البقاء لله .

[crossfield]

بمناسبة الموضوع اللى طرحته شعنونة عن المدافن الفايف ستارز و بجملة حرق الدم ؛ايه لازمة المورستان اللى بيتعمل بعد الواحد مبيموت؟؟؟ قصدى صفحات النعى و صورة المرحوم و معرفش الله يرحمه كان قريب عيلة مين و نسيب عيلة مين و ابن خال بنت عم مرات ابو خالة مش عارفة مين غير كلام النفاق الاستعراضى:دموعنا لن تجف حتى نلتقى؛إلى جنة الخلد ؛نرثيك و بدموع الحسرة نبكيك؛لن أنساك حتى ألقاك …الخ و الله أنا بيصعب عليه الميت اللى أهله بيعملوا الدعاية دى لان لو ركزنا فى الظاهرة دى هنلاقى ان الدافع من وراها لا حزن و لا دياولو الحزين بيتقهر و يزعل و يسلم أمره لله و خلاص لكن عشان يتقلب الموضوع لدعاية بالشكل الاستفزازى ده أهو ده اللى اسمه نفاق و استعراض بجد .أنا شخصياً بحب أتابع صفحة الوفيات دى و بشوف فيها العجب من أسماء لكلمات رثاء لأحجام غير عادية من النعى .أنا أفتكر انى قعدت فترة حوالى أسبوع أو عشر أيام أقرا نعى لشخص واحد لحد محسيت ان المفروض انزله نعى أنا كمان .طيب المدافن و بنقول عشان الناس متتبهدلش بعد متموت والا تتسرق جثثها لكن النعى ده هيفيد الميت بايه؟؟؟؟؟؟ و ان كان ولا بد من هذا النعى ليه ميكونش كلمتين و خلاص من غير من نعمل زى النكتة اللى بتقول كهين ينعى ولده و يصلح ساعات؟؟؟؟ :roll: :roll:ثم ليه دايماً حكاية الشكر

للسيد السلطان

اللى فى كل نعى تقريباً دى؟؟؟؟ معقولة يقرب لكل الناس اللى بتموت دى؟؟؟؟؟ :shock:

[Lancelot]

يا ستي هو مش الناس بتوقف جنب بعض في الأفراح .... و تبعت تهاني و ألف مبروك و مش عارف إيه ..... لازم برضه توقف جنب بعض في التعازي .... و بعدين أهوه باب رزق للجرايد ....

[elbana]

والله عندك حق يا كروسفيلد ، الموضوع ده بيحرق دمي أنا كمان ، النعي في الأهرام هو نوع من الوجاهة ، وكل ما كان كبير ومتبروز كل ما كان دليل وجاهة أكبر ، والأكادة إن الواحد لما يقرأ النعي يلاقي أقارب المرحوم كلهم يا أخي مناصب محترمة ، اللي مستشار واللي لواء شرطة واللي عميد جيش ، وكأن العيلة مافيهاش حد غلبان أو منصبه عادي أو موظف كحيان مثلاً ، هي بالطبع فيها ، بس هؤلاء يتم تناسيهم عمداً عند (رص) النعي .

يعني حتى في النعي الفقير مالوش مكان ..

هييييييييييه دنيييييييا ....

فكرتوني بفيلم السقا مات ، كان فيه برضه كلام كتير عن المواضيع دي ...

ويا عم لانسلوت النعي مش وقوف جنب أهل الميت ولا مؤازرة ، لأن النعي في الأغلب بتنشره عيلة الميت نفسها ، وأنا ايف إن لو يطلعوا مبلغ النعي صدقة مثلاً يمكن تكون أحسن لهم .

في المكان اللي باشتغل فيه ، توفي أحد العاملين ، ولقيت زملاءنا بيجمعوا مبلغ علشان برضه يعملوا له نعي ، والمبلغ اللي ح يتجمع ما كانش قليل ، فأصريت إنه يسلم لزوجته تعمل بيه اللي هي عايزاه ويساعدها في المصاريف بدل ما نروح نتفشخر ونعمل بيه نعي والست تلاقيها حالتها كرب خصوصاً إن زوجها كان مرتبه على قده ، وطبعاً كان النعي ح ينزل بافتتاحية بتقول إن سعادة المدير العام والعاملين بالمكان الفلاني ينعون زميلهم ، يعني لازم سعادة المدير العام والوكيل والنائب يتصدروا القائمة حتى في النعي .

دي حاجة تزهق :twisted:

[شيكو المصري]

النعي الغرض منة فقط الاشهار و اعلام الناس بخبر وفاة الشخص و هنا لااعتراض علية

اما لو كان الغرض منة مجاملات فقط و كلام فاضي من دة :? فلا داعي من صرف هذة المبالغ على هذة الامور و التصدق بهذة المبالغ على روح المرحوم افضل طبعا .

تالت حاجة انا عن نفسي عمري ما قريت الوفيات فلو حد مات و عايزين يعرفوني انة مات لن يكون عن طريق الجرايد طبعا . و الافضل للمتوفي اخباري شخصيا قبل ذهابة للوفاة .

[Cleo]

ألذ حاجة النعى اللى بيتعمل نفاق للشخصيات الكبيرة فى البلد. تبص تلاقى النعى من دول واخد بسم الله ماشاء الله مساااااااااحة فى الصفحة، و بالبنط العريض و شريط أسود على الجنب :

شركة عبد السمع اللميع

تتقدم بخالص العزاء

للسيد الأستاذ الدكتور اللواء/ عبد ربه عبد الموجود

وزير النفاق و التخاذل الدولى

فى وفاة السيدة الفاضلة

خالة حرم سيادته

أسكنها الله فسيح جناته و ألهم أسرتها الصبر و السلوان

:shock: :shock: :shock: :shock: :shock: :shock:

[Salwa]

زمان كان فيه مثل بيقول....

لما مات كلب المدير....كل ألناس راحت تعزى.

ولما مات ألمدير........مفيش كلب راح يعزى.

دنيا غرورة.

كل ده تهريج...ومنظرة ملهاش لازمة...هو حفل تعارف؟

صدقة جارية...هو ده ألصح....ألمبالغ دى مفروض يتعمل بيها حاجة

للناس ألغلابة ...حاجة ثابتة...

مش حنفيات صدقة...وجوامع تحت كل بيت ...وبس.

لا..لا..لا..

فى نفس جامع الحى ممكن عمل جزء لاعطاء دروس خصوصية لأبناء

ألحى...ممكن فتح مشغل للبنات...ممكن فتح مدارس وورش لتعليم

النجارة والسباكة والكهرباء..لايجاد فرص عمل.

ممكن حاجات كتير ..لكن ...حتى ألنفاق واهدار ألمال...وصل لقدسية

الموت؟

ان لله وان اليه راجعون.

سلامى.

[White heart]

و بعدين أهوه باب رزق للجرايد ....

كنت هاقولها...... :D :lol: :lol:

[White heart]

زمان كان فيه مثل بيقول....

لما مات كلب المدير....كل ألناس راحت تعزى.

ولما مات ألمدير........مفيش كلب راح يعزى.

:D  :lol:  :lol: 

دنيا غرورة.

كل ده تهريج...ومنظرة ملهاش لازمة...هو حفل تعارف؟

صدقة جارية...هو ده ألصح....ألمبالغ دى مفروض  يتعمل بيها حاجة

للناس ألغلابة ...حاجة ثابتة...

مش حنفيات صدقة...وجوامع تحت كل بيت ...وبس.

لا..لا..لا..

فى نفس جامع الحى ممكن عمل جزء لاعطاء دروس خصوصية لأبناء

ألحى...ممكن فتح مشغل للبنات...ممكن فتح مدارس وورش لتعليم

النجارة والسباكة والكهرباء..لايجاد فرص عمل.

ممكن حاجات كتير ..لكن ...حتى ألنفاق واهدار ألمال...وصل لقدسية

الموت؟

ان لله وان اليه راجعون.

سلامى.

أتفق معك تماما يا عزيزتى،

هذا هو الكلام المنطقى، المفيد فعلا للأخرين...

شكرا لك.

[الطفشان]

صدقة جارية...هو ده ألصح....ألمبالغ دى مفروض  يتعمل بيها حاجة

للناس ألغلابة ...حاجة ثابتة...

مش حنفيات صدقة...وجوامع تحت كل بيت ...وبس.

لا..لا..لا..

فى نفس جامع الحى ممكن عمل جزء لاعطاء دروس خصوصية لأبناء

ألحى...ممكن فتح مشغل للبنات...ممكن فتح مدارس وورش لتعليم

النجارة والسباكة والكهرباء..لايجاد فرص عمل.

كل كلامك صخ يا أخت سلوى

و ياريت الناس تفهم ان احسن حاجة هي مدى النفع للناس

و ليس العبادات التي تخص الشخص فقط (حج، عمرة، صلاة) بدون ان يمتد اثر ذلك الى محيط الفرد و المجتمع

[Proud Muslim]

كلام الأخت Salwa لا غبار عليه .. جزاكي الله خيرا ..

للأسف إنتشرت الأنانية الدينية .. هذا ما أدعوها ..

ينفق الشخص 40000 ألف جنيه في الحج كل عام ..

لماذا ؟؟

و لو أنه لأخرج نفس المبلغ أو نصفة كصدقة ( و ليس كزكاة ) .. فلن يكون هذا حالنا .. و ساعتها ليذهب يحج كل عام ..

لا أدعو أبدا لسن قوانين لذلك ..

و لكن أدعو لأن يكون الأمر فرديا و مبعثه هو مسؤولية كل شخص ..

فالكل يعرف واجبه تجاه أمته ..

و للأسف أصبح الهم هما فرديا ..

المسجد ليس مكان عبادة و خلاص ..

المسجد يجب أن يكون مؤسسة متكاملة بمعنى الكلمة ..

كل شيء يجب أن يكون فيه ..

سياسة ..دين و دعوة .. تعليم ..صحة .. ترفيه ..

لا أدعو لأن يكون مقر الحكم هو المسجد ليس لأنه لا يصلح .. و لكن لأن مقر الحكم أصبح له متطلبات أخرى ..

نريد من المسجد أن يصبح هو المركز الذي تدور حوله الأشخاص ..

و ليس مسجد للدراويش ..

لم يكن هذا دور المسجد يوما في عصر الرسول صلى الله عليه و سلم .. و ما تبعه في عصور الخلافة الراشدة .

تنفق الأموال على الأعراس .. و المآتم بنفس القدر .. لماذا ؟؟

لماذا تذهب هذه الأموال التي لا طائل لها أدراج الرياح فيما لا ينفع ؟؟

نعي يأخذ نصف صفحة و أحيانا صفحة كاملة ؟؟

أصلا النعي على ما أعلم أنه لا يجوز شرعا .. فنهى الرسول الكريم عنه ..

فما بالنا بمن ينشر نصف صفحة من أجل الأربعين او الذكرى السنوية .. التي هي من البدع أصلا !!

و لا يجدون من يقول لهم ..ما هذا السفه !!

إلى هذه الدرجة وصل بنا الحال من الجاهلية و التفاخر حتى بموتانا ؟؟

حتى يقرأ القاريء خبر الوفاة و أقارب المتوفى ..فيعرف أنه من عائلة .. و يتعمد من يكتبون النعي أن يضيفوا من له علاقة و من ليس له علاقة لمجرد أنه يتولى منصب هام .. و يبقى من العائلة !!

و عندما سألت عن سبب هذا النعي ..يقول لي أحدهم ..

علشان الناس تعرف أن فلان مات .. و أن العزاء واجب !!

كلام لا يصدقه إلا الأطفال ..

العزاء واجب نعم .. و لكن أيجب أن يكون هناك نعي منشور !!

و كأنه لا توجد طريقة لمعرفة المتوفى إلا من خلال هذا الإعلان !!

سبحان الله ..

بل و يذهب البعض الى نشر تعازيه ردا على النعي .. من باب إحنا كمان نعرف الواجب و الأصول .. ما فائدة هذه الفشخرة !!

أضرب كف على كف من هذه التفاهة و هذا السفه ..

و يقول المرحوم فلان !!

هل جزمت له بالرحمة أيضا !!

لا حول و لا قوة إلا بالله ..

[crossfield]

برضو محدش رد على سؤالى ايه علاقة السيد السلطان بالنعى؟؟؟؟؟؟؟؟؟؟؟؟؟؟هوه ده كمان هينصص فيه؟ :roll: أوووووووووووووف

[بنت شعنونة]

طب النعي وامره هين

اهو في حالة على الأقل

انما تقووووولووووو اييييييييه في الصوووووووووووان :twisted: :?: :?: :twisted: :twisted: :twisted: :twisted:

تلاقي صوااااااااان اااااااااااد كداااااااااااا

والشارع يتقف وتقعدي تلفي من مليووووووون شارع عشان توصلي بيتك

ولما تولي تلاقي الصووووووووووت استغفففففففر الله

يطرش الأطرش تااااااااني :twisted: :twisted:

وتبصي جوا الصوان تلاقييييييييه فاااااااااضييييييييييي!!!!!!!!!

لا واشي انوااااااار

واشي صورة الكعبة

واشي قهوة ومية

وشوية وتلاقي زفة حصب الله :twisted: :twisted: :twisted:

مش ممكن

بيكون ازعاج ما بعده ازعاااااااااااج يعني :? :?

[kokowawa1979]

أتفق مع جميع الإخوة الذين قالوا إن النعي الآن في صورته الحالية أصبح أحد أشكال الوجاهة الاجتماعية ومن المؤسف أن عظة الموت فقدت معناها فى صور ومظاهر النعي الحالية

أتذكر في وقت من الأوقات كان فرح شقيقتي الكبرى قد تقرر له وقت معين وقبل الموعد المحدد بأسبوع توفي أحد الجيران فما كان من الوالد ووالد العريس إلا أن أصروا على تأجيل حفل الزفاف إلى مابعد الأربعين الخاص بالجار حتى لانؤذي مشاعر الجيران وفي نفس الوقت كان الحفل في هدوء تام بدون صخب .

وتعالوا نشوف ماذا يحدث الآن كما قالت الأخت شعنونة :

وتبصي جوا الصوان تلاقييييييييه فاااااااااضييييييييييي!!!!!!!!! 

لا واشي انوااااااار 

واشي صورة الكعبة 

واشي قهوة ومية 

وشوية وتلاقي زفة حصب الله

طبعا موسيقى حسب الله تطورت الآن إلى الدي جي تبص تلاقي سرادق العزاء شغال والمقرئ بيقرا القرآن الكريم وبجوار السرادق شلة شباب صيع من الخنافس عاملين فرقة قال إيه علشان الحنة وهات يارقص خليع وشغل تجرمة وقلة أدب ومافيش حتى احترام لسماع القرآن الكريم :twisted: :twisted: :twisted:

حاجات كتير اتغيرت في المجتمع وصعب بيتهيألي يرجع الزمن الجميل اللي كان الكل يخاف على شعور التاني

حاجة تانية بنلاحظها في أثناء عمليات الدفن من مظاهر الإنفعال الإرادي يعني شغل تمثيل تلاقي واحدة كانت منكدة على جوزها في عيشته لحد مايمكن مات بالضغط منها تقف عند المقابر وتصرخ بأعلى صوتها أثناء الدفن : ياسبعي ... ياجملي .... ياللي كان نفسك في اللحمة قبل ماتموت ياخويا ... اتخطفت ( مع العلم بأنها هي اللي كانت خاطفة حياته كلها ) حتى أنه في يوم قالت إحداهن عند الدفن : ماتسيبونيش لوحدي خدوني معاه فاستفز ذلك أحد المشيعين فأصر على دفعها دفعا للدخول إلى القبر حتى لايحرمها من هذه الرغبة هنا سكنت المناحة ونظرت إلى الأرض في كسوف

صدقوني الحادثة دي حصلت قدامي

[وسام]

حتى الان شغلانة الست المولولة لسا موجودة فى المناطق الشعبية !!!!! ولو زودت المعلوم يرتفع الصراخ و العويل اكثر و اكثر وكمان مع وجود الفرقة الماسية المصاحبة ممكن توصل لشق الهدوم

كل دهه و هم ميعرفوش خلقة المرحوم ايه اصلا :lol:

[shoshka]

بالنسبة للصيوان .. حد ممكن يقوللي ليه فيه ناس بتصور العزا فيديو ؟؟؟؟

يعني انا ممكن أفهم ان حد يحب يتفرج على فرحه تاني .. بس العزا ؟؟ يصعب على أمثالي فهم ذلك ....

[Cleo]

بالنسبة للصيوان .. حد ممكن يقوللي ليه فيه ناس بتصور العزا فيديو ؟؟؟؟

يعني انا ممكن أفهم ان حد يحب يتفرج على فرحه تاني .. بس العزا ؟؟  يصعب على أمثالي فهم ذلك ....

أعرف عائلات بتحتفظ عندها بسجلات تكتب فيها مين اللى "جامل" فى "المناسبة" دى و جامل بإيه.... يعنى فلان جه بنفسه... فلان بعت تلغراف.... علان نزل نعى فى الجرنان بنط كذا.... و لما حد من المعارف تحصلله حاجة يرجعوا تانى للسجلات و يشوفوا هو كان عملهم إيع يعملوا زيه.... أما لو كان "مجاملش" يبقى من المغضوب عليهم و الضااااااااااااالين..... :twisted: :twisted:

[Salwa]

شوفى ياكليو....هنا فيه سجلات...أو دفاتر..موجودة فى مكان العزاء علشان كل اللى يروح يعزى يكتب اسمه أو كلمة..لكن حكاية الفيديو

دى بصراحة..جديدة علية...يتفرجوا على ايه؟

ده تجديد للأحزان.

بصراحة بصراحة...فيه حاجات كتير استجدت على المجتمع المصرى

تجعلنى أقف مذهولة...ولاأجد لكل هذا تفسير ...سوى....

الآن..الصغار..هم القادة...وماذا يفعل الصغار؟...يهرجون..يلعبون...

يعيشون اللحظة...مفيش مسئولية...وأخيرا.

الكبار...كالعادة...يسامحوا.

يتغاضوا.

ويتمادى الصغار....على اساس ان التغاضى.....موافقه.

ولسة ياما حانشوف ونسمع.

سلامى.

[وسام]

بالنسبة للصيوان .. حد ممكن يقوللي ليه فيه ناس بتصور العزا فيديو ؟؟؟؟ 

يعني انا ممكن أفهم ان حد يحب يتفرج على فرحه تاني .. بس العزا ؟؟ يصعب على أمثالي فهم ذلك ....

دى حصلت قدامى و كانت الحجة ان احنا فى غربة و عايزين نثبت لاقارب المتوفى فى مصر ان العزا اتعمل على احسن ما يكون و محدش قصصر معاه فى حاجة.......ماكنتش عايز اقول لكن و صل الامر لدرجة تصوير المتوفى نفسه :? :shock: :shock: ...الكلام دهه اتعمل قدامى

[ابو يوسف]

واشي قهوة ومية

:?

يا اخت شعنونة .... زمان - مش زمان قوى - كان بيتقدم فى الصوان قهوة سادة و ميه ... و ماحدش كان بيشرب قهوة ... يقعد الراجل يلف بيها و ماحدش يمد ايده لغاية ما تبرد ...

دلوقتى الوضع اختلف ... اصبح ممكن الواحد يطلب قهوة زيادة او مظبوط ... او زى ما يحب ...

و ممكن يطلب شاى كمان ... و ده بجد مش هزار .. و شفته انا اكثر من مرة :? :?

اعتقد انه قدام شوية ح تلاقى فخفخينا ... وشيشة تفاح :oops: :oops:

و تلاقى صاحب الميت ماشى وسط الناس و وبيقول الطلبات دى عندى :oops: :oops: :oops:

و تلاقى الولد بتاع الولعة ماشى وسط المعزيين و وبيقول ولعععععععععععععة ....... وحدوووووووووووووووووووووووه :lol:

[kokowawa1979]

شاكوش كتب :

بالنسبة للصيوان .. حد ممكن يقوللي ليه فيه ناس بتصور العزا فيديو ؟؟؟؟ 

يعني انا ممكن أفهم ان حد يحب يتفرج على فرحه تاني .. بس العزا ؟؟ يصعب على أمثالي فهم ذلك ....

شوف ياعم شاكوش تصوير العزا بالفيديو ده استكمال لأصول الوجاهة مثل عزيز بيه الأليت :) :) :)

وكما قلت سابقا في إحدى مداخلاتي في موضوع المقبرة أم39000 جنيه أن بعض العائلات المريضة بالوجاهة ( لإن الوجاهة دي مرض والعياذ بالله) أنا باعتبره نقص في العائلات أصلا ولقد قلت في مداخلتي أن بعض العائلات تستأجر عادل إمام وبعض الوزراء بالساعة هذا مايحدث فعلا ويتم تصوير عادل افندي زعيم الهجس وهو يؤدي العزاء في المرحوم ومفيش مانع يطلع واحد من المعزين نفسه يتصور مع عادل إمام يتصور ويدفع قرشين لزوم شراء شريط الفيديو اللي اتصور فيه مع عادل إمام ويبقى كده أهل الميت جابوا أجر عادل إمام وزيادة :o :o :D

لكن خراب الديار بصحيح ييجي لما يتم تأجير وزير زي كمال الشاذلي وده لامؤاخذة بيشتغل بالوصلة زي دينا ماحدش بيقبل يبص في خلقته في العزا وبالتالي يقف بالخسارة على أهل الميت مع العلم بأن عادل إمام يروخ العزا وهو مش عارف هايعزي في مين بالضبط :D :D :lol:لكن اللي اعرفه دلوقت إن عادل إمام بيشترط يكون ابنه رامي هو مخرج فيلم العزا واللي يقدم القهوة بعض الفتيات الروشه اللي بتمثل معاه ككومبارس

وألف ورحمة ونور تنزل على المرحوم اللي هايتحاسب على المال اللى بيتصرف في العزا وكان جايبه منين

واللي معاه قرش محيره يجيب حمام ويطيره :lol: :lol: :lol: :lol: