عم رمضان المكوجى والبورصة

[ابو جيداء]

عم رمضان المكوجى راجل طيب .. وقديم فى المهنة .. ودايما يفتخر بشعبان عبد الرحيم ويقول دة صديق الكفاح :lol: كفاح اية مش عارف . مش مهم ماعلينا .

عمنا رمضان المكوجى عندة عيلين شغالين .., كل يوم الصبح يخرجوا يلفوا على البيوت يجيبوا الملابس من الناس عشان تتكوى . وعم رمضان كان سافر للعمل فى دولة عربية ورجع اشترى سيارة عملها تاكسى ..

وجاب سواق شغلة على السيارة عشان هوة مبيعرفش يسوق .وحجتة ان البلد دى مايتمشيش فيها

كل يوم ييجى السواق يحاسبة آخر النهار يفضل عم رمضان يشخط ويزعق للسواق على اية مش عارف المهم إنة لازم يعرف الناس اللى ماشية فى الشارع انة صاحب السيارة . وطالما صاحب السيارة فمن حقة انة يتخانق مع السواق . :D

وفى يوم من الأيام عم عبد الحميد موظف الصحة قال لرمضان المكوجى . اعذرنى انى مبقتش آجيلك نقعد مع بعض . عشان انا مشغول بالبورصة والأسهم .

فسألة عم رمضان المكوجى يعنى اية بورصة ويعنى اية اسهم . فقالة دة موضوع كبير وعاوز قعدة عشان تسيبك من الشغلة المنيلة دى وتقب على وش الدنيا بسرعة .. الكلام عجب عم رمضان وأصر انة يجلس فى اليوم التالى مع الأستاذ عبد الحميد ,,

المهم بعد ماقعد معاة أعتمد على اللة وراح بايع السيارة الأجرة وراح طارد العيال اللى شغالين عندة . واشترى شيشة جديدة وراح حط فلوسة فى البورصة . كل يوم يجيب الولا زينهم العجلاتى والواد ابن عم احمد البقال ساعة العصارى . ويفضل يحكى عن مغامراتة البرصاوية .. طبعا هوة مش فاهم حاجة والعيال قاعدين معاة هوة يحكى وهما فاتحين بقهم ومبسوطين من انتصارات عم رمضان المكوجى الوهمية :D

. وفى يوم رن جرس الباب . قلت للشغالة افتحى . فتحت الباب وسألتنى فية ملابس عاوز تكويها ؟ قلتلها دا مكوجى جديد ؟ رد عم رمضان قال انا رمضان يابو جيداء ... قلتلة اتفضل تعالى دخل على استحياء . وقلت لة خير اية اللى حصل ؟ انت فتحت المحل تانى ؟ قالى ايوة عشان خسرت كل فلوسى فى البورصة . قلتلة ازاى الكلام دة حصل ؟ قالى يابية من فات كارة اتقل مقدارة .

دا انا مبعرفش اقرأ وكنت بخلى اى حد يشتريلى اى اسهم من اى شركة

احنا اتكتب علينا نعيش ونموت مكوجية .

بس خلاص :D

تم تعديل 7 مايو 2008 بواسطة ابو جيداء

[badroora]

دى بقي يا ابو جيداء المفروض تسميها قصة وعبره .....

عزائي لعم رمضان ومافيش احسن من الغسيل والمكوا

طب والله انا حلم حياتى يكون عندي مغسله غسيل ومكوا بس طبعا ان على الم الغلا بس انا باكره الغسيل كره العمي

مشروع كويس جدا ومربح .......... هو بس لو يركز فى الحاجة اللى بيفهمها وبما انه شارب الصنعة كويس هيكون من الاعيان واصحاب الملايين و بعد كدا

مش هنعرف نكلمه ......... :lol:

قصة جميلة وموعظة قيمة

تسلم يداك ابو الفاضلة جيداء

[امانى]

من فات قديمه تاه------- وادى العيش لخبازه ---------- الطمع قل ما جمع

امثلة قديمة تورثناها عن اهالينا لكن هى فى الحقيقة حكم ملموسة بنشوفها فى الواقع

عزائى لعم رمضان واللى يعرفه احسن من اللى ميعرفهوش

قصة واقعية يا ابو جيداء نشكرك عليها لما تحمله من موعظة وعبرة

امانى

[ابو جيداء]

دى بقي يا ابو جيداء المفروض تسميها قصة وعبره .....

عزائي لعم رمضان ومافيش احسن من الغسيل والمكوا

طب والله انا حلم حياتى يكون عندي مغسله غسيل ومكوا بس طبعا ان على الم الغلا بس انا باكره الغسيل كره العمي :sad:

مشروع كويس جدا ومربح .......... هو بس لو يركز فى الحاجة اللى بيفهمها وبما انه شارب الصنعة كويس هيكون من الاعيان واصحاب الملايين و بعد كدا

مش هنعرف نكلمه ......... :closedeyes:

قصة جميلة وموعظة قيمة

تسلم يداك ابو الفاضلة جيداء

شكرا يابدرية على حضورك المميز :sad:

[ابو جيداء]

من فات قديمه تاه------- وادى العيش لخبازه ---------- الطمع قل ما جمع

امثلة قديمة تورثناها عن اهالينا لكن هى فى الحقيقة حكم ملموسة بنشوفها فى الواقع

عزائى لعم رمضان واللى يعرفه احسن من اللى ميعرفهوش

قصة واقعية يا ابو جيداء نشكرك عليها لما تحمله من موعظة وعبرة

امانى

شكرا يا امانى

يمكن افتكر انة ممكن يبقى رمضان عبد الرحيم :sad: