مدافن مسلمين مميزة ....مش معقول؟؟؟؟؟

[بنت شعنونة]

منقول من منتدى المصري..

[وسام]

مممممممممم جميييييل مدافن قطاع خاص :shock:

مش ناقص غير التكييف :lol:

اعتقد ان السعر مساوى لسعر شقة صغيرة

لا و الميت تحت ايده خدمة 24 ساعة :lol: :oops: :oops: :lol: :lol: :lol:

من سخرية القدر ان نموذج المشروع يشبه نماذج القرى السياحية....الظاهر دة مصيف فى جهنم

( و الان فقط تستسطيع اصطحاب اولادك لزيارة اجدادك ) ههاهاهاهاهاهاهاهاهاهاهاهاهاها انا واثق ان الدخول بكارنيه و بتذاكر

[crossfield]

لا إله إلا الله حتى الموت كمان فيه خيار و فقوس :( :( :(

[بنت شعنونة]

انا مش عارفا اهلا زي دا يتنشر ازاي في جرنان الأهرام؟

لا وفي الوقت الصعب اللي احنا فيه دا؟؟؟؟؟

انا لو من الناس

اروح اقتل صاحب الأعلان الراااااااااااااااايق :twisted: :twisted: :twisted: :twisted: :twisted:

[مصرى]

مدفن يرد الروح !!

لكن مالا أستطيع فهمه هو العبارة المكتوبة على الاعلان :

الآن فقط تستطيع أن تصطحب أولادك لزيارة أجدادك

إزاى يعنى .. هيدفنوا بأثر رجعى .. أم أن المعلن نصاب ؟! فالقيمة مغالى فيها جدا .. ويحاول تبريرها بخدمات لا توجد ضمانة لا ستمرارها وعبارة فخمة جذابة للتغطية على الواقع حتى وأن كانت العبارة نفسها بعيدة عن الواقع ..

[Proud Muslim]

لا حول و لا قوة إلا بالله ..

الآن فقط تستطيع أن تصطحب أولادك لزيارة أجدادك

زيارة القبور للعظة و الإعتبار .. أصبحت فسحة ..

يا ترى في هناك ماكدونالدز و أماكن لألعاب الأطفال و لا لأ !!

ايه المهزلة دي ؟؟

بقيع ايه ..

أين هذا الفندق من البقيع الذي دفن فيه أهل المدينة !!

و بعدين طالما أنه سماها البقيع .. كانت تبقى على السنة !!

بس الظاهر النظام المطبق فيه هو النظام المصري في الدفن المخالف للسنة .. نظام الغرف .. و هو نظام غريب جدا !!

و بعدين ده في جنينة و حراسة ( مش عارف ليه ) !!

يمكن علشان سرقة الجثث لطلبة الطب ؟؟

و بعدين ايه الرخص ده ؟؟

يعني حتى الموت فيه دفع دم القلب !!

فعلا .. هو ده كمان بقى فيه خيار و فقوس ..

و الظاهر إن الناس ستتفاخر بعد كده ..

يعني مثلا .. عندي عربية مرسيدي و فيلا في الزمالك و شاليه في مارينا و تربة في البقيع !!

:cry: :cry:

لا حول و لا قوة الا بالله .

[Cleo]

فاكرين أخواننا فى فلسطين اللى ماتوا فى مذابح الصهاينة و اضطروا يدفنوهم فى مقابر جماعية عشان مكانش فيه قبور تكفيهم؟؟؟

و كذلك أخواننا فى البوسنة و الهرسك؟؟؟

وبعدين سبحان الله.!!!! دى هى العملية كلها متر فى متر و اللى هايشوفه الواحد هناك مالوش دعوة بإنت دافع كام..!!!!! يعنى الواحد بعد ما يتقفل عليه هناك مش هايلاقى معاملة 5 نجوم على قد فلوسه زى ما هم متخيلين...!!!!!!!!

و بعدين فى الصيف يعملوا فيها حفلات للشباب (حلقات ذكر يعنى) و يذيعوها على الهوا و يجيبوا كاظم الساهر و نوال الزغبى و وائل كفورى كل واحد يقراله "تلت" على روح المراحيم.....

