجوز الغنام دا

جوابك هايكون اية

لا طبعاً ؟؟؟؟؟؟؟؟ .... صح

طب لو رجعنا بالزمن ورا حبتين تلاتة كدة

هانلاقى ان الرسول صلى الله علية وسلم والسيدة خديجة رضى الله عنها وارضاها

هل كان حد يصدق ان واحدة صاحبة حسب ونسب ومال

تتجوز رجل كان بيخرج بتجارتها وكان بيرعى الغنم ... لو مشين بالمناصب يبقى لاء طبعا

ما حدش يصدق

طب اية الى حصل

الرسول صلى الله علية وسلم بنا امة من اكبر الامم فى العالم وكل دول العالم بتتعلم منه ومن تعاملاته حتى لو مش على دينة

واهوة راعى غنم

منحها رسول الله(ص) مرتبة رفيعة، ومكانة عظمى لم يمنحها لواحدة من أزواجه.

حد كان يتخيل

فرب ضرة نافعة

بمعنى ان الى تخاف منه ما يجيش افضل منه ..... طبعاً غلط :lol:

بس احنا لية نحط نفسينا فى نقطة ممكن اة وممكن لاء

طب لو كان الرسول صلى الله علية وسلم

مثلا .... مثلا يعنى

لو كان فى زمانا دلوقتى واتقدم لواحدة .............. طبعاً لاء

علشان هما بصوا للى هما فية دلوقتى ما بصوش للمستقبل

ما حدش يعرف هوا ممكن يكون ازاى فى المستقبل

تم تعديل 7 مايو 2008 بواسطة م.سامح المصرى

[المنصوراوى]

اجابة لبنت بلدى بصى

على راى المثل لو الفقر دخل من الباب نط الحب من الشباك

المثل مش مبالغ فيه ولا حاجة بس كلام صحيح

تخيلى لو الاولاد\عاوزين لبس او اكل بس اكل من الغالى مش خمريد و الاب مش معاه فلوس اكيد الام حتزعل على الاولادحتكون فيه مشاكل و قيسى على كده الفسح و الشقة التشطيب اللوكس و............الخ

انت ما تعرفيش انه الفقر بيوتد الكفر بس الكلام ده مش مقياس للكل فيه ستات عنده الصبر و الرضا و للاسف مش كتير بس فيه

الفلوس اكيد مش كل حاجة بس اكيد حاجة فهمتى حاجة

ايه رايك فى كلمة الخمريد

[محمد لمار]

السلام عليكم يا أيها القوارير انا كنت واقف فى محطة المترو وجه المترو واتفتح الباب ولقيت العربية كلها بنات وراجل واحد والموضوع مشوق جدا فاسمحولى اتدخل .اولا معظمكم تدوروا فى نفس الدائرة يا استاذة هبة فى فرق كبير بين الوضع الاجتماعى والوضع المادى وليس بالضرورة الطبيب غنى والسواق فقير وده كلام مسلم بيه يبقى نشوف انتى عايزة ايه؟ انتى اخترتى انسان اكاديمى إذا اولا فكرة الوضع المادى مش مهمة قوى بالنسبة ليكى ثانيا لازم تكونى انتى كمان اكاديمية ولازم تتحملى صعوبة الحياة الاكاديمية اللى عايزة تعيشيها .ثالثا فى فرق بين الحب والتفاهم فيه إتنين بيحبوا بعض جدا بس مش متفاهمين وحياتهم صعبة جدا وفى إتنين متفاهمين جدا ومفيش حب وحياتهم فيها جمود مفيش فيها الشغف اللى بيحلى الحياة .طيب إزاى نجيب الاتنين معا اننا من الاول نختار على اساس معقول وبدون مغالاة فى الصفات المطلوبة .حاسب لا اسطى !!!! على جنب لو سمحت هنزل المحطة دى

[~Heba~]

الاخت الغالية دكتورة المستقبل:نونا

يا حبيبتى انا فاتحة الموضوع ليكى انتى و البنات عشان تفضفضوا

بس ايه دا يا بنتى هو انت كنت عايزة تكتبى مذكراتكو انا اطلقت لكى العنان بالموضوع ده!!!!!!!!

عموما انا لفت نظرى فى كلامك حاجة مهمه

المشكلة عندنا ان الراجل لازم يبقى راجل

و يبقى أفضل من الست في النواحي العلمية و المادية

يعني مثلا بيتقال عندنا في مصر جمل كدة لذيذة خالص

العروسة دايما احلى من عريسها

حاجة بقى مسلم بيها

تخيلي بقى

لو العروسة اوحش من العريس سنة

بيتبقى محط استهجان و تعجب ازاى الحليوة ده خد البتاعة ده

اقلبي بثى الموضوع على درجة التعليم

هتلاقي الناس بتقول دكتورة ولا مهندسة و متجوزة سمكري دوكو!!!!!!!!

