إحنا ليه ما بنعرفش نستمتع بوقتنا ؟

[se_ Elsyed]

دي صفة يشترك فيها كل العرب .. إلا من رحم ربي

تلاقينا عاملين زي ام العروسة ... فاضية ومشغولة ... يعني أم العروسة ممكن تبقى قاعدة مآنتخه في الفرح واللي حواليها هما اللي بيعملوا كل حاجه ومع ذلك ملبوخه وكراكيب الدنيا فوق دماغها ..

كذلك نحن

بصوا كده على ايام الإجازات أو أوقات الفراغ بتاعتنا وإزاي بنقضيها ؟

شيء في منتهى العجب ... وناس فاهمه الدنيا غلط .... ونرجع نتعجب ونقول : هو ليه أمراض الدنيا كلها ركبتنا ؟

ما هو من اللي بتعمله ياخويا ... وإنتي كمان ياختي

- نبص مثلاً على ثقافة الويك إند عند كل مواطن عربي .. إذا كان خميس وجمعه او أحد او أي يوم مش هاتفرق .... تلاقينا بنتصرف تصرفات موظفين أراري ... مخضرمين يعني ... وروتين وملل يدعو إلى الملل المُمل

** هات هنا يا بني الكاميرا على راجل البيت الشهير بابو السباع الغضنفر ... .. أحلى ويك إند بيقضيه في النوم لحد الظهر - الكاميرا بتعمل زوم إن مع بروفيل جانبي وركز لي قوي على إبتسامة الموناليزا - وبعد ما يصحى سي السيد ... مش انا .. لكن أقصد كل راجل عايش في دور سي السيد أو هو أصلاً سي السيد أو لسه شاب في مقتبل العمر وسيد بس من غير سي .. بعد ما يصحى من النوم يوم الإجازة يروح معدول في سريره وقالب حواجبه ومتمطع ومتخن صوته ومنادي على أمينة عشان تحضر له الحمام ( كنت زمان هاموت وأعرف الحمامات دي بتتحضر إزاي ؟ يعني إيه بيجيبوا التواليت مثلاً لعند السرير ؟... ولا في طقوس معينه بتتعمل في الحمام عشان تحضير العفاريت ؟ ... بالمناسبة لحد دلوقت ما عرفتش حتى بعد 8 سنين أشغال جوازية شاقة وتكسير حجارة وخلافة كيفية تحضير الحمام .. بس مش فارقه معايا عشان أنا راجل سيلف أديوكشن وأي هاف تو أيز وكده يعني ) وبعد ما ياخد الشاور المظبوط يتخن صوته برضوا وينده على امينة عشان تحضر له الفطار عشان يلحق يفطر قبل ميعاد الغدا ما ييجي ... وبعدين وهو بيفطر ومع كل ضربة لقمة في طبق الفول يروح باصص بصه على جرنان الأهرام الـ 150 صفحة بتاع يوم الجمعة واللي ملغمط إعلانات ويبتدي ينقي الاخبار من وسط الإعلانات ودي في حد ذاته عمليه شاقة وتستغرق ما بين ساعة إلى ساعتين في المتوسط .

بالصلاتو عالحبيب كده دخلنا على العصر .... يبتدي يحضر نفسه نفسياً ومعوياً للغدا ... يتخن صوته للمرة التالتة وينده عالغدا مع إنه لسه هابد طبق فول وخمس طعميات بخلاف البتنجان المخلل والطرشي .. يعني وجبة تخليه يعيش يومين على لحم بطنه .... ومع ذلك فهو إنسان منظم وما بيفوتش وجبه ... تنزل وجبة الغدا محاشي بقى وصنية بطاطس ولحمه او فراخ حسب التساهيل مع صحن ملوخية والتقلية عايمه على وشه والتقليايه بتجري ورا التانية عايزه تطولها ... بالإضافة إلى التحابيش ما بين سلطات ومخللات وشوربات و لسان عصفورات بالليمونات .... يخلص الغدا يروح بنفس الصوت التخين الخنيق ينده على الحلو ... وأساسي لازم يكون بطيخ ساقع ... أصل المحشي بيحب البطيخ .... والبطيخ لازم يكون شُقق ... وكل شقة من دول عاملة زي المركب الشراعي ... عشان وهو بيستخلص لحم البطيخ من القشر لازم يعمل صوت ببؤوه زي صوت ماكينة الشفط اللي بتشفط مياه الامطار من تحت كوبري العباسية اللي موصل على رمسيس واللي بيبقى عايم في الشتا بعد كل نوه ...

