عباس العرسة + النفــاق 010-011-012

[التونسى]

أكيد كتير مننا يعرفه :blink: .. من يتابع جريده الاخبار ((او حتى من كان يتابعها وتوقف )) .. يعرف جيدا تلك الشخصيه الكاريكاتيريه المشهوره والتى هى من ابداع احمد رجب وريشة مصطفى حسين .. وعباس العرسه هو نموذج للشخص المنافق والوصولى والمتسلق فى حكوماتنا .. بل ومجتمعاتنا .. شخصيه تتواجد بكثره .. وتنامت بشكل كبير وفج فى العقود الخمسه الاخيره بفعل المناخ الجيد الذى تهيا لها .. ذاك المناخ الديكتاتورى القمعى البوليسى المتعسف

اللى فكرنى بعباس العرسه دلوقتى .. هو أحد ((العبابسه الجدد)) والذى لا يتوانى عن الافتخار ((ضمنيا )) فى كل وسيله اعلاميه بأنه منافق الرئيس الاول .. بعد أن تسلم شعلة النفاق من سابقه سمير رجب

الغريبه ان عباس العرسه الجديد والشهير(( بممتاز القط )).. هو نفسه رئيس تحرير الجريده اللى كانت بتتضمن عرض كاريكاتير احمد رجب ومصطفى حسين بخصوص عباس العرسه

وقبل ما انسى وقبل ما اعرض عليكم السبب فى فتحى لهذا الموضوع .. احب اعرفكم انى وانا بصيغ البيت الشعرى فى قصيده فاض الكيل واللى بيقول

اللى ينافق... دا فى نظركوا ... وطنى اصيل

كان ممتاز القط هو اللى فى بالى خصوصا مقاله له كان عنوانها ((من غيرك يحمينا )) ... قصده الريس طبعا لتفتكروا حاجه تانيه ((لا سمح الله))

المهم النهارده بقى وانا بطالع مقالته الجديده فى اخبار اليوم ((وقبل يوم واحد من اضراب 4 مايو)) كانت فعلا دماغى حتضرررررررررررررب من كمية النفاق اللى زادت الحد وتستفز الاصنام ... وعشان دماغى متضررررررررررررربش((مع الاعتذار لمسعودى ولينا فى مسرحية المتزوجون)) جبت المقاله هنا عشان تقروها وتعرفوا لاى مدى احنا عايشين فى مهزلة ومأساة

مقال ممتاز القط ( .. ليه بنحبك يا ريس !!!!!!!!! bngn::

[KANE]

'ياريس كل سنة وانت طيب وربنا يخليك لينا'..

كل سنة ومصر تعيش معك أغلي وأعز أيامها.. سنوات مرت وكأنها حلم جميل داعبنا، وجعلنا نبتسم لكل أيامنا.

في عيد ميلادك ياريس ندعو الله لك بالعمر المديد، لكي تحقق لنا المزيد والمزيد.. فنحن سيدي الرئيس قدرك، وانت قدرنا. لمن غيرك نشكو؟! من مين غيرك نطلب!! لمن غيرك نروي احلامنا وآمالنا في مستقبل نملك فيه القدرة علي ان نحقق طموحاتنا، ونترك لاولادنا وأحفادنا وطنا عزيزا وقادرا علي ان يحقق لنا كل ما نتمناه.

بصراحة.. إحنا بنحبك لأنك إنسان أصيل.. بتعرف تحافظ علي كرامة وكبرياء بلدك وشعبك.. بتعرف تقرأ المستقبل صح ياريس.. وفي كل حاجة.. بره وجوه.

بنحبك.. لأنك مابتعملش حاجة إلا بعد ماتحسبها صح.. ويكون قرارك في الصميم.. بنحبك لان تاريخك كله نظيف.

تاريخ بطل.. كان يكفيه من كل الدنيا وسام الانتصار في حرب أكتوبر. الوسام الذي وضعه شعب مصر كله علي صدرك داخل مجلس الشعب تقديرا لبطولاتك ودورك الذي فتح أبواب أعظم انتصاراتنا.

دايما ياريس، القرار الغلط في أي مجال يكون له تأثيرات سلبية، بتختلف من مكان لمكان.. ولكن في الطيران القرار الغلط يعني الموت.. من هنا دايما بيكون فيه تقدير وحسابات كاملة قبل أي قرار.

طول ما إحنا معاك ياريس حسينا بالحكاية دي.. مفيش انفعال ولاغضب.. أي حاجة دايما تسبقها دراسة كاملة.. كتير قوي ياريس مواقف مرت علينا وعلي بلدنا.. تحديات كتيرة لا لها أول ولا لها آخر.. لكنك ياريس عدتها كلها بسلام.. بحنكة ومهارة وتفكير.. كانت دايما ياريس مصر معاك.. في قلبك وعقلك والعدو والحبيب دايما بيحسب لبلدنا معاك ألف حساب.

بنحبك ياريس.. لأن سمعة مصر معاك أصبحت زي البرلنت.. وبيحسدونا عليك.. لأنك مننا.. دايما ياريس كنت معانا.

ساعات كتيرة كنا بنكلم نفسنا.. بنقول ياتري الريس حاسس بينا.. ياتري الريس حاسس بمشاكلنا وهمومنا.. وفي كل مرة ياريس نكتشف الحقيقة إنك معانا.. أنت جزء مننا وإحنا جزء منك.. بتتكلم زينا.. وحاسس بالظروف الصعبة اللي إحنا عشناها.

وبصراحة ياريس.. إحنا نسينا أيام زمان.. إحنا ادلعنا ياريس في عهدك.. ونسينا كل حاجة وحشة.. نسينا زمن الاشتراكية اللي ضحكوا بيها علينا لاننا اكتشفنا إننا بنعيش في وهم جميل صحينا منه يوم 5 يونيه.

نسينا زمن تليفون العمدة وبقينا دلوقتي محتارين.. نركب 012 ولا 010 ولا 011 ولا أرضي.

نسينا القطارات ماركة اللي يحب النبي يزق!! نسينا زمن كل حاجة بالبطاقة من قطن العرايس لحد قماش التيل والبفتة والدبلان.. نسينا زمن المجاري اللي طافحة وطلمبات الميه البحاري ووضع النواية جوه الزير.. نسينا ياريس زمن زوار الفجر وزوار الصبح والظهر والعشا.. نسينا اللهو الخفي ونسينا نشوف النجوم في عز الظهر.

دلوقتي كله بيتكلم.. مفيش حد خايف.. شلت الخوف من قلوبنا يا ريس ودي نعمة إحنا مكناش حاسين بيها.. دلوقتي ممكن أي واحد ينتقد رئيس الجمهورية والحكومة وكل حاجة!! ساعات بنزودها حبتين!! لكن جوانا شعور إننا مش خايفين.. عارفين إن فيه كبير في البلد.. بيحبنا وبنحبه.. عايش في قلوبنا وقريب دايما مننا.

بنحبك ياريس لأنك مننا.. انت الرئيس الذي لا يتحدث بلغتين.. اللي بتقوله في الغرف المغلقة هو اللي بتقوله في العلن.. ودايما آراءك وأفكارك سباقة والعالم كله يا ريس آد أيه بيحترمك ويقدرك.. طولة بالك وسعة صدرك ياريس وحبك لينا.. خلانا نطمع أكتر واكتر ياريس.

في عيد ميلادك الناس.. اهلك... وشعبك... كل اللي بيحبوك المفروض يقدموا لك ورود الدنيا كلها.. لكنك ياريس كنت سباق بالخير.. طول عمرك سباق بالخير.. العلاوة ياريس كانت مفاجأة.. كانت عبور بالموظفين الغلابة من الدوامة اللي عايشينها ليل نهار.. الناس كلها دعت لك ياريس بالصحة والسعادة.. حسوا ساعتها انك جزء منهم وانت بتطالب الحكومة إنها تدبر الموارد عشان العلاوة لأن الناس مش ناقصه.!!

الناس ياريس كلها بتقولك في عيد ميلادك كتر خيرك.. وربنا يديك الصحة.. والسنة الجاية برضه هنقولك عايزين علاوة ياريس.. 'علاوة ريس'.. له في قلب كل مصري حب ما يتقدرش بأموال الدنيا كلها.

كل سنة ومصر معاك بخير ياريس ونفضل دايما نقولك عايزين وعايزين.. والسنة الجاية مش مهم العلاوة تبقي 30 % خليها 25 % بس!! إحنا مش طماعين!!

كل سنة وأنت بكل خير ياريس

تم تعديل 3 مايو 2008 بواسطة KANE

[KANE]

إِنَّ الْمُنَافِقِينَ فِي الدَّرْكِ الأَسْفَلِ مِنَ النَّارِ وَلَن تَجِدَ لَهُمْ نَصِيرًا

[se_ Elsyed]

الأخ تونسي

إنت ما عندكش إخوات صغيرين ؟

يا أخي كنت قول : الموضوع ده ممنوع لمرضى الضغط والسكر والإسقربوط

بالمناسبة في عِرس في كل الجرايد الحكومية ومنها الجمهورية اللي عاملين حمله يومية دلوقت إسمها " بطل العدالة الاجتماعية "2"

الجزء الاولاني كان إمبارح

والحمد لله بطلت أقرا الحاجات دي لإني صاحب عيال .. وممكن لو جالي مرض والعياذ بالله يتعبوا من بعدي ...

[التونسى]

إِنَّ الْمُنَافِقِينَ فِي الدَّرْكِ الأَسْفَلِ مِنَ النَّارِ وَلَن تَجِدَ لَهُمْ نَصِيرًا

صدق الله العظيم

والله انه النفاق البواااااااااااااااااااح :wub:

انا بجد حسيت للحظات ان المقاله دى بالمعنى البلدى ((اشتغاله )) او مقاله ساخره ..

على العموم دا شئ طبيعى ان ((ربع موهبه صحفيه)) وصلت لمنصب لا تستحقه ..زى ممتاز القط .. طبيعى تكتب كده ..

معقوله دا رئيس تحرير لجريده كان رئس تحريرها فى يوم من الايام مصطفى امين .. دا حتى ابراهيم سعده مكنش بالفجر ده

بجد يا ممتاز القط فاااااااااااض الكيييييييييييييييل :sad:

[التونسى]

الأخ تونسي

إنت ما عندكش إخوات صغيرين ؟

يا أخي كنت قول : الموضوع ده ممنوع لمرضى الضغط والسكر والإسقربوط

بالمناسبة في عِرس في كل الجرايد الحكومية ومنها الجمهورية اللي عاملين حمله يومية دلوقت إسمها " بطل العدالة الاجتماعية "2"

الجزء الاولاني كان إمبارح

والحمد لله بطلت أقرا الحاجات دي لإني صاحب عيال .. وممكن لو جالي مرض والعياذ بالله يتعبوا من بعدي ...

بعيد الشر عليك يا سى السيد .. ان شاء الله هو وغيره وااللى متشدديلنه ..

انا عارف ان الصحف الحكوميه زاخره بالعِرس .. بس مش معقوله يكون النفاق مباشر كده .. يعنى ((اذا بليتم فاستتروا)) ..يخلى عنده دم شويه .. والا هو عشان عارف ان محدش من الشعب عاد بيقرا الاخبار زى الزمان يقوم ينافق كده بكل بجاحه .. وبعدين بيكتب لمين .. بيكتب لمين ..... أللهم ارفع مقتك وغضبك عنا .. اميييييييييييين

[se_ Elsyed]

على العموم دا شئ طبيعى ان ((ربع موهبه صحفيه)) وصلت لمنصب لا تستحقه ..زى ممتاز القط .. طبيعى تكتب كده ..

وصلت إيه يا راجل يا طيب

دول كلهم بالتعيين من الريس مباشرةً

[Modest]

نفسي أقول كلمة عيب :wub:

بلاش مواضيع من دي تاني يا تونسي الله يكرمك .. مش معقول بعد العمر ده كله أبدأ أقول كلام خارج :sad:

[KANE]

الحقيقة عزيزي التونسي أنا إصطبحت بالمقالة دي وقلبت لي معدتي

وجيت أنقلها للمحاورات لقيتك سبقتني

المشكلة إن النفاق برغم تجاوزه الحد الطبيعي

هذه المر كان نفاق ماسخ الطعم عامل زي شعار "بلدنا بتتقدم بينا"

لا أتذكر أن كتب أحد من رؤساء التحرير مقالاً بهذه الركاكة

وكان ناقص يقول زي عادل إمام في مسرحية الزعيم "هشكنا وبشكنا ياريس"

وبعدين حد ضمنط يا قط إنك هتعيش لغاية السنة الجاية أما تشوف العلاوة :wub: ولا انت قط بسبع ارواح :sad:

[هشام عباس]

بصراحه يا جماعه حاجه تحرق الدم بجد

ايه ده الناس دول بيقدروا يعملوا كده ازاي

والمصيبه لو كانوا مصدقين نفسهم

[Modest]

نفس "الراجل" :wub: ده كان صعبان عليه الريس أيام ""إنتخابات!!!" الرئاسة.

لما قال إن أعباء الرئاسة كبيرة و يكفي إن الريس يا عيني محروم من طّشة الملوخية كأي مواطن عادي :sad:

[التونسى]

على العموم دا شئ طبيعى ان ((ربع موهبه صحفيه)) وصلت لمنصب لا تستحقه ..زى ممتاز القط .. طبيعى تكتب كده ..

وصلت إيه يا راجل يا طيب

دول كلهم بالتعيين من الريس مباشرةً

.. ودى عينه بسيطه من اختيارات الرئيس .. مش بس فى الاعلام .. لكن فى كل المجالات والتخصصات .. اهم شرط فى المراد تعيينه أنه يكون ((عِبس )) .. ويمسخ جوخ .. ويشيل الشنطه .. ويصدرلنا الكدب والاونطه .. واللى مش عاجبه يحشى ((بقه)) شطه

[KANE]

كل مرة اشوف نفاق فج بالشكل ده افتكر الآيات دي

وَمِنَ النَّاسِ مَن يَتَّخِذُ مِن دُونِ اللَّهِ أَندَادًا يُحِبُّونَهُمْ كَحُبِّ اللَّهِ وَالَّذِينَ آمَنُواْ أَشَدُّ حُبًّا لِّلَّهِ وَلَوْ يَرَى الَّذِينَ ظَلَمُواْ إِذْ يَرَوْنَ الْعَذَابَ أَنَّ الْقُوَّةَ لِلَّهِ جَمِيعًا وَأَنَّ اللَّهَ شَدِيدُ الْعَذَابِ

إِذْ تَبَرَّأَ الَّذِينَ اتُّبِعُواْ مِنَ الَّذِينَ اتَّبَعُواْ وَرَأَوُاْ الْعَذَابَ وَتَقَطَّعَتْ بِهِمُ الأَسْبَابُ

وَقَالَ الَّذِينَ اتَّبَعُواْ لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّؤُواْ مِنَّا كَذَلِكَ يُرِيهِمُ اللَّهُ أَعْمَالَهُمْ حَسَرَاتٍ عَلَيْهِمْ وَمَا هُم بِخَارِجِينَ مِنَ النَّارِ

[~Heba~]

انا بجد حسيت للحظات ان المقاله دى بالمعنى البلدى ((اشتغاله )) او مقاله ساخره ..

انا كمان افتكرت كده مش معقول وسط موجة الاضرابات دى و لسة فيه حد له عين يجامل الرئيس

يمكن يا جماعة هى فعلا مقال ساخرة :wub:

[التونسى]

نفسي أقول كلمة عيب :sad:

بلاش مواضيع من دي تاني يا تونسي الله يكرمك .. مش معقول بعد العمر ده كله أبدأ أقول كلام خارج :lol:

على العموم مش محتاج تقولها اخى الفاضل موديست ((اللبيب بالاشارة يفهم)) :wub:

مش دى الكلمه او اللفظ اللى معناها او مدلولها فى اللغه العربيه (( الاعتراض بشده.... وبحنق ..وبغيظ ..وبإنفجاريه )) gra:-

او ممكن نقول بجد فاااااااااض الكيييييييييييييل wst::

[ahmedarab]

عزيزى استاذ تونسى

لا حرام ....بجد مش قادر اقرى المقال

قريت اول 3 او 4 سطور وبعدي مش قدرت ..حسيت انى ممكن يغمى عليا .....حرام عليكم الواحد مرراتة مفقوعة خلقة من غير حاجة

وبعدين انا مع سين سين ..المفروض كنت تقول ان المقال دة ممنوع لمرضى الضغط والسكر وال....... والله هاعيط خلاص ..

وعلى ذكر عادل امام ...التوسعية من التوسع والامبريالية ...من الامبـرة ......

حسبي الله ونعم الوكيل

[التونسى]

الحقيقة عزيزي التونسي أنا إصطبحت بالمقالة دي وقلبت لي معدتي

وجيت أنقلها للمحاورات لقيتك سبقتني

المشكلة إن النفاق برغم تجاوزه الحد الطبيعي

هذه المر كان نفاق ماسخ الطعم عامل زي شعار "بلدنا بتتقدم بينا"

لا أتذكر أن كتب أحد من رؤساء التحرير مقالاً بهذه الركاكة

وكان ناقص يقول زي عادل إمام في مسرحية الزعيم "هشكنا وبشكنا ياريس"

وبعدين حد ضمنط يا قط إنك هتعيش لغاية السنة الجاية أما تشوف العلاوة :wub: ولا انت قط بسبع ارواح :sad:

مانا عشان كده بقول عليه بكل امانه ((ربع موهبه صحفيه)) .. وملاحظتك فى محلها فعلا مقاله ركيكه جدا جد .. تحس ان الريس زى ما يكون عمدة كفر ابو لمون و قاعد على المصطبه ..والواد بهنساوى بهروز الشهير بعباس العرسه .. قاعد تحت رجليه ووبيلمع بكم جلابيته بولغة الريس (0لامؤاخذه))و عمال يمدح بكل ركاكه ونفاق فى ولى نعمته ...

على العموم عباس العرسه اهم سماته التلون كالحرباء .. يعنى لو الاخوان مسكوا مصر .. حيمشى حاله وحيركب الموجه

لا اله الا انت سبحانك انى كنت من الظالمين

لا اله الا انت سبحانك انى كنت من الظالمين

لا اله الا انت سبحانك انى كنت من الظالمين

اللهم ارفع مقتك وغضبك عنا امييييييييين

تم تعديل 3 مايو 2008 بواسطة التونسى

[التونسى]

بصراحه يا جماعه حاجه تحرق الدم بجد

ايه ده الناس دول بيقدروا يعملوا كده ازاي

والمصيبه لو كانوا مصدقين نفسهم

هى رساله خبيثه اخى الفاضل يؤديها المنافون فى مصر منذ قديم الازل ..منذ ان كان فرعون ينصب نفسه إلها .. وحوله الحاشيه ومن بعدهم الرعيه يعبدونه .. ((ولا يروا إلا ما يرى )) كما حدثنا القران الكريم فى احدى اياته ما معناه

انا بعتبر ممتاز وامثاله هما بجد اللى من اهم اسباب التخلف والانهيار والانحدار اللى احنا فيه .. لانهم هما اللى بيصنعوا من حكامنا ألهه وطواغيت .. وهما اللى بيبرروا كله مصايبهم السوده .. وياكلوا الشعب البالوظه

يا مين يلايمنى عليك يا قط :wub:

[التونسى]

نفس "الراجل" :wub: ده كان صعبان عليه الريس أيام ""إنتخابات!!!" الرئاسة.

لما قال إن أعباء الرئاسة كبيرة و يكفي إن الريس يا عيني محروم من طّشة الملوخية كأي مواطن عادي :lol:

طشة ملوخيه مين .. هو الرئيس بتاع الكلام ده

بأمارة ايه ... بأمارة طباخ الرئيس اللى طلع فى احد الجرائد وفضح الدنيا وقال على قائمة طعام الرئيس .. وبعده عينك ما تشوف الا النور :sad: .. على راى حسن عابدين ((اتخاااااااااااااااطف))

من جريدة المصريون بتاريخ 27 مارس 2007

ذكرت جريدة الكرامة الصادرة هذا الأسبوع أن مباحث أمن الدولة بالجيزة قامت باحتجاز وتعذيب الشيف أحمد النعماني المعروف بأنه طباخ الرئيس مبارك والمقيم بالهرم لمدة ثلاثة أيام لأنه أدلى بتصريحات لجريدة المصري اليوم قال فيها أن وجبات طعام الرئيس مبارك يتم استيرادها خصيصا من أشهر المطاعم العالمية ...

والقط يجى يقول ملوخيه قال ملوخيه قال .. على راى محمود القلعاوى فى مسلسل سنبل ((يا عم روووووووووووووووووح)) gra:-

[التونسى]

انا بجد حسيت للحظات ان المقاله دى بالمعنى البلدى ((اشتغاله )) او مقاله ساخره ..

انا كمان افتكرت كده مش معقول وسط موجة الاضرابات دى و لسة فيه حد له عين يجامل الرئيس

يمكن يا جماعة هى فعلا مقال ساخرة :sad:

مش بيجامل يا اخت هبه .. دا بينااااااااااااااااااااااااااااافق .. وايه بقى بينافق بفلوسنا .. ما جريدة الاخبار دى بتتطبع من الضرايب اللى احنا بندفعها لانها جريده حكوميه من دم الشعب النازف !!!!!!!!!!

يعنى العرسه ينافق عشان منصبه والكرسى بتاعه ((والاكل على خساب صاخب المخل))

كويس انى مش لوحدى اللى حسيت الاحساس ده .. افتكرت والله الفيلم بتاع محمد هنيدى وحنان ترك لما كان شغال فى محطه فضائيه وبيعمل برنامج عن معاناة المواطنين والكلام اللى كان عكس الصوره .. وكمان افتكرت الصحاف .. لما كان بقول ان الامريكان لم يبرحوا بغداد .. وهم كانوا فى نفس الوقت يعربدوا فى شوارعها بلا اى مقاومه تذكر

يالها من كوميديا سوداء .. يا لها من ملحمة تختلط فيها الماساة بالملهاة .. يالها من مقاله :wub: