والله العظيم حرام ... الثانوية العامية تاني

[se_ Elsyed]

أقسم بالله دول لو شويه كفتجية قاعدين في معلم عمالين يعملوا تجارب لولبية على فيران .. ما كانوش عملوا كده .. لإن الكفتجية محترمين أكتر منهم

شوف معايا نظام الثانوية العامية الجديدة ( إرجع كما كنت وزي ما كنا زمان )

يفتتح اليوم الرئيس حسني مبارك مؤتمر تطوير التعليم الثانوي وسياسات القبول بالجامعات..يؤكد الرئيس أهمية وجود تعليم متطور يواكب العصر في كل مراحله بما يساهم في تخريج أجيال تستطيع المنافسة محلياً وعربياً ودولياً..يتقدم د.يسري الجمل وزير التربية والتعليم بورقة عمل إلي المؤتمر كان قد أعدها عدد من الخبراء والمسئولين بالوزارة.

تتضمن ورقة العمل: العودة للنظام القديم للثانوية العامة بأن تكون سنة واحدة بدلاً من عامين مع تطبيق نظام التقويم الشامل بها ويبدأ تنفيذ ذلك علي طلاب الصف الأول الثانوي للعام الدراسي 2010-2011 لتكون أول ثانوية عامة بهذا النظام 2012-2013. وذلك لتخفيف العبء ورفع الضغوط النفسية عن الأسرة..كما تتضمن ورقة العمل: مد صلاحية شهادة الثانوية العامة أو الفنية لمدة لا تقل عن ثلاث سنوات للالتحاق بالجامعات وليس سنة واحدة مع استحداث كليات تكنولوجية جديدة تلبي احتياجات سوق العمل..ويؤكد د.الجمل علي ضرورة وجود مواد دراسية مشتركة بين الدارسين في التعليم الفني والعام.

أكد د.هاني هلال وزير التعليم العالي والدولة للبحث العلمي أنه تم الإعداد جيداً لهذا المؤتمر بالتعاون مع د.يسري الجمل وزير التربية والتعليم من خلال عدة جلسات استماع مما يوضح أن قرارات المؤتمر سوف تعبر عن جميع الآراء لأنها تستهدف مستقبل التعليم في مصر.

[capitshino]

يا سى السيد الحكومة مش لاقية حاجة تعملها فبيتسلو بالشعب زى ما القطة بتتسلى بالفار قبل ما تاكله

[زهرة الجبل]

أخي الفاضل سي السيد

ممكن سؤال... يعني إيه الجزء ده ؟

مد صلاحية شهادة الثانوية العامة أو الفنية لمدة لا تقل عن ثلاث سنوات للالتحاق بالجامعات وليس سنة واحدة

هو كان ممكن واحد ياخد الثانويه العامه و ياخد سنه أجازه منغير جامعه؟

يعني دلوقت كمان ممكن ياخدو ثلاث سنوات بدون جامعه و بدون دراسه خالص؟

طيب لو اللي أنا فهمته سليم ... إيه الفايده اللي ممكن تتحقق من قرار زي ده؟

و بالنسبه لأصل الموضوع اللي هو الثانويه العامه تكون سنه واحده ...

فبصراحه هو فعلاً تحس من كثرة التغييرات ان القائمين على القرار مش عارفين هم بيعملوا إيه

إفتكرت دلوقت البنت الصغيره اللي كانت بتغني في فيلم (( مش فاكره إسمه )) و بتقول:

شالوا سنه ساتته .. جابو سنه ساتته .. عالم رايقه و فاااااضيه

لكن يمكن المره دي القرار فعلاً لصالح الأسر و هيخفف الضغط شويه عن العائلات و عن الطلبه

الثانويه العامه كانت بتبقى وصله وحده بدون إنقطاع بدايتها آخر يوم في إمتحانات أولى ثانوي و نهايتها آخر يوم في إمتحانات ثالثه ثانوي

حتى الأجازه اللي بين تانيه و تالته كانت بتبقى حرب دروس خصوصيه .... كانت فترة هلاااااك

بس يا رب مايرجعوش في كلامهم تاني و يطلعوا بنظام جديد

تحياتي

[metwallly]

شالو ألدو جابوا شاهين قالوا خلاص منتش لاعبين

:ninja: :blink: :hi:

المرة رجوع لنظام الثانوية القديم

:rolleyes:

المرة الجاية هيلغوا مجانية الجامعات

المرة اللى بهعدها مجانية بقية التعليم

وهو ده التطور الطبيعى للحاجة الساقعة

:wub: :wub: :wub:

[عادل أبوزيد]

الثانوية العامة هى مأساة كل أسرة فى مصر حتى لو كان الأبناء لم يصلوا إلى سن المدرسة بعد.

ما سبق كان إستهلالا لابد منه

الجديد فى الخبر الذى أوردته هو مد صلاحية الشهادة ثلاث سنوات و هذا وحده ليس حلا شاملا و لكنه مجرد حل جزئى ، تكلم الكثيرون عن الثانوية العامة منذ أوائل الستينيات عندما بدأ إختزال العملية التعليمية فى المجموع.

صحيح فى الخمسينيات و الستينيات كان من ضمن البرنامج الدراسى مواد مثل الفلاحة و الصناعات الغذائية و الأشغال اليدوية ... بل إنى أذكر أنى تعلمت أساسيات صناعة الطباعة و تقريبا حفظت ترتيب صندوق الحروف الرصاصية سنة 1958 فى مدرسة المنيا الثانوية كجزء من مادة الهوايات ، و تعلمت طريقة ترتيب و تصنيف الكتب المعروفة بطريقة ديوى و التى تعتبر جزء هام من علم المكتبات و أنا طالب فى سنة أولى ثانوى فى النشاط الحر فى مدرسة حلوان الثانوية بنين سنة 1956 .

ما سبق كان جزء من التعليم الإختيارى الذى كنا نبذل فيه الجهد طواعية.

إختزال العملية التعليمية كلها فى المجموع أوجدت نوع من التلاميذ الذين يحفظون أكرر يحفظون فقط و لا يستوعبون المقرر الدراسى بالكامل من أول بسم الله الرحمن الرحيم حتى تم بحمد الله فى يوم كذا كذا و هذه ليست صورة كايكاتورية و لكنها صورة حقيقية رأيتها بنفسى .......

رأيت تلميذة تعرف صورة ورقة القطن و لاتعرف أن القطن يزرع بل ربما لا تعرف ما هو القطن أساسا.

هل هناك أمل فى يرفض الآباء أو بعض الآباء المشاركة فى سباق المجموع و يبحثون عن قيمة حقيقية للتعليم.

المطلوب أن تتغير ثقافة المجتمع ككل .... أكون سعيدا لو تم القبول فى الجامعات بإختبار خاص و لتذهب إلى الجحيم كل الشكوك فى أمانة القائمين على تلك الإختبارات.

[om marawan]

القرار الجديد يمكن يخفف بعض العب عن الاباء اللى بيشوفوا الويل والدروس الخصوصية سنتين متوالييتن

والحقيقة ان ماساة التحسين فى كل مادة هى ايضا احدى كوراث النظام القديم او الجديد .......... حاجة تلخبط

لأنها فتحت مجال لأرقام غريبة فى الدرجات لا علاقة لها بمستوى الطلبة

ولكن فعلا المشكلة الحقيقية هى فى التجارب الفذة اللى بتجرى بدون اى دراسة او اساس او علاقة بالتعليم من اى صلة قريبة او بعيدة

التعليم فى مصر مش مشكلته الثانوية العامة سنة ولا سنتين ارجو ان يفيق القائمين بالتعليم على كارثة الحفظ والتلقين وعدم فهم اى حااااااااااااجة فى أسلوب التعليم الغير تعليمى

سمعت مؤخرا أن سياية التعليم فى سلطنة عمان اتغيرت فى الفترة السابقة واصبح الاهتمام بمستوى المدارس والمناهج مختلف عن الاساليب المعتادة .. هل ده صحيح لأنه لو صحيح فترقبوا جيل مختلف ودولة متقدمة لأجيال قادمة

عقبالنا ياااااااااااااااااااااارب

[حلواني]

انا عوز افهم حاجه فيها ايه لو اخدنا نظام تعليمي متكامل من احدي الدول المتقدمه علميا اليابان او المانيا او انجلترا مثلا كنظام متكامل من الروضه الي الثانويه العامه يعني نحط المناهج بتاعتنا بعد تعديلها وتطويرها حتي تتوافق مع اي نظام نختاره كوحده واحده مش من كل فيلم اغنيه يعني ناخد طريقه اعداد المنهج وطرق التدريس والانشطه المصاحبه وطرق التقويم وطريقه احتساب المجموع ونظام القبول في انواع التعليم المختلفه ونظاف القبول في الجامعات كله من مكان واحد حتي لو من الهند

[alex fox]

نشرة الساعة التاسعة من القناة المحلية التلاتين...

