هل أنت مستعد للتضحية من اجل رأيك وأفكارك ومعتقداتك وثوابتك ؟

[se_ Elsyed]

نسمع كده ونشوف الأراء وكل واحد حر .. يا يختار من سكات ومش هانعرفه .. يا ييجي يشرح وجهة نظره مهما كانت إن شالله الخيار بتاع الست نانسي .. مافيش إحراج

[MZohairy]

اعمل اللي انت عايزه لغاية ما توصل الى ولا تلقوا بأيديكم الى التهلكه

[se_ Elsyed]

لا هي فنجرة بؤ ولا فتح صدر

اخترت الخياريه الاولانية

وده لإيماني الشديد بالأية التي تقول " قل لن يُصيبنا إلا ما كتب الله لنا "

وخصوصاً في الأراء السياسية أو التي تخص البلد بشكل عام

وكما وضحت من قبل إن هناك تساؤل يؤرقني ومالقتلوش إجابة بصراحة ولا لقيت تفسير عند حد حتى الان وهو :

" ليه ناس مكتوب عليها تروح ورا الشمس وتتنفخ وقفاها يبقى عامل زي الأخ اللي سحلوه عشان دعوته للإضراب عالفيس بوك او البت الجدعة إسراء اللي نفخوها وسجنوها وأفرجوا عنها وراحوا خطفينها تاني ويا عالم حصل فيها إيه عندهم او عبد الحليم قنديل اللي على رغم إختلافي مع فكره الناصري إلا إن توجهاته المصرية الخالصة في السنوات الأخيرة عرضته لإن زبانية الامن يخطفوه من قدام بيته ويرموه في صحراء المعادي بعد ما قلعوه سالبوته - ملط يا أستاذ شريف .. ملططططططططططط - وأخدوا نضارته اللي ما بيشوف من غيرها متر قدام ...

وخد كتير بقى من زمان الآلاف اللي ضحوا بحياتهم عشان أفكارهم ..

طب إشمعنى دول ؟

وإشمعنى الـ 99 % الباقيين مآنتخين و كتيرهم بيبقى كلام وفتح مطاوي عالفاضي وهما قاعدين في حته ناشفه ومنتظرين المهدي المنتظر ياتي ليُخلصهم - ده فين ناس ما بتتكلمش أساساً وبتاخد على قفاها وتسكت ودول مصيبة سودا- ... وأهو لو المهدي خلصهم يبقى الخير هايعم عالكل ... ولو فشل يبقى هايتنفخ لوحده وأهو اخد جزاءه وأهم لسه قاعدين في الناشف والحمد لله حصل خير .

آه مش كل الناس مؤهله للقيادة ...

ما حدش قالك قود ولا سوق يا سيدي وإبقى زعيم .. لكن خليك تحت لواء القائد على الأقل وأسند ضهره

ده أنت لا بتعمل ده ولا ده ومنتظر السماء تُسقط عليك ذهباً وفضه وإنت مآنتخ يا معلم ...

ونرجع نقول الأحوال ما بتتصلحش ليه وربنا غضبان علينا ليه

أي نعم اللي إيده في الميه مش زي اللي إيده في النار

ومهما الواحد إتكلم وقال في حكم ومواعظ .. اقسم بالله هذا لن يقارن بساعة واحده الواحد يعيشها وهو مهدد في حياته وبيته وأكل عيشه وفي صحته ... ما هو النفخ ده بيأثر عالصحة برضوا

لكن ومع الإحترام لكل تلك الإعتبارات .... لو فضلنا طول عمرنا نفكر فيها ... يبقى هانفضل كما كنت ... بل بالعكس ده حتى الكما كنت دي مش لاقيينها وبقينا بنعمل للخلف در وبالخطوة السريعة كمان

يالله عييييشوا مع الإستفتاء

وكل سنة وإحنا طيبين

[se_ Elsyed]

اعمل اللي انت عايزه لغاية ما توصل الى ولا تلقوا بأيديكم الى التهلكه

زهوور حبيبي

التهلكة هنا معناها التصرفات الطائشة ... يعني أنتحر ... أشرب مخدرات .... أدخل نفسي في حاجه فيها خطر بدون فائدة ..

