شباب زى الورد .....حقيقى....

[لونا]

امبارح شفت اسراء عبد الفتاح فى 90 دقيقة وبلال دياب اللى قاطع رئيس الوزراء فى جامعة القاهرة فى العاشرة مساءا .حقيقى اثلجوا صدرى بعد الواحد ما قال ما فيش فايدة الشباب بايظ وتافه....بالعكس..... حقيقى فرحت جدا بيهم شباب مثقف وواعى ومتحدثين لبقين وخاصة بلال ولد طموح منى الشاذلى بتقول له انت عايز تكون ايه سياسيا قال لها انا باطمح اكون رئيس جمهورية انتظروا هذا الشاب وراقبوا نجمه السياسى وهو يرتفع على فكرة هو عضو فى حزب الغد . .وهو ايضا يعرف جيدا هوعايز ايه فيه رسالة محددة عايز يوصلها وقالها بطريقة اقرب للسياسيين المحنكين هو قال فى كلمته فى الجامعة ان العيش موجود والتعليم فل الفل والديموقراطية موجودة فرد عليه احمد نظيف انت بتسخر من الحكومة؟ وكان رده على منى الشاذلى فى النقطة دى: ان دة مش كلامى دة الحكومة هى اللى بتقول ان كله تمام يبقى لو فيه حد بيسخر يبقى اكيد حد تانى مش انا ...

[التونسى]

على فكره .. انا فعلا حاسس ان الجيل الجديد ده حيعمل شئ وحيغير شئ فى مصر .. ومتفق معاكى فى الراى ... اذا كان جيلى والاجيال اللى قبلى معظمها بل اغلبها انسحق وانبطح وهرب من المعركه ..واكتفى بالتلمظ والتصعب والاقوال دون افعال .. فلا اعتقد ان الجيل الجديد هذا الذى ظهرت بشائره سوف يستسلم بسهوله للامر الواقع .. فمقارنة بهم قد يكون جيلى والاجيال التى قبلى اكثر حظا منهم (0نسبيا)) .. فعلا هذا الجيل الجديد لم يترك لهم الطغاه او اللصوص اى نسمة امل فى الاصلاح .. والصوره امامهم سوداويه بلا اى بقعة ضوه ولو شحيحه .. لذلك ليس لديهم ما يخسروه .. والمواجهات بينهم وبين الطغمة الحاكمه ستتابع امواجا وزلال .. حتى يتحقق المراد المنشود من اصلاح ...واتمنى فقط الا يصل الامر لمرحلة ((هدم المعبد على الجميع))

اقولها ((ووقودى التفاؤل))بعد ان كنت فقدت الثقه فى كل شئ .. اقولها .. التغيير قادم .. لا محاله

تم تعديل 27 أبريل 2008 بواسطة التونسى

[se_ Elsyed]

للاسف الشديد منذ قيام ثورة يوليو المباركة .. تم تحييد وتغييب تلك الفئة من الشعب تماماً .. وحتى الان تسير هذه العملية بشكل منظم ومدروس ..

وذلك لإن كل ديكتاتور يعلم بإنهم مكمن الخطر على عرشه وكرشه

ولو نلاحظ إن في عز أيام الإحتلال العثماني والإنجليزي لمصر كان الشباب هم المحرك الرئيسي لكل الثورات على الظلم ...

وحتى اللي قتل كليبر أكبر قائد في الحملة الفرنسية كان شاب سوري يدرس في الأزهر

وشوفنا وقرأنا عن الحركات السياسية لدى شباب الجامعة في أوائل القرن التاسع عشر .. وكيف كان يُطلق عليهم فعلاً إنهم شباب زي الفل

حتى الثورة لما قامت ... كان معظمهم شباب وما كانش فيهم حد كبير في السن تقريباً غير المرحوم الرئيس محمد نجيب عشان كده كانوا عارفين قوة الباب .. وبالتالي قتلوه وأدوه في مهده

ومن بعد الثورة مباشرةً تم تقسيم تلك الفئة إلى 4 انواع :

1- نوع منتمي لهم تماماً ومعمول له غسيل مخ وبتاع الإتحاد الإشتراكي واليوم أصبح عندي كارنيه وتلك الشعارت الفارغة .... إلى أن وصلنا إلى شباب جمعية جيل المستقبل بتاعتك جمال مبارك اللي بمنتهى البجاحة لها مقار في الجامعات عيني عينك .. ومنهم بنشوف العيال المتحفلطة اللي بيحضروا لقاءات الريس أو الوزراء وبيبقوا متحفظين هما هايقولوا إيه وإمتى يسقفوا وإمتى يعيطوا ودول بايعين القضية وراكبين الموجه

2- نوع واعي ومتفتح ومعتدل وعايز يعمل حاجه ودول بياخدوا بالقديمة وبيتسحلوا والدولة بتلعب لهم في البوصلة بتاعتهم فمابيبقاش عارف يروح فين وييجي منين .

