الستات عايزة ايه

[النيل حبيبي]

نفسي أعرف الستات عاوزة ايه

حاجه تحير خمستاشر سنه زواج

الهادئ مفيش فايدة،العصبى مفيش فايدة

قرار لوحدك مفيش فايدة،قرار مشترك مفيش فايدة

هل حريه الاختيار---------- يمكن

[خالد عيزوقي]

الستات عايزو زوج خفيف نظيف ,, شكله لطيف ,, وما ياكل أكثر من رغيف ,, ودمه خفيف,, ويكون جيبه مليان وظريف,, وقليل طلبات ,, ومايكونش معها عنيف.......

[SEMSEMS]

ههههههههههههه

ببساطة كده الستات عايزين يخرجونا من الجنة تاني وتالت ورابع

ربنا يخليهملنا ويحرقوا دمنا ويقدرهم علي اغاظتنا وشلنا

[مصرية و مغتربة]

بقي هي دي فكرتكم عن الستات ليه متكونش عايزة تفاهم حوار انها تلاقي في الراجل كل حاجة(اب واخ وصديق وحبيب) لو لقت كل دول عمرها ما هتشتكي.

[SEMSEMS]

بقي هي دي فكرتكم عن الستات ليه متكونش عايزة تفاهم حوار انها تلاقي في الراجل كل حاجة(اب واخ وصديق وحبيب) لو لقت كل دول عمرها ما هتشتكي.

والله مش بيعجب وبتشتكوا برده وهي دي سنة الحياة :lol:

ياريت الستات والبنات ماياخدوش الموضوع بحساسية

النيل حبيبي بيفضفض بس واهه ادالنا فرصة يا رجالة نتكلم من ورا زوجاتنا wst::

ماحدش يفتن علينا بقا

الستات bv:-

تم تعديل 28 أبريل 2008 بواسطة SEMSEMS

[هشام عباس]

الستات عاوزه حد يفهمهم ويتعامل مع عقلهم ورحهم ويقلهم كلمه حلوه ويعاملهم بالحسنى وينفز طلباتهم لو مفيهاش غلط ويساعدهم في تربية الولاد وفي ادارة شئون البيت ويحترمهم ويدلعهم

[~Heba~]

الستات عاوزه حد يفهمهم ويتعامل مع عقلهم ورحهم ويقلهم كلمه حلوه ويعاملهم بالحسنى وينفز طلباتهم لو مفيهاش غلط ويساعدهم في تربية الولاد وفي ادارة شئون البيت ويحترمهم ويدلعهم

الله ينور عليك جبت المفيد

بس اكيد فيه ستات عينهم فارغة ميملهاش الا التراب

بس و الله العظيم انا مش منهم

[alaashabana]

عارفين الستات عاوزة اية ... عاوزة الحنية بجد ... تعال شوف اوحش بنت فى الدنيا وهات كل الصفات الوحشة اللى فىالدنيا وحطها فيها .. وتعال كدة عاملها بحنية شوف هتبقى عاملة ازاى. صدقونى انا عارف ان فية ستات كتير تايهين مش عاررفين هما عاوزين اية بس تعال كدة دور على اى بنت وشوفها من جواها .. فكر ى اللى هى بتفكر فية. وان هتفهم اى بنت فى الدنيا .. صدقونى والله البنات نعمة من عند ربنا ومنقدرش نعيش ولا دقيقة من غيرهم . كفاية ان الستات دول فيهم امهاتنا واخواتنا البنات ..

اى بنت فى الدنيا مش محتاجة غير بجد قلب حنين عليها يحافظ عليها ويضمها اوى لو هى مضايقة .. يسعدها لو حتى بالنظرة يهتم بها وباللى بتحبة .. نحسسهم انة مهمين اوى فى حياتنا واننا مش هنعرف نعيش من غيرهم ....لو حد متجوز فيكم ومتخانق مع مرراتة تعال كدة وانتم زعلانين من بعض روح قولها انا اسف .. فية ناس ممكن تقول ان دة بيقلل من كرامته الانسان بس عمرك فكرت ان دة بيزود كرامتنا خصوصا قدام زوجاتنا.

الناس اللى مخنوقة اوى من البنات او من زوجاتهم مفكرتش ان ممكن يكون العيب فينا احنا .. واحنا اللى عاوزين كل حاجة عاوزين زوجة وفى نفس الوقت نعقد بالساعات قدام النت والتليفزيون ولو اى واحد صاحبنا اتصل بينا وقال تعال نخرج فى ثوانى نلبس وننزل لكن لو اى حد فيكم مراتة قالتلة تعال نخرج هتلاقى مليون حجة بيخترعها .. طيب لية كل دة لية لينا الحق اننا نخرج ونتفسح ونيجى فى نص الليل ونسيب زواجاتنا فى البيت وهما قاعدين لوحدهم وبيتمنوا بس اننا نفضل معاهم حتى لو البيت ... صدقونى كلام كتيرر اوى اوى اوى احنا مش بنفكر فيه علشان مش شايفين غير حياتنا واننا طالع عيننا فى الشغل وخلاص لكن ناسين نصنا التانى اللى مستنى اقل كلمة واقل حاجة نعملها وهما هيبقى طايرين من الفرح ...

ياريت يا جماعة نفكر بعقل ونعامل زوجاتنا بما يرضى الله ... ياريت نحاول نبقى جزء بسيط اوى ونعمل ولو جزء بسيط اوى من اللى كان بيعملة الرسول " صلى الله عليه وسلم " ... يارب يهدينا كلنا ازواج وزوجات ..

علاء شبانه

[SEMSEMS]

عارفين الستات عاوزة اية ... عاوزة الحنية بجد. يارب يهدينا كلنا ازواج وزوجات ..

علاء شبانه

الستات عايزين راجل طيب وعلي نياته زي حضرتك يا استاذ علاء علشان يعاملهم علي انهم ملايكة بتأثر فيهم الكلمة الطيبة wst::

يا راجل يا طيب

الستات عايزين راجل فاهم مكرهم ولكن لا يبين لهم ذلك يعني يلعب من تحت لتحت من غير مايجرح مشاعر مراته

يعني مش لازم يقلها صراحة انه فاهم الاعيبها ولؤمها بالعكس لازم يعمل نفسه مش واخد باله ويخليها تجيب اخرها ويتحرق دمها وتقول لنفسها : ايه ده هو انا ماعرفتش استفزه واحرق دمه ؟ وتقعد تفكر في حيلة جديدة كل يوم ومع ذلك انت مصدر البرود القطبي :lol:

سلامي لكل الاهل والاصحاب بطنطا

[SEMSEMS]

بس اكيد فيه ستات عينهم فارغة ميملهاش الا التراب

كتير والله ربنا يهديهم

[ابو جيداء]

الست تمر بمرحلتين هامتين فى حياتها

الأولى تبحث عن الحب وتريدة بشتى الطرق

والثانية عندما تجد الحب تريد كل شيىء

تم تعديل 28 أبريل 2008 بواسطة ابو جيداء

[Alshiekh]

نفسي أعرف الستات عاوزة ايه

حاجه تحير خمستاشر سنه زواج

الهادئ مفيش فايدة،العصبى مفيش فايدة

قرار لوحدك مفيش فايدة،قرار مشترك مفيش فايدة

هل حريه الاختيار---------- يمكن

الاحترام

الحب

العيشة المستورة

[ابتسامة رضا]

السلام علينا وعلي عباد الله الصالحين

بالاضافة لكلام الاستاذ هشام عباس و كلام الاستاذ علاء شعبان

الست عايزة اللي يحترم رأيها ويناقشها فيه ويحترمها هي نفسها

بس مشكلة بعض الستات وأكنا كنت كدة برضو معتقدة ان مدام جوزي بيحبني هيعمل الحاجة اللي بحبها وبفكر فيها منغير مقوله عليها ( خيال رومنسي واسع زيادة عن اللزوم) وهو ده اللي بيسبب المشاكل لما الراجل يتصرف في في موقف وميعجبش مراته هي بتزعل انه معرفش ايه اللي بتحبه وايه اللي بتكره وكمان فيه رجالة كتير مبتحاولش تتكلم مع زوجاتها عندهم ( خرص منزلي) علي رأي الكاتب الكبير أحمد رجب وتلاقيهم برابنت مع الستات الغريبة

الست بيصعب عليها حالها لو جوزها اتريق عليها أو لو مقدرش تعبها في حاجة عملتها له أو لولادهم محتاجة الكلمة الحلوة وشوية مدح علي شوية تملق

لكن كمان محتاجة تتعلم ازاي تتعامل مع زوجها ومحتاجة تعرف ايه اللي يسعده وايه اللي ينكد عليه وعليها علشان تتجنبه

وزي ماهو واجب علي الست دراسة شخصية جوزها علشان تعرف تتعامل معاه صح كمان واجب علي الراجل نفس الشئ علشان المركب تمشي وتوصل بر الامان

المسألة مش مين يسود لكن الصح الصحيح ( وأمرهم شوري بينهم) ومننساش ان الحياه شركة طرفيها رجل وامرأة يعني احنا النص وانتم النص

الست النكدية اللي بيقولو عليها بيكون جواها حاجة مش عارفة تعبر عنها

وفيه ستات بتكون فاكرة ان الطبيعي يكون فيه مشاكل وخلافات فاكرة نفسها بتمثل فيلم عربي وان البطل هيفضل يجري وراها زي الفيلم

مشكلتنا اننا معندناش تعليم فن الحياه الزوجية ... قصدي معندناش تعليم فن الحياه بصفة عامة

عموما الفضفضة يمكن تنتج أفكار تساعد علي تخطي الازمات

ربنا يسعد الجميع اللهم آمييييييييين

[alaashabana]

ررد جميل جدا من المشتركين بس فى الاول انا اسمى علاء شبانه مش علاء شعبان زى ما الزميلة قالت

على العموم فعلا الفضفضة ممكن تنتج بايجابيات كتير اوى واننا بنتعلم خصوصا اننا مش نعرف بعض علشان كدة الواحد بيتكلم بحرية ...

فى الاول احب اقول اننا بشر يعنى اكيد فى كل واحد فينا صفات كويسة وصفات مش كويسة ولما اتنين بيتجوزوا بعض طبعا بيحصل تلاقى للفات دى منها اللى بحاول نتأقلم علية ومنها اللى بنحاول نتجنبة علشان متحصلش مشاكل .. وفعلا الزواج والحياة الزوجية حاجة كبيرة اوى ومهما اتكلمنا فيها مش هنعرف نغطى كل المواضيع وكل المواقف بس انا فى رايى انها مش محتاجة دراسة لانها مش معادلة واحد + واحد = اتنين

لكن هى تصرفات ومبادئ .. ويمكن والله بجد نحمد رنبنا اننا شرقيين يعنى مهما كنا بنعمل او بيحصل بينا الازواج كل دة هيكون فى نطاق محدود ونقدر نحل اى مشكلة ..

انا مش بتكلم كلام رومانسى اوعاطفى او انا على نياتى علشان يمكن انا اتعرضت لمواقف كتير اوى وعرفت منها ان فية بنات مش كويسة من جواهم وعندهم نقص او عقدة من حاجة معينة لكن يا جماعة كل الكلام اللى احنا بنتكلمة دة للناس العادية زى اخواتنا البنات اصحابنا اللى نعرفهم يعنى لازم تكون الناس عارفة ان لكل قاعدة ليها شواذ واكيد فية بنات وراجالة مش هيأثر فيهم الكلام دة ولا مليون قدة ..

لكن انا عندى فكرة .. ممكن نتعلم بجد وصح من الموضوع دة عن طريق ان كل واحد يقول مواقف حصلت له فعلا بينى وبين مراتة او بينها وبين زوجها ونشوف هى كانت بتفكر فى اية والوقف حصل ازاى واسبابة ..

انا مثلا ساعات كتير اوى بتعلم من اخواتى اللى متجوزين وبشوف المشاكل لية حصل كدة وكان رد فعل كل واحد فيهم اية ودة حقيقى افدنى كتير اوى يمكن ع لشان ان شاء الله لما اتجوز يكون عندى خبرة بالحياة الزوجية والمشاكل اللى بتحصل فيها ..

عارفين فية حاجات كتير اوى فى حياتنا كرجالة انانيين اوى زيادة عن اللزوم يعنى ان اهقول مثل بسيط اوى

طبعا ودة معرف جدا ان البنات بتحب دائما الافلام الرومانسية او مثلا برامج الموضة ولالازياء والمكياج والحاجت الخاصة بالبنات عموما.. نفترض مثلا ان فية برنامج موضة او ميكاج على التليفزيون كتير اوى من الرجالة لما يلاقى مراتة بتتفرج على حاجة زى كدة تلاقية يغلس ويقولها اقلبى حاجة كويسة نتفرج عليها .. رغم انها ممكن تكون مستنية البرنامج دة من اسبوع فات .. بس لما الست فعلا بتلاقى ان الحاجات اللى بتحبها جوزها مش مهتم بيها وعاوز يتفرج على مزاجة بجد دى يمكن فى نظرى اكتر حاجة ممكن تزعل الزوجة من جوزها.

