إستفسار بخصوص بناء أرض بالتجمع

[أبو عمر المصري]

اخواني الأعزاء

السلام عليكم جميعا

وشكري وتحيتي وتقديري للقائمين على هذا المنتدي الجميل و أعضائه المحترمين

سعدت لتسجيلي معكم واحب أستشيركم بموضوع خاص بالبناء بالقاهره الجديده

لدي قطعة أرض أملكها انا وزوجتي سويا ( المالك الأول من الجهاز) أشتريناها من زمان بالتجمع الأول بالقاهره الجديده وكان حلمنا ان نبنيها بيت العمر ومعها كم شقه للأولاد وكم شقه نبيعها كأستثمار لأنها أرض في موقع متميز وبحريه وناصيه وقريبه من نادي رياضي ومسموح بنائها بدروم و أرضي ودورين وضعت فيها حلمي المستقبلي في البناء بعد هذا العمر والكفاح الكبير في حياتنا والمشكله ان حساباتنا كلها تغيرت مع أرتفاع الأسعار والخامات ومواد البناء ( الله يجازيه اللى كان السبب) فالمبلغ اللى كنت ناوي أبني بيه بدروم وارضي مايكفيش حتى لرمي الأساسات دلوقتي والمشكله ان موعد مهلتي للبناء بينتهي في شهر يوليو 2008 و يقال أن سعر الأرض نزل عن السنه اللى فاتت انا ماعنديش معلومه لأني مش في مصر الآن

والله ياجماعه واقع في حيره منغصه على حياتي وتؤرق منامي ومش عارف أعمل أيه وخايف الأرض تنسحب مني فلو رجلي جت في البناء ( والرخصه جاهزه ) لازم أكمل بهذه الأسعار الجنونيه والتي ستجعل تكلفة البناء مرتفعه جدا وفايدة أستثمارها هاتكون معدومه في الوقت القريب ومش معانا سيوله كافيه لازم نبيع شقة الزوجيه بتاعتنا ، يا إما أبيع الأرض وآخد بتمنها شقق متشطبه يتم الأستفاده منها بالتأجير قانون جديد

وسؤالى لكم هل فعلا تم سحب أراضي من مالكيها بالفعل عند انتهاء مدتهم للبناء ؟ هل أحدكم سمع عن ده؟

سمعت ان هناك مهله اعطاها وزير الأسكان 6 شهور لأراضي القرعه ، وماذا عن أراضينا نحن الملاك الأوائل للأرض هل تشملنا مهلة ال6 شهور هذه أم لا ؟

طيب وفي حالة بيع الأرض عن طريق مكاتب عقار، كم بتكون حدود نسبتهم من تمن الأرض وبتكون على مين البائع أم الشاري أم الأتنين مع بعض ؟

وعن طريقة البناء بالمشاركه ما هي ميزاته وعيوبه ؟ وهل من حلول أخري عندكم يا أهل الخبره والمعرفه بالمدن الجديده وقوانينها للخروج من هذه الأزمه

آسف للإطاله وجزاكم الله خيرا

تحياتي

[طه بدر]

اولا عزيزى ابو عمر انت المفروض تحمد ربنا وتبوس ايدك وش وضهر لان ارضك فى التجمع الاول

فارض بهذه المواصفات بالفعل تتخطف منك مع مكسب لك ربما يصل لمليون او اكثر تبعا لموقعها ومواصفاتها

يعنى الاختيار امامك مفتوح البيع سهل وفورى والاعلانات فى كل الجرائد تبحث وتطلب اراضى بهذه المواصفات وباسعار فلكية

اما عمولة المكتب وخلافه فهى من البائع والمشترى ونسبتها يتم الاتفاق عليها وهى من 1 الى 2.5 من المبلغ الزيادة حسب الاتفاق

يعنى تفاءل يااخى وان شاء الله ربنا يكرمك فيها

تم تعديل 10 مايو 2008 بواسطة طه بدر

[se_ Elsyed]

لو أنا منك

أعرضها للبيع وزي ما قالك الخبير العقاري رفيق العبور الاخ طه بدر

أبيعها واخد أرنب ونص في إيدي دلوقت وأنزل أشتري بيت العمر وفيلة العمر وقصر العمر كمان ...

وبعد تجربة شخصية مريرة .. بيني وبينك ... شرا العبد ولا تربيته .... عندنا في العبور ممكن تلاقي فيلا نص تشطيب ومحترمة وحركات بمليون وربع مليون ونص وإنت مرتاح البال وولا تبني وولا واحد زي احمد عزو يتحكم فيك ...

إبتدي إتحرك من دلوقت عشان ما تبيعش وإنت مزنوق

وبالنسبة للكوميشن بتاعت السمسار .. فبتكون في حدوم 5 % ... نص عليك ونص على المتشري

وممكن تتحاشى ذلك إنك تنزل إعلان في جريدة الوسيط .. او الإهرام او المواقع الإلكترونية المتعددة وبكده تتفادى موضوع العمولة وتكتب ببالنط العريض لا للوسطاء

أما البناء بالمشاركة فعيبه الوحيد بيبقى لو ربنا وعدك بناس وطلعوا مش كويسين كجيران هاتقضي معاهم بقيت عُمرك .....

لكن عايز اطمنك

الحكومة مش ما شاء الله سيستماتك قوي وأول ما ييجي شهر يوليو هايقوم السيستم منبههم وييجوا جري يسحبوا الأرض

وبما إنك قلقان فخد الحبايه المهدئة دي من اخوك س س

إنزل الشهر ده أجر بلدوزر بـ 80 ج في الساعة وهاتوا في الأرض يعملك منظر إن شالله يكوم التراب على جنب وده لحد ما تبيع عشان لو بتوع الجهاز عدوا يعرفوا إنك جد .. وكمان روح إستخرج موافقة من الجهاز على موضوع التراب اللي بتطلعه من الأرض عاشن مش مسموح إنك تكوم حاجه في الشارع وتسد الطريق .. بس بكده هاتدفع تأمين مُسترد وده في حدود تقريباً ألف جنيه - على ما أتذكر - ولما تخلص بُنا وييجوا يعاينوا ويشوفوا ما فيش ملاحظات تتعلق بالنضافة هايردوا لك المبلغ تاني .

يالله قوم إتحرك ونفض التراب اللي على هدومك

[أبو عمر المصري]

ربنا يكرمك يا أخ طه وطبعا باحمد ربنا الف حمد والف شكر

مشكلة الأسعار اللى بتتزايد دي بتحطم أمال الواحد في البناء بس انت ماقولتليش رأيك هل أبني بما هو متاح وانتظر كل ما أجمع قرشين أحطهم فيها ام البيع أفضل ؟ وهل تم سحب أراضي من مالكيها قبل كده ؟ وبعدين انت بتقول ان النسبه بتكون بين 1: 2،5 % من المبلغ الزياده حسب الأتفاق .. بتقصد أيه بالمبلغ الزياده

اخي طه أشكر لك أهتمامك وردك

[أبو عمر المصري]

الأخ الفاضل سي السيد

كنت مستني أسمع رأيك والله

طبعا نصيحه من خبير زي حضرتك أكيد فيها الشفا ان شاء الله ربنا يطمنك يارب

يعني انت شايف ان البناء أستثماريا مش جايب همه وبيع الأرض وشراء شقه أو فيلا هايكون أفضل

طيب في حالة البيع ونقل الملكيه أيه الألتزامات اللى على ناحية الجهاز ؟ هل بياخدوا مني نسبه مثلا من تمن الأرض وماهي رسوم الجهاز في هذه الحاله

تحياتي ليك يا سي السيد

[se_ Elsyed]

البُنا عايز يكون معاك شوال فلوس مليان ورق بميات او يا حبذا دولارات وتمكل بدون إنقطاع وهوب كلوب تلاقي نفسك نتعت البيت في 6 شهور وسكنت كمان ...

وما تصدقش أي حد يضع لك ميزانية لن يتخطاها البنا

حتى الشركة اللي بتبني لك مونه واجر بتضع شرط هام وهو إن الحسبة دي محسوبه على الأسعار الحالية واي زيادة في الأسعار حضرتك هاتتحملها زي الباشا .. ولو ماحطوش الشرط ده يبقى هايسرقك .. وياريت تيجي عالفلوس .. ده هايبني لك بتراب وعصيان أقفاص وممكن البيت يقع بعد كام شهر .. لإنه مش عايز يخسر او مش بيشتغل لله وللوطن ...

أما بخصوص نسبة تحويل المليكة فأنتو جايين ايام الرخص يا ولاد ... فين لما كنا بندفع 20 % من قيمية الأرض المتنازل عنها .. واللي كان بيتحمل النسبة دي هو المُشتري .. يعني كنت هاتبقى في الأمان .. أما الأن فهي مجانيه ولا توجد أي تكاليف وحتى لو في حاجات بسيطة فالمشتري اللي بيشيل الليلة ...

قولي بقى : هو أنت زوج أختنا ام عمر المصرية اللي هاتسافر السعودية والناس مضايقينك وسحبوا منك العقد .. ولا واحد تاني ؟

لو إنت وجاي الرياض قريب ... يبقى قول لأم عمر حسابكوا تقل قوي ومش هاتنازل عن 2 كيلو لب سوبر .. ولو إني نازل مصر قريب فممكن أخد منك 50 ريال أجيب بهم لب وسوداني على راحتي ..

لو مش إنت يبقى برضوا عليك كيلو لب

[أبو عمر المصري]

والله ما يغلاش عليك 2كيلو ولا حتى 10 كيلو لب يا سي السيد ( :closedeyes: إلا هو بكام الكيلو دلوقتي بعد موجة زيادة الأسعار والسولار )

بس الحال من بعضه أنا كمان بالرياض وبنتظر أي حد جاي من مصر برضه عشان يجيب لنا اللب السوبر ده لأنه أدمان فعلا

على كل حال بالنسبه لأم عمر المصريه ( ادعو الله العظيم ان ييسر لهم أمورهم هي وزوجها ) انا لست زوجها بس تشابه مسميات

كتبت المسمى بتاعي أبو عمر وبعدين قالى فيه واحد تاني واخد المعرف ده فقمت بإضافة المصري ونجح تسجيلي على طول

اما لشوال الفلوس فطبعا ده غير متوفر هما قرشين يادوب يعملوا الأساسات بالعافيه عشان كده هاشوف موضوع بيع الأرض وادعو الله ان يقدم لنا مافيه الخير

[ابتسامة رضا]

السلام علينا وعلي عباد الله الصالحين

الاستاذ أبو عمر المصري

أنا أعرف انه يكفيك عمل الهيكل الخرساني علشان الجهاز ميسحبش منك الارض

ياريت قبل ما تبيع الارض اسأل في جهاز القاهرة الجديدة لما تنزل باذن الله أو أحد أقاربك ولو صدق هذا الكلام ممكن تستخرج رخصة وتعمل الاساسات والاعمدة وكل ما يتجمع معاك مبلغ تعمل بيه حاجة الي أن يكتمل وممكن تشطب شقة واحدة تسكنها وبعدين تكمل علي راحتك

ربنا يوفقك لما فيه الخير

[أبو عمر المصري]

أخي الفاضل أبتسامة رضا

وعليكم السلام ورحمة الله

يشرفني زيارتك لموضوعي كما وأقدر ردك ونصيحتك ، والله يا أخي كان يراودني هذا الحلم كنت فعلا ناوي أبني هيكل خرساني وبعدين كل ما يتوفر قرشين نحطهم في البناء دا أنا حتى طلعت الرخصه خلاص بس لقيت نفسي هاكون مضغوط انا والعيال لمده مش بسيطه وخصوصا بعد القفزات الغير متوقعه لأسعار مواد البناء و السولار والغير معروف متى ستتوقف قضت على حلمي بالبناء بشكل تدريجي واصبحت فكرة بيع الأرض هي المسيطره الآن

[se_ Elsyed]

خدها نصيحة من أخ

فرصتك في البيع الان أكبر من عندما تضع أساسات وتفصل الأرض على مزاجك وبالتالي ييجي واحد بعدك كان عايز حاجه على مزاجه هو ودور بقى على واحد هواه يوافقك هواك

ومع إحترامي للاخت إبتسامه الرضا

انا بنيت وإيدي في النار يا جماعة

ده مش تاكسي بتصلحه عشان تقول كل ما يتوفر قرش هاعمل حاجه ... القرش في المباني حضرتك يعني أقل شيء 100 ألف جنيه جاهزين ومرصوصين جنبك .... لو هاتقدر يبقى أتوكل على الله

خد الحته دي

أنا مساحة فيلتي 280 متر مباني والمساحة الكلية 700 متر ... فهل تعرف حضرتك إن الحديد لما كان بـ 3400 كانت حسبة سقف الدور الأرضي فقط ..... إسمع كده ... 100 ألف جنيه عداً ونقداً .... طب بعد ما بقى الحديد بـ 6400 ج ... إضرب بقى كده في 2 وقولي المجموع هايطلع كام ... ناهيك عن الأسمنت والمصنوعيات و و و و و وخلافه

في حين إنك لو بعت الان وأشتريت حاجه مبنية جاهزة بقى له 3 سنوات مثلاً .. هاتلاقيها اقل مما لو بنيت لإن صاحبها بانيها أيام الرخص فمهما ضرب في السعر هاتلاقيه كسبان

كان جنبي فيلا حوالي 180 متر مباني والمساحة الكلية 600 متر وبتتباع من 6 شهور دورين وروف وجنينة ومتشطبة عالمفتاح وصاحبها عايز فيها مليون و 300 ألف ... تخيل ..

قبلها بـ 6 شهور برضوا فيلا كانت جنبي في احي السابع خرافه خرافة خرافة وصاحبها التاجر المشهور بعد ما وضبها ولادوا ما رضيوش يسكنوا فيها وفضلوا الأماكن الزحمة .. كان عارضها بـ 750 ألف جنيه ... ولا حول ولا قوة إلا بالله ... طبعاً إتشقطت واللي أشتراها لو قفلها من وقتها دلوقت يطلب فيها 3 مليون مستريح ...

[shofa2003]

أخي الفاضل أبتسامة رضا

وعليكم السلام ورحمة الله

يشرفني زيارتك لموضوعي كما وأقدر ردك ونصيحتك ، والله يا أخي كان يراودني هذا الحلم كنت فعلا ناوي أبني هيكل خرساني وبعدين كل ما يتوفر قرشين نحطهم في البناء دا أنا حتى طلعت الرخصه خلاص بس لقيت نفسي هاكون مضغوط انا والعيال لمده مش بسيطه وخصوصا بعد القفزات الغير متوقعه لأسعار مواد البناء و السولار والغير معروف متى ستتوقف قضت على حلمي بالبناء بشكل تدريجي واصبحت فكرة بيع الأرض هي المسيطره الآن

الاخ ابو عمر

اذا كنت ترغب في البيع ارجو ان تعطينا معلومات عن الارض و السعر المطلوب

وشكرا

[الشامي]

الأخ أبو عمر

بخصوص الأرض اللي في التجمع انا ممكن اجد لك حل لو تقدر تتصل بيه أو تراسلني على الأيميل

وشكراً

[فيصل رافت]

السلام عليكم الاخ العزيز ابو عمر واعضاء وزوار المنتدى الكرام

احب اهديك تحياتى يا ابو عمر كما احب ان الفت نظرك لشئ هام الا وهو ان البناء استثمار صادق جدا ويبقى اصدق استثمار الى وقتنا هذا ويسمح لى كل من ينادى بان البناء كاستثمار غير ناجح فهو مخطئ بكل المقاييس وعلى الرغم من غلاء مواد البناء ولك منى نصيحه مجربه حاول تطلع بالاساس وبيع بمقدم واقساط ومهلة استلام هتلاقى نفسك جمعت مقدمات تقدر تبنى بيها وتكمل وربنا يوفقك واهم حاجه الالتزام ابنى واتوكل على الله مكسبك فى البناء اكثر بكثير جدا من البيع

والقاعده ان العقار يمرض ولكن لايموت

[ziad]

أخى أبو عمر,هداكم الله للرزق الحلال ليك ولأهلك,على ما فهمت حضرتك بتشتغل فى الرياض فى عمل له دخل منتظم,الحلول كتيره أن شاء الله....

- أسهل حل قاله سى السيد,بيع وأشترى جاهز,مفيش وجع دماغ,هتجيب وسيط هياخد نسبه بس نوعا ما أسهل,هتحط إعلان يبقى لازم حد موجود يفرج العميل يتفاوض يخلص ورق

- الحل التانى,أعرض المشاركه,يعنى حضرتك تشوف قريب أو بعيد يشارك بنسبة البناء لقيمة أرضك وتعملوها أسهم,تاخد أسهمك بقى فلوس أو شقق زى ما أنت عايز

- الحل التالت هو( وده المفضل شخصيا), ( http://www.amlakfinance.com/egypt/aear/ ) ديه شركه إمارتيه لسه فاتحه فرع فى مصر بقاله أقل من سنه,تمويل حلال بالمرابحه وعلى 20 سنه,أنا لو منك أرفع سماعة التلفون أكلمهم أخد أجازه وأنزل أدفع وأبنى وسدد براحتك من مرتبك أو من بيع الشقق,الأستثمار العقارى نجم,مصر فى خلال 10 سنين هتدخل دورة رخاء عاليه إن شاء الله وكل جندى هترميه دلوقتى هيرد عليك أكبر وأكتر قريبا بعون الله

[أبو عمر المصري]

صباح الخير على أهل بلدي الطيبين

الموضوع محير فعلا انا عارف أن الأستثمار في العقار هو خير أستثمار وعندنا مقوله هنا في الرياض بتقول العقار هو الأبن البار وده كلام صحيح بس عاوز سيوله زي ما تفضل سي السيد عايز شوال مليان فلووووس واحنا دخلنا هنا يادوب بيمشيني انا والأولاد مع التزامات مدارسهم ومصاريف معيشتهم وزيادات الأسعار اللى حاصله في كل مكان سواء مصر أو الخليج مافيش قدامي إلا بيع شقتي في مصر والبناء بتمنها الهيكل الخرساني هل تعتقدوا هذا حل سليم ؟

الأخ shofa2003

بالنسبه للأرض هي بالتجمع الأول 712 متر ناصيه وبحريه خلف فندق الميراج وبجوارها نادي رياضي وطبعا السعر بيتوقف على سعر السوق وقت البيع وتميز الأرض

الأخ الشامي

حاتواصل معاك بإذن الله

الأخ فيصل رأفت

وعليكم السلام ورحمة الله تحياتي لك أخي الفاضل واشكر لك هذه النصيحه الصادقه ما تفضلت به صحيح وهذه كانت فكرتي قبل ما تقفز الأسعار قفزاتها الكبيره وطبعا ماحدش يقدر يقول ان البناء أستثمار غير ناجح ولكن انا بابص لها من ناحية الزنقه اللى هاكون فيها

من ناحية الطريقه اللى حضرتك اتفضلت بيها وهي بناء الأساسات وبعدين أبيع بمقدم وأقساط ومهله فيها عيب هو زيادة أسعار البناء عن وقت التعاقد وخصوصا الزيادات مش زيادات بعقل فاهاتدخلك في متاهات مع المتعاقدين معاك على شقق والا انت أيه رأيك ؟

[أبو عمر المصري]

الأخ زياد

تحيتي لك أخي الكريم على مداخلتك القيمه طبعا بيع الأرض هو الحل الأسهل والأسرع في دورة رأس المال والأقل صداع كما تفضلت ،

الحل التاني وهو المشاركه هو أمر وارد طبعا ولكن لها عيوب انا باعتبر الطريقه دي ضبابيه شويه بمعنى قد نختلف في تقدير قيمة الأرض وقد نختلف في تقدير قيمة البناء ولاسيما مع غلاء الأسعار يوم بعد يوم وكمان بعض اللى بيبني بنظام المشاركه مابيدفعش حاجه . هو بيحفر وبعدين يبيع على الناس ومن المقدمات بيبني طب دي مانا أقدر أعملها وأجيب مهندس مشرف على العمل وخلاص، ولا انت مش معايا في كده؟

أما إقتراحك الثالث وهو القرض بتاع شركة أملاك أو غيرها من شركات الإقراض - "مع تحفظي على موضوع القروض سواء من الناحيه الدينيه أو من ناحية رفع سعر تكلفة البناء عليك ووضعك في زنقه ماليه تعاني معاها سنتين تلاته " - سمعت عنها فعلا ودخلت موقعهم من باب العلم بالشئ من أسبوعين تقريبا ولقيت انهم بياخدو 13 % فحسبتها

يعني 13% فوائد القرض + 12 % تقريبا متابعة بناء وأشراف + 5% إكراميات وخفير وعرب وغيره من نثريات انت عارفها يعني بنتكلم في 30% زياده على التكلفه الفعليه للمبنى ولا أيه رايك ؟

أشكرك على مشاركتك وآرائك الجيده وانا طبعا بافكر معكم أخوتي بصوت عالى لعل الله يهدينا الى ما فيه الخير

تحياتي لكم جميعا

[ziad]

طبعا رقم كبير بس فى غيرها كان بياخد 8 % بس وبنك إسلامى ومش قرض,مرابحه,بنك التمويل المصرى السعودى,أتصل بيهم كمان ساعتين وأعرف بنفسك

http://www.esf-bank.com/

أو جرب بنك فيصل الأسلامى كمان عندهم حلول كتير بردو

http://www.faisalbank.com.eg/

[الشامي]

الأخ أبو عمر

السلام عليكم ورحمة الله وبركاته ،،،

على فكره ياأخ أبو عمر انا هنا معاك في الرياض

وده رقم تلفوني 0501720060 وممكن أساعدك في حل مشكلتك ونجد لها حل

ياريت لو تتصل بيه أو تديني رقمك أتصل بيك

وشكراً

في أنتظار ردك

[فيصل رافت]

السلام عليكم اخى العزيز ابو عمر

لا متاهات ولاحاجه بالعكس انت كده المستفيد هاتقولى ازاى ؟؟؟؟ اقولك ياسيدى

لان الغلاء وزيادة الاسعار معظمها فى حديد التسليح اما الاسمنت والرمل والظلط بيزيد اه بس مش بالمئات كحديد التسليح ومن ثم انت تكون خلاص رميت الاساسات اللى هيه اهم حاجه واغلى حاجه فى البناء ككل والباقى يعتبر كلام فارغ وبالتالى لما تيجى تتفق على الشقه ولو حنى زادت مواد البناء ما هتفرق معاك لانك ببساطه خلصت التقيل ( الاساسات ) وحاطط حديد التسليح للتعليه جمبك ومطمن تمام صدقنى ده احسن من البيع فرصتك عندك متضيعهاش والله الموفق ولك القرار

[se_ Elsyed]

السلام عليكم اخى العزيز ابو عمر

لا متاهات ولاحاجه بالعكس انت كده المستفيد هاتقولى ازاى ؟؟؟؟ اقولك ياسيدى

لان الغلاء وزيادة الاسعار معظمها فى حديد التسليح اما الاسمنت والرمل والظلط بيزيد اه بس مش بالمئات كحديد التسليح ومن ثم انت تكون خلاص رميت الاساسات اللى هيه اهم حاجه واغلى حاجه فى البناء ككل والباقى يعتبر كلام فارغ وبالتالى لما تيجى تتفق على الشقه ولو حنى زادت مواد البناء ما هتفرق معاك لانك ببساطه خلصت التقيل ( الاساسات ) وحاطط حديد التسليح للتعليه جمبك ومطمن تمام صدقنى ده احسن من البيع فرصتك عندك متضيعهاش والله الموفق ولك القرار

إسمح لي أختلف معاك يا أستاذ رأفت

لا علاقة بالزيادة بالمئات ولا بالألوفات .. ولكن الأمر يتعلق هنا بالنسبة المئوية

هاكلم حضرتك كلام من الورق الرسمي والفلوس المدفوعة

في يناير 2006 طن الأسمنت كان بـ 280 ج .... والان هو بـ 500 تقريباً وممكن ازيد شويه ...... يبقى حضرتك في الفترة دي زاد 78 %

في يناير 2006 .. طن الحديد كان في حدود 3100 ج ... والان هو بـ 6400 .... يبقى الزيادة بقت في حدود 100 %

كذلك الطوب اللي اتوقع إن بعد الزيادات المضطردة في السولار وفي بقي أسعار المواد الخام .. أعتقد إنه زاد ييجي 100 % برضوا

مع العلم إنك بتستخدم أسمنت في المباني أكتر من الحديد بكتير جداً جداً ..

يكفي بناء الطوب والمحارة والبلاط و و و و و و