خبر عاجل .. محاولة إجهاض إضراب 4 مايو

[أسد]

خبر عاجل

في محاولة جادة لإجهاض الإضراب ..

أعلن الرئيس الآن زيادة الرواتب بنسبة 30% لجميع العاملين في الدولة ..

ويتحدث في خطابه بعيد العمال عن زيادة الدعم وبطاقات التموين ..

وأصدر قراراته للحكومة لأخذ الموظفين بالمحليات بعناية خاصة

على إعتبار أنهم غلابه ..

وقال أنه يطلب من القطاعالخاص مراعاة ذلك مع العاملين لديهم ...

الوضع الحالي يفرض علينا إعادة ترتيب الأولويات لتحقيق أفضل تنمية

وطالب الحكومة والبرلمان بسرعة تدبير الموارد الحقيقية كي يمضي في تنفيذ كل ذلك إعتباراً من باكر أول مايو

دون إنتظار للعام المالي الجديد ..

والإستمرار في دعم المواد البترولية

ترى هل سينجحون في ذلك

[ELSHAMY]

عزيزى أسد

الله....يعنى البلد فيها فلوس

يعنى الاضراب نجح قبل ان يبدأ.

يعنى الاضراب اللى فات كمان نجح..ودى نتايجه.

يعنى الحكومة اتهزت و عرفت ان الشعب صاحى...وخافوا على كراسيهم.

يعنى الناس لازم تعرف ان دى طريقة صحيحة لتحقيق مطالبهم...اللى لسه بدرى عشان تتحقق كلها...

يعنى حاجات كتيرة أخرى.

[ahmedarab]

سبحان الله

يعنى الفلوس طلعت دلوقتى اهوة ... لا وكمان مش هايستنوا لحد الموزانة الجديدة ...لا فورا ومن بكرة ؟؟؟؟؟؟ وكمان 30%

انا رايى ان دة اكبر دليل على نجاح اضراب 6 ابريل ...والمفروض دة يكون اكبر حافز لكل الناس انها تشارك فى إضراب 4 مايو بإذن الله لتحقيق المزيد من المطالب العادلة.

تحياتى

[aimen]

كلام جرايد وسد خانات

اللى بيدفعه باليمين حيأخده 10 مرات بالشمال

كان فيه مرة كاريكاتير لمصطفى حسين .. الحكومة ( ممثلة فى الصراف ) بتسلم الموظف الراتب وبعد خروجه من العمل يجد نفس الموظف ( الحكومة ) وقد ارتدت ملابس البلطجية وتطالبه بالفلوس اللى اخدها ( يعنى يعطيك من طرف السان حلاوة ويروغ منك كما يروغ الثعلب )

[se_ Elsyed]

أكلني البالوظه يابو اشرف

كله ضحك على الدقون ... للأسباب الأتية ( كله بالمستندات والحقائق )

1- السيد وزير المالية الهُمام .. وبعد ضجة وضغط شرفاء مدينة المحلة .. ومع المكافأة الشهر اللي سكتوهم بها .. أعلنها صريحة مدوية من مدينة المحلة .. بإن حتى هذه الزيادات والمكافآت لن تتم إلا ببيع المصانع والشركات التابعة للدولة لتدبير موارد ماليه ....... وبيع يا عم هدومنا الداخلية ومشينا عالجنط .

يبقى ما بالك بهذه الزيادة الوهمية الكبيرة ؟

3- طب واللي مش موظف لا حكومة ولا قطاع خاص .. يعني زي ما بنقول على باب الله ... يعمل إيه ... يموت ؟

2- الزيادات دي بتبقى محدودة بسقف أعلى للرواتب ... يعني آه 30 % ... لكن بتبقى عالأساسي للموظف اللي عدمان اساساً وبتلاقي الاغلبية ما بين 120 إلى 250 ج بعد فحت في الحكومة لأكثر 20 سنة ... إحسبوها أنتوا بقى ..... وحتى المرتبات الكبيرة بتتضرر من هذا السقف فتلاقيه يقولك مثلاً بحد أقصى 300 ج ...

