لماذا اسعار العقارات منخفضة بزهراء مدينة نصر؟؟

[الأقصرى]

السلام عليكم

فيه منطقة محصوره بين اخر شارع ذكر حسين وامتداد مصطفى النحاس يعنى شمال ذاكر حسين وانتى جاى من انبى او الحى السابع . المنطقة دى اتقسمت واتباعت على جمعيات اهلية وهى تلاصق منطقة عزبة الهجانه وتم بناءها بطريه عشوائية وكانت مرتع لتجار العقارات بسبب رخص سعر الارض والبناء على كامل المسطح والارتفاع المبالغ فيه ولكن الحكومه يادوب بدأت تفوق عليهم اليومين دول بعد الباشوات ما خلصوا من الارض وفعلا المناطق دى سعرها رخيص حتى الان وبيتكلموا فى سعر من 800 الى 900جم للمتر المربع وتسهيلات مرتاحه قوى علشان هوجة المبانى اللى كانت عندهم.

طبعا قرار الشراء من عدمه بيختلف من شخص لاخر لو مزنوق فى سكن وعلى قد فلوسك اسكن بس على الرغم من سهولة المواصلات عن طريق ذاكر حسين الا ان السكن مش حيبقى مريح على اى حال وليه مشاكله المتوقعه من مرافق وركن عربيه .

اما الاستثمار فلا انصح بيه فى تلك المنطقة لو عايز تستثمر خليك فى يمين ذاكر حسين وانتى جاى من مدينة نصر يعنى ابعد عن اى اعلان يقولك فيه شارع جامعة عين شمس-شارع حسنى مبارك -خلف السلاب-مدرسة العلا لانك كده دخلت فى عزبة الهجانه وعشوائيتها- اما شقق الجيش فهى مبالغ فى اسعارها حتى الان استنى لما السوق يظبطهم شويه

اما بدر ففكر واسال حد ساكن هناك قبل ما تشترى فيها وزى ما قال الاخ المهندس اشرف فى منتدى نشرة اخبار العقارات ما تشريش شقه الا لما تروح مره واثنين وثلاثه لمكان العماره لان عملية شراء عقار ده قرار شبه مصيرى والنصيحه المهمه ما تشتريش شقه الا وفيها لوحة كهربا او عداد كهرباء .

وربنا يوفق الجميع

[الأقصرى]

عفوا المقصود بلوحة الكهرباء هو حديده الكهرباء اللى بره باب الشقه وعليها رقم وحرف ويفضل السؤال عليها فى شركة الكهرباء للتاكد من ان عنوانها مطابق للشقه وباسم مين

[abuAdham]

السلام عليكم جميعا

الاخت الفاضلة EMY

مداخلتي في نقطتين اولا

لاتدفعي مليم في شقة في عمارات اهالي الابعد ما تسئلي عن رخصة العقار وتااخدي رقم الرخصة وتذهبي الي الحي للتأكد من انها تخص هذا العقار وان العقار ليس مخالف في عدد الادوار يعني ممكن انا كصاحب عقار اعمل ترخيص سليم ب 7 أدوار وابيع لكي شقة في الدور الثامن او التاسع وأرش رشة علي الكهرباء ( 3 ألاف ج ) للمهندس عن كل عداد وابيع لكي الشقة بكدة تبقي اشتريتي شقة مخالفة تيجي المحافظة تبحث في دفاترها القديمة تتبق عليكي القانون وتعمل ازالة للدور الشقتك فيه دة اولا

ثانيا حطي فلوسك في شقة بنياها وزارة الاسكان هتبقي في الأمان

فعليكي وعلي مدينة بدر المبلغ ال معاكي هيشتري لكي شقة 95 م تأجريها ب 350 ج علي المحارة

او شقة 81 م ب 53 الف ايجار 320 ج او شقة 65 م ب 43 الف ايجارها 300 ج وكلة علي المحارة واكيد ممكن تلاقي اسعار اقل من كدة مثلا كا قدامي فرصة علي مصراوي شقة سوبر لوكس 70 م جنب الجهاز ب 45 الف ولا تتعجلي في الشراء لكن عليكي وعلي المدن الجديدة بدر الشروق العبور لكن انتبهي لنقطة الشقة ال تشتريها تكون بتدفع اقل من 90ج قسط شهري وإلا هتبقي تقيلة ومش هتعرفي تبيعيها بسرعة

اما بخصوص السؤال الشائع لية بدر ارخص

ارخص لان اراضيها نزلت القرعة اخر مدينة ولما نزلت الاراضي وزارتنا المبجلة نزلت 1490 قطعة مرة واحدة فكل الناس ال عاوز يبني وال مش عاوز والتاجر والسمسار اخذوا اراضي وعرضوها للبيع بأي مبلغ والاراضي فيها مئات القطع وبرخص التراب لان فية ناس عاوزة اي فلوس وتتخلص من قطعها قبل المهلة

تم تعديل 2 أبريل 2009 بواسطة abuAdham

[masking]

السلام عليكم ورحمة الله وبركاته

نظراً لأننى كنت يوماً من سكان هذه المنطقة

يسعدنى انى أصحح المعلومات اللى ذكرها الإخوة

وأصحح الرد الذى قام به الأخ سى السيد

زهراء مدينة نصر هى مدينة سكنية لضباط القوات المسلحة تتراوح مساحات شققها بين 77 و85 و 96 متر

والآن كل الجديد من النموذج ال 86 متر وأسعارها تقترب من 200 ألف جنيه

أما الشقق الرخيصة فى مدينة نصر

بجوار زهراء مدينة نصر وفى امتداد مصطفى النحاس بالقرب من الحى الثامن والتبة وخلف النادى الأهلى

فجميعها رخيصة الثمن بسببب أنها تتبع عزبة الهجانة

منطقة عشوائية وتقريباً كل عماراتها غير مرخصة والأرض أصلا بوضع اليد

يعنى موقف الأرض غير قانونى والبناء غير قانونى

وهذه الشقق يقال عنها أنها زهراء مدينة نصر على سبيل التسويق لأنهم بالفعل مجاورين تماماً لزهراء مدينة نصر

لكنها لا علاقة لها نهائياً بعمارات الضباط وذلك واضح من فرق السعر

أتمنى أن أكون أفدتكم

مع خالص تحياتى

تم تعديل 6 سبتمبر 2011 بواسطة masking

[عادل أبوزيد]

للرفع