وإلا هل تعتبر الحرب والجهاد والدفاع عن بلدك وعرضك ومالك تهلكه ؟

هل تعتبر إن مستقبل بلدك - زهيري إوعى تقولي إن مصر مش بلدي :rolleyes: .. انا بقيت عُماني يابا وعاش السلطان قابوس المُعظم - فهل تعتبر إن مستقبل بلدك المظلم والمتجه إلى ظلمات ما بعدها ظلمات ..... هل تعتبر الدفاع عن هذا المستقبل تهلكه ؟

[التونسى]

؟

وإشمعنى الـ 99 % الباقيين مآنتخين و كتيرهم بيبقى كلام وفتح مطاوي عالفاضي وهما قاعدين في حته ناشفه ومنتظرين المهدي المنتظر ياتي ليُخلصهم - ده فين ناس ما بتتكلمش أساساً وبتاخد على قفاها وتسكت ودول مصيبة سودا- ... وأهو لو المهدي خلصهم يبقى الخير هايعم عالكل ... ولو فشل يبقى هايتنفخ لوحده وأهو اخد جزاءه وأهم لسه قاعدين في الناشف والحمد لله حصل خير .

يعنى انت مع الراى القائل اننا ((شعب يستاهل )) :rolleyes: .. نستاهل اللى يجرالنا بسبب السلبيه والانامليه والجهاد الحنجورى . :waf:

طب خد دى

مواطن هلامى .. ومؤمن بسيط

وفعلى بعوضه .. وقولى محيط

دورى .. ((خيال المأته فى غيط))

وأيامى مالحه .. فى بيرى الغويط

مين دا اللى اخد حبوب صراحه

..............................!!!!!؟

م الاخر .. لو نسبتك دى صحيحه يبقى احنا شعب اخر شئ نفكر فيه التضحيه .. ((وربك بقى يحلها من عنده )) دى المقوله الشائعه .. الاتكاليه ...واللى بيرددها الشعب .. حتى ساعات ناس بتضحى بس بتطالب بتمن تضحياتها مش لوجه الله او الوطن والضباط الاحرار خير مثال ((على اساس لو كان انقلابهم فشل كانوا ممكن يتنفخوا (لامؤاخذه) )) لانهم بعد كده مرجعوش ثكناتهم .. ووصلنا معاهم لحد اللى احنا فيه دلوقت

[se_ Elsyed]

لا ننكر إن حياة الإنسان غاليه عليه

خصوصاً لما يكون في كوم لحم متعلق في رقبته :rolleyes:

لكن التوازن بين كوم اللحم ......... وبين البيئة المحيطة للإنسان سواء كانت بيئة سياسية أو إجتماعية هي دي المشكلة

فمن ناحية .. لو فكر وقال : وأنا مالي يابا أنا عندي عيال عايز أربيهم وخليني ماشي عالحيط ...

فكده فعلاً هو في امان - وهمي - وماحدش هاييجي جنب قفاه - مؤقتاً -

لكن من ناحة أخرى إذا كان بيقول طالما الضرب والسحل بعيد عن بيتي يبقى انا في السليم ... فمصير الدائرة تدور وهاتدخل تدمر بيته زي الإعصار

وأهو على يدكو وأديكو شفتو ... يوم ما ربنا رزقنا بشوية شباب زي الفل دعوا للإضراب والصراخ في وجه الظلمه على الأوضاع السيئة اللي وصلنا لها ... لقينا كمية ناس متهكمين ومصاصي شفايف شمتوا فيهم لما الإضراب الثاني لم يلقى شعبية كافية والناس فضلت السلامه وقالت وأنا مالي ..

فجاءها العقاب فوري وحارق مارق سارق .... غلاء متوحش في كل حاجه وقطم وسط اكتر ما هو مقطوم ... لدرجة إني متخيلنا كشعب مصري شوية ماشيية بالنص الفوقاني وشويه تانيين بالتحتاني .. وما عندناش خط وسط

ليه ؟

عشان قولنا : خلينا نربي العيال

ربيهم يا عم الحاج وإبقى أكلهم من خشاش الأرض إن شاء الله

نيجي عالنقطة التانية زي ما قلنا ... وهما الناس المحترمة أصحاب الرأي اللي بيروحوا ما بيرجعوش أو بيرجعوا وهما أشباه ىدمية من اللي حصل لهم

طب دول مين يعوضهم عن ثمن جرأتهم ؟ وليه هما بس اللي يحصل فيهم كده ؟

----------------

اتذكر جيداً كلام والدي الله يرحمه ووالدتي ربنا يديها الصحة في أواخر الثمانينات والتسعينات أيام ثانوي وجامعة وتلك النصائح الغالية التي توجد في كل بيت مصري بلا إستثناء :

- إوعى يا س س مالكش دعوة بالسياسة .. ولا المظاهرات بتاعت الجامعة .... خليك في حالك وامشي جنب الحيط .. وذاكر دروسك وشوف مستقبلك واتخرج واشبط لك في شغلانه وكون نفسك عشان تتجوز وتخلف لك عيلين تربيهم كويس ...

- إنت سايب دقنك ليه يا أستاذ ؟ إنت عايزهم ياخدوك زي ما بياخدوا السُنيين ؟ اومال إحنا شيعه يا أبتاه ؟ ما أحنا سُنيين برضوا ... يقولي : انا قصدي الشباب اللي بدقون واللي بيلموا فيهم على إنهم جماعات مُسلحة

- حتى لما كبرت وشبيت عن الطوق .. كان والدي رجع من السعودية للإستقرار .. وبرضوا النصايح شغاله : إنت رايح السعودية .... وبرضوا إوعى ومالكش دعوه بالسياسة وخليك في اكل عيشك

يابا أنت محسسني إنك مخلف مصطفى باشا كامل ..

ليه ده كله يا جدعان .. عشان بأفكر وبأستخدم ساندوتش المخ اللي في راسي وبأقول لأ للظلم وياريتني حتى زي الثورجية او الناس اللي بتتفرم في مفرمه السياسة ...

ولحد دلوقت .. أمي لو عرفت من بعيد لبعيد إني بأكتب في منتدي وبأقول كلمه لوجه الله ... تتصل وتعيط وتقولي مالكش دعوة بالسياسة وما تموتنيش بحسرتي عليك ...

--------

بتيهيألي من الناحية العاطفية أنا هاعمل كده برضوا مع عمر إبني ... قلب الأب بقى اللي بيخاف على ولاده من الهوا الطاير ..

لكن لو عمل كده من ورايا .. هابقى فرحان بيه طبعاً وفخور إن إبني إنسان عاقل يفكر ويرفض الظلم وله دور في بلده ...

وممكن أروح أشد له محامي ولو إن قانون الطواريء لا فيه محامين ولا دياوله والدولة عندها سكة واحده وان واي

لكن لازم في حل .. ولازم حد يضحي .. والحد ده ما يبقاش هو إبن البطة السودا اللي مش محتاجينه وممكن نشجعه وندعمه وندفعه للأمام - نديله شلوت يعني -

فيوم ما الحد ده ما يبقاش مميز ويكون كل واحد فينا

ساعتها هاينصلح حالنا ومش هاننضرب على قفانا

[جويرية]

ليه ناس مكتوب عليها تروح ورا الشمس وتتنفخ وقفاها يبقى عامل زي الأخ اللي سحلوه عشان دعوته للإضراب عالفيس بوك او البت الجدعة إسراء اللي نفخوها وسجنوها وأفرجوا عنها وراحوا خطفينها تاني ويا عالم حصل فيها إيه عندهم او عبد الحليم قنديل

فيه شهيد وفيه ميت فطيس

الشهيد ده عمل حاجة لكن التاني ضيع نفسه علي الفاضي

عايزين نظام صح من الأول من الألف للياء

لكن أجي في الوضع الحالي

و أقول لأ كدة غلط كدة ميصحش

حتوقع ايه يعني اللي حيحصل

[قائد المدفعيه الهولنديه]

الموضوع بصراحه ان الواحد لازم يضحى علشان افكاره بس فى بعض الاوقات افكارك هتكون ضد مصلحتك الشخصيه يبقى لازم تمشى مع التيار علشان تقدر تعيش فى ظل الظروف الحاليه للبلد .......و بالنسبه للعدد الكبير اللى اختار اول اختيار دى ناس غير واقعيه من وجهه نظرى...... و صاروخ تحيه من المدفعيه الهولنديه بقياده العبد لله لكل المشاركين

[أبو محمد]

هذا الاستفتاء أثار عندى ذكرى عدة تساؤلات طالما استغرقت فى محاولة الإجابة عليها .. سأضعها كما هى دون محاولة الإجابة ... ليت كل من يقرأها يفكر فيها .. وإذا توصل لإجابة .. فهو حر .. فى أن يخفيها أو يبديها :

ماهو الفرق بين الشجاعة والتهور ؟

ماهو الفرق بين حرية الفكر وحرية التعبير ؟

ماهو الفرق بين الحرية والفوضى ؟

ماهو الفرق بين الصراحة ، والوقاحة ؟

ماهو الفرق بين الوضوح ، والضجيج ؟

ماهو الفرق بين الصلابة والعناد ؟

ماهو الفرق بين حب الخير ، وحب الظهور ؟

ماهو الفرق بين ظاهرة العمل الجماعى وظاهرة القطيع ؟

ماهو الفرق بين النصيحة والفضيحة ؟

ماهو الفرق بين الحزم والاستبداد ؟

ماهو الفرق بين الخطأ الشريف والخطأ المتعمد ؟

[se_ Elsyed]

يا نهار يا نهار

يا عم ابو محمد ده أحنا على ما نعرف التعريفات دي ونفنطها يكون جمال مبارك نط عالكرسي وحكمنا ومات كمان وجه إبنه هيثم اخد له ييجي 30 سنة هو كمان وإحنا لسه قاعدين في قاعدة الرجالة بتاعت البيضة ولا الفرخه

[Muhammad Zidan]

لا هي فنجرة بؤ ولا فتح صدر

اخترت الخياريه الاولانية

وده لإيماني الشديد بالأية التي تقول " قل لن يُصيبنا إلا ما كتب الله لنا "

مصدقك والله يا س س يا أخويا

بس مين يقول إن أفكاري صح ... ..... غيري

مين يقيم أفكاري ... وزي ما أنا ليا أفكاري ومعتقداتي غيري برضه ليه

بس مين يقول إن أفكاري صحيحة 100% وتستحق أن أضحي من أجلها

السادات استشهد عشان أفكاره ومعتقداته .... وأبو جهل مات كافر عشان معتقداته وأفكاره

لازم يكون في مرجعية للتقييم

وخصوصاً في الأراء السياسية أو التي تخص البلد بشكل عام

وكما وضحت من قبل إن هناك تساؤل يؤرقني ومالقتلوش إجابة بصراحة ولا لقيت تفسير عند حد حتى الان وهو :

" ليه ناس مكتوب عليها تروح ورا الشمس وتتنفخ وقفاها يبقى عامل زي الأخ اللي سحلوه عشان دعوته للإضراب عالفيس بوك او البت الجدعة إسراء اللي نفخوها وسجنوها وأفرجوا عنها وراحوا خطفينها تاني ويا عالم حصل فيها إيه عندهم او عبد الحليم قنديل اللي على رغم إختلافي مع فكره الناصري إلا إن توجهاته المصرية الخالصة في السنوات الأخيرة عرضته لإن زبانية الامن يخطفوه من قدام بيته ويرموه في صحراء المعادي بعد ما قلعوه سالبوته - ملط يا أستاذ شريف .. ملططططططططططط - وأخدوا نضارته اللي ما بيشوف من غيرها متر قدام ...

وخد كتير بقى من زمان الآلاف اللي ضحوا بحياتهم عشان أفكارهم ..

طب إشمعنى دول ؟

أكيد اللي له ظهر ما يمضربش على بطنه ولا قفاه ولا يقلعوه نظارته ولا هدومه ولا يبقى ملط

وإشمعنى الـ 99 % الباقيين مآنتخين و كتيرهم بيبقى كلام وفتح مطاوي عالفاضي وهما قاعدين في حته ناشفه ومنتظرين المهدي المنتظر ياتي ليُخلصهم - ده فين ناس ما بتتكلمش أساساً وبتاخد على قفاها وتسكت ودول مصيبة سودا- ... وأهو لو المهدي خلصهم يبقى الخير هايعم عالكل ... ولو فشل يبقى هايتنفخ لوحده وأهو اخد جزاءه وأهم لسه قاعدين في الناشف والحمد لله حصل خير .

نص الـ 99% دول ليهم ظهر .. وظهر جامد كمان .... والنص التاني مرعوب وخايف على ولاده وعاوز يمشي جوه الحيط مش جنب الحيط .... ومستنيين المهد المنتظر

آه مش كل الناس مؤهله للقيادة ...

ما حدش قالك قود ولا سوق يا سيدي وإبقى زعيم .. لكن خليك تحت لواء القائد على الأقل وأسند ضهره

ده أنت لا بتعمل ده ولا ده ومنتظر السماء تُسقط عليك ذهباً وفضه وإنت مآنتخ يا معلم ...

ونرجع نقول الأحوال ما بتتصلحش ليه وربنا غضبان علينا ليه

طيب قوللي انت مين هو القائد الواجب اتباعه؟؟

الإخوان !!!!

أيمن نور ؟!

إسراء عبد الفتاح ؟!!

واللا مرتضى منصور!!!؟؟؟

أي نعم اللي إيده في الميه مش زي اللي إيده في النار

ومهما الواحد إتكلم وقال في حكم ومواعظ .. اقسم بالله هذا لن يقارن بساعة واحده الواحد يعيشها وهو مهدد في حياته وبيته وأكل عيشه وفي صحته ... ما هو النفخ ده بيأثر عالصحة برضوا

لكن ومع الإحترام لكل تلك الإعتبارات .... لو فضلنا طول عمرنا نفكر فيها ... يبقى هانفضل كما كنت ... بل بالعكس ده حتى الكما كنت دي مش لاقيينها وبقينا بنعمل للخلف در وبالخطوة السريعة كمان

يالله عييييشوا مع الإستفتاء

وكل سنة وإحنا طيبين

إنت قولت بنفسك اللي إيده في الميه مش زي اللي إيده في النار

يعني اللي عايش في السعودية مش زي اللي ساكن جنب مديرية أمن اسكندرية

ومع ذلك اخترت الخيارية الأولانية

[Alshiekh]

بعد قراءة المداخلات ، واضح ان الموضوع ليس الايمان برأى او فكر او معتقد والدفاع عنه.

لان لو الموضوع اقتصر على رأى او عقيدة ، او فكر معين ، فثق انه لن يتعرض لك احد طالما لم تضر الاخرين.

لكن لو كان السؤال هو ،

هل انت مستعد ان تمون شهيد فى سبيل ان تعض اصبع صاحب كرسى من الكراسى المحرمة؟

او هل انت مشتعد ان تتحمل العذاب فى سبيل قضمة من كعكة النظام؟

أو هل انت مستعد ان تضحى بكل شيئ فى سبيل كرسى صغنون من الكراسى اياها؟

أو هل انت مستعد ان تفضحهم على الملأ؟ ماتسألنيش مين دول اللى حاتفضحهم ، لانى ماعرفهمش وماشوفتهموش ، ماقابلتهومش.

اللى حصل على الـ فيس بووك ، لم يكن رأى شخص أو أشخاص لهم فكر جديد وراح او راحوا ضحية له ، بل كان رأينا جميعا رأى الشعب بأكمله ، وقام شخص او اشخاص باعلانه على وسائل المديا ،

علشان كده انا لم اصوت لان الخيارات لم تحقق التغطية الكافية لتعدد الاجابات، و لانى فعلا لى رأى ولكننى فى النهاية ارضخ لرأى الاغلبية لو خالف رأيى الا فيما يتعلق بالعقيدة الدينية ، فلن اتكلم عنها لانها بين العبد وربه ، يظهرها لو لم يتعرض للاذى ويخفيها لو تعرض لاذى وقد يظهر عكسها وسيطبق عليه حكم المضطر .

[se_ Elsyed]

مش عارف فهمت من كلامك يا عم محمد إن أصحاب الرأي دول بيدوروا على كراسي ..

وهذا غير صحيح ..

ناس كتير جداً لا لها في الكراسي ولا الشِلت

وكل همهم هو مصر فقط ...

لان لو الموضوع اقتصر على رأى او عقيدة ، او فكر معين ، فثق انه لن يتعرض لك احد طالما لم تضر الاخرين

إيه يا عم محمد .. في إيه ؟

ده انا باتكلم عن مصر يا عم والناس اللي راحت بيوند ذا صن .. ما كانش حيلتها إلا الرأي والعقيدة ...

أما ردي على أخي محمد زيدان ... فمرجعية أراءك خصوصاً السياسية هو الوضع اللي إنت شايفه وعايشه واللي واضح وضوح الشمس ومش محتاج تشكيك .. وبعدين يا زيدان ما هو الناس اللي قالوا رأيهم كانوا ساكنين جنب المديرية والمسافة والبعد والقرب ليس معياراً لتمسك الشخص برأيه .

[عادل أبوزيد]

إخترت الخيار الأول لكن الحقيقة أن إبليس نفسه غير قادر على محاكاة آلة الإعلام الجهنمية التى ستقول عن أنى قواد أو تاجر مخدرات و أن هذا هو سبب سحلى و أننى عميل كردستانى إلى آخر قائمة الإتهامات التى وجهت ل إسراء عبدالفتاح أو ل أيمن نور أو ل إبراهيم عيسى.

ما سبق كان إستهلالا لابد منه

و ماذا بعد ؟ سيظهر على الساحة بطل ما ذو عقلية تنظيمية تفوق عقلية سعد زغلول سيكون حوله فريق عمل يعرف تماما كل آليات العصر فريق عمل له صلات بالعمال الذين يهتفون الآن لنسبة الخمسين فى المائة للعمال و الفلاحين و له صلات بالطلاب و صلات بالموظفين و صلات برجال الأمن.....

سيتم التغيير الكامل بين يوم و ليلة

أما المثقفين أمثالى و أمثالكم فأكيد عندهم أسباب منطقية ووجيهة من أجل البقاء فى الظل بجوار الماء البارد على مر التاريخ لم يقم المثقفون بثورة أو تغيير إلا و هم فى حماية الطبقات الكادحة.

[se_ Elsyed]

و ماذا بعد ؟ سيظهر على الساحة بطل ما ذو عقلية تنظيمية تفوق عقلية سعد زغلول سيكون حوله فريق عمل يعرف تماما كل آليات العصر فريق عمل له صلات بالعمال الذين يهتفون الآن لنسبة الخمسين فى المائة للعمال و الفلاحين و له صلات بالطلاب و صلات بالموظفين و صلات برجال الأمن.....

سيتم التغيير الكامل بين يوم و ليلة

أما المثقفين أمثالى و أمثالكم فأكيد عندهم أسباب منطقية ووجيهة من أجل البقاء فى الظل بجوار الماء البارد على مر التاريخ لم يقم المثقفون بثورة أو تغيير إلا و هم فى حماية الطبقات الكادحة.

ما هو ده اللي أنا باتكلم عليه من الصبح وعمال أخبط راسي في الحيط :rolleyes:

حضرتك هنا يا عادل بك قسمت الناس إلى طبقة مثقفين اللي المفرض إحنا منهم واللي بيهمهم مصلحة بلادهم ومشغوين بهمومها

ومعسكر أخر فيه ناس ذوي عقول تنظيمية هما اللي بيقودوا وبيبقوا في الامام

طب ليه ما يبقاش من المثقفين واحد زي ده وبالتالي لا يجلسوا الدهر ينتظرونه لكي يتحركوا ؟ ...

وليه المثقفين يبقى دورهم الكلام وبس ... وأخونا بتاع العقلية التنظيمية يبقى هو في وش المدفع و هو اللي لا وراه عيال ولا اكل عيش وعايش على طول في المعتقلات ، والمثقفين اللي كانوا شايلينه على أكتفاهم في المظاهرة جريوا وسابوه وبيدوروا على غيره عشان يشيلوه ؟

ما أقصده هنا هو ..... التحرك في كتله واحدة .. أي نعم تحت لواء القيادة التنظيمية ... لكن لازم الجميع يبقى على إستعداد يضحي ... مش ناس شغلانتها إنها تهتف وتسقف وتروح أخر اليوم على بيوتها .. وناس تانية بتقود وتتسحل وتتشرد وتتنفخ في المعتقلات ...

وأظن يعني إن أعتى ديكتاتويات العالم لن تستطيع أن تقف في وجع شعب بأكلمه

وأظن إننا كلنا عاصرنا عصر شاوشسكو الظالم القاتل في رومانيا وكيف إن لما الشعب إتنفض أمر دباباته إنها تدوس عليهم وما كانتش العربيات المحملة بالنعوش قادرة تسد على كمية الطلبات اللي موجودة نتيجة قتل الألاف بدم بارد - مش قادر أنسى المنظر ده عندما شاهدته بالتليفزيون - .. لكن الناس ولا همها ووقفوا في وجه الدبابات لحد ما سقط الطاغية وتم إعدامه وانتقل الحكم للشعب ...

ده اللي عايز اوصل له ..

إن لما حاجات تحصل زي كده .. مش الكل ياخد بعضه وديله في سنانه ويقول يا حيطه داريني ... لإن هو ده اللي الامن عايزه وهو ده اللي عملوه في المحلة ... واللي لما تسمع من المحلاوية البسطاء أنفسهم تستعجب وتشك إن هذه الحكومة وسلاحها البطاش المتمثل في الشرطة إنهم من الشعب المصري ومن تراب هذا البلد .

[عادل أبوزيد]

فى السبعينيات و فى أحد برامج الحوار الإذاعية تم سؤال سائق ميكروباص من تفضل من المطربين و المطربات فأجاب بتلقائية و بثقة أم كلثوم ...... و المفاجأة أن كان يدير شريط لأحمد عدوية.

فى حالتنا هنا الجميع يود أن يكون صادقا و يضع الخيار الأول و لكن الواقع كم منا يتحمل آليات الإستجواب و آليات التلويث الإعلامى.

مقاومة آليات الإستجواب و آليات التلويث الإعلامى تتطلب أن تكون جزءا من حركة شعبية قادرة على رد غيبتك و قادرة على أن تقف بجانبك و تدعم صلابتك.

فى نفس سياق هذا الموضوع هناك موضوع فى باب السياسة يتسائل هل هناك حركة سياسية خلف إضراب السادس من أبريل.

http://www.egyptiantalks.org/invb/index.php?showtopic=57512

[se_ Elsyed]

للرفع ...

يمكن يفيدنا

ولحاجة في نفس يعقوب

و

بس

[الغريب]

للرفع ...

يمكن يفيدنا

ولحاجة في نفس يعقوب

و

بس

يبقى شكلك جالك أستدعى :lol:

على العموم أنت متعرفناش ها ، ربنا يكرمك عاوزين نربي العيال :lol:

[se_ Elsyed]

للرفع ...

يمكن يفيدنا

ولحاجة في نفس يعقوب

و

بس

يبقى شكلك جالك أستدعى :lol:

على العموم أنت متعرفناش ها ، ربنا يكرمك عاوزين نربي العيال :lol:

حاجه زي كده يا غريب

لكن تفتكر الواحد لو مش قد كلمته ... كان أتكلمها ليه من الاول ؟

وتفتكر اللي مش قد مسئولية الكلمة .. يبقى هل من حقه إنه يتكلم عن تغيير وتطوير وتحسين ؟ ولا يخليه في حاله ويعيش ياكل ويشرب زي اللي بيعيشوا ؟

ومازال السؤال يطرح نفسه ....

إنت مستعد تتحمل نتيجة كلامك ؟

ولا تعيش زي اللي عايشين وماشي جنب الحيط ؟

[se_ Elsyed]

اختنا الصغيرة لماضه سألت سؤال كده في موضوع العنوسة اللي بأسن سناني دلوقت عشان أدخل أرد على شيكو واللي منعني اليومين اللي فاتوا دول كانت التطورات اللي حصلت في برمجيات المنتدى لكن أنا مرقد لها وهارد يعني هارد

لماضه قالت : إيه الـ Minimum requirements اللي لازم نوفره أو نعلمه لأولادنا ؟

تفتكروا حرية التعبير ... مش ضمن الحاجات دي ؟

والاهم من حرية التعبير بقى ... أصل الحرية سهله .. ما اسهل إني أقف في ميدان التحرير اتكلم وأزعق وممكن اشتم .... الاهم من ذلك .. هل إحنا بنعلم أولدانا إنهم يبقوا مسئولين عن تعبيرهم عن انفسهم وبالتالي ممكن يدفعوا ثمن إحساسهم بالحرية دي ؟