وعشان كده الاطباء لما كانوا هايعملوا إضرابات كانوا عايزين بداية التعيين أو أقل راتب لهم 1000 ج ... فتدخل كوهين اليهودي اللي موجود في كل وزارة وكل حارة وقال لهم ماشي ... بس هانمش الأساسي زي ما هو يعني 200 ملطوش ولا حاجه ... ونكمل لكم باقية الباكو ده حبشتكانات ومشاط كبريت ... ( بحيث طبعاً لما يغضب عليهم أو الهوجه تخف ... يروح مانع تلك الحبشتكانات اللي عبارة عن بدلات وعلاوات واجر إضافي ويرجعهم كما كنت )

3- هل معنى إنه يزود الموظفين 30 % يبقى كده الامور تماما والبلد بقت سنغافورة وما بقاش ناقصنا حاجه ؟

هذه مجرد مسكنات تضر أكثر مما تنفع

الأسعار بقت مولعه وخارج السيطرة واخرها النهارده .. حتى لما فتحوا إستيراد الحديد وجبنا حديد من تركيا هاينزل السوق خلاص ... عارفين نزلوه بكام ؟ بـ 5800 ج .... يا حلاوه يا حلاوه يعني فرق 200 أو 300 ج عن سعر حماده عزو ؟ .... ضربة معلم طبعاً وتكتل وحرب يقودها احمد عز اللي توحش وتجبر ... بالمناسبة هو بيخبط دلوقت في طلعت مصطفى اللي هو عضو لجنة السياسات في الحزب الفاشي ورئيس إتحاد المقاولين يعني في نفس العصابة ... واللي بيته أتخرب من اللي بيعمله عز واتهمه بالتربح و و و و .. فعز حطه في دماغه وهايخليه يشحت ... والأيام بيننا ,,,,

والتجار بيولعوها أكثر لما يعرفوا إن في علاوة

أقسم بالله العظيم بأسمع من موظفين بعضمة لسانهم إنهم مستعدين يرفضوا تلك العلاوات ويبقى الحال على ما هو عليه ... في سبيل وجود ضوابط لهذا الإنفلات اللي في الأسعار واللي للأسف بيتزامن مع نزول المغتربين اجازة فكله بيضرب نار .. والكام ملطوش اللي بيدوها للموظفين .. زيادة الأسعار بتلتهم قدها 10 مرات ...

بالمناسبة ... خير اللهم أجعله خير ما سمعناش حاجه عن نزول سعر الدولار بشكل درامي في مصر إلى ان وصل 5.37 وجت لي أخبار شبه مؤكده إنه هاينزل لـ 5.26 ... فخير يعني ما سمعناش عن تاجر عنده ضمير خفض الأسعار ... بعد ما خربوا مصر بالتعاون مع الحكومة في السنوات الماضية بحجة إن الدولار طالع يا بيه وإحنا معظمنا بضايعنا مستوردة فلازم نعلي السعر ...... ولا السعر عندنا ماشي في سكة ون واي وما عندوش مارش دير ؟

والله لو قال مبارك ما في الخمر .... فالبلد باظت خلاص ومحتاجه تنزل عالمحارة ونبدا من أول وجديد وكما قلنا إننا بنحصد ثمار فاسدة لفترة حكم سوداء أستمرت أكثر من ربع قرن إتباعت فيها البلد ... واللي ما تبعش نهبوه بتوع الحزب الوطني في صورة قروض من البنك وهربوا على بره ..

نفسي تكونوا بتتابعوا مقالات فاروق جويده في اهرام الجمعه عن بيع البلد وعن الفساد الذي تعملق وضرب بجذورة حتى وصل لقاع القشرة الأرضية وإن اللي هايدفع ثمن ده كله هو الاجيال القادمة اللي مش هاتلاقي اللضه بالمنظر ده ..

وحسبنا الله ونعم الوكيل ...

[se_ Elsyed]

في أخبار مؤكده أيضاً إنه هايفرح الشعب بكره في خطابه بإنه هايزود المقررات التموينية على البطاقات ..