لكن تعالى كدة نغير رد الفعل

اى راجل متجوز مثلا خلى مراتة فى مرة تتفرج على برنامج موضة وازياء اومكياج واقعد جنبها واتفرج معاها بنفس راضية

وقولها رايك على اى حاجة شوفتها على فستان مثلا او على لو ن مكياج او اى حاجة كويسة وقولها مثلا " الله المكياج دة جميل اوى نفسى اشوفة عليكى " تخيل مراتك ساعتها هتبقى فراحانة قد اية علشان بس مجرد اظهرت اهتمامك بالحاجات اللى بتحبها ..

يمكن حياة البنات عموما مش عميقة زى الرجالة يعنى تفكرهم فى حاجات اللى من وجهة نظرنا احنا انها تافهة لكن ممكن تكون من وجهة نظرهم حياتهم كلها .. لية دائما فاكرين ااننا اللى عاقلين وان البنات تفكرهم قليل او تافهة .

صدقونى والله انا ولا ضدد الرجالة ولا مع البنات بس بحاول اتلكم فى المواضيع اللى احنا كرجالة فاكرين انها تافهة ولكنها كبيرة اوى عند الستات.

يمكن مثلا لو فية ماتش شغال واى راجل منا بيتفرج علية رغم ان فية بنات كتر مش بتحب الكورة بس انا متأكد ان كتير اوىمن الزوجات لما تلاقى جوزها بيتفرج على اى ماتش بتفضل قاعدة جانبة او تعملة شاى او اى حاجة .. شوفت الفرق بينا تصرفاتنا وتصرفاتهم ..

صدقونى البنت باقل حاجة ممكن تخليها اجمل انسانة واسعد انسانة فى الدنيا ولو حصل صدقنى والله هتلاقى تفكيرها بقى عاقل اوى وبقيت حياتكم جميلة ...

يارب اكون ضيف جفيف فى المنتدى ويارب محدش يفتكر انى على نياتى او عاطفى زيادة عن اللزوم بس والله والله والله ان بلاحظ فعلا ان اغلب المشاكل بتبقى من الحاجات الصغيرة اللى فى حياتنا..

لكن فى المواقف الكبيرة اوى والمشاكل الكبيرة فعلا " ربنا يبعدها عنا " هتلاقى الستات اول ناس بتفكر بعقل وبحكمة ..

يارب يسعدكم جميعا ويارب الاقى الانسانة اللى اقدر فعلا اسعدها .. ويارب يوفقنا فى حياتنا دائما ..

[النيل حبيبي]

شكراً أخواتي وخواني

الصراحه الستات عاوزين حريه الإختيار وبعد كده تنول منها كل شئ

ربنا يهدينا للخير والسعادة لأن الدنيا مش مستاهله حرق الأعصاب

[mogly]

السلام عليكم

يا أخوان اسمحوا لى اضيف تعليق بسيط

أنا أتحدى اى راجل يقول انه بيفهم الستات لأنه ببساطة الست مالهاش مالكة زى ما بيقولوا

يعنى عارفين الناس اللى بتتوصف انهم زى الزيبق ، انا تقديرى ان الستات زى الزيبق ما تقدرش تخمن رد فعلهم و لا تصرفاتهم

و ده مش بيعيب الست فى الواقع و الرسول الكريم صلى الله عليه و سلم بيقول ان الست خلقت من ضلع أعوج و مش دى القضية

القضية فى بقية الحديث ان اذا انت حاولت تقويمه كسرته فيبقى ربنا سبحانه خلق الست كده و ده التجهيز الربانى للدور اللى ح تقوم بيه فى الدنيا

المشكله بدأت لما الأدوار تداخلت و الأمور اختلطت و بقت الست عاوزة تاخذ دور الراجل و عاوزة الراجل يأخذ دورها

وهنا لازم نذكر الرائد العظيم أستاذ قاسم أمين الله .........بيته

موجلى

[حسام يوسف]

السلام عليكم

أحسن ماقيل حول الستات عايزة ايه

عبر عنه لينين الرملى فى رائعتة الخالدة تخاريف

حين خرج الجنى لينفذ لكل واحد امنيتة

وجاء دور الانثى الوحيدة فيهم

وسألها تطلبى ايه؟:

قالت له:

عايزة ابقى جميلة وحلوة زى أجمل ست

وعايزة أبقى قوية زى الرجالة

قالها الجنى:

فهمت انتى عايزة ايه

فأستوقفته قائلة:

كداب فى اصل وشك

(اذا كنت انا نفسى مش عارفة انا عايزة ايه)

[ابتسامة رضا]

الاستاذ علاء شبانة سامحني علي الخطأ في الاسم

والحقيقة كلامك في محله لكن أختلف معك في انك بتقول ان المواضيع دي مش محتاجة درس الحقيقة ان العلاقات الاجتماعية والزوجية فيها حاجات كتير مكتسبة ومش كلها فطري علشان كدة الانسان بيحتاج لمن يعلمه وينقل اليه بعض الخبرات لكن بحذر شديد

ونصيحتي عند وجود مشكلة مع الطرف الاخر لابد أن يتوافر حسن الظن به ( ولا تنسوا الفضل بينكما ) وكمان لازم نسيب الباب موارب ودايما يكون في بالنا ان لما المشكلة دي تخلص هنرجع تاني زي الاول وأحسن ونحافظ علي شعرة معاوية ومنغلطش في بعض علشان دايما الغلط بيترك أثر سيئ حتي بعد الصلح وحذاري من الشكوي للأهل علشان احنا بنتصالح ونرجع لبعض زي السمن علي العسل وننسي الناس اللي شيلناهم الهم يفضلوا زعلانين من الطرف الاخر علشان ضايقنا وكمان يمكن يكرهوه ومينسوش اللي حصل بالرغم من اننا نسيناه خلاص

اللي يشوف هموم غيره تهون عليه همومه

أمنياتي الحلوة للجميع

تم تعديل 29 أبريل 2008 بواسطة ابتسامة رضا

[ابو محمود]

موضوع كان لازم يكون فية مداخلات اكتر من كدة على العموم انا متابع ورآيى ان الستات دول اغلب خلق اللة علشان احنا مش دائمآ بنعرف نتعامل معاهم الا من خلال ما ورثناة من عادات وقليلآ منا يعاملهم بما امر اللة لانهم ايضآ ورثو عن جهل معتقدات خاطئة وتصورات بالية مما أدى الى ما نشاهدة من الجانبين رغم ان الرجل من واجبة مساندتها وهى التخفيف عنة والعمل على أرضائة ولكن قليلآ منا نحن الرجال ما نصل الى حل تلك المعادلة سريعآ وهنا اتذكر تجاربى مع شريكة حياتى ... ومن باب النصيحة انصح الرجل بالصدق وهى ايضآ

لان الصدق والمصارحة يذوب معهم كثير من الظن والهواجس وتبنى من خلالة ثقة متبادلة وحب عميق يصعب على اى مصاعب ان تهزة او تنول منة وياليت الشبان الجدد او المتزوجين حديثآ ان يتعاملو فيما بينهم بالصدق وانكار الذات وعدم الأنانية وسوف يجدون ان حياتهم تدوم وتذدهر فيها السعادة ويتحملون اعباء الحياة بدون مصاعب او أذمات تفشل علاقتهم او تقلق بالهم وباللة التوفيق

[tarek hassan]

السلام عليكم

أحسن ماقيل حول الستات عايزة ايه

عبر عنه لينين الرملى فى رائعتة الخالدة تخاريف

حين خرج الجنى لينفذ لكل واحد امنيتة

وجاء دور الانثى الوحيدة فيهم

وسألها تطلبى ايه؟:

قالت له:

عايزة ابقى جميلة وحلوة زى أجمل ست

وعايزة أبقى قوية زى الرجالة

قالها الجنى:

فهمت انتى عايزة ايه

فأستوقفته قائلة:

كداب فى اصل وشك

(اذا كنت انا نفسى مش عارفة انا عايزة ايه)

الله يصبحك بالخير يا دكتور : حسام يوسف 

ومازال السؤال : هي الستات عايزه إيه ؟ 

هن يقلن مخدناش من الرجالة غير وجع القلب

عرفنا وجع القلب طيب إيه تاني ؟

 

حسب قول أبو محمود الستات أغلب خلق الله ...ودا صحيح 

ولكن كلامه فكرني بمثال : 

عندما أجد العمال قاعدين كتير على الرصيف مستنيين عمل

ولما تقرب لواحد منهم علشان شغلانة في البيت ويعملها ولما تسأله عن الأجرة 

يروح رازع مبلغ خيالي في عمل ضئيل 

صحيح أنا محتاجه وهو محتاج الفلوس ولكن التعامل يكون بالعرف والأصول