الطريق الي الكوشة

[ابتسامة رضا]

نصايح أبلة سوووسة للقضاء علي العنوسة

الحكاية دي شدتني وقلت في عقل بالي يابت يا ابتسامة ليه متوريهاش لاخواتك علشان ياخدو بالهم هم كمان وميقعوش في مطب العنوسة بعد الشر بعد الشر بعد الشر تعالو نلم بعضينا و نشوف أبلة سووسة بتقول ايه اتفضلو ا

وقفت قدام المرايا أشوف نفسي لاقتني مش أنا .. في حاجات كتير أتغيرت .

ولاقيت البشارة اياها طله فوق جبيني زي ما تكون راية المهزوم .. شعراية بيضة خلت قلبي م الخوف يزووم .

كتير بيسالوني انتي ليه مستنية .. اقولهم ده نصيب وانا بخبى دمعة فى عينيه .. وكسرة قلب حزين اتحرم يوم ميلاده من التهنية .. واقولهم لسه ماقابلتش اللي عليه القصد والنية .. اللي هيخطفنى فوق حصانه ويطير بيه .. باتظاهر بالسعادة والاستمتاع بالحرية .. وانا جواية ملانى اليأس والاحساس بالدونية .. لان بصراحة ماحدش سـال فيه.

ياتري العيب فيهم ولا العيب اتخلق فيه .. ولا في حاجه كان لازم اعملها بايديه ؟!

قررت اخلع عباية السلبية .. وانصب محكمة وافتح قضية .. واقتص لنفسى المظلومة ديه .. ياترى انا الجانى ولا المجنى عليه .. فاسمعوا حكايتي وتجربتى وازاى قدرت اجتاز المحنة ديه

( طبعا منقول)

لسة الكلام مخلصش قولو لي رأيكم نكمل ؟ وللا بلاش

[ELSHAMY]

كملى يا شهرزاد....

[~Heba~]

احكى يا شهرزاد

ولاقيت البشارة اياها طله فوق جبيني زي ما تكون راية المهزوم .. شعراية بيضة خلت قلبي م الخوف يزووم .

الحمد لله 3 :wub:

[Nonna]

يجعل كلامنا خفيــــــــــــف عليهم wst::

قوليلي يا اوختي قوليلي

ها ويش سويتي؟!! :wub:

[قائد المدفعيه الهولنديه]

كملى و خلى بالك المدفعيه الهولنديه كلها مهتمه بشؤن المرأه و منظرين موضوعك

[امانى]

كملى يا ابتسامة نحن بانتظارك

امانى

[Nonna]

بالطريقة ده يا ابتسامة

انا هاتأهل على اربعين اتنين و اربعين :lol:

ده انتى لسة ما كتبتيش الطريقة :lol:

و انا ما بدأتش في تنفيذها

يبقى ثمارها تطلع امتى

يا مسهل ياااااااااارب

[ابتسامة رضا]

السلام علينا وعلي عباد الله الصالحين

حضرات الافاضل

الاستاذ ELSHAMY شكرا علي مرورك الكريم ونكمل باذن الله

الاختHeba~ حااااضر هاحكي والتلاتة اياهم ولا كأنك شايفاهم طنشيهم

الاختNonna هقول هقول بس علي مهلك عليا شوية وخللي بالك احنا في أيام

والبيت مشدود علي الاخر اللي في اعدادي واللي في ثانوية عامة

واللي في جامعة يعني مبونش

الاخ قائد المدفعيه الهولنديه خللي المدفعية تستعد وتتمرن كويس علشان الزفة

الاخت امانى حااااااضر حكمل

سامحوني ياجماعة علي التأخير ومتستعجلوش كله جااااااااااي

[ابتسامة رضا]

وتعالو بينا أيها الاخوان المجتمعون في هذا المكان من سالف العصر والاوان نكمل الحدوتة واليكم الجزء الثاني وهو بعنوان

<H3 class="post-title entry-title">زئـردة هانـم وعـم عبـده </H3>

انا بنت زي أي بنت .. علي راي الست دوللي شاهين

ليه اخت واحدة .. بس ان جيتوا للصراحة بميه

وانا والهانم اختي .. اه نسيت اقولكم ان هية الصغيرة .. المهم انا وهي حاجتين ملهومش دعوة ببعض خالص .. وأنا اكبر منها ب 8 سنين

احكيلكوا بقي عن الهانم اختي .. والشهاده لله هي هانم فعلا .. احنا مجرد أشياء اتخلقت ف الدنيا عشان تخدمها وبس

يعني من صغرنا انا ادربت علي اني اكون ست بيت وهي ادربت علي انها تكون ست البيت

طبعا هية لما كانت زئرده مش باينه م الارض انا كنت دخلت المدرسة وماما عودتني منذ ذلك التاريخ علي ان البنت لازم تتحمل مسؤلية البيت...... ايوه امال ؟

فكنت ف الصيف اخضع لتدريبات تنظيف الشقه والتي كانت لطفله بريئه مثلي عباره عن اشغال شاقة

وكان اجباري عليه اقعد اتفرج علي ماما ف المطبخ وهي بتطبخ بقي يا عالم ده اسمو كلام

بدل ما اشوف توم وجيري ولا بوجي وطمطم أو حتي اقرا المغامرين الخمسة والاخ تختخ اتفرج علي امي وهي بتطبخ

وطبعا اياميها مكنتش اسمع عن وثيقة حقوق الطفل

آآآآه لو كنت اعرف مكنتش امي هتفلت من تحت ايدي

المهم انا كنت بخضع لتدريبات الصاعقة دي والزئرده التانية بتكون ملهيه ف لعبة او امي عشان تتخلص منها رمياها قدام التليفزيون وايامها مكنش فيه دش عشان تتفرج علي سبيس تون

اللي بقي كان بيزيد ويغطي إن انا كنت اروق السراير وتيجي زئرده تشد ملايات السرير..

حسبي الله ونعم الوكيل !!

بس الشهادة لله برده كانت من يومها عيله تفرح فبالاضافه لانها وش اذية ومتسيبش حاجه علي حالها ولا ف حالها حتي ان امي كان عندها قط بلغ من العمر ارذله اسمه عم عبده بالذمه والنبي شايفين

امي مسميه القط عم عبده محسساني انها كانت مربية بواب مش قطة

المهم عم عبده ده يا اسيادنا كان احول ومبيشفش وده لتقدم السن وكان لا بيهش ولا بينش لدرجه ان احنا استوطن ف بيتنا عيلة فيران ف الصندرة كانو بيلعبوا حواليه النطه وهو ولا هو هنا

المهم لما اختي كبرت واتنبهت لعم عبده اصبح يا عيني سلوتها

بقي مبيتهناش علي نومه ولا علي قعده كانت بتمسح بيه بلاط الشقة .

كانت تشده من ديله وراسها والف سيف تحميه وعم عبده ياعيني يقنفد اديه ورجليه ويحاول يقاوم ويفضل يقول آآآآآآو أآآآآآآآو وديه باللغة القططي الفصحوي ..

النجدة .. الغوث ! !

المهم ف الاخر عارفين من زهقه عمل ايه

انتحر ..........!!

ايوه والله .. انتحر !! هرب من البيت.... قط بقاله 13 سنه مكنون وف حاله جت الزئرده دي وخلته يطفش وده بمثابه انتحار لانه اصلا مبيشفش وانتو عارفيين بقي قط زي ده ف الشارع ممكن يجراله ايه مع الوعي العالي ف بلدنا للرفق بالحيوان .

نيـآآآآآآآآآآآآوم نيـآآآآآآآآآآآآآآآوم

وديه باللغة القططى الفصحوى تصبحوا علي خير واكملكم بعديــــن

لسة الكلام مخلصش

م ن ق و و و و ل

[Nonna]

استمري :waf:

على مهلك يا فندم

ده فيها ثانوية عامة :aslam:

كااان الله في العون

انا هستنى هنا البوستات مش هحرقها من المدونة :ninja:

[ابتسامة رضا]

استمري wst::

على مهلك يا فندم

ده فيها ثانوية عامة wst::

كااان الله في العون

انا هستنى هنا البوستات مش هحرقها من المدونة :sad:

طيييييييييييييييب يا NONNa لن أنسي لك هذا الموقف وعموما انت حليتيها أدي المدونة http://www.misssosa.blogspot.com/

وهي للآمانة مش بتاعتي وكنت مستأذنة اني أنزل الموضوع عندنا ومادمتي مستعجلة وأنا مشغولة بالامتحانات اتفضلي اقري براحتك بس بشرط

متنسيش تدعيلي انت وكل الاخوة أصلي نسيت أقول لكم ان بنتي في ثانوية عامة وأنا في كلية الحقوق واليومين دول واقفة علي ضوافري وطلعانة عيني ربنا يستر

[النيل حبيبي]

حظك الفيلم الهندي اتحرق

ربنا يوفقكم ياأختي

كتر خيرك في الظروف المتلخبطه وحرق الاعصاب

شدي حيلك مع الاولاد ومع نفسك بعديهم

[Nonna]

ربنا يكرمك يارب ويوفقك ان شاء الله

واللي في ثانوية عامة تترقى يارب و تدخل جامعة واحسن جامعةكمان

و اللي في جامعة تتخرج ان شاء الله

معلشي

بقى سماح النوبة

سيبتك بعافية