بوش يبحث عن عقد عمل في الخليج

[الحازم حسن]

السيد بوش رئيس الولايات المتحدة الامريكية زيه زي غيره من باقي الرؤساء الغربيين اللي لما بيقربوا يطلعوا على المعاش ويللا حسن الختام يا سلطة يبدا يدور على سبوبة ياكل منها عيش زي بيل كلينتون اللي حاول جاهداً الحصول على عقد في شركة انتاج سينمائي في هوليوود بعد ما انتهت فترة رئاسته وزي كمان طليقة ساركوزي اللي انتقلت لدبي

دلوقتي السيد بوش بكل بجاحة وفظاظة بيحاول مص دم أمة مادياً بعد ما مصه عسكرياً ومعنوياً

في الوقت اللي امتنع فيه عن زيارة المنطقة لمدة سبع سنوات هي كل مدة فترته الرئاسية اللهم إلا كام زيارة خطف للعراق زي الحرامي وبمنتهى السرية ولا يعلن عنها عشان يقضي ربع ساعة مع الجنود ويقول أنا مش خايف

نلاقيه بيزور الشرق الأوسط مرتين في أقل من 6 شهور وركز في زيارته الاخيرة على دول خليجية صغيرة لا ليها في الطور ولا في الطحين ولا علاقة لها بعملية السلام من قريب او من بعيد وفي نفس الوقت همش دولة بحجم مصر الاقليمي في زيارته ونلاقيه بيزوها لمدة ساعتين تلاتة وكتبت جريدة اماراتية عن غرض بوش السري في آخر زيارة واكدت انه يبحث عن عقد عمل في الخليج

بدات المؤشرات توضح للنوايا الامريكية " الحسنة دائماً " وأغراضها من الساذجين العرب لان مرتب شخص بحجم بوش في الخليج العربي لن يقل بأي حال من الاحوال عن 150 ألف شهرياً على الرغم من انه من فلاحين تكساس وشكله بيقول انه مبيفهمش في أي حاجة

ومن المؤكد انه نازل تاني قريب عشان يزبط تفاصيل العقد

أرزاق ....

[se_ Elsyed]

يارب ييجي تحت إيد كفيل يطلع عين مامته

وساعتها يدخل المنتدى ويسأل عن حقوقه وإنه عايز يشتكي في مكتب العمل واتنطط انا عليه وأظبطه بقى

150 ألف شهرياً

بالبروز والمناور ؟

قصدي ببدل السكن وبدل الإنتقال ؟

ده كده ممكن يسكن في حاجة أوضتين وصالة في البطحا .. لإن الراتب كده ضعيف خصوصاً بعد السجاير ما غليت

[الطيار المصرى]

ز احنا رحنا فين يا عمو سين سين........

الراجل بوش مغترب جديد......لازم نساعده و نمده بالنصيحة عشان نحطه علي الطريق السليم....

ولا نسيبه يضحك عليه؟؟؟؟

تحياتي...

الطيار المصري

[الحازم حسن]

أنا عندي فيزا حرة بمهنة نجار مسلح على 22 ألف ريال ويدفع للكفيل 300 ريال كل شهر والسكن والإقامة عليه

لو عايزها كلموه هوه اولى بيها

[badroora]

وركز في زيارته الاخيرة على دول خليجية صغيرة لا ليها في الطور ولا في الطحين ولا علاقة لها بعملية السلام من قريب او من بعيد ....

ممنكن توديح اكتر لو سمحت ........

[الحازم حسن]

وركز في زيارته الاخيرة على دول خليجية صغيرة لا ليها في الطور ولا في الطحين ولا علاقة لها بعملية السلام من قريب او من بعيد ....

ممنكن توديح اكتر لو سمحت ........

ماشي نودح

يعني عنوان الزيارة المباركة كان احياء عملية السلام في الشرق الأوسط ايه بئه علاقة دول خليجية صغيرة بعيدة تماماً عن السياسة ومفيش في تفكيرها البترول والريالات والدينارات

اكيد كان بيشوف السوق اخباره ايه هناك