أعلن السيد :أحمد محمد حسن على رامى يسرى الجمل وزير التعليم (لأنه خلاص على أيامه هايكونو لغو التربية) قراره التاريخى بحصر الثانوية العامة فى سنة أولى ثانوى فقط مع أستمرار الطلبة فى دراسة سنة تانية وتالتة بعد ما يخلصو سنة أولى(لييييه ...ماعرفش) ...وقد صرح سيادته بأن هذا القرار نابع من (قلبه الأسود) وحرصه على تعقيد وتشويه نفسية طلبة الثانوية العامة وحرصه على خراب بيت أولياء أمور الطلبة (واللى مش عاجبه ) ...

القاهرة 31 فبراير 2250م

ولا عزاء للناس الوحشين ...

وصوتى ياللى أنت مش دريانة ب(مستقبل طلبة الثانوية العامة :rolleyes: )

[om marawan]

انا عوز افهم حاجه فيها ايه لو اخدنا نظام تعليمي متكامل من احدي الدول المتقدمه علميا اليابان او المانيا او انجلترا مثلا كنظام متكامل من الروضه الي الثانويه العامه يعني نحط المناهج بتاعتنا بعد تعديلها وتطويرها حتي تتوافق مع اي نظام نختاره كوحده واحده مش من كل فيلم اغنيه يعني ناخد طريقه اعداد المنهج وطرق التدريس والانشطه المصاحبه وطرق التقويم وطريقه احتساب المجموع ونظام القبول في انواع التعليم المختلفه ونظاف القبول في الجامعات كله من مكان واحد حتي لو من الهند

أولا دى فرصة أرحب بحضرتك فى المحاورات ودايما تشرفنا باراءك

تانى حاجة والله الموضوع ده فعلا جننى فترة ... ليه ماناخدش نظام متكامل زى ما حضرتك قلت

واكتشفت الاجابة وانا فى الكلية ......... لأن حضرتك الدكتور اللى بيدرس حاجات ماعدش لها علاقة بالتطورات الجديدة فى المادة مش فاضى يذاكر تانى ويفتح كتاب يضيف منه معلومة او حتى يحذف معلومة

وبالقياس ده نفس حال التعليم لأن عشان اغير نظام محتاج اغير هيئة تعليمية كاملة

أنا أحترم التدريس جدا والمدرسين اكثرهم أفاضل ووالدتى مدرسة بس من الزمن الجميل .... تخيل حضرتك والدتى كانت بتدرس فى مدرسة حكومة فى منطقة بسيطة وشعبية شوية يعنى لكن من ضمن النشاط اللى كانت بتعمله فى حصة العلوم انها جابت للطلبة ضفدعة مخصوص فى درس البرمائيات مع ان كل الطلبة فى المكان ده عارفين كويس أوى يعنى ايه ضفدع !!!!!!!

طب حضرتك هتصدق انى كنت باشوف كراسات تلامذة فى سنة رابعة مش عارفين يكتبوا حتى اسمهم على الدفتر !!!!!!!!! طبعا دول عدوا السنين اللى فاتت عشان المدرسة ترفع نسبة النجاح ومايكونش شكل الادارة التعليمية وحش

أعتقد ان الموضوع محتاج نظرة جديدة على حاجات كتير منها واهمها كلية التربية ومستوى المدرسين المتخرجين منها وحبهم للتدريس واتمامهم ان الطلبة تفهم اصلا

ويمكن بعد كده نقدر نطور نظام التعليم والمناهج

[Sherief AbdelWahab]

تتضمن ورقة العمل: العودة للنظام القديم للثانوية العامة بأن تكون سنة واحدة بدلاً من عامين مع تطبيق نظام التقويم الشامل بها ويبدأ تنفيذ ذلك علي طلاب الصف الأول الثانوي للعام الدراسي 2010-2011 لتكون أول ثانوية عامة بهذا النظام 2012-2013

وطبعاً حننزل جلبرتو ورا الاتنين روس الحربة ونجيب فلافيو باك شمال.. :unsure:

هل "التطوير" اللي بقالنا عقود بنسمع عنه بيتم في "ظل" توجيهات الرئيس أم "بـ" توجيهات الرئيس؟ يعني فجأة كنا مشغولين بحاجة وبعد كدة قلنا يااااااااااااااااه نسينا تطوير التعليم فنقوم نطوره ولا الموضوع فيه حاجة تانية؟

صياغات الخبر نفسها في وسائل الإعلام حاجة تكسف..

التطوير بييجي بخطوات على الأرض ، مش بالحنجرة وكتر الكلام اللي بيعزهم البيه الوزير أكثر من ولاده..

التطوير مبيجيش بتوجيهات وواسعة قوي بصراحة إنه يبقى جزء من برنامج انتخاب رئيس.. التطوير عملية مستمرة لازم تستمر بتغير النظم والوزراء (بما إن مفيش عقل يقبل إن نظام يعوز تعليمه يبقى متخلف عن عمد) .. مش لما يمشي وزير تلاقي التاني هادد المعبد ع اللي فيه..

خلص الكلام

[om marawan]

(بما إن مفيش عقل يقبل إن نظام يعوز تعليمه يبقى متخلف عن عمد) .. مش لما يمشي وزير تلاقي التاني هادد المعبد ع اللي فيه..

ايواااااااااااااا حضرتك يا استاذى الفاضل جيت لمربط الفرس هل فعلا النظام عاوز التعليم متاخر عن عمد ولا لأ ؟؟؟؟؟؟؟؟؟؟؟؟ وايه سر التغييرات الغير مدروسة المتكررة دى ؟؟؟؟

[حلواني]

الاخت الفاضله ام مروان

اولا اشكرك علي الترحيب

ثانيا الشرف ليا

ثالثا لو نرجع لموضوع التطوير الخاص بالتعليم بيتم حسب المزاجيه ووجهات النظر الشخصيه وكل مسئول يجي يقعد علي الكرسي يفكر يترك بصمه مش مشكله البصمه دي هايكون تاثيها سلبي وها ثؤثر علي كام مليون تلميذ وطالب ومعلم مش مهم المهم ان الريس يقول انه شغال وبيعمل تطوير علشان يستمر في المنصب اطول فتره ممكنه لكن لو وضع نظام ثابت ويتم تطوير المناهج بما يستجد من مفاهيم جديده وعلوم ومبتكرات ولازم يكون النظام بيسمح بالتطوير مش كل واحد يمسح اللي قبله كما قال الاخ شريف ويبني من الاول وقبل لن يكتمل البناء بكتشف فيه اخطاء ونعدل ونرمم وزود ويطلق في الاخر مسخ مش نظام تعليمي ونهد من الاول وهكذا من ايام مينا موحد القطرين

اما المعلمين وكيفيه اعداد المعلم ومن يستحق هذا الشرف ان يكون معلم ومسوي المعلم المادي فحدث ولا حرج

واذا كانت المدخلات

معلم فاشل او محبط

منهج لايرتبط بالواقع ومتخلف

نظام تقويم ظالم وفاشل

طالب بفتقد اي دافع للتعلم

بيئه مدرسيه غير صالحه لا وسائل تعليميه لا مختبرات لاكراسي لا غرف للمعلمين لاولا ولا

هاتكون النتيجه طبعا لاتعليم

للحديث بقيه

تم تعديل 12 مايو 2008 بواسطة حلواني

[se_ Elsyed]

طلع يابني الاكلشيهات اللي شايلينها في الدرج من ايام محمد علي باشا عشان نرد على تلك الفئة الموتورة المأجورة من طلبة الثانوية العامة

ماذا حدث بإختبار التفاضل والتكامل أمس ؟

دموع و«انهيارات» في التفاضل والتكامل.. والامتحان «غريب وصادم وغير مألوف»

كتب هشام شوقي ١١/٦/٢٠٠٨

تصوير- أسامه عبدالنبي

دموع الأم وانهيار الابنة بسبب «صدمة» امتحان التفاضل والتكامل «التعجيزي» أمس

في اليوم الرابع لماراثون الثانوية العامة، محت دموع طلاب امتحان التفاضل والتكامل ابتسامات الطلاب خلال الأيام الثلاثة الماضية، التي أدي فيها الطلاب خمسة امتحانات، حيث شكا بعض طلاب المرحلة الثانية، الذين أدوا الامتحان صباح أمس من صعوبة الامتحان، في الوقت الذي أكد فيه تقرير لجنة تقييم الورقة الامتحانية أنه جاء في مستوي الطالب المتوسط، بحيث يستطيع الإجابة عن ٧٠% من أسئلته.

ووصف بعض الطلاب الامتحان بأنه «تعجيزي»، مشيرين إلي أن أفكار التمارين كانت «غريبة»، بالرغم من أنه لم يخرج عن المنهج.

وأكدوا صعوبة السؤال الإجباري، معتبرين أنه كان موجهًا للطالب الممتاز، فيما جاءت العديد من الجزئيات غير مألوفة - حسب الطلاب - مثل الجزئية (أ)، والسؤال ثانيا «بالكامل».

وقالوا «هذا الامتحان صادم وغير مألوف، ولا يستطيع الطالب المتميز الإجابة عنه خلال ٣ ساعات وليس ساعتين»، فيما أكد بعض الطلاب أن الأسئلة لا يوجد مشابه لها بالنماذج، وشهدت لجان الامتحانات انهيار الطلبة وموجات من البكاء والصراخ بين الأبناء والآباء.

وفي المقابل، قال تقرير لجنة تقييم الورقة الامتحانية، الصادر عن الوزارة إن الطالب المتوسط يستطيع الإجابة عن ٧٠% من الأسئلة، وفوق المتوسط يجيب عن ٩٠%، والمتميز يجيب عن ١٠٠% من الأسئلة، وأن الزمن ساعتان، بواقع نصف ساعة لكل سؤال وهو كاف للإجابة والمراجعة.

وأضاف التقرير أن الورقة الامتحانية كانت خالية من الأخطاء العلمية والفنية والمطبعية، وكذلك التراجم للغات الإنجليزية والفرنسية، والألمانية، وجاء الامتحان مطابقًا لمواصفات الورقة الامتحانية ويقيس مستويات «التذكر - الفهم - التطبيق - حل المشكلات»، مؤكدًا أن الصيغ الرياضية للأسئلة كانت «خالية من التعقيد» وموجهة لجميع الطلاب، والأسئلة غطت جميع موضوعات المنهج الدراسي ومن محتوي الكتاب المدرسي.

وقال محمد الكرارتي، رئيس الإدارة المركزية للخدمات التربوية، إن امتحان التفاضل والتكامل يعد ضربة لمدرسي الدروس الخصوصية، من حيث السهولة، مؤكدًا أن نتيجة العينة العشوائية للغة العربية لم تنته بعد، ومن المحتمل أن تنتهي مساء اليوم ليعتمدها الوزير.

ولفت الكرارتي إلي أن تصحيح العينة العشوائية لمادة التفاضل والتكامل يبدأ يوم ٢٢ المقبل، بما يوازي ٥% من حجم الأوراق.

وأكد بيان صادر عن وزارة التربية والتعليم أن الدكتور يسري الجمل، وزير التربية والتعليم، تابع سير عمليات الامتحان من خلال غرفة العمليات والاتصال بالمحافظات للاطمئنان علي أن الطلاب أدوا الامتحان في جو مناسب، مشيرًا إلي أن الغرفة لم تتلق شكاوي أو إجراءات حتي صدور البيان في الساعة ١٢ من ظهر أمس.

فيما أشار البيان إلي تلقي الوزارة استفسارًا بشأن وجود عجز بين الملاحظين بلجنة مدرسة كميان فارس بالفيوم، وتم سد العجز، كما أنه تم استدعاء طالب بلجنة مدرسة النيل الابتدائية بالوراق الجيزة، ليقوم بتحرير الاستمارة، حيث إنه لم يأت في مواعيد امتحانات المواد الراسب فيها.

وأكد البيان أن الوزارة تلقت شكوي بوجود حالات غش في لجنتي القاهرة الجديدة التجريبية، ومدرسة ابن النفيس، وهما بشرق مدينة نصر، وتم إرسال لجان متابعة عاجلة للوقوف علي الحقيقة واتخاذ الإجراءات القانونية لاتخاذ القرار المناسب.

.

طبعاً العيب في الأخر هايطلع في الطلبة اللي ما بيعرفوش يحلوا !!!

أنا عايز أفهم وأعرف .... اللجنة المسئولة عن وضع تلك الإمتحانات ... بيكونوا قاعدين في حمام مثلاً وبالتالي بيعانوا ويألفوا ويخترعوا أسئلة تنُم عن المكان اللي قاعدين فيه ... وكذلك عن نفسياتهم المريضة وعن العُقد والكلاكيع اللي كانت عندهم وهما صغيرين لما ابو الواحد فيهم كان بيعلقوا في السقف لما يخطأ أو مامته اللي كانت بتسخن المعلقة على البوتاجاز لحد ما تحمر وتقوم كوياه في .... إيده - هانمشيها إيده المره دي يا معلم - وبالتالي بيطلع معقد وبيحلف بالطلاق إن في أول مناسبة هايطلع العُقد والكلاكيع دي على جتة العيال المجرمين بتوع الثانوية ويخليهم يلفوا حوالين نفسهم ؟

بالمناسبة ده حصل في شخصياً في دفعة الثانوية العامة سنة 99 وامتحان الفرنساوي لطلبه ما درسوش فرنساوي إلا لمدة 3 سنوات وبالكاد يعرفوا فيرب أتغ وأفواغ ويلاقي واحد يقوله في سؤال إجباري " تخيل نفسك حنطور في مدينة الأقصر وإحكي لنا شوفت إيه وعملت غيه " ولا تخيل نفسك ريشة طايرة في مهب الريح ...

وفي الأخر بعد ماهبلنا كلنا وحدثت إنهيارات أرضية ونفسية لدى الطلبة أثرت على باقي الإختبارات .. إذ نُفاجا بإن النتيجة طالعة شيء لا يُصدق ونسبة نجاح عالية جداً .. يعني اللي كتب إسمه على الورقة راحوا منجحينه ... وأنا عن نفسي كنت شاطر في الفرنساوي لكن مش لدرجة الحنطور - كنا ساعتها حانكور من الفرحه - لقيت نفسي جايب 36/40 ..... على العكس تماماص مادة اللغة الإنجليزية اللي كنت بأحل إمتحانها بصابع رجلي الصغير والحمد لله كنت متمكن منها ... ومش انا بس كان لي زمايلي معديين في اللغة دي ... نُفاجا إنهم قصونا ورصدوا لنا درجات زي الزفت على دماغهم ... وبعد ما كنت داخل إني أخد مركز على مستوى المنطقة التعليمية بتاعتي على الأقل وجميع المواد جايب فيها فوق الـ 95 % ... إذي بي أُفاجا إني جايب 42/60 في الإنجليزي ... يعني لو كان لي ديل وودانين كبار

ما كنتش جبت المجموعة ده

وبروضا في الجامعة حصل نفس الفصول البايخة في عدم إختبارات ولما الطلبه إنهاروا نجحونا فيها بتقديرات عاليه

ده كله عشان ما يطلعوش هما اللي غلطانين ...

[~Heba~]

لا اعتقد ان الامتحان كان صعب

الرياضيات عموما لا يجب ان الاسئلة بتاعتها تأتى مثل امثلة الكتاب حرف بحرف و امال يروح فين الابتكار و الابداع

محسوبتكم دخلت هندسة بالعافية بفرق 0.25% لكن كنت مقفلة فى الرياضيات 50 من 50 و اتذكر انى ساعتها حليت الامتحان كله حتى الاختيارى منه و الرياضيات ساعتها كانت 3 كتب

طلبة الايام دى بيدلعوا

[جويرية]

لازم امتحان او امتحانين ييجوا صعب عشان يظبطوا المجاميع شوية

لو كل الأمتحانات مش حقول سهلة لكن معقولة طيب حيجيبوا اماكن فين في الكليات

و بعدين الطلبة المصريين كلهم شطار من قبل ما تبدأ الثانوية العامة من الأجازة و هما بياخدوا دروس و بيصموا المناهج كويس

ظاهرة المجامعيع العالية مش موجودة في مكان تاني غير في مصر و اللي يضحك اكتر المجاميع اللي فوق ال 100 % ناس كتير بتجيب 105 % بعد اضافة المستوي الرفيع

لدرجة أن هما مش بيعرفوا يختاروا العشرة الأوائل علي مستوي الجمهورية يمكن 1000 ولا أكتر يكونوا اوائل

[se_ Elsyed]

جويرية ... هبه

مانتو لو عندكو قناة أوربت وبتتفرجوا على برنامج القاهرة اليوم ... كان فكركم اتغير

حضرتك يا فندم في اسئلة محطوطة غلط بشهادة مدرسين متخصصين ... يعني خطأ في تركيبة السؤال ...

الشيء الأخر الخزعبلي واللي عمرو أديب كشف عنه ووراه لنا أمبارح رؤية العين .. إن في الصفحة الرئيسية لموقع جريدة الجمهورية بتاعت النهاردة - الحكومية بالقوي - نشروا أخبار بتؤكد إن إمتحانات الثانوية هذا العام وخلال هذا الأسبوع بيتم تسريبها قبل الإمتحان بيوم ... طازه بطازه يعني ...

خدوا الحتة دي بقى

الإمتحانات بتتسرب من محافظة أسيوط بالذات ... والتقيلة بقى ... إن هناك مواقع كثيرة عالنت بتنشر الإمتحان بتاع بُكرة ومعاه الإجابات النموذجية .. والراجل تحفظ ولم ينشر أسامي هذه المواقع

بالمناسبة ... أكتشفت أنا شخصياُ إن المواقع الإلكترونية للجرايد عالنت بتقرطسنا ... اي والله .. بتقرطسنا

فالخبر لم يُنشر على موقع جريدة الجمهورية الإلكتروني اليوم ... ولكنه موجود في النسخة الحية الملموسة للجريدة وممكن حد دلوقت يشرب قهوته ويعصر على نفسه لمونه ويروح يضحي بجنيه وربع ويشتري الجرنان بتاع النهاردة يقرا الخبر ويقوم حارق الجرنان لإنه بيخلي منظر الإيد عامل زي إيد عمال مناجم الفحم بتاعت شمال بريطانيا ...

الخبر الأخر الأشد غرابة واللي يؤكد أنهيار المنظومة الإدارية في مصر من القمة إلى القاع ... إن الاخ الرئيس القائد حفظه الله وأبقاه لنا .... قام بالأمس بزيارة تفقدية لمدينة 6 أكتوبر عشان يسلم

الله يسلمه يارب

عشان يسلم - والله العظيم ما هاتصدقوا الرقم -

يسلم 14 شقة لـ 14 نفر من الشقق الإقتصادية التلاتين متر بتاعتهم اللي الواحد بيبقى نايم جوه بيته ورجله مدلدلة بره البلكونة ..

14 شقة ... يا نهار مش فايت ومواكب وتأمين موقع قبلها بعشر سنين وسارينات وطائرات حربية في الجو عشان 14 شقة ...

مش هي دي المُشكلة إن شالله يارب يطلعوه في التليفزيون عشان يسلم أوضة من غير صاله لواحد غلبان حتى

المشكلة إنه اختار إنه يروح 6 أكتوبر والعيال رايحه تمتحن ثانوية عامة ....

وكانت النتيجة إن العيال إتحبست في الطريق لحد الموكب ما يتأمن ويروح ....

ولإنه إنسان وأب وأبونا غصبٍ عن اللي جابونا ... فلقد أصدر القائد أوارمه إلى الدكتور أحمد طويل النظيف إنه يروح المدرسة دي بحراستة بعبله ويمد للعيال الإمتحان لمدة ساعة أخرة ...

تخيلوا ؟

يعني لا في مخابرات ولا ديوان رئيس الجمهورية ولا وزير تعليم يقول له سيادتك خلي الزيارة بعد الضهر او في أي يوم تاني غير أيام الإمتحان هي الشقق هاتحمض ولا العيال ساكنة في الشارع ومزنوقين قوي في الـ 14 شقة ظ

لكن نقول إيه ؟

معروف إن الشعب بالنسبة للريس ما يساويش جناح بعوضة وإن شالله ينحرق الكل بجاز ... أهم حاجه الريس يطلع في التلافزيون ويتصور وهو جنب الوزرا

[Handicraft]

الصدمة

امتحان التفاضل والتكامل والمآساة التى يعيشها جميع الطلاب وأولياء الأمور الآن ما هى الا رد فعل لدش بارد لواحد كا نايم من سنين وفاجأه أخد دش بارد ، الأمتحان ده بيمثل الصدمة التى سوف يأخذها خريجى المدارس والتعليم المصري عندما يلتحقون بسوق العمل وعندها سوف يصدمون ان ما تعلموا عليه لا يصلح الا لعملهم بائعين فى محل. وده حال بلدنا الآن وحال التعليم حاجه تكسف.

امتحاتن التفاضل والتكامل موجود اهو

وأدى الحل للي يحب يفرج على خيبة النظام التعليمى المصري بالصور

باقى الحل فى هذا الموقع

وادى تعليق البعض

"الامتحان افكاره جميلة جدا اخيرا امتحان فيه تفكير مش نمط بقالنا 20 سنة ماشيين عليه لحد ما الناس حفظت الرياضة من غير فهم للاسف

"

الإمتحان والحل منقول من منتدي الرياضات العربية

http://www.uaemath.com

وللأسف من الواضح اننا مشينا غلط كتير لحد ما صدقنا ان الناس هى اللى ماشية غلط ... اللى عايز يلحق ولاده ياخد باله التعليم ده مش حينفع يأكلهم عيش وكل واحد لازم يفتح مدرسه فى بيته

[se_ Elsyed]

الإبن العزيز هاندي ...

إنت عارف أخوك كان أدبي متأدب

إنت تقصد إيه .. أفصح آبن ... ماذا تريد أن تقول وما هي الماسج اللي عايز توصلها لنا ؟

[Handicraft]

التعليم بايظ والطلبة اخدت على الحفظ والمدرسين اخدوا على التسهيل وفى الآخر الخريجين حالهم ما يسرش واديك شايف اللى حاصل، يبقى لازم نفوق ، الأمتحان ده اللى حطه مدرس لسه فاهم يعني ايه تعليم وحدد هدف الإمتحان كالتالي:قياس قدرات الـ (حفظ - فهم - تطبيق -ابتكار) وكانت النتيجة قلم على فجأة مكانش حد متوقعه بعد هوجة التسهيل او الإسهال التعليمى اللى حصلت فى السنوات السابقة من اكتر من 15 سنة ، بس يريت حد يحلل اللى حصل ويطلع منه بنتيجة تحسن شوية من الحال المايل يمكن الحال ينعدل ويطلع خرجيين مستواهم عدل يعرفوا ياكلوا عيش فى سوق معدش بيرحم.

بالرغم من قناعتي إن دى حركة نص كم من وزارة التعليم لأن اللى نايم من 15 سنة مينفعش تصحيه بقلم فجأه على وشه ، بس القلم ده لازم يصحي البهوات اللى بيخططوا للمستقبل ويفهمهم ان منظومة التعليم فيها حاجه غلط ولازم تتصصلح.

ده رأيي الشخصي

[se_ Elsyed]

بالرغم من قناعتي إن دى حركة نص كم من وزارة التعليم لأن اللى نايم من 15 سنة مينفعش تصحيه بقلم فجأه على وشه

بس كده .. إنت جبت زتونة الموضوع

ولما نيجي نصحى .. يا نصحى كلنا سوا ... يا نفضل نايمين

يعني مش الطالب بس اللي لازم يصحى

وطبعاً إنت أخويا وحبيبي من ايام الجيزة .. وجلسنا سوياً مع أولياء امور عندهم طلبة في الثانوية العامة .. وجلسنا مع ناس مسئولة في وزارة التعليم - فاكر ؟ - وحكوا لنا على اللي بيحصل ... وإن الطلبة في تانية وتالتة ما بقوش يروحوا المدرسة وبيعتمد إعتماد كُلي وجزئي على الدروس الخصوصية وبيروح يضرب الإمتحانات اخر السنة ..

وبالتالي المدرسين بقوا مرتاحين هما كمان ومفضيين نفسهم للدروس الخصوصية ..

وكيف أن أولياء امور دلوقت إبتدوا ما يهتموش بالدروس الخصوصية ويخلوا الواد يجيب أي مجموع ويدخلوه جامعة خاصة ..

ما هو كده كده هايتخرج ومش هايلاقي شغل !!!

هو في إيه ؟

والبلد دي مالهاش صحاب ؟

وليه الناس اللي بتتكوي بنار التعليم ما بتتكلمش والدروس الخصوصية عمالة تنهش في لحمها ...

وبعدين تكمل عليهم الجامعات الخاصة ..

وبعدين يلاقي إبنه اللي باع له اللي وراه واللي قدامه عشان يبقى صاحب شهادة ... يلاقيه مبروز الشهادة وقاعد يضرب بانجو عالقهوة

وهل تلك الوجوه اللي عماله تتغير وتشكل علينا من عبد الرحيم منصور لفتحي سرور لحسين كامل ليسري الجمل لعبد العزيز الخروف .. هل هؤلاء وش إصلاح أو عندهم نيه للإصلاح أو ما عندهمش وصلة دش من أم 25 ج وبالتالي بيشوفوا إن التعليم في العالم كله حتى في الصومال ماشي بسلاسة وما فيش أي مشاكل ولا إتفكاسات وإرهاصات وإنتحارات وتعقيدات غير عندنا ؟