و تبدأ الافتراضات

ده اصلها عنست و مش لاقية

و ماله ضل راجل ولا ضل حيطة

و عواجيز الفرح يقطعوا الواحدة بلسنتهم

هى دى المشكلة

انا عن نفسى ممكن اتجوز واحد ولو دبلوم (طبعا ضرورى يكون بيعرف فى الكمبيوتر و الانترنت) طالما هو انسان مثقف لكن الناس حتقول عليا ايه

اهلى نفسهم مش حيرضوا لانهم كمان حيخافوا من كلام الناس

رغم انه ممكن يكون زوج صالح بكل المقاييس الاخرى من دين و اخلاق و نسب و مال....و شكل كمان و ده مهم عشان تحسين النسل ;)

و انت يا سامح تعالا هنا

طب لو رجعنا بالزمن ورا حبتين تلاتة كدة

هانلاقى ان الرسول صلى الله علية وسلم والسيدة خديجة رضى الله عنها وارضاها

هل كان حد يصدق ان واحدة صاحبة حسب ونسب ومال

تتجوز رجل كان بيخرج بتجارتها وكان بيرعى الغنم ... لو مشين بالمناصب يبقى لاء طبعا

ما حدش يصدق

زواج السيدة خديجة من الرسول صلى الله عليه و سلم لا يمكن ان يقاس عليه اى شئ فى عصرنا الحاضر

العرب كانوا سعتها حياتهم قبلية اهم شئ عندهم النسب و بيفتخروا بالانساب و نسب الرسول صلى الله عليه وسلم يغنيه عن اى مال او جاه........الثقافة والعلم و المهنة فى ذلك العصر لم تكن تعنى اى شئ بل ان مهنة راعى الغنم فى حد ذاتها كانت محل تقدير و هى مهنة اساسية فى المجتمع البدوى

و بعدين هاتلى انت واحد عنده 80% من اخلاق الرسول صلى الله عليه و سلم و انا اتجوزه و انا مغمضة حتى لو كان امى....و ليك عليا انا اعلمه :blink:

الاخ اللفاضل منصوراوى

تسلم يا بلدياتى على المرور على الموضوع

رأيك تمام و مظبوط

و بعدين متفتحش عيون الناس على الخمريد...لو عرفوا قيمته الغذائية حيغلى و حنبقى مش طايلينه

و بالنسبة للصبر و الرضا...والله صابرين بس مين يقدر الصبر

السلام عليكم يا أيها القوارير انا كنت واقف فى محطة المترو وجه المترو واتفتح الباب ولقيت العربية كلها بنات وراجل واحد

اهلا بيك معانا يا محمد

بس راجل واحد ازاى انت مش شايف رد الاستاذ عادل و الاخ منصوراوى و المهندس سامح و الاخ الفاضل ابو جيداء

عادى قولوا رأيكم ده موضوع يمس المجتمع كله

و لو لخصناه فى كلمتين حنقول " ما هى مقاييس الزواج فى ظل الضغوط التى يواجهها المجتمع الان من فقر و انهيار اخلاقى"

انا بدورى بحاول اقنع البنات ان الشهاده مش كل حاجة

و الواحدة يكفيها فى شريك الحياة ان انسان متفهم ومثقف وقادر على الانفاق"مش شرط غنى جدا" طبعا بالاضافة للدين و الاخلاق

واقولهم اتركوا على جنب وجاهه العريس الاجتماعية ومنصبه و لا تهتمى بالمظاهر فى شريك الحياة

وده مش مغالاه و لا حاجة بس انا اتمنى ان البنات يرتبوا الاولويات وتخلى الاشياء الجوهرية فى الاول خالص

و انا كتبت الموضوع بسبب ان واحد اعرف اتقدم لبنت صيدلانية رفضته رغم انه محاسب و مستريح ماديا جدااااااااا و متعيبوش حاجة الا انه مش دكتور و لا صيدلى

و اتقدم لواحدة تانية دكتورة رفضته كمان

تعتقدوا الراجل بقى عنده عقده ;)

[سهران]

يبدو اننا هانحتل عربية الستات في المترو و نستولي عليها .... لا مؤاخزة و أعذرونا على التطفل ....

أنا شايف أن التصنيف مش في محلة لكنة أقرب لميراث قديم نتناقله جميعا .......... أيهما أفضل مهندس عادي أم محامي شهير متميز مرموق .......... طبيب متوسط الكفائة أم محاسب ناجح بارع مميز ... صيدلاني عادي أم مدرس بكفائة عالية و ناجح ...... أعتقادي أنه لو المؤهل عالي يبقى الفرص متساوية و العبرة أيهم أنجح في مجاله و من منهم مميز بين أمثاله ..... باقي الأعتبارات الدينية و الثقافية و الأخلاقية و التكافؤ و منظومة القيم السائدة لدى الشخص ما لهاش علاقة بالشهادة ....... دعواتي للجميع بالتوفيق و الزواج الناجح و السعادة.....

[المنصوراوى]

رغم انه ممكن يكون زوج صالح بكل المقاييس الاخرى من دين و اخلاق و نسب و مال....و شكل كمان و ده مهم عشان تحسين النسل :bro:

اختى العزيزة هبة حياكى الله وليس تحياتى الى فيها الكلام الكبير اللى قراته

الاسلام حدد لنا كل شى فى حياتنا ز كان لازما علينا ان نتبع ما جاء به الاسلام

قال الرسول الكريم صلى الله عليه و سلم فى معنى الحديث (من ترضون دينه و خلقه فزوجوه و ان لم تفعلوا يكن فسدا كبيرا فى الارض و فتنه)هذا معنى الحديث زوجوه يعنى اقبلوه زوجا

اذن فالمقياس الحقيقى الدين :aslam:

اما بالنسبة لتحسين النسل يبقى انتى بتحلمى و انتى فهمانى كويس و بلاش نسيح علشان فيه ناس بتتربص

[~Heba~]

اما بالنسبة لتحسين النسل يبقى انتى بتحلمى و انتى فهمانى كويس و بلاش نسيح علشان فيه ناس بتتربص

تقصد ايه :aslam:

[المنصوراوى]

اما بالنسبة لتحسين النسل يبقى انتى بتحلمى و انتى فهمانى كويس و بلاش نسيح علشان فيه ناس بتتربص

تقصد ايه po::

اقصد ايه ؟انت مش عارفة اقصد ايه !

ايه يا باشمهندسة انتى كده حتخلينى اشك فى ذكاءك

مش كفاية موضوع الخمريد الى الناس كلهم عرفوا فيدته حتى و انا ماشى فى شوارع القاهرةشامم ريحته يعنى الموضوع انتشر والناس كلها بتعم

[المنصوراوى]

اما بالنسبة لتحسين النسل يبقى انتى بتحلمى و انتى فهمانى كويس و بلاش نسيح علشان فيه ناس بتتربص

تقصد ايه :rolleyes:

اقصد ايه ؟انت مش عارفة اقصد ايه !

ايه يا باشمهندسة انتى كده حتخلينى اشك فى ذكاءك

مش كفاية موضوع الخمريد الى الناس كلهم عرفوا فيدته حتى و انا ماشى فى شوارع القاهرةشامم ريحته يعنى الموضوع انتشر والناس كلها بتعمل خمريد دلوقتى

و لا موضوع الجوزيرة الى بقت سيرتها على كل لسان

علشان كده قررت اتكلم بالشفرة

[م.سامح المصرى]

و انت يا سامح تعالا هنا

طب لو رجعنا بالزمن ورا حبتين تلاتة كدة

هانلاقى ان الرسول صلى الله علية وسلم والسيدة خديجة رضى الله عنها وارضاها

هل كان حد يصدق ان واحدة صاحبة حسب ونسب ومال

تتجوز رجل كان بيخرج بتجارتها وكان بيرعى الغنم ... لو مشين بالمناصب يبقى لاء طبعا

ما حدش يصدق

زواج السيدة خديجة من الرسول صلى الله عليه و سلم لا يمكن ان يقاس عليه اى شئ فى عصرنا الحاضر

العرب كانوا سعتها حياتهم قبلية اهم شئ عندهم النسب و بيفتخروا بالانساب و نسب الرسول صلى الله عليه وسلم يغنيه عن اى مال او جاه........الثقافة والعلم و المهنة فى ذلك العصر لم تكن تعنى اى شئ بل ان مهنة راعى الغنم فى حد ذاتها كانت محل تقدير و هى مهنة اساسية فى المجتمع البدوى

و بعدين هاتلى انت واحد عنده 80% من اخلاق الرسول صلى الله عليه و سلم و انا اتجوزه و انا مغمضة حتى لو كان امى....و ليك عليا انا اعلمه :rolleyes:

لا يا باشمهندزة هبه

المفروض يقاس

اصل احنا بنقول اية احنا ماشيين على نهج الرسول وسنتة

طب ازاى

لو احنا ماشيين على نهجة

يبقي نعمل اقل حاجة هوا كان بيعملها

وعلى فكرة مهنة التجارة هيا العمل الى كانوا بيفتخروا بيه

انما الرسول صلى الله عليه وسلم

بدأ راعى غنم وبعد كدة بقى يخرج بتجارات للسيدة خديجة رضى الله عنها وارضاها

انما مهنة راعى غنم ما كانتش مناسبة لنسب كويس فى الجاهلية

ثانياً يا ستى لو ادامك حل من اتنين

تتجوزى واحد صاحب منصب واية عال العال وثروة وكل الى انتى عيزاة

بس مش هايبقي مقدرك

ولا واحد عادى صنايعي

دا هايقدرك وهيحافظ عليكي

طبعاً الصنايعي

علشان اخلاقة كويسة

ولان اخلاقة كويسة يبقي ما تشكيش انه هايبقي حاجة كبيرة بعد كدة

انتى تعرفى يا هبه مع انى اعدت فترة صغيرة فى الغردقة

بس بجد لاحظت حاجة جميلة جدا فى الاجانب

ما بيهتموش بمظهره اوى او شعرة وشكلة او كدة

انما بيهتمو بطباعة ورجولتة

انما النسوة العرب

تخيلي بقى لو واحدة جالها عريس

يمكن يكون اول سؤال لابوها

هوا شبه تامر حسنى :blush2:

ولا حتى هيثم شاكر ..... طب حتى مصطفى قمر

دا على فكرة فكر بنات فى الجامعة

عرفتى بقى يا هبه

إلا من رحم ربى

[هشام عباس]

يا جماعه انا ليا وجهة نظر في الموضوع ده

صدقوني يا بنات المحاورات مش المركز الأجتماعي والشهادات هي المقياس ابدا ابدا

وهقلكم على تجربه شخصيه

زوجتي عندها اخين تؤم متشابه يعنني شكل بعض تماما والفرق الوحيد في الشكل بينهم ان واحد عنده حسنه جنب انفه والتاني لأ

المهم لما كانوا في ثانويه عامه كان واحد اشطر من التاني بشويه ودخل تربيه قسم لغه عربيه والتاني درجاته مدخلتهوش غير حقوق

ولما اتخرجوا الأول اشتغل مدرس لغه عربيه والتاني اشتغل وكيل نيابه!!!!!!

وبقى مكتوب في بطاقته المستشار فلان الفلاني

المهم ان الأتنين دلوقتي بيدوروا على عروسه لأن بقى عندهم 30 سنه ولسه لم يرتبطوا الى الأن

واقسم لكم بالله ان لو كان ليا اخت كنت اكيد هجوزها لمدرس اللغه العربيه لأنه بسيط ومتفهم وني وبالرغم من ان اخلاقه ممتازه الا ان طريقة تفكيره ديقه وغريبه ومتعصب لأرائه وحاجات تانيه كتيره جدا

لكن لو الأتنين دول اتقدموا لنفس البنت طبعا وبلا اي تردد اي بنت هتختار وكيل النيابه(الباشا) وايش جاب حتة مدرس لغه عربيه لوكيل نيابه او نقدر نقول ايش جابه لسيادة المستشار؟

وده طبعا اسلوب ظالم جدا جدا

صحيح الشهاده مهمه لكن فيه اهم كتير جدا منها

وانا رأيي ان البنت الي يجيلها عريس محترم ولو كانت شهادته اقل منها فالمقياس هنا هو مين الشخص ده؟ اخلاقه ايه؟ طباعه ايه؟ تصرفاته عامله ازاي؟ معاملته ليها شكلها ايه؟

هو ده المهم

وبعدين رسولنا الكريم حسم الموضوع من زمان

اذا جائكم من ترضون دينه وخلقه فزوجوه

ومقالش شهاداته ولا تعليمه

انا عندي 3 بنات صحيح لسه صغيرين جدا اكبرهم عندها 5 سنين لكن انا ناوي والله اذا جالهم شخص كويس ويعرف ربنا واخلاقه كويسه واهله ناس طيبين انا هجوزه بنتي وهساعده على اد ما اقدر كمان

عارفين انا لما جيت اتجوز حماتي كتبت قايمه ولما شفها والدي رحمة الله عليه اخدها وراح لحمايا وقاله انه مش موافق على القايمه ديه

عارفين حمايا عمل ايه؟ اخد القايمه وقطعها وقال لوالدي انا امنتكم على بنتي دم ولحم وانت جي تتكلم في شوية خشب وكلام فاضي!!!!!!!!!

ووالله من ساعتها وانا شايلهاله وبعامل زوجتي بما يرضي الله وبراعي ربنا دايما فيها

وناوي اعمل كده مع ازواج بناتي ان شاء الله

[Nonna]

أستاذ هشام

انا متفقة مع حضرتك تمامااااااااا

الا في ده

لكن لو الأتنين دول اتقدموا لنفس البنت طبعا وبلا اي تردد اي بنت هتختار وكيل النيابه(الباشا) وايش جاب حتة مدرس لغه عربيه لوكيل نيابه او نقدر نقول ايش جابه لسيادة المستشار؟

و انا لما قلت الفارق التعليمي كنت أقصد بيه الفرق الشاسع بين الاتنين

يعني ما تبقاش هي جامعية مثلا وهو دبلوم معلش يعني

او هي جامعية و هو معاه اعدادية

ولا ايه

لام في رايي الدين ده اول حاجة اذا صلح ماشي طبعا باقي الامور صلحت في الشخص ان شاء الله

انما برده في حجاة اسمها طبعا

و نفسيات

وطرق تفكير

للاسف ممكن دينه ما يبلغوهوش لدرجة ان الحاجات التانية ده تبقى كويسة

بالذات للاسف برده في وقتنا الحالي

المعنويات بقت أسوأ من الماديات

بمعنى

ان مش بس الحالة الاقتصادية للشباب بقت سيئة

لا ده كمان النواحي المعنوية بقت أسوأ

من اسلوب في المعاملة و الكلام و المشاعر و الاحترام و التفكير و الطيبة و التقدير

الخ الخ

فاذا تنازلت الواحدة عن المادة وده كتير و ربي بيحصل

ما ينفعش كمان تتنازل عن معنويات

زي دين كويس علم كويس اسلوووب معاملة كويس

[~Heba~]

لا يا باشمهندزة هبه

المفروض يقاس

اصل احنا بنقول اية احنا ماشيين على نهج الرسول وسنتة

طب ازاى

لو احنا ماشيين على نهجة

يبقي نعمل اقل حاجة هوا كان بيعملها

وعلى فكرة مهنة التجارة هيا العمل الى كانوا بيفتخروا بيه

انما الرسول صلى الله عليه وسلم

بدأ راعى غنم وبعد كدة بقى يخرج بتجارات للسيدة خديجة رضى الله عنها وارضاها

انما مهنة راعى غنم ما كانتش مناسبة لنسب كويس فى الجاهلية

ثانياً يا ستى لو ادامك حل من اتنين

تتجوزى واحد صاحب منصب واية عال العال وثروة وكل الى انتى عيزاة

بس مش هايبقي مقدرك

ولا واحد عادى صنايعي

دا هايقدرك وهيحافظ عليكي

طبعاً الصنايعي

علشان اخلاقة كويسة

انا قلت لا يقاس عليها لان ظروف مجتمع الرسول صلى الله عليه و سلم غير موجوده الان

العرب ساعتها كانوا بيهتموا بالنسب و نسبه صلى الله عليه و سلم غنى عن التعريف لذا لم يكن هناك اى مشكلة ان ولى السيدة خديجة يقبل زواج الرسول صلى الله عليه و سلم

كما انا اخلاقه صلى الله عليه و سلم تغنى عن اى شئ آخر و اخلاقه كانت تسبقه فى اى مكان يذهب اليه لما لا و هو "الصادق" "الامين"

و انا قلتلك ايه قبل كده...

و بعدين هاتلى انت واحد عنده 80% من اخلاق الرسول صلى الله عليه و سلم و انا اتجوزه و انا مغمضة حتى لو كان امى....و ليك عليا انا اعلمه

و بعدين يا سامح انتى شايفنى بحرض البنات انهم يبصوا للثروة و الجاه و المنصب....لأ طبعا انا من اشد المعارضين لكده........لكن مهم يكون فيه توافق فكرى على الاقل

بس بجد لاحظت حاجة جميلة جدا فى الاجانب

ما بيهتموش بمظهره اوى او شعرة وشكلة او كدة

انما بيهتمو بطباعة ورجولتة

هما دول عندهم جواز اصلا

و ان كان عندهم حتبص لفلوسه