بعد المعركة الغذايئة دي الأمر لا يسلم من واحد شاي تقيل يرتشفه... قال إيه عشان يحبس الاكل اللي على وشك إنه يفط من فُم المعدة ... فهناك معتقدات فرعونية بتقول إن الشاي بيعمل زي المحبس اللي بيقف على الاكل وينزله تحت في المعدة حسب نظرية الاواني المستطرقة ... .... ومع رشفات الشاي اللي بنفس صوت الشفاطات ... يضرب باقي الجرنان لإنه تقريباً كده وصل لصفحة الوفيات وقرب يفنش .. فلازم ولابد المكونات دي تكبس على مراوح تلافيف نفسه وتلاقي رموشه أسترخت على جفون عيونه العسلية وفكرته بمقولة الشاعر الفحل إمرؤ القيس ... وليل كموج البحر أرخى سدوله.......علي بأنواع الهموم ليبتلى ...

أهي أرخى سدوله هي اللي أقصدها هنا ... هي بيت القصيد يعني ..

فبيقوم سي الأفندي ويكوع له قد ساعتين تلاتة قول أربعة ...وأثناء نومه بقى الاكل شغال جوه وعمال يضرب في عقله الباطن والبطيخ متحد مع المحشي .. وصينيه البطاطس عايمه في الملوخية .. ولسان العصفور مزنوق ومش لاقي مكان في العركة دي .... كل الكوكتيل ده لازم يكوبسه كوابيس جامده ويحلم بقى بأضغاث احلام غريبة منها ما هو مبهج زي مثلاً إنه صحي يوم الثلاثاء من النوم لقى الريس مقدم إستقالته ومسوي معاش مبكر بعد الثمانين وقرر يسيب البلد ويروح يشتغل في السعودية - أقصد رئيسه في العمل يعني :closedeyes: - أو إن أفران العيش عملت خدمة الهوم ديليفري وبقى العيش يجيله لحد باب شقته مفقع وسخن وبسمسم ..

ومنها ما هو محزن وكئيب .. كأن تطب عليهم حماته وتقعد عندهم فترة مؤقته قد سنتين تلاتة عبال ما حي العباسية يدبروا لها بيت بدل بيتها اللي وقع في زلزال 92 ( موت يا حمار .... ده هو اللي بيقول بعد ما امينه فاتحته في الموضوع وهو بيحلق دقنه وكان هاين عليه يمسك موس الحلاقة ويديها بشلتين في وشها من هول المفاجأة.... لإن أساساً الشقة عبارة عن أوضتين وصالة ... وحماته لو جت هاتقعد فين إن شاء الله؟ ... ما فيش بقى غير أوضة الجلوس اللي فيها التليفزيون وهايطضر يحط لها سرير سِفري مع مرتبة .. يعني كده مُتعة الفرجة على قناة الجزيرة والإتجاه المعاكس بمزاج ... وضرب ماتشات الكورة المصيرية بروقان .. كل ده إنتهى وتقريباً هايكون مصيره الفرجة على القهوة مع الغوغاء والدهماء ... بقى يا ربي حتى مُتع الحياة الواحد مش عارف يتسمتع بها في وجود هذا الكائن الحي المُسمى حماته ؟!؟!!!! دي حاجه تقصر الشعر .. قدصي العُمر )...

طب قشطه خالص .. كده دخلنا على العِشا واليوم قضيناه ما بين أكل وقراية جرانين ...

ستوب خلي بالك إحنا داخلين على منعطف تاريخي ..فهناك في جدول الاعمال ماتش الساعة 8 وربع ما بين الأهلي وحرس الحدود .... وده ماتش مصيري ولو الاهلي اخد التلات نُقط دول يبقى هايفرق عن الزمالك 37 نقطه ويحسم الدوري قبل إنتهاء مراحلة بسبعة وعشرين إسبوع ...

