إفتي يا شهرزاد

[se_ Elsyed]

إخترت العنوان على اساس السجع بتاع أُغنية " إحكي يا شهرزاد "

وأقصد بالفتوى هنا مش الفتوى الدينية .. ولكن الفتاوى بشكل عام في حياتنا

وقد تكون الفتوى بغير علم اتت من منطلق حُب ..

بس بيبقى حُب زي حُب الدبة اللي بتقتل صاحبها وهي قصدها تهش ذبابه من على وجهه .. بس إيدها كانت تقيله .. وراحت مخليه وشه في قفاه من كُتر الضربة ....

فتقابل بقى نماذج من دي كتير قوي ... قوي .. في الحياه ...

تسأله عن اي حاجه في أي مجال ... يتكسف يقول لأ ... أو مش عارف ... وبالتالي يحاول يتفي لك بأي حاجه .. واهو يا صابت يا خابت ...

ودي مصيبة في حد ذاتها

ومحسوبكو ياما إتعرض لمواقف من دي في حياته

ولسه حاصل لي موقف من إسبوعين طلع من عيني بصراحة ... فحماتي كانت المفروض تيجي بتأشيرة زيارة .. فبعثت الأوراق للمكتب اللي بنتعامل معاه ... يقوم واحد موظف هناك يفتي يقول : لا يجوز .... ومطلوب أصل قسيمة الجواز بتاعتك مع باقي الأوراق .. القنصلية عايزه كده !!!

قلت له يابني دي أول مره اسمع عن حاجة زي كده ... وكل شهر بنعمل عشرات الزيارات .. وما تجيش غير في انا ويحصل كده ؟ ... على العموم تعيش السفارة ورجال السفارة

وروحت باعت الورقة في البريد السريع .. طبعاً دخلت علينا أعياد الفصح ... وشن النسين ... وعيد العاملين ... وكل ده والجواب متعطل في الطريق ... فين وفين قلت لهم طب لحد ما يووصل الجواب .. ما تحاولوا يا جدعان وتدخلوا الورق السفارة ومش هاتخسروا حاجه ... وقد كان والحمد لله .. خرجت التأشيرة وكله تمام قبل القسيمة ما توصل ... ولا كان مطلوب قسيمة ولا دياولو .. ولكنها كانت فتوى غير شرعية من شخص غير مسئول .

أكبر فتوى بقى طلعت من عيني .. كانت في أول عربية أشتريتها وكانت مرسيدس .. وكانت زي الفل ... وحتى بعد ما ماتت .. مازلت احمل لها كل الحب ... وإتجوزت .. قصدي جبت 3 او 4 عربيات بعدها .. لكن مش قادر أنسى حبها ... كان بيحصل مشكلة بسيطة في مروحة الردياتير ... وإنتو عارفين إن مروحة المرسيدس عامله زي مروحة الطيارة كبيرة وصوتها من قوته تحس إن العربية هاتعمل تيك أوف ... المهم كانت المروحة بتعمل إلتماس في لوحة الفيوزات والفيوز بتاعها بيضرب ... فروحت لورشه كبيرة صاحبها مهندس ميكانيكي من احدى الجنسيات العربية ..

فقال لي : بص ... دي مش مشكلة ولا حاجه ... . إنت روح إشتري كبشة فيوزات وتخليها معاك وكل ما يضرب الفيوز تروح مغيره ويا دار ما دخلك شر ... وعمتت كده والعربية كانت كذا مرة هاتولع عشان المروحة بتبطل وخصوصاً كنت في مشوار بمكه والطريق داخل مكه زحمه موت موت موت ... وإذ بالمروحة تقف وفيوزها يضرب ومؤشر الحرارة يقترب من الخط الاحمر والموتور على وشك إنه يتحرق ... فأستطعت إن أدخل في احد الشوارع الجانبية عشان أقعد ادلق عليها ميه واطفي الدنيا اللي هاتولع دي .

الموقف عدى ورجعت الرياض وروحت له ... وإذا بواحد ميكانيكي تركي كان شغال عندهم قبل كده جاي بالصدفة يسلم عليه عشان مسافر أجازة فلقى العربية مفتوحة وبيسأله في إيه .. فقال له على موضوع المروحة ... فقال بسيطة ... ركب لها حاجة إسمها " كتاوت " يعني شي زي المقاومة كده بيشد الكهربا الزيادة ويحولها لأرضي ويا دار ما دخلك شر ...

وإذ بالمفتي ياخدني على جنب ويقولي : الكلام ده غلط ... ولو كان الموضوع موضوع كتكاوت .. كان الألمان نفسهم عملوه .. إيه ؟ إنت هاتشكك في أمبراطورية الرايخ الثالث ...

فقلت له بمنتهى السذاجة : هايل هتلر .... عندك حق ... الألمان عمرهم ما يغلطوا ولا تطلع منهم العيبه ... ( ما هو مهندس والمفروض بيفهم احسن مني )

وأستمر الوضع يمكن شهر .. الفيوز يضرب أنزل أغيره .. الفيوز يغير انزل أضربة .. وإذ يا سادة بلوحة الفيوزات من كتر الحرارة اللي بيعملها الفيوز لما يضرب .. تتاكل خالص لإنها بلاستيك وبقت الفيوزات معلقه عالهوا ..

قلت ما بدهاش أروح لدكتور تاني ... وإذ بالولا الكهربائي يقولي : الموضوع يستلزم تركيب كتاوت بسيطة ولن يستغرق ذلك 5 دقائق .... ورجعت الدنيا بمبي تاني ..

وكان هاين عليه أروح للمفتي أضربه جوز أقلام على وشه عشان ضيعني بفتاويه الغير شرعية ..

[sosa]

يا سلااااااااااااااام .. يللا الحمد لله انها جت سليمة

المشكلة بقى اننا بنواجه ده كتير جدا جدا و في كل مجالات الحياه و دايما بيقابلك اللي بيفتي و مش بس كده .. لا ده بيفتي و بقلب جامد

و انت مفيش قدامك حاجة غير انك تمشي ورا الفتوى ما انت متعرفش وهى احيانا ممكن تيجي من موظف يوديك و يجيبك و يسفرك و يرجعك لانه هيتعب لو بص في ورقة قدامه تحدد له المطلوب منك .. و احيانا من دكتور بيجرب فيك لان باباه كان سياده وكيل او عميد الكليه و كان لازم ابنه يتخرج بإمتياز ( مع ان الباشا كان بيداوم في تجارة و الاسباب كتير ) و العياده موجوده و جاهزة في انتظاره و المرضى بقى ربنا معاهم هو يعني هيقطع نفسه

وممكن من مهندس يفتي فتوى للعمال تتقلب الدنيا على بعضها بعد كده ..و فيها ايه ماهو الراجل بيشغل دماغه و بيجرب هو يعني اللي ابتكروا نظريات الهندسة احسن منه

او من حضرة السباك اللي بيدخل عشان يظبطلك الحنفية اللي بتنقط يقوم يبوظلك الحمام كله و ياخد دم قلبك كمان

او من حضرة المبجل المحترم عامل تصليح التكييف اللي انت بتبقى بتتشوي على درجه حرارة 50 مثلا و هو قاعد يقولك ده عايز غاز

و لا مين و لا مين .. حدث و لا حرج

و لكن تظل الحكمه الشهيرة .............. إفتي يا شهرزاد