وظيفة براتب 2000 ريال بالمدينة ما رأيكم

[أبو أماني]

السلام عليكم

اخواني الكرام في تأشيرة امامي هتكلفني 8000 جنية تقريبا هشتغل في مؤسسة بالمدينة المنورة

ان شاء الله تعالى الشغل على فترتين في مكتب -مكيف طبعا- من الساعة 9 صباحا الى الساعة

12 ثم الفترة الثانية من 4 الى الساعة 9 مساء الراتب 2000 ريال

التأشيرة يمكن عمل استقدام عليها

وانا متزوج ولدي طفلة

لم احسم مع الكفيل موضوع السكن علما ان الاستقدام لن يكون الا بعد 6 شهور على الاقل

وبنسبة 80% ممكن يكون فيه بدل سكن

فما رأيكم وما نصائحكم

[vipwithyou]

شوية يا ريس الراتب وفترة العمل طويلة على الراتب

[مسالم]

كما قال اخونا vipwithyou .. الراتب قليل .. في ظل الغلاء النسبي الذي اصاب اسواق السعوديه ايضاً .. ولا ادري إن كان الكفيل سوف يدفع لك بدل سكن 4000 ريال.. شهرين او ثلاثه مثلاً 6000 ريال.. وفي كلا الامرين سيكون الامر ايضا صعب نظراً لارتفاع اجور السكن بشكل كبير وخصوصاً اذا كنت ستستأجر سكن خاص بك وبأهل منزلك.. وليس كما يفعل العزاب من time share في شقه واحده ..

لا ادري ايضا ما هو مؤهلك والوظيفه التي سوف تأخذ التأشيره عليها .. لكن على الاقل حاول تطلب بدل سكن (إن لم يكن) وايضاً بدل انتقال حيث ان المسافات هنا بعيده شويه .. وبالأخص تحت ظلال الزيزفون .. قصدي اشعة الشمس الملتهبه .. وايضاً الرطوبه ..

المدينه هي من افضل الاماكن المحببه .. وكذلك اهلها من خيرة الناس .. ربنا يوفقك ..

[justtrying]

الراتب فعلا ضعيف جدا

وأتمنى لك التوفيق بإذن الله

بس بيني وبينك بردو احلى من العيشة في مصر .. توكل على الله وبإذن الله هتلاقي فرص كتير

تم تعديل 7 مايو 2008 بواسطة justtrying

[أبو أماني]

شكرا جزيلا لكم اخواني الكرام على ردودكم ونصائحكم

ورزقنا واياكم من فضله

بس معظم الناس عندنا محاسبين مثلا ومدرسين بيطلعوا على 1200 ريال و 1500 ريال و 1800 ريال

بالنسبة للوظيفة مصمم دعاية واعلان بالكمبيوتر مصمم جرافيك

مؤهلي بكالوريوس تجارة وحاصل على دبلوماتين في الجرافيك

تم تعديل 8 مايو 2008 بواسطة أبو أماني

[MZohairy]

الراتب ضعيف جدا بالنسبه للسعوديه يابو اماني

و حتى لو ادالك بدل سكن 3 شهور سنويا ...6000 ريال سنويا يعني- حتلاقي نفسك لازم تدفع فوقهم عشان تلاقي سكن مناسب و ليس جيد

نصيحتي ...متروحش الا اذا كنت مضطر على المر اللي فيه امر منه

[المر]

لو انت مضطر الى السفر و يجب ان تسافر من رأيى ان الحل الامثل هو انك تسافر لوحدك و تنزل اجازات لاهلك كل سنة شهر او اتنين .لان الاسعار فى السعودية اصبحت غالية جدا و خصوصا ايجار السكن و جميع الاسعار زى ما وضح قبلى الاخوة الافاضل.

بالتوفيق انشاء الله.

[se_ Elsyed]

لو 2000 ريال وواحد أعزب هانقول ماشي ومصيرها تتعدل

إنما 2000 ومتزوج ...... مستحيل تعيش بهم وهاتواجه ظروف صعبه ... خصوصاً وإنكم هاتبقوا في غربة ..

ولو الشركة لو إتمطعت قوي واعطتك 6000 ريال بدل سكني سنوي ... فلما تعمل إيه باللاتي عمرك ما هاتلاقي أوضه حتى تسكن فيها إنت وعيالك

ناهيك عن المصاريف الأخرى للمعيشة والعلاج وإتصالات التليفون و و و و و و .... أعوذ بالله مش هاقول مدارس أحسن كده هاتضطر توصل ماسورة فلوس من مصر لحد المدينة عشان يمدوك بالمعونات

أضف على ذلك التكاليف اللي إنت دافعها في التاشيرة المبروكة دي ... هاتستردها إمتى إن شاء الله ؟

لا تيأس يابو أماني ودور تاني على حاجه مناسبة ....

والله العظيم يا جماعة السنة الماضية والسنة دي ... كل اللي موجودين في السعودية بيتشووا من نار إرتفاع الأسعار في جميع المجالات وخصوصاً السكن اللي بقى نفخ ... وللأسف عشان كلنا شغالين في قطاع خاص فما فيش إلازم عليهم برفع المرتبات ... يعني كله من لحم الحي .

[قديم]

لا ادري ايضا ما هو مؤهلك والوظيفه التي سوف تأخذ التأشيره عليها

اعتقد كل مؤهل وليــه مرتب .. .؟ وحوافز ..

فعشان نقول لك المرتب دا كويس ولا قليل . او فيه فرص اخــري ..لازم تقول مؤهلك ايــه . وهتشتغل ايــه

بالنسبه للمدرسيــن الي بيقبضو 1200 الي 1800 اغلبهم مدرسين في مدارس خاصـه من 7 - 1 وبعد كدا بيشتغلو دروس خصوصيــه او مترجمين او اعمال اخــري معاهم حسب ضروفهم

[أبو أماني]

متشكرين يا رجالتنا على الاهتمام وان شاء الله نجاملكم في السفريات ومن نجلكوش في سفرية ب 2000 ريال

طيب يا اخواني الكرام الشغل من الساعة 9 الى الساعة 12 ومن الساعة 4 الي الساعة 9

وعلى فكرة انا مبرمج ايضا فيجوال بيسيك دوت نت وسيكول سيرفر بس ملقتش فرصة كويسة في البرمجة

فهل ممكن اللاقي فرصة عمل اضافي سواء في البرمجة او في الجرافيك

ام الافضل اني اشتغل 3 ساعات اضافية في الشغل بتاعي من الساعة 1 الى الساعة 4 او حتى ساعتين اضافيتين

لانهم قالوا لي في الشغل ان اي ساعات اكثر من 8 ساعات بيكون فيه اوفر تايم

[مسالم]

السلام عليكم .. عوداً لذي بدأ ...

خلينا نكتب اللي بنفكر فيه ..

مرتب اساسي 2000 ريال .. هذا كل ما لدينا من معلومات .. لم تخبرنا اذا كان الكفيل سيعطيك بدل انتقال وبدل سكن ام لا والافضل انه يوفر لك بدل سكن خاص بيك وباسرتك .. لكن خلينا نحسبها على الافتراضات ...

المصاريف الاساسيه :

- سياره خاصه للتنقلات داخل البلد للذهاب الى العمل او لشراء متطلبات الحياة الاساسيه .. وفي احسن الاحوال للفسح ..في الحاله دي ممكن تشتري سياره ب 6000 ريال على فرض ان الكفيل سوف يعطيك 500 ريال بدل انتقال في الشهر. و سياره بالمبلغ ده حتكلفك بنزين وصيانه شهرياً بما لا يقل عن 150 الى 200 ريال في احسن الاحوال.

- اذا لم يوفر الكفيل السكن الخاص بك وباسرتك .. فلابد ان يكون هناك بدل سكن (وإلا انسى الموضوع) .. اذا كان بدل السكن عباره عن راتب شهرين .. 4000 ريال مثلاً .. فلا داعي لاستقدام اسرتك .. واكتفي بدفع هذا المبلغ في غرفه داخل شقه مع آخرين في سكن مشترك .. كما علمت انك متزوج حديثاُ ولك طفله .. ربنا يخليهملك .. وفي هذه الحاله سوف تدفع لك مبلغ اضافي للمكالمات التليفونيه .. الدقيقه لمصر في حدود 1.6ريال تقريباً .. ناهيك عن مكالمة الوالد والوالده .. وخلافه .. ويمكن توفير هذا المبلغ .. لو عملت شات مع مراتك ومع اهلك كما يفعلون بالسيبر كافيه ..

- مصاريف الاكل والشرب زادت بشكل كبير .. يعني مبقاش فيه حاجه رخيصه في الزمن ده .. واسعار الخضار هنا اغلى من مصر وممكن الاخوات الفاضلات يفيدوك اكتر مني في الاسعار .. لكن عندك حل آخر وهو الاشتراك في مطعم متوسط لتناول وجبة الغذاء فقط .. وده حيكلفك حوالي 300 ريال شهريا إن لم أكن مخطأ .. والاكل على مزاج المطعم .. يعني اللي يجبهولك تاكله .. حسب طبق اليوم . ويبقى عندك وجبتي الافطار والعشاء .. وإذا كنت عاوز تعمل ريجيم .. بلاها العشاء ..

- مصاريف العلاج .. حكمن لزمن .. ان الكفيل يكون عنده نظام تأمين صحي عليك .. وإلا انسى الموضوع .. ونظام التأمين الصحي هنا إن الكفيل يشترك مع شركه تأمين ويعطوك بطاقه صحيه تستخدمها عند الذهاب الى المستوصف او المستشفى .. وفي هذه الحاله سوف تدفع مبلغ 15 ريال تقريبا على كل زياره للطبيب حتى يشخص لك العلاج .. وانت وحظك .. إمىَ ان يكون العلاج تبع التأمين الصحي وبذلك سوف تصرفه مجاناً وإما ان يكون لا .. مثل الاسنان والنظر ومتابعة الحمل والامراض النفسيه والفيتامينات وخلافه .. وكذلك الولاده .. وهكذا .. أما لو الكفيل تكفل بدفع كافة العلاج والكشف بدون تأمين صحي فهذا افضل .. بس لازم يكون مكتوب في العقد .. أو حسب نظام المؤسسه .. عايز اديلك فكره عن الاسعار .. كشف الطبيب الاستشاري حوالي 100 على الاقل والطبيب الاخصائي 75 ريال على الاقل .. وخلع الدرس اللي مفهوش اختراع بـ 100 ريال .. انا بتكلم عليك انت فقط اما اذا استقدمت اسرتك فلابد ان يكون هناك تأمين صحي لهم ايضاً .. وإلا انسى الموضوع ..

- بالنسبه لساعات العمل والاضافي .. انا شايف ان اليوم عندك منتهي ولم يبقى فيه من الكثير لمتابعة شئونك الخاصه .. وخصوصاً انك كان اهلك معاك .. الله يعينك .. لكن كلنا مرت علينا ضغوط عمل مثل هذه .. مش عارف حيحسبلك اضافي على اي اساس .. واضح انك مصمم جرافيكس .. وشغلك غير مجزء .. لكن احرص على ان يكون الاضافي مكتوب في العقد ..

- مصاريف اخرى مثل .. استقدام الاسره .. من سيدفع التكاليف .. إذا كان الكفيل فلا بأس .. اما اذا دفعت انت فستكون هناك مصاريف اضافيه حوالي 2300 ريال على ما اذكر ..

- مصاريف سنويه مثل تذاكر السفر و تأشيرة الخروج والعوده .. مين حيدفع .. اذا الكفيل اتفق معاك على تذكره واحده وتكاليف خروج وعوده ليك سنوياً فسوف تدفع لأسرتك حوالي 2200 ريال ثمن تذاكرهم بخلاف 200 ريال تأشيرة خروج وعوده .. اما اذا الكفيل وافق على دفع هذه المصاريف فقد نجوت .. ولازم الكلام ده يكون مكتوب في العقد.

- مصاريف أخرى مستحبه .. مثل العمره والحج ليك ولاسرتك ..

- مصاريف اجباريه رغماً عن أنفه .. طبعاً حضرتك جاي تشتغل في المدينه المنوره .. بجوار الحبيب صلى الله عليه وسلم .. ويا مُنى النفس .. لما حبايبك يعرفوا في مصر .. حتلاقي اللي ما فكرش يعمل عمره لازم ييجي يعمل عمره ويزورك واللي جايي يحج من اهل بلدتك والاصحاب مش حيهون عليهم يروحوا يزوروا الحبيب بدونك .. وادفع ياعم مجاملات وعزومات و هدايا وخلافه .. ده انا بتكلم عن اللي في مصر .. مابالك لو ليك اقرباء او اصدقاء في المملكه او البلدان المجاروره ...

ربنا يوفقك .. انا من رأيي تنفض .. وتيجي على بركة الله ... بس ابقى اديني تليفونك لما تيجي علشان اجي ازورك ..

تم تعديل 9 مايو 2008 بواسطة مسالم

[أبو أماني]

شكرا جزيلا أخي مسالم بارك الله فيك

ايوه كده نورتني وافدتنى وان شاء الله انت ابعت لي بس رقم تليفونك على الخاص

واول ما اوصل المدينة ان شاء الله اتصل بك

[اسكندرية تانى]

ربنا يهديك لما فيه الخير

[أبو أماني]

بارك الله فيك أخي وبارك الله في جميع الاخوة الذين تعاونوا معي وافادوني

ولكني أريد أن أضيف أضافة انه لو عرض علي عمل في اي مكان غير المدينة ب 6000 ريال

وعرض علي عمل في المدينة ب 2000 ريال لما قبلت أي عمل خارج المدينة إلا لو كان العمل في مكة

وقريب من الحرم ويسمحوا بالصلاة في الحرم وارجوا من الله أن يثبتني على ذلك

فالمدينة بركة المدينة سكينة المدينة بها قطعة من الجنة فاح مسكها وريحها على المدينة كلها

المدينة روحانيات المدينة عبادة المدينة فجر الإسلام وعزه المدينة بها أشرف بقعة على ظهر الأرض بها

أطهر جسد خلقه الله تعالى المدينة بها الحرم النبوي المدينة بها أطهر وأفضل قلوب والله حسيبهم ولا نزكي أحد على الله

المدينة دعا لها رسول الله صلى الله عليه وسلم قال صلى الله عليه وسلم ( اللهم إن إبراهيم حرم مكة فجعلها حراما و إني حرمت المدينة ما بين مأزميها أن لا يراق فيها دم و لا يحمل فيها سلاح لقتال و لا يخبط فيها شجرة إلا لعلف اللهم بارك لنا في مدينتنا اللهم بارك لنا في صاعنا اللهم بارك لنا في مدنا اللهم اجعل مع البركة بركتين و الذي نفسي بيده ما من المدينة شعب و لا نقب إلا عليه ملكان يحرسانها حتى تقدموا إليها) .

وقال صلى الله عليه وسلم ( لَا يَصْبِرُ أَحَدٌ عَلَى لَأْوَائِهَا فَيَمُوتَ إِلَّا كُنْتُ لَهُ شَفِيعًا أَوْ شَهِيدًا يَوْمَ الْقِيَامَةِ إِذَا كَانَ مُسْلِمًا )

فالحمدلله على نعمة الإسلام والحمدلله رب العالمين

[vipwithyou]

يا سيدى الفاضل كلامك مظبوط على المدينة لكن يا اخى انت فى غربة عن بلدك واهلك واصدقائك

لا نقول ابدا ً ان مصر احسن من المدينة مستحيل طبعا ً

دا يكفى بس انك ممكن تصلى اكتر فروضك فى المسجد النبوى غير ان الجمعة كدة كدة هتروح مكة واهى جمبك تصلى فيها

كل دة كلام سليم

لكن يا عزيزى لو قلت 3000 ريال كنت هاقولك سافر

لكن بجد ونصيحة اخوية 2000 ريال هتتعب قوى وحرام عليك اسرتك

لهم عليك حق

اسمحلى من حقهم يعيشوا معاك زى ما من حقك تحاول الوصول للمدينة لتكون بجوار اطيب خلق الله

راجع قرارك اذا كنت اخدته فعلا

حتى لا تندم وقت لاينفع الندم

شكرا

اخيك

تامر السيد

[أبو أماني]

جزاكم الله خيرا أخي تامر

على النصيحة

الحمدلله الكفيل كويس جدا وتحس فعلا انك بتتعامل مع انسان محترم ومتدين

وغير كده هو وعدني إن الراتب قابل للزيادة بحسب الالتزام بالمواعيد والاداء الجيد

وفي حاجة كمان هو قال لي ان اي زيادة في ساعات العمل هيتحسب خارج دوام او اضافي

يعني ممكن من الساعة 12 الى الساعة 4 أخد راحة ساعة أو ساعتين وبعد كده ابدأ الشغل من الساعة 2

فربنا ييسر لنا ولكم ويرزقنا واياكم من فضله