الورقة اللي محيراني علشان اختم التأشيرة

[midonido]

سلام عليكم

في البداية احب اقول ان المنتدي ده شدني جدا من خلال الردود القيمة للناس اللي فيه فعلا انا حاسس كانكم كلكم اسرة واحدة

آجي لموضوعي واتمني الاقي عندكم الرد انا المفروض طالع اشتغل مع شركة سعودية في الرياض ولكن علي تأشيرة بيزنس لحد مايطلعوا ليه الاقامة وهما مؤخرا بعتوا لي ورقة علي موقع وزارة الخارجية السعودية علي النت موجود فيها رقم التاشيرة وتاريخ اعتمادها والمهنة محاسب والنوع تاشيرة عمل وطلبوا منه اختمها من القنصلية لكن القنصليه قالت انها بتتعامل مع مكاتب لس أفراد ورحت المكاتب قالت لي انها علشان تخلص لي عايزة :

1 - شهادة خبرة من شركتي ( ودي سهلة ان شاء الله )

2- عقد كاتفاق من الشركة السعودية اللي رايح اشتغل معاها ( ودي الورقة اللي محيراني ) محدش عارف ايه صيغتها حتي الشركة السعودية بتقولي قول لنا الصيغة واحنا نعملها ونبعتها لك كل اللي اعرفه عنها انها من الشركة السعودية بتقول اني رايح اعمل شغل معاهم كعميل من طرف شركتي الموجودة هنا في مصر .

اتمني ماكونش طولت عليكم بس بجد الموضوع ده محيرني جداً ومحتاجة اي حد يفيدني فيه واتمني الاقي هنا الرد

شكر مقدما

[madzoro]

:rolleyes:

معلش انت بتقول ان نوع التاشيرة عمل يا ريت تتاكد انها عمل مش زيارة عمل لانها تختلف

عموما لو زيارة عمل ممكن تكتب

السادة / قنصلية المملكة العربية السعودية

نفوض نحن (الشركة السعودية ) المكتب الفلاني( اللي انت هتتعامل معاه عشان يخلصلك التاشيرة من مصر ) بانهاء اجرءات السيد / (اسم حضرتك ) يحمل جواز سفر رقم ....... بموجب تاشيرة زيارة تجارية رقم ...... بتاريخ ...... صادرة من وزارة الخارجية

حيث انه يعمل لدى شركة ( الشركة بتاعتك في مصر ) بجمهورية مصر العربية

و قد تم الاتفاق بيننا (اسم الشركة السعودية ) و بين شركة ( اسم شركتك ) على الاستعانة بخدمات السيد / ( اسم حضرتك )

نرجو من سيادتكم تسهيل الاجرءات و لكم جزيل الشكر

اسم و توقيع المسؤل في الشركة السعودية و يكون توقيعه معتمد من الغرفة التجارية .... و تخليهم يعتمدوا التفويض ده في الغرفة التجارية و يكون على ورق الشركة هناك

( انا الفت صيغة على حسب بعض التعاملات اللي اجريتها في السعودية قبل كده )

هذا و الله اعلم

يا رب اكون افدتك و اذا مشرفنا الكبير سي السيد قرا موضوعك ممكن يفيدك اكتر مني ان شاء الله

بالتوفيق باذن الله

[vipwithyou]

بالفعل كلام الاستاذ مادزورو وافى اذا كانت التأشيرة زيارة عمل وواضح انها كدة فعلا

يبقى فقط ان تقوم الشركة بارسال اصل تلك الورقة لك لتدخل السفارة

شكرا

[midonido]

madzoro basha

قبل كل شيء احب اشكرك جدا علي اهتمامك وعلي ردك القيم فعلاً وهيه فعلا زيارة عمل وهو بصراحة انا رايح اشتغل في الشركة دي لكن هما اقترحوا اني اخرج بالاسلوب ده لحد مايقدروا يدبروا لي ـاشيرة العمل وقالوا ان زيارة العمل دي يقدروا يجددوها لحد 6 شهور ومرة تانية تشكر ياباشا :closedeyes:

[madzoro]

بالتوفيق باذن الله

انا كان ليا زمايل سافرو السعودية بالطريقة دي و الحمدلله هي طريقة مافيهاش قلق

اهم حاجة انها ماطولش عشان لو انت عايز تجيب حد من اهلك او تعمل استقدام لزوجة او ابناء .... او تشتري عربية

ربنا يوفقك

اخوك / مديح

[se_ Elsyed]

تامر ..... وبعدين ؟!!!

أصل التأشيرة مش مطلوب ...ويكفي البرنت أوت اللي بيتبعت بالميل .. لإن المكتب لما بيراجع القنصلية بيلاقي نسخه منه مبعوته من وزارة الخارجية هنا إلى القنصلية في مصر

أما صيغة الإتفاقية اللي المفروض إنها تتبعت من الشركة بالسعودية ومختومة من الغرفة التجارية لحضرتك عشان تاخدها مع باقي الأوراق للمكتب اللي هايخلص فهي كالتالي :

بسم الله الرحمن الرحيم

التاريخ : ------------------

عقد إتفاق[وسط][/وسط]

- اتفقت شركة: -------------------- ( الشركة بالسعودية ) كطرف أول

- عنوانها : المملكة العربية السعودية ، ص ب ----------- الرياض _ رمز بريدي ------------

- مع السادة / شركة ( شركتك اللي في مصر ) كطرف ثانى

- عنوانه --------------------

- على ان تقوم شركة---------------- الطرف الاول ، بالإستعانة بخدمات السيد / ---------------------- ، مصري الجنسية ، جوزا سفر رقم ----------- والذي يعمل بوظيفة ---------------- لدى الطرف الثانى وذلك لمدة -------------- من تاريخ وصوله للمملكة العربية السعودية .

على الآتي :-

- يكون على الطرف الأول تحمُل كافة مصاريف السفر ذهاب وعودة بالطيران للموظف على الدرجة السياحية .

- يتحمل الطرف الأول تكاليف الأقامة خلال فترة الزيارة.

- أن يقوم موظف الطرف الثانى بمتابعة العمل القائم بالشركة . .

- أن يمنح الطرف الأول مكافأة لموظف الطرف الثانى عند نهاية الزيارة.

والله ولي التوفيق ،،،،

المدير العام

[madzoro]

شفت يا سيدي .... مش قولتلك سي السيد اللي هايجبلك المفيد و من الاخر

جزاك الله خير يا سي السيد و بارك فيك

بالتوفيق يا استاذ midonido

[midonido]

سلام عليكم

بصراحة ياجماعة انا مش عارف اشكركم ازاي الف شكر ليكم جميعا