أستحلفك بالله تشكيلى همك

[houssin abo habaga]

أستحلفك بالله تشكيلى همك

أستحلفك بالله يا أمى

تشكيلى همك ولا يهمك

ولا أنا اللى أشكيلك

عايش همومى وقادر أشيل عنك

أنا ولدك أحكى ولا يهمك

ليكى حق تزعلى منى

طول عمرى أشيلك همى

وطول عمرك شايله الهموم عنى

أنا ولدك أنا همك

أنا مواطن عايش من الباطن

على الهامش

يمكن أكون عايش ومش عايش

بصى جوه الكتاب حتلاقى على اليمين هامش

حتلاقى فيه نقط وكوم عضم جوه الهدوم

بالتكال عايش

يدوب أحصل لقمتى وبالشمال عايش

بطلب من المولى يجبلى حاجه

تهزنى ترجنى

أفوق من نومى

عايز يا أمى أنتفض وأغير أنا يومى

خلاص مليت أنا م السكات

يمكن أكون أتأخرت والقطر فات

لكل يا أمى كل وقت و له ساعات

فيه قطر جاى حا حصله

أول ما عينى تلمحه وليه تشوف

مش هيهمنى

حا أرمى كل شىء أسمه خوف

وأجمع ولادك ملايين ألوف

نكسر حاجز الزمن نهدمه

بدون ما نهرب ولا حتى خوف

زى الجنود أيام ما كانوا ع الحدود

بيستشهدوا علشان أرضنا

أحنا برده حانرجعك وراح نموت

مش حيهمنا

علشانك أنتى يا أمنا

مادام حنحيا كلنا

من غير خضوع

من غير خنوع

من غير ركوع

من غير خوف إن الكلاب تعضنا

ومدام يا أمى

تتحررى

تتنورى

وتعودى تانى يا مصرنا

لينا كلنا

سا عتها

مايهمنيش

عايش ولا مش عايش

على الهامش

ها أكون سعيد ومش حايهمنى

____________________

حسن أرابيسك :unsure: :blush2:

خلص الكلام وحان وقت العمل

تم تعديل 12 مايو 2008 بواسطة houssin abo habaga