حكومة بتلعب بالبيضة والحجر

[الحازم حسن]

طبعا الشعب فرحان ومنشكح قوي اليومين دول برفع الاجور بنسبة 30% ربنا يبارك لكم يارب (انا مبحسدش ياباشا) اسمحوا لي افرح معاكم أنا كمان وأزف إليكم البشرى بان الزيادة المفترضة للأجور والمرتبات سيتم تمويلها عن طريق رفع أسعار المحروقات واستخراج رخص السيارات وشوية حاجات تانية

يعني زيادة منه فيه

سعر لتر البنزين حيكون 1.75 وكمان الديزل والسولار

واستخراج وتجديد رخص السيارات كمان حتزيد بنسبة لم تحدد بعد

اذن انت كمواطن حتزيد مصاريفك بنسبة 30% والزيادة دي حتاخدها وترجع لك أول الشهر على المرتب

شفتوا حكومة احلى من كده

المهندس المسئول عن الخطة دي هو أحمد عز النائب في الحزب الوثني الحاكم

ومذيعة النشرة الاقتصادية في قناة الجزيرة قالت للمحلل الاقتصادي " يعني الزيادة في المرتبات حيدفعها المواطن لنفسه ؟!!!!! " افتكرت وقتها محمد صبحي فيمسرحية تخاريف لما كان بيقول للوزراء أنا عاوز حكومة مصحصحة حكومة مفتحة حكومة بتلعب بالبيضةوالحجر

وبعدين في الناس دي .......................

نعمل ايه في الناس دي ....................

[مزاميزو]

يبدو إن الشعب دائما هو البيضة عشان هو اللي بيتكسر

[جويرية]

وحتي لو مازاتدش الأسعار

30 % يعني أيه

يعني لو واحد مرتبه 100 جنيه حيبقي 130 جنيه

و لو مرتبه 200 حيبقي 260 جنيه

من اكتر من 14 سنة سمعت دكتور بيقول ان الدخل الشهري لعائلة متوسطة المستوي اللي تقدر بيه تاكل وتشرب و تعلم اولادها مفروض يكون 3000 جنيه

الكلام ده من 14 سنة مش عارفة مفروض دلوقتي يكون كام ؟؟

تم تعديل 5 مايو 2008 بواسطة جويرية