يعني صابون بريحه وصابون غسيل وباكو شاي ماركة نقار الخشب زيادة ..

أقسم بالله أنا مكسوف وأنا باكتب الكلام ده ..

يا جماعة الخير حد يفكر الراجل ده إننا بقينا سنة 2008

وإن الدول اللي حوالينا عامله زي ما تكون راكبه عربية مرسيدس اخر موديل ومنطلقة بها .. وإحنا لسه راكبين عربيه حنطور ...

حد يفكره إن ليبيا اللي بنتريق عليهم وبعد اكثر من 30 سنة ديكتاتورية وإنغلاق .. إنطلقت هي كمان وبكره تصدر لنا تكنولوجيا ..

حد يفكره إن مالاوي ... أي والله العظيم مالاوي اللي تعتبر من افقر الدول الأفريقية واتحدى إن كان حد عارف موقعها عالخريطة ... مالاوي بقى فيها إنتخابات حره ولا يشوبها شائبة .. وإني جبت واحد كهربائي يصلح لي حاجات في شقتي وأول ما عرف إني مصري فضل يكيل لي وكان ناقص يضربني بالشلوت وهو بيعايرني إنهم راحوا إنتخبوا رئيسهم الجديد بمنتهى الحرية وإحنا لسه بنسحل اللي يقول بِم .. لدرجة كنت عايز أخد منه البنسة والمفك وأشتغل أنا وأجيب له كرسي يقعد عليه ويحط رجل على رجل .. أو إن موريتانيا ربنا يفك ضيقتهم اللي بياكلوا ورق الشجر من المجاعات المتكررة اللي عندهم ... أي والله شوفتهم بياكلوا ورق الشجر ... بقى عندهم إنتخابات حره أشاد بها العالم وإنهم بداوا طريق التقدم بالحرية والديمقراطية ومحاربة لافساد ..

يارب ... يارب ... يا تاخده .... يا تاخدنا أحنا عشان نسيب له البلد ونرتاح ويبرطعوا فيها براحتهم ....

[مصري أصيل]

الحاجه الوحيده اللي ممكن تجهض الأضراب أن الراجل ده يتكل علي الله قبل يوم 4 مايو أما غير ذلك فعشم أبليس في الجنه يزود الرواتب يزود المقررات التموينيه يمشي يوزع دهب علي الناس في الشارع حتي . الأضراب هيتم يعني هيتم لأن الناس خلاص فاقت و مش هتفرق معاهم الحاجات دي هما عايزين يخلصوا من وشه وبس

[~Heba~]

الحكومة حتتشال و تيجى غيرها و ترجع ريما لعادتها القديمة

[se_ Elsyed]

حتى طريقة تعبيرهم عن هبات وتجليات والفلوس اللي هايفرقها الريس - من جيبه طبعاً - طريقة في منتهى الإستفزاز وتحسسك إننا عبيد في بلدنا ..

إمبارح مانشتات الصحف الوطنية تقولك بالحرف الواحد " مبارك الامل الوحيد لعمال مصر وللمصريين "

يخرب بيت كده

ليه ... هو أحنا عايشين في عزبة أبويا الحاج شندويلي ؟ .. ولما صاحب العزبة يتمطع ويرضى عننا يبقى هانعيش في نعيم . ولما يغضب علينا ممكن نتوقع إنه يضربنا بالكرباج أو ينزلنا نتباع في سوق العبيد .. وإن لو أبويا الحاج شندويلي مات .. يبقى نقول عالعزبة يالله السلامه ومن الأفضل إننا ندفن معاه ؟

[aimen]

النكته الجامدة لما يظهر الموضوع كأنه فعلا هبة و مكرمة وان يا عينى يا عينى على الولا .... مبارك انتصر للشعب من الحكومة الظالمة و ايه بقى الحياة حتبقى نغنغه ....طبعا الإعلام الموجه حيقعد يغنى بحكمته و عظمته واحساسه بالناس وانه ما رضيش الناس تبقى حزينة فى عيد ميلاده ( والله انا حاسس انى حعيط من كثر ما انا متأثر ) اشوفك طالع من الحفرة انته وهم يارب

[se_ Elsyed]

النكته الجامدة لما يظهر الموضوع كأنه فعلا هبة و مكرمة وان يا عينى يا عينى على الولا .... مبارك انتصر للشعب من الحكومة الظالمة و ايه بقى الحياة حتبقى نغنغه ....طبعا الإعلام الموجه حيقعد يغنى بحكمته و عظمته واحساسه بالناس وانه ما رضيش الناس تبقى حزينة فى عيد ميلاده ( والله انا حاسس انى حعيط من كثر ما انا متأثر ) اشوفك طالع من الحفرة انته وهم يارب

إنت بتقول فيها ؟

طب خد المانشيت الرئيسي لجريدة الملوخية ... والنهاردة .. والتقلية لسه ما بردتش

مبارك استجاب لجماهير دمياط

الوقفة الصامتة تحولت إلي هتاف بحياة الرئيس

وبالروح والدم نفديك يا زعيم

وهشتكنا وبشتكنا يا ريس ... ده أنت رئيس .. مش عندك 81 سنة .. لكن والنعمة كويس.

إستلم بقى الأيام اللي جايه مرمطتنا في محاكم زنانيري وعلى اللي هاتعملوا فينا كندا بعد نقل المشروع وتأجيلة لأجل غير مسمى ولمكان غير مُسمى ... وبالتالي مهلة الثلاثة أسابيع الإنذار اللي كندا أعطيته لنا قربت تخلص وهايبهدلونا بهدلة الأرملة اللي بتجري في المحاكم على معاش جوزها .. زي ما عمل فينا الولا بتاع إيطاليا واللي بيعنا له طابا بتلاته تعريفة ورجعنا في كلامنا بحجة الامن القومي ...

بلد عبارة عن حلة بالوظة

لا دراسات ولا حسابات ولا إحصائيات واللي بيجي على بالهم بيعملوه طالما فيه مصلحة ( لهم )

دمياط فيها سبوبة مصنع سماد .... بيع يا صبري ..

طابا جايبه 5 بواكي ... عالبركة وسمعنا الفاتحة ...

بنك إسكندرية فيه لقمه طريه للكبار طبعاً .. ورينا فلوسك وروح شيل

عمر أفندي هايطلع لنا منه قرشين نضاف نسلكهم على سويسرا جنب إخواتهم .... شيل يابا

أصل الشعب المصري ما بتفرقش معاه وشعب مهاود ... وبيبقى عامل زي لا مؤخذه الزوج اللي بيبقى نايم يوم اجازته في امان الله وزوجته وراها شويه غسيل فبتلم ملايات السرير وتقلعه البيجاما اللي عليه وتسيبي سلبوته .. وهو نايم او بيستهبل وعامل نفسه نايم ... وحليني على ما يصحى ....

[Dida]

حسبى الله ونعم الوكيل فى اللى باعوا البلد

[أسد]

فقط .. إذا حاولت أن آخذ المقعد المقابل ..

وأتحدث بلسان الطرف الآخر ...

الراجل زود الناس 30% مرة واحدة ...

أحسن من الإجراء اللي عملوه في السعودية مثلاً ..

أفاد باستمرار الدعم على المنتجات البترولية ..

قال ان المنتجات التموينية سيزيد من دعما ..

أوصى بمراعاة أحوال موظفوا المحلياتالغلابة ..

طالب بالضرب بيد من حديد على مستغلي قوت الشعب ..

عايزين ايه تاني ..

المفروض بقى ان الناس تتحد وتحارب استغلال التجار الذين سيرفعون الأسعار فوراً .. لمواجهة زيادة الطلب المتوقع ..

هل يمكن أن يحدث هذا النوع من الضغط الشعبي على التجار الجشعين

[aimen]

سى السيد هى ممكن كندا تعلن الحرب علينا ؟ يا سلام يا ولاد والواحد يأخد الجنسية الكندية وهو فى مصر والله دى تبقى اخر حلاوة ...والعيال ولادنا بعد عمر طويل ان شاء الله يطلعوا بعيون زرق وريش اصفر

[nash]

أوصى بمراعاة أحوال موظفوا المحلياتالغلابة ..