يفضل بقى سي السيد يعُد العدة ويجهز القاعدة بتاعت الماتش ... ودي مسائل تحتاج لطقوس خاصة .. لإن ما ينفعش ماتش ينضرب عالواقف كده والسلام أو من غير لب وسوداني لزوم تزبيل أوضة المعيشة - ليفينج رووم بالفرنساوي - ... الماتش بقى بالأكسترا تايم ... بالإستراحة بتاعت البيبس والشيبسي وعربيات النص نقل بين الشوطين ... كده بنتكلم على الساعة 11 بالليل خالص ..

يعني اليوم بقى في البخ ... وكل ويك إند وإنت طيب يا راجل يا طيب ...

- على الجانب الأخر نلاقي أمينه مرارتها أوشكت على الإنفجار السكاني ... وبيبقى الود ودها تطلع البلكونة وهي ناكشه شعرها وتصوت وتلم عليه الناس وهي بتقول : جاي ي ي ي ي ي ي ... يا ناس حد ييجي يشيل البتاع ده من هنا بدل ما أموته ..

** بس هي برضوا ما هياش ملاك وعليها لوم برضوا ... معليش إحنا بنتكلم ... وهالله هالله عالجد .. والجد هالله هالله عليه ..... .... فأنتي يا امينة لو ماكونتيش مستوظفة أو دكتورة أمراض نسا ... يعني قاعدة في البيت 24/7 ... فما حبكش أم يوم الجمعة يعني تنفضي فيه البيت .. وتمسكي المكنسة من صباحية ربنا وور ور ور ور ... او تلمي غسيل الدنيا كلها وتشغلي عليها الغسالة اللي صوتها عامل زي بابور الطحين وهاتك يا كركره ... وتحس إن البيت إتحول إلى ورشة عمل لمناقشة أبعاد الأنفلات النفسي للبؤر المستوطنة في حوض البحر الأحمر المتوسط ....

أوكيه يا ستي كلنا متفقين إن نفسك زي الفل في الطبيخ ... وإن عليكي ضربة منفضة ولا ضربات الإرسال بتاعت البت سيرينا ويليام أم عضلات بأتعقد منها وبتحسسني بالعجز كل ما ابص لدرعاتي اللي عامله زي البقسماط السادة ..... لدرجة إنك بتخلي السجاجيد تفك من بعضها وبعد فترة بدل ما تبقى سجاجيد بتبقى هلاهيل ... .. وعيالك نُضاف ومحمياهم ومفلياهم وحطا لهم جاز في شعرهم والجيران بيحلفوا بحلاوتهم وضفايرهم .... وبيتك بيلمع زي المرايا ..

لكن عليكي توجيه الاخ الآنتيخ اللي في البيت ده واللي إتحول إلى إنسان آنوي من الفصيلة الحجرية ... وإقترحي عليه شوية إفكار وإقتراحات مفتكسه ... ظريفة وغير مكلفة ... أعيد واكرر .. غير مُكلفة .. لقضاء ويك إند نضيف ( الرحمة شوية بالموظفين هو هايلاقيها من مراته ولا من الحكومة ) ... خديها من اخوكي س س الأصلي مش بتاع القصة ... يعني تستنوا على ما الدنيا تطري كده يوم الجمعه بعد المغربية ... وتاخدوا شوية ترمس على ثُمن لب سوبر مع شويتين شاي في الخمسينة وحتة حصيرة صغيرة وتستقلوا مترو الأنفاق من محطة غمرة لحد التحرير وتنزلوا تقعدوا شوية عالنيل .... ويا سلام بقى لو وإنتوا في الطريق تعدوا عالضاهر وترموا العيال عند والدتك وتقوليلها العيال ما لهمش سيرة النهاردة إلا عايزين نروح عند تيته .. عايزين نروح عند تيته ... وتقعدي إنتي وسي الأفندي على إستنفراد - زي زمان أيام الخطوبة ... هيييييييييييييييه الأ ليت الشباب يعود يوماً ... سي لا في - تاكلوا في ترمس وتقزقزوا في لب وتحبسوا بالشاي وتتكلموا في أي حاجه غير مشاكل العيال والعلاوة الإجتماعية وطوابير العيش والدورس الخصوصية ... وهُب عالساعة 12 تاخدوا بعضكوا وترجعوا البيت بعد ما تعدوا على والدتك عشان تجيبوا العيال قبل ما الست تخنقهم أو تعملهم هامبورجر .... لإن عندهم مدارس بكره ولازم يناموا بدري ... بدري دي في مصر يعني قبل 3 الفجر ... ..

كمان إيه المشكلة لو تعملوا حاجه كده زي صندوق الزمالة في البيت .. واللي مليان يكُب عالفاضي .. ... باتكلم جد ... وكل فترة كده لو قلبتي جوز جنيهات من جيب جوزك وإنت بتعملي نفسك بتنفضي البدلة الكشمير الصوف بتاعته لقيتهم مرمين على جنب وعندهم شعور بالوحدة .... او خنصرتي 10 جيني من مصروف البيت تحطيه في الصندوق المقفول ده ... وهو كمان مع كل قبض أول شهر يتبرع للصندوق ببريزة كبيرة او ما تجود به نفسه ...ويكون في جدار من الثقة بينكم .. بحثي ماحدش ييجي من ورا التاني ويقلب الصندوق او يختلس منه بضع جنيهات ...... وتيجيوا مع كل عيد عمال وقبل خطاب الريس تفتحوا الصندوق ... ولو طلع فيه مثلاً قد عدد واحد باكو جنيهات ... تروحوا تتفسحوا فسحه حلوه ... نايل كروز .... مطعم رومانسي ..... تجيبي له هديه نضيفة .. وهو يجيبلك هدية رومانسية عبقرية ..... تهبوا يومين على إسكندرية وأمركو لله خدوا العيال معاكو .... تبيعي غويشة من اللي في إيدك يا رشا وتزودي على اللي لقيتوه في الصندوق وتروحوا الأقصر واسوان يومين عند حسام وهبه .... كده يعني

بأتكلم جد والله

وللحديث بقية عن أساليب قضاء الإجازات.. السنوية منها والإسبوعية في أمتنا العربية ...

أقعدوا بالعافية

[~Heba~]

بس هي برضوا ما هياش ملاك وعليها لوم برضوا ... معليش إحنا بنتكلم ... وهالله هالله عالجد .. والجد هالله هالله عليه ..... .... فأنتي يا امينة لو ماكونتيش مستوظفة أو دكتورة أمراض نسا ... يعني قاعدة في البيت 24/7 ... فما حبكش أم يوم الجمعة يعني تنفضي فيه البيت .. وتمسكي المكنسة من صباحية ربنا وور ور ور ور ... او تلمي غسيل الدنيا كلها وتشغلي عليها الغسالة اللي صوتها عامل زي بابور الطحين وهاتك يا كركره ... وتحس إن البيت إتحول إلى ورشة عمل لمناقشة أبعاد الأنفلات النفسي للبؤر المستوطنة في حوض البحر الأحمر المتوسط ....

أوكيه يا ستي كلنا متفقين إن نفسك زي الفل في الطبيخ ... وإن عليكي ضربة منفضة ولا ضربات الإرسال بتاعت البت سيرينا ويليام أم عضلات بأتعقد منها وبتحسسني بالعجز كل ما ابص لدرعاتي اللي عامله زي البقسماط السادة ..... لدرجة إنك بتخلي السجاجيد تفك من بعضها وبعد فترة بدل ما تبقى سجاجيد بتبقى هلاهيل ... .. وعيالك نُضاف ومحمياهم ومفلياهم وحطا لهم جاز في شعرهم والجيران بيحلفوا بحلاوتهم وضفايرهم .... وبيتك بيلمع زي المرايا ..

:closedeyes: :lol: يا ربيييييييييي مش قادرة امسك نفسى من الضحك

احسن طريقة لقضاء الويك اند هى قراءة مواضيع سين سين

[badroora]

طبعا انت بتتكلم عن المتزوجين بس .يعنى الويك اند بتاع العزاب مش محسوب :closedeyes: طيب مش هتكلم انا بس هكلمك على تحضير الحمام دا معناه ايه

شوفى سيدي .....سى السيد .

الحمام على حسب نوع المنزل ومستوى الاسرة ..

تحضير الحمام فى أسرة نامية معناه

تُحط صفيحة ماية ع الباجور اللى بيوش ولما الماية تغلى تحضر الطشت والليفة والهدوم والذي منه .....ويقوم سي السيد

يتليف بعدها .......مش انت طبعا سي السيد اللى بتتكلم عنه .

فى الاسرة ذات الدخل المتوسط

لو من الناس اللى بتوفر كهربة السخان وتطفى السخان بعد كل حمومة تقوم تفتح السخان عشان الماية تسخن وبعدين تخضر الخلجات اللى هتتلبس بعض الشاور .

تحضير الحمام فى الاسرة ذات مستوى راقي شوية

تحضير الحمام

مليء الحمام بخار مع وضع عطر وحبيبات فوارة فى البانيو كريلاكسشين يعنى .

واضائة الشموع المعطرة عشان الريحة تعبئ المكان .

هذا والله اعلم

تم تعديل 27 أبريل 2008 بواسطة Badria Mekkawy

[رمضان]

انا الحمد لله مش بضيع ساعة فاضية الا واستمتع بيها

ويا سلام لو كانت الاجازة طويلة تلاقيني في شرم او الغردقة ودلوقتي بفكر اقضي الاجازة بره مصر خالص وفي نيتي تايلاند او سنغافورة او حتى تركيا ومعزوم على سوريا كمان بس ده جر رجل بيني وبينكم يعني علشان كده مش رايح

يعني بالصلاة على النبي مقضيها تمام

حتى لو مفيش حاجة جديدة يبقى بغير المطعم واروح مطعم بعيد شوية علشان برده يبقى خرجت

الاكتئاب وحش ومضر كمان بالشغل

بينصحونا في الشغل نغير جو باستمرار علشان مصلحة الشغل

[badroora]

ومعزوم على سوريا كمان بس ده جر رجل بيني وبينكم يعني علشان كده مش رايح

خير يا رمضان كانوا هيشلوك بضاعة ممنوعه ولا ايه :blink: اوعى يا رمضان المخدرات عقوبتها 25 سنه :lol:

ثم ماشاء الله عليك يا رمضان كل ويك اند فى بلد عينى عليك باردة :) :closedeyes:

[هشام عباس]

والله عندكم حق

انا لما بنزل مصر اجازه شهرين بنقضيها كلها مشاوير وخناقات وفض خناقات وحاجه اخر زهق

انا بفكر جديا اني السنه الجايه ابعت الولاد(4) نصر لوحدهم وناخد احنا بعضنا ونطلع على تايلاند نقضيلنا 4 او 5 ايام هناك اهو تغيير واعاده لشهر العسل الي قضيناه في اسكندريه!!!!!!!!!

اما هنا فالأستمتاع بالأجازه ممكن جدا قصدي على الويك اند وانا بعملها دايما باخد العيله وبنطلع على مكان اسمه القنتب ومن هناك بناخد مركب وفيه جزر صغيره في وسط الجبال الي على البحر بناخد معانا الشوايه والعصير والشاي والنسكافيه للمدام والذي منه ونفضل في الجزيره ديه من الصبح لغاية المغرب وبنكون لوحدنا خالص يعني بنعرف ننزل الميه والمدام بتلبس الي هيي عاوزاه لأننا بنكون لوحدنا خالص وفعلا بنستمتع جدا جدا بالأجازه ديه

بس للأسف مش بتتكرر كتير مع انها سهله جدا ومش مكلفه ابدا والولاد واحنا كمان بنتبسط جدا جدا

تصدق يا سي السيد انا هعمل العمله ديه ان شاء الله في الويك اند الي جاي

علشان خاطرك انت بس :closedeyes: