مغامرة نسائية فى الصحراء الحبشية !!!!

[badroora]

نساء المحاورات اجمعن هنا عندي فكرة بمليون جنية هندخل التاريخ من اوسع ابوابة واسمينا هتدرس فى كتب الجغرافيا

وعشان نثبت للرجال وللعالم كله ان النساء قادرون على فعل ما فشل فيه الرجال ....... لغاية دلوقتى محدش عارف عنترة

جنسيته ايه ... ولو احنا بقي بحثنا وعرفنا هتبقي مفاجئة الموسم قررت نعمل رحلة الى الحبشة نبحث بنفسنا عن جذور

الفاضل عنترة ...... والمخفية بنت عمة الدلعادي عبلة

يلا مين هيشترك النفر بجنية وربع ......

فولانه......... ودى تطلع فين الحبشة دي يا جميلة .

ناش ........دى فى السعودية يا قمر وانا عرفه الطريق كويس .

زيزيتا .....طيب يا بيضة فى رجاله هيشتركوا

هبة .......لأ طبعا رجالة ايه دى اللى هيجوا معانا .

زهرة الجبل ........لأ خلينا نروح لوحدينا نتفك شوية .

جلاكسي .......اه والنبي ياختى

أمانى ......اهو الواحد يرتاح من البيت وقرفه ...

نجفة ..........يا بنات احنا هندخل التاريخ وهنبقي مشهورين اوى وتشاور على اللاب توب وتقول ....كله هنا مدروس

ومحسوس وعاملة حسابي .

نينا ....... عليكم يا بنات لو عرفتوا اصول عنترة هاعملكم مؤتمر صحفى وهتصبحوا من المشاهير.

سهيلة .....ممكن اجى معاكم

جويرية .....ايش معنى انا ..يا فيها يا خفيها .

شهد .....وانا وانا ...

سمسمة ........ممكن

قرنفله......طيب هنتجمع ازاى داحنا متفرقين شرق وغرب .

نجفة ماشي .....اسمعوا بقي هنتجمع ازاى .....

فولانه زيزيتا هبة جويرية . امانى نينا ......هتروحوا محطة مصر تاخدوا المترو خط البحرين فيصل وهتسناكم فى البحرين

وانا هستناكم بالتوتوك بتاعى وندلى من البحرين للرياض

سهيلة قرنفلة جلاكسي ........تاخدوا جمل وتدلوا على ناش فى الرياض .

شهد ........جمل من صنعاء الرياض او البحرين شوفى الاقرب ليكى

زهرة الجبل .......الرياض اقربلك ادلى على ناش

وهنتجمع عند ناش فى الرياض ومن الرياض الى الحبشه .

هناخد الاتوبيس من هناك الى الحبشة

ماشي

كل واحدة تجيب بوهجة هدومها تكفي لمدة عشرة خماشر سنه ...اوك :shutup:

والاكل ........طبعا اللى جايين من مصر متنسوش ربع رومى على تُمن لانشوه ....الخ وانتم وزوقكم بقي

هبة .......كركدية اسوانى على صفحتين فسيخ

امانى .......سي فود بقي واللى تشوفيه .

ماشي.......

يلا نتقابل بكرة صباحا ان شاء الله

يُتبع .......

[badroora]

نجفة فى المطار لاستقبال زيزيتا ,فولانه ,هبة ,نينا,جويرية \, امانى ,

اهلا وسهلا يا بنات نورتم المملكة ...

هبة ........مسحوبة من لسنها مملكة ...فين المملكة دى ,,, دى اوطين وصالة وعفشة ماية

فولانه ........ازيك يا نجفة عملة ايه

زيزيتا ......... البلد جميلة اوى .

جويرية .........يعنى شكلها كدا قد امبابة

أمانى ......البلد والله منورة عشان نجفة فيها .

نينا ........فى مناظر هنا فظيعة وجميلة اوى

نجفة ....... معلش يا بنات البلد حاجة كدا على ما قُسم :shutup:

يلا اتفضلوا حطوا شناطكوا على ظهر التوك توك واقعدوا كل اتنين على حجر بعض اصل انا جايبة توك توك اسبورت ملقتش

سيدان بصلون كبير ......انتم عارفين الواحد جاى الخليج يحط الفلس ع الفلس والحياة بقت صعبة .

