بيع أراضي بالمدن الجديدة بدون قرعة

[ابو مرهف]

السلام عليكم يا اهل بلدي الغاليين هذه اول مشاركة لي في المنتدى واود ان اسال عن شئ

سمعت عن نظام بيع اراضي في المدن الجديدة بدون قرعة منذ عدة ايام

اتمنى من يعلم أي معلومات عن ذلك ان يفيدني بها وهل يشترط البناء ايضا في وقت معين والا يتم سحب الارض.

وسمعت ايضا ان بعض الناس تستطيع المحايلة على ذلك الشرط ببعض الطرق مثلا ببناء سور او وضع الاساسات فقط لعدم سحب الارض .

وما سعر هذه الاراضي وهل بعيدة

اشكركم

[se_ Elsyed]

دي أراضي أسمها تخصيص قديم وليست قُرعة

ولكن برضوا محكومة بفترة بس أجهزة المدن اجديدة ساعات بتغض الطرف عنها وبتهتم بالقُرعة الجديدة المدعمة فقط ...

لكن بشكل عام لما تيجي تشتري أرض من دول وصاحبها يتنازل لك في الجهاز هاتلاقيه موقع على أوراق تعهد إنه يخلص بنا خلال 3 سنوات على حد أقصى ..

يعني لو فيلا أو عماره .. فلازم على الأقل يشطب دور واحد خارجياً عشان ياخد الترخيص ...

لكن لو خالفت كده وجت هوجت سحب أراضي وإنت كنت لسه على الرمله وما بنتش ... ممكن تتسحب منك والعقد شريعة المتعاقدين يا حلو

وبالمناسبة

ممكن تبقى الخسارة فادحة بالنسبة لك ... قولي ليه ؟

قولت لي ليه

لإن الأرض بيبقى لها ملف في جهاز المدينة .. وبتبقى مُقيمة على حسب سعرها بتاع زمان .. يعني نقول 150 ج ...

حضرتك جت أشتريت من واحد اللي كان مشتري من واحد وهكذا والأرض متخلله بقى لها 10 سنوات زي مانا شوفت .. ولحد ما وصلت لك بقت بـ 1500 ج للمتر ...

فلو ما بنتش وحاولت تسقع وجت هوجه سحب الأراضي وأخدتك في الرجلين .. فجهاز المدينة هايحاسبك على 150 ج اللي هو سعرها الأساسي وهايردهم لك زي الباشا .. بغض النظر هما هايبيعوها بكام بعد كده ..

وكذلك قيس على ده برضوا من سنيتن لما كانت مصاريف نقل الملكية عبارة عن نسبة تصل إلى 20% من قيمة الأرض

يعني أنا شاري أرض في العبور .. وصاحبها كان مسقعها لمدة 12 سنة .. عشان مش فاضي يبني لإنه دكتور جامعي ومالوش في الحاجات دي . المهم كان أيام الأخ محمد إبراهيم سليمان .. فلما جه يتنازل لي رسمي في الجهاز ما كانش لهم دعوى أنا شاري بكام او هو خد كام .. ولكن حاسبوني عالسعر القديم ودفعت رسوم التنازل بناءً عليه ..

لكن جه احمد المغربي .. لغى الموضوع ده وبقى التنازل مجاني ..

لذلك خلي بالك عشان ما تندمش ..

[طه بدر]

معلش يا عم السيد

اعتقد انك ردت و مخدتش بالك من السوال

سمعت عن نظام بيع اراضي في المدن الجديدة بدون قرعة منذ عدة ايام

اخونا ابو مرهف بيسال عن الاعلان الجديد الصادر من وزارة الاسكان فى الاسبوع الماضى والذى جاء الحديث عنه فى اكثر من برنامج على لسان المهندس الدمرداش وكيل الوزارة

والموضوع اخى ابو مرهف لو قرات الاخبار جيدة ان هناك مدن محددة هى العاشر والسادات والصالحية وبعض مدن الصعيد يكون عدد المتقدمين فيها اقل من عدد الاراضى المطروحة يعنى القرعة فيها ليس لها معنى من الاساس

لذلك رجعت فى هذه المدن فقط الوزارة الى النظام القديم يعنى سعادتك تذهب للمدينة وتختار القطعة المطلوبة طبقا للمتاح على ان ينطبق عليك نفس الاشتراطات بتاعة القرعة من حيث طريقة الدفع ومدة البناء وخلافه

طبعا فى كل المدن المذكورة المدينة الوحيدة (اللى فيها الرمق) هى العاشر وهى فى نظرى مدينة معقولة والمساحات المتاحة بها يمكنها توفير عشرات الالاف من القطع

يعنى لو بتفكر فى السكن يبقى توكل على الله

لو بتفكر فى الاستثمار يبقى تاكد من الموضوع لان لو الوزارة فكرت صح (ولو مرة واحدة لوجه الله) فيمكنها تثبيت السعر ان لم يكن خفضه فى مدينة العاشر

تحياتى

تم تعديل 8 مايو 2008 بواسطة طه بدر

[هشام عباس]

استاذ طه حضرتك قلت العاشر والصالحيه

طيب انا كنت سمعت انه فيه في مدينة بدر كمان يا ترى ده صحيح ولا لأ؟

وفعلا الموضوع ده بجد وهيكون اخر الشهر ده؟

عموما اخر الشهر باقي عليه اسبوع وهنشوف ان شاء الله