واحنا فايتين ع الحدود

[Handicraft]

ومهما يحصل ... من الواضح اني لسه بحبك يا مصر

[om marawan]

يااااااااه الاغنية دى انا ذكرت فى مداخلة انى باحبها جدا وعمرى مانسيتها من اول ماسمعتها وانا صغيرة

ايوه لسه بنحبها يا سيدى الفاضل برغم كل شىء

حب محفور فى قلوبنا زى التعب ماهو محفور فى وشوش الناس العزاز دى

الوشوش التعبانة دى اهلنا اللى بنحبهم وبنشتاق لهم

وحشتينا يامصر

الاغنية لفريق الاصدقاء من شريط الحدود اللى يمكن كان سنة 1982 او 1981

منى عبد الغنى - حنان - علاء عبد الخالق

للاسف مش عارفة كلمات مين

لكن اكيد لحن عمار الشريعى

ألف شكر ليك يا أستاذى Handicraft على هديتك الجميلة جدا اللى بجد اوجعتنا

[om marawan]

بعد اذن حضرتك كلمات الأغنية

و احنا فايتين ع الحدود

مستمرين في الصعود

اختفى النيل الجميل من تحتنا

والمدن والريف

و أول عمرنا

وابتدا شىء ينجرح جوه الوجود

وابتدينا أسئلة مالهاش ردود

ملنا ع الشباك نخبى دمعة فرت مننا

باصة من الشباك

على البحر البعيد

واحنا رايحين بالامل عالم جديد

كنت فاكرة يا مصر انى تعبت منك

واكتشفت انى محال استغنى عنك

حتى دوشة صوت جيرانى

والزحام وحشونى تانى

بسمة حلوة لطفلة لسه صغيرة

لما كنت اديها حتة سكرة

قبل مانسيبك وحشتينا يا مصر يا امنا

وابتدا شىء ينجرح جوه الوجود

وابتدينا اسئلة مالهاش ردود

كنت باتذكر وانا فى غاية الأسى

لعبنا الكورة فى حوش المدرسة

والشقاوة واحنا لسه صغيرين

والبراءة والصحاب الطيبين

لما سألتنى اللى جنبى انت مصرى دق قلبى

اسم زى السحر رفرف ع المكان

زى نسمة مهفهفة بصوت الادان

أيوه مصريين لاخر كل نقطة فى دمنا

أيوه مصريين لاخر كل نقطة فى دمنا

بين وجوه من تلج

وعيون من ازاز

شوقى زاد للعشرة والناس العزاز

وابتديت اكتب وانا فوق السحاب

ابتديت ياحبيبى فى اول جواب

مصر انتى حتة منى

مش مجرد اسم وطنى

قالوا فاضل نص ساعة ع الوصول

قلت ايه معنى الساعات ولا الفصول

الا فى الارض اللى فيها ذكرياتنا وحبنا

وابتدا شىء ينجرح جوه القلوب

وابتدينا اسئلة مالهاش ردود

ملنا ع الشباك نخبى

دمعة فرت مننا