معلش الجزأ دي مافهمتهوش ممكن حد يفهمهالي؟

ويقولي إزاي يعني هايراعوا أحوال الموظفين الغلابه دول؟؟؟

أكيد فيه فكره جهنميه عبقريه بس مش هايقولولنا عليها علشان ماتسرقهاش الدول الناميه التانيه

[محمد عبدالعزيز]

فقط .. إذا حاولت أن آخذ المقعد المقابل ..

وأتحدث بلسان الطرف الآخر ...

الراجل زود الناس 30% مرة واحدة ...

أحسن من الإجراء اللي عملوه في السعودية مثلاً ..

أفاد باستمرار الدعم على المنتجات البترولية ..

قال ان المنتجات التموينية سيزيد من دعما ..

أوصى بمراعاة أحوال موظفوا المحلياتالغلابة ..

طالب بالضرب بيد من حديد على مستغلي قوت الشعب ..

عايزين ايه تاني ..

المفروض بقى ان الناس تتحد وتحارب استغلال التجار الذين سيرفعون الأسعار فوراً .. لمواجهة زيادة الطلب المتوقع ..

هل يمكن أن يحدث هذا النوع من الضغط الشعبي على التجار الجشعين

طيب يا أستاذ أسد, خلينى أكمل اللعبة معاك وأقولك:

أنا أصدق الراجل ده إزاى وهو لم يصدق فى أى وعود قالها قبل كده؟!!!

لسه فى وعود بنار الفرن ثبت كذبها, وعلى سبيل المثال لا الحصر منع تصدير الأرز والأسمنت لتنخفض الأسعار, وانخفضت الأسعار يوم أو يومين ورجعت كل حاجة زى ماكانت وأسخم كمان.

قال إن قرار إنشاء محافظتين جديدتين تمت دراسته لمدة -على أقل تقدير- 9 شهور, ورأينا كلنا التخبط فى القرارات مرة يقولوا الواحات تبع المنيا ورجع بعد كده يقول الواحات تبع الجيزة ولا مانا عارف مين عشان الطريق بين المنيا والواحات غير مرصوف, طيب وهو إنت بسلامتك ياللى بتدرس فى القرار من 9 شهور مافكرتش مرة تروح بنفسك أو تسأل الطريق مرصوف ولا لأ؟

والتقيلة بقى حكاية التوريث, يحلف لنا هو وابنه بأيمانات المسلمين مافى توريث, وكل الطرق تؤدى إلى التوريث, يبقى أصدقه إزاى؟

لو عاوزنا نصدقه, يحاسب اللصوص اللى سرقوا البلد ويحاسب نفسه قبلهم, ويرجعوا كل اللى نهبوه.

لو عاوزنا نصدقه, يصدر قرار بتنفيذ الأحكام القضائية اللى الداخلية مطرمخاها ومش عاوزة تنفذها عشان مش فى مصلحتهم.

لو عاوزنا نصدقه, يشيل أهل الثقة اللى مايفهموش إلا فى صفا وانتباه ويجيب أهل الكفاءة اللى يقدروا ينقذوا البلد.

لو عاوزنا نصدقه, يطلب تعديل الدستور عشان يكون لكل رئيس فترتين فقط بحد أقصى فى الرئاسة.

لو عاوزنا نصدقه, يرحل عننا هو والعصابة بتاعته بسلام وبدون نقطة دم واحدة ويسيب المخلصين يحاولوا إنقاذ مايمكن أنقاذه.

فى حاجات كتير ممكن يعملها ونصدقه بعيد عن تمثيليات زيادة الرواتب والدعم والكلام الفاضى ده اللى الأخو الإعضاء استفاضوا فى شرح كذبه وخداعه, باختصار اللى حيديه لنا بالشمال, حياخده أضعاف مضاعفة باليمين.

[Muhammad Zidan]

هو احنا ليه بنفتح المواضيع المستفزة دي

ما إحنا شايفين اللي بيحصل وساكتين

متنيلين على عينا وساكتين

يبقى لازمته إيه نحكي في المحكي

لازم نوضح ونفسر كل مصيبة بتحصلنا

هو في حد مش عارف إن الحكومة بتديلك باليمين وتاخده بالشمال فوراً وبدون فترة راحة أو تمتع

في حد مش عارف إن البلد دي ضايعة ومن أسوأ لأسوأ

تفتكر يا سي السيد إن في واحد عنده شوية مخ في البلد دي وعاوز يعيش فيها أكتر من كده

تقدر تقوللي مين مايعرفش إن الفساد متوغل ومستشري في كل المجالات بلا استثناء وأكرر بلا استثناء

بتوضحولنا إيه ... خربانة خربانة

تقدر تقوللي كل الشباب ومش الشباب وبس واللي زي حالاتي كمان ... عاوزين يهجّوا ( مش يهاجروا ) من البلد ليه

يا أستاذ كلنا عارفين

تقدر تقوللي مين مايعرفش إن الحاكم والبطانة حرامية من قمة رؤسهم إل إخمص أقدامهم

تقدر تقوللي مين ما بيتمناش إن الحاج شندويلي تجيله شوطة تشيله ... مش بيتمنوا بس لأ بندعي في صلاتنا كمان

مين فينا مش حاسس بخوف ورعب على مستقبل ولاده في البلد ****

كل الناس على اختلاف مستوياتهم وانتمائاتهم باستثناء الشلة الذين يطلق عليهم الصفوة ( العصابة الكبيرة الحرامية الكبار يعني ) عارفين كل كلمة حضرتك كتبتها وحاسين بيها وكل مايقروها يزيد حنقهم واختناقهم وسخطهم على كل شئ ... واللا انت عاوزني أقوم أرمي نفسي من الشباك

ليه لازم نوضح وننقح ونفسر المتنيل بنيلة ... هل لأن المتنيل بنيلة أصبح هو الأصل في حياتنا؟؟ .... لو هي دي الحقيقة إبقى قول الكلام ده لـ Folana عشان هي فاكرة إن الدنيا لسة جميلة وفيها حاجات حلوة وعندها تفاؤل وحاجات من النوع ده !!!!!!

كنا زمان نسمع حاجة كده زي دع المُلك للمالك ... وضربوا الأعور على عينه قال خربانة خربانة

وخلينا كده ساكتين أحسن كل ما نتكلم في أحوالنا اللي بقت أسود من قرن الخروب ... ها يحصل لنا حاجات وحشة ... يا جلطة .. يا انتحار ... ياتربنة في المخ ودي الأقرب حالياً

أعذرني ... أعذروني كلكم

تم تعديل 30 أبريل 2008 بواسطة se_ Elsyed

[Muhammad Zidan]

لا حول ولا قوة إلا بالله

اللهم ما ارفع مقتك وغضبك عنا

قولوا آآآآآآآآآآآآآمين

[أسد]

طيب يا أستاذ أسد, خلينى أكمل اللعبة معاك وأقولك:

أنا أصدق الراجل ده إزاى وهو لم يصدق فى أى وعود قالها قبل كده؟!!!

أستاذ محمد عبد العزيز ..

الموضوع مش وعد .. ده قرار .. والرواتب حتزيد إعتباراً من بكره .. إللي هو الخميس .. اللي هو أول مايو ..

الأرز والأسمنت .. بالفعل .. القرار منفذ منذ يوم صدوره ..

الأسعار بترتفع بشكل جنوني ..

وأزيدك من الشعر بيت كمان ..

الهند .. إللي هي بتصدر أرز قد اللي مصر بتصدره عشرات المرات .. أوقفت أيضاً تصدير الأرز .. ومن المتوقع أن يترتفع أسعار الأرز نتيجة لتلك القرارات بإيقاف تصدير الأرز من مصر والهند .. وتلك الإرتفاعات ستكون على مستوى العالم .. وليس مصر فقط ..

الطلب المتزايد على الأسمنت .. يجعل سعره مرتفعاً .. وهذا أيضاً ليس في مصر فقط ...

فمثلاً في السعودية .. بالرغم من أن السعودية تنتج وتصدر الأسمنت .. ولكنك يمكنك في اليوم الواحد أن تشتري الأسمنت بثلاثة أسعار مختلفة . حسب الكمية المعروضة يومياً ..

السعودية لديها شركة حديد سابك .. وهي شركة عملاقة .. تنتج الحديد .. وتصدره أيضاً .. الحقيقة لا أعرف حجم الشركة مقارنة بشركات أحمد عز .. ولكن الشركة تصدر الحديد للهارج .. ومع ذلك فالحديد في السعودية وصل سعر الطن فيه إلى 4300 ريال سعودي حوالي 1150 دورلار .. بزيادة مضطردة منذ بداية العام وحتى الآن بفارق كبير ..

المطلوب الآن ..

هو التفاعل مع هذا الحدث .. لنكن أكثر إيجابية ..

لنقل أن السلطة المصرية استجابت لمطالب الجماهير ..

ولكنها تقتر عليهم ..

ليكن ..

ماذا علينا أن نفعل ..

نستمر في الضغط عليهم ..

ونفعل إضراب 4 مايو ..

خليك في البيت ..

طوال الفترة القادمة .. يجب على الناشطين أن يدعو المصريين إلى :

مقاطعة أي سلعة يرتفع سعرها أكثر من اللزوم .. أو التقليل من إستهلاكها ومحاولة الوصول إلى الحد الأدنى

الإبلاغ ومتابعة بلاغاتنا عن حالات الغش

يوم 4 مايو .. خليك في البيت

ومن النهارده خليك إيجابي ..

إحنا مش عايزين نصدقهم في اللي هم بيقولوه ..

لكن نقدر نلزمهم يعملوا اللي احنا عايزينه ..

صح ..

[Muhammad Zidan]

..

المطلوب الآن ..

هو التفاعل مع هذا الحدث .. لنكن أكثر إيجابية ..

لنقل أن السلطة المصرية استجابت لمطالب الجماهير ..

ولكنها تقتر عليهم ..

ليكن ..

ماذا علينا أن نفعل ..

نستمر في الضغط عليهم ..

ونفعل إضراب 4 مايو ..

خليك في البيت ..

طوال الفترة القادمة .. يجب على الناشطين أن يدعو المصريين إلى :

يوم 4 مايو .. خليك في البيت

ومن النهارده خليك إيجابي ..

إحنا مش عايزين نصدقهم في اللي هم بيقولوه ..

لكن نقدر نلزمهم يعملوا اللي احنا عايزينه ..

صح ..

والله يا حبيبي ما أنا رايح يوم 4 مايو

وأنا بأدعي مع الناس كلها إن الإضراب ده يعمل نتيجة

مقاطعة أي سلعة يرتفع سعرها أكثر من اللزوم .. أو التقليل من إستهلاكها ومحاولة الوصول إلى الحد الأدنى

الإبلاغ ومتابعة بلاغاتنا عن حالات الغش

يا أستاذ أسد

كلنا أوتوماتيك كده بنقاطع السلع اللي بيرتفع تمنها مش من باب المقاطعة لا سمح الله لأ من باب عدم القدرة على الشراء ثم نتجه إلى السلعة الأدنى في مستوى الجودة والأقل في السعر ... يعني مثلاً الأرز المعبأ لما كان بـ 275 قرش كنا بنشتروه ولما غلي بقى بـ 325 قرش بطلناه وبقينا نشتروا الأرز السايب ... والحقيقة معرفش سعره إيه دلوقتي ... وكذلك المكرونة ريجينا مثلاً كنا بنجيبوها بـ 250 قرش أول ما زاد تمنها بطلناها وبقينا نشتروا مكرونة الملكة أم 2 جنيه بس

وسلم لي على إسراء عبد الفتاح