إفففففففففف......ارحمنا يا رب...!!!!!!!

[kokowawa1979]

حتى الموت تاجر فيه شياطين الإنس !!!!!!

المشكلة الناس النهاردة بتتباهى بالموت!!! يعني العيلة من دول تتفاخر بأنها لها مدافن فاخرة كالقصور وكأنهم سوف يأخذون معهم الوجاهة إلى القبر فكما قيل ياجامع الثروة أنت خادم للورثة !!! لأنه سوف يدخل القبر ويحاسب على المال من أين اكتسبه ومنها طبعا ال39000 جنيه حق القبر :D :D

وكمان بتلاقي عائلات تأجر عادل إمام وبعض الوزراء بالساعة علشان تصورهم فيديو وهم جايين يعزوا في الفقيد أبو 39000 جنيه !!

أنا مش عارف الناس دي مجانين واللا مستفزين مايتبرعوا بالفلوس دي للأيتام والمساكين وياخدوا ثوابها بدلا من أن ياخدوا بدلها دق في القبر !!!!!!!!!

شكلك كدة ياشعنن مش هاتجبيها البر بمواضيعك :D :D :D

[Salwa]

على فكرة ياجماعة

ده استهتار بعقول الناس.

هو مفيش رادع؟

لادين....ولا مبدأ.....ولاكرامة.

فين...المغلوب على امره....الشعب؟

محدش بيحتج؟

ايه السخرية دى؟.....ايه السرقة دى؟.....ده نصب علنى.

مين اللى عطاهم تصريح باقامة الشركات دى؟

حتى الموت؟......هم اللى اختشوا ماتوا؟

وبمناسبة اللى اختشوا ماتوا......عارفين اصل المثل ده ....جه منين.

كان مرة فيه ...حمام تركى ....الحمامات بتاعة زمان ...اللى كانت موجودة فى الاحياء..والناس تروح قبل الجواز والحاجات دى .

مرة حصلت حريقة شديدة فى حمام من دول .....الناس خرجت عرايا

تجرى من النيران .

واللى اختشوا يخرجوا عرايا ......ماتوا محروقين ..

يظهر الواحد حايموت ....محروق دمه ....من كل ده .

سلامى.

[White heart]

فعلا انا أتفق معكم بأنها "تقليعة" جديدة، و غير مستساغة، و من حق البعض رفضها و عدم التعامل معها....

و لكنى فى نفس الوقت تعودت أن أنظر للأمور بنظارة لها لون أفضل من الأسود، ففى أى مجتمع تظهر من حين الى أخر بعض "التقاليع" أو "الأساليب" التجارية قد تتشابة و قد تختلف، و كثير منها فى البداية يلقى مهاجمة و نفور، و لكن مع الوقت يصبح الأمر عادى، يكفينا القاء نظرة من حولنا لنرى كثير من الأمثلة التى كانت الى عهد قريب من ضرب الخيال، و اصبحت اليوم امور طبيعية بالنسبة للبعض، و مرفوضة بالنسبة للبعض الأخر، بالطبع كثيرون يستغلون "معتقدات" و "عادات و تقاليع" هذا المجتمع للتربح، " والتجارة شطارة" خاصة فى مجتمع مثل مجتمعنا يعانى بشدة من "محدودية" الأفكار لفتح مشاريع تجارية جديدة، و بالتالى "محدودية" ابواب الرزق، و هو ما أرارة فى مثلنا هنا:

"مساحات خضراء" = شركة أو أفراد يعملون على الأعتناء بها و رعايتها

"مراقبة على مدار الساعة" = شركة أمن أو أفراد أمن.

هذا غير الضرائب المحصلة من الدولة من مثل هذة الشركات الخ..الخ

و لذا فأننى ان وضعت فى كفتى الميزان "عيوب" مثل هذا المشروع فى ناحية و "مميزاتة" فى ناحية أخرى، ففى رأي الخاص ستغلب كفة "المميزات"، لقد سبق لى فى احدى الموضوعات مناقشة نفس النقطة، و أعترض البعض على مثل هذا التحليل بحجة ان المشروع "مخالف" لعقيدتهم، و بالتالى أى ربح أو ميزة من وراءة "حرام"، فعلى الرغم من عدم أقتناعى ساعتها بسبب منع و الأعتراض على تلك المشاريع، الا اننى "أتفهم" و "أحترم" من يؤمن بها، على ان لا يفرضها على بالتالى، خاصة و انا مقتنع بشئ أخر.

اما هنا فأنا لا أفهم سبب المهاجمة، خاصة انها فكرة أعتقد انها لا تصطدم أو تتعارض مع ما يؤمن بة البعض، و مناسبة تماما لمجتمعنا، لماذا الهجوم دائما، انا كمصرى لا يهمنى اذا كان أحدهم سيشترى مثل تلك المقبرة أو يصرف نفس المبلغ فى عمليات "تجميلية" مثلا لا طائل منها، و لا ينتفع بها أحد أو من يضع مثل هذا المبلغ بل و أكثر منة أحيانا فى "سيارة"، لأننى ببساطة لست أعلم كل جوانب حياة هذا الشخص، بل الله وحدة هو العالم و الأهم هو الذى "سيحاسبة"، كما اننى أكرة ان "اتهم" بأننى من "الحاقدين طبقيا" !! و لهذا ببساطة فأنا لست من رافضى ذلك المشروع، و لن أكون أحد من يدعو الى "أغلاق" باب رزق، بدلا من تشجيعة، فكفانا من هربوا برؤوس أموالهم و عدم استثمارهم فى بلدنا، فلن نجنى بذلك الا المزيد و المزيد من البطالة و الركود، فى حين يجنى "جيران" لنا المزيد و المزيد من "تميز" اقتصادى.

وشكرا.

[White heart]

على اننى لم أفهم تلك الخاصية، لعل أحدكم يستطيع ان يفهمها لى،

و شكرا

[بنت شعنونة]

استاذ وايت هارت

انا ها اتكلم من منطلقي الدين

اولا تصميم المقابر زي ما هوا في الصور مخالف لتعاليم الدين الأسلامي

ادي اول حرام :D

ثانيا..

اذا كان ربنا حرم على الرجال لبس الذهب والحرير عشان الغني ما يجرحش الفقير بمنظره دا

وبالتالي ما يبقاش في حقد

تفتكر انه مقابر بالطريقة دي مش ها تثير مشاعر غضب مكنونة في قلوب كثيييييييير من العامة!!!

حضرتك بتشوف انه اسلوب تشغيل حديث!!

ماشي

بس يعني الدنيا خلصت من الأشغال الا على دا؟

[yasser6666]

بصراحة يا ابو قلب ابيض كنت لسه بافكر اكتب الكثير من كلامك ولكنني انتظرت حتي اقرأ كل المداخلات وكويس انك سبقتني ووفرت عليا كتير.....

الفكرة في حد ذاتها طبيعية جدآ وكل اسرة تحتاج ان يكون لها مدفن خاص بها ...........وبالنسبة للسعر الخيالي ده والله اللي غاوي ينقط بطاقيته واللي عنده استطاعة مادية يتفضل !!!!

ولكن الاعلان نفسه مستفز جدآ ومنتهي الابتذال في عرض الفكرة وحشو في سطور ملهاش اي لازمة وقلتها احسن واكرم وكانها سلعة رخيصة بيدلل عليها بدون اي احترام للعرف والتقاليد وحرمة الموت....

يعني ايه الأن فقط يمكنك اصطحاب اولادك وقبل كده ماكنش ممكن والا ايه??منتهي الابتذال والسخرية من عقول القراء.. حاجة تقرف فعلآ !!!

وبالنسبة لسؤالك الاخير يا اخ قلب ابيض اعتقد انهم بيجمعوا فلوس من الزوار للاعتناء بالمكان والمحافظة علية وصيانته وخلافه ( تبقي قابلني لو حصل )

[yasser6666]

تفتكر انه مقابر بالطريقة دي مش ها تثير مشاعر غضب مكنونة في قلوب كثيييييييير من العامة!!!

صعبة قوي دي ياشعنونة هو برضه فيه حسد في الموت

[بنت شعنونة]

ستاذ ياسر

انا قلت غضب..

طب لجل الأمانة

انا لو عرفت انه فيه مدافن كدا فعلا وحد اعرفه اتدفن فيها ودفع الفلوس دي كلها

انا مش ها اكرهههههههههه بس

انا ها احقد عليه من كل قلبي :twisted: :twisted: :twisted:

عشان لما واااااااحد يرميييييييي كل الفلوس دي في تربة

وناس مش لاقيا تاكل

يبقى على راي اخوانا العرب

قببببببببببر يلمه :twisted: :twisted: :twisted: :twisted: :twisted:

[yasser6666]

ليه بس كده ياشعنن والله ابدأ ده مهما كان موت والواحد بيقول الحمد لله انه لسه عايش ( مش علشان حاجة يعني ولكن قدامه فرصة للاستغفار والتوبة ) طب بصراحة ياشعنونة انتي شعورك بيبقي ايه لما بتزوري المقابر بذمتك مش بتشعري بالاسف لكل الاموات دول بصرف النظر عن شكل المقبرة وارتفاعها وكمية الرخام واتساعها .... والله كله بيكون زي بعض في نظري......هييييه ماحدش واخد منها حاااااجة .....باين علينا نروح نشتغل حانوتيه احسن.....هيييييه ربك هو الدااااايم

[Mohammad Abouzied]

ستاذ ياسر

انا قلت غضب..

طب لجل الأمانة

انا لو عرفت انه فيه مدافن كدا فعلا وحد اعرفه اتدفن فيها ودفع الفلوس دي كلها

انا مش ها اكرهههههههههه بس

انا ها احقد عليه من كل قلبي :twisted:  :twisted:  :twisted:

عشان لما واااااااحد يرميييييييي كل الفلوس دي في تربة

وناس مش لاقيا تاكل

يبقى على راي اخوانا العرب

قببببببببببر يلمه :twisted:  :twisted:  :twisted:  :twisted:  :twisted:

ايوه يا شانا فيه ناس عاوزه تدفن في مقابر فيف ستار

بس عزابها هيكون برضه فيف ستار ايضا ومتوصي

يعني الناس تعمل ايه بس مفيه ناس بتدفن وبتتسرق جثتها وتتباع حته حته لطلبه كلية الطب

[مصرى]

طبعا هذا يعد سفه وإسراف منهى عنه .. لكن حتى لا تتوه بعض الحقائق فى خضم الحديث عن هذه المدافن الاستفزازية .. أود توضيح بعض الأمور ..

.. الدفن فى غرف تحت الأرض هو دفن شرعى .. يفرضه حقيقة التوسع السكانى وفى مناطق بعيدة عن الصحراء .. وقد رأيت كيف يتم الدفن فى المناطق الصحراوية حيث يتم الحفر الى عمق غير معلوم يزيد فى جميع الأحوال عن مترين تحت الأرض حتى الوصول الى طبقة صخرية تسمى "القفل" يتم تحطيم هذا القفل الصخرى والحفر تحته ثم إنزال الجثمان وإدخاله أسفل القفل ثم إغلاق المسافة بين القفل والأرض تحتها بالطوب ثم إهالة الرمال .. وهناك مناطق فى الجبل للمتوفين من الأطفال يعرفها المقيمين فى المنطقة حيث تكون فيها طبقة "القفل" قريبة الى حد ما من سطح الأرض ..

أما الدفن فى الغرف فإنه أكثر سهولة ويمكن تدبيره فى أى منطقة وهو شرعى طالما أن الدفن يكون على طبقة من الرمال وتحت مستوى سطح الأرض .. حتى لو أقيم هذا المدفن بالخرسانة المسلحة .. وتم صب الأرض بهذه الخرسانة لمنع نشع المياه فى المناطق القريبة من المياه الجوفية .. شريطة أن يتم وضع طبقة رملية أعلى هذه الصبة الخرسانية .. كما يجوز شرعا طلاء المدفن من الداخل لسد الفجوات بين الطوب لمنع تسرب الرائحة .. وكذلك يجوز الطلاء من الخارج .. وأى إجراءات من شأنها الحفاظ على كرامة جسد الانسان .. المهم أن يكون تحت مستوى سطح الأرض ويكون الدفن فوق الرمال ..

.. من المهم جدا أن يعد الانسان لنفسه مكان دفنه .. رغم الأيمان المطلق بأن نفس لا تدرى بأى أرض تموت .. وهناك ثواب كبير لمن يتطوع بدفن "الصدقة" مثل ضحايا حوادث الغرق والسير مجهولى الهوية بعد مضى الفترة القانونية للاحتفاظ بهم فى ثلاجات الحفظ وصدور قرار من النيابة العامة بالدفن .. وأعلم أن هناك متطوعين من أهل الخير فى كل منطقة يتولون تكفين هؤلاء ودفنهم صدقة فى مقابر أعدوها لهذا الغرض بداخل مقابرهم ..

[mnman]

والله فكرة..... اروح الحق اخد ركن وافتح محل ورد للناس الهاي كلاس دول و ممكن كافتيرية صغيرة و البلية حتلعب ياواد يا منمان و شوفلك حد يشاركك شعنونة ولا براود ولا حشيش اهو حتي يضحك الناس و ينسيهم همومهم .... و نغير أسمها من مقابر (اسم بلدي صحيح) ونخلية وحدات تسكين ابدية.... اسم اوريجينال وبدل الناس متيجي علشان العظة تيجي تقضي الويك أند... ويسلام لو حمام سباحة للاطفال و شوية مراجيح .... و شو و دي جي.... ويسلام لو كام واحد لقراءة الكف و البخت و الذي منة ... دحنا حنلم لم....

ألي رواد المنتدي المحترمين... دعوة للشراكة في اقامة مشروع منمان لوحدات التسكين الابدية... شعارنا موت وانت مطمئن أهلك علي علي الراس و علي النن.... لابهدلة ولاصويت وحدتنا اخر تظبيط...

تكيف مركزي...3 حمامات سباحة ... ملاهي للاطفال... مطاعم 5 نجوم... كريزي شو ... الافضلية لاسبقية الحجز... العدد محدود ...

[White heart]

بنت شعنونة كتبت:

انا ها اتكلم من منطلقي الدين

اولا تصميم المقابر زي ما هوا في الصور مخالف لتعاليم الدين الأسلامي

ادي اول حرام :D

حذارى يا عزيزتى أهذة "فتوة" دينية، ام رأيك الخاص؟

على العموم انا أستفتيت قلبى، و أميل أكثر الى رأى العزيز "مصرى"

بنت شعنونة كتبت:

ثانيا..

اذا كان ربنا حرم على الرجال لبس الذهب والحرير عشان الغني ما يجرحش الفقير بمنظره دا

وبالتالي ما يبقاش في حقد

تفتكر انه مقابر بالطريقة دي مش ها تثير مشاعر غضب مكنونة في قلوب كثيييييييير من العامة!!!

و ماذا عن "التمساحة" أو"الشبح"، او ، أو "ام عيون جريئة" :?

ماذا عن الذى يرتدى حذاء من "باتا" و شعورة تجاة من يرتدى ال"أديداس" !! ماذا عن من يأكل "الفول" على عربة بسيطة وقوفا فى الشارع، و شعورة تجاة من يأكل فى "المينج داينستى" و بال"شوب ستيك" و فى نفس المنطقة :( ، و ماذا عن الذين يصيفون فى "بلطيم" و شعورهم تجاة من يصيفون فى "نيس" أو "كان" او "ميامى بيتش" :( ، ماذا عن التعليم العام و الخاص، و من يسافر الى "لندن" لنيل درجة الزمالة ...... :( :?

أتريدين المزيد؟؟؟؟

بنت شعنونة كتبت:

حضرتك بتشوف انه اسلوب تشغيل حديث!!

لا حضرتى شايف انة باب رزق جديد "لعديدين"، تفرق يا عزيزتى....

و الحى أبقى من الميت.

بنت شعنونة كتبت:

ماشي

بس يعني الدنيا خلصت من الأشغال الا على دا؟

الحمدلله انة يوجد بالطبع أفاضل مثل حضرتك من من يقوموا بعمل مشاريع تجارية مختلفة، تفتح ابواب رزق أخرى لأخرين مع التوازى لهذا المشروع، و كل مشروع و حجم رأس مالة بالطبع.

و شكرا