3- نوع تم السيطرة عليه من قِبل أطراف أخرى غير الطبقة الحاكمة زي الجماعات الإسلامية العنيفة مثلاً ودول كانوا معظمهم يأسين من النظام وعشان كده طلعوا كل الغل في العنف ضد المجتمع .

4- نوع سلبي وهيبز وروش وسلم لي عالمترو .. ومالوش في أي حاجه ...

وظهرت شعارات جوفاء تقول إن الجامعة هي مكان للتعليم فقط وبالتالي لا يجوز ولا يصح إنخراط منتسبيها وطلبتها في السياسة ...

يعني حلال على بلابله الدوح ... حرام على الطير من كل لون !!!!!!!!!!!!!!!

يعني هما يستقطبوا شباب الجامعات في الخزعبلات بتاعتهم ويطلعوا لهم كارنيهات حزب وطني وياخدوهم معسكرات التدريب زي بتاعت النازية ويدوا كل عيل ترنج ويزورهم علي الدين هلال ومجدي الدقاق مسئولي التثقيف في الحزب الوطني واللي هما أساساً لا مثقفين ولا يعرفوا حاجه عن الثقافة . وده يبقى حلال والله اعلم

ولما ييجي ولد يفكر بشكل حر ويقول لأ للخطأ ويطالب بإنتخابات إتحاد طلاب على الأقل حره ... تلاقيهم سحلوه وطردوه من المدينة الجامعية او خدوه مبنى امن الدولة يتنفخ هناك .

ولإن كل ديكتاتور غالباً ما يكون غبياً ولا يقرأ ولا يكتب ويادوب بيفك الخط .. فبيبقى فاكر إن كده الامور تماما وإن الوضع تحت السيطرة وإنها ستدوم له ...

لكن هيهات

ففجأة لقينا منتديات إنترنت موجوده وفيها شباب زي الفل ..

ثم ظهرت المدونات ... وفيها برضوا شباب زي الفل وبيقولوا كلام جامد قوي وبنشوفهم في مقدمة كل مظاهرة رافعين شعارات لمصر .. ولمصر فقط ولا يسعون وراء أي منصب أو شُهرة ..

ثم إنفتحت على الطغاة أبواب جهنم متمثلة في احزاب الـ " فيس بوك " ولقينا بنت زي الفل بتقود أكثر من 70 ألف شخص وتحرك الجماهير في مختلف المدن المصرية ..

أنا كلي أمل ... وأرى نور ساطع في أخر الممر .. متمثلاً في هؤلاء الشباب الواعي .. الذي قاوم دعاوى الجهل والروشنة وسياسة الإستهلاك التي تريد الحكومة ان توحله فيها ...

لإن هؤلاء الشباب هم وحدهم من سيدفعون الثمن .. وإذا ما كانوش يدافعوا عن البلد اليوم ، فبكره مش هايلاقوا البلد أساساً بعد ما مبارك باعها بالرخيص ..

[سكر]

يا فرحة ايمن نور

باسراء وبلال

[justtrying]

ما علينا :closedeyes:

[galaxy]

يمكن لانهم عودوا بعض الاجيال ان تكون كما الجياد تجر العربه فقط وهو اللي ذكرته ايضا في موضوع اخر........اصبحت هذه الفئه لا تسعي سوي لاستكمال يومها وبضعه ايام اخري لا اكثر......تسعي للقمه العيش فقط ...لا لمستقبل ....ودا طبعا لان ليس في امكانهم ما هو اكثر.........لذلك اصبح اغلي مطالبهم رغيف او مستوي معقول او ادني للمعيشه الكريمه ..لحفظ ماء الوجه فقط...هذا ان حفظ..........لذا انتقلوا بهم من خانه احلام غد افضل او اجمل .........الي خانه الحلم بما يقيم المعيشه يوم بيوم فقط.............والناس عايزة تعيش بس وتقدر تصلب طولها عشان تكمل جر................وكمان عشان ولادها تعيش.

اما الشباب دول فهم بدايه بجد حقيقيه...وحاجه تفرح فعلا....انا بشوف فيهم اصرار وعزيمه ورغبه حقيقيه بجد في التغيير للاحسن.........لكن هل هيسمحوا لهم بأستكمال الحلم.....بدون ان يغتالوه او يكمموه......ربنا يستر بجد عليهم لانهم صرحوا بأمالهم بالفعل ......حتي لو يكفي والله وجود هذه النماذج المثقفه المشرفه..وان غدا لناظره قريب....تحياتي

[se_ Elsyed]

يحميك يا دياب يا بني

إضغط هنا عشان تعرف الولد قال لأحمد نزيف إيه

[Sherief AbdelWahab]

هناك من يطالبنا خارج السايبر السبيس بالامتناع عن التفكير خشية أن يكون له علاقة بالسياسة، ومن يحجر على أي فكرة خشية أن يكون لها علاقة بالسياسة ، ومن يصادر على أي قناة أو رأي خشية أن يكون له علاقة بالسياسة..

هؤلاء هم تربية الحكومات السابقة ، والوزراء السابقين، الذين يقدمون لنا كوطنيين شرفاء لا يقبلون الفساد بينما كانوا هم الفشل والخيبة وتلف الأمل.. وسمعني سلام: أبوس إيديك كفاية..منديلي مش معايا!

خلص الكلام

[Mohammad Abouzied]

يا فرحة ايمن نور

باسراء وبلال

اسراء وبلال انضمو مع حزب الغد بعد الانقلاب على ايمن نور وعزله من قيادة الحزب

[!! Lidooooo !!]

مصر بخير

علامات الاستفهام حول أداء اوربيت ومذيعيها

[الحازم حسن]

1- نوع منتمي لهم تماماً ومعمول له غسيل مخ وبتاع الإتحاد الإشتراكي واليوم أصبح عندي كارنيه وتلك الشعارت الفارغة .... إلى أن وصلنا إلى شباب جمعية جيل المستقبل بتاعتك جمال مبارك اللي بمنتهى البجاحة لها مقار في الجامعات عيني عينك .. ومنهم بنشوف العيال المتحفلطة اللي بيحضروا لقاءات الريس أو الوزراء وبيبقوا متحفظين هما هايقولوا إيه وإمتى يسقفوا وإمتى يعيطوا ودول بايعين القضية وراكبين الموجه

جمعية جيل المستقبل شيء جميل وإيجابي يكفي انها لديها منح دراسية راقية في مجال الـ IT لكتير من الشباب

[~Heba~]

احب احكى هنا تجربتى عندما كنت فى الفرقة الاعدادية بكلية الهندسة

كنا صغيرين مش عارفين حاجة فى اى حاجة ......... همنا بس نعدى دراستنا على خير و ننال رضا الوالدين

و فى مرة من المرات

وامام قاعات المحاضرات و جدنا شخص يقول لنا يالا يا شباب الى قاعة النيل ( و دى اكبر قاعة فى الجامعه)

طيب ليه يا استاذ

قال حتعرفوا هناك

قلنا يمكن فيه حفلة و الاحاجة(حفلة تنصيب اتحاد الطلبة مثلا) و فرحنا و قلنا حنقضى وقت حلو و غير كده وكده قلنا كويس حننفد من المحاضرة الغلسة اللى حتبتدى بعد خمس دقايق

و هنا كفى قاعة النيل

كان بإنتظارنا مؤتمر مبايعة الرئيس انما مبايعته للمرة الكام مش فاكرة

و احنا داخلين كانوا بيسلموا كل واحد ورقة صغيرة عليها كلمات اغنية الفوها العباقرة و كتبوها لنا فى ورق عشان نرددها معاهم

اللى انا متذكراه من كلمات الاغنية كلمتين بس

يا مبارك احنا اخترناك و بحب و عهد بايعناك

و مش فاكرة الباقى و الله

انما كان شكلنا يضحك و احنا منساقين للمصير المحتوم و هو مبايعه الرئيس بدون ما نعرف حتى يعنى ايه مبايعة وليه بنبايع ليه وايه الفرق بين البيع و المبايعة

[se_ Elsyed]

1- نوع منتمي لهم تماماً ومعمول له غسيل مخ وبتاع الإتحاد الإشتراكي واليوم أصبح عندي كارنيه وتلك الشعارت الفارغة .... إلى أن وصلنا إلى شباب جمعية جيل المستقبل بتاعتك جمال مبارك اللي بمنتهى البجاحة لها مقار في الجامعات عيني عينك .. ومنهم بنشوف العيال المتحفلطة اللي بيحضروا لقاءات الريس أو الوزراء وبيبقوا متحفظين هما هايقولوا إيه وإمتى يسقفوا وإمتى يعيطوا ودول بايعين القضية وراكبين الموجه

جمعية جيل المستقبل شيء جميل وإيجابي يكفي انها لديها منح دراسية راقية في مجال الـ IT لكتير من الشباب

إنت بتتكلم جد يا حازم ؟

ويا ترى الدورات دي من فلوس مين ؟

ويا ترى أنت شايف إن ده عدل إنهم يقولوا ما فيش سياسة في الجامعات في حين إن الحزب الوطني هو بس الوحيد اللي يعمل مقرات لجمعيته الإستهلاكية بتاعت المستقبل داخل الجامعات وفي اماكن مميزة مقتطعة من مباني كل جامعة ؟

[الحازم حسن]

ما علينا من موضوع الفلوس ده نص العمى ولا العمى كله

هيه ممكن تكون فعلا دعاية للحزب الوطني لكن من زاوية تانية فيها فايدة لشباب كتير مش لاقيين اي فرصة اكون كداب لو هاجمتها وانا نفسي كنت واحد من اللي قدموا في المنح بتاعتها

مفيش حاجة وحشة بنسبة 100% لازم حيكون في 5% حشبتكنات وحركات وأهو كله فايدة للشعب

[se_ Elsyed]

ما علينا من موضوع الفلوس ده نص العمى ولا العمى كله

هيه ممكن تكون فعلا دعاية للحزب الوطني لكن من زاوية تانية فيها فايدة لشباب كتير مش لاقيين اي فرصة اكون كداب لو هاجمتها وانا نفسي كنت واحد من اللي قدموا في المنح بتاعتها

مفيش حاجة وحشة بنسبة 100% لازم حيكون في 5% حشبتكنات وحركات وأهو كله فايدة للشعب

لأ إسمح لي

ما بُني على باطل فهو باطل يا حازم

مره أخرى : هل لو فكر الإخوان المسلمين أو حزب الوفد خلينا نقول .. في إنه يفتح كشك صغير أمام أي جامعة ... تفتكر هايعملوا فيهم إيه ؟

تعرف إن كان ممنوع على اي حزي غير الحزب الواطي إنه يعلق دعاية على اسوار الجامعة او المحافظات أو أي جهة حكومية وكان الزبانية بييجوا بالليل ويطمسوا دعايا هؤلا المرحشين ويضعوا بدلاً منها دعايا مرشحي الحزب الفاشي ؟

وهل لو الحزب الوطني .. وزع - من فولسك على فكرة - عيشه ولحمه وفول نابت على الشعب ببلاش هل كده يبقى حلو .. ويبقى حزب ذو أهداف ساميه ؟

هذا ليس نص العمى ولا الحول ... بل هو العمى الحيثي بذات نفسه ....

[جويرية]

هناك من يطالبنا خارج السايبر السبيس بالامتناع عن التفكير خشية أن يكون له علاقة بالسياسة، ومن يحجر على أي فكرة خشية أن يكون لها علاقة بالسياسة ، ومن يصادر على أي قناة أو رأي خشية أن يكون له علاقة بالسياسة..

هؤلاء هم تربية الحكومات السابقة ، والوزراء السابقين، الذين يقدمون لنا كوطنيين شرفاء لا يقبلون الفساد بينما كانوا هم الفشل والخيبة وتلف الأمل.. وسمعني سلام: أبوس إيديك كفاية..منديلي مش معايا

يعني هما أسراء و بلال حيطلعوا في قناة و برنامج بتوع الحكومة غصب عنها

اللى قاطع رئيس الوزراء فى جامعة القاهرة فى العاشرة مساءا

مين ده اللي يجرؤ يقاطع رئيس الوزراء و لا يقاطع ظابط بنجمة واحدة

و بعدين هما لازم يسمحوا بجزء من المعارضة عشان الناس متنفجرش

و اهو كله تنفيث عن اللي جواهم بدل ما الخنقة توصل الناس أنها تبتدي تغيير بجد

فخليهم بس ياخدوا الأحساس أن هما يقدروا يعملوا حاجة