هبة تهمس لامانى ........هى نجفة ملها مسودها من اولها وموريانا وش الفقر احنا ناقصين .

نجفة ..بنات افتحوا ستارة التوك توك عشان تتفرجوا ع البلد .

البحرين يا بنات كلها متجمعة فى الصورة دي ...البلد كلها تتلف فى ساعة الا ربوع

فولانه..........طيب وبقيت الربع ساعة بتعملوا فيهم ايه

نجفة ..........يعنى ممكن الناس تريح شوية وتلف تانى ..جزيرة بقي :lol:

زيزيتا ........يا ترى باقي البنات وصلوا الرياض ولا لسه .

نينا........ ايه يا اوختي اللى مشغلاهولنا فى الكاسيت دا

نجفة ......... دا عندليب الخليج :unsure:

جويرية ......... ويطلع ايه عندليب الخليج دا .

نجفة ........... يعنى تقليد العندليب الاوريجينال بتاعنا .

هبة .......... اها .. عندليب تجميع يعنى .

نجفة يا خبر.......... يا محمد عبدة يابانى تقفيل خليجي

أمانى ......... وبتفهمى كلامه ..

نجفة ........ طبعا ... دا سهل اوى :lol:

فولانه ......... واضح دا كلامه بيفكرنى باشعار زوهيري

نجفة وصلنا يا بنات ..... اتفضلوا دا محل عصير قصب نبل ريقنا بكوبيتين عصير ونتجه الى الرياض قبل الكبري

ما يتزحم ........

هبة ...... بتوشوش جويرية .......... ايه دا من الدار للنار كدا ....... طيب مش تخدنا عندها البيت ع الاقل نرتاح قيمة

عشرة خماشر يوم كدا :happy: معقول نيجي لحد بيتها ومتعزمش علينا .

أمانى ...معلش يا هبة انت مخدتيش بالك وهى بتقول احنا فى الخليج بنلم الفلس ع الفلس :blink:

فولانه .......... اه والنبي يا ختى الله يكون فى عونهم .

زيزيتا ............. الغربة صعبة يا بنات

نجفة ........ ها يا بنات عاوزين حاجة تانى غير الماية :unsure:

زيزيتا ......... :blush2: لا ميرسي يا قمر

نجفة ......... طيب معاكوا مصاري

هبة ..... ودى تطلع ايه دي

نجفة ......... بيزات يعنى

زيزيتا .......... هبة تقصد فلوس يعنى .

نينيا ....... معانا مصري ينفع

نجفة ......... انا هاغيرلكم الدينار اليوم ب 14.12 جنية وانا هاخده ب 13 ها قولتلم ايه

هبة ......... يا نهار ابيض هى بتاجر علينا .

أمانى ........ معلش يا جماعة خالى النهاردة يعدي على خير .

نجفة .... ممكن كل واحدة تطلع 500 فلس عشان نمون التوتوك احنا قدامنا للرياض 3 ايام متواصليين سفر بالتو ك توك

البنات طبعا محبطين ومصدمين من افعال نجفة

ماشي .........

يُتبع

[semsema]

بمناسبة عنترة وعبلة

النهارده في حصة النحو.....قالتلنا المعلمة هاتوا اسم "عبلة" في جملة....

وحدة من البنات قالت: احب عنترة عبلة :shutup:

المعلمة: هاتي جملة تانية بلا قلة ادب

البنت: عشق عنتر عبلة

واحنا اكيد كنا هنموت من الضحك :lol:

تم تعديل 28 أبريل 2008 بواسطة semsema

[~Heba~]

هبة .......لأ طبعا رجالة ايه دى اللى هيجوا معانا .

طبعاااااااااااا ممنوع الدخول لغير العاملين :lol:

هبة ........مسحوبة من لسنها مملكة ...فين المملكة دى ,,, دى اوطين وصالة وعفشة ماية

انا عايزة اوطة من الاوطين دول wst::

هبة تهمس لامانى ........هى نجفة ملها مسودها من اولها وموريانا وش الفقر احنا ناقصين .

نجفة هو انت اصلك منين بالظبط -_-

بمناسبة عنترة وعبلة

النهارده في حصة النحو.....قالتلنا المعلمة هاتوا اسم "عبلة" في جملة....

وحدة من البنات قالت: احب عنترة عبلة

المعلمة: هاتي جملة تانية بلا قلة ادب

البنت: عشق عنتر عبلة

يا سمسمة دى ينفع تحطيها فى موسوعة النكت bv:-

و ينفع تتذاع فى برنامج حدث بالفعل

الا صحيح هو انتى فى سنة كام

[badroora]

سمسمة يا اوختشي ........بكرة بعد ما ترجعى من الرحلة هتبقي اشطار بنوته فى الفصل قومى ذاكرى بقي لحد ميعاد الرحلة

هوبة

والله بيور جيزة ومعنديش اى جذور منوفية

(تل ابيب) استعارت الجنسية بس عشان اسكن فى المدينة الجامعية 4 سنوات وبعد كدا اتنازلت عنها .....واعترفت على نفسي انى لست منها واضطررت لعمل ذلك نظرا انهم يعتبروا نجعنا قاهرة كبري يعنى ماليش سكن ....... :lol:

واختلطت مع معتنقي هذا الجنسية 4 سنوات وطلعت سليمة صاغ بدون اى تأثير .

ما وردته فى المعامرة هو حال 90% من المصاروة فى الخليج الفلس ع الفلس ولا يصرفش هلله حمرا ومستني يرجع مصر ويعيش حياته اللى حرم نفسه منها .......دا لو ربنا اداله طولة العمر ولحق يعيش بقي ..... wst::

[ELSHAMY]

بدرية....كلكم حتطفشوا مرة واحدة ؟..وحتسيبوا المنتدى لمين ؟

....فكرتونى بهجرة الصحابة للحبشة...

عموما ما تتأخروش ...خلينا نشوف المنتدى يمشى ازاى من غيركم...

ترجعوا بالسلامة

[shahd]

بدورة الحبوبة موضوع جميل ودمه زي العسل

على فكرة الحبشة( اثيوبيا) من اجمل بلاد الله كلها خضار وجمال رباني

ماتلاقيش مكان الا وفيه شجر جميل ولامع ومنسق بشكل رائع

حتى البيوت القديمة برضه تلاقي الشجر مزينها

فيهات الفقرا وبرضه مهتمين بلبسهم واناقتهم

وفيها البيوت الجميلة واسوارها بالشجر ( بين كل بيت والتاني سور بالشجر)

وناسها طيبين واخلاقهم عاليه الصغير فيها بيحترم الكبير سواء كان قريبة اوحتى جارة او مايعرفوش

طبعا في سلبيات زيها زي اي بلد بس ارجع واقول بلد راااااااااااائعه ..

لو تحبي تزوريها قولي وانا اجي معاكي واخلي قرايبي اللي هناك يعملوا معاكي احلى واجب

احتراماتي :lol:

تيتا شــــــــهد

[badroora]

بدرية....كلكم حتطفشوا مرة واحدة ؟..وحتسيبوا المنتدى لمين ؟

....فكرتونى بهجرة الصحابة للحبشة... :lol:

عموما ما تتأخروش ...خلينا نشوف المنتدى يمشى ازاى من غيركم...

ترجعوا بالسلامة

الله يسلمك يا رب .........

عموما مش هنتأخر كلها عشر خماشر سنه نجيب اطر عنترة وبنت عمه ونرجع طوالى .........

واهى تبقي فرصة صعيدة نشوف هتعيشوا من غيرنا ازاى wst::

[badroora]

طب والله يا شهد كنت فاكرة الحبشة دى فى السعودية .......... معرفش ربطهم ببعض ازاى

عموما كويس انك نورتينى عشان نغير مسار الرحلة

واكيد طبعا هنروح زيارة حقيقة عشان نشوف اهلك ونشوفك وناخد الواجب ...... wst::

شكرا ليكي يا احلى شهد ........ :lol:

[shahd]

طب والله يا شهد كنت فاكرة الحبشة دى فى السعودية .......... معرفش ربطهم ببعض ازاى

عموما كويس انك نورتينى عشان نغير مسار الرحلة

واكيد طبعا هنروح زيارة حقيقة عشان نشوف اهلك ونشوفك وناخد الواجب ...... bv:-

شكرا ليكي يا احلى شهد ........ :lol:

لاياقمر الحبشة ( اثيوبيا) بلده افريقية مالهاش علاقة لا بالسعودية ولا باليمن

وارتريا دي برضه بلد افريقي بينه وبين اليمن ساعه بالطيارة .. انما بالجمل -_-

اثيوبيا من عندنا في اليمن تاخد 3 ساعات بالطيارة برضه, انما بالجمل احسبيها انت ياسكر wst::

زمان كانو واحد ( ارتريا واثيوبيا ) كان اسمهم الحبشة

انما من فترة طويلة جدا انفصلوا وكل بلد بقت لوحدها

خالص تحياتي

تم تعديل 28 أبريل 2008 بواسطة شهد

[جويرية]

:lol:

أنا بضحك من اول ما قريت الموضوع ييجي ليا سنتين كدة مضحكتش wst::

وكمان انا فرحت لما لقيت أسمي مكتوب أصل انا لغاية دلوقتي حاسة نفسي لسة ضيفة في المنتدي

بس هوه معقول فيه توكتوك في البحرين و لا دي هزار

اللي اعرفه أن التوكتوك ده من الأختراعات الحصرية الخاصة بمصر زي الكشري كدة و زي الفول و الطعمية

عموما انا متابعة معاكي الرحلة

و لما نشوف حنوصل لفين في منابع النيل

[ELSHAMY]

بدرية...ازاى تجيبى الناس من كل انحاء المعمورة و انتى مش عارفة الحبشة فين ؟

بعد اذنك بقى....كرسى فى الكلوب ...وكل واحدة ترجع بيتها...بدرية حتسوحكوا....

انا بس عاوز أهدى النفوس....

[مصري أصيل]

.....................

تم تعديل 28 أبريل 2008 بواسطة مصري أصيل

[~Heba~]

طب والله يا شهد كنت فاكرة الحبشة دى فى السعودية .......... معرفش ربطهم ببعض ازاى

عموما كويس انك نورتينى عشان نغير مسار الرحلة

واكيد طبعا هنروح زيارة حقيقة عشان نشوف اهلك ونشوفك وناخد الواجب ...... bv:-

شكرا ليكي يا احلى شهد ........ :lol:

لاياقمر الحبشة ( اثيوبيا) بلده افريقية مالهاش علاقة لا بالسعودية ولا باليمن

وارتريا دي برضه بلد افريقي بينه وبين اليمن ساعه بالطيارة .. انما بالجمل -_-

اثيوبيا من عندنا في اليمن تاخد 3 ساعات بالطيارة برضه, انما بالجمل احسبيها انت ياسكر wst::

زمان كانو واحد ( ارتريا واثيوبيا ) كان اسمهم الحبشة

انما من فترة طويلة جدا انفصلوا وكل بلد بقت لوحدها

خالص تحياتي

يمكن بدرية بتقصد

نـــــــــــــجــــــــــــــــــــــــــــد

[badroora]

نجفة يلا يا بنات .........اركبوا واربطوا الاحزمة عشان ننطلق وقولوا دعاء السفر عشان ربنا يكرمنا.

شهد.......... الو آلو نجفة سمعانى .

نجفة .... ايوة سمعاكي

شهد ........... انتوا فين

نجفة ..........احنا طالعين على كبري الملك فهد

شهد ..... ليه الحبشة مش فى السعودية

نجفة .......... لازم نزور قبر وصخرة عنترة وبعدين نركب كلنا من السعودية ...يعنى شيدي حيلك وهنتقابل فى الرياض .

شهد .......ماشي اللى اتشوفيه .

هبة ......... مقبرة !! نجفة احنا هنزور مقبرة ومقام سي عنترة .

نجفة ........ ايوة ونسأل عليه هناك مش جايز نلاقي حد يعرفه .

جويرية ....... انما يا اوختى ايه التكنولوجيا دي مش شيفاكى يعنى ماسكة دريكسيون . بايدك .

نجفة ......... دا توك توك متطور بتظبطية ع السرعه وهو يمشي لوحده ....يعنى انا اظبطه ونام اصحي الاقي نفسي قدام

المكان اللى عوزاه .

أمانى ........يا حلاوة يا ولاد .

نجفة ...... يا بنات غطوا وشكم عشان احنا عند الحدود السعودية وبليز محدش فيكم يفتح بوئه مهما ان حصل ,اوكى.

ظابط الجوازات ........ هلا يا الشيخة ..... شنو هذا

نجفة ....... شنهو

الظابط .... انتى كيف يا الشيخة تسوقين انتى ما تدرين انه ما يصير تسوقين فى السعودية .

نجفة ........ ادرى خوى بس وين شوفتنى اسوق انا مالمست شي.

الظابط امال بيمشي ازاى .... خوى دا مخصوص للسعودية فى حالة لما مايكون فى دراويل (سائق ) وبيمشي بدون حدا

مايسوق.

الظابط ...وين رايحين

نجفة ........خوى دول حريم عندهم روماتيزم ورايحين حق علاج فى الصحراء

الظابط ........ وين المحرم

نجفة .......خوى شنو محرم تبيه دول فوق ال 45 وانتم تقولون لو قافله وفوق ال45 مايحتاج محرم .

هبة .......نعم 45 اية.!!

نجفة ........ بس يا هبة خلينا نخلص

الظابط ..... وين الجوازات مالهم

نجفة ......... خوي هدا حريم مغطيين وييهم كيف تشوف جواز وشهم ماكشوف مايصير خوى,

الظابط ...... مايصير ارجعوا تانى مايصير تمشون بدون سائق ....

نجفة ....... يا دي النهار الابيض هنعمل ايه دلوقتى .

فولانه ....... افتحى الاب توب كدا خلينا نشوف الاي بي بتاع الاعضاء مين منهم قريب من هنا.

نجفة ...... انا اعرف موقع بيقولنا موقع المكان كمان انتى اكشفي ع الاي بي ادرس وانا هابحث عن الموقع .

فولانه ...... عندك 3 قريبين مننا ....... عمرو حورس ,النجم الثاقب .... سهران .

نجفة ....... طب وسعولى كدا ... نجفة تفتح جوجل ايرث

نجفة ......... شايفين يا ولاد مين دا

هبة ..... مين مين دا

نجفة ...عمرو حورس . قاعد فى المكتب وقالع النعال ومربع ع الكرسي

أمانى ....... من السهر طول الليل ع المحاورات ويجي ينام فى الشغل

زيزيتا ....... نجفة ابعتيله رساله يجي ينقذنا لو متأكده انه هو ..

نجفة ....... هو عمرو جوجل ايرث جايب كل شيء بوضوح

انا هاكتب رسالة وادزها .......

نجفة .... العزيز عمرو احنا ع الحدود ومش قادرين ندخل السعودية ممكن تيجي تسوقلنا للرياض او تركبنا اتوبيس

بسرعة يا عمرو احنا فى الشارع

اخواتك بنات المنتدي

عمرو رد ع الرسالة ...... ازيك يا نجفة انا للاسف ما بسوق وما عندي رخصه .

نجفة ........ عمرو بيكدب يا بنات ....جوجل ايرث جايب محافظته وباين فيها رخصة سواقة 7 راكب مدة صلاحيتها تنتهى

بعد شهرين ..

جويرية ....... بقي جوجل ايرث جايب كل دا .... طبعا .

فولانه ........ شوفى سهران

نجفة ....... العزيز سهران احنا اخواتك ع حدود السعودية ومش عارفين ندخل ممكن تيجي تسوق بينا وتوصلنا لاى محطة اتوبيس .

سهران .......... نجفة معلش انا فى الدوام هاخلص بعد 9 ساعات ينفع تستنى. :unsure:

نجفة .... باقي اخر محاولة النجم الثاقب

اخى العزيز ...... انا شايفة رخصتك صالحة وشغالة ...... وانت قاعد ومعنكدش شغل وبتشرب شاي بلبن بدون سكر

ودوامك هيخلص كمان ساعة

ممكن تساعدنا احنا ع الحدود .......

النجم الثاقب....... نجفة انتى معانا فى المكتب ولافين وبجد عرفتى دا كله منين

نجفة مش مهم بس بليز ساعدنا .

النجم الثاقب ........ مسامحة نجفة مش هاقدر اجيلكم ممنوع الاختلاط بين الرجال والحريم هنا بس هابعتلكم تاكسي

نجفة......... شكرا خوى ما تقصر

أمانى ....... نجفة معقول جوجل ايرث بيجيب التفاصيل كدا

نجفة ......... طبعا

نينا ......... طيب ماتخلى جوجل ايرث يقولنا على جنسية عنترة ونستريح من الارف دا

نجفة .......... للاسف جوجل ايرث مش متبرمج على المسميات الجاهلية .

فولانه ........ احنا دلوقتى هنعمل ايه

نجفة ......... هنركن التوك توك على جنب هنا لحد ما التاكسي يجلنا ..

جويرية .... ماتغيرنا الشريط دا هو مافيش غير عندليب الخليج دا حتى وشه وحش علينا :lol:

زيزيتا ........ شغللنا الست فى عندك الست .

نجفة .......طبعا فيه ست الكل كمان .

الشريط ..... البارحة يا حبيبي ضاق صدرى وانت ما تدري ....اه تدري

فولانه ..... مين دي .

نجفة ....... الست عائشة المارطة ,ام كلثوم الكويت .

هبة ماتشوفيلنا سعد الصغير ارحم

نجفة ماشي ........ الفنان على بحر

امانى ,,,,,,, مين على بحر سعد صغير البحرين .

زيزيتا ........طيب اى حد بيغنى لهجة مصرية بليز.

نجفة ...... تعالوا الف بيكم شوية حوالين المطعم الاحمر دا ..... والتانى الاخضر دا بتاع السعودية

زيزيتا ........ نجفة بليز بليز وقفى التوتوك رجلى نملت خلينى انزل هبة من على حجرى ونبدل الاماكن انا تعتبت .

نجفة .....اوبا ....... عجلة التوك توك فرقعت .يا دي النيلة .نجفة بتكلم نفسها يا ساتر يا رب حتى التوك توك منجيش من

عنيهم .

أمانى ....... هتعملى ايه

نجفة ..... محتاجين رقعه للكاوتش

أمانى ..... عاملة حسابي جايبة خيط وقماش بسرعه هاعملك الرقعه .

نجفة ....... هي ستارة يا امانى .

انزلوا بقي نشوف هنتصرف ازاى

نينا ......... هيه التاكسي جه التاكسي جه

التاكسجي ......... انا مدام واحد صديق يقول اجى هنا الى رياض .

امانى ......... هو اخرص

نجفة لاء دا بيتكلم لغات . ........ يلا اركبوا يا بنات خلينا نخلص

هبة تكلم جويرية ...... الحمدلله ان توك توك نجفة فرقع كان زمنا اتخنقنا من الركوبة اللى مكان يعلم بيها الا ربنا دي

نجفة ..... آلو ايوة يا ناش باقي الجروب وصل

ناش .....ايوة قرنفله وجلاكسي وسهيلة .لسه الجمل بتاعهم هابط دلوقتى

زهرة الجبل ...... قالتلى قدامها 12 قدم وتوصل .

نجقة ....... ليه هى زهرة جاية على تلاجة ولا جمل .

وشهد ..... فى الطريق

نجفة طيب يا ناش ....... احنا بالظبط 8 قدم ونكون عند نقطة التجمع . باي باي

وصلنا بقي مبهدلين وشكلنا مايعلم به اللى ربنا ....

ناش ....... يا لهوى .. انتوا جايين من خناقة ولا ايه ,,,ايه البهدلة دي .

هبة .......... بس والنبي يا ناش متقلبيش علينا المواجع

من بعيد ..... جمل زهرة وصل وبعدها شهد

اهلا وسهلا انتى شهد ايوة

انا نجفة ودى هبة ودى ناش

وانا نينا وانا زهرة الجبل وزيزيتا وفولانه طبعا وانا سمسة ثانوية عامية

سهيلة جلاكسي قرنفلة ........

نجفة ...... والله باين من رحيتكم الطيبة المشكلاته ....فرصة سعيدة يا بنات .....

جلاكسي .......... والله يا بنات حسه اننا هندخل التاريخ داخلة غير عادية .....

قرنفله ......... يسمع من بؤئك .

نجفة اخلصوا بقي عاوزين نلحق ........

ناش ....... ميكروباص ملاكي حبشي اهو هنركب ولا ايه

نجفة ....... اية ....... هنزور قبر عنترة والصخرة بتاعته وبعدين نروح الحبشة

ناش ........ طيب يبقي ناخد المترو بقي

.........باقي الجروب ماشي يلا .بينا .........

يُتبع

تم تعديل 28 أبريل 2008 بواسطة Badria Mekkawy

[badroora]

:unsure: :lol:

أنا بضحك من اول ما قريت الموضوع ييجي ليا سنتين كدة مضحكتش :)

وكمان انا فرحت لما لقيت أسمي مكتوب أصل انا لغاية دلوقتي حاسة نفسي لسة ضيفة في المنتدي

بس هوه معقول فيه توكتوك في البحرين و لا دي هزار

اللي اعرفه أن التوكتوك ده من الأختراعات الحصرية الخاصة بمصر زي الكشري كدة و زي الفول و الطعمية

عموما انا متابعة معاكي الرحلة

و لما نشوف حنوصل لفين في منابع النيل

البحرين مافيهاش توك توك بس فيها عربيات غريبة اغرب من التوك توك نفسه بس لو عاوزة توك توك طالما معاكى فلوس تجيبي اللى انت عوزاه

[badroora]

بدرية...ازاى تجيبى الناس من كل انحاء المعمورة و انتى مش عارفة الحبشة فين ؟

بعد اذنك بقى....كرسى فى الكلوب ...وكل واحدة ترجع بيتها...بدرية حتسوحكوا....

انا بس عاوز أهدى النفوس.... :lol:

لا بالعكس احنا قاصدين السعودية الاول وبعدين هنتجة الى الحبشة هناخد ميكروباص خط السعودية حبشة :)

اى خدعة :unsure:

[Diab]

عشان يبقي معاكم guide تمشواعليه

لازم تراجعوا إحدي مؤلفاتي السابقة حول تاريخ عنتر والموجود في متحف أبو اتاتة للتاريخ الطبيعي

إحدي روائع علم العنترولوجي

عنتر وعبلة

[~Heba~]

يخرب عقلك يا بدرية

و الله منا قادرة امسك نفسى من الضحك

زيزيتا ........ نجفة بليز بليز وقفى التوتوك رجلى نملت خلينى انزل هبة من على حجرى ونبدل الاماكن انا تعتبت .

يا بدارة ما يصير اقعد على حجر زيزيتا :unsure:

زيزيتا انتى لسة عايشة :lol:

[سهران]

فولانه ...... عندك 3 قريبين مننا ....... عمرو حورس ,النجم الثاقب .... سهران .

نجفة ....... طب وسعولى كدا ... نجفة تفتح جوجل ايرث

بقى معقول نخلى بيكوا كدة و احنا ولاد منتدى واحد .... و الله بس أنتوا تنورونا في الدمام و هاتشوفوا كرم أهل المنطقة الشرقية ... خيمة مخصوص في البر مع مكيف صحراوي تحت جسر البحرين مباشرة ......

أيه ده يا بدرية .......... أحنا قولنا هاتخدي الستات و البنات معاكي و تشرخوا على الحبشة و تسيبولنا المنتدى خمس ست سنين نعيث فيه فسادا و ترجعوا تلاقونا كاتبين على الباب ممنوع دخول بدرية و شركائها ..........

لكن اللي حصل انك واخدانا كلنا معاكي على الحبشة .... في انتظار اللي هاتعملوه و ترجعولنا بالسلامة.... قصدي نرجع كلنا بالسلامة .